Things I Like To Whisper About

Would You Hear Me Whispering

تنبؤات الابراج لعام 2011




للي بفكر انو هالبوست قديم وماشي عليه من قبل.......لا تنسو تقرأو الملاحيظ بالاخر :)


اهلَين وسهلَين فيكون في عالم ويسبر "معلوف" السحري للابراج,زي ما عودتكُن باول كِل سِنه بدي نبئكُن بتوكعات الابراج لكِل واحد و وحده فيكون- المقدمه اللبنانيه لزوم التسويق للمنتج :) و بعرف اني ما عودتكم على شي بس برضه الكزبه لزوم التسويق , و خلص صار حنكي يوجعني ,فنرجع اردنيين مرّه تانيه :)

بالنسبه لتوقعاتنا السياسيه
في حد راح يموت, وفي حد راح يضل , وفي ناس راح يألفو كتب, وفي بلاد راح تنباع وفي بلاد راح تتبهدل وفي بلاد راح تضلها مترفشه ببطن بلاد تانيه.......باختصار مفيد جدا يبقى الحال على ما هو عليه وعلى المتضرر انه ياكل هوا ويضلو لابد وساكت ....العادي تبعنا يعني .

الاوضاع الماليه
هلأ بالله عليكم لو في واحد من اللي بقرأو المدونه عنده اموال بحاجه لدراسه اوضاع بكون هون؟؟؟ اي اللي معو 50 نيره بهالوقت يضحك بعبو..واللي معو وبقرأ فبس علشان احطكم بالصوره, على رأي الجد اللي بالشهد والدموع " منّه له منّه له..جي رايح منّه له " :)

اما بالنسبه لتوكعاتنا للابراج لسِنة الفاين و عشرة قصدي وحداش :$ وبما ان الاوضاع ماكله هوا فالسنه سنه خير للابراج الهوائيه , ولكن للاسف الناريه راح تنطفي السنه, والترابيه راح تتحول الى غبار رمليه شماليه شرقيه, و المائيه راح تنقلب على راس اصحابها بامواج عاليه الارتفاع فيا جماعه بالعربي ...السنه مش سنتكم

برج الحمل - برج ناري

بما انه برجي فراح احطّه لحاله ,هالبرج راح يقاوم الرياح العاتيه وما راح ينطفي وراح يقاوم يعني بالعربي خاوا بدها تكون سنه خير - ان شاء الله طبعا :$ - و كل اللي بهالبرج راح يتغير مديرهم, لا لا راح يغيرو شغلهم, و راح يغيرو سياراتهم, وراح تتحقق كل امنياتهم اللي ببالهم حاليا واللي ممكن تطرأ لظروف جديده - استحياطا يعني - واصحاب هاد البرج راح يهدى بالهم, و يكونو اقرب لله ان شاء الله :)

الاسد والقوس -برج ناري

مثاليين, ويمكن هاي مشكلتكم وهاد اللي خلاكم تاكلو هوا
بهيك زمن ما بتقدرو تعيشو, معكم فرصه لاخر السنه انكم تتغيرو الكم عندي انجحكم السنه الجاي :)
خياليين وحالمين, خلّو الاحلام تنفعكم اذا بالواقع مش مشيين حالكم - طبعا هون انا بدّي اوضح اني بستثني برج الحمل من هالكلام - وين كنت ..اه مشو حالكم بالاحلام لشوف :)

برج الثور و العذراء والجدي - برج ترابي

اصحاب هاي الابراج عمليين وعلميين, بسيطين ومحل ثقه للجميع...انبسطتو عحالكم صح !!!
ماشي ماشي خلّي العلم ينفعكم, لاا لااا لااااه راح تاكلو هوا السنه :)))


برج الجوزاء و الميزان والدلو -برج هوائي

ايوه ياعم....مشيه معاك حلاوه, راح تتجوزي يختي ارتاحي منك الها , اخيرا راح يتحقق الحلم :$

وكل واحد و وحده منكم راح يطير و تطير لمستقبل باهر زاهر ماهر ان شاء الله
استغلو السنه لاني قررت السنه الجاي احطكم مع الفئه اللي ما راح تنجح :)

سرطان وعقرب وحوت -برج مائي

اصحاب هالابراج حسيسيييييييين و شاعريين, بس مش دوامه اللي راح تدخلوها السنه, هوا ومي يا سلااااااااااااااااااام.... ملااااااااااااااااااهي وعلشان ما حد يبدا يبكي, الملاهي حلوه و بتجنن صح يااااااااااي
بس المشكله انكم ما راح تطلعو منها لنهايه السنه :$


وهيدا كيل اللي بنتوكعه لهالسِنه و بتمنى لالكن سنه سعيده و هابي نيو يير و تشير اب يا جماعه اتس جست يور لاك :))



المعلومات السابق ذكرها جديده علي بصراحه واضطريت ابعبش وابحبش بالنت لاعرف ترتيب الابراج و انواعهم فشكرا لعمو جوجل.
اه واشي تاني ,اللي بدو يزعل علشان برجه فانا بعتذر الموضوع مش بايدي هاي تنبؤات فلكيه و علميه بحته ومش اشي انا اخترعته :(


ملاحيظ ع الهامش

اي تشابه بين هاد البوست و بوست توقعات 2010 فهو من محض الصدفة البحته .... و ما الكم علي يمين غير مقصوده اطلاقا مطلقا, ومش انو بوجهلكم رسالة انو شو متوقعين يتغير مثلا!!! وبعدين انتبهو للاسم..... بركي الاخت "معلوف" بتغش من الاخت "شمّاس" هاد عأساس انو كلامهم اله مطرح من الاعراب اساسا.....
وهالتشابه لا يعني اني لا سمح الله لا سمح الله مبطله اعرف اعبّر و الكلمات صايره ولا الها دخل فيي, او اني بالعربي بطلت اعرف اكتب :( لاااا ابدا مش هيك
ولا اني مثلا منصدمه انه مشيت سنه كامله وما حسيت فيها, ولا اني بعد المراجعه للذات حسيت ان انجازاتي جدا جدا جدا متواضعه كانت هالسنه و ما حققت شي يذكر غير اني تركت شغلي :)
هو يمكن الافلاك وزحل و المشتري و اقماره السنه سبحان الله موجودين بنفس اماكن السنه الماضيه البعد النوعي و الكمّي والمسافة الافقيه والعرضيه و القطريه و الميتافيزيقيا الطبيعيه بتلعب دور كبير عفكرة - كلام كبير ما تحاولو - او يمكن معموللنا عمل.....او يمكن و هو الارجح....انا صايبني زهايمر يا جماعه, جماعه!!! اي جماعه!!!...اي بوست!!!!....مين انتو!!!....من ام عمر!!!...اي كعكاتّ!!!...وين انا!!!.... مين اناااااااااااا
اعتقد الفكرة وصلت و عرفت انسيكم اصل الموضوع :)

ملاحظه نمبر تو

للي كنت ناوية انجحهم
اوعكم تكونو مفكرين اني بخلت انجّح اللي رسبو السنه الماضيه او اني ما بوفي بوعدي....لا لا لاااااا بس انا حبيت ان الوضع الطبيعي اللي كلنا عايشين فيه ما يتغير....كل الي بوعدونا كذبو علينا....وانا متواضعه من يومي و ماشية على رأي كل الامثال العربية اللي بتحث على الرضا باسؤ معانيه و الخنوع و عدم التحرك من حط راسك بين الروس....لا امشي الحيط للحيط....فاااااا حطيت راسي بين الحيطان و اخلفت وعدي بس و فقط علشان مصلحتكم خفت يصيبكم صدمه حضارية من التغيير.... و كلام للابراج الهوائيه.... هيني دعمتكم للسنتين فبدنا دعمكم يا جماعه - طلعت بنفع للانتخابات :)

و كل عام وانتو بالف خير

تسليم واجبات 2010




علي واجبات كتيره و حبيت اخلصها قبل ما تخلص السنه لنبدا سنة جديده بيضه, كل عام وانتو بالف خير يا رب

صديقتي الغاليه اللطيفه "لطيفه" كلفتني بهالواجب من اول الشهر بس شكلي كسّلت مع القعده و هلأ لحليته , مش انه صعب وما عرفت اجاوبه الا هلأ...لا ابدا اطلاقا مطلقا :)

- لخّص حياتك الدراسية في جملة .
مدرسية رائعه جامعيه سيئة

2- لخّص حياتك اليومية في جملة .
اعيش يومي بتفاؤل بغد افضل

3- لخّص حياتك العاطفية في جملة .
بحب الله و الرسول وبابا وماما و خواني و اولادهم :)

4- لخّص مجمل ما عشت في جملة .
الحمد لله على كل حال

5- لخّص حياتك العمليه في جمله
بعد 10 سنين معاناة بالشغل يشرفني اني التحق بركب البطالة "مؤقتا" ان شاء الله :)

5- أرسل الواجب إلى أربعة من أصدقائك .
بدي اقتبس رد صديقنا صالح..... جميع من أمون عليهم قد وصلهم هذا الواجب.

هلأ لخصت صحيح بس انا بطبيعتي كتيره حكي, فلازم اوضح
اول شي يمكن انا الوحيده اللي بتعتبر 4 سنوات الجامعه كانت وحده من 3 اسؤ فترات في حياتها :$

ثاني شي... حياتي جميله جدا ولله الحمد , الصحه و الاهل و الرضا اهم شي بالحياه و ربنا منعم ومتفضل علي فيهم, لكن اكيد ما خليت من الحفر مع اختلاف اعماقها, اشي طلعت منه و نسيته تماما و اشي خلاني اكثر حذر للخطوات التانيه و اشي من شدّة الحذر خلاني اوقف مكاني و خايفة اتحرك ..... فدائما الحمد لله على كل حال :)


واجب تاني من الصديقان ابو زينه و صاحب الفكرة جعفر عن حصاد عام 2010


1- ما هي اهم الأحداث التي طرات على الصعيد المهني - التعليمي لهذا العام؟

اخيرا و بعد 10 سنين شغل منها معاناه اكثر من 5 سنين اخدت اجازه سنة و بديت صفحه جديده في حياتي العمليه :)

2- ما هي أهم إن الإنجازات على الصعيد الشخصي و الأسري؟

للاسف بسنة 2010 صار في حالتين وفاة عنّا بالعيلة استوقفوني و اثرو فيي كتير, لفقدان الاحبة و لرهبة الموت , تقبّل الموت طبعا ما في اعتراض عليه و لكن فكرة ان في حد اختفى وما راح نقدر نشوفه و نحكي معه مرّه تانيه فهاي كتير صعبه, الله يرحمهم و يغفرلهم و يرحم جميع اموت المسلمين
سبحان الله الانسان مع الوقت بنسى و بتستمر الحياة ولكن بتضل في غصّه موجوده او يمكن بلحظات بس يكون قاعد مع حاله بتزكرهم و بتألم على فراقهم, الاشي اللي ريحني اني حلمت بعمي الله يرحمه ثالث يوم من وفاته و شفته وقف قدام الباب ابتسملي و مشي, ان شاء الله يكون خير و ربنا يغفرله و يرحمه يا رب.

الحمد لله ربنا رازقني بعائلة رائعه, بأب و ام مثاليين و اخوان رائعين و زوجات خوان اروع اللي اختلف ب 2010 وكان اهم شي الحفيده الجديده نور وانّا بأنتظار الحفيده الجديده الثانيه " ايفيلين" يا بتكون ب 2010 يا ب 2011 :)


الصعيد الشخصي..... كان ممتاز ليوم عيد ميلادي, ارتفع للسما لبعدها بشهر و فجأه نزل بسرعه 1000000 كيلومتر بالثانيه الحمد لله حاليا رجع لمقبول وهيني بدرس منيح لاخد الامتياز :)
بعتبرها ثالث اسوء فترة من حياتي :(


3- :ما تقييمك العام لسنة 2010

كانت سنة يمكن اني اوصفها "تقريبا" سيئة

4- : أهم طموحاتك و اهدافك للسنة الجديدة 2011؟؟


حكينا عن اهدافنا بال 2010 ببداية السنه بمدونة قرابتي رولا اللي اشتقتلها كتير كتير كتييييييييييييييييييييير - ربنا يصبرها على وفاة والدتها و يرحم خالتو ويدخلها فسيح جناته يا رب - معظم الاهداف اللي كنت حابة احققها ب 2010 ما صارت, اهمها العمره :$ ربنا يكتبلنا اياها , اني احوّش فلوس - عأساس ال 2000 دينار اللي كنت اخدهم ايام ما كان عندي شغل :) - بس الحمد لله حققت اشي منهم , نزّلت وزني و الحمد لله ربنا قدرني اصوم الفتره الماضيه لكن للاسف مش كل اثنين , و قدرت اصير اتحكم باعصابي و صرت طويلة بال بزياده و مش كل شي ينرفزني :)

بهيك تأجلت العمره و تحويش الفلوس لسنة 2011 و انضاف عليهم اني الاقي شغل ارتاح فيه ان شاء الله بالامارات او بالاردن وما اضطر ارجع لشغلي القديم, اني ازيد من تفاؤلي بكل شي بالحياة , ارجع للقرأة اللي بحبها و اللي بحسها بتحسن من شعوري تجاه نفسي و اكتّر من قراءة الكتب الدينيه و التاريخيه لاني ناسية اشياء كثيره :$, اظهر محبتي بشكل اكبر لماما و بابا وادير بالي عليهم اكتر لاني السنة الماضيه كنت " شوي" على كئيبة و كأني... كأني تشكونت كتير من شغلي طول الوقت و همه اللي دايرين بالهم علي

باب الاشتراك مفتوح للجميع بدون تحديد الاسماء و لكن الشروط...انو اسمي يكون مكتوب :) و اسم صاحب الفكرة و اللي هو جعفر برضه يكون مكتوب....علشان اذا الموضوع فيه حبس ياخدونا كلنا لنوّنس بعض :)

اما بالنسبة للواجب الثالث من هيثم.... أكثر موقف غريب/محرج حدث معك على البلوجر؟ "أو على الشبكة ال"ذبابية" بشكل عام" ؟


فاااااااااااااااااااا ما الك علي يمين ولا موقف صار....الحياة البلوجرية هاديه جدا جدا جدا :)

مدونات من اجل التغيير




فكره جديده لزميلنا المدون محمد علي عباره عن تجمع للمدونين في موقع واحد لتبادل المعرفه و لعمل تغيير فعال في توحيد الكلمه , الفكره كتير حلوه و اذا كلنا شاركنا فيها ممكن نعمل تغيير ملموس , من افكار الموقع ان يعمل مسابقات دورية لافضل موضوع و لافضل فيديو و لافضل صوره و بهيك ممكن الكل يشارك و يتنافس و ممكن نتعرف على مدونات جديده سواء علينا او في عالم التدوين
من اهم اهداف الموقع
- تقوية الروابط بين التجمعات
- يناء تجمع قوي قادر على التغيير و التأثير
- تسهيل نشر المدونات الجديده
التجمع عباره عن عده اقسام لانواع التدوينات حكي بالسياسه ... وحل واقع...اقلام ساخره... يوميات...مساحة الادباء... و اخترنا لكم
و في شخص مسؤول عن كل قسم بتم تزويده بالتدوينات اللي انتو بتشاركو فيها عن طريق نموذج خاص موجود بالموقع والمسؤول بختار افضل مشاركه او مشاركتين ليتم نشرهم
وفي قسم اسمه اساسيات التدوين و حيكون فيه تدوينات لطريقه شرح بناء المدونه من الالف الى الياء
لتعرفو اكتر عن الفكره زورو الموقع و لا تنسو تشاركونا هناك و تعلقو على مشاركاتي :)
او اكبسو على صوره التجمع الموجوده على صفحتي الرئيسية

وبحكو عنّا دمنا مش خفيف



اللوجو الخاص بالبرنامج


اكيد المعظم سمع عن سلسلة "بث بياخه" الاردنية لكن حسيت انه خسارة يكون في حد ما بعرفهم لهيك قررت اكتب عنهم.

, ما بعرف هو برنامج تلفزيوني ويلا بس فيديوهات عاليوتيوب لكن الجماعه دمهم خفيف كتير و افكارهم حلوه كتير, اللي لقيته هو حساب عاليوتيوب و بتضمن 5 فيديوهات و بتمنى انهم ما يوقفو و تستمر هالسلسه.

كل الفيديوهات حلوين بس هدول اكتر شي حششت عليهم و بنصحكم تحضروهم كلهم








Movie :: Letters To Juliet





ما زالت الاجازه مستمره و ما زال الاسترخاء موجود و الحمد لله, بقدم على شغل و عملت كم من مقابله لكن الاجراءات كتير بتمشي بطيء هون غير انو عطلة العيد و بعدها العيد الوطني و راس السنه الهجريه ...ربنا يجيب اللي فيه الخير, المهم اجازه يعني طلعات و مشاوير و لكن بما انها اجازة طويله فالاكل في سيطره عليه, وكل جمعه باخده اوف يعني بعوّض الاسبوع كله :) شهر وشوي مشي و الوزن باقي زي ما هو وهاد اهم شي.

بالغالب بنطلع وبس نرجع عالبيت وفي وقت بنحضر فيلم, حضرت مجموعه كبيره من الافلام و خصوصي ان النت هون ما فيه محدوديه للتنزيل لهيك كل يوم بنزّل فيلم او تنين و بالليل بس ينام عبود بنحضره انا و مرة اخوي.

حضرت اكتر من فيلم اشي عجبني و اشي لأ اللي عجبوني

Inception
Remember me
babies
Law Abiding Citizen
Dear John
letter to juliet

وفي افلام لسا بدي احضرها و متوقعه انهم يكونو حلوين...بتمنى بعد ساعات من التنزيل يكونو حلوين

Due date
You again
Tangled
Mother and Child
Green Zone
The Lovely Bones بناءا على اقتراح Rain
Morning glory
Letters To God

الفيلم اللي بدي احكي عنه زي ما هو واضح من العنوان letters to juliet g لكن بالاول بدي احكيلكم اني مش متخصصه بالموضوع فمعلش اذا تهتو بالقصه ...لكن متأكده انه حيعجبكم
حبيت الفيلم من اول ثانيه لقبل 5 دقايق من نهايته, مش انه نهايته مش حلوه لأ بس النهاية التقليديه لهالنوعيه من القصص بس اجمالا حلو, حبيت اغنيه المقدمه كتير كتير ومش راضيه تروح من بالي بعنوان You got me

فكرة الفيلم نوعا ما جديده, الفكره باختصار علشان ما احرق القصه, وحده شغلها التحقق من صحه القصص بالجريده fact checker , ونفسها تصير كاتبه بالجريده, بتروح مع خطيبها لايطاليا علشان شغله و علشان يقضو اجازه , الخطيب دائما مشغول فهي كانت تلف بالمدينه لحالها, بيوم راحت لتزور بيت جولييت و البلكونه اللي كانت تحكي منها مع حبيبها روميو, كل البنات السائحات بيجو عالموقع يكتبو لجولييت رسائل عن هموم الحب و يلزقوهم على الحيط تحت البلكونه وبآخر اليوم بتيجي وحده بتجمعهم و بتكتشف البطله ان في مجموعه من الستات بشتغلو " سكرتيرات" لجولييت حسب ما بسمو حالهم , بقرأو الرسائل و بردو عليها وكأن الرد من جولييت, البطله حبّت القصه و بيوم وهي بتلم الرسائل وقعت صخره من البيت و بين من تحتها رساله, طلعت محطوطه من 50 سنه قرأوها وكانت من وحده بريطانيه و عمرها 15 سنه وحبت واحد ايطالي و اتفقو يتزوجو وبيوم ما قررو يتلاقو بالسر من ورا اهلها ما قدرت تروح و تركته, البطله تبرعت بانها ترد عالرساله و بناءا على هالرد بتصير احداث الفيلم

احضروه وما راح تندمو :)
وهي اغنية المقدمه You got me :)



ان الله يهدي من يشاء




بعد ما تخرجت من الجامعه قعدت سنه كامله بالبيت بدور على شغل و من غير ترتيب اجا الشغل, كنت رايحه زياره لبيت عمي و اجا ابن عمي اخر الزياره اول ما شافني بحكيلي " كيف رحتي من بالي!!" طلعو بدهم بالكليه اللي بدرّس فيها محاضر حاسوب و اتفقنا تاني يوم اروح عالكليه و اقابل مساعدة الرئيس وفعلا و بعدها قابلت الرئيس و وقعت عقد و بديت تدريس تاني يوم فورا :).

مرحله التدريس كانت لسنه اولى و سنه تانيه و كانت كتيييييييييير حلوه وفيها مواقف كتيره خصوصي اني كنت بال23 فكنت تقريبا بعمر الطلاب و احيانا اصغر منهم, وكانت كتيييييييييييييييييييييييييييير متعبه و سبحان الله عأخر الفصل طلعلي بالحكومه و طبعا على رأي المثل .....مش متزكره منه الا الميري واتمرمغ فيه :$ المهم خلصت الفصل وطلبو مني اراقب شامل و فعلا كان لسا في وقت لبداية الدوام بالحكومه.

خلال مراقبتي للشامل تعرفت على مدرسات من كليات تانيه, وحده منهم اول ما شافتني انصدمت وانا قلبي من جوا فرح - ببقى احكيلكم قصتها بعدين - المهم وحده من المدرسات كبيرة بالعمر و كان الكل بباركلها عالحجاب و هي صارت تبكي , حكتلنا قصة حجابها

تزوجت مباشرة بعد التخرج , زوجها كان متخرج من روسيا تخصصه بشي بخص الديانات مش متزكره شو بالزبط و معه دكتوراه و كان شيوعي و معلنه هالشي, و اهلها بوقتها ما عارضو وما كان عندهم مشكله و اول ما اجا عالاردن اشتغل بجامعه من الجامعات الاردنيه و افضل ماده قريبه من تخصصه كانت الثقافة الاسلاميه :$ كان يدرس الطلاب الماده و يحكيلهم انه مش مقتنع باللي بدرسه و يحاول يدخل افكار شيوعيه من خلال المحاضره, طبعا ما كان معترف باي ركن مطلوب لا صلاة ولا صوم ولا اشي, وهي كانت ملتزمه بالصلاه و كانت توصل فيه انه وهي بتصلي يحط ابنها على ظهرها لحتى يدايقها, كانت تحكيله عن رغبتها بلبس الحجاب و كان ردّه " يوم ما بدك تحطي هالشريطه على راسك فورا بتروحي عبيت اهلك" و كلنا بنعرف ان ايام زمان كانو الناس مش كلهم ملتزمين بالدين, كان العادات و التقاليد و ثقافة "العيب" هي اللي بتحكم مش "الحرام", و طبعا فكرة الطلاق مرفوضة تماما بوقتها و لهلأ, فأستمرت بحياتها زي ما بده, كانت تصلي لانه ما بقدر يمنعها من الصلاه بس دايما يحاول يعيق هالموضوع.

بيوم كانو طالعين يسهرو كعادتهم براس السنه الميلاديه, كانو ساكنين فوق بيت والدته, و لازم قبل ما يطلعو يمرو عوالدته يسلم عليها و يحكي معها و يطلع, وبالفعل نزلو وحكو و ضحكو و ودّعوها و طلعو, بوقتها ما في موبايلات كان روحو لقو عجئه و ناس, اكشفو ان والدته توفت بعد ما ودعوها بفتره قصيره, و كانت هاي اول صدمه اله, تاني يوم وقت الدفن وبما انه لازم المحارم اللي يحطو المرحومه بالقبر نزل هو عالقبر, ومن وقت ما حط والدته بالقبر لرجعو عالبيت و هو منهار و ببكي, عرفت زوجته و راحت لتهديه و تواسيه , بعد ما هدي حكا لزوجته انه حس بشي جوا القبر بسحبه و كأنه مش قادر يتحرك و حس قديش الدنيا ما بتسوى شي و كيف اخرنا كلنا للقبر, وفورا حكالها بتمنى انك لسا بدك تتحجبي و فعلا من يومها تحجبت و هو التزم بالصلاه بالمسجد و كل سنه بروحو عمره و ربنا رزقهم بالحج

ما حد بعرف شو نهايته و شو نهايه غيره, كتير منا بطلقو احكام على غيرهم وممكن توصل انهم يلعنو و يسبو على ممثل او ممثله و احنا ما بنعرف شو مقدار الدين اللي بقلبهم, تذكرت القصه هاي لموقفين مرو بهالفتره, اول شي جديد حضرت فيديو لحلقه اللقاء مع حلا شيحه و زوجها على قناة الناس عاليوتيوب و جد هزني كلامهم و طريقة هدايتها و اشي تاني تعليق ما نشرته بناء على طلب صاحبه وصلني على بوست بكفي تقييم للعالم و حبيت احكي هالقصه لعل و عسى هالقصه تريّح البال

اللهم احسن خاتمتنا


7 Random facts about me - Tag



تاج جديد.. هو بصراحه واجبين بواجب واحد من الاموره سارة و المعروفة في عالمنا التدويني ب Rain و الثاني من الاموره Bullet واللي من زمان مررتلي اياه وانا لاني كسلانه صايره اجلته :$
و قبل شوي قرأت دعوة من الغاليه وفاء برضه :)



هلأ ما بنكر ان في اشياء كتيره ما بتعرفوها عني, ولكن الصعوبه بأني الاقي 7اشياء تنحكي :)

1 - وانا صغيره كان عندي مشكله قضم الاظافر - عجبتني قضم :) و لأ هيثم مش مسموح تعلق على هالكلمه - ...مش حاله نفسيه ولا عقده ولا كلاكيعو - لسا ممنوع التعليق هيثم - بس انسجام مش اكتر :) و كانت ماما تحكيلي اني حكبر و اظافري يصير شكلهم بشع و كبرت وكل شي تمام والحمد لله فيا صغار لا تصدقو ما بصير اشي بالمره :)

2- بكره حد يحكيلي اعمل شي انا كنت ناويه اعمله , بعرف ان الكل هيك بس انا مبالغ فيه الزعل لدرجة اني ببطل اعمله و بلغي الموضوع تماما...بفكر فيها بعديها بلاقيني بالغت بردّه فعلي لكن كل مرّه هيك بصير.

3- كتير بيجيني حاله مود الاسترخاء, بكون جاي ابالي احضر فيلم حاضرته 100 مرّه و بحبه وحافظه قصته بكل لقطه بس هيك اتفرج و انبسط , زي فيلم موتنج هيل, اوتم ان نيويورك, اونلي اف, تو ويكس نوتس

4- بحب العب بشعري بس اجي انام, بضل العب بشعري لاخر لحظه قبل ما اغفى, فروحه هيك بتحب حد يلعبلها بشعرها و مميتي شافتها بتحكي هاي طالعه لعمتها - اللي هي انا :) - انصدمت, بحكيلها كيف عرفتي!! طلعت عندي هالحركه من ايام الطفوله, و كتير مرات بتكون ماما قاعده بحط راسي بحضنها و بتضلها تلعبلي بشعري, انا فكرت الكل هيك, لحتى مرّه بلعب بشعر بنت خالتي الصغيره و حسيتها متدايقه , وطلعت بتكره حد يمسك شعرها :)

5- انا اجمالا طويلة بال مع الجميع ومع الصغار بالذات....بس فروحه تناديني "ناني" او عبود يناديني " مانا" بعرفش شو بصير فيي و اي شي بطلبوه مني بصير اوامر وبالعاده نلعب باغراض الشاي و الطبخ انا و فروحه او نلعب بال " كوا" اللي يعني سياره و "تومو" اللي هو القطار توماس مع عبود, مستعده اترك اي شي بعمله و العب معهم

6- بس اكل اي شي بحدد الجزء الاكثر زكاوه فيه و بحاول اكل من الاقل زكاوه للاكتر زكاوه, ممكن اكل القاع قبل الوش حسب الترتيب و نفس الشي بالمكسرات, فستق حلبي بعدين لوز بعدين كاجو :)

7 - ما بعرف اقشر اي نوع من الفواكه او الخضار...تفاح ...برتقال...خيار...اي شي بقشره بقشارة البطاطا :) ولكن - علشان ازبّط "الايمج" شوي - انا حرّيفة محشي كوسا :) حفر و حشي بدقائق معدوده .....يعني المحاشي لعبتي :)


التاج لازم ينتقل ل 7 وهالشي هو اللي بحتار فيه :$

انا حختار و اللي بحب يعمله يعمله واللي ما بحب يعمله هو حر ....لكن راح يضل مسجل علامه فاضيه مكان اسمه :)
وهي فرصه لنتعرف على بعض اكتر :)


العسل صاحبه مدونه جرات عسل






سوزان اللي بضلي ازعجها بهالقصص لانها بتضلها تغيب عنّا


مياسي :) علشان تضلك تتزكريني


Jaraad - لحتى نتعرف عليك اكتر اذا بتحب :$


و اخيرا وليس اخرا... قط البكتريا لانّا برضه من زمان ما سمعنا صوتك


و سلامتكم :)

واجب الاسئلة الفضوليه :)



عندي واجبين المفروض احلهم
الواجب الاول من اكتر وحده بتكرهني بعالم التدوين - وخده بالك حضرتك - ام عمر و بيسان


السؤال الاول...هل انتي فضوليه؟؟

هلأ بالعموم انا ماشيه عمبدأ "بكره بدوب التلج و ببان المرج" يعني اذا عرفت عن الموضوع منيح ما عرفت عنه عادي....
ولكن - طبعا المعظم كان بستنى هال لكن - عندي مشكله بان حد يبدا يحكي بموضوع و بعدين يقرر ما يحكي O_o
هون بتشرّت الامور و بصير بدي اعرف كل تفصيله و كل حركه و همسه و نظره, بصير الفضول عندي لدرجه اني طول اليوم اضل افكر بالموضوع و ممكن اذا حسيته خطير ما انام بالليل...صف تاني ب بصير عطول و بضلّي كل دقيقه اترجى ان حد يحكيلي و هون بصير ماشيه على مبدأ " الحّ...يلح..الحاحا" :)


السؤال الثاني...ما هي الاسئلة التي تستفزك؟؟؟

كتير بتعلني الاسئله اللي اجابتها واضحه...رجعتي...صحيتي...من هالنوعيه في ناس بسألوهم من باب الدعابه ...بس اللي بعلوني اللي بسألو وبستنو جواب O_o

بكره حد يسألني سؤال بنص الفيلم اللي النا ساعه بنحضره ومن السؤال يبين انه مش فاهم اشي و بدي اقضي نص الفيلم التاني وانا اشرح...وبكره الاسئلة اللي بتتخلل حضوري للفيلم, هاي سيئه فيي بحب الافلام كتير وبحب انسجم وما حد يقطعني :$


بكره بس يكون طالعتلي حبّه بنص صباحي - بعد ما اكون اجرمت بكيكه بلاك فوريست او تشيز كيك قبلها بكم يوم :) - و انا بحاول اخفيها و اقنع حالي انها اختفت و فجأه تيجي وحده تسألني...من ايش هاي !!!
انو شكرا :(

سؤال ...ليش لهلأ ما تزوجتي؟؟ هاد بطل يأثر فيي...خلص تمسحت بعيدن عني :)

نيجي لنقل التاغ هلأ مشكلتي الدائمه بالاختيار ان في ناس بحسهم ما بحبو التاغ وانه لطالبات الصف تاني ب - اللي بسن حضرتي و حضرتك وخده بالك - فاااااااا


بختار صديقتي و اختي المغربيه لطيفه صاحبه مدونه اللي فرط يكرط




سارة الحلوه Rain


كل عام وانتم الى الله اقرب




كل عام وانتو بالف خير
ان شاء الله تحققو بهالسنه كل احلامكم اللي ما تحققت بالسنوات الماضيه

و ربنا يستجيب لكل صلواتكم و ادعيتكم

سنة خير عالجميع ان شاء الله

و لا تنسو صيام عاشوراء

9 محرم ان شاء الله حيكون يوم الاربعاء

تقبّل الله من الجميع


Open minded




نفسي اعرف شو يعني؟؟؟
شو يعني بس وحده تحكيلي خليكي Open minded!!!

شو يعني لما الشب او البنت بس يجو يتزوجو يحكو ان اهم شروطهم ان شريك الحياة يكون Open minded!!
وهل يا ترى قصدهم يكون Open minded بتصرفاتهم ويلا بردود افعالهم؟؟

بعض اللي كررو هالكلمة قدامي كانت جملةOpen minded بتعني اني انا او الشخص المقابل يسكت عن اي مخالفة دينيه او مخالفة لعاداتنا وتقاليدنا
Open minded يعني تقبل البنت انها تستغل من قبل زملاء الشغل و الادارة الاستغلال القذر

Open minded يعني الشب يقبل اخته او زوجته تقضي السهره وهي بتجامل س من الناس بطريقه مبتذله علشان مصلحه شخصيه الها و احيانا للاسف اله

Open minded يعني ان الشخص يسكت و ياكل هوا و يكون زي رجل الكرسي باي مكان و ينمسح بكرامته الارض وما يعترض على اي شي و يتقبل كل ما هو جديد مخالف لكل القيم الدينيه والدنيويه اللي انغرست فيه لحتى ما يكون انسان رجعي وغير متفهم و غير متحضر و مواكب للعالم بتطوره

لهلأ مش فاهمه...... كيف انه الشخص يكون Open minded بالمعنى الصح و الايجابي...اذا في معنى ايجابي اساسا
.يا ريت حد يفهّمني.....

بكفي تقييم للعالم....



موضوع لبس الحجاب كان من المواضيع المصيريه بحياتي, لبسته وانا بسنه رابعه جامعه, كنت افكر فيه من سنوات ولكن قبل ما البس الحجاب بشهر خلص وصلت للاقتناع التام انه لااااااازم اتحجب, و سبحان الله ربنا بعتلي عدّة رسائل, يمكن متهيئلي و ممكن فعلا صارت بس انا مقتنعه تماما ان ربنا ببعت لكل واحد فينا رسائل بكل شي بحياته لحتى يهدينا للطريق الصحيح و احنا اللي بنفهمها او ما بنفهمها و احيانا كتير بنفهمها بس في منّا بطبقها و منّا اللي ما بطبقها.

كنت كل ما اجرب البس حجاب الاقي حالي ابشع وحده بالدنيا, حتى يوم ما اشتريت الحجابات كنت اقيسه و احكي يا الله ما ابشعك و اعطيه للبياع اني بدي اشتريه

من القصص اللي صارت معي و اعتبرتها رسائل, قبل ما اتحجب باسبوع كنت راكبه بالباص مروحه من الجامعه, ركب الباص حج كبير بالعمر, كبير كتير وماشي على عكازات, قام واحد من الشباب علشان يقعد حكاله اشي بما معناه انه ليش نقعد وما في وقت لنقعد و الدنيا ماشيه ولازم ما نضيع اي وقت ولازم تعمل لاخرتك لانها جاي و شو خمس دقائق واقف وشو 10 دقائق واقف والعمر كله بمشي, انا حسيت الحج بحكي معي انا...انو شو بتستني ولايمتا!! روحت حكيت لماما هلأ بدي انزل عالسوق اشتري حجابات و هاد اللي صار, اشتريت حجابات و طبعا اشتريت اواعي جديده, مش لان اواعيي مش مناسبه للحجاب هو كان بس ناقصني الحجاب و لكن لحتى نفسيتي تتحسن شوي

يوم ما قررت البس الحجاب طلبت من صاحبتي انها تستناني بالمجمع لاني بدي اياها تكون معي بس الكل يشوفني, و فعلا تلاقينا هناك , ردود الفعل انقسمت لعدّه اقسام, اشي حكالي انهم كأنهم متعودين على شكلي بالحجاب و انه ما في شي تغير, و جزء باركلي بحراره جد فرحتني وكان عنّا استاذ مساعد كان في بيني و بينه مشكله في ماده بحوث العمليات عاسلوب المناقشه المهم شافني من بعيد ضحك و رفعلي اشارة الابهام انه جود فور يو :) كتير انبسطت يومها هو اي نعم ردينا تمشكلنا وقت مناقشة مشروع التخرج بس عادي .

هلأ الشباب يمكن ما بعرفو معاناة لبس الحجاب مش النفسيه لأ السمعيه :) اول فتره كل بنت متحجبه جديد بكون صوتها شوي اعلى من قبل, مش للفت الانتباه لا سمح الله لأ بس لانها بكل بساطه مش سامعه غير صوت حالها :), تخيل ان فجأه في شي على دينيك مرافقك بكل حركه, حتى صوت حت القماش ببعضه جنب دانك بكون بقوه 10000 فولت , و اشي تاني ان في بنات متحجبات جديد مع العجئه و مع قلّه الاحتراف بحط الحجاب فجأه الشعر بنطلق للخارج من كل جهه من دون قصد - هون بعني اللي مش قصدهم تبين غرتهم و طراف شعرهم لان لهلأ في ناس بعملو هالحركه الغريبه عن قصد - فأنا طبيعي لسا اول يوم و كل شوي لازم اروح ازبط الحجاب, شافتني بنت من بنات " المصلّى " بتحكيلي شو هالحجاب اليوم بس و يلا لكل يوم, حكيتلها طبعا لكل يوم, بتحكيلي طيب مدام تحجبتي بلاها تطليع الغرر هاي, قهرتني و كنت لساتني من اللي بكتمو بنفسهم و ضليتني ساكته.

شوي رحت عالمصلى كعادتي من قبل ما اتحجب لاصلي الظهر, شافتني صاحبتي اللي معي بالقسم واللي معي بمشروع التخرج وبرضه من اللي يطلق عليها "بنت مصلّى" اتطلعت علي من فوق لتحت و رفعت حاجبها و حكتلي " لساّ....قدامنا كتير لسّا لنوصل" و كبّرت و بدت تصلي !!! شو هالاحباط!!!

مشكلتنا ان في بعض الناس حوالينا بفكرو حالهم ختمو العلم بالدين و وصلو للقمه مع اني مقتنعه ان بعد رسول الله صلى الله عليه وسلم ما في حد بوصل للقمه و اللي بفكر حاله وصل يعرف انه كتييييييييييييييير بعيد عن الدين الحقيقي, ناس بتفكر حالها بموقع يسمحلها انها تقّيمني و تقّيم ديني و تديني, بحكولي انتي مش مجلببه وانا الي الظاهر و الظاهر اللي مبين مش كامل لهيك انتي دينك مش كامل!!! ومين انتي لتقيميني؟؟؟ ومين حضرتك لتفكري ان انا ما الي انتقادات على تصرفاتك!!

المشكله ان في ناس ايمانهم بكون ضعيف او متزعزع و تصرفات مثل هالنوع بتخليهم ينفرو و يبعدو عن الدين بدل ما يقربو و يتمسكو اكثر و يحاولو يستزيدو , دائما بحد ربنا الغفور والرحيم اللي خلّى المحاسبه و العقاب و الثواب بايده هو مش بايد واحد من هالبشر....


ملاحظه ع الهامش

كنت متصوره صورة لكتاب التخرج و تحجبت بعدها و ربنا يسر اني اعطيهم صورتي بحجاب و اللي طلعت دمار مع اني اخدت صاحبتي لتتأكد ان شكلي منيح....عجييييييييييييييب منظر الحجاب طلع اشياءات طالعه و مزيوحه و ملفوفه :)

الى متى!!




كان يحب السير كثيرا, يجد فيه الفرصه الوحيده لممارسه حريته, بحيث يكون لوحده, لوحده تماما وخصوصا مع سماعات الاذن التي تفصله تماما عن العالم الخارجي, يختار القناة المفضله فلا احد يزعجه ولا احد يعترض, ولا يسمع اي صوت غير صوت افكاره تقاطع ما يسمعه بين الحين والاخر, ولكن حديثا اصبح هنالك ما يقاطعه و يفصله عن هذا الجو الروحاني و الطقس الجميل الذي تعوّد عليه, مجموعه من الحجاره او سياره قد تركت الشارع بما رحب لتصطف على الرصيف الضيق بالمكان الوحيد الذي تركته "اشجار الزينه" كما يسمونها بالرغم من انها بنظره قد افسدت المنظر و شوهته و افسدت عليه حريته.

اليوم المشؤوم بالنسبه له هو يوم التقاءه صدفه باصدقائه وهو يمارس هذا الطقس الجميل, لقائه باصدقائة يعني التوقف و نزع السماعات وبذلك يكون انتزع تماما من عالمه و رجع الى ارض الواقع, حديث ليس له معنى قد يستمر اقله الى نصف ساعه و قد يتخلله بعض المكالمات الهاتفيه و جلب سيرة فلان و علّان و قد يتخلله ايضا زجاجه من العصير او احدى المشروبات الغازيه, و بذلك يرحع الى عالم تلبية رغبات الافراد و البعد عن "عالمي" كما يحب ان يطلق عليه وهو ما يتخلل الفتره التي يقضيه فيه اقلها ساعتين خلال سيره.

ولكن اليوم حدث ما لم يكن بالحسبان, اليوم سحب احد اصدقائة السماعات بشده كنوع من المزاح و انسحبت السماعات ليظهر الصوت عاليا مجلجلا في اذان كل من حولهم, و بدأت التعليقات من حوله " ما هذا!!"..." والله ما عرفتك"..." زي اللي عنجد"... و بدأت الضحكات تتعالى حوله, شعر بخجل كبير و لم يدري ماذا يقول وبماذا يبرر الذي حصل, " ياليتني اغلقته قبل ان اقف معهم" و فجأه احس بان العالم كله توقف من حوله و اختفى الاصدقاء و اختفى الشارع و احس نفسه في منطقه سوداء لا يظهر منها الا بقعه ضوء وحيده يقف تحتها, " ولم و من ماذا تخجل!!" سأله صوت من داخل عقله, " وما العيب او الخطأ بالذي تسمعه!!! ءانت الذي يجب ان تشعر بالخجل ام هم!! " و بلحظه رجع ضجيج الشارع و قهقهات الاصدقاء و حرارة نظراتهم المستهزءه .....نظر اليهم وقال " نعم وما العيب في ذلك؟؟؟ ما العيب في ان استمع الى ما احب ؟؟ " ثم سأل نفسه " و لماذا اخبئ ما اسمع؟؟؟ لعلّ العلّه موجوده في نفسي انا و ليس بمن حولي!! " ..."لماذا افكر في رأي الناس عندما اكون مقتنع تماما بما افعله!! لماذا دائما نسعى لارضاء الناس مع ان ارضائهم ان لم يكن مستحيل فهو يعني في كثير من الاحيان عمل مالا نحب و اجبار انفسنا على ممارسات لا نطيقها"

ابتسم....اشار لهم بيده مودعا....وضع السماعات جانبا, رفع الصوت و مضى

ذلك الشعور



نعم اعرفه تماما
ذلك الشعور بانك قد وصلت الى القمه بالرغم من انك لم تراها بعد, عندما يتسلل الاحساس بان كل شيء سيكون على مايرام , وفجأة....تجد نفسك تستيقظ من دوران عنيف اصابك بعد سقوطك لتضرب باحدى الصخرات التي كنت تعتقد انك قد انتهيت من عبورها

و تتكرر تلك السقطات مع اختلاف الازمان و اختلاف شدّة الالم و اختلاف الصخرة التي عدت اليها, فقد يكون السقوط عنيفا مدويا او قد يكون انزلاقه خفيفه ليس لها ذلك الاثر, قد تسبب غيبوبه لفتره, قد تسبب كسر مع اختلاف العضو المكسور, يد!!! من الممكن ان تستمر بيد واحده او رجل واحده لفتره, نعم هنالك نوع من التأخير ولكن في النهايه ستشفى و تستمر بالتسلق, قلب!!! هنا نختلف , منّا من يستمر بقلب مكسور ومنّا من لا يقاوم, منّا من قد يلثئم جرحه و ينسى ومنّا من قد يلثئم جرحه و يحاول ان يتناسى, و احيانا قد نصاب بتوقف دماغي وفكري يختلف في حدتّه وفي فترة استمراره, و هناك ما هو اكبر باعتقادي....عندما نقف هناك عند تلك الصخره و لا نرى شيء, كل شيء ظاهر ولكننا لا نراه كل شي موجود و ابواب كثيره تفتح بعدما اغلق ذلك الباب في وجهنا و سقطنا الى هنا, ولكننا نبقى واقفين بين تلك الابواب المغلقه و الابواب المفتوحه نقف بلا حراك بلا امل .... ومنّا ايضا من يستطيع ان يستمر.

و يبقى السؤال الذي يعود في كل مرّه.....هل فعلا كنا نسير بالطريق الصحيح ؟؟؟ وهل فعلا تلك كانت القمّه؟؟؟

كأنهم زودوها!!!






كأنه بس الناس تمل بصير فيها اشياء غريبه و بتطلع بافكار عجيبه؟؟؟
بس العالم تبطل تهتم بأشي غير بتوافه الامور بتبالغ اكتر من المبالغه اللي بتبالغها؟؟؟

وين ما الف وجهي هاليومين بلاقي مقاله طويله عريضه عن الفقيد الغالي على قلوب الملايين - كما تبينلي - "بول الاخطبوط"

من اللي قرأته اكتشفت ان بول اللي مات عن عمر سنتين ونص كانت حياته احسن من حياة ملايين البشر
في جريدة الامارات اليوم عرفت انه " وينحدر «بول» من أصول أرجنتينية رغم أنه ولد في إنجلترا ويحمل الجنسية الألمانية" و حصل على تكريم من اسبانيا و انه " على الرغم من أن الأخطبوط الشهير قد توقع خسارة المنتخب الانجليزي أمام منتخب ألمانيا في دور الستة عشر - وهو ما حدث بالفعل - إلا أنه أعلن ولاءه لإنجلترا، وتم اختياره ممثلاً لملف استضافتها لكأس العالم قبل أن ينفق"

كيف يعني!!! حد يفهمني كيف اعلن ولاءه لانجلترى!! شو ممكن عمل ليعلن ولاءه!!
و بعدين حصل على تكريم ملكي من اسبانيا و على لقب "مواطن فخري"

الحلو بالتعليقات في واحد معلق تعليق مضحك و محزن بنفس الوقت التعليق كان
" الاختبوط بول احسن مني على اقل عنده جنسية "

ومع استمرار البحث و شكرا لعمو جوجل اكتشفت ان لبول صفحه عالويكيبيديا بالعربي و بالانجليزي


و منهم عرفت ان بعد فوز اسبانيا الشعب الالماني زعل " فنزلت عدة مقالات بالصحف الألمانية منها بوضع الأخطبوط بول بالمقلات و الأخرى وصفة لطبخ الأخطبوط بزيت الزيتون و الحامض فأمر رئيس الوزراء الأسباني بإرسال حراس شخصيين إلى الأخطبوط لحمايته من المشجعين الألمان."

و انه " أختير بول للمنصب "سفير" الرسمي لإنجلترا بنهائيات بطولة كأس العالم لكرة القدم 2018 ."

طيب كيف 2018!!!
طب مهو الاخطبوط ما بعيش اكثر من 3 سنوات كيف بدكم تخلوه لل 2018

وحتى بعد ما مات الشب برضه اسبانيا تقدمت بطلب لحتى تاخد الجثمان و تحطه بمتحف عأساس انه تكريما لبول, طبعا اكيد كلنا عارفين ان هالاهتمام هاد مش علشان ولاء وانتماء و صفاء و هالقصص اللي بحكوها, كله علشان الفلوس اولا و اخرا, و مش بعيده ابدا يحنطوه و يصير هو رمز كأس العالم ل 2018 مهو قصّه و العالم فاضيه خليهم يلتهو شوي


اه صحيح.....و اكتشفت انهم ألفوله اغنيه بعنوان "we love you Paul"
عجبني تعليق عالفيديو بحكي "goodbye Paul you would have made a great sushi"


من كل هالكلام صرت مش عارفه كيف ممكن نكمل حياتنا من غيرك يا بول :"( يللي جبتلي النابوليا بالشيء الفلاني يا بول, يعني بعمر سنتين ونص كل هالانجازات و التقديرات و الجنسيات و الحرّاس الشخصيين و السفرات و الاستضافات و الالقاب!!!

كتير...صح!!
كتير كتييييييييييييييييييير كمان

العيد مع الاقارب





اول يوم بالعيد بالامارات بكون بالعاده تجمع لكل افراد العيله المتواجدين بالبلد و بالعاده بتكون عزومه ببيت شخص منهم وكل واحد من المدعوين عليه بجيب معو شي بحدده صاحب العزومه , اخواني مثلا واحد كان عليه يجيب الحلو, جاب اشي اسمه حلو ملوكي بالقشطه, طعمه اشي خيااااال بصراحه, و اخوي التاني كان عليه الحمص والفلافل و هالاشياء و الخزعبلات كلها اللي بعملها عمو صاحب المطعم :) فول , مسبحه, باباغنوج, متبل, حمص بالفول - مش متزكره شو اسمه - بس اشياءات كتير زاكيه ,لان الجو حلو كتير هالايام فالعزومه كانت بالهواء الطلق, وصلنا متأخرين طبعا بسبب الصغار, عبود قرر يعمل اشي و احنا بالسياره فرجعنا لنغيره البامبرز :)

بس وصلنا انصدمت من عدد الاشخاص الموجودين و عدد الاطفال ما شاء الله, همه قرايبنا من بعيد و من جهة ماما, نص الموجودين ما بعرفهم, الجو اجمالا كان غريب, جايبين مايكريفون وسماعات و اشي بغنو واشي بحكو نكت و اشي حاطين اغاني, بالبدايه كان دمهم خفيف بعدين ضوجونا بصراحه, صغار بنطو وبلعبو وبتقاتلو وببكو وبضحكو و الشباب بغنو و بتخوتو, المشكله وين كانت يا حزركم!!! لا مش بأي شي من اللي حكيتو, المشكله بصبايا العيله و بزوجات القرايب, ايش فييييي!!! جد ايش مالهم؟؟؟
عايشين الدور بطريقه غريبه, واي دور مش عارفه, مالك يختي منك الها, ايش الألاطه و شوفة الحال هاي وشو بالنسبة للخنف و للحكي اللي بطلع بالعافيه, جد جد الله يرحم جدك منك الها.

اكيد لازم تحكي مع ابنها بالانجليزي لانه العربي يك مش كول بالمره و شوي على فلجر بيجي, المشكله ان في وحده منهم كانت معي بالجامعه وكنّا صحبه كتير وبعرفها وبعرف كيف بتحكي, و كل سنه بس اجي عالامارات واشوفها لازم تسوي حالها مش عارفتني :$ طيب ليش يعني؟؟؟ اصلاطن قلّة ذوق و بعيد كل البعد عن الادب انك تبين بكل طلاقه انك مش عارف اللي قدامك وخصوصا بس يكون هو طيب و على نياته و يقبل عليك زي ما انا عملت :( يعني مستحيل كل مرّه تعملي حالك مش عارفتيني و بس شفتي مرة اخوي اللي هي بنت خالتك تحكيلها طيب قولي انك متزوجه اخو "ويسبر" !!!! طب ما انتي عأساس ما بتعرفيني هلأ صرتي تعرفيني؟؟؟؟


اوك بلعناها و بدينا نتحدث , بنحاول انا ومرتات خواني نحكي مع الموجودات - مرة اخوي بتكون بنت خالة بعض الشباب و الصبايا الموجودين وبرضه مش عارفه تنسجم - كل ما نحكي ما بناخد اكتر من هزّة راس وفي وحده عروس جديد حامل بالشهر السادس , من باب فتح المواضبع مرتات خواني بحكولها عن تجربة الحمل لاول مره و بنصحوها و الرد كان جمله طويله عريضه تبين مدى خبرتها للاخت وانها ما بدها حد يدلها مع انها هي اللي بتشكي, قاعده الاخت و محملتنا جميله بحملها مع ان مرتات خواني وحده والدت قبل شهر و التانيه حامل بالشهر التاسع و هي بس قالبه خلقتها بوجهنا , اللي انسجمت معهم همه ضيوفهم, الضيفة التونسيه اللي بتكون حماة واحد من قرايبنا و الضيفة اللبنانيه اللي بتكون اخت واحد من ازواج القريبات :) الباقي بس نظرات من بعيد لبعيد

ما بعرف ليش المغتربين بالخليج خصوصي بفكرو حالهم اشي كتير صارو!!! ليش يختي الخنف وليش تغيري صوتك وطريقة كلامك!! يعني لو بتشتغلي ماشي لانه بتضطري تحكي انجليزي كتير وبنحكي متعوده و زلة لسان, بس انه بطلتي تعرفي المصطلحات العربيه و بتستخدمي انجليزي مع ابنك و بس يعملها على حالو ابوه يحكيلي " شخيت" - بعتذر عالكلمه بس بدي افرجيكم مدى التناقض - هيك كلمات بلا منها , وبس احكيلك وين الفحم تطلعي علي من فوق لتحت و تحكي لابنك " مامي كوكي جيب الشاركول لآنتي " فأنا اكيد مضطره احكيلك.....يرحم جدك :)

المهم ان العيد كان حلو لان ختامه كان مسك , روحنا و قعدنا بالحديقه شربنا قهوتنا و تحدثنا وحكينا و تذكرنا ايام زمان و كتييييييييييير ضحكنا و ضلينا نلعب مع فروحه و عبود بال Bubble Maker"" عرفتوها!!
هديك ال stick اللي بتعمللها "هفت" بسير يتلع منها bubles :)
بتعرفو اسمي الي اكتر من اسبوعين بالامارات فااااااا انعديت :)