Things I Like To Whisper About

Would You Hear Me Whispering

ام كامل الكرد




امبارح بعد ما روحت من الشغل واول ما وصلت البيت اتصلت فيي بنت خالي بتحكيلي ان في اليوم درس بدها تعطيه وحده جاي من القدس ببيت المحاضره اللي باخد عندها دروس فقه كل يوم اثنين, انا بصراحه كنت تعبانه بس حكيت يلاا بنام وبروح لاني بحب اسمع اخبار اهلنا بفلسطين واكيد بتكون غير بس تنحكى من الناس العايشين هناك.

رحت والحمد لله اني رحت, اللي جاي اسمها ام كامل, انا ما عرفتها بالبدايه و بالصدفه اجت قعدتي جنبها, حكت معي وتعرفت علي و سألتني من وين و شو دراسه وشو بشتغل, عاده ما بحب اللي بسالني هالاسئله من اول جلسه بس ما بعرف ارتحتلها وكنت اجاوب وانا كتير مبسوطه.

بدا الدرس, طلع الموضوع مش درس, طلعت ام كامل جاي تحكيلنا عن وضعها و وضع كتير ناس زيها بالقدس, بدت القصه من 1999 , وصارت تحكيلنا عن معاناتها هي و زوجها و اولادها, القصه طويله مختصرها ان بيت ام كامل من اقرب البيوت للمسجد الاقصى, واليهود بدهم اياها تطلع من البيت باي طريقه, وفعلا اخدو جزء من البيت و سكنوه مستوطنين يهود, اللي حاربوها واذوها هي وعيلتها نفسيا و جسديا, وكان دايما ايمانها بالله هو اللي مقويها و مخليها تصبر.

وبعد عده محاولات ما قدرو يطردوها من البيت ,عرضو عليها فلوس علشان تترك البيت وما رضيت, بيوم من الايام هجمو عليها اليهود بنص الليل,كانت هي وزوجها المقعد لحالهم بالبيت لانهم طلعّو قرار بتغريمها اذا حد من ولادها ضلو عندها بالليل, ربطوها ورموها بره البيت, و ضلت من الساعه 12 بالليل للساعه 10 الصبح وهي مربطه و الجنود حواليها لحتى فضو البيت من كل اشي فيه , و سكرو الابواب وهي مش عارفه شو عملو مع زوجها, بعد ما فكوها لقت زوجها عند الجيران رموه اليهود قدام الباب لانه ما بقدر يمشي, وبتحكي وحده من الجارات انها سمعت زي صوت شخير, طلعت ولقته واقع و نادت جاره تانيه و حملوه لبيتها و بعتت تجيب دكتور بعد ما حاولت تتصل بالمستشفى و حكولها ان الجنود مانعين سياره الاسعاف تدخل المنطقه, وطلع زوجها انصاب بجلطه.

ام كامل اخدت زوجها عالمسشتفى وبعد فتره انصاب بجلطه تانيه, وبعد فتره انصاب بجلطه ثالثه واللي اتوفى على اثرها, قررت ام كامل تعمل اشي, راحت قدام بيتها و نصبت خيمه وقعدت فيها , هالحكي في بدايه 2009 و لليوم هي مقيمه بهالخيمه رغم ان الجنود هدوها 5 مرات.

و هي بتحكيلنا القصه اتصل فيها راديو البلد و عمل معها مقابله عالتلفون,اول ما وصلت البيت عملت بحث على النت عن ام كامل, طلع في مقالات كتيره عنها وعن تكريمها من عده مواقع وجمعيات, وبالصور مليان صور الها بخيمتها, كتير انقهرت اني ما بعرف عنها....مع اني متابعه للصحف بس لقيت اكتر من مقال عنها عمري ما قرأتهم, واكتر من شخص شفته من امبارح لليوم اسأله عن ام كامل برضه ما يكون سامع عنها, مع انها حكتلنا ان كتير ناس كانو يجو عندها عالخيمه, اجانب وعرب وناس من حقوق الانسان , وحكتلنا ان في ايام يجتمعو عندها بالخيمه مسلمين ومسيحيين ويهود, وانهم كلهم ايد وحده ضد الظلم, عجبتني جمله حكتها ام كامل, بما معناه ان انا ما بهمني شو ديانتك ولا بكرهك لديانتك, لان ديني بحكيلي اني لازم اؤمن بكل الديانات وكل الانبياء, وان لا اكراه بالدين, اللي بكرهو هو اللي بأذيني وباخد حقي ايش ما تكون ديانته.

هي القصه كامله لام كامل لقيتها منشوره بجريده الدستور

واللي بدو يعرف تفاصيل اكتر هي هون مجموعه مقالات واخبار























عم لملم حناني

للي بدهم ينامو هلأ - زيي يعني- بحكيلهم
تصبحو على خير واحلام سعيده و ان شاء الله يكون يومكم كان سعيد و يكون بكره احلى من اليوم
Nighty Night :D






وللي هلأ صحي بحكيله
الله يسعد صباحك و كل اوقاتك
و نهار سعيد علينا كلنا
و مهما صار ما تزعلو لان اليوم الخميييييييييييييييييييس
مش مهم شو يصير اليوم المهم انه اليوم الخميس وبكره عطله وبعده عطله :)
yeeeeeeeeeeehhhhhoooooooo







خليني اتركم مع اغنيه بحبها كتير لعازار حبيب اللي بحب كل اغانيه
وتصبحو على خييييييييييييييير





نتائج التوجيهي



اول شي بتمنى للجميع النجاح في كل صباح - زي ما كنا نكتب بالتاني ب على الكتاب :)
وبما ان النتائج المسا فبتمنى للجميع الحساء في كل مساء -ما اله دخل بعرف بس مش لاقيه كلمه مناسبه شو اعمل!!!

السيناريو الطبيعي لاحداث اليوم

المفروض النتائج بتطلع عالساعه 6 عال 4 ببدو العالم يزمرو, انهم واصلين والهم ناسهم اللي بجيبولهم الاخبار قبل ما تنزل عالسوق.
بتطلع النتائج وببدا الطخ,عند الناجحين وعند الراسبين , وطبعا في عده انواع للطخ, نبدا بالناجحين

الطخ الفشك اللي بالسما عند الناجحين, والموجود بعمان الشرقيه والغربيه و الوسط واي مكان بدك اياه, الطخ طخ مع اختلاف نوع المسدس ولبس الطاخخ - كل ما اسمع الصوت بتزكر دعايه كانو يجيبوها عن مديريه الامن العام, بيجي شب وبكون كتفه ملفوف و بحكي "كنت قاعد بالحوش و فجأه ما حسيت غير اشي سخن على كتفي ويلا الدم بنفر نفر", فانا كل ما اسمع صوت الطخ بحكي لاهلي "كنت قاعد بالحوش" وببعد عن اي شباك بالبيت :$

وفي طخ الالعاب الناريه اللي كنا من عيد استقلال لعيد استقلال لنشوفه ونطلع كل الاردن عالسطوح علشان نشوفها,صار بسبب وغير سبب هلأ.

وفي طخ العين اللي راح تضرب الناجحين , مع كلمه مبروك بنطخ الشب او الصبيه عين بتطرحه ارضا لمده اسبوع.

وطبعا الكلمه الشهيره عند الاب " ابني" ..."بنتي"..."تربايتي"

نيجي للراسبين, الراسبين نوعين

اللي بعترفو اهاليهم بانهم راسبين, وبرضه في طخ بس بنص راسه هالمره.


و برضه في طخ الحكي, ولك يا هامل طول نهارك عالاساطيح ,ولك يا صايع ولا مسكت كتاب خلي صحابك الصيع ينفعوك, ولك فضحتينا طول نهارك من مسلسل تركي لمسلسل تركي تاني, و كل ما اتصل حد من العيله ويحكولو الاخبار المشؤومه ببدا الموشح من اول وجديد, و الكلمه اللي راح تتكرر بكل بيت من الاب للام "شايفه ابنك" ..."شايفك بنتك و تربايتك".... وبصير ولادها لحالها ساعتها.


واللي ما بعترفو بان ابنهم راسب و بطخو, و بوزعو حلو واحتفالات والمشكله ان الشب بعيش الدور و بصير يرقص و ينادي صحابه
صاحبتنا بتحكيلنا ان ابن خالها السنه الماضيه نجح و عمل حفله كبيره وعزومو كل العيله و بس صار تقديم للجامعات حكو انهم قدمولو و ما طلعلو وبدهم يسجلوه بجامعه خاصه, صاحبتي بتحكيلي كنا ندور عالنت عاسماء الناجحين فخطرلنا نشوف معدلاته, طلع الشب راسب :)


اذا اليوم حضرو حالكم, اصوات زوامير وسيارات طالين الصبايا من الشبابيك وبصرخو و الشباب فرحانه من كل قلبها مش لنجاحهم الشخصي ابدا, فرحانين بفرحه الصبايا,واللي عنده حد ناجح توجيهي واللي ما عندو طالع بالسيارات وهات يا زوامير, نوع من انواع المشاركه الوجدانيه يعني.
اصوات الالعاب الناريه - النوريه- و اصوات اطلاق العيارات الناريه- بديش استخدم كلمه الطخ للمره المليون- .

مره تانيه مبروك للناجحين وحظا اوفر في السنوات القادمه للراسبين.

شعب خبّور



مش ملاحظين ان 3 ارباع ونص الشعب ,ما شاء الله خبيرين باي اشي بتناقشي فيه, يعني ماشاء الله ما شاء الله خبره شامله ساحقه ماحقه لكل اشي.

خلينا نحكي بابسط اشي, سايقه بالشارع مش عارفه عنوان اشي و تسألي حد عن العنوان, اكيد لايمكن يحكيلك ما بعرف, ولو عيييييييييب شو ما بعرف هاي ,بصير يتطّلع يمين وشمال و يمين وشمال و يكرر اسم الموقع اللي سألتيه عنه ويفرك بذأنه, بعدين بعطيكي وصف متاهه, بحكيلك بتلفي وبترجعي بالشارع و بتروحي يمين بعدين شمال بتلاقي جامع بتتركيه و مش اول دخله ولا تاني دخله ثالث دخله بتتركيها وبتضلك ماشيه ,بتلاقي اشاره بعدها ب 10 م بالزبط بتلاقي سوبرماركت بتنزلي وبتسأليه الا ما يكون بعرف.... وطبعا بكون الشارع اللي انت فيه اساسا ون واي وما بتقدري ترجعي فيه :$....من نفسي اسأل حد عن اشي ويدلني صح, ومن نفسي اكتر اني اسأل حد ويحكيلي ما بعرف.


بتكوني تعبانه مريضه مفلوزه, ما شاء الله كل اللي حواليكي بقلبو دكاتره, لا هاد فيروس,لا هاد ارتفاع بالضغط اشربي مي وكلي ملبسه, لاااا هاجد انخفاض بالضغط كلي اشي مالح,لا لا هاد تحسس مش اكتر, خدي بندول, خدي مضاد حيوي, لا تاخدي هاد النوع مش قوي خدي 500,لااا 500 قليل خدي 1000 وحبه معده لانه قوي, ولا دوا ولا اشي انت بس نامي و حطي عراسك بشكير مليان زيت و حطي رجليكي بمي وليمون, دهني حلقك عسل, كلي معلقتين طحينه عالريق.....وهات يا وصفات وخزعبلات والكل بقلب يا دكتور يا عطار يا مؤلف كتاب التداوي بالاعشاب.


بتكوني بجلسه بحكو فيها سياسه, بكونو قبل بيوم بالصدفه شايفين كم من منظر عالجزيره و بناءا عليه ببنو قصه كامله متكامله للاحداث وبصيرو ولا اعظم محلل سياسي, وكل ما اجا حد جديد عالجلسه بتلاقي في كلام جديد تأليف لحظي - ما شاء الله ابداع من جميعه - و ببدا النقاش و الاحتداد والاحتدام.
حتى لو كان موضوع النقاش ان في جنوب شرق افريقيا بال 1900 لما تزوج ابن شاكازولو بنت كينتاكونتي دفع مهر غنمتين وبقره ويلا بقرتين وغنمه!!!! بتلاقيهم بفتو وبحكو و بحلفولك ميت يمين انهم قرأو عن الموضوع, وبصير يدافع عن شرف عيلة كينتا كونتي كأنه ابن عم ابوه اللزم وانت جاي بحد من طرف الوالد....

يعني طب...سياسه...ادب...فن...رياضه...جغرافيا...جيولوجيا....
ايش ما بدك اي واحد عنا بكون خبير بكل هالامور, و0000000,000000000009% ممكن تحكيلك بصراحه ما بعرف, اللي بتحكيلي هيك بكون نفسي اقوم ابوسها لانها فادتني اكتر بكتير من اللي قعدت نص ساعه تأشر وتشبر و تحكي حكي مش مفهوم ومش منطقي و ضيعت وقتي وحرقت اعصابي وكله عالفاضي , وبس علشان ما تحكي "ما بعرف"...

بلاش سوسو...خد ناديا

في يوم من كل اسبوع بروح انا و2 من بنات خالتي اللي بنفس عمري بحضر درس دين عند محاضره رائعه و كتير بحبها - ما بدي احكي اسمها علشان ما حد يعرف القصه اللي بدي احكيها عن مين, بهيك مواقف سبحان الله الدنيا بتصير كتييييييييييييييييييييير صغيره- المهم في مجموعه من الصبايا اللي اكبر منا واللي اصغر منا بحضرو الدروس وفي خالتو كبيره سوريه بتحضر معنا.

الخالتو هاي بتضلها تقطّع المحاضره وتناقشها ببديهيات وبأمور مكتوبه صريحه بكتاب الفقه اللي بندرس فيه, بس علشان تحكي و ينسمع صوتها, والمحاضره ما بتدايق منها بحكم انها كبيره بالعمر و بتتركها تحكي اللي بدها اياه و بتحاول تفهمها و توصللها المعلومه باحسن طريقه و بوجه مبتسم.

عاده انا وبنات خالتي بنقعد جنب بعض بالدرس واجت قعده الخالتو جنب وحده من بنات خالتي, سمعتها بتطلب من بنت خالتي تلفون البيت ال عجبتيني و بدي ادل عليكي هالعريس, بنت خالتي انحرجت, وما عرفت شو تعمل, اصرّت الخالتو قامت بنت خالتي كتبت الرقم على ورقه و اعطتها اياها.

و احنا مروحين, سألت الخالتو بنت خالتي - اللي اعطتها التلفون- عن طريقنا بالترويحه علشان نوصلها لاقرب مكان يكون قريب لبيت بنتها, حكتلها بنت خالتي انها تسألني انا لاني انا اللي بسوق السياره وانا بعرف الطريق, وبعد ما عرفت عنوان بيت بنتها, تبين انه عالشارع المقابل لبيتنا .

و بالطريق كنت انا بسوق, والخالتو جنبي, وبنات خالتي التنين ورا, وضلت تسأل عن عناوين بيوتنا حكينالها ان انا وبنات خالتي تقريبا جيران, وبين بيوتنا يا دوب 5 دقايق بالسياره, و انا بسوق شايفتها بتطلع علي من فوق لتحت و بتعاين و بتدقق, انا بهيك حاله بحب ابين للي بعمل هيك اني انا شايفته, سألتها في اشي خالتو, بتحكيلي انتي ساكنه مع اهلك - يعني مش متزوجه بمعنى تاني - حكيتلها اه , لفت وجهها على بنات خالتي وبتحكيلهم هلأ انا عندي فكره, بس جاوبوني بالاول, انتو بترضو تطلعو انتو التنتين لما يجي عريس يشوفكم, جاوبوها بنات خالتي "طبعا لأ" و فهّموها انهم مش بضاعه بيجي و بنقي الشب و بختار اللي بدو اياها, حكت يا الله عاد انا فكري يشوفكم انتو التنتين و فرد مره -يعني مره وحده بس بالسوري - بروح بزور بنت خالتكن -اللي هي حضرتنا - بنفس اليوم!!!!

سكتو بنات خالتي مصدومين, حكيتلها انا " شو رايك خالتو اروح انا يومها عند بنات خالتي بالمره يشوفنا مره وحده و حتى هيك المقارنه بتصير اسهل عليه" , بتحكيلي " لأ يا عيب الشوم ما بصير".....انا صرت اضحك وحكيتلها " يا خالتو طبعا انا بمزح, واللي حكيتيه هو اللي ما بصير, وعلشان اريحك انا عن نفسي بحكيلك شكرا كتير الك ما تدلي حد علي انا ما بدي اتزوج...." و بنات خالتي التنين حكو مع بعض " وانا كمان" وفهّمناها إنّا ما بدنا تدل حد علينا, و إنّا ما بدنا نتزوج بهالطريقه,و زواج البضاعه هاد والتنقايه ما بمشي معنا
.


من هنا وهناك

:) اشياء كتير بدي اكتب عنها حبيت اختصرتها ببوست واحد

اول شي واهم شي شكرا لكل اللي صوتلي واللي لسا ما صوتلي وناوي انه يصوتلي واللي ما صوتلي ومش ناوي يصوتلي اللي اكيد راح يصحى ضميره قبل ما يخلصو اخر 5 ايام للتصويت ويصوتلي
وهي اللينك علشان ما يكون في حجج :)



ما بعرف اذا سمعتو عن الطفل فادي اللي عمره 9 سنوات ومسكوه عالحدود لانه من اصحاب القيود الجرميه او الاجراميه !!!
ال اسمه الرباعي واسم الام بشبه اسم واحد مطلوب بال 2005 يعني لما كان عمر فادي 5 سنوات!!!
وانه اصر الضابط السؤول انه يحطه بالنظاره والولد مش فاهم اشي و ببكي وبحكي والله ما عملت اشي...
يعني مش خطأ بصراحه...مش المفروض في اشي اسمه رقم وطني يعتمدو عليه في حاله غياب التفكير المنطقي؟؟؟ الخبر بجريده الغد


اليوم طلعت انا واخوي كان عندي كم من مشوار دفع فاتوره النت و شرايه كم من غرض, نزل اخوي يشتري علكه من السوبرماركت - ما بعرف ليش هيك مسمي الدخان - وانا ضليت بالسياره, في بنت واقفه وشكلها بتستنى حد, اجا شب مرتب حاله عالاخر وماسك باكيت السجاير والموبايلين بايده, سلم عالبنت, اعطته البنت كيس كان بايدها, الكيس مليان اغراض و مبين من طرف الكيس دبدوب و عليه قلب احمر, كانو واقفين على لشارع مسكها الشب و سحبها للمكان مخفي عالرصيف,من الوضع ومن الحركات والمعاتبات فهمت انهم متمشكلين و البنت بترجعله الهدايا .
طبعا هلأ بتدمرو التنين يومين تلاته و كل واحد فيهم برجع يتعرف على حد جديد و بتمشي الحياه ولا كأنه صار اشي وهاد دليل على ان العلاقات صايره مبنيه على امور سطحيه مش اكتر,بما ان تأثيرها سطحي بكون بس تنتهي.

يمكن ان معظم العلاقات بين الشباب و البنات بتكون مبنيه على جهل تام يا من طرف منهم يا من الطرفين, في بنات بصدقو ان الشب بحبهم و بصدقو انه قصده استمراريه وتطور العلاقه والشباب بستغلو هالشي و بالاخر بس يزهق او يشوف انه ما في امل تتطور العلاقه التطور اللي هو بدو اياه واللي هو بعيد كل البعد عن الاستقرار و الارتباط, بختصر كل شي بكلمه... " خلينا اصحاب احسن" بس طبعا بكون مأمن حاله بعلاقه جديده, ما بصير يقعد فاضي .

ما بنكر ان في بنات ببدو العلاقه وهمه عارفين نهايتها بس بتحكيلك "يلااا هينا بنتسلى ولا القعده"....


امبارح رحنا نزور بنت خالتي ونباركلها عالزواج, بنت خالتي سكنت ببيت بجبل عمان , طلعنا سهرنا عالروف ويا الله ما احلى المنظر.

البيت بطل على عمان الشرقيه وعلى عمان الغربيه....الاشرفيه, جبل الجوفه,شوارع البلد, القلعه, القصور, العبدلي, الرويال كله مبين من الروف, المنظر جد بجنن مع الضواو ومع الشوارع.

انا بحب الالعاب الناريه كتير- او الالعاب النوريه على راي بنت صاحبتي - و احنا بالبيت بس اسمع اصوات لازم اروح اطل من شباك, عندهم كل دقيقه لازم نشوف العاب ناريه طالعه من مكان من هالاماكن, جد كانت سهره من العمر و كتير انبسطنا
اخدت اكم من صوره مع انهم ما بعكسو حلاوه المنظر بس حابه اشاركم فيهم
:)





Books@Cafe



بركاتك يا شيخ تامر

مع احترامي الشديد لكل فان و فانه لتامر حسني
بس انو.... اي يلااا عاد....شو صاحب كرامات الشب بدكم تخلوه

اي نعم عمل شريط ديني و من هالحكي
بس مش انه هيك بدكم تخلوه بعمل المعجزات الشب

تخيلو بكره يفتح عياده ويصير الدكتور المطرب اللواء العقيد العميد الركن المتقاعد تامر حسني

يعني محمد عبد الوهاب احسن منه !!!!!

اتركم مع الخبر المصور - حلوه المصور عجبتني :)










مع اني مش من فانااات تامر حسني بس في الو كم اغنيه حلوه
وهاي وحده منهم - بعرف اني حطيتها قبل بس جد بحبها فبدي احطها مره تانيه :)


ADSL

مسا الورد عالجميع...عاللي صوتلي هون :) وعاللي ما صوتلي :"(

هلأ انا اشتراكي السنوي للنت خلص من فتره , الاشتراك كان مع اورانج
بالبدايه كان كتييييييييييييييييييييييييييييييييييييييييييييييييييييييييير يفصل و بعد ما خلص الاشتراك السنوي ضليت مكمله معهم لحتى اقرر اجدد الاشتراك معهم ويلا اغير الشركه, و سبحان اله صار النت ما يفصل بالمره وكله تمام علشان اضل محتاره.

اشتراكي القديم كان ب 32 دينار وبحكو ان العروض الجديده من اورانج صارت بتقريبا 20 دينار

فبدي حد يقترح علي شو احسن اشتراك لل
ADSL

يكون منيح وابن ناس ما بقطع ورخيص كمان ..اه صح ويكون الليميت للداونلود كبير مش قليل لاني من اللي بنزلو مسلسلات وافلام وبرامج من النت .

انا سمعت عن الويرليس من زين, فبدي حد يحكيلي ازا جربه او بعرف حد جربه وطلع منيح ويلا لأ؟؟؟ وشو حسناته وشو مساوءه

بتمنى حد يفيدني بهالموضوع لاني بدي اجدد العقد قريب :$

Lovely SunSet



صورت الصوره يوم الاثنين الماضي بتلفوني
Nokia N95
كنا عاملين جمعه علشان بنت خالي اجت من امريكا
زي عشا بس كل واحد بجيب طبق
انا كان علي اجيب الحلو, ماما عملتلي ازكا هريسه بالدنيا
هيك الكل بحكي عنها - انا عمري ما دقتها لاني ما بحب الهريسه :$
وكانت الجمعه كتير حلوه
واحنا مروحين شفت هالمنظر
صورته و ضليت قاعده بالسياره تقريبا نص ساعه
بس اتطلع على هالغروب
انا بحب الغروب كتير , اعتقد كل الناس بحبو الغروب :)
وخصوصا اللي عند البحر
يا سلاااااااام انا اساسا البحر بحبه فكيف مع الغروب
دمااااااااااااااااااااااااااااااار

---------------------------

الاغنيه هاي بحبها كتير كتير
شكرا رزان :)



by Anghaaam
Fandalism Free MP3 Hosting

اهلك ادرى بمصلحتك....

كتير اهالي بياخدو قرارات رئيسيه بحياه اولادهم, من منطلق انهم ادرى بالحياه وانهم بقدرو يحكمو عالاشخاص و عالمستقبل اكتر من ولادهم, وللاسف مرات كتير بعاني الولد او البنت طول عمرهم من هيك قرارات.

بتختلف القرارات وتأثيرها عالحياه, بتبدا يمكن من يوم ما اختارو اسم المولود, و بتمر بالعلمي و الادبي بالتوجيهي , بنسو ميول الطالب نفسه وبركزو على مصالح وافكار اجتماعيه بحته , ابن فلان علمي وابني ادبي لا والله, بدك تطلع دكتور و بدك ترفعنا من هالحياه اللي زي الزفت, بدك تدرس مهندس و تتعين عنا بالشركه...الخ من هالمعتقدات والفرضيات وكلها بتروح في خانه, ابوك اعرف منك بمصلحتك , لاتعانده واكسب رضاه.

اليوم بدي احكي عن قصه صاحبه الي, وكيف تدخل اهلها بحياتها خرب حياتها و حياه اولادها بعدها

صاحبتي جابت معدل عالي بالتوجيهي, وانقبلت بجامعه مؤته الفرع المدني , و لانها من عائله محافظه و ببتكون من 4 بنات والاب بشتغل بره البلد, ففضل الاب انه يحاول ينقلها على جامعه بعمان, وبحكم انه بره البلد استنو لاجا وبس قدمو طلع فتره التسجيل خالصه بالجامعه, واعتبرو البنت مستنكفه و راح مقعدها.

البنت ما يأست وقعدت سنه بالبيت وتعلمت تجميل و صارت تشتغل بصالون ليجي موعد التقديم للجامعات السنه اللي وراها, وللاسف بوقت التقديم للجامعات كان الاب عنده مشاكل بشغله , و وضعه المالي بالمره وما بقدر يدّرس حد جامعه, البنت قدمت على كليه و درست وقدمت دبلوم و اشتغلت, وهي بالشغل جسرّت جامعه - يعني بعادلولها ساعات الكليه والدبلوم و بحسبو كم ضايل ساعات لازم تدرسهم بالجامعه ليعادلولها شهاده الكليه بشهاده بكالوريوس - اشتغلت و صرفت على دراستها وكتير عانت خلال هالمده و الحمد لله خلصت و جابت معدل جيد جدا.

وهي بتدرس تقدملها شب من العيله, هي ما بتحبه ولا بتحب اسلوب حياته, الشب اتكالي على اهله بكل شي, وغير ملتزم لا دينيا ولا اجتماعيا, و رفضته بالرغم من معارضه امها بالزات , هو الشب من قرايب الام و بدها تطمن على بنتها على رايها.

قبل التخرج بكم يوم, اكتشفو ان والدتها عندها سرطان, تكركبت العيله و اتدمرو نفسيا وتعبت الام كتير و بدت المطاردات و جرعات الكيماوي - الله يعينهم ولا يبلينا ولا يبلي حد- تخرجت البنت و قدمت لوظائف بشهادتها البكالوريوس وانقبلت براتب ضعف الراتب اللي بتاخده و تركت الشغل وانتقلت للشغل هناك, بس هي كانت تحكيلنا انها نفسها تطلع تشتغل بره الاردن بس اللي صار لوالدتها هو اللي راح يخليها بالبلد.

وبهالفتره رجع تقدم نفس الشب للبنت, الام لانها مريضه عملت مشكله كبيره مع البنت انها لازم تتزوجه, والبنت رفضت مره تانيه, بس هالمره الام تعبت و بطلت بدها تشوف بنتها و لا بدها اياها تاخدها عالدكتور, البنت تحت تأثير الام رضيت تقعد مع الشب مره تانيه, و بتحكيلنا حكيتله انا ما بدي اياك و انا ما بدي اتزوج هلأ, و والدتي هي اللي بتضغط علي, الشب بكل برود بحكيلها بكره بتتعودي علي, انا بدي اياكي, حكتله انت بتحبني يعني؟؟؟ حكالها لأ مش حب بس انا حسيتك مناسبه الي!!!

استمر الموضوع اشهر والبنت تحاول تتخلص من الشب وبالاخر الام حكتلها بموت وانا غضبانه عليكي, وتحت كل تأثيرات العيله اللي حست البنت مجرمه بحق امها ومش مراعيه ظروفها و مش مقتنعه ان الام بدها مصلحتها, وافقت و انخطبت وتزوجت.

بعد ما تزوجت بفتره صار عندها مشاكل بين تعارض اجازتها اللي ماخدتها من عنا و انها اشتغلت بالبلد, فتركت الشغل الجديد ورجعت عنا.

صاحبتي الها سنتين متزوجه عندها ولد و حامل بالشهر الثامن,سنتين من الجحيم و المشاكل, سنتين من الكره , سنتين مش طايقته ولا هو طايقها, بس المهم قدام العالم متزوج و عنده بيت و ولاد, سنتين وهو اله علاقات مع بنات, في عنده خط موبايل ممنوع حد يمسكه وطول نهاره واقف عالبرنده بحكي فيه تلفونات, حاولت انها ما تحمل عالقليله بالتاني, بس هو اصر عالموضوع وحكالها, ولدين صعب تتركيهم , يعني بعرف انها ما بدها اياه وممكن تتركه باي لحظه و موافق يعيش معها بالغصب.

سنتين لا فيهم كلمه حلوه ولا حركه حلوه ولا حاول انه يقرب منها خطوه وحده, احنا كنا وما زلنا بنحكيلها انها هاي صارت حياتها وانها تحاول تقرب منه و تحاول تستوعبه وتتعود عليه تحاول تكسبه, مع انا كلنا مش مقتنعين باستمرا هيك حياه لا الها ولا للاولاد.

هي بتحكي اذا صار اشي لا سمح الله لامي , اول شي بعمله بتركه واذا اصر ياخد الاولاد بتركه هو و اولاده , بنحكيلها حرام عليكي الاولاد شو ذنبهم, وما راح تقدري تبعدي عن اولادك.

امها هلأ كتير مبسوطه, وهو صار عندو مشاكل بالشغل اله 5 شهور قاعد بالبيت وهي واهلها بصرفو عالبيت, و بدفعو لاهله مبلغ شهري مع ان ابنهم قاعد بالبيت بس لازم يدفعو لاهله, بتحكيلنا ازا هلأ واول سنوات زواجنا هيك عشناهم, شو بدو يصير بعد خمس سنين.

ما بعرف شو ممكن احكي, انا من جوا مقتنعه انها مش مجبوره تتحمل هيك عيشه, بس هلأ صار في ولاد, ولاد هو اصر يجيو بسرعه علشان ماتتركه, الشب ما بعمل حركه وحده تبين انه منيح وشاري البنت, طيب ليش تزوجها, ليش ما شاف وحده تانيه ترضى بهالحياه, لا عندها طموح ولا عندها اشي مهم غير انها تتزوج, انا بضل احكيلها لأ بدك تتعودي و بدك تيجي على حالك علشان الاولاد, بس مرات بحط حالي مكانها, ما بقدر استحمل ولا بقدر اكمل, شو ممكن تعمل؟؟؟ تعيش هي و اولادها ولا كأنه موجود بالحياه؟؟؟ تتأقلم على حياه بدت غلط اساسا؟؟؟
مش عارفه.....الله يعينها ويسامح امها
....

Voting Banner :D

هي البانر للي بحب يحطه بمدونته
علشان يصير اسهل للناس يروحو يصوتو
:)


'Create
Copy this code to your website to display this banner!



وهاد البانر لانس زي ما وعدتك
ان شاء الله يعجبك و يكون لابق لمدونتك :)


'Create
Copy this code to your website to display this banner!



بلشنا بالتصويت :)


مره تانيه شكرا لاحمد المحروق
لانه جهزلنا الجروب عالفيس بوك
واليوم بتقدرو تبدو بالتصويت لمدونه صيف 2009 :)

تزكرو انكم بتقدرو تصوتو لاي عدد من المدونات اللي بتحبوها
بس التصويت لنفس المدونه ما بجوز يكون اكتر من مره وحده

هي الجروب هون

بتمنى متل ما شاركتونا بالترشيح
تشاركونا بالتصويت :)

وكل فتره وفتره راح نحطكم بالصوره بالنسبه لنسب التصويت


تحديث

اقرأو بمدونه احمد نتائج التصويت لاول يوم حتى الساعه 9 مساءا هـــون
و اللي بحب يضيف بانر التصويت بتلاقوه هـــــون

المناسف بتغير الحكي

في ناس ما بتعرف تحكي
وفي ناس ما بدها تعرف كيف تحكي
وفي ناس بحبو يرمو الكلام من تحت لتحت
وفي ناس بحبو يرمو الكلام عيني عينك
وفي ناس بحبو يدجو الكلام دج :)
بس معظم الناس عند المصلحه بتغير كل كلامها
و بتتغير مبادئها...و بتتغير وجهات نظرها
ومواقفها
و
و
و
.
.
.


وهي مثال




by Zohair Al Nobanee
Fandalism Free MP3 Hosting

يا ريت حد يفهّمني!!!

معلش يا جماعه خدوني على قد عقلي

هلأ كلنا سمعنا عن حادثه مقتل الدكتوره مروه الشربيني بالمانيا وكيف ان القاتل طعنها 18 طعنه وما حد تحرك و بس اجا زوجها يدافع عنها انطعن 3 طعنات و الشرطه الالمانيه حاولت تطلق الرصاص على القاتل قامو اصابو الزوج, قصه او حقيقه جدا محزنه و بتخلي الواحد يزيد قهر واحساس بالظلم, وبكره بطلع مريض نفسيا وما حد بعملو اشي.

وموضوع الاعتداءات على المسلمين في الصين ومنعهم انهم يصلو, وحسب ما حكو ان القضيه بدأت برضه باعتداء على فتاه مسلمه من مسلمي الايغور في الصين, وايضا حقيقه بتخلي الواحد يزيد قهر واحساس بالظلم


الموضوع اللي بدي حد يساعدني على فهمه هو خبر قرأته بموقع عمون
الخبر بعنوان
30 نائب يطالبون الحكومه باستدعاء السفير الصيني في عمان.... ومطالبه باصدار بيان يدين مقتل مروه

طيب هلأ انا كمواطنه لا املك اي سلطه بالبلد بستحي اني ادين او استنكر متل هيك حقائق ,لاني بادانتي ما بعمل اشي ولا بحقق عدل .

شو يعني بس النواب يكتبو مذكره - حتى لو كانت شديده اللهجه - تدين او تستنكر او تشجب او اي كلمه من قاموس التخاذل اللي بنضل نستخدمها؟؟؟

شو بده يصير؟؟ وشو اللي راح يتغير؟؟؟

ليش كتبو هالمذكره ؟؟؟

وشو يعني تابعو بقلق شديد و همه قاعدين ببيوتهم وكاسات الشاي قدامهم؟؟؟

وايش بدو يصير بس يجي السفير الصيني و يبلغوه باستنكارهم الشديد لمثل هذا العمل؟؟؟

وشو يعني بدو يصير بس يستخدمو كلمات منمقه بالمذكره مثل
هالنا,متطرف يميني الماني,جريمه نكراء,الاستهداف الدموي المريع, احد غلاه العنصريه؟؟؟

وشو يعني " ومطالبة الحكومة الصينية مراعاة علاقتها الاقتصادية الهائلة مع دول العالم الاسلامي التي يتصاعد غضب شعوبها يوما بعد يوم لما اصاب اخوانهم " ايش بدهم يعملو يعني اذا ما ردو على استنكارهم وادانتهم؟؟

يا ريت حد يفهّمني!!!

4 Days Left :D

4 days left Pictures, Images and Photos



باقي 4 ايام و بتخلص مده الترشيح لمدونه صيف 2009
شكرا كتير لكل اللي شاركونا انا و احمد المحروق صاحب الفكره
بالترشيح او بوضع البانر عندهم بالمدونه


و ب 15 الشهر راح نبلغكم بالجروب اللي راح نعمله عالفيس بوك للتصويت
و نوضح كيفيه التصويت
كان في مشكله عند بعض الاصدقاء بموضوع الفيس بوك
انهم ما بدهم يظهرو شخصياتهم و اسمائهم هناك
بس ان شاء الله ما تكون هاي مشكله عندكم
بتمنى الكل يشاركنا بالتصويت
المدونات الللي ترشحت لحد اليوم وصلو
21
25
27
33 مدونه




مدونه مياسي

http://mayyasi.blogspot.com/
--------------------
مدونه رزان

http://vagueraz1.jeeran.com/razan/
--------------------
مدونه بشار بركات

http://www.beeesh.com/
--------------------
مدونه احمد المحروق

http://amahrouq.blogspot.com/
--------------------
Whisper مدونه قصص طرمه

http://2esas6arma.blogspot.com/
--------------------
Maioush

http://maioush.com/
--------------------
eNAS

http://nosaroses.blogspot.com
--------------------
Jafra

http://jafra78.blogspot.com/
--------------------
Moe Battah

http://battah.wordpress.com/
--------------------
Amjad Wadi

http://amjadwadi.blogspot.com/
--------------------
Anas

http://www.anosyat.com/
--------------------
JUMANA:)

http://jumana.wordpress.com/
---------------------
Dreamy Villager

http://dreamyvillager.blogspot.com/
---------------------
Qwaider Planet

http://qwaider.com/default.aspx
---------------------
Ahmad Hamdan

http://thoughts-ahmad.blogspot.com/
---------------------
SimSim

http://orientalsoul.blogspot.com/
--------------------
marwa

http://marro-elmodmer.blogspot.com/
--------------------
Se Wena

http://kafkasi.wordpress.com/
--------------------
Ala' JA

http://ajamr.blogspot.com/
--------------------
Aladdin

http://lozenge-wheel.blogspot.com/
--------------------
همسه

http://my-own-whispers.blogspot.com/
--------------------
مدونه اسامه الرمح

http://osamaa.com/blog/

--------------------

Maf3oos

http://mab3oos.blogspot.com/

--------------------
مدونه رنا و ديمه - اعتقد ان هيك الاسم

http://dema84rana.blogspot.com/
--------------------
Orangee

http://orangee.wordpress.com/
--------------------

Noura - Smile

http://www.blogger.com/profile/16790075404391288427
--------------------

Jumana

http://sensationalpearl.blogspot.com/
--------------------

roba assi

http://andfaraway.net/blog/
--------------------
hareega

http://www.hareega.blogspot.com/
--------------------
Naseem

http://www.black-iris.com/
--------------------

Samer Qwaide

http://blog.sweetestmemories.com/

--------------------

Sozan - الحياة

http://lifeisforgivness.blogspot.com/
--------------------
Mohammad Allouh

http://allouh.wordpress.com/


يلا ما ضل وقت رشحو مدونات تانيه قبل ما يخلصو الاربع ايام
الثلاث ايام



قريبا ...وبس عقصص طرمه...WeWe

بما اني مش مرتاحه بشغلي و راتبي مش مكفيني و بدور على شغل جديد ومش لاقيه ...فانا قررت اصير مطربه :)

اي نعم صوتي مش حلو, واي نعم اني محجبه, واي نعم اني من عائله محافظه,واي نعم ان السوق هالفتره ما بمشي فيه الا اشياءات بتجيب التار ولا العار بس لازم اتحدى الملل...

فلزوم التخفي و الحرص و المحافظه على حياتي اولا, وسمعه العائله ثانيا فقررت ما هو اتي:-

1-
انزل السوق باسم "وي وي" اختصار ل ويسبر

whisper <----- WeWe

-2
الصوت ما راح اعمل عليه اي تعديلات بس بلوء تمي بكم كلمه مع اصدار الكلام من المناخير, و لفظ بعض الكلمات متل اللي عمرها سنوات.

3-
اللحن برضه مش مشكله, الكل بسرق الحان اجت علي انا يعني, بجمعلي الحان مقدمه اغنيه لعمرو دياب مع اغنيه لتامر حسني مع كم لحن تركي على اسباني وما حد بعرف اشي.


4-
الشكل .... لا عمليات تجميل و لا شفط ولا نفخ ولا اضافات ولاااااااااااا اشي

بستخدم الانيميشن :)
اه... بجبلي واحد بعمل جرافيكس على فوتو شوب على جافا على اوراكل على شويه
.net
و بطلع اشي من الاخر :)

5-
عنوان الاغنيه.... طقو موتو وي وي كوتوموتو :)
بكرر الكلمه 100 مره كل مره بلفظها بشكل وما حد بحس بالموضوع.


6-
التمويل.....انا بس انزل البوستر بالصوره و عنوان الاغنيه التمويل راح يجي لحالو...او ببعتها لجاد شويري وهو بتبناني - حلوه يتبناني ونعم الاب راح يكون - و بعملي احلى فيديو كليب وبعد فتره بصير صحبه مع سيمون اسمر و بنقطع بعض بالبرامج الفنيه الهابطه على
LBC


-7
بعد ما اصير مليونيره اهلي بسامحوني و بابا بصير مدير اعمالي و يخترلي اللبس بنفسه :)

8-........

خلص خلص باااي ماما بتناديني بدي اقوم اساعدها بجلي العشا :)

بترككم مع ملهمتي وقدوتي لهالافكار البنّاءه



Funny Commercials and I Like To MOOOOO



Voice SMS commercial :D






I love this commercial very much....it is cute :D







This is not a commercial but it is funny
I like to MOOOOO



عرسان وهميين



في موديل بشع بين البنات ما بعرف عنا بس ويلا بكل مكان, ان الاخت بدها تسوي حالها بتحبك بتقوم بتخترع موضوع ان في شب بدور على عروس و اول اشي خطر ببالي انت, عاساس بدها تعمل معروف معك

زي مره كنا بنشرب قهوه الصباح بالشغل, كنا تقريبا 10 بالمكتب و في بنت انا علاقتي معها اسطح من اسطحيه, يعني وين السطحيه انا فوق السطوح للسطحيه,جاي عند البنات اللي بنجتمع عندهم نشرب القهوهة مع بعض - فساد اداري بعرف :) - المهم واقفه و متركيه على طرف مكتب بتطلع علي وبتحكيلي باعلى صوت عندها " بدك تتزوجي؟؟؟" انا استغربت بحكيلها كيف يعني؟؟ بتقلي انت بدك تتزوجي؟؟ ضليت ساكته بتحكيلي في ابن بنت حماي بدور على عروس بنفس مواصفاتك, فازا بدك تتزوجي احكيلي وانا بدله عليكي....حكيتلها لأ شكرا ما بدي اتزوج, مع ابتسامه زرقا مش صفرا ولفيت وجهي وغيرت الموضوع.

الاخت شو متوقعه اني احكيلها ...كتر الله خيرك منشان الله دليه علي....معروفك ما بنساه طول عمري...ويا ريت تدعميني شوي عنده....جد كيف بتفكر او اعتقد اللي بتتصرف هيك ما بتفكر اساسا.... وطبعا ما رجعت فتحت الموضوع.

او بنت كل ما شافت خلقتي تحكيلي, بتعرفي بدي اخدك لاخوي فلان, بضل ساكته علشان ما احكي اشي يدايقها بعد سنه بتزوج اخوها فلان, بتصير تحكيلي بتعرفي بدي اخدك لاخوي علّان - يعني التاني - برضه ما بحكي وبضل ساكته بتمر سنه و بتزوج علّان , انا بالاخر بصير احكيلها شوفي انا ما بدي اتزوج الله يبعتله بنت الحلال اللي بتستاهلو, وهي بتضلها على نفس الموال وما بتستوعب.

غير المراجعين والمراجعات, يعني بفكرو البنت ميته على عريس فعلشان امشيلها معاملتها بسرعه , او ازا بدها تكافئني لاني مشيتلها معاملتها بتتطلع علي نظره حكمه وبتحكيلي, انت مش متزوجه صح؟؟ - مش انها اتطلعت على اصابعي تدور على خاتم لااا ابدا - بحكيلها لأ , ال انت والله عجبتيني وبدي ادل هالشب عليكي, بالبدايه كنت احمر و اخضر من الخجل هلأ صرت احمر واخضر من التعصيب , بحكيلها ومين هالشب؟؟ ال واحد, واحد منيح خلص هاليومين بخليه يمر عليكم , انا بحكيلهم شكرا كتير ما بفكر بالزواج انا حاليا :)
يعني حتى لو فعلا في عريس هلأ هاد اسلوب طرح للموضوع؟؟؟ مش هيك يا عالم مش هيك....
ممكن تحكو ان مش ضروري يكونو وهميين العرسان بكل الحالات, انا معكم بس مع الوقت صار عندي خبره باللي بألفو القصص و اللي بحكو جد.
وبلا من هالكم من واحد اللي راحو مع اللي فكرتهم بألفو :)

يعني وبعدين؟؟؟




وبعدين مع سواقين السيارات اللي بحبو يحطو خط الشارع بنص السياره ويسكرو المسربين؟؟؟

والمشكله هالنوعيات بتحب تمشي على اقل من مهلها, ما بعرفو ان في عالم دوامهم عال 8 وطالعين من بيتهم عال 8 واذا تأخرو اكتر من ال 8:15 بتدخل بساعات المغادرات الرسميه؟؟

وبتزمريله زامور خفيف انه عيب الدنيا الصبح ابدا , وبتزمريله زامور كبيييييييييييير بتعرفي انه اساسا مش معانا وشكله نايم, ولا بحس ولا بتحرك ولا بتطلع يشوف مين بزمر لمين.


اليوم فكرت بالموضوع و خطر في بالي فكره, بدي اطرحها على امانه عمان علشان يطبقوها, الفكره باختصار انهم يخططو الشوارع كاروهات , اه يعملوها كاروهات وهيك وين ما بمشو هالسواقين بتكون الخطوط بنص السياره :)

موضوع تاني بقهرني, ليش الشب بنسم بدنه بس بنت تتجاوز و تيجي قدامه؟؟؟ جد حد يفهمني الشعور اللاشعوري في السيكولوجيه النفسيه لهالشباب هدول؟؟

قبل كم يوم كنت بالحسين بشغل, وطبعا كل سيارات الاردن متجمعه ما بين دوار الداخليه و دوار المدينه الرياضيه, وبنمشي نقطه نقطه والدنيا ناااار, لدرجه ان بحس شقه وجهي اللي عند الشباك لو اضحك بتتشقق, صحللي فرصه انتقل على المسرب اللي جنبي والشب واقف وقوف تام ومش منتبه ان السيارات اللي قدامه مشيت, و يا دوب انتقلت صحي على حاله و ساق بسرعه و ضرب زامور , من زوامير الفضيحه اللي واضح انه مسبه, وهو لسا في بيني وبينه مسافه سياره و انا صرت واقفه وقوف تام بالمسرب, انا بتطلع مين بزمر , وضل يزمر طنشته و بطلت اتطلع عليه, ضلو وراي لبعد دوار المدينه وبس فضي الشارع تجاوز عني , انا مسكره الشباك و هو مسكر الشباك , وهدّى سرعته لصار جنبي و بدا يحكي و يبرطم, ويشبر, طبعا انا مش سامعه شو بحكي والمسبات كلها بتضرب بالشباك وبترجع على صباحه - تزكرت ايميل وصلني بعنوان
garbage smile
واللي بحكي عن سائق تكسي كان معاه راكب و هو ماشي بالشارع الرئيسي , في سياره حاولت تتجاوز عنه, تجاوز غير قانوني والاولويه لسائق التكسي, التاني صار يزمر و يسب فسواق التكسي ابتسم ابتسامه عريضه و صار يتطلع عليه ومشي, فبسأله الراكب ليش ابتسمت و ما قاتلته مع ان الحق عليه مش عليك, حكاله بما معناه ان اللي بحكيه عباره عن زباله و كل الحكي اللي حكاه هو اللي سمعه واللي رجعى عليه فانا ببتسم للزباله - بعيد عن القارئين :) - فانا عملت نفس الشي, تطلعت عليه و ابتسمت ابتسامه عريضه, هو عصب بزياده و صار وجهه احمر , لفيت وجهي و اخدت ابعد مسرب عن سيارته و ضليت ماشيه :)


سلسله عرسان - الحلقه العاشره

العريس صاحب جارنا اللي ساكن جنبنا, بشتغل بالامارات مهندس ميكانيك, وعمره مناسب, وحسب ما حكا جارنا ان وضع اهله المادي متوسط, اخلاقه عاليه, مؤدب , متدين, مربى وكل الصفات المنيحه بالبني أدم

كانت الام حابه تيجي هي و بنتها يزورونا لان الابن لسا ما نزل اجازه, بس انا واهلي متفقين اني ما بشوف اهل بدون عريس - كتير من المعلقين على الحلقات السابقه وخصوصا الشباب بينو انه مش دايما بكون زياره الاهل قبل ما يجي الابن مزاج ولكن لانه ممكن اجازته تكون قصيره وبدهم يختصرو وقت بزيارتهم - بالرغم من كل هاد انا لسا عند رأيي, مع اني حاليا بطلت استقبل بالبيت, بدك تتعرف علي تعال عندي عالمكتب, بتقعد بتشرب فنجان قهوه بتتعرف علي وبتعرف عليك مبدئيا وبعدها بنشوف ازا في قبول من الطرفين بنمشي بموضوع زيارات البيت.

نرجع لموضوعنا, انا اول ما شفت الشب انصدمت, انا مش سطحيه وبحكم عالمظاهر بس بصراحه الشب شكله قديم!!! يعني لبسه تمشيطه شعره كل شي فيه شكله قديم.... بس حكيت لحالي يا بنت هاد كله بتغير بعدين المهم المضمون.

النظره التانيه كانت عالام, مبدئيا شكلي ما عجبتها, بتعرفو كيف التنهيده هاي مع طعجه التم انه لااا لااااااااااااا مش هاي هي.

قعدت و بدا الحوار الافتعالي اللي الكل بجاهد فيه حتى يخلق جو الفه, شوي شوي انا والشب انسجمنا بالحكي و يسألني و اسأله و الام كل شوي تعلق تعليق على اخوي!!! والله هالقعده ما حليت الا بوجودك يا فلان.....والله يا هيك الشباب يا بلا.....انا شفت شباب كتير بخفه دمك ما شفت و هاهاها و هي هي هي ومعي ما حكت كلمه :$

ما علينا انا حكيت المهم الشب وبدي انسى امه هلأ بعدين بنشوف شو قصتها , الشب طلع عقله كبير و بفهم , وكان الخجل والارتباك من الطرفين فكان عادي, حكالنا عن طبيعه شغله وعن حياته و كيف بقضي يومه, يعني تقريبا انسجم مع الكل.

لما روحو سألوني اهلي عن رأيي حكيتلهم مبدئيا ماشي الحال بس اكيد بدنا قعده تانيه, وحكيتلهم عن الام ماما انتبهت بس بتحكيلي يمكن هية لانها شافت ابنها انسجم صارت بدها تمارس دور الحماه - مع اني مع ان ام الزوج او الزوجه ام تانيه ,و بطل في قصص الحماوات تاع المسلسلات من زمان - حكتلي لا تحكمي عليه هلأ واستني.

اجو الزيارهالثانيه بعد سنه :)
جارنا اجا وحكا لبابا انهم كانو مرضى الاب والام وراحو عالحج و انشغلو, انا ما كان بدي اشوفهم بس بابا اقنعني - كنت لسا راسي مش يابس زي هالايام بموضوع الزواج والعرسان - و اجو و اول ما قعدنا بتحكي ام العريس, انا بصراحه رجعت بس علشان فلان - اللي هو اخوي - انا ما عرفت شو التصرف اللي المفروض اعمله او احكيه فضليت ساكته و ضربت عيني عالشب, لقيته بتطلع علي و بحرك براسه انه معلش استحمليها, سويت حالي ما انتبهت و ابتسمت وضليت ساكته.

طلعت الام جاي تعرض علينا قراراتها , والشب صاحب الشخصيه الجميله اللي زارنا هديك المره جاي و تارك شخصيته بالبيت, الام بتحكي وهو ولا كلمه.

القرارات

بدها تسكن عنا بالعماره, و بدو يسافر ويتركها لاني ما بقدر اضلي لحالي انا و زوجي, احنا كبار ومرضى ولازم يضل حد عنا - طبعا هي وزوجها اللي ما شفته و بنتها المش متزوجه عايشين لحالهم والشب بالامارات اساسا - و كل شهرين تلاته بنزل اجازه اسبوعين وبرجع, بس ينزل حد من ولادي اللي بالسعوديه او بنتي اللي بامريكا ممكن تسافر عنده اسبوع مش اكتر لانه بده ياخد غرفه باوتيل, لانه ساكن مع شباب.


بابا صار يضحك, بحكيلها وايش رايك يا حجه بلا منو هالاسبوع وبتيجي بتقضيه عنا بس ينزلو ولادك اجازات :)

صلي عالنبي يا حجه, انت شكلك بدك حد يسليكي و ما بدك تزوجي الولد - اه الولد - فشو رايك يا حجه تجيبيلك ممرضه تقضي النهار عندك ارخص الك ولابنك :)

صارت تحكي لا انتو فهمتوني غلط و من هالحكي, بابا حكالها لا يا حجه انا فهمتك, وفهمتك صح...عالعموم اهلا وسهلا فيكم وفرصه سعيده لاتعرفنا على ناس زيكم, وانا انسحبت من الجلسه بكل هدوء.

اجا جارنا وحاول يقنعنا ان الشب حابب يقعد معي لحاله من غير امه بس انا ما وافقت, مبينه الحياه كيف راح تكون وانا مش مجبوره ارمي حالي بهيك وضع


ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع


الحلقات السابقه
.

مش مقتنعه




قبل فتره صار نقاش طويل عريض بيني انا ومره اخوي وبين ماما و اخوي

الموضوع ان بس اكون بسوق ومثلا طالعه من شارع فرعي, و سياره ماشيه عالشارع الرئيسي - فيها شب او زلمه او عمو- و يوقفلي علشان امشي انا تلقائي برفع ايدي باشاره انه شكرا
وكل مره ماما بتحكيلي اني ما اعمل هيك, يعني ما اشكر السائق و الف وجهي زي الشاطرين ولا كأنه عمل اشي و اضل ماشيه, اخوي بأيد كلام ماما و مرته بتعاني متلي من رأي اخوي.
حتى لو ماشيه وبقطع الشارع وسياره وقفت تمشيني برضه المفروض ما اشكر الشخص اللي وقفلي وامشي برضه زي الشاطرين ولا كأنه عمل معي اشي - مع اني ناااادرا جدا ما اقطع الشارع لحالي , لاني بمنتهى البساطه اذا لحالي يا بقطع بكره يا بلغي المشوار كله, من الاخر بخاف من قطعه الشارع انا

مع اني بس اكون قاعده بالسياره و بابا او اخوي بسوق و يوقفو لبنت وما تشكرهم, ببدو مسبات وما بتفهم ومش مزوقه و مش عارفه ايش والحق علي انا اللي مشيتها ومن هالحكي...

بسألهم ليش بتحكو هيك عن العالم, وليش ما بدكم ايانا نعمل هالشي؟؟
يعني انا شكرت السائق, شو صار بالدنيا؟؟ هو مشي بطريقه وانا مشيت بطريقي, ال شو انت ما بتعرفي كيف العالم بتفكر وشو نفسياتها....شو نفسياتها!!! كل واحد مشي بطريقه وعالاغلب عمري ما راح اشوفه بحياتي, ليش ما يكون الواحد مزوق ولطيف وخصوصا انه عمل معي معروف ؟؟؟

هالموضوع محل خلاف بيني وبين ماما تقريبا بكل مره بنطلع فيها مع بعض, وانا بصراحه بعمل اللي بدها اياه ماما لاني بحبها, بس مش مقتنعه, موبرضه كتير بعمل الحركه من غير شعور كرده فعل تلقائيه وماما بتزعل مني
:(


مياسي بنكهه جديده :)





من زمان واحنا بنشتري هاي المكسرات
و بعرف ان اسمها مياسي
بس ولا مره انتبهت للاسم الا قبل كم يوم بتسألني بنت خالتي عن المكسرات
اللي كتيييييييير زاكيه وكتيييييييييير بحبها
سألتني بنت خالتي عن اسمها حكيتلها مياسي و فجأه انتبهت...مياسي!!!
فورا صورت البكيت و حبيت اشاركم بالنكهه الجديده
النكهه القديمه اللي كانت بطعم الفول السوداني اكتشفناها بمدونه مياسي هون

النكهه الجديده فول سوداني مغلف بطبقه رقيقه بطعم الذره
يم يم يم ....جد لازم تجربوه
:)

مين المفروض نلوم



اليوم سمعت قصه صدمتني كتير, يمكن مش من عادتي اكتب بهيك مواضيع بس جد القصه أثرت فيي كتير
القصه سمعتها من وحده بعرفها بتحكي ان في ست اجتلها بتحكيلها بدي تساعديني الاقي حل مع بنتي, شو قصه البنت

عائله الست ببتكون من الام اللي بتشتغل و الاب اللي قاعد بالبيت و بدرس ماجستير و من بنتين, الاب كان قاسي كتير عالكل ,و كان يعامل الام بطريقه مش منيحه , وكان كل اللي بالبيت يخافو منه.

الام كانت يوميا تطلع عالشغل وتترك الاب مع البنتين على اساس انه بدرس, بس الاب طلع بعتدي على البنت الكبيره يوميا, والام مش عارفه شو بصير من وراها, وكان الاب يهدد البنت انه راح تندم اذا بتبلغ حد بالموضوع.
استمرت السنين على هالوضع لحد ما صار عمر البنت 14 سنه فخاف الاب انه يصير حمل, فانتقل بجريمته الى البنت التانيه اللي حكت عن ابوها من اولها و كشفت شو بعمل.

الام بلغت الشرطه و انحبس الاب و بعدها سافر بره البلد و ما رجع من يومها.

البنت لما كبرت ووصلت لسن الزواج, ضلت ترفض العرسان اللي بتقدمولها , بس امها جبرتها انها تقبل الزواج من شب مناسب الها, واخدتها على دكتور وشرحتله الوضع اللي صار و عمللها اللازم.

بعد ما تزوجت البنت , ما قدرت تتحمل العيشه مع زوجها لانها حست انها خدعته, وبنفس الوقت ما بتقدر تحكيله اللي صار معها وبعد فتره طلبت الطلاق و رجعت لبيت امها.

الام بدها الست اللي حكتلي القصه تساعدها بانها تقنع البنت ان هاد قدر من رب العالمين وبدها تستحمل وتكمل حياتها.


السؤال اللي ضل ببالي هو مين المفروض نلوم؟؟؟
الاب الحقير ويلا الام؟؟
معقول الام ما انتبهت عالبنت وهي صغير؟؟؟ معقول في ام ما بتحس ببنتها انها تعبانه انه في شي مدايقها؟؟ معقول ما بتعرف لاي درجه زوجها نذل و لوين ممكن يوصل بنذالتها وحقارته؟؟؟
المشكله ان اللي حكتلي القصه بتحكي انها بتعرف وحده بتشتغل بالطب الشرعي و بتحكيلها ان 80% من حوادث الاعتداء بتكون اعتداء المحارم على البنات...يعني اب... خال ..عم... اخ.

قبل كم يوم كان في مقاله بجريده الغد بتحكي قصه مشابهه كنت متردده احكي عنها...بس بعد ما سمعت القصه قررت احكي عن الموضوع

المقاله بعنوان بنت بنوت في جريده الغد


غرامك شو عامل فيي



مش عارفه شو اكتب
افكار كتيره ببالي
اشي بنكتب واشياااااااء ما بتنكتب
بلا من النكد هلأ
واتركم مع الاغنيه احسن :)









لا تنسو ترشحو المدونه اللي بتلاقوها بتستاهل تكون مدونه صيف 2009 هون