Things I Like To Whisper About

Would You Hear Me Whispering

حياة بلا روح...



صحيت على صوت المنبه, كل يوم بتصحى على هالصوت بس ليش اليوم بالذات حسّت ان في اشي غريب راح يصير
قامت و بدت يومها بالروتين اليومي اللي بتعمله من سنين بايام الدوام,كل شي بنفس التفاصيل, تغسيل الوجي و بعدين الفطور و بعديها اللبس و التجهيز للشغل, روتين المفروض يكون ممل لكنها عمرها ما حست بالملل منه الا اليوم, ابصر ليش قلبها مش مرتاح وبدها تخلص بسرعه وتوصل الشغل بسرعه, في اشي غريب اليوم بس ايش هو مش قادره تحدده.

بالشغل برضه نفس الروتين اليومي, القهوه و النم و تناقل الاخبار و بعديها ببدو المراجعين يهلّو و بستمر هالوضع لاخر الدوام, لكن اليوم في حركه غريبه بالشغل وفي نظرات غريبه من كل اللي حواليها,في كركبه مش طبيعيه مش فاهمه سببها

حتى زميلها "خالد" اليوم مر من قدام المكتب وما سلّم زي عادته, هو بالحقيقه اكتر من زميل, خالد اقرب ما يكون الى...
ايش الصفه اللي ممكن نعطيه اياها؟؟
خالد هو السبب اليومي اللي بخليها تصحى الصبح وتيجي عالشغل
خالد هو السبب اللي بخليها تصرف كل راتبها على لبسها واناقتها
خالد هو السبب اللي بخليها تتنفس
خالد هو السبب اللي بخليها تعيش
خالد هو السبب اللي بخليها تستمر بالحياه بشكل عام
حبيب؟؟؟ عشيق؟؟؟ روح؟؟ اكتر من مسمى بتقدر تسميه لكن هي وحدها اللي بتعرف هالمسميات
لان كل هالمشاعر عاشتها هي وحدها و ما حكت لاي مخلوق عنها, حتى لخالد نفسه اللي حاول يتقرب منها اكتر من مره لكن هي صدته, لانها بدها تضل صورتها قدامه ما عليها اي شائبه

ما حكت حتى لاقرب صديقاتها " منى" اللي المفروض ما بخبو عن بعض اشي, مش خجلها وحيائها اللي منعها, لأ كبريائها , كانت تحسن ان اعترافها بهيك مشاعر راح يهز شخصيتها قدام الناس, وبالحديث عن منى, منى في بعيونها اشي غريب اليوم, في لمعه اول مره بشوفها, خير اللهم اجعله خير

بنص الدوام والدنيا عجئه و المراجعين متراكمين قدام الباب اجت منى و خالد و معهم ام علي المراسله حامله بايدها اشي, لفت نظرها ان منى وخالد ماسكين بايدين بعض, انصدمت, قلبها صار يدق بسرعه, نفسها انقطع.... بلعت ريقها و حاولت تستجمع قواها وترسم ابتسامه على وجها بانتظار الخبر المتوقع

بالفعل خالد تقدم لمنى وامبارح قرأو الفاتحه واللي مع ام علي هو الحلوان, بايد بترجف مدت ايدها و اخدت الحلوان, قامت و ضمت صديقه عمرها منى وباركتلها و باركت لروحها و عشقها "خالد" و ما صدقت تقعد على اقرب كرسي وصارت تدعي ربها يطلعو من المكتب قبل ما تنهار تماما قدامهم...

تاني يوم صحيت الصبح قبل ما يرن المنبه, لانها اساسا ما نامت طول الليل, خصوصا بعد ما اتصلت فيها منى تحيكيلها تفاصيل الموضوع وتوصفلها مشاعرها وفرحتها بدخول شخص مثل خالد لحياتها, حاولت تتماسك لاخر المكالمه واول ما سكرت الخط بدت دموعها تسيل بدون ما تحس, وما قدرت تتحكم فيهم

صارت الساعه 8 وهي قاعده عالتخت ما تحركت من مكانها, بطل في سبب يخليها تقوم من التخت الصبح, بطل في سبب يخليها تروح عالشغل, بطل في سبب يخليها تستمر بالحياه...... وضلت على هالحال اسبوع , طلبت من زميلتها بالمكتب تقدملها اجازه, لاول مره من يوم ما تعين خالد بالشركه بتاخد اجازه, كل اللي بعرفوها اتصلو يتطمنو عليها, ما ردت ولا على تلفون

قضّت الاسبوع بالتخت و هي تفكر بحل, بعد ما خلصت اجازتها قامت برضه قبل المنبه لبست اواعيها بسرعه بدون ما تفطر وبدون ما تطلّع على حالها اكتر من مره كعادتها, وصلت الشغل فورا راحت على مكتبها, و من يومها وهي عايشه زي الاله منعت حالها انها تحس باي احساس انساني علشان باعتقادها هيك ما راح ترجع تتألم مره تانيه
وما بتعرف انها هيك هي بتقتل حالها كل يوم اكتر من اليوم اللي قبله, وضلت هيك لفقدت اي احساس او مؤشر على الحياه....

بكرهوووووو





بعرف ان الكل او اللي بشرفني بمتابعة مدونتي فهم اني بحكي عن مديري
بس هالمره انا بحك عن شي تاني
انا بحكي عن التوقيت الشتوي
يا الله شو بكره التوقيت الشتوي, ما في وقت تعمل اشي, انا انسانه نهاريه مش ليليه, كيف بدي اعيش بحياه بتصير عتمه عال 5 و راح توصل ل 5 الا ؟؟؟

اهلي عندهم موعد الترويحه من اي مشوار هو اذان المغرب, ومش وقت المغرب لا اذان المغرب يعني والدنيا لسا فيها ضو, طيب فهمونا هلأ بهالخمس شهور الجايين كيف بدي الحّق اعمل اشي قبل اذان المغرب :"(

وبما انه بحكي عن الكره مش قادره اقاوم لازم احكي عن مديري العزيز :)

الي فتره عامله زي هدنه مع الاخ, بحاول اكون منيحه و بمشي الاشياء بدون اي تعليق, وحاضر و اوك و هلأ بعمله و كل هالحكي المنيح اللي ما في معارضه ولا مناقشه, وهو ما فيه غير بحكي الله يرضى عليكي, المهم اليوم زي الشاطرين حكيتله ان انا حجزت علشان بدي اسافر على دبي ىب 7-1 يعني بعد شهرين وشوي و بس بدي احطك بالصوره, كشّر و صار يحكيلي انه قانونيا الاجازات مش من حقي و انه هو بس بمشيلي اياها بمزاجه و انه من حقّي اخد يومين بكل شهر وما بصير اخد 19 يوم - اللي بدي اخدهم اجازه - ما بصير اخدهم بنفس الشهر, طبعا انا الشاطره المفروض بعرفه وبعرف اني بس اتعامل معه منيح بتنمرد الاخ, حكيتله الي 5 سنين كل سنه باخد اجازه بهالوقت وما حد بعلّق ليش السنه يعني؟؟؟

اختكم ويسبر خلعت قناع المناحه و رجعت للمود الزنخ اللي بتعامل معه فيه, قعدت خمس دقايق اكر حكي و ختمته بانه انا مسافره يعني مسافره, بحكيلي من هون لوقتها بنشوف شو بصير, حكيتله من هون لوقتها ابصر مين بكون متقاعد - قصدي هو طبعا - او ابصر مين بكون مستقيل, بحكيلي ان شاء الله انا وانت بنستقيل, حكيتله ان شاء الله وانا لافه وجهي وماشيه للباب :(
بكرهووووووووووووووووووووووووووووووو........ هو والتوقيت الشتوي :")

تساؤلات....


هالموضوع الي فتره بفكر فيه و حابه اكتب عنه, لكن ولاول مره بحس حالي مش عارفه اعبر ولا عارفه ابدأ!!

الموضوع عباره عن سؤال

كم فرق العمر اللي ممكن نحكي عنه مناسب بين الشخصين علشان يرتبطو؟؟؟
هل بترضي ترتبطي بواحد اصغر منك؟؟ واذا اه اصغر بكم سنه ؟؟
هل بترضي ترتبطي بواحد اكبر منك بكتير؟؟؟ وحددي الكتير بالنسبه الك؟؟

ونفس الاسئله للشباب

ممكن تتزوج وحده اكبر منك؟؟ واذا اه بكم سنه عالاكثر؟؟
مع النظر لموضوع ان التركيب الجسدي للبنت بتأثر بالعمر, من ناحيه الشكل و النفسيه وحتى الانجاب...

انا خالي متزوج وحده اكبر منه ب 17 سنه , ارمله اخوه وعندها 3 اولاد, و تزوجها بناءا على محبته الها مش واجب, وتزوجها مع رفض كل العيله,وعايش معها احلى عيشه, بحبها و بتحبه, وهلأ الهم 35 سنه متزوجين و لهلأ بحبها و بخاف عليها, لهلأ بعاملها كأنها خطيبته.

و عنا بالشغل 2 متزوجين ستات اكبر منهم بسنه او سنتين و التنين بدورو على عرايس لانهم من وجهه نظرهم غلطو باختيارهم وما عاشو حياتهم وحقهم يتزوجو وحده صغيره, بعد 11 سنه زواج و اولاد وعيله...


اللّي اثار الموضوع في بالي, انه تقدملي شخص اكبر مني ب 16 سنه..

الكل استاء من رفضي, واعتبر كلامي حجج بحجج...واتهموني باني انا متطلبه وما بعجبني العجب, وان انا حاطه معايير كتير عاليه, مع ان الرفض اجا عالعمر , حكيتلهم مواصفات الشخص ممتازه وما بنكر انه شكلا مش مبين عليه العمر بالمره, لكن العمر مش مناسب اطلاقا, بعرف اني مش صغيره و بعرف اني -وكأي بنت بالعالم- بتتمنى يصير عندي بيبي, لكن ما اعتقد اني المفروض ارمي حالي بدوامه انا من اولها مش مقتنعه فيها علشان يكون اسمي تزوجت والسلام ...

انا ما شكيت للحظه بقراري , لكن بدي اشوف هل اللي حوالي بحكو هيك علشان بنظرهم انهم بدهم يسترو علي و يزوجوني,لانه اهم اشي بحياه البنت الزواج - طبعا هيك رأيهم - ويلا فعلا هيك رأي مجموعه من الناس؟؟؟


طرقنا الخارجيه

الي شهر تقريبا يوم بعد يوم بطلع انا وزميلتي على محافظه من المحافظات علشان نزبط الاجهزه و تنزيل اخر نسخه من التعديلات على البرنامج اللي بنشتغل عليه وتزبيط الشبكه علشان ما نضطر ننزل مره تانيه الا للضروره

انا شخصيا كنت مبسوطه على هالطلعات فكرت انها زي رحله راح تكون, لكن اكتشفت انها كتييير تعب وخصوصا بالمناطق البعيده مثل دير علّا و الشونه و الباديه, قعده السياره لساعتين ومرات اكتر جد بتكسّر, غير ضربات الشمس اللي بتصيبنا مع ان الكونديشن مشّغل معظم الاوقات, لكن ما بنكر انها كانت فيها مغامرات نوعا ما :)

اللي لفت نظري ان شوارعنا الخارجيه بتفتقر بشكل خطير للوحات الارشاديه, ممكن تمشي مسافات كبيره وما تلاقي يافطه وحده تبين وين انت بالزبط, بكتبولك سهم والحدود العراقيه, يا سلااااااااااام شو استفدت؟؟ وشو فهمت؟؟ او لوحه صغيره عمودها قصير كتير مكتوب عليها 70 كيلو!!! بس هيك كل ما تمشي شوي بتقل الارقام بس 70 كيلو لايش بالزبط مش مشكلتهم, اللوحه صغيره وين يكملو المساكين ؟؟؟

هاي الامور المفروض اساسيه وخصوصا ان الطرق بتكون صحراويه وما في حد غير التريلات الكبيره اللي ماشيه وما في حد تسأله, و اكتر من مرّه نسأل دوريه من دوريات الشرطه وطبعا عيب يحكو ما بعرفو, يعطونا وصف تماما عكس الاتجاه اللي بنكون رايحينه - حكينا سابقا عن هالنوعيه من الناس :$ و لساتهم ما انقرضو للاسف - مثل اليوم, رحنا عالباديه الشماليه, و بعد الجامعه الهاشميه - اللي اتفجأت قديش كترانين المباني من يوم ما تركتها من 100 سنه - في دوريه شرطه سألناها بحكولنا وين بدك الباديه الجنوبيه ويلا الشماليه, طبعا الجنوبيه قريب العقبه و الشماليه قريب المفرق يعني كل وحده بجهه و الشب بوصفهم كأنه بينهم شارع يا بتروح شمال يا بتروح جنوب, من هالكلمه عرفنا انّه ما اله دخل :$

المهم والحمد لله دايما بالاخر بنوصل وبنتعرف على ناس كتير بجننو, بس الحلو انهم بحسسوكي انك بمسلسل اردني قديم, كل اللي بالموقع بيجو وبيصيرو يحكو هدول من عمان!!! هدول من العاصمه!!! زكروني بمسلسلات تيسير عطيه وعبير عيسى القديمه :)

اشي تاني اكتشفته ان في عنّا كتير مناطق حلوه بالاردن ان كان صحراويه او خضرا , حاولت اني اصور اشي بس للاسف ما قدرت لان السياره ماشيه كل الصور بتطلع مش واضحه او ما الها معنى, غير هالكم صوره


طريق عجلون....








طريق دير علّا -كتيييييييييير حبيت اول صوره :)






في موظفه في محافظه من المحافظات بتشكي ان جهازها كتيير بطيء و انها ما بتشبك انترنت ولا بتستخدم فلاش ميموري
بس شغل
طبعا اول ما امسكته كانت شابكه النت على الاذاعه
الجهاز كله العاب
و بعد تشغيل الانتي فيروس طلع على الجهاز 12132 فيروس
اول مره بحياتي بشوف هيك عدد فحبيت اصوره للذكرى







ممكن نتعرف!!!

لمّا كانو خواني يجو من السفر زمان قبل ما يتزوجو من ضمن الاشياء الجديده على حياتي بكون شغلي حارس ليلي للبيت :)
بيجو الاخوان ناسيين مفاتيح البيت, بس يروحو بالليل برنو علي عالموبايل يا بفصلو يعني هيهم واقفين عالباب بدهم اياني افتحلهم, او بتصلو علشان يسألوني بابا نايم علشان بدهم يتأخرو اكتر :$ ومن اول الزياره لاخرها وانا بزكرهم يوميا يعملو نسخ جديده...

المهم مره رن الموبايل و ما فصل, حكيت اذا بدهم اياني ارد, رديت واذ بصوت شب وبس سمع صوتي بدى يلقي شعر , طبعا انا ماشاء الله علي من السطلان مش فاهمه شو في
حكيتله ايش؟؟؟ مين؟؟؟ شو يعني؟؟ بعد ما صحصحت استوعبت و سكرت الخط, وضل الموضوع اسبوع كل يوم عال 2 يرن الاخ و يبدا يشعر , حفظت الرقم وبطلت ارد , وبالاخر بابا اخد الموبايل للشرطه, لانهم لازم يشوفو ايمتا رن وكم مره رن بالزبط, و همه تصرفو معه

اللي فتح الموضوع ان ماما امبارح وصلها مسج من رقم غريب محتواها ممكن نتعرف!!!

ماما بتحكيلي على سمع بابا خبيها خبيها بلاش ابوكي يشوفها هههههههههه

انه بالله عليك, معقول في بنات بردو على هيك مسج؟؟؟ يعني معقول تبعتله انا فلانه, مش ممكن المسج توصل لشب ويبدا سحب الافلام؟؟

ليش الشباب او بعض الشباب- ما بصير نعمم- بحبو هالحركات, يعني بتتصلي بوحده من صاحباتك و بتغلطي بالرقم ولاجل الصدف السعيده برد عليكي شب, بتحكيله عفوا ... الرقم غلط, لازم يستلمك اسبوع رنات ومسجات, طيب ليش يا اخي, والله غلطت شو اعمل, ليش لازم الوحده تتورط بهيك ناس!!!

هاد طبعا غير عن المعاكسات اللي بعد فتره بتعرفي انه اخو صاحبتك ويلا ابن مش عارفه مين من قريباتك هو اللي كان يعاكس , وبتستحي تجيبيلها سيره
كيف عرفت؟؟؟
انا بس يتكرر اتصال من رقم غريب بسجله عندي باسم "مين".."مين1"...وهيك
و بعد اشهر من الموضوع برن الموبايل بنفس الرقم والاسم "مين" برد بتطلع خالتي مثلا بحكيلها خالتو هاد الرقم جديد, بتحكيلي اه كان لابن بنتي :$ شو بدي احكيلها بالله عليكم, وابن بنتها اساسا قد اولادي يعني الشغله بدها ذوووووووووق مش اكتر

الحمد لله الذي عافانا....

راكبه سيارتها الجديده و بتحكي مع صاحبتها عالموبايل, بدهم يتفقو باي مطعم يتلاقو علشان يتغدو سوا
الهم فتره بخططو ومش زابطه معهم, مشغولين من الشغل للنادي للصالون وبالليل الا ما يكون عندهم سهره, هالمره بما ان النادي مسكر علشان التصليحات لقو فرصه يتغدو مع بعض, وقفت عالاشاره , سكرت الموبايل بعد ما اتفقو على مطعم كتير اكله طيب, و هي واقفه بتشوف شب ماشي بعكازتين و بعرج, بتحكي في بالها....الحمد لله الذي عافانا مما ابتلى فيه غيرنا

"
يلااا شوي و بخلص الربع الساعه اللي حددلي اياها الدكتور اقطعها علشان الين المفاصل"
هيك كان بقنع حاله وهو متألم , قبل كم من شهر عمل حادث بالسياره ,انصاب عموده الفقري و تكسرو رجليه, الدكاتره حكوله بعد مرور فتره من العمليات و التجبير وزراعه المفاصل ,لازم تداوم عالعلاج الطبيعي ولازم تلين المفصل لانه ممكن مع عدم الحركه يتكلس و ما تقدر تتحرك وهو ماشي لمح زلمه كبير بالعمر ماشي و حاطط السيجاره بتمه و حاطط ايديه ورا ظهره و واضح انه بفكر او مهموم , حكا بباله.....الحمد لله الذي عافانا مما ابتلى فيه غيرنا


"الله يرحمك يا امنه ما عشتي لتشوفي بنت ابنك امنه اللي سماها عاسمك, زي القمر الكل بحكي انها بتشبهك"
هيك كان يحكي لحاله الزلمه الكبير و هو ماشي باتجاه المستشفى بعد ما اتصل فيه ابنه وخبره بوصول اول حفيده اله على الدنيا
ما عرف شو يعمل, سكر الخط وطلع يوقف تكسي, بعدين انتبه انه بالبيجاما رجع عالبيت, غير اواعيه و لبس الكندره, و طلع يدور عتكسي يوديه عالمستشفى, و بعد مدّه من علوقه بالازمه قرر يكمل باقي الطريق مشي, وتزكر المرحومه ام محمد كانت تحب المشي بهيك جو, وهو ماشي شاف ولد صغير ببيع فاين عالاشاره, الولد مبهدل و بنتقل من سياره لسياره و الكل بسكر الشباك بوجهه , حكا بباله...الحمد لله الذي عافانا مما ابتلى فيه غيرنا

"ايه هاي شكلها محرزه خليني اروح اقززها بركي اشترت مني كم من بكيت فاين"
وراح للبنت اللي بالسياره, لقاها معليه صوت المسجل عالاخر و بتحكي بالتلفون, سمعها شو بتحكي لللي معها عالتلفون, وفهم انها بدها تروح تتغدى بالمطعم, ضلو يلف و يدور يلف ويدور "ويا اشتري مني.....الله يخليلك حبايبك.... الله يوصلك لاهلك بالسلامه....منشان الله اشتري مني.....والله لسا ما استفتحت, طب التنين بنص, احكيلك ال 3 ب 75 وانا الخسران"
اتطلعت عليه وصرخت عليه وبهدلته لانه وسخ السياره و سألته عن اهله وينهم عنه ما يضبوه من الشوارع,و حلفت لتبلغ قريبها المسؤول بالامن عنه وعن صحابه المنتشرين بالمنطقه, فتحت الاشاره و مشيت السياره, وقف عالرصيف و اتفرج عالسياره من ورا و ضحك و حكا بباله .....الحمد لله الذي عافانا مما ابتلى فيه غيرنا

يا رب لأ....




اكتر كلمه ترددت ببيتنا طول اليوم

Veto

ان كانت عن طريق استفسار

امريكا راح تستخدم حق الفيتو؟؟؟؟

او عن طريق تأكيد

امريكا راح تستخدم حق الفيتو...

يا رب لأ يا رب لأ يا رب لأ....

يا رب يزيدو ال 25



مطارنا العزيز....



اليوم اخوي تسهّل على العين, وكعادتنا العيله بالليله بنروح عالمطار, طريق المطار ما بدي احكي عنه لاني حكيت اكتر من مره بهالموضوع و لكن للاسف ما في اشي بتغير على مر السنين, الاشي الوحيد اللي متغير هو ان افي جزء صغير من طريق المطار وانت باتجاه السابع مزفّت, نعم واخيرا زفتو الشارع اللي لو مشيت عالمسرب اليمين او الشمال السياره بتاكل هوا, اي نعم جزء بسيط من الشارع مش كل الشارع بس يلا ولا البلاش, ما بتعرفو مين سكن جديد بهالشارع و اضطرو يزبطولو قدام بيته, او يمكن جد بدايه التزبيطات بطريق المطار, مع انهم بدو من الوسط...


وبرضه من عاده العيله انّا نستنى بالمطار لحد ما نتأكد ان امور اللي بدو يسافر كلها تمام و يطلع عالدرج المتحرك ويحكيلنا باي من فوق, والحمد لله ولا مره حد احتاج اشي الا المره الوحيده اللي اخوي سافر فيها عالفجرو و اصر ان ما حد يوصله عالمطار غير اخوي الصغير, واللي وصّله و روّح و وهو بنص الطريق اتصل فيه اخوي اللي بدو يسافر " ارجع طلع معي وزن زياده و مش حامل فلوس اردني و الصرّاف اللي بالمطار ابصر وين رايح ومش موجود :$ "

و احنا قاعدين بنستنى و انظارنا كلها عنهايه الدرج المتحرك اللي يا دوب مبين علشان نحكي لاخوي اخر باي لتوديعه مع انّا متفقين معه انه يرن علينا بس يخلّص كل اموره ,كان قاعد جنبنا زلمه كبير بالعمر ماسك السيجاره بايده و مخبيها زي اولاد المدارس اللي بهربو عالفرصه من المدرسه وبوقفو يدخنو , المهم نرجع للعمو اللي قاعد بدخن و ولا حد من الامن منتبهله وهو مطنش اشاره ممنوع التدخين اللي مليه المطار, العمو خلص السيجاره و رماها بسله الزباله و مشي , شوي الا الدخنه معبيه المكان, طلع مش طافيها منيح و اللي بنظفو حاطين كيس نايلون جوا السله و هب الكيس, الكل هجم و مسكوها وكبو عليها قنينه مي و مسكوها وطلعوها برّه القاعه

كانت معنا بالمطار مره اخوي وبنته فرووحه اللي بدهم يلحقو اخوي بعد 3 اسابيع, فرووحه احتاجت ان مامتها تغيرلها البامبرز, لفلفنا المطار ان نلاقي تواليت واحد فيه مكان لغيار البيبي ابدا....معقول مش مجهزين المطار بهيك اشي مهم؟؟؟ جد استغربت يعني المفروض في اشياء ستاندرد تكون موجوده بهيك موقع لانه اكيد الناس راح يحتاجوها, ولما سألنا اللي مسؤوله عن التواليت ونظافته بتأشرلنا على مكان كأنه متوضأ و رابطين كيس عالحنفيه و ال المفروض هاد مكان غيار البيبي!!!!!

رجعنا لعند اهلي ما لقينا بابا معهم, بسأل اخوي عنه بأشرلي الا بابا واقف مع العمو اللي حكيت عنّه فوق, طلع الاخ منتقل لمكان تاني و بادي يدخن واللي كانو قاعدين جنبه اجو قعدو جنب اهلي و بشكو منه ومن دخانه, بابا كالعاده بهيك مواقف ما بسكت لانه بعتبر السكوت سلبيه, راح و ابصر شو حكاله - لانه لما سألناه شو حكيتله بحكيلنا فهمته غلطه وما رضي يحكي التفاصيل - بس واضح ان بابا بحكي بانفعال والزلمه مش عارف شو يرد, المهم كان بدو يطفي السيجاره زي اول مرّه بس بابا حكاله اشي و طلع بره طفاها.

يعني مش عارفه ايمتا بدها الناس تستوعب ان القانون قانون وانه ما انحط بس علشان يحدّ من حريتك - بعرف ان في قوانين محطوطه بس علشان تخنقنا يلااا مشولي اياها هالمره :)

وجهة نظر عالسريع :)



الباليه فن راقي وبجنن, وما اعتقد ان في ناس بختلفو بهالشي
الكل بحب يشوف الصغار و الكبار من اللي برقصو باليه
بس اكيد اللي برقصو لازم يكونو بنات

اما شب وبرقص باليه !!!!
فاسمحولي......مش زابطه معي ......مش حلو بالمررررررررررررررررره وبالعكس مرات بتتقزز من منظره الواحد
والله مش لابقلك يا عمو هالشي
من الاخر بقلب الموضوع من فن راقي لفن فافي :)
ويلا شو رايكم ؟؟؟؟

بدي حقّي.....





امممممم بدي احاول اتزكر انجاز عظيم عملته علشان اتفشخر فيه
بس بما انه طلع الانجازات ما الها دخل هالايام

فااااا انا اطالب بحقي و حقوقي المدنيه و العسكريه و النفسيه و...

ياااااااااااا بتنتخبوني نائبه
يا بتعطوني جائزه نوبل :)
انتو قررو

اما هيك انا ما راح اضل
موظفه شقيانه وغلبانه ما بدي

ازا بدكم اروح القي كلمات ...بلقي كلمات
ازا بدكم اشجب واستنكر....بشجب وبستنكر
ازا بدكم اوعد وعود كاذبه.....بوعد وعود كاذبه و بشطح فيها كمان, يعني ازا شديتو علي ممكن اوعدكم بان المي ما تنقطع عند اي بيت , اللي واصلتله المي واللي مش واصلتله

ازا بدكم اوزع رواتب وضرايب الشعب لاسرائيل...بوزعها شو وراي انا هي رواتبي :)

اللي بدكم اياه احكوه
بس بدي الجائزه انا
في مكان عالمكتب فاضي و الجائزه بتيجي فيه طقع ومن الاخر

شفتو المطر اليوم ...شكله رجعت الشتويه :)



السنه متل السنه الماضيه تماما, حكو انها راح تمطر الدنيا وانا ابدا مش اني اعمل اشي
و بالصدفه المره هاي كنت بالشارع لما بدت تمطر
لكن الاشي المختلف اني السنه حابه المطر كتير, شعوري و انا بمشي تحت المطر لحتى اوصل السياره كان بجنن معى اني كنت بدي اتزحلق و اواعي تملو مي :)

اليوم كنت مع صاحبتي بالسياره ولانها هي كانت تسوق انا اخدت راحتي بالتصوير عالاخر, مع اني ما بقدر انشر كل الفيديوهات لان صاحبتي العزيزه ضلت تحكي و انا بصور :)

امّوووووون سامحيني اني التهيت بالتصوير وما ركزت معك وكمان بدي اياكي تضلي ساكته :)

المهم طبعا وكالعاده سكرت الدنيا بهالشتوه
الشوارع تملت مي وصارت انهار الاردن بكل الشوارع وضلينا على دوار المدينه قريب الساعا بس كان اليوم كتير حلو بصراحه وما تدايقت بالمره

ابصر ليش حابه الشتا هالسنه, ما بعرف ممكن اغير رأيي بس تبدا تبرد الدنيا لاني مش صحبه مع البرد اطلاقا
بخبركم ساعتها عن مشاعري :)


بس هلأ يا جماعه..... رجعت الشتويه :)

اترككم مع الصور والفيديو

طول اليوم وانا عبالي اغنيه " تحت الشمسيه بلا وعد تلاقينا انا وهي " غبره بعرف :)

صحيح نسيت احكي اشي مهم
شكرا كتير كتير لرجال وستات المرور لانهم زادو الازمه ازمه :)













هي الاغنيه للي ما بعرفها :)


لخبطات



**
ليش العالم ما بتستوعب اني انا بس اشتغل بشركه, فانا موظفه بهالشركه مش مدير عام الشركه, بيجو عندي و بتوقعو اني راح امشيهلهم معاملاتهم واذا ما مشيت اذا انا مقصره بحقهم...

**
و بما اني مبرمجه اذا انا كمبيوترجيه - او كمبوطرجيه في مقوله اخرى - و بفهم باي شي بخص الكمبيوتر من صيانه من قطع من تصليح من برمجه بكل لغات البرمجه ومن جميعو....


**
اكره اشي عندي ادخل بحوار مع اشخاص الحوار معهم عقيم و خصوصي اللي بنص الحكي بتحكيلي " تسك تسك ستك مش صحيح اللي بتحكيه" كتير بتنرفزني هالحركه, وبرضه بكره اللي صوتهم عالي بالحوار لان انا طبيعتي صوتي مش عالي و بس يبلش يعلى بصير حاد و رفيع يعني اشي مخزي ...


**
المفروض بس انسان ياخد قرار بحياته انه يلتزم فيه و ما يتراجع لو مهما حس بالذنب ومهما انقهر من جوا ومهما أرقه الموضوع, وخصوصا بس يعرف ان الاطراف التانيه مش ماخده قراره بجدّيه و متأكدين من تراجعه عنها......اذا ما فهمتو اشي عادي لان هالكلام لنفسي بوجهه :$

**
ابن صاحبتي الي عمره 5 سنوات طلب منها تشتريله لعبه من وجهه نظرها انها خطره ومش مناسبه لعمره , فحكتله لأ و بعد الحاح كبير حكتله, بكره ان شاء الله بالجنه بتطلب من ربنا يعطيك اياها و بيعطيك اياها, انبسط واقتنع و وافق,غاب نص ساعه ورجع بحكيلها وهو معصب " ماما , انا بس اروح عالجنه راح اكون حج كبير كيف بدي العب؟؟؟" بعدين بحكيلها "هلأ بصير اطلب من ربنا ارجع صغير والعب باللعبه؟؟" حكتله اه انبسط وكمّل لعب


**
بنت صاحبتي اللي عمرها 4 سنوات بتسألها ماما بصير اتزوج حمزه؟؟؟ - حمزه هاد اخوها اللي لسا ما اجا
حكتلها لأ ماما ما بصير الوحده تتزوج اخوها
سألتها طيب بصير اتزوج بابا, حكتلها لأ ماما ما بصير الوحده تتزوج ابوها
انقهرت البنت و حكت ....طيب انا هلأ مين بدي اتزوج؟؟؟؟



معلش اليوم الاحد اول يوم بالاسبوع واطول يوم بالتاريخ ...فا انا بكره هاليوم من كل قلبي :(

نسوان....




انا اكتر كلمه بكرها بالحياه هي كلمه نسوان
بحبش اللي بستخدمها
يعني الكلمه اللي لازم تستخدم هي ستات
لكن اكتشفت ان في مجموعه من الستات بحس لازم يطلق عليهم كلمه نسوان
النكده الزنخه اللي دايما مكشره اللي بتزهق اللي حواليها وبتسم بدنهم
اللي بتهمل حالها و بتهمل زوجها وبيتها واولادها

فاااااااااااا
هاي الاغنيه مهداه لكل نكده و زنخه بتنكد عاللي حواليها وخصوصا على زوجها العزيز