Things I Like To Whisper About

Would You Hear Me Whispering

اسئله تطرح نفسها ارضا....






ليش سائقي التكاسي ما برتاح قلبهم الا بس يحطو خط المسرب بنص السياره؟؟

ليش سائقي التكاسي بس يكون معهم راكب, بصيرو مناح ما شاء الله و بمرئو كل اللي جاي من طريق فرعيه,وطيبين و بمشو بطيء و بحترمو قانون السير, يعني ببدو يوقفو السياره بس يشوفو الاشاره اللي بعد كيلو ها...هاا بدت تصفّر؟؟؟؟

ليش واحنا واقفين صف طويييييييييييييييل عالاشاره بتصير الاشاره خضرا وما بنتحرك ولا نقطه و بس تصير حمرا بتبدا السيارات تمشي؟؟؟

ليش لما تحترم نفسك وما تزمر للي بقطع الشارع, علشام حرام ينصرع من صوت الزامرو بصير يتطلع عليك و بحط ايديه بجيابو و بمشي و بقطع الشارع على اقل من مهله؟؟؟؟

ليش لازم اذا واحد بحكي تلفون خلوي بالشارع او بالمطعم لازم كلنا نسمع موضوع المكالمه من اولها لاخرها؟؟؟

ليش الاشياء بتكون قدام عيونا و مزهقيتنا ومقززيتنا واحنا النا 100 سنه مش مستخدمينها, وبس نحتاجها بتختفي, وبننسى وين حطيناها؟؟؟واذا كبيناها,تاني يوم بالزبط بنحتاجها ؟؟؟

ليش صرنا بس نحكي علبناني - مع انها لهجه حلوه وخصوصا من نورا :) - و بس نطعوج بالكلام و احنا بنحكيه و نحكيه بطريقه غريبه من مناخيرنا - مش من راس مناخيرنا انه تكبّر لا نحكيه بخنف - هيك بنكون يااااااي شو كول و راقيين و متتورين - متطورين - وبس نحكي على طبيعتنا بنصير ياااااي شو فلجر و حفرتل؟؟؟


ليش بس تكون منيح مع الناس, بتصير اشي عادي بحياتهم و آخر اشي بفكرو فيك و بمشاعرك, وكأنك اشي روتيني بحياتهم, و اللي بكون يسيء الهم بكون مهم و بحملو هم مشاعره و احاسيسه؟؟؟


ليش اول ما يجيني فلوس زياده لازم يخرب اشي بالسياره :"( ؟؟


ليش دايما بنضل نأجل تنظيف الشبابيك بركي شتت الدنيا, و بس نيأس و انظفهم تاني يوم بتشتي سبحان الله؟


شو كمان...شو كمان...كان في بالي اشياء اكتر بس مش متزكريتهم...بس اتزكر برد اضيف...انتو زكروني ايش كمان؟؟؟

Evening Smile .....احساس الام






شاب حكى لأمه بحماسه انه وقع بالحب وانه بدو يتزوج
قالها:" على سبيل المزح، امي بدي أجيب صبايا وانتي حاولي واحزري اي واحده راح اتزوج انا".
وافقت الام،،
اليوم التالي، جاب ثلاث صبايا بجننو على البيت وقعدهم ودردشوا لفتره.
بعد ذلك قالها: "طيب احزري من راح اتزوج ".
ردت بسرعة: "اللي على اليمين"

استغرب الشب , فعلا مزبوط , بس كيف عرفتي". . . . . . . . . . .
*
*
*
*
*
*
*
*
*
*


ردت الام:"سبحان الله ما حبيتها"

ههههههههههههههههههههههههه

Open Day


بتذكر وانا صغيره كان احلى يوم بالسنه الدراسيه خصوصي بعد ما وصلنا للمراحل المتقدمه بالدراسه, مش بالرابع والخامس اللي كنا ناخد 5 حصص منهم حصتين فن وحصه رياضه و حصه رياضيات وحصه عربي.... الله يرحم هديك الايام هلأ مساكين اللي بصف اول ابتدائي باخد طحشه مواد لدرجه ان الام بتقد ترسهم كانهم توجيهي, لا تفهموني غلط!!! انا مع هاد الشي لانه التأسيس هو الاساس و اذا تأسس صح بضل معه لاخر عمره.

المهم نرجع لموضوعنا اكتر يوم كنت احبه هو يوم النشاط المدرسي "Open day" اولا لانا بنروح باواعي مش بالزي المدرسي - خصوصي اني كنت اكره الزي المدرسي وكان نفسي يكون للتوجيهي زي لحاله .

و لإنا بنكون محضرين نشاطات وانا مشاركه بمعظمهم :)

تجارب كيميا, تمثيليات عربي و انجليزي و طبعا رقصات :$ , اكتر اشي بتذكر تنتين منهم بالصف السادس, راح طيّر حمام لراغب علامه, اشي تافه عالاخر بس وقتها كنت حاسه حالي بعمل اشي مهم, بندخل و احنا بنعمل بايدينا زي العصافير, و بعدين بنوقف و بنبدا نشوح بايدينا - كيف بس كنا نغني بابا وماما بحبوني, بالزبط هيك - وكنا كمان على كلمات مبرووك مبرووك وحده توقف و وحده تقعد, لا حركات حركات.
و الرقصه التانيه, على اغنيه "brown girl in the rain" حركات ما الها دخل بس انه ما شاء الله عنا مثقفين :$







اللي ذكرني بهالحكي ان اليوم كان ال "Open day" لمدرسه البنات اللي جنبنا, كأنه يا جماعه تغيرت الدنيا؟؟؟ اصوات صراخ و زغاريت وطبله ....شو بعملو بالزبط؟؟؟
الصبايا وهمه مروحين حبو ينقلو الاجواء للشارع, باخر الزفه لقدرت ابدا اصور, بعد ما خلصت تصوير اكتشفت ان الزووم عندي بالموبايل مش واضح بالمره, فاعذروني على ردائه التصوير , وعلى كتر الحركه :$
اتركم مع الفيديو





سلسله عرسان - الحلقه الخامسه

اليوم بدي احكي قصه قصيره, بسبب انئماص الفليح لاسباب كانت مجهوله :)

القصه بتتمحور حول شب قعد عنا ساعتين و هو صافن بالطاوله اللي قدامه و بنفس البقعه الا بس نقدمله اشي بياخده و بحكي شكرا و بحطه قدامه و برجع يركز على نفس النقطه, انا للحظه صرت افكره بحضّر اروح او اشي زي هيك, وبديت اقرأ المعوذات ههههههه لا بمزح بس الاخ ما حكا ولا كلمه و والدته ما شاء الله عنها ما سكتت فليح درس بالجامعه الفلانيه و فليح بشتغل بالشركه العلتانيه و فليح بحبش مش عارفه ىشو و فليح..وفليح..وفليح...

وفليح ولا اله دخل, اخوي كان كل شوي يعمل حركات و يجحر بالطاوله بنفس الطريقه و نصير نخبي ضحكتنا انا واياه و الشب سلامتك و الهسس ولا اله دخل.

انا استغربت بصراحه و ضل فضول اعرف شو السبب ورا عالصفنان العجيب, لحد ما مياسي بتعليقها على الحلقه الاولى حكت عن الشباب اللي بيجو مع اهلهم بس علشان يرضوهم وما بكون في عندهم نيه للزواج اساسا, طيب ليش الاهل بعملو بولادهم و ببنات العالم هيك, مش قادره الاقي سبب مقنع يخلي الاهل يجرجرو الشب وراهم لبيوت العالم !!!! بعدين طيب صار و انك انغصبت معقول تقعد عند العالم وانت مكشر هيك؟؟ يعني افرد هالوجي و بس ترّوح احكيلهم ما عجبتني, بس انه يكون عمرك 100 سنه و تقعد هيك زي الاولاد الصغار اللي ماكلين كفين قبل ما يجو عند العالم و قاعدين مئموصين من اول القعده لاخرها كتير بصراحه.



ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقه الرابعه



Good Morning


الي اكتر من شهر كل يوم الصبح بلاقي ايميل من اخوي اللي بالامارات بصبح فيها علي

و كل مره بتكون كلماته احلى من اليوم اللي قبل, وكتير بتسعدني ايميلاته الصباحيه هاي
و اليوم حبيت انا كمان اصبح على كل اللي بزورو مدونتي
صباح الفل يا جماعه






ولاخواني و لكل اللي متغربين عن بلادهم و اهلهم بحكيلكم
يا مسافر عود



موضة الشهر










الي فتره ما بتابع اخبار لا مقروءه ولا مسموعه ولا مرئيه ولا الكترونيه, و للاسف اليوم قررت ارجع شوي للدنيا واشوف شو صاير فيها.


ما بدي احكي عن سمه البدن و الاكتئاب اللي بيجي للواحد بس يقرأ اخبارنا اللي بتجنن, بدي احكي عن الاشي اللي لفت نظري بالاخبار, لاحظت ان في عنا زي اشي اسمه موضه الشهر بالاخبار, خليني اوضح يعني قبل فتره و تقريبا لمده شهر كل يوم نسمع عن طفل جديد لقوه تحت جسر او بحاويه الزباله او بحمام مستشفى, لقيط و حي وميت و استمرت هالقصص تقريبا لشهر, خلصنا بدينا بحوادث السير , حادث عجلون , حادث العقبه, و اعداد غريبه لناس توفو بحوادث سير و بمناطق مختلفه, خلص الشهر بدينا بجرائم الشرف, قتل بنته و قتل اخته لانها متمكيجه, قتل اخته وسلم حاله للشرطه, اخد اخته عالبحر الميت و قتلها هناك و قصص عن الشباب و الاباء الابطال اللي اثبتو رجولتهم و نخوتهم و محافظتهم على الشرف, ما بعرف كيف مقتنعين بهالحكي بس همه هيك بكون احساسهم بس يطلعو من حبس الست شهور, ابطاااال و شرفااااء و رجاااااااااااااااااااااااااال.


اللي لاحظته ان موضه هالشهر هي استهداف الاطفال اللي اعمارهم خمس سنوات ....
اب بقتل ابنه و بحرقه بالسيجاره, رجل يدهس طفل عمره خمس سنوات و يلوذ بالفرار, معلمات بضربو طفل عمره خمس سنوات لانه ما رضي ينام....
ايش في يا جماعه؟؟؟ ليش هيك صرنا؟؟؟ لا في رحمه بقلب اب ولا ام ولااخ ولا اخت ولا مدرّس ولا مدّرسه.
كتير ناس بحطو الحق عالفقر و الوضع المعيشي ....بعرف انه الوضع من زفت لازفت والحمد لله.... يعني نموت بعض ؟؟؟ مش قادرين نحكي و مش قادرين نعترض نقوم نفش قلبنا ببعض؟؟؟



فيا جماعه اللي عنده ابن, اخ, اخت, ابن جيران, ابن عم ابو....اي طفل عمره خمس سنوات يضبه بالبيت و ما يطلعله ليخلص هالشهر على خير, و لنشوف شو موضه الشهر الجاي...



الله لا يحرم حد منهم

عيلتنا بتتكون من 6 افراد بابا وماما الله يخليلنا اياهم, و اخواني ال 3 وانا - يس البنوته الوحيده بالبيت يعني مدللله :) - اخواني الكبار بشتغلو بالامارات فما ضل بالبيت الا بابا وماما و انا واخوي الصغير اللي خلص جامعه السنه.
يعني عيله كبيره المفروض انها راكزه بس مرات انا واخوي بنقلب البيت ازا عجبتنا اغنيه او نكته او قصه, بس اجمالا البيت هادي.

اول شهر 4 اجا اخوي من العين هو و مرته و بنته الصغيره فرح فرووحه -هيك بناديها- اللي عمرها 4 شهور

البيت انقلب و تغيرت الاغراض اللي فيه و الاصوات اللي فيه, صار البيت موزع فيه العاب ودباديب و لهّايات و رضعات, المجلى عليه
ال Sterilizer

اللي بعقمو فيها الرضاعات, واشياء معبا فيها مي مغليه, عربايه هون, و حرامات هون , ومريله هون اشي بجنن بصراحه.


اما بالنسبه للاصوات ففروحه جديد مكتشفه صوتها و مرات بتسلطن و بتسحبها سحبات بتجنن - سحبات هاي بنحكيها للكناري بس يبدا يغرد احنا بنحكيها لتغريد فرووحه- باخر البوست حطيتلكم وصله من وصلاتها :)

المهم الخميس اخوي تسهل و مره اخوي راحت عند اهلها بدها تقعد اسبوعين و بتلحقه, ما بدي احكيلكم عن جو البيت :"( هدووووووووووووء - حفله اغنيه كان عنا طاحون يا دوب استمرت 10 دقايق و رجعنا للهدوووء- و كل شي مكانه, المجلى فاضي, بصراحه مزعج الوضع و اشتقنا لفرووحه الصبح صحيت على ماما وهي بتدلع صورها :(

ماما اليوم عالساعه 9 بالليل صارت بدها تروح تشوفها, وكلنا نقنعها انو ما بصير والوقت تأخر بتحكيلنا بس نص ساعه والله اشتقتلها, الله يعينهم فرووحه و عبوود اول احفاد اجو مع بعض بينهم 4 ايام و ما شفناهم اشي وما شبعنا منهم و احنا ما صدقنا ويصير عنا احفاد, الحمد لله على كل حال.

الاسبوع الجاي بدو يجي اخوي التاني وهاد اللي مصبر ومسكت اهلي, الله يعينا عاللي راح يصير فينا بس يتسهلو عالامارات , بنرجع لجو العيله المثاليه الكبيره الراكزه..اففففففففففففففففففففففففففففففففففت.







شو كانت حلوه الليالي....


من الصبح و انا بغني هالاغنيه مش عارفه ليش!!!
مع اني من زماااااااااااان مش سامعتها

و اخوي سمعني بغنيها وصار هو كمان يغنيها و يدبك عليها
قلبنا البيت عرس بالاخر, وبحب اضيف ان ولا واحد فينا صوته حلو بالغناء
فلكم ان تتصورو اللي صار بالبيت :$

ييييييييييييييييه يا سهر الليالي....اااااااااااااااااه يا حلو على بالي
غني.....غني...غني على الطرقااااااااااااااااااااات :)






سلسله عرسان -الحلقه الرابعه



فليحنا هالمره اشي مرتب كان

شب ما شاء الله عنه ممتاز شكلا و مضمونا
مهندس اتصالات عقل و شخصيه و شكل ما شاء الله عنه
اجت عمكتبي موظفه عنا بالشغل, بتحكيلي ان ابن اختها بدور على عروس و انها دلته علي
طلبت مني انه يجي عالشغل بس كنت وقتها لسا مش مقتنعه بهالشي - حاليا اول اشي بطلب انه يجي عالشغل ما يجي عالبيت- المهم اتفقنا انها تعطي لوالدته رقم تلفون البيت علشان تحكي مع ماما وتتفق على موعد الزياره, وهاد اللي صار.

اجو عنا اول زياره الشب و والدته و اخته, الجلسه كانت كتير مريحه, اشبه بزياره عائليه حكينا و ضحكنا , دائما بس يكون اخوي الصغير موجود بمتل هالجلسات كتير بغير الجو , اخوي دمه خفيف - هاي وراثه عند كل العيله اذا ملاحظين...ويلا في عندكم رأي تاني :$ - المهم خلصت الزياره وكان انطباعي عن الشب كتير منيح.

طبعا و كالعاده صليت استخاره و توكلت على ربنا, تاني يوم اجت الموظفه تسالني شو رأيي, حكيتلها بايش؟؟ زارونا و انبسطنا بالجلسه, بس ما في موضوع احكي رأيي فيه - نوع من انواع حفظ خط الرجعه و حفظ ماء الوجه - حكتلي بصراحه انتي عجبتيهم كتير و اهلك عجبوهم كتير,حكيتلها اني ما بقدر احكم الا بس نقعد مع بعض اكتر من مره, وهيك صار.

اجو اكتر من مره على مدى شهر كامل, وكل جلسه اكتشف اشي جديد مريح بالشب, اشي جديد يخليني اقتنع فيه اكتر, طريقه تفكير و طريقه تصرف, قصص و خبرات بالحياه - الخبرات مش خبرات شب بالعلاقات لاني مش من البنات اللي بحبو ان الشب يكون عنده خبرات بالعلاقات , هالموضوع انكتب عنه بالتعليقات على مدونه مياسي بس ما صحللي اعلق عليه, ما بنكر ان تقريبا كل شب الا ما يكون خاض علاقه او علاقات بس انه يتفاخر فيها و يحكي عنها وكأنها اشي عادي مرفوض بالنسبه الي, انا مع ان البنت تهتم بحياه الشب من يوم ما تعرفت عليه وما الها دخل بالماضي بما انه اكيد كان وما زال ماضي للشب - نرجع لموضوعنا.

كل هالزيارات وما في موضوع رسمي انفتح بالمره و والد الشب المفروض انه مسافر و بستنو يجي علشان يفتحو الموضوع رسمي زي ما حكالي الشب, بعد كل زياره كانت تيجي الموظفه تسألني : اه شو رايك, اجاوبها اجوبه ما تريحها و الف وادور و الله اعلم و هينا بنشوف شو بصير, المهم بعد اخر زياره ما اجت الموظفه تسألني, بعد يومين اجت بتحكيلي والله انا ما بعرف كيف بفكرو شباب هالايام , سألتها عن سبب هالكلام, بتحكيلي الشب بحكي انا حكيتلكم بدي وحده مواصفاتها هيك وهيك , وطبعا هالمواصفات مش فيي, بتحكيلي قعدنا نقنعو انا وامه و خواته ان يعني البنت ما عجبتك و والله البنت منيحه, وهو يحكيلنا منيحه بس شكلها مش زي ما انا طلبت!!!


حكيتلها لا تقنعوه ولا تغلبو حالكم, انسي الموضوع, ناس اجو اهلا وسهلا فيهم وتعرفنا عليهم و تشرفنا بمعرفتهم و خلص,انا ما سألت كتير بالموضوع ما بنكر اني كنت بديت اتعلق بالشب او يمكن هي شغله تعويد مش اكتر, بس الشب من حكينا قبل ما حسيت انه سطحي بتفكيره لهدرجه, مش عارفه يمكن هاد السبب ويمكن اسباب تانيه, بس انا بما اني بعمل استخاره فايش ما بصير او صار معي بعرف انه من رب العالمين, اشي مكتوب ولازم امشي فيه, فالحمد لله على كل حال.


ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقه الثالثه

تضامنا مع القدس


وصلني بالايميل دعوه للاشتراك في حمله التضامن مع الحمله الاهليه لاحتفالية القدس عاصمة الثقافة العربية 2009

الموقع جدا جميل, بتقدر تشترك فيه وتكتب تعليقات او تدوينات عن القدس
في وصله لشريط ادوات "Tool bar" بتقدر تنزله على البراوزر اللي بتستخدمه بوصلك فورا للموقع و بوصلّك التعليقات و التدوينات الجديده بالموقع, وفيه رابط مباشر لاذاعتي المفضله حياة اف ام :)

بالنسبه الي المشاركه بهيك موقع و نشره هو ابسط و اقل اشي بقدر اقوم فيه
وربنا ايسر لنا فرصه اكبر للمشاركه و لدعم الحمله اكتر

الموقع

الرابط لتنزيل شريط الادوات

احلى مسج بالحياه

اليوم الصبح و عالساعه 8 وصلتني مسج
انا انسم بدني , شو هالازعاج ومين الزنخ اللي ببعتلي مسج بهالوقت وخصوصي ان امبارح سهرت, وكنت ناويه اضلي نايمه لوقت متأخر اليوم
بس لما قرأتها و عرفت مين اللي باعتها اتبدل كل مشاعر الغضب لمشاعر ما بقدر اوصفها
كتير انبسطت و ارتسمت على وجهي ابتسامه بدل البوز اللي انمد شبرين قبل ما اقرأ المسج

انا متأكده لو وصلت هالمسج لاي شخص بالعالم مهما كان قاسي القلب مهما كان زعلان مهما كان متدايق الا ما ترتسم على وجهه ابتسامه تمحي كل النكد

المسج بتقول

"
Dear customer, your 04/2009 Salary was credited to your account with us thank you for banking with us
"


بالله مهي احلى مسج بالدنيا ؟؟؟؟ D:



المطار و طريق المطار

الي فتره بدي احكي عن هالموضوع,اليوم رحنا نوصل اخوي للمطار بدو يتسهل عالعين, بصراحه شو بالنسبه لطريق المطار؟؟
يعني هاد المفروض انه الهاي واي تاعنا, حفر و مطبات و شقوق, يعني اول مره بشوف شارع فيه شقوق, و المطبات نفسي اشوف مطب بشبه المطب التاني, اشي جبل اشي بنص المطب في حفره , بتحس المطبات معموله على زوء العامل اللي كان يشتغل فيهم, مش المفروض ان في مواصفات عالميه لهيك اشي؟؟؟

بعدين تخطيط الشارع, طلعو نظام المخالفات و الالتزام بالمسرب....طيب مش تفرجوني وين المسرب اللي بدي التزم فيه؟؟؟ الخطوط بالشارع متداخله و اشي المسافه بين كل مسرب ومسرب نص متر, اي بسكليت ما بمشي فيها!!!

بعدين الهاي واي المفروض انه مخصص للسيارات و الشاحنات, كلنا فوق بعضنا الله وكيلكم, اليوم وقفنا بين شاحنتين اكلنا هوا, استنشقنا كل الكربون و تشحبرنا بكل الدخان و غير الشوب و الحريقه اللي عشنا فيها.

نيجي هلأ للمطار, اي نعم الهم 7 شهور بزبطو فيه مش مشكله يلااا بس ان شاء الله يزبطوه بالاخر.
بتصف سيارتك بالكراج خمس دقايق لتودع الناس عالباب خلص راح منك دينار, طيب ليش يا جماعه الخير؟؟؟ ما لحقنا انزل العالم, هو انتو ناويين تجددو المطار عحسابنا؟؟؟
يعني احنا اليوم رحنا عالمطار 3 سيارات بخمس دقايق دفعنا 3 دنانير يا بلاش

غير المطار نفسه, من كتر مهمه مسكرين المناطق جوا المطار يا دوب تدخل الشنطه!!! ليش هيك مصغرين مناطق المغادرين و القادمين بالمطار؟؟؟ ما ضل وسع للعالم, بتزكر واحنا صغار بس كنا نروح عالمطار يكون يوم السعد بالنسبه النا, مهو ما كان في سكاليتر "درج متحرك" غير بالمطار و نقضي المده اللي بنقعدها بالمطار يا ركض و تزحلق على الارضيه يا طالعين نازلين عالسكليتر....يا الله كانت ايام, هلأ بتروح يا دوب تحجز المنطقه الجغرافيه 50سم ب 50سم اللي بدك توقف فيها و تثبت رجليك بالارض و بتبدا العالم تضرب فيك من هون و تدزك من هون, بطلنا نتدايق لانه هاد العادي صار.

بعدين هلأ الجايين من بره عالاردن مش المفروض يشوفو مناظر جميله, شجر و ورود اشي منعش اشي يخللي الانطباع الاول يكون ممتاز, ليش هيك طريق مطارنا بخوف؟؟؟؟ بتحس حالم ماشي بنص صحرا وبعدين بتصير بنص قريه بعدين بتصير بمناطق مهجوره, يعني اليوم اللي شفته انا عطريق المطار راعي غنم و وراه الغنمات - مع احترامي الشديد لكل راعين الاغنام الرسول صلى الله عليه وسلم كان راعي فحاش لله اني اقلل من قيمه اي شخص- بكب او بكم محمل بقره, شاحنات ملعون ابو الطحطح تاعها الاعجال شوي و بدها تفلت و الدخنه وراهم ل 10 كم, صحرا و قحط وخيم و بيوت مهدمه, كم بيت حلوين ماشاء الله عراس الجبل, بس لما توصل عند المدارس الامريكيه قريب السابع بتصير الدنيا خضرا و الورود و الزهور بعدين بنرجع للمناظر اياها, يعني زي فاصل دعائي , انا مش عاجبني بصراحه, ليش عند المدارس الامريكيه اه؟؟؟ ان ما شاء الله همه المزهرين بينا؟؟ جد بدايقني ان بس هناك بتغير النظر.


يعني ما عنا غير هالهاي واي و غير هالمطار اللي عليه العين يا ريت يكون في اهتمام اكتر من هيك براحه المواطن الغلبان اللي بدفع دم قلبو لتردوله اياهم بخدمات زي العالم والناس
و سلااامه تسلمكم :)

Lovely days :D

الايام الماضيه كانت من الايام اللي ما راح انساهم بحياتي
من قبل ما يجي اخوي من السفر بعتتلي مرة اخوي ايميل انها ناويه تعمل مفاجأه لاخوي بعيد ميلاده و تحجز بالعقبه, وحكتلي انها حابه كلنا نروح انا و اخوي الصغير و اختها و زوج اختها و بناتهم و هي و اخوي الكبير :)
بالبدايه ترددت انه شو بالنسبه للملل...وحده عامله مفاجأه لزوجها ليش كلنا نلزقلهم....بس هي اقنعتني انها فرصه و بننبسط و لما حسيت انها فعلا بدها ايانا نروح وافقت و زوج اختها حجزلنا بالراديسون ساس و رحنا وكانت من اجمل ايام حياتي.
الفندق بجنن, و البحر بياخد العقل و الجو مش كتير شوب,و احلى اشي ان اخوي رجعلي الفلوس اللي دافعتهم :) يااااااااااهههوووووووو :$

زوج اختها لمره اخوي بكون ابن خالي و مرته بتكون بنت خاله عم ابو زوج عمتي :).......مين حكا البطيخه!!!! مش حزوره , هو بس ابن خالي, وهومن ضمن شغله تنسيق رحلات للبترا و العقبه فتقريبا على رأيه حافظها رمله رمله :) فكان هو المنسق لكل النشاطات و الرحله عباره عن يومين مليااااااااااااااااانه نشاطات.

انا اخدت معي لبس السباحه الشرعي, طبعا ولا شرعي ولا اله دخل اول ما تنزلي بالمي بيصير بدله غوص ما شاء الله :$ بس الحمد لله سبحت انا واخواني ولما اجيت اطلع من البحر فاخواني ماشاء الله كل واحد منهم طول بعرض اعطوني المنشفه و ربنا ستر علينا :)
افطرنا الصبح بالاستراحه بناءا على طلب الشباب و احنا البنات اكلنا المعجنات اللي عملتنلنا اياهم ماما و بالفندق بس وصلنا كملنا على المعجنات و نزلنا عالبحر فباليل كنا كتير جوعانين و اخدنا ابن خالي على ال " Tche Tche" كنا كتييييييييييير جوعانين, و الاكل كان بجنن, بحب الوجبات الشامله انا اللي زي هيك, بعدها ضلينا نلفلف بالعقبه و بعدين رجعنا قعدنا جنب البحر لل 2 بالليل.


رحنا عالسوق الشعبي و اشترينا مكسرات طبعا, رحنا عالمولات اللي هناك ولفلفنا بكل مكان.

نسيت احكيلكم ان الفندق كان معه وجبه فطور, اشي فاخر عالاخر البوفيه فيه كل الانواع اللي ممكن تخطر ببالكم....بعرف اني حكيت كتير عن الاكل بس انا بالنسبه الي رحله يعني بدك تخرب الرجيم و تخرب كل برامجك و تاكل اللي بخطر ببالك :)

بكفي حكي, اتركم مع الصور و الصور اهداء خاص لمتابع المدونه ما بعرف شو اسمه اللي بالسعوديه و كان يشتغل بالعقبه :)




















اطلع من راسي 5

لكل وحده اكبر مني او قدي او اصغر مني و وبس تتزوج بتفكر حالها عملت اشي مهم بالحياه, و بس تخلف بتفكر حالها جابت التايهه و بتصير تتعامل ىمع الناس كأنها افهم الناس و كأنها جابت الديب من ديلو, و بتصير تتعامل معي كأني بصف تاني "ب" لا بفهم ولا بعرف اشي بالحياه ولا بعرف اسوي اشي بالحياه و بتعامل كأنها افهم و افلسلف وحده بالدنيا.....اطلعي من راسي

اذا انا بسكت وما بحكي اشي وما بعلق عمتل هالتصرفات فهاد احترام لحالي اولا و احترام للعالم الموجودي, لانه انا بطلع معي حكي كتير و بقدر احكيه بكل سهوله, فاحترمي نفسك بلاش ابلّش فيكي

و بس :)


جد ارتحت, بعدين بكمل اذا في اشي تاني :$

اه يا شوق...من اولها


هدول الاغنيتين كتير كتير كتيييييير بحبهم
الهم ذكريات كتييير حلوه عندي
:)

الصور ما بعرف مين هدول الاطفال....بس لقيتهم كتير احسن من الهنديات و الممثلات اللي من غير هدوم :$










The Curious Case Of Benjamin Button



الفيلم جدا رائع, مقتبس عن روايه للكاتب"F. Scott Fitzgerald" بتحكي القصه عن شخص انولد بعمر ال 80 بنهايه الحرب العالميه الاولى 1981 و بتنتهي وهو طفل صغير بالقرن الواحد والعشرين.

الفيلم بطوله "براد بيت" و "كيت بلانشت"
بتبدا القصه بكيت بلانشت عجوز بالمستشفى ومعها بنتها, الام بتحكي للبنت قصه عن رجل اعمى بشتغل بالساعات بروح ابنه مع الجيش عالحرب و بكون هو بشتغل بساعه بدهم يحطوها بمحطه القطار, و بعد فتره بيجيهم خبر ان ابنهم انقتل بالحرب, بنهي شغله عالساعه و بس يحطوها بكتشفو انها بترجع ما بتمشي , وبحكي انه كان يتمنى انه يرجع بالوقت علشان يرجعله ابنه و يرجعو كل اللي ماتو بالحرب , وفعلا خلو الساعه زي ما هي بالمحطه.

بعدين بتبدا البنت تقرأ مذكرات "بنجامين" اللي بتروى على لسان براد بيت من يوم ما انولد لحتى مات.

"بنجامين" بتموت امه وهي بتولده و بنولد حجم بيبي بس شكله عجوز بعمر ال 80 فباخده ابوه و بحاول يرميه بالنهر, بشوفه شرطي فبهرب فيه و بلاقي حاله قدام دار مسنين مسؤوله عنه وحده افريقيه, بتركه عالدرج و بتاخده الافريقيه وبتربيه كأنه ابنها.

احداث كتيره بتمر بالفيلم على مر سنوات عمره اللي ببداها بال 80 و بتنتهي ببيبي صغير , قصه مثل الانتقال بالزمن, بس بدل ما تنتقل للماضي بتبدا بالماضي و بتنتهي بالمستقبل.

ما بدي احرق القصه, في تفاصيل كتيره بس ما بدي احكي اشي يخرّب الفيلم, انا ما توقعت ان الفيلم يكون بهالروعه, استمتعت بكل تفاصيله, احضروه لانه بستحق المشاهده.

تحذيييييييييييييييييييييييير



في خبر قرأته في موقع زاد الاردن, بحكي عن شخص اله 15 سنه بعمل عمليات نصب عالبنات و بوهمهم انه شخص مهم و بوعدهم بالزواج, واله اسبقيات و بنحبس كم شهر و بطلع من السجن و برجع لنفس الطرق بالنصب, باول لقاء بكون لابس احسن لبس, وبحكي عن حاله بشتغل طيار او مهندس وان وضعه المادي فوق الريح, و بحكيلها انه بمر بازمه حاليا و بحاجه لفلوس و بتقوم البنت بتعطيه فلوس و بتعطيه دهبها, و كاتبين قصه وحده من البنات عمرها 20 سنه و مقدمه فيه بلاغ للشرطه بانه ماخد منها فلوس ومصاغ بقيمه 14 الف دينار.

اللي بقرأ الموضوع بحس انه فيه نوع من المبالغه, يعني شو 20 سنه و معها 14 الف, كبيره بصراحه.

بس اللي بدي احكيه ان قصه هاد المحتال حقيقيه.....اه حقيقيه....كيف عرفت؟؟؟ لاني انا شخصيا كنت ممكن اكون وحده من هدول البنات :)

وانا بالشغل اجا تلفون عالمكتب, رديت اللي بحكي رجال و طلب يحكي معي بالاسم, حكيتله تفضل مين معي, مش متزكره الاسم الاول بس متزكره العيله " الناصر" حكيتله تفضل بحكيلي اليوم في واحد صاحبنا اجا عندكم عالشغل و شافك وبعرف اني بدور لابني على عروس و بصراحه انت كتير عجبتيه و هو اتصل فيي و اعطاني اسمك, انا ابني بشتغل طيار و دارس بالمانيا, و انا عمو حابب اخد رقم تلفونك علشان اتصل و اتفق مع والدك علشان حابين نزوركم.

انا لاني ما شاء الله كتير شاطره - طبعا قصدي العكس- اعطيته رقم تلفوني الخلوي :) بعرف ..بعرف مبدعه "كانت اول مره و اخر مره بعطي رقمي الخلوي لحد.
المهم روحت عالبيت حكيت لاهلي عن الموضوع المغرب رن تلفوني, مرحبا عمو انا فلان الناصر بقدر احكي مع بابا, احنا طبعا قدّرنا هالحركه, انه طلب يحكي مع بابا فورا, حكينا واضح ان الجماعه بفهمو و بعرفو بالزووء و الاصول.

المهم حدد بابا معاه موعد يجو عنا اخر الاسبوع.تاني يوم كنت انا وماما بره, رن التلفون نفس رقم الجماعه, الو مرحبا كيفك عمو, عمو ام فلان حابه تحكي معك و تسلم عليكي -اللي هي ام فليح يعني- كيفك خالتو وشو اخبارك و انا كتير مبسوطه لانا النا فتره بندور على عروس و اخيرا لقيناكي ومن هالحكي اللي بكبر الراس, انا بصراحه كنت مبسوطه عالحكي , وبعدين بتحكيلي حبيبتي فليح حابب يقعد معك في اشياء بده يحكيلك اياها قبل ما يجي عندكم عالبيت, حكيتلها ان شاء الله بس تيجو عنا عالبيت بحكي اللي بده اياه, حكتلي لأ هو حابب يحكيلك اياها بينك و بينه في تفاصيل حابب يتفق معك عليها و تكونو مرتاحين وانتو بتحكو لو تروحو على كوفي شوب احسنلكم, حكيتلها خالتو عنا بالبيت اريح اشي بالنسبه الي, فجأه صار العمو يحكي عالتلفون, ال يا عمو انت بنت واعيه و جامعيه المفروض انك تكوني متفتحه اكتر من هيك, حكيتله عمو انتو جايين اخر الاسبوع بنحكي باللي بده اياه عنا بالبيت, انتو جايين زياره عاديه و بنتعرف على بعض, بحكيلي خلص خلص بحكيلك راح نيجي بس انت اقعدي معه تفاهمو على هالكم شي, حكيتله لأه انا اسفه عمو, وازا عندكم مشكله احنا تشرفنا بمعرفتكم وبصراحه عمو انا بره البيت و لازم انهي المكالمه, سكرت الخط و انهيت المكالمه.

المهم روحت عالبيت شوي الاب بحكي مره تانيه, نفس الحكي و نفس الاقناع, حكيتله تفضل هاي بابا معك احكيله اللي بدك اياه, يا دوب اعطيت بابا التلفون الزلمه سكر الخط, استغربنا و حللّنا و حاولنا نوصل لشي يشرح اللي صار ما قدرنا.

انا نسيت الموضوع تماما, بعد بسنه تقريبا ما بعرف شو بحكي انا و جارتنا, بتحكيلي قصه صارت مع اختها, نفس اللي صار معي ونفس اسم الشخص, بس اختها وافقت تروح معه عكوفي شوب و اللي صاير انه حكالها اشياء تافهه ما الها معنى, وانه خجول وحابب يتعرف عليها ومن هالحكي وبالاخر بحكيلها انا مش حابب اجي ايدي فاضيه بدي اشتريلك هديه, اعطيني الخاتم و الاسواره اللي لابستيهم علشان اجيب نفس القياس و برجعلك اياهم بس نيجي عندكم, و الاخت الشاطره معطيته اياهم, و طبعا ما شافت وجهه بعدها,
ولما راحت بلغت الشرطه حكولها انت خامس حاله تبلغ عن نفس الشخص خلال هالشهر.

يعني يا جماعه الموضوع حقيقي و خطير, فديرو بالكم

براءه



امبارح كنا طالعين على سيتي مول , وكان معنا 3 بنات , بنت اخوي "فرح" عمرها 4 شهور و بنات خالتها وحده 4 سنوات " جود" و وحده سنه ونص "جنا".

المهم لفلفنا بالمحلات و من الاشياء اللي شتريناها باللون و لعبه لجود , اتفقت امها انهم الها ولاختها الصغيره, وبعد اللفلفه و كالعاده بس نروح على أي مول بتواجد فيه سينابون لازم نقعد وناكل :$

واحنا قاعدين " ام جود" اعطت "جنا" البللون علشان تلتهي فيه لحتى ناكل, طبعا وكعاده الاطفال "جود" واللي بتلعب باللعبه انجنت " هاد الي انا, ما بدي اياها تلعب فيه" مع بدايه تنكد, ابوها حكالها اوك اذا هاتي اللعبه تلعب فيها مش احنا اتفقنا انها بالنص الك ولاختك, سكتت شوي وبعدين حكت لا لا خليها تلعب بالبللون.

بعد شوي "ام جود" قامت شوي شوي و حملت بنت اخوي "فرح" و راحت بعيد علشان "جنا" ما تشوفها لان من يوم ما اجت فرح و هي مش طايقتها .

بتسألنا جود" ليش ماما هيك عملت, حكتلها مره اخوي علشان "جنا" ما تغار....سألتنا شو يعني تغار؟؟؟

طبعا هاي المره المليون اللي بتسأل هالسؤال قدامي, حكيتلها انا بحكيلك.

انا: هلأ معقول ماما تحب حد اكتر منك؟

جود : لأ طبعا.

انا: بالزبط, ماما لا يمكن تحب حد اكتر منك, بس انت كبيره و بتفهمي هالحكي, بس جنا لساتها زغنونه و يادوبها بتمشي و يا دوب بتحكي بابا, ما بتفهم هالشي, تخيلي انها بتفكر ماما بتحب فرح اكتر منها لانها بتلعبها.

سكتت شوي انها بتستوعب بعدين حكتلي: اااااه يعني زي لما انا زعلت لما اعطو البلون لجنا و كانو بدهم يعطوها لعبتي, انا غرت وقتها!! :)

حكالها ابوها بالزبط...مثال واضح و صريح ومباااااااااااششششششششششششرررر, وال ايش مش فاهمه شو يعني تغار.


ههههههههه الله يعينهم الصغار على هالمشاعر اللي بتصير عندهم بس يجي أي بيبي جديد عالعيله, بس لازم الاهل يستوعبو هالشي وما يتجاهلوه دايما يراعو مشاعر البيبي اللي بكون صغير اساسا بس لما يجي بيبي جديد بفكروه صار سنه تانيه جامعه عاقل وبفهم و واعي وكبير.

سلسله عرسان - الحلقه الثالثه

فليحنا لليوم اتصلو اهله بدهم يجو يزورونا, بعد السؤال و الاستفسار تبين ان الشب بشتغل بالخليج, و عمره مناسب و كل اموره مناسبه, و هو موجود بالبلد و بده يجي هو و والدته.

لهون كل شي تمام وممتاز, اجو بالموعد المتفق عليه, حكينا وتعرفنا و كل الامور تمام, ما كان في توتر ولا كهربا بالجو, والدته كتييير طيوبه واضح من كلامها و من شكلها.

روحو و بعد يومين اتصلو , حابين يجو لان فليح حابب يقعد مع العروس و يحكو مع بعض, اوك ما في مانع اهلا و سهلا, اجو مره تانيه و مره تالته وقعدت مع الشب , قعدنا بالبرنده , يعني قدام العيله بس الصوت مش كتير مسموع, وحكينا بكل اشي, الشب مريح و كلامه لطيف, انا طبعا على مر هالزيارات كل يوم كنت اصلي استخاره و ما كنت اشوف اشي لا بحلم ولا بواقع, لا اشي يريحني ولا اشي يزعجني.

الزياره الاخيره اللي شكله كان بده يحكي بالموضوع رسمي, لانه جايب كل العيله اخوانه و خواته و زوجات خوانه و الاطافيل اللي بالعيله, عادي شكلهم ناويين يعملو الحفله بالمره, جايين جايين ليش المخاسر :)

المهم قعدنا مع بعض للمره الاخيره, انا ما كنت عارفه احدد شعوري, يعني عادي, مش مبسوطه ولا زعلانه, عادي كأنه الموضوع ما بخصني.

المهم فجأه الشب بحكيلي احنا لما حكينا بموضوع شغلك انت حكيتلي انك حابه تشتغلي الا اذا هالشي اثر على حياتنا – كتير بكره بس الشباب اللي بيجو يخطبو بصيرو يحكو عني و عنهم كأنه خلص صرنا ببيت واحد, بدنا بنروح, بنعمل, حياتنا O_o....ما بعرف ليش ما بحب بس يحكو هيك – المهم بحكيلو اه يعني خصوصا ازا صار في اطفال الست مرات بكون كتير تعب عليها, بحكيلي انا مع انك تقعدي بالبيت من اولها " انا طبعا اخدت عاساس ان الشب بفكر براحتي" بحكيله ليش يعني, بحكيلي انا بصراحه بس اروح بكون كتير عصبي و منرفز وبدي افش قلبي بحد, فازا انت كنتي بتشتغلي ما بيجيني عين اتفشش فيكي....كالعاده حاجبي وصل للسقف, حكيتلو كيف يعني؟؟؟ انه بتحب يكون كل شي جاهز بالبيت و الجو مريح, بحكيلي لأ بكون معصب و بقعد اصرخ!!!

حكيتلو لو بشتغل او ما بشتغل ما بصير تتفشش فيي.

بين على وجهي اني مش عاجبني الحكي, فالاخ حب يلطف الجو فبحكيلي انت ليش مش متوتره!!

بحكيله كيف يعني, بحكيلي انت قاعده و حاطه رجل على رجل لا بتهزي رجل ولا ايديكي برجو!!!

حكيتله وليش اتوتر يعني, انا مش بنت صغيره الموضوع بده تفكير و تركيز, والموضوع مصيري صح بس اخر اشي بحتاجه الواحد بهيك موقف التوتر, و اقترحت عليه انا نرجع نقعد مع العيله .- انا كان ببالي كلام كتير احكيه بهالموقف بس حكيت عيب يا بنت تشرشحي الشب و كل عيلته قاعده بره.

رجعنا و اخوه الكبير حكا بالموضوع و بابا حكالهم انه اعطونا فرصه نفكر ونسأل عن الشب, بس روحو الجماعه فورا حكيت لبابا اني مش موافقه, تاني يوم اتصلت والدته بتحكيلنا احنا عارفين الجواب علشان هيك انا بدي احكيلكم انه ما في نصيب.

مش فاهمه شو قصدهم بالزبط, انه بدهم تطلع منهم علشان يحفظو ماء وجههم ويلا شو بالزبط مش عارفه, بس الحمد لله انه انهبل و حكالي عن عاداته اليوميه قبل ما نتورط.


الحلقه الاولى

الحلقه الثانيه

Made in China

شو بدك بالكفاله و الوكاله
الصوانيه -على رأي خالد السعود- ما خلو الها لزوم


شيش تاتووت بالمنونيز مع طاطاطا!!!

اللي ماكل عنده بس اللي بفهمه :)

by mohammed elmadfa3ee
Fandalism Free MP3 Hosting


سامحيني.....


سامحيني جيهان...لم اكن اعتقد في يوم ان يقسى قلبي لتلك الدرجه.

ولا ان ابني احكامي عن الناس بهذه السرعه ومن اول خبر و بدون ان اتأكد.


سامحيني اني اعتبرت نفسي قارئه للافكار وللعقول و قررت انك ضعيفه قلب و ضعيفه ايمان وقررت ان في نيتك الانتحار فعليا, وحكمت عليك وكأنك قد انتحرت , ولم يخطر في بالي ان يكون ذلك تسجيل اعتراض علني و واضح عن الحاله التي يعيشها الآلاف من شعبنا الكريم.

صدقت ما قيل وما كتب, و كأن اشباه المواقع الالكترونيه تلك قد تصدق اخبارها.

سامحيني أختي, اعترف الان بانك بطله و اتمنى ان يستيقظ اصحاب الضمائر النائمه, كما استيقظت انا.


شكرا لسوزان التي طلبت مني التروي و اني ما اتسرع بالاحكام و لانها هي و حميدي عرضولنا الخبر الصحيح


Friends


يمكن المعظم اذا مش الكل بعرف هالفيديو
انا كتير بحب هالفيديو وكل مره بشوفو و بحس بنفس الشعور اللي حسيته اول مره, استغراب مع تفاجأ مع خوف يعني لخبطه, و بترتسم على وجهي نفس الابتسامه كل مره وما بمل من اني اضل اعيده واشوفه
بتمنى ان انتو كمان تكونو بتحبوه.








يا طيب

بحب هاي الاغنيه كتير

الكلمات... العود...... صوت انغام..... الذكريات القديمه....... الحاضر..... وكل شي




سلسله عرسان - الحلقه الثانيه

عريسنا اليوم من اللي اجو عالشغل, داله علي موظف من الشغل, بعت موظفه تحكيلي و تسألني اذا عندي مشكله لو اجا, انا بالبدايه انحرجت اشوفه و خصوصا اني تبلغت بس قبل بساعه, بعدين لقيت ان بما اني ما بحب اللي بيجو عالبيت وطبعا لايمكن ارضى اطلع بره معه متل ما بعملو بعض العائلات, ما بعرف بس بالنسبه الي هالموضوع غلط كتير, من وين لوين اطلع معه, و سمعت من اكتر من ناس انه ما عندهم مانع , والطلعه معظم الاحيان ما بتكون بعلم الاهل و هاد لسا اشي تاني.


المهم اجا الشب, انا مش من البنات اللي بحكمو عالشكل لانه الشكل اشي نسبي بختلف زوق الناس فيه, و مقتنعه انه مع التعامل لو كان الشخص اشي خيالي شكله لو شخصيته وتعامله زي الزفت راح يقلب وحش بنظري و العكس لو شكله مش مقبول مع الشخصيه والتعامل ممكن اصير اشوفه احلى واحد بالدنيا, بس الاشي الوحيد اللي ممكن يشوفوه الناس سطحي عندي الطول, انا طويله و اكتر منظر بكرهه اشوف وحجه ماشيه مع زوجها وهو اقصر منها, ما بقبل هالشي, و كتير رفضت شباب ممتازين علشان هالشي .

نرجع لموضوعنا....اجا الشب عالمكتب وهو والموظف اللي جايبه, عرفه علي و على صاحبتي اللي معي بالمكتب, وعرفنا عليه قعد شوي و راح, وصاحبتي انسحبت بعد بشوي بحجه انها بدها تستعجللنا بالقهوه.


بدا يحكيلي عن دراسته وعن حياته و عن شغله, كله تمام وانا برضه احكيله عن حالي.

حكالي انه كان خاطب و ترك خطيبته, سألته عن الاسباب , وكانت اسبابه مقنعه بالنسبه الي, طبعا مبدئيا يعني شغله التأكد من الاسباب هاي بتيجي بعدين.


فجأه و هو بحكي عن خطيبته القديمه, بحكيلي مع اني انا احلى منها, يعني هيك شايفتيني اني ابيض و اشقر وعيوني ملونه, وهي سمره بصراحه يعني هي ما صدقت اني خطبتها, انا حلو وهي بشعه, وانا ...وانا... واسهب فليح يوصفلي بحاله ....انا طبعا رفعت حاجب وصل للسقف, انسى اني اساسا ما بفضل هالمواصفات اساسا بالشب,بس اول مره بسمع شب بحكي عن حاله حلو و بوصف بشكل عيونه بهالطريقه, يعني انا بنت وبين بنات و بقعده تخويت ما بحكي عن حالي بهالطريقه .

اجاني شعور الراحه, يمكن البنات بعرفو هالشعور بهيك مواقف, شعور انه الموضوع انتهى فخدي راحتك يا بنت D:

انا بين علي اني ما عجبني كلامه, قعد يرقّع و يحكي طبعا الشكل مش ميزه للشب و طبعا المهم الاخلاق و ال..وال... بس على مين يابابا, كل شيئن انكشفن وبان.


المهم روح الشب, اجت الموظفه, حكيتلها انسي الموضوع ما في نصيب, سألتتني ليش ما حبيت احكيلها لانه تافه, حكيتلها هيك سبحان الله عقلي ما ركب على عقله, طريقه تفكيره غير عن طريقه تفكيري.


بعد بيومين فجأه وانا بالشغل ما لقيت الا الشب جاي, انا احمريت و اخضريت محرج الموقف, طلع الاخ اللي داله مش موصله الجواب,بعد ما قعد حكيتله شكله فلان ما خبرك بالرد, هو من رده فعلي فهم و اعتذر و طلع....شوي اجا الموظف بحكيلي انا اسف بس الشب بصراحه حابب يعرف ليش ما في نصيب, حكيتله نفس الحكي اللي حكيته للموظفه, صار بده يقنعني انه اعطيه فرصه وشوفي, حكيتله من الاخر الشب بحكيلي انا احلى من خطيبتي وانا بجنن يعني بصراحه الشب تافه, انصدم الموظف بحكيلي جد هيك حكالك, هاد ولا حبه.


فياااا شباب اللي رايحين تخطبو, الثقع بالنفس كتير حلوه و الشخصيه القويه كتير حلوه, كله حلو بس يكون واضح من التصرفات.

و اشي تاني, كتير شباب سمعتهم بحكو ان البنات بدهم واحد شخصيته معدومه يتحكمو فيه و يعمللهم كل اشي, بالعكس اكره اشي عند البنات ان يكون زوجها طرطور بالبيت, وازا في بنات عايشين هيك ما بكونو مبسوطين.



ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع


الحلقه الاولى

يا سي سي..... لاااا خطير!!!

ما راح اعلق , اللقطه بتحكي كل اشي....D:

سلسله عرسان - الحلقه الاولى



قرأت بمدونه نانا خربوشه حلوه كتيرعن تفاصيل زياره عريس.

من فتره وانا خاطر على بالي اكتب عن قصص العرسان بعدين بتردد مش عارفه ليش, هو الموضوع شخصي كتير بعرف, بس انا حابه ان الشباب اللي بتفكر تروح تخطب تتعلم من غيرها شو ما تعمل وشو تعمل, و برضه برسم ابتسامه على وجوهكم , مع اني شخصيا بحبش شغلات جيت العريس عالبيت, وبرضه انا مش من الناس الفري اللي بتعرفو عالعالم هيك, مش عارفه هي كلها نصيب اولا واخرا واذا الواحد الو نصيب بدو ياخده ويشوفه, و الموضوع مش بايدينا ولا بشطارتنا على رأي وحده صاحبتي اللي بتحكيلي انت مش شاطره وما بتعرفي تدبري حالك!!!!


شو شاطره وشو ادبر حالي , انا الموضوع اساسا مش مفكره فيه,وتقريبا لاغيته, واذا اذا اذا صار نصيب فبكون من رب العالمين, لا من شطارتي ولا من تدبيري.

انا منعا لحصول اي لبس, راح اسمي العريس بقصصي "فليح" .
انا اكتر صفه بكرها بالانسان بعد الكزب و البخل هي العصبيه.

فليح هاد مهندس اسم الله عليه, صاحبه ماما دلته علينا, اجا هو و والدته.

المهم بعد ما قعدنا كلنا و بدت الام النظرات و التفحص, بابا صار يحكي مع الشب و انا وماما بنحكي مع الام.

الام بتسألني عن شغلي, حكيتلها و جبنا سيره شغلي القديم, بعد ما تخرجت اشتغلت مدرسه بكليه, و بحكيلها اني ما حبيت التدريس و بالصدفه انقبلت بالشغل الجديد فتركته, يا دوبها نطقت كلمه و فليح ما بحب التدريس كمان, لف وجهه وحكالها مين حكالك اني ما بحب التدريس!!! انا بحب التدريس, كلنا انصدمنا من الطريقه و من ان المفروض الشب منسجم مع بابا بالحكي, طيب مشيناها و كملنا حكي, الام نوع من فتح الحوار بتسألني في عندكم شباك بطل عالشارع الرئيسي,يا دوب بدي اجاوب وللمره التانيه وهو معصب بحكي لامه, ما انت شفتي ان البرنده بتطل عالشارع, بابا هون رفع حاجب, وهاي دليل على الهدوء قبل العاصفه.

برضه مشيناها و بدينا نحكي انا واياه, الشب كل ما اساله سؤال ما يعجبه, يمسك المخده اللي ورا ظهره, واصير انا ارمش انه معقول يضربني فيها O_o يحطها بين ايديه و يضغط عليها و يجاوبني وهو بكز عاسنانه, انا فجأه صرت اضحك :)
و حاولت امسك حالي, استغليت ان ماما قامت عالمطبخ, قمت انا وراها وحكيتلها بديش ارجع , حكتلي عيب مش علشانه علشان الام المسكينه وهي بتضلها ضيفه.

رجعت و امري لربنا, بسأل الشب اذا هو ملتزم بالصلاه, هون طار عقلو و برضه مسك المخده انا حكيت خلص لطشني فيها, صار يحكيلي بصوت شوي مايل للصراخ, هلأ لو انا كزاب و حكيتلك اني بصلي كيف بدك تميزي اني بكزب ويلا لأ, يعني هلأ مش في ناس ولاد.... وبصلو و بصومو انت بدك واحد محترم ويلا واحد بلف وبدور, يا دوب بدي اجاوب, بابا قطعني, و مسح بكرامته الارض ببهدله ادبيه لبد بارضه وما تخنفس بعدها, و همه طالعين, صارت الام تتعزر وتحكي انه شوي عصبي ومتوتر ومسكين ومش عارفه شو.

المشكله انهم حكو ال شو رايكم بالشب و الشب عجبته البنت كتير O_o.... طبعا حكينالهم ما في نصيب و اتصلت صاحبه ماما تقنع فينا وان وضع الشب المادي فوق الريح ومش عارفه شو, فهمتها ماما ان البنت ما بدها الشب .

بعد 4 شهور صادفنا ام الشب بعرس بنت صاحبه ماما بتحكي لماما هو صحيح ابني تزوج بس والله ضلت البنت بباله....ولا حبه الشب وامه , و بتحكي ماما لصاحبتها انه مش عيب هالحكي, بتحكيلها منيح ما وافقتو الشب طلع بخيل و عصبي و بضرب مرته, عاساس انه مش مبين الشب من اولها.

يلااا الحمد لله اللي بين من اولها
والى اللقاء في الحلقه القادمه :)

ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع