Things I Like To Whisper About

Would You Hear Me Whispering

مساكين

بتعرفو الشد العضلي اللي بصيبنا بس نكون مش متعودين على لعب الرياضه
او النا فتره مش لاعبين
بعد نص ساعه لعب فورا بصيبنا شد عضلي
انا والحمد لله ما عمري جربته وان شاء الله ما بجربه :$
بس بشوف خواني بس يكون الهم فتره مش لاعبين basketball
برجعو مساكين ماكلين هوا.

الاشي اللي جديد سمعت عنه
هو عن نوع من الغنم بس يفرح او يخاف او ينفعل لاي سبب بصيبه شد عضلي :)
اتركم مع الفيديو.....جد تحشيش خصوصا بس يفتح الشمسيه بوجههم ههههههههههههههه
مساكين...جد مساكين

video


ياااي شفتو المسلسل التركي الجديد؟؟؟

جد جد جد زهقت من المسلسلات التركيه, افففتتتتتتت كل القنوات صارت متخصصه بالمسلسلات االتركيه المدبلجه, وانا من الناس الي بكرهو المسلسلات المدبلجه, و المسلسلات اللي بتطول وهمه بعرضو فيها.

يعني ممكن احنا كنا من الناس القليلين بالاردن اللي ما حضرو كساندرا و لا تابعو ولا نص حلقه منها.
صاحباتي بالشغل من وقت نور و همه كل يوم الصبح مع فنجان القهوه لازم يعيدو اللي صار في حلقه امبارح بكل لفته و كل نظره, حتى مرات بصيرو يحكو عن الاكل اللي كان على سفره الفطور في مسلسل نور!!!!

زهقت و قزيت و كل ما نحكي خلصنا من واحد بيجينا واحد تاني, ويلا الدعايات اللي بحطوها للمسلسل , قبل كم يوم بحكو عن مسلسل جديد, الاخت اللي بتشوقنا لنحضر المسلسل بتحكي بما معناه...انه هالمسلسل راح يرجع يعلمنا معنى الحب و كيف نحب من جديد....بالله عليكي....يعني كتّر الله خيركم والله, يعني لولاكم كان ابصر كيف كنا راح نعيش, حب؟؟ شو يعني حب؟؟؟ يلااا بسرعه اعرضو المسلسل بدي اتعلم كيف احب !!!! جد اشي بخزي.

انا بالبدايه فكرتها زي موضه وبعد فتره بخف شغف الناس فيها بس شكله زادت الامور عند الناس, بس المشكله ان العالم بتتعلق بهالمسلسلات , في وحده من صاحباتي بتحكي انها يوميا بتابع 4 مسلسلات تركيه وفي منهم مسلسلين ورا بعض بيجو, وانها جابت ساتلايت جديد وحطته بغرفه النوم عندها و ان في قناه بتعيد كل حلقات الاسبوع و بترد تحضرهم كلهم مره تانيه بركي راح عليها منظر او لفته لحد من الممثلين ما انتبهتلها لما حضرت الحلقه المره الاولى, وان عيلتها دايما بحكو انهم بطلو يشوفوها بالبيت, كتير هيك ؟؟؟صح؟؟؟

بديش احكي عن تعلّق العالم بابطال و بطلات المسلسلات, يعني على سبيل المثال مهند....يعني خلينا نحكي جد, بالله عليكم بتحسوه وسيم؟؟؟ يعني شب متل البنات شو الاشي الوسيم فيه؟؟؟ شب شفايفه زهر!!! وين الوسامه بالموضوع...غير عن كيف كبر راسه للشب وفكر حاله اشي مهم,استقبالات و دعوات و فيديو كليبات و دعايات و رقص - يا الله شو بكره دعايه الشامبو اللي بعرضها, جد وهو برقص بحس حالي بدي استفرغ- الله يعينا عاللي جاي لانه حسب ما سمعت ان MBC مشتريه عدد كبير من المسلسلات التركيه فالموضوع راح يضل لكم سنه قدام !!!!

الفائده الوحيده اللي اخدناها من مسلسل نور هي





سلسله عرسان - الحلقه السابعة


فليحنا لليوم بشتغل ببنك, معاه ماستر محاسبه و بشتغل نائب مدير فرع


الشب ممتاز و متحدث و شكله خلوق,اجت معه والدته , ست هاديه كتير واضح انها هاديه زياده عن اللزوم و كل ما تحكي اشي لازم تطلع على ابنها كأنها بتاخد منه الموافقه قبل ما تحكي

اخت صاحبتي دلته علي و والدته اتصلت و اخدت موعد و اجو, احنا عنا علم مسبق ان الشب كان متزوج و منفصل عن زوجته, ليش و كيف و قديش قعدو متزوجين, هاد كله حينا بنسأله للشب وبنعرفه منه

خلينا نوقف هون شوي
في بنات كتير ما بقبلو فكره الارتباط بشب كان متزوج و شباب - اضعاف اضعاف البنات- برفضو تماما يتزوجو وحده كانت مرتبطه من قبل, بغض النظر عن الاسباب اللي ادت للانفصال, وما بدهم يعرفو, ولا يسمعو, وعنا الشب لسا وضعه كتييير احسن من البنت بهيك مواقف يعني شب مطلق حقه..اكيد الحق عالبنت اللي طلقها ,او والله سافر و تزوج علشان الجنسيه, هاد بنظر بعض الناس يعتبر مش متزوج مع انه مرات بكون في ولاد و الزواج بستمر سنين, اما بنت مطلقه ....لاااا يابا ابعد عن الشر وغنيله, وليش هو ناقص ايد ويلا رجل يتزوج وحده مطلقه.

انا ما بعارض هالتفكير او بأيده, بالعكس انا مع ان الواحد يكون قد القرار اللي بدو ياخده لانه هاي حياه و عمر, اذا انت او انتي عندك وجهه نظر بهالموضوع المفروض ما تستمري من اولها, لانه اذا كان طرف مش مقتنع بالطرف التاني راح تكون الحياه جحييييييييييييييم هاد اذا استمرت.

نرجع لموضوعنا, انا قررت اني اشوفه و اسمع اسبابه و بعدين احكم عالموضوع
زي ما حكيت كل شي كان ممتاز, بابا سأله عن موضوع انفصاله, الشب كان مؤدب و حكا انا ما بدي اعيب ببنات العالم, احنا ما اتفقنا, و في اشياء كتيره بنختلف فيها فكان الانفصال من اولها افضل ما نستمر و نجيب ولاد ونعيشهم حياه مش مريحه و فيها مشاكل.

طيب كل هاد ممتاز بس اذا بتحكيه لخالتك اللي جاي تزوركم, لعمك, لابن عمك....بس انت جاي تخطب يعني بدك تعطي معلومات اكبر من هيك, بابا ما حب يضغط عالشب ,يعني بما انه ما في اشي رسمي لسا.

انا الي ابن خاله بشتغل مدير فرع بنفس البنك اللي بشتغل فيه الشب, فسألته ماما باي فرع بشتغل , طلع بنفس الفرع, حكتله ماما اذا اكيد بتعرف فلان الفلاني مدير الفرع, حكا لماما شو بقربلكم؟؟؟ جاوبته انه ابن خالتي , حكا مع كشره لأ ما بعرفه!!!! كلنا اتفاجأنا من رده الفعل حتى والدته اتفاجأت.

سكت شوي و بعدين حكالنا انا الي عندكم طلب, انه اذا صار نصيب او ما صار نصيب ما بدي تحكو اني اجيت اتقدم لبنتكم!!! سأله بابا:"كيف يعني عمي ما فهمت؟؟" حكا انا بصراحه مش حاكي لاصحابي بالشغل اني انفصلت و حتى همه بدهم يزوروني بالبيت علشان يباركولي والي تقريبا سنه بأجل بالزياره وبطلع حجج علشان ما يجو.
سأله بابا:"خليني امشي معك بالحكي, هالحكي اذا ما صار نصيب, بس شو بدك تعمل اذا صار نصيب؟؟"

حكاله نفس الشي, بيجو بباركولي وما بعرفو اني رديت تزوجت......"كيف يعني؟؟"...يعني بس يجو يباركولي مش ضروري يعرفو انها زوجتي الجديده و بصراحه طليقتي اسمها هدى فهي راح تحكيلهم ان اسمها هدى,وان هيك الناس بنادوها اما اسمها الحقيقي فهو مكتوب بشهاده الميلاد علشان المعاملات المستقبليه....

كلنا سكتنا, انا كان براسي 100000 مليون سؤال وعلامات استفهام وتعجب و استنكار و نقط وفواصل لخبطه عالاخر ...انه اكيد بتتخوت انت صح؟؟؟؟

بعد خمس دقايق تفكير وصمت, بابا حكا للشب "عمي اشرب قهوتك و اهلا وسهلا فيكم" و اتطلع عالام وحكالها "نصيحتي الكم اذا ما بدكم تخسرو ابنكم عالاخر, تاخدوه على طبيب نفسي وتعالجوه قبل فوات الاوان "

ولا نفس ولا كلمه شربو القهوه و طلعو و بابا بحكيلهم" تشرفنا بمعرفتكم"




ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

Before I Go To Bed




لكل اللي صحيو هلأ بحكيلهم







واللي لازم يصحو ولسا ما صحيو بحكيلهم




و بالنسبه الي هلأ بحكيلكم




و



وبهديكم اغنيه بحبها كتير كتير....



اعترافات وخزعبلات


اليوم بدي اعترف بكم من شغله عني

انا حكيت قبل اني بكره البسس

للمره الخامسه بكون بدي اطلع الصبح على الشغل و بتكون بسه واقفه على باب البيت بدها تدخل لان مش عارفه مين مطعميها بالبيت و لزقّت الاخت, ولاني بكررررررررررهم و بصراحه بخاف منهم :$ , بضطر انزل عالكراج واطلع من الكراج والف الدنيا لاوصل لسيارتي اللي مصفوفه قدام باب البيت :"(

اشي تاني.... بس اسمع كلمه وتعجبني تلقائيا بكتبها باصبعي بالهوا او على اشي قدامي :) ما بعرف ليش ومن انا صغيره عندي هالعاده ......و حتى بالانجليزي بكتبها مشلبكه :$



بكررررررره حد يضله يحط ايده علي و هو بحكي,او بتعرفو اللي بنص الحكي بتحط ايدها على ركبتك فتره بتستحضر فيها باقي القصه....بحس اشي من جوا جسمي بنفس النقطه اللي محطوطه فيها بسخن شوي شوي وبحس حالي بدي انخنق وكل تفكيري بصير بهالبقعه....و بكون شوي وبدي الطش ايدها.


بقهروني اللي يكونو بحكو قصه و بصيرو يحكو ببطىء ويصفنو بين الحكي و يغمضو عيونهم وهمه بحكو....يا بااااااااييييييييه بكون بدي اموت انا, ونفسي اصرخ عليه...خلّصنا احكي وخلّصنا

اممممم ايش كمان...اااه بحب اعدّ الاشياء, مثلا قاعدين بصاله, بصير اعد الاضواء جوا الصاله...وبعدّهم بضمير و بحفظ العدد كأنه في حد بده يمتحني بالعدد :$
بعدّ الدرجات... بعدّ الشبابيك بعماره...بعدّ ورقات الورد :)

خلص بكفي فضايح صح :$

وقف يا زمان



نفسي يكون عندي القدره اني اوقف الزمن لحظه, متزكرين كان يجي مسلسل على عمان التانيه, ايام العز ما قبل الساتيلايت و الخزعبلات الجديده, والله كانت ايام بتجنن عالقليله تحط عالقناه وتسهر عالفيلم مش زي هلأ بتضلك تقلب من ساعتين ونص ل 3 ساعات- نفس مدّه الفيلم- وبالاخر ما بتحضر اشي, شو كنت بحكي انا؟؟؟ اه اه مسلسل البنت اللي ابوها عباره عن منشور بلاستيكي جنب التخت بضوي و بصير يحكي معها, كانت بس تحط اصابعها على بعض توقف الزمن.

بدي تكون عندي هاي القوه الخارقه و خصوصا بس يكون في عنا اجتماع مع المدير, يعني بنص الحكي و هو بتلفلسف و بكزب اوقف الزمن امسك ورقه قد راسه الزقها بنص صباحه مكتوب عليها انا كزااااااااااااااااب.
او و هو بمدح بحاله اوقف الزمن الخمه 10 كفوف على خد واحد و ارجع اقعد مكاني و اطرقع باصابعي -هيك كانت ترجّع الزمن البنت- و اشوف رده فعلّه.

او لما يمشي تكسي من جنبي و يضل ماشي على نفس مستواي علشان ما يخليني اخد المسرب, بس لاني بنت -بتعرفو لساتها البنت صفه ناقصه مرفوعه بالسكون عند بعض جماعه- اوقف الزمن و فجأه يلاقيني قدّامه و على وجهه ابتسامه بنفكحيه دليل على الانتصار :)

او لما اكون بمكه مول و يجي شب قدامي من المسحولين اللي شعرهم منكوش, اوقف الزمن اكب عراسه سطل مي و افرقله شعره على جنب او من النص و الزق شعره تلزيق براسه , زي ولاد الابتدائي المرتبين ,و ارفعله بنطلونه واشد الحزام على اخر منطقه فيه.

بس اكون بموقف محرج و نفسي الارض تنشق وتبلعني, اوقف الزمن و اختفي من الجلسه نهائيا.

بديش احكي لما يصير في خطر على الارض اوقف الزمن واهزم العدو و انقذ الارض بتقلب قصه فيلم امريكي , عيب يعني الموضوع جدّي وما بدنا نقلبه تخويت :$



شكرا لمحمد اللي حكالي اسم المسلسل
Out Of This World


عقبال العايزين :)





الاعراس هالايام صايره زي الحروب تماما, وخصوصا بالقاعات الصغيره, بتكون كل الطاولات جنب بعض و الدنيا شوب و الكل بحكي مع بعضه, شوي وبكون بدي انفجر,بصراحه ما بحب احضر متل هيك اعراس, بس الواحد مضطر علشان صله الرحم, واجتماعيات الحياه.

اول شي اهل العروس بقعدو بجهه واهل العريس بقعدو بجهه, اعداء الله وكيلكم هدول ببحلقو بهدول و هدول بجحرو بهدول
فتره انتظار العرسان بالقاعه لحتى يخلّصو تصوير بتكون فتره الهدوء قبل العاصفه, اولاد صغار ماخدين مجدهم وهييييييييييه وهاد بلحق هاد, وهاد بقعد عاللوج, و كل العالم مش فاضيه غير توشوش بعضها و تأشر بطرف راسها , وتلوي ببوزها شمال ويمين علبسه فلانه, وعتسريحه فلانه.

شوي بدهم يدخلو العرسان, وهات لم هالصغار و بتبدا تعلى الاصوات, ولك يا فلااان والله لاقصف عمرك, ولك يا فلانه والله لاترفش ببطنك بالبيت, ماشي لمو الصغار و دخلو العرسان اللي مساكين ما بكونو عارفين شو يعملو وبس بيتطلعو على مسؤوله القاعه اللي بتعطي اشاراتها بكل حركه من ورا المصوره, والمساكين بكونو مش فاهمين اشي, يعني لو تحضرو اول دخله العرسان بالفيديو بتفهمو عن شو بحكي.

ببدا توزيع العصير, اللي بشتغلو بالصاله بيجيبولك العصير وهمه مش طايقينك بشلن, بتحط العصير قدامك و كأنها نفسها تلطشه بنص وجهك ويااااا ويلك ازا بتطلبي نوع عصير غير اللي حطتلك اياه, بتاخد كاستك و بتمشي وبتروح عليكي, علشان هيك ارضى بنصيبك و اسكتي, كاسات العصير ما بدي اجيب سيرتها, 10 الاف ايد ماسكينها قبل ما توصلك و بالنظر بتقدر تحلل البصمات و مرات بالمنخار لانه الريحه بتكون مميزه.

ببدو العرسان يرقصو و اول ما تخلص الاغنيه بهجمو اهل العريس, وبتبطلي تشوفي البيست لنص ساعه زمن, وبتبدا الروائح تطلع مع الانفعال و الذمه والضمير بالرقص, واهل العروس قاعدين بجحرو ولا وحده منهم بتزقف, و ازا كنتي قاعده جنب الطرف الاخر من الاهل وبتزقفي بتكون اللي جنبك بتطلع عليكي نظره " وك استحي على دمك هاد عرس و نازله تزقفي و تتبسمي" شوي شوي بتضطري تنزلي ايديكي و تزقفي عالجهه التانيه حتى ما تشوفك.

بيطلع العريس وهاد اعلان رسمي لاهل العروس يتفضلو عالبيست, كل اهل العريس بنسحبو انسحاب رجل واحد, و بتنعكس الايه, اهل العروس برقصو واهل العريس بجحرو وياويل وحده من الطرف الخصم تحب تشارك عالبيست, بضلهم يدزو فيها يدزو فيها ليطلعوها من حلبه السباق...قصدي حلبه الرقص :)

هلأ وقت الكيك شو على راي الدي جي اللي بعلن الحدث العظيم - عفكره كتييييييييير بكره كلمه الكيك شووو ما بعرف ليش - كل اطفال القرايب و اطفال قرايب القرايب و اطفال جيران قرايب القراب بجتمعو حول العرسان, و بعدين علشان اسمه شو لازم يكون في حركه, بشعلو اشي مش عارفه شو اسمه زي الفتّاش و بطلعو دخنه بيقعدو كل اللي بالقاعه نص ساعه مخنوقين و مش عارفين يتنفسو من ثاني اوكسيد المنغنيز اللي طلع من هالشو.

وهيك لاخر العرس, بس بزيد عليهم ان قريب اخر العرس بتحسي بتصفير غريب بدانك, طبله دانك بتحكيلك من شان الله ارحميني و اطلعي, وطول الطريق و انتي مروحه و انتي بتحكي بصوت عالي مع اهلك لحتى توصلي البيت ببدا معك وجع الراس.

هلأ الموضوع مش مقارنه اعراس قاعه ويلا فندق, الله يعين العالم وكل واحد حسب امكانياته بعيش, يعني تقريبا نفس العداوه بتكون بالفنادق كمان, بس بتكون المقارنات على مستوى اعلى.

وكل عرس وانتو بخير وعقبال العايزين :)

تعليقات.....يا تعبني


شكرا ل احمد المحروق على الكاريكاتير

الخبر بموقع عمون " يحيى صويص يغادر برنامج ستار أكاديمي ويعود الثلاثاء الى عمان"

انا الخبر ما بهمني ولا بعرف مين يحيى صويص اساسا ولا بعرف ان ستار اكاديمي بدى ويلا خلص
اللي خلاني افتح عالخبر اني كنت متأكده اني راح الاقي تعليقات تحشيش من شعبنا خفيف الدم, جد ان بالرغم من كل المأسي و الاوضاع اللي بمر فيها الشعب بس لسا خفّه الدم موجدوه

قبل ما احط التعيقات بدي احكيلكم اهم اشي بالخبر اللي المعظم علّق عليه
"
وفي الأردن بدات الاستعدادات من قبل مدير اعمال يحيى صويص السيد مروان التميمي في التحضير لاستقبال يحيي في مطار الملكة علياء الدولي بالاضافة الى تغطية مباشرة على برنامج الزميل محمد عمر "مشوار" وتم دعوة كافة وسائل الاعلام الاردنية والعربية للمشاركة في مؤتمر صحفي للاحتفال بعودة يحيى صويص .
"

اخف دم تعليقات من ال 136 تعليق الموجودين عالخبر

هاد اكتر تعليق عجبني فبدي ابدا فيه

الطنط السفاح

اهئ اهئ اهئ انا كتير كتير اتأثرت لما تلع
مش أدر أأدر استتيع...احكولي مين تلعو من المسابئه عشان احت في شعرو علكه

______________________

يا اخوان انا بقترح بما انه يحيى صويص صاير رمز وطني واخباره على عمون اللي بنعتبرها جريده محترمه، انا رايي نقطع العلاقات مع لبنان ونطرد السفير ونغلق مكاتب ال LBC ونعمل على زعزعة الاستقرار هناك ونضرب موسم السياحه لرد اعتبار هذه الامه، جد سو هاذا يعني الناس عايفه حالها ومش لاقيه توكل والفساد في كل مكان واحنا دايريين ورا اخبار هال.. يعني اجا ولا ما اجا لطييييييييييييييييييييييف جدا :)
______________________

انا بقترح انه الحكومه تصدر بيان وتعميم يكون يوم الثلاثاء عطله رسميه عشان يطلع الشعب يستقبل البطل المغوار يحيى صويص و بتمنى من جميع فئات الشعب تخرج لاستقباله و بتمنى كمان من امانة عمان تنصب قوس النصر على طريق المطار لكي يمر البطل يحيى من تحته ......عن جد الي بصير فينا مش قليل حسبي الله و نعم الوكيل بس ...يا امة ضحكت من جهلها الامم.... وبتمنى تنشروا تعليقي يا صوت الاغلبيه الصامته يا عمون

______________________


يحيى الك كل المحبة من بنات عشيرة بني حسن عامة والزيود خاصة والمعلا تحديداً وان شاء الله رح تعوضها
هاد مش خفيف دم بس اكثر من 20 تعليق ذلو اهل اللي كتب هالتعليق فحبيت اضيفه :)
وباقي التعليقات انقسمت 10%مؤيد و 30% ضد و 60% بلشو ببعض :) ,هاد اشي ملفت بالتعليق بنسو الخبر الاساسي و بنزلو بهدله ببعض.

هو اجا ويلا ما اجا ؟؟؟


______________________

الاغنيه ما الها دخل بالموضوع....بس كتير بحبها ومش راضيه تروح من بالي :)

Ya ta3ebnee by Tamer Hosnee
Fandalism Free MP3 Hosting

للكمبوطرجيه :)





كتيييييييييييييييييييييير حبيته للفيديو.....مصطلحات كمبوطرجيه من الاخر و بمكانها صح :)


الفيديو هاد زكرني ببعض الموظفين اللي عنا بالشغل, بس يتعاملو مع المدراء بصيرو يدخلو كم مصطلح انجليزي كمبيوطرجي على كلامهم ما الهم دخل باللي بنحكي فيه و المدير بصير يهز براسي زي الهبيله انه فاهم كل اشي ومقتنع 100% وبالاخر بحكيله خلص انت فاهم شغلك منيح فاعمل اللي بدك اياه

"مهو ال Routers بس تعمللهم Ping عال Modem بصير ال TCP\IP يبعت signal و بستقبله ال Application server و بحوله لترددات تلفون و بنبعت عن طريق الlase line و لانه Fiber بتوصل المعلومات كتير سريع"
طبعا انا بس اسمع هالكلام مع كل تخبيصه بتزداد عدد الرمشات عندي - زي اللي بسمع صوت تكسير زجاج- بكون بحرب جسوره مع نفسي " اسكتي يا بنت, ما الك دخل خليهم الله لا يردهم, لا تحكي, ما الك دخل, هسسسسسسسسسسس"
واللي بسمعه كل ما يسمع مصطلح انجليزي جديد بتتوسع الابتسامه على وجهه و بتزيد ثقته بنفسه انه يا زين ما اختار لرئاسه قسم الصيانه.

مش حلو ءاسفن بالشب بس لما يجي و يحكي معي هالحكي , بفش قلبي وبحكي كل اشي, شو دخل , وشو اللي بتحكي عنه, الشب خريخ ال 1900 من امريكا دارس رياضيات و عادلو شهادته بالاردن كمبيوتر....ليش و كيف مش عارفه و الشب لا يفقه شي بالكمبيوتر, يعني بس اشي يعطل لازم يضل راح جاي عندي عالمكتب لحتى اقوم و اشوف شو المشكله وادله شو يعمل, هالشي بالبدايه كان من دواعي سروري, كنت جديده ومتحمسه وما بعرف ان الكل بكزب و بنسب الشغل لنفسه, يعني كنت اضل طول اليوم اساعده بتعريف الاجهزه عالشبكه و تنزيل البرامج وبالاخر يروح عند المدير ويحكيله خلصت شغلي, طيب وانا !! ولا يجيب سيرتي
فصرت اذّل كل اللي بقربوله لحتى اقوم اساعده و احكيله المشكله والحل بالقطّاره, وبس يكون فقي شهود موجودين احل المشكله.

صار يكرهني!!! عادي , سنين وانا بكرهه و هو ما عندو مشاكل :)
هلأ صرنا فاهمين على بعض من اولها يحكي اني ساعدته او راح اساعده علشان نخلّص الشغل بسرعه



Fring



برنامج اكثر من رائع, انا شخصيا جديد عرفته
البرنامج بتنزله على جهازك و بشتغل عالويرلس بعطيك فرصه تشبك على اكتر من برنامج بنفس الوقت
(yahoo messenger, MSN ,Twitter,skype,ICQ,G Talk,....)

وبطّلعلك رسائل تنبيهيه ازا وصلك مسج من حد عالمسنجر او اي اشي جديد انكتب على ال Twitter
والاشي الاهم انه بعطيك فرصه تحكي عالموبايل مع اي واحد موجود عندك بالمسنجر و منزل الفرنج عنده عالموبايل مجانا

يعني انا اخوي ببلغاريا حاليا , طول اليوم وباي لحظه بكون هو وانا موجودين بمكان فيه ويرلس بنقدر نحكي مع بعض مجانا بالاتصال بموبايله عن طريق المسنجر اللي فاتحته جوا برنامج الفرنج.

يمكن كتير منكم بعرفوه, وان شاء الله يكون الشرح واضح للي ما بعرفوه,بس لو نزلتوه عالموبايل التعامل معه سهل كتير وما فيه تعقيد.

لو شبكت من النت عالموبايل على موقع
www.fring.com
بفتح الموقع وبتبين كبسه لتنزبل البرنامج.

المشكله ان البرنامج شغال بين معظم دول العالم يعني مع امريكا و كندا و بلغاريا و المانيا استخدمنا البرنامج وكله تمام الا بالامارات :"(
يعني انا اخواني بالامارات و التنين عندهم ويرلس بالبيت بس للاسف سياسه الامارات انها تلغي و توقف اي برنامج للاتصال المجاني, فيا ريت اذا حد بعرف برنامج مثل الفرنج بشتغل بالامارات يحكيلي .

سلسله عرسان - الحلقه السادسه



فليحنا لليوم اجا عالشغل, عن طريق موظفه عنا صاحب زوجها بشتغل باداره حساسه بالاردن, بديش اجيب سيره حد انام ببيت خالتي, مش علشان جبن او اشي زي هيك لا سمح الله, بس انا متعوده انام بتختي :$

المهم اجت الموظفه واجا فليح معها, انا كان عمري وقتها 27 و هو عمره 39 و غير انه كبير شكله عمو و اقصر مني , يعني انا من الاشياء اللي ممكن ارفض الفليح علشانها غير الطول هو بس يكون عمو, بشكله و بطريقه لبسه و بطريقه تمشيطته, يعني حسيته زوج خالتي جاي يزورني :(

المهم انا بس شفته حكيت انسي يا بنت, خلص الموضوع منتهي, طبعا قعدنا و صاحبتي المسكينه اللي دايما بغلبها بقصصي هاي بتصير تعمل قهوه و تلطف الجو, بتعرفني دفشه بهيك مواقف.
بس لاني كنت مرتاحه انه لأ تصرفت بطبيعتي عالاخر, وما كنت مهتمه او متوتره او حامله هم بالمره.

اللي لفت نظرنا انا وصاحبتي ان عيله الفليح نفس عيله بنت عنا, فسألناه من باب فتح مواضيع جديده بدل ما نضل صافنين و تسود فتره الهدوء الممله بهيك مواقف, حكا انه ما بعرفها وممكن تشابه اسماء مش اكتر, حكينا, وسألني و سألته, طلع عنده بيت و ساكن فيه لحاله والبيت فوق بيت اهله, انا حكيت ممكن بحكم العمر بده استقلاليته ,وخلّصنا و تسهّل فليح.

طبعا وكالعاده اجت الموظفه, خير شو صار , شو رأيك, شو حكيتو, وهالقصص,حكيتلها بصراحه هو شب - لازم احكي شب شو اعمل - هو ما شاء الله عنه شكله محترم و مؤدب و...و... بس بصراحه تفكيري ما اجا عتفكيره - هاي كلمتي الدائمه اذا ما عجبني فليح منعا للاحراج- و بصراحه شكله ما في نصيب.

تاني يوم بتناديني البنت اللي عيلتها نفس عيلته, بتحكيلي انا بصراحه مش عارفه شو احكي, بس اخوي امبارح اجا شافك.....حكيتلها لحظه لحظه...اخوكي!!!! بتحكيلي اه بس هو انحرج يحكيلك انو اخوي, بحكيلها كيف انحرج ومن ايش ينحرج وبعدين انا سألته سؤال صريح و واضح انه شو بتقربيله حكالي ما بعرفها , هون انا انقهرت و صار الرفض عندي مضاعف, يعني من هلأ بلشنا بالكزب واللف والدوران , بتحكيلي البنت ما تاخدي الموضوع بحساسيه, يعني مش محرز الموضوع توقفي عنده , حكيتلها انا بصراحه بالنسبه الي كل شي ما بنحكى فيه الصح محرز وكتير كمان.

حكيتلها انه ما في نصيب, وصارت تترجاني, طيب بس اسبوع فكري, والله اخوي اكل راسي كل شوي بيتصل حكيتي معها...حكيتي معها, حكيتلها ليش اسبوع والجواب موجود, يعني هالمواضيع مش حلو المطمطه فيها, ما اقتنعت والله يخليكي اخوي صعب و بنق كتير, انا بعقلي صرت احمد ربي انها بتحكي صفات تانيه بالفليح ما حد بستحمل يتعايش معها, اذا اخته واللي متزوجه وعايشه بعيد عنه اكل راسها, انا بكره شو بده يعمل فيي؟؟ حكيتلها الله يخليكي خلص انت بدكيش تجاوبيه حره, بس جوابي عندك وعند الموظفه اللي دلته علي.


بعد كم يوم بنادوني موظفين بالمكتب اللي جنب مكتبي ان في تلفون الي عندهم, الو مين معي, طلع فليح :( بحكيلي اه شو قررتي؟ حكيتله انا جاوبت اختك, وانّي مش بمكتبي و ما بقدر احكي, وانا اسفه كتير ومضطره اني انهي المكالمه.
بعد ساعه تلفون مكتبي برن, الو مين فليح :"( بحكيلي بس حابب اعرف سبب الرفض, حكيتله الله خلقنا انفس و قلوب وافكار منها من أتلف ومنها من اختلف, واحنا للاسف مش جاي افكارنا على بعض, بحكيلي لا انا بحكيلك ليش!!! لانك حسيتيني كبير!!!
حكيتله ما بنكر هالشي بصراحه, يعني فرق العمر مش قليل, بحكيلي وانتي مفكره حالك صغيره, انا صرت اضحك ما بعرف ليش, حكيتله طيب شو بدك هلأ؟؟؟
بحكيلي ولا اشي بس بدي نضل اصدقاء, حكيتله طيب اهلا وسهلا فيك وفرصه سعيده, بحكيلي لأ بدي تاخدي تلفوني بركي احتجتي اشي مستقبلا - هون هو بده يزكرني بشغله الحساس- حكيتله طيب هات الرقم, نقلني اياه وانا طبعا ما كتبته, قام حكالي عيديلي اياه, سكتت انا, بحكيلي بدي انقلك اياه وهالمره اكتبيه, وباخر المكالمه بحكيلي يعني ما بتعرفي بركي احتجتيني بيوم بضلي متل اخوكي الصغير , ما صدقت اسكر الخط و حششت :)

انا مش من طبيعتي طوله البال بصراحه, وبكبس الواحد بسرعه على رأي اخوي, بس هاد بدي اخلص منه, لانه شكله ما بده يحل الابس يخلص كل اللي بده يحكيه, فانا اعطيته الفرصه و خلصت منه.

اشي اخير.... هلأ المعظم بس يقرأ سلسله العرسان بفكر ان ما بيجيني او بيجي للي كتبو عن الموضوع غير فليحين البلد بس , لا مش كلهم بكونو عاهات ومعقدين ومتخلفين, في هيك وفي هيك, وفي ناس فعلا ارواحنا ما بتنطبق على بعض مع انه بكون ممتاز بكل اشي, ان كان من ناحيتي او من ناحيته هو, يعني اكتر من شخص يجو اكتر من زياره ويكون الموضوع خلص راح يتم وباخر لحظه ربنا بكشف اشي , وهاد كله بالنسبه الي تقادير ربنا واستجابته لاستخارتي, و الموضوع اولا واخرا ان تم او لم يتم او تم وفشل باي مرحله كله تقادير رب العالمين.



ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقات السابقه


اذا اردت ان ترسل بطيخه




كل يوم بوصلني مسج من شركه زين - او "شين" على رأي خالي - اغرب من اللي قبلها
بس مسجه اليوم كانت من الاخر

المسج بتقول
ادعي لاحبابك, ارسل اسم الشخص ثم فراغ ثم حرف ذ للذكر او أ للانثى ثم رقم الموبايل الى *****
سعر الرساله 15 ق

يعني بالله عليكم هلأ لو انا بدي ادعي لاحبابي بدي اياكم تكونو الوسيط؟؟؟ و كمان بفلوس..لا حول ولا قوه الا بالله

يعني وبعدين مع هالمسجات اللي صارعينا فيها؟؟؟ اذا بدك تتجوز, اذا بدك تتعرف, اذا بدك تغني, اذا بتحب تسمع حبايبك مونامور وهمه بستنو بحضرتك ترد, اذا بدك تبعت بطيخه, اذا بدك اتف بوجي اعداءك.....مهو هاد اللي ضايل يعملوه

لسا هاي احسن من غيرها اللي بحكولك اشترك مجانا لمده اسبوع, بعدين بتقعد شهر تحاول تلغي اشتراكك و همه يخصمو عليك.

غير المسج اللي وصلتني واللي واضح تماما انها فيروس
وصلتني من الرقم 000
وبتحكي مبروك لقد فزت بصك رقم 00044 و قدره 90 الف دولار اتصل بالرقم 00103 003598815

لااا مش واضح بالمررررره انه في انّ بالموضوع وكمان بحكم تعاملنا بارقام بلغاريا فالرقم بلغاري, وال ايش اتصلي بالرقم... كيف حالكم انتو O_o

يا ريت في طريقه اقدر اوقف كل المسجات الفارطه اللي ببعتوها.....ششششين حلّو عني.

* الصوره مأخوده من النت...شكله في ناس كتير بعانو برضه :)

تحسّس


في كلمات كتير و مواقف كتير بتحسس منها

اول اشي بتحسس منه بس وحده تحكيلي "حبيبتي" , مش حبيبتي المعنى المنيح لا حبيبتي بمعنى انها مش شايفتني و بتعتبرني بصف تاني "ب" و في حبيبتي اللي بتعتبر مسبّه, بس حد يردح لمده 10 دقائق وبالاخر تحكيلي ماشي "حبيبتي"....يعني مسبّه ادبيه مش اكتر.


انا وصاحبتي بالمكتب بنتعامل باخر نوع من حبيبتي بكلامنا, بتحكيلي اشي برد عليها بطريقه مستفزه شوي فبتحكيلي حبيبتي و بتشرحلي " هاي قصدي فيها حبيبتي المش منيحه !!!" ومرات بس نكون رايقين و صافيين و هو العادي عنا والحمد لله, بتحكيلي حبيبتي وبرضه بتشرح "هاي حبيبتي المنيحه" وانا نفس الشي بتعامل معها :)


ال "حبيبتي " بجميع انواعها بتكون صادره من بنت طبعا, الا امبارح , اجا المراجع اياه قريب الموظف- اللي طبعا ما صار اشي ضده- انا ما حكيتلكم انه اجا تاني يوم, طلعو مغيرين معلوماته ومش مغيرين معلومات باقي العيله, حكيتله روح للي عملّك المعامله و خليه يغيرها وفعلا بس رجعت تأكدت عالداتا بيز - او البازا ديت على رأي مديري العزيز- طلعو مزبطينله المعامله, امبارح اجا ويا اختي و يا اختي بحكيلو انت شو جابك, بحكيلي كنت ماشي جنبكم فحبيت اتأكد من المعلومات طلعو كل المعلومات متغيرين, حكيتله انت ساكن جنب الشغل يعني كل يوم راح تكون مارر من جنب الشغل, تأكدت من معلوماته طلع كل امورو تمام, حكيتله ما تغير اشي وكل امورك تمام زي ما بدك, بحكيلي طب خلص اسف "حبيبتي"!!!!!!!!!!!!!!!!!!!!!!!!!!!!
حكيتله عفوا؟؟؟ شو حبيبتي هاي, بحكيلي اسف اسف بالغلط طلعت, يلا بسيطه انت زي بنتي, حكيتله لأ انا مش زي بنتك, وانا عندي اب الله يخليلي اياه, ولو سمحت مره تانيه ركز وانت بتحكي, ضحك و لا كأنه صار اشي وطلع :(


اشي تاني بتحسس منه...الربيع :"(

من انا صغيره معي تحسس ربيعي, بس كل سنه بزيد مش فاهمه ليش!!!!
كل يوم الصبح اول ما اصحى ببدا بسمفونيه تعطيس تستمر لربع ساعه, ليبد مفعول الدوا بكون سطلت.
اهلي كانو يحكولي يرحمكم الله على كل تعطيسه, بعدين صارو يستنو احكيلهم خلصت فيحكولي اياها مره وحده :)


فكركم لو اسمي برهان كان ممكن تختلف حياتي :)





ذكاء خاااااااارق

بحياتنا في لوحات مرور كتيره بنشوفها, و الحمد لله اشي العالم بتلتزم فيه واشي ما بتلتزم فيه, اشي بدل على ذكاء خارق و اشي بدل على....ذكاء خارق بس هالمره الذكاء اللي بقهرك


اول شي بدي احكي عن لوحات التحويل اللي على طريق المطار, يعني انا رحت اوصل قريبه النا عمرج الحمام و طلعت من عندهم بدي اروح عالدوار السابع, مش عارفه وين اروح, في اشاره بتحكي الدوار السابع لقدام, كتير حلو مشيت ومشيت ومشيت ......و اني الاقي اي اشاره تانيه تحكيلي وين اروح ابدا, بالاخر بتلاقي بصباحك اشاره عاول الجسر ان السابع من هون, تلحق تطلع عالجسر ما تلحق مشكلتك ما الهم دخل الجماعه, يعني حاطين اششششششااااااررررتتتييييين بينهم 100 كيلو وانت ما انتبهت!!! مشكلتك شو دخلهم همه.....هاي من اللوحات اللي بتدل على ذكاء خارق بقهر.

اللوحه التانيه , بصراحه هاي بتدل على ذكاء خارق و ان في عالم لسا بتفهم وبتعمل اشي للبلد
اللوحه بكراج السيارات اللي عند شارع الوكالات
ما بدي احكي اكتر,صوره اللوحه بتحكي كل اشي :)






اللوحه الثالثه من لوحات الذكاء الخارق مش اللي بقهر...اللي بجلط بعيد عنكم
كلكم شفتو الاماكن الخاصه لاعلان الزفاف و العزاء اللي معلقينها الامانه مشكوره على اعمده الكهربا, جد انها خطوه رائعه لمحاوله التنظيم والتجميل والرقي بمستوى الناس, بس اكيد في ناس كتيييير مزوئين وما بلتزمو بهالشي متل ما فرجانا خالد السعود بالبوست و الفيديو في مدونته.







شوفو بالله عليكم هالاعلان






جد اشي بخزي, وحاطينه على باب حديد و ملزقينه على بوكسه بندوره , يعني والله عيب, شو هالطريقه بالاعلان , وكيف بتتوقعو الناس تيجي على محل موزع اعلاناته بهالشكل....عيب والله عيب.

سمعت بس تاني مره بشوف :$

كتبت قبل عن اول مره بشوف هالشغلات "سمعت بس اول مره بشوف"

امبارح واحنا بشارع الوكالات بنتمشى شفت شبين بمشو مع بعض منظرهم وكلامهم بما انه صوتهم كان عالي بلفت النظر, او بالاصح صوت واحد فيهم اللي شفت وجهه, التنين لابسين زي بعض مع اختلاف الالوان,اللي شفت وجهه لابس بلوزه نص كم زهر, عفوا قصدي
" Pink"

و فوقها فيست اسود و شورت اسود, التاني نفس الاشي بس البلوزه لونها ازرق.


اللي لابس زهر واضح انه حاطط عدسات خضرا و شعره زي كل الشباب الاردني اللي بسنّه سبايكي و بحكي بنرفزه مش طبيعيه وبصوت عالي: " الانتر - مش فاهمه هو محل و يلا قصده المدخل ولا شو بالزبط بس ما علينا- من هون, انا بحكيلك من هون, خلص اسكت تخلينيش اكفّر هلأ, خلص اسكت" طبعا كله بحكيه بصوت غريب مايل لصوت البناويت - البنات يعني - و بأشر بايديه زي اليااااي خلس - خلص- و ابصر شو رد عليه الشب اللي معه وقف ابو الزهر و عصب وضرب التاني على كتفه بوكس - هو مش بوكس بوكس هو اقرب لنفض الغبره او لا انا بكرهك بكرهك بكرهك- و مشي وترك الشب التاني وما بعرف هي طبيعه مشيته هيك ولا هو كان بترئوص مش عارفه, بس احنا و كل اللي شاف الموقف انقسمنا لجزئين, جزء ما قدر غير يضحك و جزء رفع حاجب واستغرب.

مش عارفه ليش الشباب بعملو بحالهم هيك, يعني من اللحيه الخفيفه اللي عاملها الاخ واضح انها مش مشكله خلقيه عنده و هو اللي عامل بحاله هيك, يعني المنظر والتصرفات كانت منافيه لطبيعه الشخص وهاد اللي لفت النظر اله, او ممكن هو حابب يلفت النظر لحاله...الله اعلم.

اشي تاني لفت نظري ان كل الشباب لابسين زي بعض , بلاطين مسحوله وشعرهم سبايكي, والبنات بلاطين الجينز الديقه من تحت - الهم اسم بس ما بعرفه - و نفس تسريحه الشعر, ما بعرف بس بالنسبه الي مش حلو هيك, يعني اي موضه بتنزل عالبلد اكيد بتلبق لناس وما بتلبق لناس, ليش ما اشوف اللي بلبقلي و البسه او اسويه, يعني ما شاء الله العالم نسخ ماشيه بالشارع كانو, حتى الالوان يا جماعه نص البنات لابسين بنفسجي طيب يا اختي غيري شوي :)

عكلن الله يهدي العالم ويهدينا.

BAPD......فلسطين الحبيبه




طفله صغيره كنت انا انظر لاخبارك بشغف
يوم رأيت محمدا يتخذون جسده كهدف
سألت امي يا ترى اين العرب افي كهف
قالت بحزن واضح سيتناسون للاسف
ويوم استباحه غزة قلبي اصابه الرجف
خيانات و عصابات و تصريحات تختلف
هذا ينادي لتحريرها وهذا لموتها يأتلف
جاره و شقيقه و اختا بالعروبه تتصف
خانت و باعت واغلقت معابرا و لم تقف
هددت وتوعدت ولموت غزه تحتلف
وبدأت بتصفيه حسابات و نست العدو وما اقترف
وشيخا جليلا ازهري برر افعاله بلا اسف
واعترف بجهله بعدو لنا اغتصب حياتنا واغترف
ويوم تنهدت و ضربت اكفا ببعضها و قلت يا حسف
جاء اوردغان بشجاعة نادره ولم تنحرف
وظهر النور بملامح احمد و محمود وغيرهم ممن عرف
ان فلسطين حرّه ابية مهما الزمان مضى و اختلف
كبرت وكبر حبي لك فصار موتي فداكي هدف













اعتذر عن الركاكه في الكلمات واسلوب التعبير , ولكن هذه محاولتي الاولى بالتعبير بالكلمات.....فاعذروني





الاسرة في مطعم الاسرة

احلى اشي بس يجو خواني من السفر هو انه الروتين بلتغى من حياتنا, ما في اشي مرتب اله, يلا نطلع , يلا نحضر فيلم,يلا نروح ...يلا ناكل :$

طبعا الاكل انسو موضوعه, الاكل عال 1 الصبح عادي , مثلا امبارح بالليل اخوي طلب من ماما تعمله دحدح الساعه 12:30 بالليل كان جاهز, واكلنا نص الصينيه, انسو الدايت و انسو الوزن, انا شخصيا ما راح اوزن حالي لبعد ما يتسهل لخوي و اسجل بنادي و يمشي شهر و اعمل دايت قاتل, بعدين بشوف وزني, وخصوصا ان عنا عرس بالعيله ب 11\ 6 فان شاء الله لازم اكون نحفانه :"(

المهم, اليوم صحينا الصبح شو بدكم تفطرو, اقترحت اعزمهم عالفطور بمطعم الاسره بعبدون, كلهم رايحين عليه من قبل الا انا و مرة اخوي, يا الله شو بجنن هالمطعم, جد انه جوه اكتر من رائع, اي نعم المطعم مش من المطاعم الفاخره, بس والله كتير انبسطنا.
و الاكل اشي من الاخر, طلبنا كل شي بعملوه اله دخل بالحمص و الفول, ممنوع كبده وهاي الاشياء, وطلبنا قلايه بندوره,اللي فكرتها مش زاكيه بالبدايه بعدين قضينا عليها.

وبما انا عائله بتخاف من الحرام....فبحب اطمنكم انا مسحنا الصحون مسح على راي اخوي الصغير ههههههه

و اكيد كالعاده فجأه بتشوف نص العالم اللي بتعرفهم هناك, علشان ما تكون عملت اشي ما حدى بعرف عنه.

الجو كتير حلو, الاكل كتير زاكي, الخضار و حوض السمك, واحلى اشي صوت فيروز بالخلفيه اللي بخللي الاكل ازكى وازكى
و للصدمه الفاتوره طلعت كتير كتير قليله بالمقارنه مع مطاعم تانيه للحمص والفول - ابوك يالجباره :)

اتركم مع الاغنيه اللي اكلنا عليها :)




To My Friend

I'm sure you will find away to success
just be patient and God will open new doors
and to every one feel that it is over
don't lose hope




Twinkle Twinkle Little Star

ابن اخوي عبود عمره 5 شهور هلأ, كتير بحب اغنيه "twinkle twinkle little star " وبس حد يغنيله اياها بصير يحرك اديه و رجليه وكمان شوي بده يطير :)

قبل كم يوم كان كتير متنرفز وابصر شو اللي مدايقه, امه مغيرلتله و مطعميته و نايم وشبعان نوم, المهم دورت عالنت على الاغنيه بركي كان تأثيرها اقوى, وبصراحه والحمد لله الغنا مش من مواهبي المتعدده اللي بتميز فيهم :$

وانا بدور طلعتلي الاغنيه بالهندي, جد تحشيييييييييش و من يومها و كل العيله بتغني الاغنيه بالطريقه الهنديه و عبود حبيبي بيضحك بصوت بس نغنيها هيك.
فهاي يا اخوان الاغنيه الرسميه اللي عنا بالبيت من فتره




حدائق الملك حسين


امبارح حبينا نكسر الروتين شوي و خصوصا ان اخوي وعيلته هون وانا ماخده هالاسبوع اجازه, اقترحت مره اخوي نروح نفطر بحدائق الملك الحسين,فعلا حضرنا الاغراض اللازمه و اشترينا معجنات و رحنا هناك.

الجو كان بجنن, اكلنا و تسلينا وتشمسنا وتمشينا, انا بحب حدائق الملك حسين كتير كل ما نكون زهقانين انا وصاحباتي بناخد وجبات و بنروح نتغدى هناك.

فعلا انه هالحدائق متعوب عليها, يعني كبيره و المناطق متنوعه التنسيق ومجهزه بمواقع للقعده و خضار و ورود
جد انبسطنا كتير, و انها مفتوحه للجميع برضه هاد اشي كتير منيح, في ملاعب سله و كره قدم, لا يخلو الامر من بعض الحببّيبه المنتشرين فيها وبعض المخربين, و بعض الرسومات عالحيط اللي بتبين انه ما بلبقلنا اشي مرتب, بس اجمالا مرتبه و نظيفه
اتركم مع صور من هناك, وبنصحكم تروحو عايها


























سؤال بدون جواب....

بتعرف الواحد على كتير ناس بحياته, ناس بكونو كتير عزيزين عليه بتركو اثر كبير بحياته, وناس بكونو عاديين بمرو بحياته و ما بتركو اي اثر, حتى الناس اللي بتركو اثر ممكن يكون سلبي و ممكن ايجابي و برضه بختلف بقوه ودرجه ومده التأثير.

انا بحياتي مرو ناس كتير علي, وانا بطبيعتي بس اثق بالناس بثق بطريقه مطلقه علشان هيك الصدمه بتكون كبيره و يخيب املي, والحمد لله بستمر بحياتي لانه هاي سنه الحياه.

من الناس اللي تركو اثر كبير بحياتي وايجابي همه 3 صاحبات من المدرسه, من الصف الثامن للتوجيهي ضلينا مع بعض, و مع انا افترقنا بالجامعه بس ضلت علاقتنا متل ما هي والحمد لله وبعد ما تزوجو و وحده منهم سافرت لساتنا على علاقه قويه وكل شهر تقريبا بنجتمع.

اليوم كنا مجتمعين عند وحده من صاحباتي, انا بصراحه ولاول مره بكون مش متحمسه لهاللقاء, صاحبتي الله يسامحها كل زياره لازم تسمعني موشّح الزواج, اكتر من مره حكيتلها ازا انا مش حامله هم حالي انت شو بدك يا اختي؟؟؟ وبعدين انا مبسوطه هيك مش المهم اكون مبسوطه, كل مره لازم تنفتح السيره, هي المسكينه زوجها جدا سيء معها و بعد ما تشكي وتحكيلنا قصص عن زوجها اللي مورجيها النجوم بعز الظهر , بتنتقلي و بتبدا بهالموشح, انا اكتر من مره بكون نفسي احكيلها ان حياتي احسن من حياتها ب 100 الف مره بس بخاف على مشاعرها, ومرات بقول يمكن بس بدها تحس انها مش لحالها عندها مشاكل, وبدها تفترض ان هاي مشكله عندي...الله يهديها ويصلح حال زوجها.

من امبارح وانا زي اللي علي واجب, مش مرتاحه ومش مبسوطه, المهم رحنا , المسكينه نحفانه كتير و شكلها كبييييره , استغربنا ولمّا سألناها حكتلنا قصه طويله عريضه زي الافلام, المختصر المفيد ان زوجها كل ما يرجع من عند اهله برجع مستنفر و كيف انه ضربها وطلع هاي مش اول مره بضربها, واتصل باهلها تعالو خدو بنتكم انا ضربتها وراح اضل اضربها لتنعدل - كيف يعني تنعدل مش فاهمه !!!- واجو خوانها و البيت كله اصوات وصراخ وبناتها التلاته اللي اكبرهم 6 سنوات بصرخو وببكو, وكيف طلعت مع خوانها و تركت البنات لانه اخوانها ما رضيو ياخدو البنات, ولما ما عرف يدبر البنات وداهم عند خالتهم و راح لبيت اهلها يرجعها مع ان اخوانها حكوله اذا بتقرب عالبيت راح تندم, ولما اخوانها شافوه هناك ضربوه و مسحو فيه الارض, وكيف وسّط العالم كلها لترجعله.....وبعد كل هالقصص رجعت.

انا اللي مش قادره استوعبه....كيف راح ترجع الحياه عاديه؟؟؟
كيف راح تقدر تستمر الحياه بعد الاهانه وبعد الاذلال؟؟؟ كيف البنات راح تكون نفسياتهم؟؟؟ بتحكيلنا صاحبتي ان البنت الكبيره اللي حضرت قتله الام و قتله الاب ما بتاكل و بالمدرسه بحكولها انها صارت انطوائيه, معقول يكونو خربو حياه البنت للابد؟؟؟ مين احسن ترجعله علشان البنات ويلا تتركه برضه علشان البنات؟؟؟ هي بتحكي انها بتتمناله الموت!!! يعني شو هالحياه؟؟

لما حكيت لماما بتحكيلي عادي ياما ناس انفصلو و رجعو مره تانيه ونسيو واستمرت حياتهم عادي, معقول ينسو؟؟؟
انا لو كنت بمكانها شو كنت بتصرف؟؟
كل مره بنجتمع بنرجع بنات صغار بنرجع لصف تامن...هالمره حسيت صاحبتي كبيره كتير.
اسأله كتيره ببالي......معظمها مش لاقيتلها اجوبه...

اطفال تصنعهم المحن

اعتقد ان الجميع بعرف هالطفل اللي ادهشنا وقت العدوان على غزه باسلوبه و تعبيراته و طريقته بالكلام
و اعتقد ان المعظم شاهد اللقاء على قناه الجزيره
ولكن يشرفني ان يكون احمد عوض زايد ضيف في مدونتي
حتى وان كان بهذا الفيديو

احمد
سامحنا ان صمتنا....سامحنا ان جبنا
ان شاء الله ربنا بساعدنا انا نربي اطفالنا بهذه الطريقه
وبهذا الايمان و بهذه الجرأه



Old Is Gold

You will say this is old
I'll say old is gold
at the end of the video I was up to cry :"(
I loved it hope you enjoy it too


video

اشي بقهر...

محاذاة إلى اليمين

في ناس غريبين
بفكرو اذا ضلو يعيدو ويزيدو بالكلام, و يقززو عيشتك بكتر الحكي,انك ممكن تقتنع بكلامهم اللي بتنافى تماما مع اللي انت بتعرفه و مقتنع فيه, و بضلو يزنّو و يتمسكنو و يتحزونو عاساس انك لسّا ابن مبارح وما بتعرف اشي بالدنيا.

اجا مراجع اليوم بدو اياني اعمل اشي غير قانوني, اني اعدّل معلومات عالداتا بيز بتعفيه من دفع فلوس و غرامات, و على حكيه ان المدير طلب هيك, طيب يا اخي بدي ورقه رسميه, انا بدي احمي حالي, والله يستر عليكي....الله يبعتلك مش عارفه مين....الله يخليكي...مع شويه رجرجه بالصوت...انه الاخ متأثر من الوضع....والله ما معي...بحكيله يا اخي انا بدي اساعدك بس معقول اساعدك باشي يضرني؟؟؟
بدي أمر رسمي....حاولت اساعده اتصلت بالمدير عالداخلي و عالخلوي ما برد....بالاخر اتصلت بموظف, طبيعه شغله متعلقه بشكل مباشر باللي بدهم اياني اعمله, وكان موجود لما المفروض المدير حكا للمراجع ييجي عندي.

اتصلت فيه و سألته اكّد الحكي...حكيتله اوك ابعتلي انت كتاب رسمي....تأتأ و ايييش...اااه....ااااااييه "لا يختي انا ما الي...ما بعرف عن الموضوع انا!!!!!"
حكيتله مش انت كنت موجود؟؟
بحكيلي احكي مع المدير اساله بصير ويلا لأ انا ما الي.....طبعا طلع المراجع قريب هالموظف وباعته علي من راسه, والمراجع بنص الحكي بحكيلي....انا جاركم هون, ساكن بالفيلا اللي جنبكم - هاد وهو مسكين و معوش فلوس .

يعني كيف بفكرو هالعالم؟؟ شو هالنفسيه المريضه اللي بتخليهم ما يهتمو بتوريط الناس بمشاكل ؟؟؟
انا شخصيا ناديت مديري المباشر و خليته يسمع الكلام مره تانيه من المراجع, و كتبت كتاب رسمي بالموضوع للمدير العام.
والله شخص ما عنده مشكله يورطني اكيد مورط ناس قبلي و ما عنده مشكله يستمر بهالشي.

ما بنكر ان مر عليّ بالشغل كتير قصص غريبه وعجيبه....بس للاسف لساتني بنصدم و بتفاجأ بهيك نفسيات وشخصيات.

نيااااالهم...

يا ريت يجي حد يخفف عنا ...او يطلّع قانون يحدد حجم الاعباء و المصايب اللي بقدر يستحملها المواطن.
حد للضرايب و الخصومات.... حد للهم والغم...حد لقدره التحمل

يعني بالخبر بقولو "تعاني من ظلم البشر واضافت انها لا تحصل على الغذاء والراحة اللازمة وتضطر إلى العمل طيلة ساعات اليوم حتى يتمكن اصحابها من جمع بعض النقود"
مش احنا هيك؟؟؟.....يعني ليش ما يطالبو بحقوقنا احنا كمان

يا الله....جد نيالهم

اتركم مع الخبر


على جناح يمامه



يا ريت حد يحكيلي
هو احنا لحالنا بالعيله بنعاني من هالمشكله ويلا موجوده بكل العائلات
مشكلتنا بتنحصر بان بابا و اخواني اذا بالغلط وانت بتقلب على المحطات لمحو فيلم عربي من ايام اتسعينات و خصوصا لعادل امام , محمود عبد العزيز, نور الشريف.... - افلام متل الكيف, سواق الاتوبيس وهالقصص- بيصرّو يحضروه ولو للمره ال 100 بعد المليون.
يعني بكونو حافظين الفيلم عن غيب و بقدرو يحكو الحوار كامل وبرضه بحضروه :(

مع انهم ما بكملوه للاخر بس بيضيعو نص ساعه بيكون الاشي اللي بدك تحضريه بادي و انا بكره احضر اشي مش من بدايته :$ ما بنسجم :), وما بدي احكي اذا كانت مباره كره قدم او سله.....خلص انسى السهره كلها :(

امبارح مثلا كان فيلم محمود عبد العزيز "على جناح يمامه" حضرو نص ساعه منه كالعاده وغيرنا القناه.
بس بعد هالنص ساعه ضلينا ساعتين واحنا نحكي عن هالمشهد, بصراحه نرفزتني الاخت....انا بكره الست او الزلمه النكد, كل اشي اله وقته, يعني كل انسان بتنكد من اشي ما اختلفنا وانا اولهم بس في اوقات غلط كتير الواحد يقعد يتنكد فيها.
اتركم مع المشهد وانتو احكمو :)



ورد...

اكيد ان الكل سمع عن الطفل ورد الربابعه المختفي من منزل والده من اسبوع تقريبا
بس لعل وعسى هالفيديو يساعد اهل الطفل انهم يلاقوه ويرجعه الهم سالم يا رب
بركي حد ما بعرف شكل الطفل
او شاف الطفل بالصدفه واستطاع انه يحكي مع والده

خبر وتفاصيل الاختفاء
هنا
هنا
هنا






اعترافات زوج غريب






قبل فتره بحكولي صاحباتي ان كان عندهم شغل مع مجموعه من الشباب بقسمهم, وهمه بحكو اتطرقو للفرق بين الزوج والزوجه, فالشباب انسجمو و حكولهم بعض الاعترافات , اللي انا ما حسيت انها ممكن تتعمم بس عالقليله نتعرف على افكار بعض الازواج

* بالنسبه للمرض

بحكولهم ان الزوج اكره ما عليه ان زوجته تمرض, و دايما بلوموهم اذا مرضو, ما انت ما بتشربي الا المي بارده, ما انت هداك اليوم حكيتلك الجو بارد وما رضيتي تاخدي جاكيت..اما همه فلو الواحد عطس عطسه بنام اسبوعين بالتخت, وهات يا طلبات و هات يا دلع.

* مبدأ المشاركه

الزوج بحب زوجته تشاركه بكل اشي بالحياه.
واحد من الشباب حكالهم انه بطلب من زوجته تاخد ورثتها من عماره ابوها علشان يشترو بيت - بحب اضيف ان ابوها اساسا مش متوفي- فبعد اقناع والحاح و تهديد و توضيح مبدأ المشاركه بالحياه, والتعاون وان ربنا بأمر الست تساعد وتشارك زوجها بكل اشي -مش عارفه من وين جابها هاي بس يلاا مش موضوعنا- وافقت وامره لله , فبتسأله يعني بدك تكتب البيت باسمي؟؟؟ حكالها طبعا لأ, حكتله و وين مبدأ المشاركه...حكالها بهالموضوع بالذات المشاركه حرام !!!

* الاهل

الزوج بحب مرته تحب اهله وتزورهم و تودهم ....بس بكررررره انها تروح عند اهلها و تودهم و بكره بس يجو يزوروها, و بحب امه تدخل بامور حياتهم لانه حقها و بكره بس مرته تحكي لامها اشي او تشكيلها او تدخل, و اهل الزوج وخصوصا الام بكرهو اهل الزوجه و خصوصا ام الوزجه.
بحكي واحد من الشباب ان اول ما قرر يتزوج ما كان لاقي بيت مناسب وتأجل الزواج لهالسبب و حاول الشب يتداين او يدبر اموره من اهله من اي حد مش زابطه معه, لما ام الزوجه لقت الموضوع طوّل عرضت عليه انه يتزوج ويسكن عندها بالبيت , لما عرفت والدته بالموضوع, سألته انت كم بدك؟؟ حكالها المبلغ تاني يوم كانت مدبرته :)

* الفلوس

الزوج بكره يكون مع مرته فلوس ومهما كان المبلغ, بحب هو يعطيها مصروفها وعالقد القد , وحتى لو بتشتغل بحب ان تكون بطاقه الصراف الالي معه وهو يسحب راتبها و يعطيها اياه بالقطاره على رأي واحد من الشباب.

يعني تخيلو هالعقول و هالنفسيات الي بدها تربي جيل جديد و تفتح بيوت قائمه على المصلحه الشخصيه و الانانيه....
جد بقهرو اللي بفكرو بهالطريقه, يعني الزواج هو استقرار و تعاون ومحبه, واذا ما كانو التنين قلوبهم على بعض ما بتكون حلوه الحياه, تحول كل هالشي لامور ماديه وامراض نفسيه بحته.

الله يهديهم هالنوعيه من الشباب, لان همه بهالحكي مش بس بخربو على اولادهم وعلى عائلاتهم لا بخربو على حالهم و بضيعو ساعات و ايام وسنين من حياتهم عاشياء فاضيه