Things I Like To Whisper About

Would You Hear Me Whispering

اعتراف





علاقتي فيه بدت متاخره
 يمكن بدت عالتوجيهي و قبليها ما كنت منتبهه اله


مع انه كان متواجد دائما عنا,  و اهلي كلهم بحبوه و متعلقين فيه، ولكن انا و هو كان بينا نوع من التجاهل عالقليله من طرفي انا , كانت توصل فيي اني ما احب اشوفه بالمره.


لكن التوجيهي غير، كل المشاعر بتتغير و الضغط النفسي بخليك تتفشش بكل شي حواليك و تحب كل شي حتى ولو كان برنامج علمي بحت - افاق المستقبل - و بهالوقت انتبهت لوجودﻩ و من يومها و انا بعزه و ممكن اني اتجرأ و اقول اني بحبه بالرغم من تأنيب الضمير اللي ما بقدر اتغلب عليه.


جد نفسي اكرهه او حتى عالقليله زي زمان اتجاهله و لكن للاسف تعلقي فيه و عدم استغنائي عنه بزيد مع الوقت




تبا لك يا  طبق ﺍﻟﺤﻠﻮ :(

اشي بجلط




اول ما رجعت من دبي سمعت من اهلي عن بنت قريب النا الها فتره زعلانه ببيت اهلها, و ا ن هاي مش اول مره بيصير انها بتزعل, اتدايقت كتير عليها خصوصا ان اللي كان ظاهر انها كتير متفقه مع زوجها, تمنيت انها تكون زعله وتمشي خصوصا ان في عندها بنت و ولد بالمدرسه وفترة امتحانات و دعيت ربنا يصلح الحال.

شاءت الاقدار ان اهل البنت يجو عنا زياره ويفتحو الموضوع, الموضوع انفتح لان اهل البنت قراب كتير منا و حسب كلام الاب هو ما حكا اشي لحد و حابب يشكي لبابا, بشكي من اهله  كيف بتدخلو بالاصلاح و انهم مستهجنين ان البنت طولت ببيت والدها و طبعا المصيبه الكبرى كانت لما لمح الاب – الغير مقتنع بتلميحه – بموضوع الانفصال.

طلعت البنت من اول سنوات الزواج يعني قبل 10 سنين وهي تهان عند زوجها, اهانه بالضرب و بالكلام و اهانه بالتعامل واهانات معنويه, وكل مره البنت تروح عند اهلها ابوها يرجعها عاساس ان البنت ما الها غير زوجها, والزوج يفهم  الموضوع ضعف من اهل البنت و يزيد بالاهانه.

فالاب الذكي قرر يعاقب الزوج باخر زعله, فقرر ياخد البنت و يخليها تترك ولادها( ولد 8 سنوات وبنت  5 سنوات )لابوهم, البنت تدمرت نفسيا ببعدها عن الاولاد و الاب مش مقدّر هالشي, و بعد ما شاف البنت بتدوب قدامه راح جاب الاولاد, شرحتلي ام البنت الاهانات اللي بتتعرضلها البنت, المسبات و التهزيء بوجود ناس او بدون وجود ناس, الضرب  اه الضرب اللي صدمني ان في اب ممكن يرجع بنته بعد ما تضرب و يسكت عن حقه و حق بنته و يجبرها ترجع لهيك بني ادم, الضرب لدرجه ان البنت الها شهر عن اهلها و لسا امها كل ليله بتحطلها مراهم على اماكن ضربها بالحزام من زوجها, لدرجه ان البنت الها شهر ما طلعت من البيت ولا شافت حد لان الزراق و الانتفاخ اللي بوجهها لسا ما اختفى.

من ضمن الكلام انجاب سيره الطلاق و اكد الاب انه مستحيييييييييييييييييييييييييييييييييل تطلق, شو بدهم يحكو العيله و شو بده يحكي المجتمع و بلوم المجتمع اللي عايشين بينه وما بلوم حاله, انا ما قدرت اسكت حكيتله بدي احكيلك شغله اولا العالم لو بنتك مبسوطه ما حترضيها العالم اذا بدك تعيش بناء على رايهم تموت احسنلك ويا دوب تسلم, و هيني من هلا بحكيلك اذا بنتك رجعت و صارلها شي ماتت او انتحرت فانا بحكيلكم انتو التنين اني بحملكم مسؤوليتها, طبعا بابا وماما ما عجبهم تدخلو بس الله هداهم و اكتفو بالتشبير انه اسكتي.

بتحكيلي الام هو بصراحه البنت تعبت نفسيا و اخدتها على دكتور نفسي من شي سنتين و الدكتور حكالها انها مصابه بانهيار عصبي حاد و ان البنت عرضه لانها تعمل بحالها اي شي و ممكن تأذي حالها, والها سنتين عالادويه

كيف بهونلك تعمل هبك في بنتك, بديش احكي عن شبه الرجال اللي بضربها و اللي فاهم الرجوله بطريقه متخلفه, بدي اضل بالاهل, لما تجبر بنتك على هيك عيشه و لما بس بدك تساعدها تقرر تحرمها من اولادها اللي الشرع و الدين بعطيها هالحق , للاسف كتير اهل بحكو لبناتهم اللي ماكلين هوا بحياتهم تعالي انت و ارميله اولاده, عاساس انهم ولاد الجيران مش ولادها, بدك تكسر قلبها فوق الكسره اللي هي فيها, هاد طبعا في حال الاهل رضيو بموضوع الطلاق, كتير اهل الطلاق هاد غير وارد و الحل هو انك تموتي او هو يموت بس رجعه عندي ما في, كتير بنات ما بعرفو حقهم برفض هالواقع اللي بلزموهم فيه ازواجهم و اهاليهم.

اتقو الله يا جماعه في بناتكم, اتقو الله يا رجال في زوجاتكم



ملاحظه ع الهامش

اصدقائي و صديقاتي....في مشروع بشتغلو عليه زميلات مدونات النا و انا حابه اشاركهم فيه, هالمشروع بحكي عن حقوق المرأه و تعريفها بهالحقوق, حقها بالحياه, حقها بانها تحكي لأ و ما تسكت عن الظلم, اول خطوه في هالمشروع هي تجميع قصص عن العنف ضد المرأه و ياخدو رأي قانوني بالموضوع لتعرف الستات اللي ساكتين عن هالعنف شو العقوبه القانونيه للي بتعرضوله و انه الهم حق يرفعو صوتهم و يحكو لأ , بدي منكم اصدقائي تبعتولي اي قصه بتعرفوها عن الموضوع و تبعتولي اياها على ايميلي باسمكم او باسم مجهول واذا بتحبو بالتعليقات, يا ريت تشاركونا بكل القصص اللي بتعرفوها علشان اللي بتعرضو لهيك مواقف و بفكرو انو عادي الزلمه يضربها و عادي يهينها تعرف انه مش عادي بالمره و ان القانون برفض هالشي, كتير ستات عايشين بينا بفكرو ان جزء من واجباتها تجاه زوجها انها  تاكل القتله و هي ساكته و لااا كمان  تستسمحه و تطلب الغفران على شي ما عملته, بتمنى منكم تساعدونا.

مصدوووومه O.O




قبل كم يوم بتحكيلي صاحبتي قصه صارت معها جد صدمتني
احكيلكم عن صاحبتي قبل لتكون الصوره  واضحه عندكم
  صاحبتي كبيره بالعمر و حتتقاعد بشهر 2 ان شاء الله، عاديه جدا شكلا و طريقه لبس، محجبه و قويه و قد حالها ، بالشغل النص بحبها و النص التاني بخاف منها ما بتسكت عالغلط و اخت رجال بالمواقف اللي بتطلب منها اي شي صعب او سهل
  بتحكيلي قبل كم يوم كانت مروحه بتكسي من الشغل، فجأه سائق التكسي لف وجهه عليها و اعطاها ورقه، بتتطلع شو هاللي اعطاها اياه طلع معطيها  خمسين دينار...بتحكيلي ما فهمت بتطلع عليه بحكيله شو هاد اتطلع عليها من المرايه اللي موجهها على وجهها بدل الزجاج الخلفي - زي تلات ارباع سواقين التكاسي عنا - بنظره مقززه و بحكيلها " ها شو رأيك بمشي الحال " مع غمزه   صاحبتي بتحكيلي قلبي كان بدو يوقف و صرخت فيه وقف و بديت اسبسب و رميت الفلوس بوجهه و نزلت من هون طار من هون  
ﺑﺴﺎﻟﻬﺎ طب ما شفتي اسمه ما شفتي رقم التكسي ، بتحكيلي صرت ارج و متت خوف و اساسا بطلت شايفه...الدنيا فجأه صارت عتمه سوده قدامي

بس ترجع امي ﻋﺮﻭﺱ


القصه حكتلنا اياها خالتي صارت معها
كانت واقفه عالاشاره اجا شب ببيع فراوله، فتحت خالتي الشباك و سألته بكم السحاره حكالها باربع دنانير، خالتي ما عجبها حكتله شكرا و سكرت الشباك
صار الشب يأشرلها من ورا الشباك انه بس بواحد، حكت والله اذا بدينار باخدها، فتحت الشباك قام الشب حكالها " بس ترجع امي عروس بعطيكي اياها بدينار "
خالتي بتحكي بعد الصدمه و كتمه الضحك بالغصب حكتله " مش عيب تبهدل والدتك و هي قاعده ببيتها يا خالتو !!"  وسكرت الشباك
بتحكيلنا يا دوب فتحت الاشاره و مشيت وكل اللي بالسياره فقعو ضحك
كلنا ضحكنا عالقصه الا بابا :$ انقهر و انسم بدنه ، بحكيلنا ان بزمنه ستات العيله، الام و الاخت كانو اشي مقدس ما يدخلو لا بموضوع مزح ولا بموضوع جد، هالايام صارو علكه بتم اولادهم، صار الاخ يسب على اخوه بشرفه وبامه و باخته
طبعا اختفت الضحكه و التفكير بالموقف صار اعمق واله ابعاد تانيه ...
Published with Blogger-droid v2.0.9

بدنا همتكم معنا

صباحكم و مسائكم نرجس

اصدقائي و صديقاتي اليوم انا جاي مش بطلب لا بأمر هههه لا بمزح بمزح :)
جاي الفت نظركم لشي شكله مش واصللكم

بتعرفو صديقنا المدون مالك صاحب مدونه جراد....متأكده ان معظمكم بعرفه و اللي ما بعرف مدونته تأكد انو رايح عليك كتير, صديقنا مالك المغترب بكتب من امريكا و كتاباته متنوعه و جميله جدا وانا بدون مبالغه قرأت جميع تدويناته و حتى اللي كاتبها قبل ما اتعرف عمدونته برضه بحبشت فيهم :)

الموضوع ان مدونه صديقنا مالك مرشحه لجائزه افضل مدونه مغترب, و ليفوز و صدقوني مدونته بتستحق الفوز لازم يتم ترشيحه على هاد الموقع مع كتابه تعليق بسيط عن مدونته - ايجابي طبعا ما في مجال للمزح هون ام عمر :$ - و تقييمها بالنجوم و طبعا المدونه تستحق 5\5 فاااااا يلاااا فرجونا همتكم :)

 فيعووووووو

احلامنا واقعهم





امبارح  وصلني عالفيسبوك فيديو عن احداث غزة, ولان مدة الفيديو طويله فضلت انزله عالموبايل و احضره بعدين و امبارح بالليل قبل ما انام تذكرته و حضرته, الفيديو عن احداث غزه بال2008 تفجيرات و اشلاء و حرائق , جرحى و شهداء, اطفال و كبار , و مشاعر اهل بالمستشفيات, بكيت و دعيت وقلبي و جعني من القهر و من العجز...ونمت


صحيت صليت الفجر و نمت, صحيت عال 7:00 وانا شبعانه نوم و لكن جبرت حالي ارجع انام لانه الوقت بكير, صحيت عال 7:10 من كابوس, بعرف ان المناظر ضلت في العقل الباطن عندي و طبيعي جدا احلم فيها, الحلم اني كنت مروحه و ماما باقيه في المكان اللي كنا فيه, وقررت ارجع و بس حكيت مع ماما عالموبايل شفت تفجيرات بتصيب المكان اللي ماما فيه و سمعت صوتها بتصرخ و بعدين بطلت ترد علي, بالحلم حكيت لحالي ما راح اهرب, و دعيت ربنا انه يجمعني مع ماما ان صارلها شي او اذا ضلت سالمه و صحيت من النوم مفزوعه.

نفثت على كتفي الشمال و فكرت, بعشر دقائق "حلم"  صار فيي هيك, بحلم مدته 10 دقائق حسيت بهالمشاعر و الخوف و القلق و الحزن, فما بالكم "بواقع"  استمر لسنوات, ما بالكم ببيوت اذا ما انهدمت فعليا انهدمت نفسيا بحبيب استشهد, وما بالكم ببيوت انهدمت هي و اهلها جميعا, مهما كنّا مع اهل غزّة مدامنا مش معهم هناك فاحنا مقصرين, مدامنا مش معهم هناك فمشاعرنا ناقصه.

و بعديها فكرت, كيف شعب بتكون حياته هي اسؤ و اجمل احلامنا, كوابيسنا هي حياتهم و حلمنا بالعزه و النصر هو واقعهم برضه, شعب نرفع فيه الراس بكل احواله, بتقبلهم لواقعهم و صبرهم و رضاهم, باعتمادهم على نفسهم لانّا خذلناهم اكتر من مره, باستخراج الضحكه من واقع مرير.

هل يا ترى حبنا لاخوانا و اخواتنا اللي بغزه و بفلسطين مستمد من حبنا للارض ؟؟؟ هل يا ترى حبنا الهم و قلقنا عليهم الفتره الماضيه مستمد من قلقنا على غزه و فلسطين؟؟؟ 
بعد تفكير استنتجت انّا بنحبهم لشخوصهم, حبنا لفلسطين مهما شرحنا و عبرنا ما بنوفيه حقه, ولكن حبنا لاخوانا و اخواتنا هناك همه السبب فيه, حبنا لطريقه تفكيرهم, حبنا لوعيهم و نضوجهم الفكري المبكر, حبنا لطريقه مناقشتهم ومحاكاتهم للواقع, الحمد لله ربنا رزقني بهالعالم الافتراضي و اللي بتمنى ينتقل للعالم الواقعي باخوات و اخوان في فلسطين و غزه تحديدا بتشرف فيهم و بمعرفتهم, و حبي الهم و خوفي عليهم نابع من قلب بخاف على اخوانه.

تحيه لجميع اهل فلسطين اللي بعيشو احلامنا و بندعي رب العالمين ان يجمعنا معهم على الارض و في السماء

الف سلامه يا رب



متأكده انكم كلكم مستفقيدينلها بعالمنا الافتراضي, عالبلوج و الفيسبوك و التويتر, بطلتو تلاقو متعه بسبب غيابها يا ترى عن مين بحكي؟؟؟

عن اللي بتحفزنا نكتب و نعلق, عاللي بتحفزنا نتطاوش عالفيسبوك, عاللي بتعمللنا تاج على صور غريبه عجيبه....بحكي عن ام عمر

متأكده ان الكل فاقدها الو فتره , اليوم حكيت معها و اذذذذذ :( حبيبتي ام عمر هابب فيها الغاز و ايدها محروقه حروق من الدرجه الثانيه و الثالثه :(
اجر وعافيه يا رب و الله يقومك بالسلامه عن قريييييييييييييييييب يا قمر.


الحرق ما بدو حد يشرح عن المه و اللي بستمر بكل مرحله, اجر وعافيه يا قمر و الله لا يحرمنا من ضحكاتك يا رب

اسأل الله العظيم رب العرش العظيم ان يشفيك

روحها و فضيحتهم





امروها ان تنتظر في غرفتها و اقفلو الباب ليتباحثو في امرها, فاولا و اخرا لهم القرار, و اولا و اخرا هم الاهم, فاي ضرر اصابها اصابهم اضعافه, و اي فضيحه مسّتها مسّهم جبال منها, هذا في حال توقفو ولو لثواني للتفكير في المها و حزنها و مشاعرها في تلك اللحظه.

نظرت الى ثوبها الممزق, الى اجزاء جسدها العاريه, نظرت الى نفسها في المرأه لم ترى شيء, لم ترى الا احداث حدثت في ثواني مرّت عليها كانها دهر, ماذا حصل و كيف تمكن منها ذلك الذئب البشري, كيف تركها و كيف وصلت الى البيت و كيف تمالكت نفسها لتخبر والدتها بما حصل معها, جلست في زاويه السرير ضمت رجليها الى صدرها بقوه, تقوقعت على نفسها تريد ان تهدّئ روحها تريد ان تطمئن نفسها و لكن دون فائده فجسدها و قلبها المنهكان لم يستطيعا التوقف عن الخفقان.

اريد ان اذهب الى الشرطه , اريد ان ابّلغ عن هذا الحيوان الذي يعيش بيننا, حتى لو لم اعرفه فانا اتذكر كل تفصيله في وجهه اتذكر صوته اتذكر رائحه انفاسه المقيته, استوقفتها والدتها وهي تلطم على وجهها ادخلي الى غرفتك الان لارى كيف سابلغ رجال العائله بهذه الفضيحه التي اتيت بها....فضيحه!!!

استيقظت على اهتزاز جسدها فجأه, واذ بوالدها يمسك بشعرها و يشتم و يسب و امها تدفعه عنها,و اخاها ينظر اليها بعيون يملؤهما الغضب, ابتعد عنها قليلا وقالت والدتها, احمدي الله انه رزقك اب و اخ صدراهما رحب ,متفهّمان و في قلبهما رحمه, لقد عفوا عنك و قررا  ان لا يدفناك انت و فضيحتك, لن تذكري شيء مما حصل حتى لنفسك و غدا ساخذك الى طبيب اعرفه و نخفي فضيحتك الى الابد, وستعودين الى البيت و لن تخرجي منه الا الى بيت من يعمي الله قلبه ليستر علينا او الى قبرك, وشدتها والدتها باتجاه الاب و امرتها ان تركع على يداه لتقبلهما عرفانا بكرم اخلاقه و طيبه قلبه و تفتح عقله.

اهكذا تنهون "قضيحتكم" اهكذا تكافئون الحقير بان تعفون عني و ان ترقعون فضيحتي!!!
ماذا بشأني انا؟؟؟ ماذا بشأن روحي؟؟؟ روحي التي تمزقت.... من سيرقعها لي!!!

بتصير معكم؟؟





كل مره...كل مره...كلللللللللل مره

بكون بعمل القهوه و انا بغليها بتنزل نقيطه بحجم 1\2 ملم * 1\4 ملم عالغاز
ولاني بسم الله ماشاء الله مرتبه و بحبش العوج بقول امسحها بلاش ما تخرب شياكه
 و نظافه و بياض الغاز وبلا ما تنشف... و يا دوب بمسح النقيطه
القهوه اللي نسيتها بتغلى على النار بتفور و بتفرد لعشرين متر :(

كل مرّه؟؟؟

 معقول؟؟؟ 
و ببدا بهدله بحالي و بالغاز و بالقهوه
و بتنسد نفسي و ببطل طايقه حد مما ذكر اعلاه و بنظف الغاز زي الاسد و ببطل اشرب قهوه :$


وبحكولك ليش الدكاتره بنضربو




ماما من قبل العيد وهي بتشكي من ركبتها و مع عجئه العيد و طلوع درج و نزول درج زاد الوضع, راحت عالدكتور و اعطاها مسكنات و حولها للمستشفى علشان التصوير, اخدنالها موعد يوم الثلاثاء الجاي عند دكتور العظام في المستشفى ليصوروها و يعملو اللازم, طبعا 100 ترجاي انها تقعد و ترتاح و لكن بدون فائده, الها كم يوم بتسحب رجلها سحب و ما بتقدر ترفعها و اليوم و هي بتمشي من عند الباب ما قدرت ترفع رجلها و ضربت بالعتبه, حبيبتي داخت من كتر الوجع و الحمد لله كنت جنبها, طبعا نشف دمي و صرت انادي على اخوي زي المجانين :( الحمد لله صحصحت و مشي الحال.

حكينا ما بدها هلأ بدنا نروح طوارئ عالمستشفى, دور و عجئه طبيعي و ساعه الا شوي لدخلنا على غرفة طوارئ العظام , مع ان الناس بتتجاوز الدور وما حد حاكي معها شي ضلينا قاعدين لان اللي عالاستقبال حكالنا ارتاحو و انا بنادي عليكم بالخمس مرات اللي رحت اساله فيها ايمتا دورنا.

اجا الدور و لله الحمد و قبل ما حد يفحص قررو نصور الركبه, اخدنا ماما عالتصوير و صورناها, كنت انا و اخوي مع ماما و طلبنا من بابا يروّح لانه اساسا ظهره و ركبه بوجعوه وما بقدر يمشي ولا يضل واقف بالمستشفى, برضه دور عالتصوير و لكن اكثر تنظيما, خلصنا و رجعنا لغرفة الطوارئ  اعطيناهم الصور و الممرض علقها عالجهاز الخاص بصور الاشعه و خصصولنا سرير لماما, ماما فضّلت تضلها عالكرسي المتحرك لانها مش قادره تحرك رجلها, بعد بنص ساعه و احنا بنستنى حد يجي اجا الدكتور المقيم بسالنا عن الحاله, شرحناله و فحص رجل ماما و استأذن علشان يروح  يشوف التصوير و يرجعلنا , و قبل ما يطلع بحكيلنا لسا هلأ كان دكتور العظام واقف و راح و الله اعلم ايمتا يرجع, اخوي وصفله شخص كان واقف جنب الممرض اتطلع على الصور و اتطلع على ماما و طلع من الغرفه, طلع الاخ هو الدكتور بس فضل انه يطلع من الغرفه قبل ما يفحص ماما, الدكتور المقيم حكالنا هلا بنتصل فيه و بيرجع, رجع بعد نص ساعه تانيه رجع الدكتور المقيم يحكيلنا عن الصوره و عن العلاج المتوقع لرجل ماما و لكنه مش دكتور عظام و بترك القرار للدكتور اللي حكو معه وحكالهم انه  هيو جاي, واقترح يعطي لماما ابره مسكنه لحتى يخف الوجع.


اجت الممرضه بعد نص ساعه  و اعطت ماما الابره مفيش ربع ساعه  ماما صار وجها اصفر و صارت تحكيلنا انها دايخه و حاسه حالها بدها تستفرغ, ركضت عالممرضه الاخت و بكل برود بتحكيلي اه هاي الابره بتعمل كل الاعراض دوخه و لعيان و هبوط عادي عادي, رجعت عالغرفه ماما غمضت عيونها و بطلت قادره تتحرك ولا تحكي, حملناها انا و اخوي و نيمناها عالتخت و رجعت للممرضه وين الدكتور , ال حكو معو 3 مرات و حكالهم هيو جاي , ساعتين ونص و احنا بنستنى الدكتور اللي لا ذمه ولا ضمير لانه حسب ما فهمنا ما اله شغل تاني بالمستشفى غير طوارئ العظام يعني الغرفه اللي احنا قاعدين فيها , حكيتلها عن وضع ماما للممرضه وانا نشفان دمي بتحكيلي " الحجه شكلها بتبالغ" اخوي هون اعصابه اللي ضلينا انا وماما نهدي فيها طول الساعتين فلتت منه, صار يصرخ و يبهدل قام الممرض حكاله انا ما الي دخل بس يجي الدكتور صرخ عليه بدخلت الاخ الدكتور, اخوي بلش يحكيله " كيف انت دكتور و بتتطلع على صور مريضه بالطوارئ و بتتركها و بتطلع؟" 
الدكتور و بكل وقاحه  الدنيا و بنبره مستفزه جدا  " عندك مشكله ما تحكي معي و روح اشتكي" 
اخوي بلش يصرخ ويبهدل و حكاله "اه بدي اشتكي عليك" , حكاله الدكتور " اطلع بره اشتكي و بديش حكي كتير"  
اخوي " انت واحد مش محترم و لو انك محترم كان حسيت انك بتتعامل مع بشر و مرضى وانا راح اشتكي عليك و هلأ" و كان اخوي ماشي باتجاه الدكتور خلص ضاربه لولا تدخل الممرضين و باقي الدكاتره, اجا دكتور عظام تاني اخد اخوي يهديه و بعدين اجا شاف ماما و تبين انه ردّه فعل الابره غلط و هاي اول مره بصير بمرسض هيك و طلعت رجل ماما بدها جبص :(

الدكتور نفسه اخد ماما و حطلها الجبص وبدقائق كانت الوصفه مكتوبه و المواعيد محدده و الدكتور التاني اعتذر لاخوي و حكاله اذا بدك تشتكي هاد حقك بس انا عملت كل اللي بقدر عليه للوالده , اخوي حكاله انا مش جاي اقاتل انا  معي مريضه بدي اعالجها و اروح, و احنا مروحين اجا الدكتور المقيم بحكي لاخوي معك حق باللي عملته و انا لو مكانك بعمل نفس الشي, شو مريض طوارئ يستنى دكتور ساعتين و نص, و احنا دائما هالدكتور بسببلنا مشاكل مع المرضى و اهاليهم.

من ال 8 المسا لل 1 بالليل و احنا بالطوارئ....طب بالله عليكم هيك دكتور بدوش قتله تصحيله ضميره اللي مات و تذكره باليمين اللي حلفه؟؟؟

Just wondering...




!!!How to know 
!!When to go after and when to let go



انا عندي حنين و بعرف لمين




يا الله كيف الدنيا بتبعدنا و بتقربنا, كيف القريب بصير بعيد و البعيد و الغريب بصير اقربلنا من نفسنا, ما بعرف هي الدنيا القاسيه ويلا قلوبنا اللي قاسيه, بننولد بقلوب صغيره صافيه و بنبدا نحط فيها القسوه اشي عشناه و اشي اكتسبناه من اللي حوالينا, ياما حبينا ناس لان اهالينا او اللي حوالينا بحبوهم و ياما كرهنا ناس لنفس السبب.

عالمنا الافتراضي اللي قررنا نلجأله من قسوه الواقع اجمل بكتير, عرفنا على ناس رجع ثقتنا شوي باللي حوالينا, بالرغم من بعض الشوائب اللي زي الفيروسات بتدخل حياتنا و بتخرب فيها و لكنها قليله مقارنه بالواقع, الاجمل هو تقاطع  العالمين مع بعض الواقعي و الافتراضي, ناس عشتو معهم اجمل اللحظات و احلى الاوقات وبعدتكم الدنيا عن بعض و خلقت زي جفا بينكم من باب اللي بعيد عن العين بعيد عن القلب, و بالصدفه تتلاقو بهالعالم الافتراضي و بجمله بسيطه يرجعوكم لهديك الايام ولا كانه سنييين مشيت و يرسمو على وجهكم ابتسامه نابعه من القلب, ساعتها بصير عندكم حنين و بتعرفو بالزبط لمين.





ملاحظه ع الهامش
هالبوست وليد مشاعر غمرتني من تعليق لقريبه الي الي سنين ما شفتها و جديد تلاقينا عالفيسبوك و ختمت تعليقها بهالاغنيه اللي رجعتني لايام جميييييييييييييييييييييييله كتير

تعيش الحكومة



تعيش الحكومه...يعيش احمد عرابي... من سنييييييييين و احنا بنعيد هالمقطع من مسرحيه شاهد مشفش حاجه و بنحشش من الضحك عليه, من جديد بطلت اضحك على هالمصطلح, بطل اي شي وحتى لو نكته تقصد بها التسحيج للحكومه يبعث روح الفكاهه من اعماقي.


ما بين الغاء قرار تغيير التوقيت - و اللي انبسطت عليه لاني بكره التوقيت الشتوي - و بين تغيير اوقات الدوام و بين موضوع السيارات الزوجي و الفردي  و الله اعلم شو اللي جاي استوعبت الموضوع و فهمته اكتر, و كتبت هالشي تعليق على الفيسبوك, اللي فهمته ان الموضوع كله حب من الحكومه النا.... اه الحكومه لانها بتحبنا و تعتبرنا طفلها الصغير المدلل فكرت فكرت فكرت و طلعت بهالافكار الرائعه - اه رائعه علشان ما نغتال شخصيه حد - فقررو يطلعو بامور يخلونا "نتسلى" فيها بتعرفو بما انّا شعب فاضي وما في وراه ولا ديون ولا فساد ولا انتخابات ولا خاوات ولا واسطات و لا.... فاااا حبّو انهم يعطونا لعبه زغنونه نلتهي فيها لحتى امور الدنيا اللي ممكن تزعجنا  - اه تزعجنا احنا  مش احنا اللي نزعجهم - تمشي من تحت رجلينا, قصدي تمشي على عيونا, هو هوووو قصدي اممم مش مهم شو قصدي المهم انها تمشي بهدوء و سلاسه 

و زي ما لاحظتو ان حكومتنا الرشيده فاهمتنا كتير منيح و حافظتنا و حافظه ردود افعالنا, و فعلا حصل, مناقشات و حوارات و توهان و تفكير بين ايمتا بدي اوصل ولادي عالمدرسه و ايمتا بدي اروح عالشغل و ايمتا بدي اجيبهم و هالقصص, بين سياراتنا زوجي ويلا فردي و شو بدنا نجيب سيارات و شو بدنا نغير لوحات السيارات - عفكره سألت شخص عن سعر تغيير لوحه السياره طلع بكلف فوق ال 100 دينار للعلم فقط -  و التهينا و نسينا الدنيا, الدنيا مش بره الاردن لان للاسف في كتير ناس مش سائلين اساسا بس الدنيا اللي جوا البلد.


فاااا بهالمناسبه بحب احكي ....تعيش الحكومه....يعيش احمد عرابي...و محمد الكحلاويييييي...وتحيا الامه العربيه...تحيا الامه العربيه.

الملافظ سعد



صباحكم و مسائكم رضا يا رب

من وقت ما قررت ارجع عالاردن و انا حاطه في بالي عدد من التعليقات السلبيه اللي حتنحكالي من الناس و العائله تعليقا على "غربة البنت"  اللي كنت فيها, و قررت اطنش و ما اهتم و فعلا مع كل زياره ومع كل تلفون في رمي لجمله معينه, و بناء على نصيحه صديقنا ابو زينه قررت اسجلهم عندي و بعدين انزلهم بتدوينه :) و خصوصا ان العيد جاي و كلللللللللل العالم راح تشوفني خصوصي اني بحب الفلف بالعيد مع بابا وماما فااااا انتظرونا :)


التعليقات ذكرتني بتعليق  " مبدع" من قريبه النا قبل سنه تقريبا,  شافتني ببيت قرايب تانيين, هالست بشوفها بشكل دوري كل كم شهر و ببيت نفس الناس سبحان الله, هي قريبتهم اكتر ما تكون قريبتنا, المهم كنا قاعدين و اجت سلّمت علي و على ماما و بدت بالتعليق كأنها مش شايفتني من 10 سنين " ماااااا شااااااااء الله هاي بنتك؟؟؟ ما شاء الله شو حلوه  الله يخليلك اياها  شوهالحلاوه و شو هال ...الخ" ومن هالحكي اللي بشرح القلب و برفع المعنويات انا طبعا الابتسامه من الدان للدان و " شكرا خالتو....شكرا خالتو" و راسي عبّى الغرفه

و ختمت التعليق ب " مع انها وهي صغيره كانت بشعه" 
!!!!!!!!!!!!!!!!!!!!!!!!!!!!!!!!!!!!!
أن أن أأأأأأأأأأأأأأأأأأأأأأأأان
 فسسسسسسسسسسسسسسسسسسسسسسسسسس
راسي نفّس و ابتسامتي اختفت و حسيت وجهي بشع نار زي الملطوش عشر كفوف على خد واحد 

ابااااااااااااااااااااااااااااااااااااااااااااااااااااااه......الله يسامحك يا خالتوووو :(
اصلاطن بجنن وانا زغنونه :(

عن الزواج و تكاليفه




الزواج و تكاليف الزواج, التقدم لخطبة بنت و انت مش جاهز ماديا, فكره الزواج تكون مطروحه و انت مش جاهز ماديا, موضوع اله فتره محيرني و بفكر فيه, بدا بحوار مع صديق و انتقل الى موضوع جدّي بالنسبة الي لانه بخص حد بعرفه منيح.


انا من زمان, ايام الشباب يعني :) , كنت مع ان اي شب ما يفكر بموضوع الزواج طوا ما هو غير جاهز ماديا, و ليش تجيب بنت العالم تمرمرها معك اذا انت حياتك مره, و لكن بعد ما كبرت - شوي -  و خبرتي بالحياه زادت نقطتين و نص - علشان الدقه النص - تغيرت وجهة نظري.

هلأ التغير ما بعني اقمه زغيوره تكفينا  و عش العصفور يقضينا, لأ فكرتي ان الحياه صعبه صارت و ضروريات الحياه صارت تفرض ان التنين يتعاونو و يشتغلو و يصرفو عالبيت, فكره الصرف عالبيت هاي من زمان وارده من منطلق ان انت سلمتي نفسك لانسان, فاكيد انت واثقه تماما منه و اذا خايفه على الفلوس الاولى انك كنتي تخافي على حالك, الفلوس ارخض شي بتقدميه بعد ما تختاري تدخلي الشخص على حياتك.

نرجع لموضوعنا, هلأ فكره ان انت ماديا مش جاهز للزواج حاليا, شو اللي بضمن انك تكون جاهز بعد سنه او حتى سنتين؟؟؟ و بس تشوف كل اللي حواليك متزوجين و مستقرين, موظفين الحكومه اللي بياخدو ملاليييييم - اه صرت منهم هلأ - ويلا الموظفين الكبار كله فاتح بيوت, بتشد عليهم بيوم و بتفرج بيوم, فاااا انا برأيي اذا معك الحد الادنى من مستلزمات الزواج فمش غلط تطرح الموضوع و تبدأ بتنفيذه مع وضع العروس و عائلتها بالصوره ليكون الموضوع واضح من اولها, في عائلات ما بترضى اكيد و هاي حريه شخصيه و وجهة نظر حقهم يتمسكو فيها و في ناس ما عندها مشكله.

يا ريت تفيوني بوجهات نظركم عن الموضوع لاني مش عارفه شو انصح هالشخص اللي كتييييييييير بهمني , اذا ما كنتو حابين تعلقو باسمائكم بتقدرو تعلقو كمجهولين, واللي لاول مره بيجي على مدونتي و بالصدفه قرأ هالموضوع يا ريت تفيدنا و تشاركنا بوجهه نظرك

و دمتم :)

GOOD BYE

قرار السفر لدبي اخد مني تفكير عميق و طويل، فكرت بكل ناحيه و بكل تغيير، حسبت شو حخسر و شو حستفيد و بعد الاستخاره و التوكل على الله تم السفر و لله الحمد.

تجربه غنيه بكل ما فيها من صعوبات و تغييرات، الغربه و العيشه المستقله، الشغل الجديد و الناس الجداد، تعلم شي جديد تماما عن تخصصي ، تجربه مفيده و مش ندمانه عليها الحمد لله، لا انكر ان شعور وجود شغل بستناني بالاردن هون التجربه كتير و وجود اخواني شجعني عليها، لكن هاد لايمنع من قسوه بعض المراحل و صعوبه التأقلم مع بعض الامور.

الحياه بدبي جدا مريحه، في سهوله بالحياه و بعد عن تعقيدات موجوده بالاردن، بعيدا عن الناس و رأيهم و تدخلاتهم في شي بخلي الحياه سهله بعيدا عن موضوع الناحيه الماديه ﻛﻤﺎﻥ، دبي مكان لصرف الفلوس وعدم التحويش اسلوب الحياه بفرض عليك هالشي،  مهما حاولت ما بتطلع بشي، زي ما بحكو دبي فلوسها فيها، بتاخد بايد و بتعطي بالتانيه.

حققت معظم اللي كنت ناويه احققه بالغربه، البيت و السياره و الشغل و جزء من اللغه، المحادثه ممتازه و لكن الكتابه لسا بدها شوي :$
بالشغل ولله الحمد اثبتت نفسي و بعد سنه وصلني ايميل لترشيحي لترقيه و بعد امتحان تحريري و مقابله تم الموافقه  :) يا الله شو انبسطت لاني شفت نتيجه شغلي و تعبي، بالشغل بالعاده الموظف ببعت يطلب يتقدم للامتحان و في موظفين الهم اربع و خمس سنين لسا ما ترقو و انا وصلني ايميل لاتقدم :) الحمد لله.

فرحتي باﻻستقرار و الترقيه ضلت ناقصه بسبب عدم تأقلمي على موضوع البعد عن الاهل، موضوع اني ببلد وماما ببلد ما زبط و خلى شعور غريب متل قبضه القلب مرافقني من اول يوم وصلت دبي، توقعت ان مع المده و الزيارات و الاتصالات يقل هالوجع، لكنه بالعكس كل ماله بزيد، مهما طولت او قصرت الاجازه الوجع ملازم و بالعكس بزيد.

لذلك تم اخذ القرار و البدء بالتنفيذ، بيع السياره، تقديم الاستقاله و اتمام شهر الانذار، بيع العفش و تسليم البيت، وووووووووو الرجوع الى ارض الوطن نهائيا :)

فاااااااااا يوم السبت وفي تمام الساعه الخامسه و الربع عصرا نور الاردن اللي منور باهلها زاد نقطتين و وصلت  الى ارض الوطن سالمه غانمه :) اي نعم مكنتش نايمه منيح و وقت الهبوط هبط ضغطي و دخت و اللي جنبي خف عقله المسكين لما صرت اتنفس بصوت عالي لاتحكم بحالي و مسكت كيس تحسبا لاي قرار مفاجأ لارجاع الوجبه للجماعه :$  لكن مشيت على خير

باي باي دبي و ويلكم تو جوردان :)

Published with Blogger-droid v2.0.6

طفلي الكبير






لم تستطع النوم من شده الغضب, انه اليوم الثالث منذ خصامهما, كل مره تتنازل و ترضى و تتقبل ولكن ليس هذه المره, كرامتها لا ولن  تسمح لها ان تتنازل, ستستمر في صمتها حتى يبدأ هو بالكلام, قرأت فيما مضى  في موقع الكتروني ان علاج الصمت مع الاطفال كعقاب على ارتكاب الاخطاء اكثر تأثيرا من الصراخ.

تعلم انه تعدى الاربعين ولكنه ما زال يتعامل كالطفل العنيد, و يبدو ان العلاج يسير على الطريق الصحيح ولكن لا يلزم الا الصبر, صحيح انه يبدي عدم اكتراثه و انه لا يشعر بانها منزعجه و بان هناك توتر بينهما و لكنها  متأكدة انه  سينزعج و يتكلم و يعترف بخطأه.

شعرت بيده تتحسس مكانها على السرير, ضحكت في سرها فعلى ما يبدو التأثير قد بدأ, ها هو سيبدأ بالكلام, التفت اليها و قال لها بصوته النائم و بعيون شبه مغلقة..." اذا بدك تتغطي بكل الحرام قومي هاتيلي اشي اتغطى فيه" !!! 


لم تتمالك نفسها انفجرت ضاحكه , فتح عيناه مستغربا, القت بجزء من الغطاء عليه وقالت له " نم...نم يا طفلي الكبير"

اكتشافات تدوينيه




الي كم يوم عم بقرأ البوستات القديمه في مدونتي من سنه و سنتين و اكتشفت اشياء كتيره

اكتشفت ان في اصدقاء كتير النا في عالم التدوين - مدونين و معلقين - اختفو بدون ما انتبه, من التعليقات حاولت افتح اكتر من مدونه و كلهم بتطلعلي صفحه "الوضع غير متاح"....بعتذر  اني ما انتبهت و اني ما سألت, و بتمنى انهم يكونو بالف خير و بطمع اكتر بالتمني بانهم لسى متابعين  و فكرة الرجوع للتدوين خاطرتلهم و  بنصحهم  و بشجعهم انهم يرجعو


اكتشفت اني كاينه كتيره حكي بس ربنا الله في تدوينات قرأتها مرة و مرتين و تلاته و انا مش مستوعبه اني حكيت كل هالحكي و كتبت كل هالكلام....الله اكبر شو خليتي مخبى :$

اكتشفت اني لازم اشكر الله على نعمته باني اندليت على التدوين, في ذكريات و مواقف و احداث مهمه صارت معي ناسيتها تماما و لولا البوست كان ما تذكرتها

اكتشفت تعليقات من غير معرفين جد بتخوف و بتحير :$ اشي انا راده عليه بكل لطف و ذوق وهو عدائي جدا و اشي مش راده عليه اساسا بس ناشرته 

اكتشفت ان انا و هيثم كاينين اصدقاء و هيثم ما كان عنده اللؤم التعليقي زمان....قمه الادب و الاخلاق التعليقات و الردود و هو يحكيلي شكرا عالموضوع و انا احكيله شكرا على التعليق ...لاااا اصدقاء اصدقاء ما شاء الله :)

اكتشفت اني موهوبه....اه اه بدي ارفع من معنوياتي ...انصدمت في بعض التدوينات من طريقه كتابتي...جد يا جماعه في الي تدوينات خطيره و معبره .... و برضه قرأتها و قرأت التعليقات و استغربت ان عندي هالقدره على الكتابه وانا مش حاسه


واكتشفت اني مابين اخر سنتين انتثقلت من مود اللطافه و خفة الدم التلقائيه  - اه برضو تواضع- الى قمه النكد و الكئابه :$ جد الله يعينكم علي شو كاينه مواضيعي متلونه باللون الرمادي , من السرد التلقائي اللطيف الى الكتابه الجامده الخانقه

اكتشفت انكم -اللي لسا بتنوروني - رائعين و اصدقاء حقيقيين, تعليقاتكم و متابعتكم و تشجيعكم و وجودكم بحد ذاته نعمه من رب العالمين


ومن موقعي هذا اعلن نيتي على العوده الى المسار الصحيح - على سيره العوده اكتشفت برضه اني مقرره هالقرار خمس ست مرات من قبل و كل مره ارجع  للنكد و الغيبه - المهم خلينا باليوم و مع فرحه العد التنازلي اللي انا فيها فاااااا ان شاء الله حرجع انا بالواقع لحتى ينعكس الموضوع على مدونتي و مواضيعي اللي حكتب عنها


و دمتم

اهواك بلا امل





لاا ما بدي احكي عن اغنيه ام كلثوم, بدي احكي عن اسم من الاسماء المستعاره المنتشره على النت, لصمتي حكمه, توتو تتكلم والعالم تتألم - جربوها موجوده عالفيس بوك :$, صمتي شموخي, فوفو الوحيد O_o 

اللي بدي احكي عنها اليوم اهواك بلا امل, قبل فتره اجاني طلب اضافه من شخص بشتغل معي بشغلي القديم, انا بصراحه مش ضايفه عالاكاونت الا شخص واحد من الشغل و اللي متأكده منه و من طريقه تفكيره, شخص طبيعي مش مثل الامراض النفسيه اللي عنّا بالشغل , المهم فتح الاكاونت تبعه لقيت كم من صاحبه الي برضه ضايفينه و بيّن كم بوست عنده, الشب متزوج و عنده ماشاء الله 4 اولاد, كتاباته عشق وغرام , عادي حر الشب يكتب اللي بدو اياه و يحط  اللي بدو اياه عالاكاونت, في وحده باسم اهواك بلا امل معلقه على كل بوست حب و غرم بطريقه بتحسس الواحد ان الكلام الها, و بس فتحت الاكاونت شفت ان في بينا صديقات مشتركين, بيني وبينكم فضولي اللطيف بدا يتحرك شمال ويمين بس انا هدّئت من روعه و سكتّه على مضض

من ضمن الليموجود بصفحته فيديو لاغنيه اجنبيه, صاحبتي معلقه انها كتييييير بتحب هالاغنيه و شكرته انه حاططها,وباقي التعليقات لشباب برضه بشكروه عالاغنيه مع تلميحات غريبه,  انا بيني و بينكم ثقافتي بالاغاني الاجنبي  محدوده جدا كم اغنيه قديمه من اخواني الكبار و كم من اغنيه جديده من اخوي الصغير وكم اغنيه من الافلام اللي حضرتها, شغلت الفيديو لاشوف شو ذوق صاحبتي طلعت الاغنيه محطوطه على صور اشي بخزي, اتصلت بصاحبتي فورا بدي احكيلها تشيل تعليقها لاني بعرفها مش من الاوبن مايندد اشي شبهي تقريبا, انصدمت و بتحكيلي انها ما حضرت الفيديو بس بتعرف الاغنيه و بتحبها, ومن هون و من هون وصلنا الى ...."اهواك بلا امل" :)

بتحكيلي عن اخر الاخبار بالشغل و القصص و اذذذذذذذذذ الاخت اهواك بلا امل موظفه عنا بالشغل, متزوجه و عندها 3 بنات, بحكي لصاحبتي  يعني ليش الهبل و هالشبهه اللي حطت حالها فيها, بتقلي اي شبهه, التنين بحبو بعض :$ نعم يا ماماااااا حبو برص منه الها, طلعت هاي اخر موضه حاليا بالشغل ,3 من الموظفات و الموظفين المتزوجين عايشين حالات حب و هيام, بقضو الدوام مع بعض و بالبيت مسجات و مكالمات و قصص طرمه من لاخر.

يمكن انا بحكي عن الموضوع بنوع من التندر و المسخره و لكن الموضوع بهز البدن, الموضوع غير انه مقزز ومقرف و بصدم الموضوع حراااااااااااااااااااااام, خيانه فظيعه , ومش للهبله البنت لا للتنين الشب و البنت, تخيل زوجها بكون رايح يشتري كم غرض من الدكانه ويلا بشتغل بالشغل التاني اللي بعد الظهر ليجيب لقمه العيش و هي بتحكي مع "حبيبها" و تخيل الزوجه بتغدي الاولاد و بتدرسهم و بتحممهم و بتنظف و بتجلي و الاخ بحكي مع "حبيبته" و الامر و الادهى ان هالعلاقات مش بالخفى لااااا كل الموظفين بعرفو و عادي ما في خوف ما في خجل ما في حيا ما في دين!!!!!

 كيف بتوصل اخلاقنا لهالمستوى من الانحدار!!!  كيف بهون عليك دينك!!! كيف بهون عليكي زوجك و اوادك و اهلك !!! كيف بتهون عليك زوجتك و اولادك و اهلك!! كيف بتهون عليكم نفسكم!!! ما تحكولي هاد اخر الاختلاط بالشغل وهاد اخر شغل الست, الموضوع ما اله دخل, مهينا بنشتغل و اكيد في كتير من بنات العيله بشتغلو اذا مش زوجتك او والدتك او اختك, بتتوقع هالشي بطلع من وحده فيهم, الموضوع مش شغل البنت الموضوع انحدار الاخلاق , الموضوع الفراغ النفسي اللي بخلي امثال هالعالم  يعبوه بالهبل, الموضوع قلّه وعي ديني و اخلاقي.


ملاحظه ع الهامش

بعرف ان الاغنيه لفيروز بس حبيت احرئصكم من اول البوست لاخره وانتو نفسكم تعلقو لتحكولي انها لفيروز  :)

قلوب حائره





جلست بجانبه في السياره, و كعادتهما في الفتره الاخير يمضي الطريق بدون اي كلام, هو ينظر امامه وهو مرتكي على بابه, وهي تنظر من الزجاج الجانبي و كأنها تريد ان تخرج منه, يا الهي متى بدأنا نكره احدنا الاخر, متى بدأنا لا نطيق الحديث, اذكر في اول ايام الزواج كنّا نتمنى ان نقتني بيك اب حتى لا يفرق بيننا اي شيء, وكم شكرنا ربنا على نعمه السيارات ذات الغيار الاتوماتيكي  لتبقى يدانا مترافقتان طوال الطريق, كنّا لا نتوقف عن الحديث ابدا, وفي بعض الاحيان كنّا نضحك من انتقالنا من موضوع الى موضوع بسرعه صاروخيه.


عندما كان يمشي بجانبي وليس امامي بخطوات كأنه يتمنى ان لا يلمح حتى خيالي بجانبه, كنّا لا نجلس الا على نفس الكنبه, وكم كان يكره فتره الصيف لانني لا احب المراوح و المكيفات, فقد كان يضطر ان يطفئها او يوجهها الى مكان اخر من الغرفه حتى يتسنى لي الجلوس بجانبه, الان وحتى في بدايات الخريف المروحه لا تنطفئ ابدا حتى في اوقات تناول الطعام, مما اضطرني الى الجلوس في الطرف الاخر من المائده.

"يا الهي....ايمقتني الى هذه الدرجه"

نظر اليها وهي قادمه نحو السياره, قال لنفسه مهما مرت الايام و السنين تبقين جميله كاول يوم قابلتك فيه, جلست بجانبه بدون اي كلمه, استغرب من صمتها و وعد نفسه ان لا يتكلم معها, يعلم انها تعبه و مرهقه فلم لا يمنحها فتره الطريق الهدوء اللازم لروحها حتى تنتعش من جديد, منذ زمن و هو لم يراها تضحك مثل السابق, كل يوم اقرر ان افعل شيء لاجلها و لكن مشاغل الحياه وارتباطاتها تنسيني, اذكر اول مره رأيتها بها, لم اتمالك نفسي عن سؤال اختي عنها وعن ظروفها و كم اسعدني علمي بانها غير مرتبطه, لا ادري اهي الارواح ام ماذا ولكنني اكاد اقسم انني عندما رأيتها علمت انها ستكون زوجتي.

نظرت اليه في طرف عينها رأته وكأنه في دنيا اخرى, " انا متأكده انه يتمنى ان يكون مع احد اخر غيري الان" اذكر عندما كنت اسأله بماذا تفكر حبيبي, كان يقول لي افكر بمستقبلي معك حبيبتي, افكر بنا ونحن عجوزان يتكأن على بعضهما يحملان حقيبتا  ادويتهما و يجلسان بجانب البحر يحتسيان القهوه, حبيبتي!!!! منذ مده  لم اشعر بها هذه الكلمه, منذ.... حتى انني لا اتذكر متى اخر مره قالها لي.


ادار المذياع حتى يقطع حدّه الصمت الذي يعم السياره, فاذا بها اغنيتها المفضله, تذكر انها قالت له انها اصبحت تكره هذه الاغنيه لانها تذكرها بابنه عمته التي اصرت ان ترقص معهما يوم عرسهما عليها حتى تغيضها لانها سلبت منها ابن خالها و حبيبها, ادار  المسجل بسرعه حتى لا يعكر صفو راحتها, و تنهد بعد تذكر يوم زفافهم, عندما رأها بثوب العرس و كأنها ملاك يسير امامه, كان يتمنى ان لا احد يراها غيره.

حتى انه لا يريد سماع الشيء الوحيد الذي جمعنا , و كأن النار تخرج من قلبه من شدّه كرهه وندمه على الارتباط بي, كم حاولت ارجاعه و اعاده قلبه الي و لكن دون فائده, لا ادري حقا متى خسرته ومتى فقدته, حاولت بشتى الطرق , لمّحت له واعطيته بداية الخيط ولكن عبثا ان يتتبع اي تلميح او اي خيط, انه يمقتني لا محال


اوقف السياره امام المنزل, نظر اليها حتى يخبرها انهم وصلو خوفا منه ان تكون قد نامت حيث انه لم يرى وجهها طوال الطريق, نظرت اليه, قال لها وصلنا و قال في سرّه "احبك" قالت له حسنا وقالت في سرّها " احبك"

مجرد سؤال!!



كيف بقدر الانسان يكون اناني بدون ما يحس؟؟ كيف بقدر يفكر بس بنفسه و ينسى مشاعر و حياه الناس التانيين؟؟؟ مرات بفكر و بتختلط الامور عندي....معقول همه الصح وانا الغلط؟؟؟ معقول ان اللي بعاني منه حساسيه زايده؟؟؟ معقول لازم اتعامل مع الناس من منظوري الشخصي للعلاقه بغض النظر كيف همه بفكرو؟؟؟ معقول العلاقات لا تبنى الا على المصالح الشخصيه؟؟؟ معقول العلاقات و المشاعر المصاحبه للعلاقه تتغير بتغير الزمان والمكان؟؟؟ تتغير بتغير الفائده من هالعلاقه؟؟؟
معقول مشاعر البشر عباره عن ازرار وريموت تحكم, الغي هالانسان ضيف هالانسان, كأنا قنوات بنحضر منا فيلم و بعدين بننسى هالقناه لحتى يجي يوم وما نلاقي شي تاني عاجبنا فبنرجع نفتح عليها, بنحدد علاقتنا ومتى يمكن نتواصل مع الشخص حسب المزاج, جاي ابالي اضحك يلا بحكي مع فلان, جاي ابالي احكي و اتفلسف يلا بتواصل مع فلان؟؟ بغض النظر شو مشاعر فلان بهاللحظه, هالعالم بفكرو  باقي البشر بس بستنو اشاراتهم وحياتهم واقفه.

لهدرجه صرنا انانيين حتى باغلى و ارخص شيء بنملكه.....بمشاعرنا؟؟؟

The Beautiful Blogger Award


مسائكم و صباحكم و كل اوقاتكم هنا و رضا يا رب
يعني الكسل صايب كل خلايا دماغي هالفتره, مش معقول وضعي بالمره, يعني انا ويسبر محبّة التاج يجيني تاجين تنين وما اعملهم!! شو بتقول واجبين!!! همه مش واجبين همه واجب و جائزه  بس لاخدها بيجي معها شوية اسئله على الهامش, فااااا بما اني قررت اعملهم فقررت ادمجهم سوا سوا بما انه فيهم جزء مشترك الا وهو معلومات عني



شكرا للصديقين الرائعين   GG   و الصديق جراد  على الترشيح

المفروض اني احط صوره الجائزه و اشكر اللي رشحني و اذكر 7 اشياء عن نفسي و ارشّح 7 مدونين
و الواجب التاني المفروض احكي 11 شي عن نفسي و اجاوب على 11 سؤال  من المدونه اللي رشحتني و ارشح 11 شخص و اعلق على مدونات اللي رشحتهم.....فااااااااااااا هيا بنا نلعب و بما اني بحب رقم  8 فراح اغير الارقام كلها الى 8 :)
1-      بعد الغربة اكتشفت اني بحب مناقيش الزعتر و الزيت كتيييييييييييييييييييييييييييير.
2-      بحب الافلام و حضرت افلام السنه عن 34 سنه مضيو, لا محدوديه للانترنت و هات تنزيل افلام :)





3-      لهلأ مافي غطاية قلم حبر بتسلم مني, وانا صغيره كنت اعضعضهم هلأ بضلي اطعوجهم :$
4-      بحب البحر و ما بشبع منه لا بالنهار ولا بالليل و لو بصحلي اضلي قاعده قدامه ساعات ما عندي اي مانع
5-     بعد تعاملي مع ناس من جنسيات مختلفه تعلمت اني ما احكم عالناس الا بس اتعامل معها و اهم شي بالانسان اخلاقه لانها  هي اللي راح تتعامل معها
6-      بحب التصوير كتير, بصور كل شي و اي شي الا نفسي, موبايلي و اللاب توب مليانين صور و لا صورة فيهم الي 
7-      انا افشل انسانه بالبيع و الشرا و لولا ربنا بيسرلي ناس براعو ربنا كان اكلت هوا رسمي
8-      حبيت حياة الاستقلاليه و الاعتماد عالنفس بالرغم من صعوبة بعض نواحيها, فكرة انك تكون ملك نفسك وصاحب القرار جميله جدا
9- نفسي اعرف مين اللي بحط ممل على معظم البوستات مؤخرا.....اه 9 مش 8 هلأ تزكرت هالنقطه و حبيت اضيفها 

    نيجي للاسئله واللي حختار 8 منهم 

1-      شو اكتر هواية بتفضليها؟
     السباحه, مع اني من سنتين تقريبا ما سبحت ولكنب بعشق السباحه واللي تعلمتها من وانا عمري 5 سنوات

2-      ايش نفسك تتعلمي؟؟
      نفسي اتعلم لغة جديده , و هالشي ناوية تطبيقه قريبا ان شاء الله

3-      شو اول شي بتعمليه بس تصحي من النوم؟
      بعد التغسيل و تفرشي الاسنان عالمطبخ لعمل كورن فلكس و مج من الحجم العائلي نسكافيه

4-      هل بتحكي مع حالك ؟؟؟ 
    نعم و مؤخرا زادت الحاله :)

5-      بتحب القراءه؟؟ اذا اه شو نوعية الكتب اللي بتحب تقرأها؟؟
     بعشق القراءه بالرغم اني بعيده الي سنه, بحب  الروايات و القصص العالميه, بحب الكتب السلسه بدون اي رمزيه.


6-      هل عندك موقع الكتروني مفضل بتحبي تشاركي فيه اصدقائك؟؟؟
      موقع دررسنيّه من يوم ما تعرفت عليه من صديقنا جراد و هو مرجعي في امور كتير

7-      شو اكتر شي بتكرهي تنظيفه؟؟
       بكره تنظيف الخلاط :$ زوايا و مثلثات و شفرات و قصص, و لازم يتنظف منيح ومن كل الزوايا  لحتى نضمن انه صالح للاستخدام المره الجاي

8-      شو اكتر موقع الكتروني بتزوريه؟؟
     الفتره الماضيه الفيسبوك هو الموقع الاول اللي بفتحه و اللي بياخد معظم وقت القعده عالنت
     
ا  اختاري 6  اصدقاء للجائزه و\ او  ليعملو التاج

1-      نورا....اللي غايبه عنّا الها مده
2-      سوزان...بعرف ان الدراسة والبيت والشغل ماخدين كل وقتك بس برضه اشتقنالك 
3-      سوسو... نفس سوزان الدراسه و الشغل و البيت و برضه اشتقتالك
4-      هديل....عروستنا الحلوه 
5-      ام عمر... لانك بتكرهيني و ليختفي البوست اللي كتبتيلي اياه من مدونتك 
6-   ايكوسان...كوز...ابوقرعه...لاني ما عملت الواجب اللي اعطيتني اياه