Things I Like To Whisper About

Would You Hear Me Whispering

فرصه جديده....لكن لمن!!!



سمعته يهمهم بكلمات غير واضحه وهو يقف على البلكونه ليدخن سيجارته,لحين انتهائها من تحضير نفسها للخروج معه, هي تعلم انه حين يقوم بعمل طائش او ينوي القيام بعمل طائش هنالك عزومه غداء فاخره, لاعتقاده بان هذا كافي لينسيها تأخره عن البيت الى اولى ساعات الصباح.

اقتربت اكثر من الباب, سمعته يروي تفاصيل مغامرته في الليله الماضيه, ومن الكلام تأكدت انه يرويها لفتاه اخرى, وهو يردد عليها كلمات كانت تعتقد انه اوجدها لها فقط مثل " يا حب" و "عيونو" وغيرها من الكلمات التي كانت تكفيها سماعها من شفتيه فيما مضى, انها مكالمته مع انهاء سيجارته و هربت بسرعه الى غرفتها لتكمل تجهيز نفسها.

دخل الغرفه ولاحظ الاختلاف على وجهها, سألها بكل حنان الارض عن سبب تغيرها و هل تشعر باعياء او تعب, اجابت بالنفي وبانها فقط بحاجه لساعات نوم اضافيه و اخبرته بانها جاهزه و انطلقو.

لم تذهب من بالها تفاصيل المكالمه, و انتقلت من مشاعر الاشمئزاز منه الى مشاعر لوم النفس, كلما اشتكت لاحد تصرفاته هذه ينقلب الموضوع ضدها و جميعهن يلمنها , انت السبب, لولا انك اهملته لما اجبر ان ينظر الى الخارج, كيف اهملته؟؟؟ كيف وانا دائمه التجديد بكل شيء حوله, في نفسي, شكلي لون شعري طريقه لبسي دائما متغيره ومتجدده , في ديكور البيت, حتى في تحضير الاكل تعلمت جميع اطباق مطابخ العالم حتى لا يمّل من صنف معين, كيف اهملته وهو دائم المديح والشكر بسبب اهتمامها به, كيف اهملته وهي دائمه التفكير بما يسعده اولا.

سألته عن سبب تأخره في الليله السابقه, اجابها بانه قد حصل معه مشكله كبيره و سوء فهم بينه وبين صديق عمره, واضطر ان يبقى لينهو الموضوع حتى لا يفترقو وهم على خصام, فاولا واخرا هو صديق العمر ولا يمكن ان يتنازل عنه, سرد القصه وكأنه حفظها عن ظهر قلب, سردها بتفاصيل جعلتها اقرب من ان تكذب ما سمعته باذانها و تصدقه...


وهم في طريق العوده طلبت منه ان لا يتوجه فورا الى البيت, ارادت ان تفكر اكثر , وفجأه خطرت لها فكره, ما رأي زوجي العزيز و رأي اللاتي دافعن عنه لو انا التي فعلت فعلته القذره تلك, هل سيلومه رجال العائله لاهماله لها؟؟ هل سيقولون له انت الذي اجبرتها ان تنظر الى الخارج؟؟؟ هل سيتمالك نفسه حتى يخرج معها و يتناول وجبه الغداء ويسمعها تروي تفاصيل كاذبه ؟؟؟؟

بالطبع لا, سيكون مصيرها فوري منه و من رجال العائلتين ومن نساء العائلتين, ولماذا...لانها بكل بساطه امرأه, و هذه لوحدها تهمه قد تستحق عليها القتل, هو رجل و الرجل لا يعيبه شيء, لا الكذب ولا الخداع ولا الخيانه, الهذا يتصرف الرجال بحرّيه تامه ؟؟؟

حاول ان يبدأ اكثر من موضوع ليتحدثو به ولكنها كانت تنهيه باجابات مختصره جدا..لا..نعم...حسنا...اذا انت اردت ذلك, ولكنها احست بان شي داخلها سينفجر, احست بانها ستصرخ من شدّه الالم, وبدأت بتهدئه نفسها شيئا فشيئا...
"حسنا ماذا تريدين" سألت نفسها هذا السؤال " اتريدين الطلاق؟؟" ..." اتريدين الانتقام؟؟...ماذا تريدين" سكتت لبرهه و طلبت منه ان يتوقف, سألها ما بها رددت الطلب وبصوت لا حياة فيه, توقف و نظر اليها, هل تشعرين بالتعب؟؟ هل اخذك الى المستشفى؟؟...
نظرت اليه " لماذا كل هذا الحنان والاهتمام اذا ما عدت اعني لك شي؟؟"
علامات التعجب واضحه على عينيه " ما الذي تتحدثين عنه؟؟"
بالرغم من محاولاتها بان تتماسك ولا تبكي روت له تفاصيل المكالمه التي سمعتها ودموعها تملئ وجهها
سكت لم ينطق بشيء , واختفى اللون من وجهه و حاول ان يستجمع شيء ليبلع به صدمه الموقف ولكن دون جدوى
"اقسم لك بان شيء لم يحصل, اقسم لك بانها كانت اول مره و اخر مره, اقسم لك بانني شديد الندم على ما فعلت , اقسم لك..اقسم لك..."

" لا اصدقك..." قالتها وهي تفتح باب السياره
" اين تذهبين؟؟؟ ارجوكي لا تتركيني , ارجوكي لا استطيع الحياه بدونك"
غادرت السياره و بدأت بالمشي بعكس اتجاه السيارات حتى لا يستطيع اللحاق بها
نزل من السياره و ركض اليها " ارجوكي سامحيني, اقسم لك بانني سأتغير, ارجوكي.."
فجأه تذكرت ما الذي جعلها تذهب الى البلكون خلفه اليوم, لقد ارادت ان تخبره بانها ذهبت الى الطبيب اليوم الذي نقل لها خبر حملها, كيف سيعيش هذا الطفل, ماذا افعل, يا اللهي دلني , نظرت اليه و اشفقت على مظهره , اصفر اللون , دموعه تنهمر بلا سيطره, و هو يمسك يداها و يضمهم اليه.

قالت له " اتقسم؟؟؟"
" اقسم"
" اتقسم بالله؟؟؟"...."اقسم بالله ان لا اعود الى ذلك"
" اتقسم بالله الذي رزقنا طفلنا".." اقسم ب... ماذا" و اتسعت عيناه المليئتان بالدموع
" امسكت يده و وضعتها على بطنها و قالت له " بطفلنا هذا"... ضمها اليه و كأنه اول مرّه يضمها, وهمس في اذنها
اقسم بالله الذي رزقني اياكي ان لا اعود الى ذلك ابدا"

ابتسمت, ربما صدّقته و ربما ارادت ان تصدقه لا تدري و لكنها تعلم انها ستغفر له كل اخطاءه لانه تحبه اولا و لانه والد طفلها الذي لن تحرمه من والده, ولانه الرجل...نعم الرجل الذي سيغفر له الجميع اعماله فلماذا هي لا تغفر له ايضا.....

الاعتراف بالذنب فضيله



انا اليوم غلطت و كتير مقهوره من حالي :(

النا فتره لانه اخر السنه ضغط الشغل مش طبيعي بالمره, كل شي لازم يرجعو لقسم البرمجه فيه مش فاهمه ليش, ولاني مسؤوله عن قسم الاحصاء و قسم البرمجه فكلّه مطلوب مني شخصيا و بعدين بوزع اللي ممكن يتوزع على باقي الموظفين
اليوم اتصلو فينا من المفرق ان الشبكه عندهم عطلانه والشغل واقف, و لاجل الصدف بس يكون رئيس قسم الصيانه مجاز كل هالاعطال بتصير وبتتحول تلقائي لقسمي :$

بس يصير عطل بالمحافظات, ما بعرف شو بصيرلهم كل دقيقه بتصلو عاساس انهم ماشاء الله عليهم ما بضيعو ولا دقيقه, بنحكيلهم اعطونا ربع ساعه نفحص الخط و نتصل بالاتصالات, لكن ابدا و ببدو يرنو عالمباشر وعالارضي وعالخلويات اشي بكركب عالاخر.

المهم اجا مراجع يسألني اشي وانا عالتلفون و بحكي و بشرح للبنت شو تعمل وهي ولا الها دخل, ولا راضيه تستوعب شو بحكيلها تعمل, صاحبتي بالمكتب جاوبت المراجع بس هو اصرّ ان انا اجاوبه لانهم بعتوه علي بالاسم ليسألني , وانا بحكي عالتلفون و البنت مش فاهمه وصاحبتي بتشرح للمراجع و المرجع بصوت عالي بحكي معي -عجئه من الاخر- انا من غير وعي صرخت عالمراجع انك مش شايفني بحكي تلفون وطي صوتك مش عارفه اسمع :$ المراجع كبير بالعمر بحكيلي معك حق معك حق وانا بعتذر وطلع.

سكرت الخط وانا بدي انجلط من حالي , شو اللي عملتيه, شوي المراجع راجع يحكيلي سامحيني يا بنتي ما كان قصدي اعلي صوتي :"(
انا كرهت حالي اضعاف و حكيتلو لأ انت سامحني عمو والله ما بعرف شو صرلي انا اسفه كتير, بحكيلي لا انت سامحيني بس يابنتي بس يكون الواحد بحاجه لاشي بتصرف وهو مش واعي.
جد كرهت حالي وما خليته يطلع الا بس تأكدت انه مش متدايق مني :(

وامعتصماه



بزمنا تغير المعتصم

المعتصم باكل

المعتصم بشرب

المعتصم بحب

المعتصم بعشق

المعتصم جبان

المعتصم بخاف

المعتصم مدعوس عراسه

المعتصم الفلوس عاميته

المعتصم الفقر عاميه

المعتصم متمسح

المعتصم بوقع معاهدات سلام

المعتصم بحفر لاخوه

المعتصم بخنق اخوه

المعتصم بقتل اخوه

.
.
.
.
.

تعدد المعتصم و الرد واحد

المعتصم مش فاضي.....


ايام من ذهب 2



اصدقائي و صديقاتي
اخواني واخواتي
اولا كل عام وانتو بالف خير بمناسبه راس السنه الهجريه
و مقدما بمناسبه راس السنه الميلاديه
و بحب اذكركم بان الاحد ان شاء الله 10 من محرم
اللي بنسميه عاشوراء
و وصلنا احاديث كتيره عن الرسول صلى الله عليه وسلم بذكر فيها فضل صيام هاليوم
ومنها بانه والله اعلم صيام هاليوم يكّفر السنه التي قبلها

و العاده انّا بنصوم يوم 9 و 10
حتى نخالف اليهود اللي بصومو عاشوراء لوحده و هذا كنوع من الشكر لله على نجاة سيدنا موسى وقومه من فرعون

يعني ان شاء الله بكره 9 محرمو يستحب الصيام فيه بالاضافه ليوم 10 اللي راح يكون الاحد
الله يتقبل منّا و منكم ان شاء الله


_______________________


عن عبد اللَّه بن أبي يزيد أنه سمع ابن عباس رضي اللَّه عنهما وسئل عن صيام يوم عاشوراء؟ فقال: " ما علمت أن رسول اللَّه صلى الله عليه وسلم صام يوماً يطلب فضله على الأيام إلا هذا اليوم، ولا شهراً إلا هذا الشهر - يعني رمضان -" .
وفي لفظ: " ما رأيت النبي صلى الله عليه وسلم يتحرى صيام يوم فضله على غيره إلا هذا اليوم: يوم عاشوراء..".
أخرجه البخاري (4/245) (ح2006) ، ومسلم (1132) ، والنسائي (4/204) (ح2370)، وأحمد (1/367) ، وابن خزيمة (2086)، والبيهقي في "شعب الإيمان" (3779)، وفي "السنن الكبرى" (4/286)، والطبراني (1254).

كلنا ليلى ام كلنا امل...نحن من نختار



امل زميلتي بالعمل, تعرفت عليها لمدّه شهر فقط لانني انا كنت بديلتها في العمل, و لكنني كنت اراها كل فتره قد تمتد احيانا الى اشهر عندما كانت تأتي لزياره صديقاتها بالعمل, واللاتي اصبحن صديقاتي بعدها وعن طريقهم اصبحنا صديقتين.

اكثر من روايه سمعتها عن قصه صديقتي امل و اكثرها تداولا بالرغم من شح التفاصيل الدقيقه , انها بدأت وهي في الثانيه عشر من عمرها, عندما حصل انتفاخ غريب في رجلها, شك الاطباء بانه مرض خبيث و اوصو بضروره بتر الرجل كامله حتى لا ينتقل المرض الى باقي الجسم, و بعد البتر اكتشفو سؤ تقديرهم و تشخيصهم للمرض....

و هكذا منذ الطفوله عاشت امل برجل واحده و بلقب ضل معها حتى انه كتب على الصندوق الخلفي لسيارتها " احذر السائق مقعد ", بعد فتره من الزمن بدأت امل تتعود على استخدام الرجل الاصناعيه, و اكملت دراستها بالمدرسه و انتسبت الى الجامعه وكانت من المتفوقات.

لا اذكر انني سمعت امل تشتكي من وضعها الا مرّه واحده, وكانت اول مره ارى فيها رجلها, كان الصيف على غير عادته حار جدا , و قد بررت تأخرها بزيارتنا بسبب الحر, لمناها و اخبرناها بان تلك ليست حجه و هي امل التي لا يقف شي بطريقها, كشفت لنا امل عن ساقها لاكتشف بان البتر كان من منبت الرجل, يصل الى منطقه الحوض, وقد ظهر اسفل الشريط الخاص بتثبيت الرجل تقرحات و جروح عميقه, عرفنا بعدها بان حر الصيف و احتكاك الرجل الصناعيه هي السبب في تلك التقرحات, وبانها معظم ايام الصيف تقضيها في البيت لانها تضطر الى تقليل استخدام الرجل الصناعيه.

علاقه امل بوالديها علاقه وطيده جدا, تزوج الاخوان و تزوجت الاخوات ولم يبقى الا امل, والتي كانت قويه الشخصيه بحد يلفت النظر, واحيانا كانت جريئه بقدر يتعدى الحدود بقليل وكنّا دائما نعذرها لاننا نعتقد بان اصابتها هي المنبع الحقيقي لتصرفاتها, وبسبب كبر عمر الاب و مرضه فكانت امل هي عينه و يده ولسانه في كل ما يخص حياته, و توالت السنين وسمعنا ان امل تكمل دراسه الماجستير وانتقلت الى التدريس في كليه معروفه.

وصلت امل الى سن يصفه الناس من حولنا بانه سن " العنوسه" - لا ادري من وضع هذا القانون ومن حدد سن الزواج سواء للفتاه ام للرجل؟؟ ومن اطلق هذا المسمى وما من اي جذر استنبطه؟؟؟ - لنعود الى امل, في يوم هاتفتني امل على غير عاده, حيث انني اعرف اخبارها من صديقاتنا او من زياراتها للعمل, اتصلت لتدعوني الى حفله عرسها .... كان والدها يملك دكان وكان يريد ان يبيعه, وكالعاده امل هي المتحدث الرسمي باسم الوالد, وجاء شاب تركي وسيم مستقر بالاردن لاتمام دراساته العليا و اراد ان يشتري الدكان, و حسب ما قال لنا انه اعجب فيها من اول نظره, واعجب بها اكثر من طريقه تعاملها " الدفشه" , بعد فتره تقدم لخطبتها و لكنها رفضت, وعندما قارب على انهاء دراسته تقدم لخطبتها مره اخرى , وهذه المره وافقت امل,كان عرسها جميل جدا, وهي كانت اجمل, لم استطع يوما ان اصنف امل اجميله هي ام لا, بيضاء البشره, وجميع ملامح وجهها فيها ضخامه, لو نظرت الى كل ملمح لوجدته اقرب الى القبح ولكن سبحان الله اجتماع هذه الملامح مع بعضها اعطى لوجه امل جاذبيه غريبه,ولكن العريس كان وسيم بالاجماع, كانت جميله في فستانها الابيض و لم تجلس طوال العرس, كانت ترقص و تتمايل و هو معها ايضا لم يجلس, كان عرس لن يتنسى

سمعنا بعدها ان امل تكمل دراسه الدكتوراه و بسبب حملها فانها اضطرت للجلوس في المنزل , وعندما ذهبنا لنهنئها بقدوم "دنيا" قالت لنا بانها وفي الشهور الاخيره كانت لا تضع الرجل الصناعيه اطلاقا بسبب زياده الوزن, وبان زوجها كان يحاول ان لا يتركها لفترات طويله, لانه يساعدها في كل حركه , وحتى في منتصف الليل عندما كانت بحاجه الى الذهاب الى لقضاء حاجتها, كانت توقظه كان يحملها بدون اي تأفف او تذمر, اعترفت لنا بانها لم تكن تتوقع ان تستمر حياتهم معا عندما تقدم لخطبتها, وانها وافقت وهي متأكده من عدم استمرار حياتهم معا, ولكن قالت لنفسها ساخرج من هذا الزواج بطفل يملئ علي دنيتي و يؤنس كبرتي.

قبل شهرين وبالتحديد في 20-10-2009 اتصلت بي امل لتدعوني الى حفله ستقيمها بمناسبه نيلها شهاده الدكتوراه التي حصلت عليها قبل سنه تقريبا , و بالفعل ذهبت وكانت الحفله اقرب منها لتجمع الصديقات , تحدثنا و ضحكنا و رقصنا و اكلنا وكانت جمعه جميله جدا, وتعرفنا على " فرح" الابنه الثانيه لامل ,وفي نهايه الحفل وقفت امل لتشكرنا على تلبيه دعوتها و قالت لنا بانها دعت فقط من تحبهم و تحب ان تراهم, و قالت لنا بان والدها رحمه الله كان يلح عليها لاقامه هذه الحفله, و تلبيه لرغبة والدها اقامت هذه الحفله, و قد اختارت اليوم بالذات لانه في مثل هذا اليوم توفي والدها قبل سنه, وبان الحزن و الجرح لفقدانه سيبقى في قلوبهم ولكنه لم يكن يوما من محبي الحزن وكان دائما يدعوهم الى الفرح والتفائل, وقد سألته يوما ما اكثر شيء يمكن ان يسعدك, قال لها بان يراها في بيت زوجها و هي تحمل اعلى الشهادات, و لذلك اقامت هذه الحفله اهداءا لروحه الطيبه ولتقول له " شكرا "....

________________

بالرغم من الحياه التي قد تفرض على اي فتاه في موقف امل, امل اختارت بان تحدد احلامها و اهدافها و تسعى لتحقيقها, وهذا ما يجب ان نصبو جميعنا اليه.

الموقع الجديد لمدونه شتاء 2010

هي عنوان الموقع الجديد للترشيح لمدونه شتاء 2010

الموقع الجديد

شكرا للمدون
اسامه على تجهيزه
وحاليا عم بجهزلنا اسامه شاشه التصويت
واللي راح يبدا باول شهر 1 ان شاء الله
يلااا بنستنا ترشيحاتكم لاخر شهر 12
و برضه بنستنى التصويت
حاليا ما في شاشه بتبين المدونات اللي تم ترشيحها
ان شاء الله بالقريب العاجل بتكون جاهزه
شكرا لمشاركتكم
_________________

لسا العطل الشامل شغّال
بس الشاشه الله يسعدها قررت تشتغل بعد 20 الف محاوله
يلاا سلاام قبل ما تقرر تفصل
نراكم :)

عطل شامل



اله فتره عندي عطل شامل
اللاب توب المروحه ابصر شو مالها زي الجاروشه
ما بشغله خايفه يخرب اشي
و لاجل الصدف الكفاله خلصت قبل شهر :(
انا جايبته من دبي
و الحمد لله ما خرب وما بعرف مين الوكيل هون اساسا :)
و لله الحمد في النا زميل بالشغل بعرف يزبط لاب توبات فيوم الخميس بدو يزبطلي اياه
المهم قلت لحالي يلا في جهاز و بنرجع للعصر القديم وبشتغل عليه
ولاجل الصدف والحظ اللي بجنن السكرين ضربت
فجأه بتطلع اصوات غريبه
فكرت كرت الشاشه, بس طلع الشاشه اللي فيها مشكله
ومش عارفه حد بزبط شاشات
و بالشغل عندي شغل كتييييييييير و ما بفضى غير كم دقيقه علشان افطر فيهم
والكل بحضر عاصي و الغريب و باقي المسلسلات التركيه
فيادوب اسبوع بخلص الداون لوود وبصير النت ميت " فساد اداري "
و بخلصو هالكم دقيقه وانا يا دوب بشبك الايميل
هلأ انا طفيت النت و رجعت شبكته ليفصلو كل الاجهزه و الحق اكتب هالبوست قبل ما يشبكو العالم
هاي فائدة الادمن يوزر :)

فياااا جماعه اسفه على التأخر بالرد
و على عدم التعليق عالبوستات الجديده
كلها بقرأها عالموبايل بالبيت
ولكن ما بقدر ارد عليهم
الله يفرجها بهالعطل التكنولوجي اللي انا فيه
سلاااااااااااااااااااام


انطلاقة مدون جديد

بتمنى انكم ترحبو معي بالمدونة الجديده


وهو مدون اردني

بدوّن مباشره من الاراضي السعوديه

اهلا وسهلا فيك :)

تنبؤات الابراج لعام 2010



اهلَين وسهلَين فيكون في عالم ويسبر "شمّاس" السحري للابراج,زي ما عودتكُن باول كِل سِنه بدي نبئكُن بتوكعات الابراج لكِل واحد و وحده فيكون- المقدمه اللبنانيه لزوم التسويق للمنتج :) و بعرف اني ما عودتكم على شي بس برضه الكزبه لزوم التسويق , و خلص صار حنكي يوجعني ,فنرجع اردنيين مرّه تانيه :)

بالنسبه لتوقعاتنا السياسيه
في حد راح يموت, وفي حد راح يضل , وفي ناس راح يألفو كتب, وفي بلاد راح تنباع وفي بلاد راح تتبهدل وفي بلاد راح تضلها مترفشه ببطن بلاد تانيه.......باختصار مفيد جدا يبقى الحال على ما هو عليه وعلى المتضرر انه ياكل هوا ويضلو لابد وساكت ....العادي تبعنا يعني .

الاوضاع الماليه
هلأ بالله عليكم لو في واحد من اللي بقرأو المدونه عنده اموال بحاجه لدراسه اوضاع بكون هون؟؟؟ اي اللي معو 50 نيره بهالوقت يضحك بعبو..واللي معو وبقرأ فبس علشان احطكم بالصوره, على رأي الجد اللي بالشهد والدموع " منّه له منّه له..جي رايح منّه له " :)

اما بالنسبه لتوكعاتنا للابراج لسِنة الفاين وعشراه وبما ان الاوضاع ماكله هوا فالسنه سنه خير للابراج الهوائيه , ولكن للاسف الناريه راح تنطفي السنه, والترابيه راح تتحول الى غبار رمليه شماليه شرقيه, و المائيه راح تنقلب على راس اصحابها بامواج عاليه الارتفاع فيا جماعه بالعربي ...السنه مش سنتكم

برج الحمل - برج ناري

بما انه برجي فراح احطّه لحاله ,هالبرج راح يقاوم الرياح العاتيه وما راح ينطفي وراح يقاوم يعني بالعربي خاوا بدها تكون سنه خير - ان شاء الله طبعا :$ - و كل اللي بهالبرج راح يتغير مديرهم, لا لا راح يغيرو شغلهم, و راح يغيرو سياراتهم, وراح تتحقق كل امنياتهم اللي ببالهم حاليا واللي ممكن تطرأ لظروف جديده - استحياطا يعني - واصحاب هاد البرج راح يهدى بالهم, و يكونو اقرب لله ان شاء الله :)

الاسد والقوس -برج ناري

مثاليين, ويمكن هاي مشكلتكم وهاد اللي خلاكم تاكلو هوا
بهيك زمن ما بتقدرو تعيشو, معكم فرصه لاخر السنه انكم تتغيرو الكم عندي انجحكم السنه الجاي :)
خياليين وحالمين, خلّو الاحلام تنفعكم اذا بالواقع مش مشيين حالكم - طبعا هون انا بدّي اوضح اني بستثني برج الحمل من هالكلام - وين كنت ..اه مشو حالكم بالاحلام لشوف :)

برج الثور و العذراء والجدي - برج ترابي

اصحاب هاي الابراج عمليين وعلميين, بسيطين ومحل ثقه للجميع...انبسطتو عحالكم صح !!!
ماشي ماشي خلّي العلم ينفعكم, لاا لااا لااااه راح تاكلو هوا السنه :)))


برج الجوزاء و الميزان والدلو -برج هوائي

ايوه ياعم....مشيه معاك حلاوه, راح تتجوزي يختي ارتاحي منك الها , اخيرا راح يتحقق الحلم :$

وكل واحد و وحده منكم راح يطير و تطير لمستقبل باهر زاهر ماهر ان شاء الله
استغلو السنه لاني قررت السنه الجاي احطكم مع الفئه اللي ما راح تنجح :)

سرطان وعقرب وحوت -برج مائي

اصحاب هالابراج حسيسيييييييين و شاعريين, بس مش دوامه اللي راح تدخلوها السنه, هوا ومي يا سلااااااااااااااااااام.... ملااااااااااااااااااهي وعلشان ما حد يبدا يبكي, الملاهي حلوه و بتجنن صح يااااااااااي
بس المشكله انكم ما راح تطلعو منها لنهايه السنه :$


وهيدا كيل اللي بنتوكعه لهالسِنه و بتمنى لالكن سنه سعيده و هابي نيو يير و تشير اب يا جماعه اتس جست يور لاك :))



المعلومات السابق ذكرها جديده علي بصراحه واضطريت ابعبش وابحبش بالنت لاعرف ترتيب الابراج و انواعهم فشكرا لعمو جوجل.
اه واشي تاني ,اللي بدو يزعل علشان برجه فانا بعتذر الموضوع مش بايدي هاي تنبؤات فلكيه و علميه بحته ومش اشي انا اخترعته :)

مدونة شتاء 2010...متذكرين!!!

مش عارفه اذا الموضوع ما انتشر او ان الفكره ما لاقت استحسانكم, ولكن نسبه الترشيح بالنسبه للمره الماضيه كتير قليله, و بما انّا المره الماضيه بعد انتهاء فتره الترشيح في ناس اقترحو علينا مدونات جد بتستاهل وكتير سعدنا بالتعرف عليها
لذااااااااااااااااااااا تم تمديد فتره الترشيح لاخر الشهر :)

و كمان في موقع للترشيح و للتصويت بقوم المدون اسامه من مدونه crimson بتصميمه, وكالعاده غلبنا معنا قويدر بالموضوع وان شاء الله باقرب وقت بنحط اللينك للموقع الجديد


و لحتى يجهز الموقع بتقدرو ترشحو اي مدونات جديده هون

المدونات اللي تم ترشيحها لغايه اليوم هي



NasEr - http://naserz.blogspot.com

Hareega - http://hareega.blogspot.com/

مدونة حياة تستحق الانقاذ -ميساء - http://omelmees.blogspot.com/

مدونة فرح - http://creativefarah.blogspot.com/

2esas 6arma- whisper-http://2esas6arma.blogspot.com/

Ahmad Hamdan -http://thoughts-ahmad.blogspot.com/

Mayyasi blog - http://mayyasi.blogspot.com/

Mais - http://mais13.blogspot.com/

Qwaider blog - http://blog.sweetestmemories.com/

مدونة احزان شجر البطاطا- http://sharifo.jeeran.com

مدونة الكاتبه انتصار عبد المنعم- http://intissar1999.blogspot.com/

Maher Jilani blog - http://www.mohor.net/

فراغ داكن -Crimson^ - http://crimsonfeelings.blogspot.com/

Ahmad Al Mahrouq blog - http://amahrouq.blogspot.com/

Ahmad Merie - http://ahmadmerie.blogspot.com/

احمد دعموس - http://ammannet.net/blogs/ahmad/

اسامة الرمح - http://osamaa.com/blog/

المدونة شارم -http://sharm2t.blogspot.com/

Yazid's Blog - http://yazzzidzblog.blogspot.com/

Saifallah blog - http://saifallah-held।blogspot।com/

Mohammed Ali blog- www.moh3li.com/blog

مدونه محمد عمر - www.mohomar.com

شو بالنسبه...2



مشاهدات غريبه مرّت علي بهالكم يوم

معظم الناس اللي حوالينا ما عندها مبدأ تمشي عليه,كلهم اقوال و كلام عالفاضي
من الاشياء اللي بكرها بالعالم واللي للاسف منتشره بشكل كبير هو لمّا الواحد يصير ينظّر بالحكي و الحكم والمواعظ بالحلال والحرام وباللي بصير واللي ما بصير, و بس تلف الدنيا وهو ينحط بموقع اللي كان يلومه بتتغير كل معايير الحياه عنده, بصير الدين و الحكم و العادات والتقاليد اللي كان يحكي عنها مختفيه تماما و بصير ميزان الامور مقلوب فورا بما انها ما تخدم مصلحته بهاد الموقف اللي هو فيه, وطبعا ممكن ترجع مرّه تانيه للوضع الطبيعي لمّا يكون بموقف بحتاج فيها انها ترجع, لا مبدأ ولا هدف ولا اي شي مهم غير مصلحته الشخصيه فقط

اشي تاني بصراحه انا بحسّه مخزي, ان البنات بهالايام يا امّا دلوعات دلّع مقزز مصطنع و تقليد اعمى لهبل العالم, يا امّا بنت ما بتستحي صوتها عالي و ممكن تستخدم الفاظ بذيئه, عاساس هي هيك فايعه وكول, مثل قبل كم يوم وانا ماشيه من عند دورا الداخليه, طبعا هناك بتوقف 100 الف مرّه لتقدر تلف عالدوار, في بنت اموره واقفه محجبه ولبسها ما اله دخل بالحجاب, بس لفتت نظري بشكل ايجابي مش عارفه ليش, شوي مسكت الموبايل وكأنها بتحكي مع صاحبها اللي لاطعها من الصبح على رأيها ...بتحكيله وهي معصبه " وينك يا كندره...الي ساعه بستنا بحضرك يا كندره....يا حيوان انت هلأ بالسيرفيس ويلا بالبيت يا كندره"
انا انصدمت بصراحه, ول عليكي وك شو مالك ؟؟؟ شو هالقرف اللي انت فيه و شو هالعلاقه المبنيه على قلّه الاحترام هاي, وهاي طبعا القصه الالطف اللي بقدر اكتب الفاظها لانه الالفاظ بتزيد بالبذائه عند مجموعه من البنات باضعاف مضاعفه

مشاهده تانيه هي الانسجام التام الكامل المتكامل اللي بكون بين سواق التكسي وبين البنت اللي قاعده ورا, يعني بكونو بتحدثو وبياخدو وبعطو وبضحكو, ايش في!!! مش هيك يعني, طبعا انا مش قصدي اني مستقلّه بسواقين التكاسي لا بالعكس كل العالم خير وبركه, بس في حدود المفروض تضلها علشان ما تتعرضي لكلمه او لموقف مش منيح من ورا انه فهم لطافتك الزايده بشكل غلط


شو بالنسبه للشعب اللي نص شبابه متدّمر من الحب ...امبارح كان نفسي اسمع البرنامج اللي حكت عنه فرح بمدونتها و بالصدفه بحكي لاخوي دورلي عليه على قناه من هالقنوات يا دوب حط اول قناه طلع البرنامج, او مش نفسه بس نفس المبدأ

يعني بنص ساعه انصدمنا و حششنا و ازبهلينا انا اخوي بشكل مش طبيعي, بحبها ..... بحبو.... وانا متزوج و عندي اولاد بس بحب بنت تانيه والحب اقوى من كل شي.... و انا بحب واحد متزوج .....و واحد اله اسبوع متعرف على بنت و متدمر لانه بعد يومين حكالها خلينا ننقل علاقتنا من صداقه لحب - مع اني مش فاهمه كيف صارت, يعني حكالها هيك حكتله يلا و هلأ صارو بعلاقه حب كيف يعني , المهم و بعد اسبوع البنت انخطبت والشب متدمر وبدو يموت , بسأله المذيع كم عمرك بحكيلو 19!!! احلى شي وحده اتصلت بتحي للمذيع متزكر اللي اتصلت فيك قبل كم حلقه تحكي عن زوجها انه بخونها مع وحده قريبتها, انا قريبتها ....بحكيلي اخوي تخيلي ان هالعالم عايشين حوالينا واحنا مش عارفينهم, يعني ممكن اي واحد بمشي جنبك بمكان يكون هواللي اتصل واللي ببكي عالهوا..جد اشي بصدم

يعني مشاهدات بترفع الراس بصراحه و حبيت اشارككم فيها..........اشي بخزي


صباح الاحد الجميل


الله يسعد صباحكم...ومسائكم....و كل اوقاتكم

كعادة الاحد ما بوصل الشغل الا بتبدا الطلبات
وبحس المدير طول الاجازه وهو بفكر كيف يخلينا طول الدوام مشغولين
وانا حابّه اني اضل متفائله وما اخسر اثار عطله الاسبوع باول اليوم الاول
فلهيك اول ما قرأت هالنكته
حبيت ارسم ضحكه على وجوهكم
مع ان انا حششت عليها مش بس ضحكت


في اثنين اخوان شاهدوا حادث سير على الدوار الثالث....انطلبوا للمحكمه حتى يشهدوا باللي شافوه.
قال الأخ الاكبر للقاضي انا يا سيدي بقللك شو اللي صار
- (راح زاح كل الاغراض اللي على طاولة القاضي ووضع عقاله في النص ووضع علبة الدخان بجانب العقال ووضع بالقرب منهما قداحة وخلع كندرته ووضعها على حافة الطاوله ).
قله القاضي : شو هذا
اجاب: العقال يا سيدي هذا الدوار وباكيت الدخان سيارة هذا الزلمه والقداحه سيارة الزلمه الثاني شوف يا سييدي:
باكيت الدخان كان بجانب العقال يعني داخل الدوار اما القداحه كانت جايه من خارج الدوار وضربت في باكيت الدخان يعني سلامة فهمك الحق على القداحه مش على باكيت الدخان
وبالتالي صاحب السياره ( القداحه هو اللي عليه الحق)
قله القاضي : طيب فردتين الكندره اللي على طرف الطاوله شو هظول؟؟؟
قله هضول انا واخوي كنا بنتفرج على الحادث يا سيدي


فيلم رعب




الي فتره الذاكره عندي ضاربه, اذا ما كتبت اللي بدي اياه على الريمايندر عالموبايل خلص بروح, الكل حكالي ان نقص فيتامين B12 هو اللي بعمل هيك رحت عالدكتوره و كتبتلي فحص - مع انها حكتلي انه ما اله دخل بالذاكره و ناس بحكو ان اله دخل بالذاكره مش عارفه , امبارح رحت عملت الفحص, وانا هناك اجت عيله من اب وام و بنت عمرها تقريبا 5 سنوات و ولد عمره 3 سنوات , الام والولد والبنت بدهم يعملولهم فحص.

دخلو العيله قبلي بس انا بما انه دوري بعدهم فقاعده بمكان شايفتهم منه, العيله كلها دخلت و الاولاد متوترين من قبل ما يدخلو غرفه الفحص, والاب اقترح انهم يعملو فحص للام قبل الاولاد علشان بس يعملو فحص لواحد من الاولاد تمسكه وتطلع فيه بره الغرفه, انا مسكت حالي بالعافيه, انه خليك انت بره انت والاولاد لتعمل الام الفحص, بعدين واحد واحد بتدخلوه, لكن ضليت ساكته, مش الكل بحب الناس الفضوليين :)

عملو فحص للام , الاولاد شافو الابره من هون بدا البكى النئنئه, خلصت الام مسك الاب الولد و يا دوب نيمه عالتخت علشان تسحب الممرضه الدم, انفجر الولد بالبكا, و بدا يفعفط واجريه تضرب التخت, ويصرخ وبس حطت الابره صار يصرخ, دور راما دور راما, انه دور اخته, مسكين ما لقى طريقه يخلص منها غير انه يزكرهم باخته, اتطلعت عالبنت اللي واقفه تطلع عالمنظر, ما بتبكي المسكينه, بترج و بتطلع اصوات غريبه , كأنها بتتنفس بصوت عالي و بترج و خلصو من الولد الاب مسك البنت و نيمها عالتخت, الام استلمت الولد و حطتله لزيقه و قعدت تسكته, البنت صارت تصرخ "بديش بابا بدي ماما...ماما تعالي بدي اياكييييييييي" و صار هاد يبكي ماما بدي اياكي, والبنت تبكي ماما بدي اياكي, خلصو كل شي و الاب اخد البنت يلبسها جاكيتها, الام بتحكيلهم "هلأ بابا بدو ياخدنا عند تيتا" والمفروض انه مشوار كتيير راح يبسطهم الولد بحكيلها وهو ببكي طبعا " بديييييييييييييييس بدي اللّوح عالبييييييت" اللّوح يعني اروّح

يا الله شو انقهرت عليهم, يعني يفكرو شوي الاب والام بدل ما يخلّو الاولاد ياكلو هالرعبه, خصوصا البنت جد منظرها وهي بتطلع عاخوها و هو ببكي ومنظر الابره اشي جد بخوف, انا اساسا رايحه ومتردده, انا شخصيا بكره الابر و بخاف منهم, وما بنكر ان منظر الاولاد كان فيلم رعب الي كمان, بس برضه شجعني اني اخد الابره وانا ساكته ولا نفس :( مع ان ايد الممرضه طلعت مش خفيفه بالمره و لهلأ ايدي في دائره اللوان احمر واخضر و بنفسجي محل الابره و كتيييييييير بتوجعني, الله يعينهم للصغار ابصر شو صار فيهم :(

هلوسات اخر الليل



وانا بحضر نهايه فيلم Just Like Heaven للمره العاشره يمكن :) فكرت لو كانت القصه في بلد عربي, هل راح تكون نفس النهايه؟؟
بعد ما بالمستشفى لمّا فاقت ما تعرّفت عليه, روحت عالبيت لقته عامللها حديقه و برضه ما تعرّفت عليه و بس لمسو ايدين بعض تزكرته, لو عنّا كان زعل و انئمص من المستشفى, ول عليها بعد كل اللي عملتلها اياه بتسوي حالها بتعرفنيش, وبتنئح عليه كرامته و كبريائه و ما برجع بحكي معها بالمره.

ونهايه فيلم Notting Hill يا حبيبي بعد ما البنت تروح وتعترف بحبها اله وهو يرفض حبها, ويروحلها عالمؤتمر الصحفي و يطلب انها تسامحه, لو ببلد عربي يا سلاااااااااام كان استغلّت الفرصه, والله لانتقم منه انا يرفض حبي؟؟؟ انا يطلعني من مكتبته مكسوره الخاطر, خليه يدوق اللي دوقني اياه.


و فيلم Fever Pitch يااااا لهوووووووييييي لو تكون بنت تركت شب بعد مشكله و يرجعلها عالباب و يطلب منها تعطيه فرصه تانيه و هي تحكيلو لأ و هو يترجاها و يطلب الزواج وما ترضى و يصير مش عارف يعيش, لو ببلد عربي...والله لاتجوز ست ستها و اخليها تندم عاليوم اللي رفضتني فيه, بتشوف والله لالعن $#@#$ و الله لافظحها ...

كتير قصص حب كان المفروض يكون مصيرها الزواج بتنتهي لاسباب تافهه و خصوصا الكبرياء والكرامه, مع انه ما بتكون كرامه ولا كبرياء حد انداس على طرفها, لكن هيك مخنا العربي كل شي بمس كرامتنا , و كرامتنا ما بتسمحلنا نعمل اشياء كتيره , وبتخلينا نخسر اشياء كتيره

و المشكله بالمواضيع اللي كرامتنا المفوض تصرّخ علينا فيها مش بس تنئح علينا, بتمووووت كل مشاعرنا, بنفقد الاحساس باي معنى بالحياه و بنصير عباره عن اشخاص متلبدين المشاعر, و في جزء بمثل انه مش حاسس علشان يمشي على المثل اللي زي امثال كتير غيرو بتدعي للبلاده و للاستكانه اللي بحكي " مين خاف سيلم"


بعرف الموضوع تشعب لاكتر من اشي....بس هاد اللي خطر ببالي :)
تصبحو على خير :)