Things I Like To Whisper About

Would You Hear Me Whispering

شو بالنسبه...1




انا هالكلمه بستخدمها كتير, مرات بتكون عن شي منيح ومرات عن شي مش منيح, مع اختلاف ترددات الصوت و تعابير الوجه :)

المهم انا في اشياء كتيره بشوفها حولي بدي احكي عنها, ولهيك بدي اعمل سلسله شو بالنسبه واكتب عن الاشياء المنيحه والاشياء الغريبه او المش منيحه ولا مقبوله عالقليله من وجهه نظري.

اليوم بدي احكي شو بالنسبه للبنات اللي بكونو عاملين بروفايلهم مشاع لكل العالم عالفيس بوك...جد شو بالنسبه؟؟
يعني لو بس صحابك وقرايبك اللي مسموح يشوفوهم ماشي ما اختلفنا لكن حاطه صورك لكل العالم هيك, كبيره بصراحه
مثل وحده متصوره جنب شهاده البكلوريوس وهي عامله بوز اللهم احفظنا, يعني اعلان رسمي و واضح للزواج, العمر واضح وهي شهاده و الشكل واضح باكتر من بوز بس انت تعال.

وحده تانيه حاطه الستيتس تاعتها
backe to Zozteee
والكل العالم يااااي ومبروك و جد فرحتلك, و زوزتها معلق انه يا جماعه هاد واحنا صحاب لو خطبتها شو بتعملو و كاتب بالاخر جست كيدينج...يعني بمزح الشب و بعلنها زوزتها للعالم كله انه مش مفكر فيها غير صحبه.
و الامّر و الادهى ان امها للبنت معها بالفرندز :) و معلقه عندها, اخيرا رجعتي تضحكي طمطومتي ....عيله فري عالاخر ما شاء الله - او يمكن انا اللي دقّه قديمه الله اعلم.

و شغله تانيه بنت بتحط الستيتس تاعتها اشي ما اله معنى ... بشرب شاي مثلا
بيجيلها 100 لايك و 500 تعليق
ول ول ول على شو يا جماعه, بدكم تهدو اعصابكم شوي

يعني فكره انك تحطي معلوماتك هيك وصورك مكشوفه لكل العالم توصلها فكره غريبه و بتبين انك لساتك بمرحله الطفوله وما كبرتي و صرتي تحسبي وتدرسي حركاتك وتصرفاتك, مع ان بكون اعمارهم منيحه ومش قليله بالمره, ما بتتوقعي ان في ناس كتير مريضين نفسيا ممكن يستغلو هالمعلومات, ينزلو صورك عندهم و ياخدو معلوماتك و يستخدموها لارضاء نفسياتهم المريضه؟؟؟

يعني اهم اشي بكون ببالها ان العالم تحكي عنها يااااي شو كوول و ياااي شو فايعه هالبنت ,يا ريت يوصلو بناتنا لمرحله النضج اللي المفروض ترافق عمرهم و عاداتهم وطريقه تربيتهم, او الطريقه اللي المفروض يتربو عليها.



بي.اس يعني عفكره: الصور و المعلومات هاي فرجاني اياها اخوي لما كنّا نتناقش بنفس الموضوع ,يعني مش انا اللي كنت ابحبش عبروفايلات العالم :)

تناحه





يوم الاربعاء كنت نعسانه كتير بالشغل, يمكنى اتاوبت 10 الاف متاوبه لدرجه انو بس حكيت للي معي اني بدي اروّح كلهم وافقو بسرعه, اكيد... خصوصي انه بعد المتاوبه العاشره المساكين صارو يتاوبو معي :)

قررت امر على مكه مول ادفع فواتير الانترنت لانه قبل بيوم كان يقطّع كتير حكيت بلاش يفلمونا على العيد و يقطعوه, وانا ماشيه باتجاه الكراجات في بنت ماشيه بنص الشارع, زمرتلها زامور خفيف لاني ما بحب اصرع اللي بكون بالشارع بس يكون قدام السياره, لان لو حد عملها معي راح انئز وراح اكرهه كتير, المهم زمور خفيف ما ردت. زمور اعلى ولا الها دخل مع انو في جزيره وسطيه على جهه بتقدر تمشي عليها و في رصيف عالسايد التاني, بس الاخت حابه تمشي بنص الشارع,زاموووووووووور طوييييييييييييييل بكل هدوء الدنيا لفت وجهها اتطلعت علي و كملت مشي, اعطيتها الزامور اللي بصرع اللي عباره عن زفّه علني, زاحت شوي عن الطريق, مشيت من جنبها و لمّا وصلت عندها حكيتلها "هبله انت؟؟ ويلا طرشه؟؟" و مشيت.

يا دوب مشيت سمعت صوت زامور عالي بتطلع بالمرايه , طلعت الاخت بس انا مريت رجعت تمشي بنص الشارع و التكسي اللي وراي بزمرلها ومشي من جنبها و ابصر شو حكالها وهي ولا تغير تعبير وجهها بالمرررررررررره.

انا انسم بدني منها و من حالي, ما بحب اغلط بالعالم هيك, لكن الاخت مش طبيعيه, ول عليهم اليهود ولك اطلعي عالرصيف, بدك تبلينا فيكي يعني؟؟, بس طول ما انا بمكه مول وانا مش قادره امسك حالي عن الضحك كل ما اتزكر حالي وانا معصبه و بحكيلها "هبله انت " هههههههههههههههههههه

بس بصراحه بشهدلها انا للبنت.... اتنح منها عمري ما شفت :$

الله يعيده عليكم بالخير




كل عام و انتو بالف خير
الله يعيده علينا وعليكم بالخير يا رب
و ان شاء الله ربنا يتقبل طاعاتنا و طاعاتكم
و بما انو بابا من غير شر مسافر
فهي راح نص اللي بعيديوني :(
يعني انا مسكينه و بحزن
علشان يكون عيدي سعيد
اتصرفو :)








Wishes Tag


I was tagged for the first time "YAAAY" by the sweet blogger SimSim


The tag is about wishes, I simply have to make 3 wishes for my life then I have to tag 6 other bloggers, afterward leave a link to let them know they have been tagged.


  • For tomorrow "wa2fet 3arafah" and for every day may Allah accept my prayer ,forgive my mistakes, keep me away from doing new one and make me Convinced with what I have
  • To change my current job soon inshallah to some thing better
  • Start to live my happy ever after period, it don't want to start :")


most of the bloggers been tagged so I will tag














يا شماتتنا احنا وابله زازا



انا مش من طبيعتي انه ينفش قلبي بحد بس اكون مقهوره منه و ربنا يقلب الدنيا فوقه, بالعكس بصير احس بالذنب وكأنه انا شخصيا السبب باللي حصله وممكن توصل فيي اني اصير ادور على طريقه اني ادعمه و اتوسطله - عاساس اني رئيسه الكونجريس العربي - بالمختصر اني اساعده باي اشي بقدر اعمله

بس خبر اليوم بصراحه مش قادره اني اخبي فرحتي ولا قادره انو ما ينفش قلب قلبي فيه, جد
نفسي اشوف وجوه هالنواب اللي ما كانت تطلّع ولا تشوف حد شو صار فيها بس وصلهم الخبر...

سيدنا يا سيدنا....الله يسعد سيدنا..على احلى خبر بسمعه من فتره :)

هلأ لنكون واقعيين, في مسؤوليه كبيره بتوقع علينا للمرحله الجاي, لازم الاختيار يكون بعيد كل البعد عن المحسوبيات و النعرات والعشائريه, بدنا حد يمثلنا مش يمثل علينا, بدناش ناس اصحاب خطابات رنانه و استنكارات و شجب, بدنا ناس اصحاب فعل قبل القول.

بالله اللي بعرف حد بالصفات اللي انذكرت يحكيلي لاني ولا اخفيكم....مش لاقيه حد بحملها :$

حوارات

بداية الحوار

سارة : متى أسيتي شعرك !! والله طالع بجنن
ريما: هيك رأيك ؟ بس حاسا مو حلو
ساره : لا والله .. طالع يجنن ، وانا بدي نفس التسريحة بس بحس انو وجهي مليان شوي ومابتزبت معي هالتسريحة ، وبشوف انو ما بتمشي مع ها الشكل الا هالتسريحة اللي بتشوفيني دايما فيها

ريما : انتي غلطانه !! انا شايفه ان وجهك حلو ، وبتمشي معو كل التسريحات وبتطلعي احلى واحلى ، مش زيي .. ما بأدر اختار الا تسريحات معينة تخلي الناس ما ينتبهو لرأبتي اللي زي رأبة الزرافة



ساره : شو هالكلام .. والله رأبتك حلوه وياريت رأبتي مثلها عشان تصرف النظر عن كتافي اللي كنها كتاف لعيبة الفوت بول الامريكية


ريما : أسكتي ياهبله ، والله كل البنات اللي بعرفهن في الجامعة بتمنوا كتاف زي كتافك ، يعني ما بتحتاري لما تشتري اواعي جديدة ..
ياحسرة علي انا .. شوفي إيدي شو صغار .. لو إلي كتاف زي كتافك كان ما بتبهدل لما اشتري أواعي جديدة وبتطلع قياساتها مزبوتة



انتهى الحوار



بالنسبة للشباب :

بداية الحوار:

محمد :نعيما
احمد: الله ينعم عليك



انتهى الحوار




خنفشاري





قبل كم يوم وصلني ايميل عباره عن سؤال

شو يعني خنفشاري ؟؟

جوابي كان

هاد مره واحد اسمه خنفو راح يخطب بنت
البنت واهلها وافقو وكل شي تمام
بعدين بدو يحكو بالمهر وهالامور وكالعاده اختلفو
البنت زعلت وحكت انا مش بكسه بندوره تبيعو وتشترو فيها
فاااااا خنفو زعل و تدايق و خصوصا ان الكلمه اجت بصباح ابوه وامه
لم خنفو وابو خنفو و ام خنفو حالهم و روحو
بعد فتره من التدوير على بنت حلال تانيه
بائت كل المحاولات بالفشل
فرجعت ام خنفو لاهل بكسه البندوره...قصدي العروس وحكتلهم انه خنفو لسا بدو البنت و من هالحكي و اختصرت جميع الكلام بكلمه
خنفو شاري :)




و بعديها الفضول لعب بعقلي اشوف شو المعنى الحقيقي للكلمه اذا اساسا كانت كلمه
و اللي طلع معي ان الخنفشاري هو الشخص اللي بنسميه بلغتنا " ابو العرّيف " يعني اللي ايش ما سألته لازم يطلع بعرف فيه
بالطب هو احسن طبيب و بالفن هو احسن مطرب و احسن فنان و بالعلم هو احسن عالم و بالدين هو احسن فقيه و احسن مفتي - وما اكثرهم اخر نوعيه بزمنا - المهم يا جماعه طلع في معنى للكلمه



وأصل القصة أن رجلاً كان يجيب على كل سؤال، ويدعي معرفة كل شيء، فتآمر عليه أصحابه، وقالوا: لنخلق كلمة من خيالنا، لا وجود لها في قاموس، فنسأله عنها، فإن أجاب فقد وقع في حبائلنا، فليس بعد ذلك ادعاء، وهو يكون حينها وقع في شر أعماله.

فوضع كل واحد منهم حرفاً غريباً حتى جمعوا حروفهم فأصبحت كلمة (خنفشار)، فسألوه عنه، فقال على الفور: هو نبات يزرع في اليمن، ينبت في الجبال، ويعقد به الحليب، قال الشاعر:

لقد عقد حبكم فؤادي

كما عقد الحليبُ الخنفشار

فأسموه بعدها الخنفشاري، وذهبت مثلاً لمدعي العلم أو المتعالمين، أعاذنا الله وإياكم منهم!



السؤال اللي بيطرح نفسه ارضا...هل انت انسان خنفشاري؟؟؟؟




الصوره تعبيريه لشخص حسيته خنفشاري :)


عادي هالشي؟؟؟؟



طبعا كلنا شفنا وسمعنا عن المشاكل اللي صارت بين المصريين و الجزائريين, ما بدي احكي عن الشعور بالقهر الكبير اللي حسيت فيه, يعني بدل ما يقطعو بعض هيك على طابه بضربوها برجليهم, نسيو الحدود اللي تسكرت و نسيو فلسطين اللي بتنادي و بتصرخ وما حد بدو يسمع صوتها, مدام عندكم هالنخوه العاليه لجماد يا ريت يكون عنّا هالنخوه لبشر بحسّو بتألمو وبموتو واحنا ملتهيين باشياء ما الها معنى وبرضه مش هاد اللي بدي احكي عنه.

اللي بدي احكي عنه, هلأ شفتو ما شاء الله ما شاء الله - هاي ما شاء الله مش خوف من حسد لأ - عدد الجمهور اللي حضر المباراه, هاد اللي بالستاد و اكيد في تجمعات كتيره صارت بالقهاوي و الكوفي شوبات, يعني العالم كانت فوق بعضها وسافرت من مكان لمكان صح؟؟؟

اللي كتير استغربته انهم نسيو اشي اسمه انفلونزا الخنازير بهيك تجمعات...
يعني لا نبهّو و لا حذرو ولا لغو هيك اشي علشان هالمرض
اكيد طبعا ما فكرو بانهم يلغو هيك مباراه ولا يأجلوها و لا يحددو عدد اللي يجي و لا عملو فحوصات و لقاحات لحضور هالمباره
لكن لمّا يجي الموضوع للحج فهون لازم نوقف و نتذكر المرض وممكن توصل انّا نلغي الحج لهاي السنه...انا مش قارده استوعب ان في دوله عربيه اسلاميه تمنع شعبها يروح عالحج !!!!

عادي هالشي يا جماعه؟؟؟
انا مش قادره اشوفه اشي عادي ....

مدونة شتاء 2010




BannerFans.com


اسمحولنا انا و احمد المحروق انّا نطل عليكم مره تانيه بمسابقه جديده "مدونه شتاء 2010 "
يمكن المعظم بعرف عن موضوع المسابقه من المسابقه اللي صارت بالصيف "مدونه صيف 2009" واللي اسعدتونا كتير بمشاركتكم وتفاعلكم معنا فيها و بناءا على التصويت فازت مدونه جوردانيا باللقب :)

المسابقه راح تكون تقريبا مثل المره الماضيه بس مع بعض التعديلات, الشروط الاساسيه ان المدونه تكون عربيه, و تكون من المدونات اللي بلتزمو بالاخلاق و الاداب العامه

فضّلنا السنه نعمل مدونه خاصه بهالمسابقه وبتلاقوها هون و فيها راح يتم الترشيح اللي راح يبدا باول ديسمبر ان شاء الله و يستمر ل 15 ديسمبر
و بعديها ببدا التصويت من 16 ديسمبر و ل 30 ديسمبر, فضلّنا ما نعملها بالفيس بوك لان المره الماضيه المعظم ما حب طريقه التصويت لانه اضطر انه يعمل حساب وهمي خصوصي للتصويت, علشان هيك السنه راح يكون بنفس مدونه المسابقه, اسهل و احسن


واخر شي بيجي اعلان النتيجه اللي راح يكون ب 1-1-2010 :)

احنا حابين قبل ما تبدأ المسابقه ناخد ارائكم و اقتراحاتكم خصوصا انكم جربتو المسابقه من قبل, بتمنى انكم ما تترددو باي سؤال او اقتراح لان هالمسابقه زي ما بحكو...منكم و اليكم :)

ايام من ذهب





بس حابه ازكركم بصيام العشره الاوائل من ذو الحجه :)

المفروض ان الخميس يبدا الصيام بس لانا مش متأكدين اذا كان رمضان بدا صح زي ما شافو الهلال او لأ و علشان مش متأكدين ان هالشهر 29 ويلا 30 فالافضل انا نبدا بكره

كل سنه انا وصاحباتي بنصوم هالعشر ايام, و طبعا والحمد لله بالبيت الكل بصومهم , الله يقدرنا على صيامهم يا رب, ومع اذان المغرب اللي عال 4:40 بصراحه جد حرام نضيعهم على حالنا و نضيع الاجر

بحب ازكر ان صيام هالايام مش فرض و ان في احاديث بتذكر ان الرسول صلى الله عليه وسلم كان مرات يصومهم كلهم ومرات يصوم اغلبهم واكيد كان دائما يصوم يوم الوقوف على عرفه.


هالايام الاجر فيهم كبير ان شاء الله فبحاول الواحد يستزيد من الخيرات, انسو الاخطاء اللي كلنا بنعملها واحنا عارفينها - استغفر الله العظيم - بس انا بحكي عن الاخطاء اللي بنعملها واحنا مش حاسين فيها ولا حاسبين حسابها, ما بتتمنو ان كل هالسيئات تتبدل حسنات؟؟ طبعا انا برضه بحب ازكر ان كلّه ربنا اللي بعرفه و كلّه ربنا اللي بحاسب عليه و بطريقه ربانيه رحيمه وحاش لله اني احط نفسي محاسبه او محتسبه للاجر

الجميل بهالايام ان جميع اركان الاسلام تتجمع فيه, يعني مش بس صوم, نحاول نذكر الله كتير و نعمل الخير و نزكي و نزيد من النوافل :)

الله يتقبل منا ومنكم :)
وكل عام وانتو بالف خير مسبقا :)

قنوات الجهل




جد كتير زودوها بهالقنوات اللي ما الها معنى, و واضح انه ما الها غير هدف واحد
بسألو سؤال زي قناتهم و بتفننو بهالاسئله, و بحطو اغنيه تافهه و اهم شي المذيعه اللي ما الها دور غير انها تغني و تتمايل و تتئصوع و تتمصوع مع الاغنيه, وبين كل اغنيه واغنيه تشجع الناس بطريقه مايعه وهبله علشان يتصلو, مش عارفه من وين بجيبوهم هالاشباه المذيعات!!!

كتير بستغرب ان معظم القنوات الاسلاميه غيرو ترددها فجأه و سكر جزء منها و متل هالقنوات اللي ما الها معنى انتشرت بشكل كبير !!!





قبل كم يوم بقلب بين الألف قناه عالستلايت وكالعاده اني الاقي اشي ينحضر ابدا
و بين القنوات ظهرت هالقناه, اول شي لفت نظري السؤال , وبعدين ست الحسن والجمال اللي بترقص بطريقه مبتذله, و بعدين كملت لمّا خلصت الاغنيه وبدت تحكي الاخت بطريقه سوقيه جدا, صورت اكتر من فيديو بس هاد اللي قدرت انزله الباقي احجامهم كبيره طلعت




video




من اللي صورته بالفيديوهات التانيه, بتحكي المذيعه بما معناه "ان اللي ما بتصل راح يندم و راح يصير يحكي يا ريت و كلمه يا ريت ما بتعمر بيت" بالله عليكي؟؟؟ انتو بتعرفي باشي اسمه تعمير بيوت؟؟؟ وال ان الجائزه راح تعوّض المتصل وانه ما راح يخسر اشي

كنت افكر ان مستحيل يكون في ناس بتابعو متل هيك قنوات, اكيد حد من نفس القناه بتصل و بعمل كأنه اتصال من الجمهور, لكن كثر هالقنوات ببين ان اكيد وللاسف هالقنوات ناجحه بالفساد و بجيبه الفلوس علشان هيك انتشرت

ان شاء الله يزيد وعي العالم اللي بتايع هيك قنوات, واللي فاتحين هيك قنوات يستغلو هالقنوات و يستغلو امكانياتهم الماديه باشي مفيد للعالم, وبزيد من ثقافتهم و بطور من قدراتهم بدل ما يخليهم يرجعو لورا بكل شي بحياتهم.

مين اللي مابخاف من زوجته!!؟؟



صباح الورد والياسمين عالجميع

اليوم حلو من اوله والحمد لله
ان شاء الله كل ايامكم تكون حلوه وبتجنن
وان شاء الله الضحكه ما تفارق وجهكم
واللي بستنى اخبار....ان شاء الله كل الاخبار تكون حلوه
واللي مريض ان شاء الله بشفى
واللي تعبان ربنا يفرجها عليه
واللي بدور على شغل ربنا يوفقه باحسن شغل :)

اترككم مع النكته....بتمنى ما تكون دبشه :$





رجال في المقهى قالهم واحد:
يلي بيخاف من زوجته يروح يقعد على اليسار
كلهم راحوا للجهة اليسار إلا واحد
قالوا له ما بتخاف منها؟
قال: قالتلي روح على القهوه بس اذا تحركت من مكانك رح امسح فيك الارض

احب قبلات الشمس



في اشياء كتير بسيطه بحياتنا , لكن بتعنيلنا شخصيا اشي كتير حلو او اشي كتير سيء


انا مثلا بحب صوت المطبات اللي بتكون موجوده على الجسر بس تمشي عليه بالسياره, بكونو حاطين زي فواصل علشان ما يسرع السائق, كتير بحب صوتها بس امشي عليها, اخوي بكرههم وبحكيلي هاي تخريب للسياره


بحب بس اسوق بطريق يكون في عمارات و الشمس تضل تختفي و تظهر من وراهم زي حد بشغل الضو وبطفيه, بحس كأن الشمس بتطبع قبلاتها على وجهي و بتودعني قبل ما تختفي ويجي الليل


بحب تكون الدنيا براد و افتح الشباك و الف حالي بحرام و يصير الهوا البارد يجّي علي و انا دفيانه


كتير بنبسط بس افكر بفيلم او باغنيه معينه و بنفس اليوم اسمع الاغنيه بالصدفه او اعرف ان في قناه بدها تعرض الفيلم


كتير بنبسط بس ربنا يسّرلي انسان اساعده. خصوصا الكبار بالعمر, جد بحسها نوع من انواع الرضا من رب العالمين, و بحب بس يحكيلي بابا او ماما ان اليوم في واحد الله يرضى عليه ساعدهم و هوّن موضوع عليهم


بحب البحر بشكل جنوني وممكن اضل قاعده قدامه يوم كامل احكي معه و يحكي معي, بشكيله و بحكيله كل اسراري و بخفف علي و بضحك معي, كتير غريب ان البحر بتحول لشخص معين بعنيلك و بتحس معه بمشاعر غريبه, البحر اله ذكريات جميله معي, البحر كان صديقينا في فتره من الفترات

الله يخليلنا حبايبنا


اليوم طلعت بكير عالشغل, كان عندي مقابله لشغل و بدّي اخلص كم من شغله طلبها المدير مني قبل ما اخد مغادره , امبارح بالليل حكيت لاخوي اللي بوصله كل يوم عشغله لانه بطريق شغلي انّا بدنا نطلع بكير, و وصيته انه ما يرجع السياره بنزينها فاضي زي كل مرّه لاني مستعجله وما بقدر اعبي الصبح ولا قبل ما اروح عالمقابله.

الصبح صحيت بدري وصحي اخوي بدري على غير عاده, بحكيلي صباخ الخير بس سوري حبيبتي نسيت اعبي بنزين, حكيتله يعني فاضيه فاضيه؟؟ بحكيلي لأ فيها بس ما عبيت, طبعا كانت فاضيه و كل محطات البنزين كانت مليانه سيارات بطريقه مش طبيعيه, هيك بصير كل ما جابو سيره انه في ارتفاع بدو يصير , كلهم بروحو بفللو السيارات :(

المهم اخر محطه وقفت عندها وهي رقم 3 بطريقي صار اخوي يصرّخ ويحكيلي والله فيها, بتدويكي عالزرقا وبترجعك, رديت عليه بصوت كتير هادي, اانك بتتوقع بس تصرخ ويعلى صوتك اقتنع انا او ابطل شايفتها فاضيه, لفيت وجهي و سقت لمكان ما بدي انزله, بحكيلي بدك تعبي, حكيتله اه بس بدي اياك تنزل من السياره, عصّب الاخ و ضرب الباب ضربه اكتشفت بس وصلت للشغل انه خرّب بهالضربه الشباك, عالكهربا الشباك, ما رضي يتزحزح , نزلت و زي شيخ الشباب ضليت احاول ارفع فيه بايدي لحتى سكر و لاني كل ما اتركه يرد يفتح تنيت ورقه عروض كانت محطوطه بالسياره و حشيتها بطرف الشباك, طبعا تأخرت عالشغل و كنت على نقره بدي اقعد بنص الارض زي الصغار و ابكي :( جد منظر السياره بحزّن صار, اي نعم هي على قدّي بس بحبها و اخوي دمّرها من يوم ما اخد الرخصه.

هلأ مش هون موضوعنا, الموضوع ان بس اخوي اجا عالبيت سمعت صوت كياس و دخل على غرفتي, انا طنشتّه و ضليت بالمطبخ احضر غدا مع ممّيتي, اجا عالمطبخ و سلّم علينا واتطمن عالاكل, تغدينا و خلصنا, اجا بحكيلي بدك السياره اليوم لاني محتاجها بمشوار, شكله بصراحه حزني و ما حبيت اكسفه في نظره احساس بالذنب موجوده, حكيتله لأ ما بدي اياها, بحكيلي طيب تعالي شوي بدي احكيلك اشي, دخل على غرفتي ودخلت وراه بسألني "زعلانه مني؟؟" حكيتله اه و كتير بصراحه وحكيتله عن الشباك, بحكيلي والله حسيت حالي غريب اليوم ما بعرف كيف صرخت وكيف ضربت الباب, و ضمني وحكالي خلص لاتزعلي مني الله يخليكي, ضحكت وحكيتله خلص بس بلالك عاده الصراخ, بتطلّع عالتخت لقيت كيس, بحكيلو شو هاد, طلع جايبلي اشياء زاكيه من اللي بحبها :)

ما كنت اعرف حالي اني ممكن يتعدّل مزاجي 180 درجه من اشي زاكي :)
وكتير انبسطت لانه عارف شو اللي بحبه بالزبط :)
الله يسعدهم و يخلليلي اياهم يا رب و يخليلكم اخوانكم وخواتكم وكل اللي بتحبوهم

وحكالي انه عبّالي السياره فلّ بنزين
:)))))




صحيح بالنسبه للمقابله طلع امتحان و كنّا تقريبا 20 واحد و وحده و الحمد لله كتير منيح قدّمت وان شاء الله خير, واللي اله رزقه بمكان راح ياخدها :)

البيوت مغلّقه... والهموم مفرّقه

اليوم بدي احكيلكم عن 3 بنات تشابهت قصصهم لحد كبير مع اختلاف الاحداث, ال3 بنات خطبو و تزوجو بنفس الوقت تقريبا قبل سنتين

اول بنت تزوجت من شخص على مستوى كبير من الثقافه والعلم و كان وضعه المادي فوق المتوسط, كانت فتره الخطوبه سريعه جدا وضاعت كلها بتجهيزات العرس و البيت, و تزوجو و بعد شهرين رجعت البنت لبيت والدها لانهم اكتشفو وبعد اجراء الفحوصات اللازمه ان الزوج لا يصلح للزواج , وما حصل الطلاق فورا لان قانوننا الجميل بفرض على البنت انها تضل مقيمه مع زوجها لفتره 6 شهور و اذا بقيت العلّه موجوده بعدها ببدو باجراءات الطلاق, وبما ان الزوج طلع لا يطاق على جميع الاصعده فالبنت و اهلها فضّلو انهم يدفعو للعريس كل اللي صرفه حتى يتم الطلاق لانهم ما بدهم اي حلول تانيه تطول فتره ارتباط بنتهم في هذا الشخص, ورؤجعت البنت لبيت اهلها زي ما طلعت منه قبل شهرين.

البنت التانيه نصرانيه, وافقت تتزوج العريس اللي تقدملها لانها كانت على علاقه حب و خطوبه مع واحد من عيلتها وصار مشاكل بينه وبين والدها على تحديد موعد العرس , لان العريس مقيم بالخارج و لمّا رتب اموره مع شغله على موعد معين ابو العروس و بس علشان يفرض رأيه ما وافق عالموعد و احتدت النقاشات ووصلو اخر شي الى ان ابو البنت حكا للشب ما عنّا بنات للزواج سافر الشب و خطب وتزوج من بنت عربيه مقيمه بنفس البلد اللي بشتغل فيها, فالبنت وافقت على اول عريس تقدملها, بتفكر انها هيك بتنتقم منه وما كانت تعرف انها بتنتقم من حالها.
مشيت الخطبه على خير و وقت العرس حكالهم الشب ان امكانياته ما بتسمحله يعمل حفله ريسبشن - الحفله بعد ما يخلصو اجراءات الزواج بالكنيسه - فالاب حكا انه هاي الحفله عحسابه وانها راح تكون هديته للعرسان, تزوجو و سافرو عتركيا شهر العسل رجعو وتاني يوم من رجعتهم الشب حكا للبنت انه في رجال من عيلته زعلانين من والد العروس لانه بدرت منه كم من كلمه على جاهه الرجال اللي اجو ياخدو البنات, انه استقّل عددهم وعلق بما معناه انه وين الرجال هو ما في رجال بعيلتكم....
وفعلا راحت البنت لبيت اهلها زياره عاديه المفروض توصّل وجهه نظر زوجها و يجي بالليل ياخدها, ومن يومها -قبل سنتين - لهلأ والبنت عند اهلها و العريس و ابو العروس معندين من فيهم اللي غلط, وبما انهم نصرانيين فالطلاق عندهم بده موافقه كنائسيه و ما بتحصل الا في حالات نادره لاتنطبق عليهم.


البنت الثالثه, خطبت و تزوجت بفتره قصيره, الزوج بشتغل بالخليج و مش موافقين يعطوه اجازه طويله من الشغل و اذا اخد اجازه هلأ ما في اجازه تانيه الا السنه اللي بعدها, فتم الموضوع تقريبا بشهر, تزوجت البنت وسافرت و بعد سنه اجت زياره لاهلها لانها حامل و تعبانه وبحاجه لامها, كان الزوج مثال للزوج المثالي , البنت كتير مبسوطه و بتشكر فيه, سافرت البنت لعند زوجها عالخليج وراحت امها عندها وقت الولاده و كان حاطط البنت وامها على راسه حسب ما ذكرتلنا الام بس رجعت, قبل 3 شهور البنت اجت تحضر عرس اخوها, واضح ان البنت متغيره لكن المسؤوليات الجديده , البيت و البيبي الاّ ما يغيرو فيها اشياء كتيره.

بيوم من الايام وهي بتحكي عالتلفون مع زوجها اللي بالخليج وهي قاعده بين اهلها, فتحت السبيكر فجأه, طلع صوت الزوج وهو بصرخ و بسب وبلعن بابذء المسبات , انصدم الاب ومسك التلفون و حاول انه يفهم من الزوج ولمّا ما لقى ان في فايده سكر الخط, ولمّا سألو البنت, طلعت البنت من بعد ما سافرت امها بفتره قصيره مكتشفه ان زوجها بخونها, بحكي مع بنات عالنت و عالموبايل و بتواعد معهم و بتلاقى معهم برّه, وانه كان يغيب يومين وتلاته عن البيت عاساس انه عنده شغل بمدينه تانيه و تكتشف انه يكون مع وحده من هالبنات اللي متعرف عليهم, ولمّا واجهته قلب 180 درجه وصار يضربها, وحبسها لمده اسبوع بغرفه النوم و كسر موبايلها و بعد ما قدرت تضحك عليه و تعمل حالها انها بدها تتفاهم معه واعتذرت عن تدخلها بشؤون حياته, وصار يحكي مع البنات ويتواعد معهم قدامها, قدرت تقنعه انها تنزل عالاردن تحضر عرس اخوها, ولمّا وصلت ما حبت تحكي لاهلها لحتى يخلص العرس علشان ما تخرب عليهم فرحتهم, والبنت حاليا رافعه قضيه طلاق بالمحكمه


هدول 3 قصص لناس حقيقيين عايشين معنا وحوالينا, كلنا بنعرف ان البيوت اسرار و ان كل انسان عنده الهموم اللي تكفيه واللي على قدّه, ممكن هم انسان يكون سخيف بنظرنا بالنسبه للي بنعانيه احنا, وبرضه ممكن همنا يكون سخيف عند ناس تانيين, الحمد لله على كل حال.

السؤال اللي بدي اسأله, كيف ممكن ترتبو هالقصص التلاته من الاكثر صعوبه للاقل صعوبه, مع مراعاه البيئه اللي بنعيش فيها و الافكار الاجتماعيه اللي عند اللي حوالينا, من قصتها اصعب من التانيين؟؟؟

انا برأيي ان البنت التانيه هي اصعب شي لانه تقريبا و لهلأ ما في انفكاك .
احترت باللقصه الاولى واللي برجح انها تكون ابسط و بين القصه الاخيره
هلأ انها ترجع لبيت اهلها بدون اولاد عند ناس كتيره افضل من انها ترجع باولاد, لكن بنفس الوقت انها تكون طلعت من هالتجربه الفاشله بولد يكون هدفها واساس حياتها برضه اشي ايجابي...
انتو شو رأيكم؟؟؟

شكرا عروب صبح :)

اليوم فتحت المدونه لقيت في زوار كتير جايين عالمدونه من الفيس بوك
استغربت وما فهمت ليش
بعدين وصلني تعليق من قط البكتريا بان في لينك لمدونتي عالفيس بوك
وبرضه ما فهمت
وبعدين صديقتي و اختي بمدونه

Salt & Papper
وضحتلي الموضوع

طلعت عروب صبح الذووووووق
حاطه لينك لمدونتي عصفحتها بالفيس بوك وكاتبه

" she has something to say ..."
شكرا ..شكرا لعروب صبح
وان شاء الله يكون اللي بحكيه و بكتبه مفيد و ممتع للجميع
وشكرا عروب عالمتابعه :)


فشّه قلب

معظم صاحباتي اللي بعمري ,صاحبات من ايام المدرسه او الجامعه وحاليا بالشغل متزوجات و عندهم اولاد, كل ما اتصل بوحده او هي تحكي معي لازم موشّح ملامه ومعاتبه, ليش لانه باعتقادهم بما اني مش متزوجه فانا 24 ساعه فاضيه ولا قدامي ولا وراي, والمفروض اني 24 ساعه بحكي تلفونات مع الناس و بتطمن عليهم وبسأل عن اخبارهم, وانا المفروض اللي تسأل لانهم همه الله يعينهم مشغولين باولادهم وبيوتهم...

مش فاهمه كيف كلهم او معظمهم متفقين على هالنقطه على اختلاف مستواهم الاجتماعي والتعليمي والاهم الفكري...

ليش المفروض بما اني مش متزوجه اذا فورا بعتبروني ما عندي اي التزام اجتماعي او اسري؟؟؟
ليش بصوروني على اني من البيت للشغل ومن الشغل للبيت؟؟

ولمّا احكي لوحده فيهم عن برامجي الحافله وعن توزيع الاعمال والارتباطات على ايام الاسبوع بتفاجأو؟؟
و المشكله بنتقل الموضوع من معاتبه ولوم الى نق و قرّ, ونيالك و احسنلك و عيشي حياتك ومن هالحكي؟؟؟

وليش البنت وحتى مرات الشب بس يتزوج بفكرو حالهم هيك كبرو و صارو اكبر من كل اللي حواليهم؟؟
ليش اللي بتتزوج بتعتبر حالها انجزت اشي مهم ويا ويلنا اذا جابت بيبي, بتكون كأنها جايبه الذيب من ديلو؟؟؟

اللي قهرني و سم بدني و خلاني اكتب هالموضوع هو ابن عمتي اللي ماما كانت تدرسه وهو بالمدرسه تزوج و اجاه ولاد فجأه صار ينادي ماما ام فلان بدل مرة خالي؟؟؟؟ و الأمرّ انه صار ينادي بابا ابو فلان؟؟
يعني بفكر حاله كبر و العالم وقفت مكانها؟؟؟

بس بابا فش قلبي, ما بعرف شو حكاله, قمنا نجيب الضيافه انا وماما و مرة ابن عمتي, رجعنا لقينا وجهه اصفر و بحكي لماما يسلمو مره خالي :)