Things I Like To Whisper About

Would You Hear Me Whispering

ملكة الحفله


اول عرس بوعى عليه بحياتي كان عرس خال بنت عمي , مرة عمو من شرق اسيا و الشب بكون  ابن عمها و اخوها بالرضاعه, خليط ما بين شرق اسيوي و شركسي :$ ما علينا المهم...انا اول ما خطب عمو مرة عمي الكل بسأل مين بتشبه يحكولهم بتشبهني , وقتها كان عمري سنه و سبحان الله عيوني جايين على صيني, ولهلأ اللي بشوفني اول ما اصحى وخاصه اذا شوي منفخين الجفون يااااا حبيبي, ويلكم تو جوردان, ما تفهموني غلط, انا بحب هالصفه في حالي و بموووت بالشكل الصيني المهم نرجع للعرس.



العرس كان بمكان مفتوح برة وعلى بركة و العروس كانت من نفس جنسية العريس وكانت بتجنن ما شاء الله, وانا وكأي بنت اردنية بعمر سبع سنوات طبعا كنت قد مارست جميع الحيل المقبولة والغير مقبولة لاقنع ماما تشتريلي فستان عروس وملحقاته على ذوقي ,بدور و ببرق و برعد وكل هالقصص موجوده فيه, و لكن كان شرط ماما ما اطلع من البيت لابسته -علشان الفضيحه ما تكون من البيت - و في حال بنت عمي لبست فستان حفله او كان في بنات لابسين فساتين عرس بلبسه,واني البس فستان عادي للعرس... وبما ان الفستان المقترح  كان برضه  اول الفساتين اللي شاركت بتنقايته  فااااا وافقت.

طبعا بنت عمي لبست فستان العرس و اللي كانت اصغر مني و كانت وما زالت اطول مني  بس وانا صغيرة كنت قصيرة بزياده وكنت – ركزولي على كنت- نحيفه نحيفه  عظمه  فاااا كنت مبينه اشي زغنون حتى لو 7 سنين

المهم اول ما وصلت مارست انا وبنت عمي هواية النق لحتى لبسونا الفساتين, طلعت من الحمام – واللي غرفة العمليات للتغيير و تجديد الميك اب وهالقصص, بنت عمي امها حطتلها ميك اب وانا لأ بما ان هاد من الاشياء القليله اللي بتدخل فيها بابا و بياخد فيها قرار في تربايتي....ممنوع منعا باتا احط اي نوع من انواع الميك اب ... مو كتير فرق عندي بما اني اولا حاطه تاج و شعري مفرود وبنت عمي ما في تاج وشعرها مربوط...وثانيا فستاني بدور اكتر من فستانها فاااا حسيت بالتفوق على الميك اب بهالميزات.

العريس بعزف عالجيتار وقام عزف وغنى للعروس وبرضه هاد شي جديد و كنت اول مره بسمع اغنيه "يا ريت فيي خبيها" و من وقتها وقعت بغرام هالاغنيه, كنت حاسه حالي متألقة و جد جد يمكن حاسه حالي احلى من العروس...ما وصلت فيي اني اقلق زي بنت صاحبتي عمرها 10 سنين واللي كانت لابسه فستان ابيض وحاطه طرحه وكانت حامله هم وسألتها امها شو مالك, حكتلها خايفة يفكروني انا العروس هههههه ... بس برضه كنت حاسه حالي ملكه الحفله وبطير ومتألقة.



ما قعدت يومها وحتى لما ماما غيرتلي الفستان ورجعت لبستني فستاني العادي و بدو اهل والدة العريس يرقصو شركسي و انا اللي اول مرة بشوف هالرقصه, ركزت و ميزت رقص البنات عن الشباب و اعطيتها...عادي مين احسن مني و قعدت ارقص زيهم و الف و ادور بالقاعه و اشبر واعمل حركات و كأني في عالم تاني وحاسه ان كل القاعه عتمه وبس ضو علي انا, ما كان في بالي الف نظر ولا اني اكون محور اي شي, كنت طفله على طبيعتي بدون تقييد, انا ذاكرتي مش كتير قوية...او بالمرة مو قويه و بتذكر لمحات عن طفولتي بدون تفاصيل التفاصيل ولكن هالعرس بتذكر كل دقيقه فيه .



الحلو ان بعد شهر من العرس اجت مرت عمي بتضحك وبتحكيلنا انهم لما حضرو شريط العرس نص التصوير كان الي و المصور كان مستلطفني ومستنغشني و مفكرني من العيله ومركز علي بالتصوير ههههههه و فهمت شو الضو اللي كنت متخيلته علي...طلع جد , اضاءة الكاميرا كانت ملاحقتني

 و لهلأ بس اشوف العريس بالمناسبات والاعياد تلقائي بنصير نضحك  :)

عن الزواج...




الزواج مش بس حب واعجاب و تنين لقو بعض

 وحبو بعضن تركو بعضن

الزواج يعني اشياء جديده يعني اشخاص جداد بدخلو عالحياه

يعني اخوه واخته وامها وابوها...يعني ريحه بيت و اسلوب حياه و طبخات وبتحب الباميه وبكره القلوبه

يعني كم مرة بفرشي سنانه كيف بتاكل كيف بعلك كيف ابوه بتعامل معه كيف امها بتتعامل معها

يعني ساعات سهر و ونوم وفيقه وبتحب النوم وبحب يشوف الشروق

بتحب القهوة وبكره ريحتها...يعني  بتحب المكياج و بكره المناكير

يعني ابوها اهم شخص بحياتها امه اهم شخص بحياته

ابوه بحب ابوها امها بتكره امه



بالمختصر .... انا لا مع ولا ضد اي شي من اللي الفوق



انا مع انكم ما تتوقعو او تستنو انكم تغيرو بعض وراح يضل اللي هلأ شايفنه بالحلو والبشع



و انا ضد انكم راح تاخدو بعض بس...ما راح تاخدو عود من الحزمه....راح تحملو الحزمه بكل من فيها



لو التنين اقتنعو بهالشي ومشيو بالزواج بهالقناعه مشاكل حياتهم حتقل بنسبه 75% وبتبقى ال 25% ملح الحياه بس :)

عمري 38 ...




بحب اعمل دنبه بنص راسي و امشي بالبيت...بحب اسشور شعري واضل اقيس اواعيي...وزني اقل من وزني وانا بالعشرين...نفسيتي احلى من نفسيتي وانا بالعشرين...وفي ناس بحكولي اني احلى من وقت العشرين...مع اني بحس حالي نفسي وبكرههم هدول الناس...بس عالقليله من وجهة نظرهم حكو شي منيح.
بحب بس تخلص الطحينيه  ويضل الشي اليابس بقاع العلبه اخد العلبه واحط فيها معلقتين سكر واجيب معلقه واكل من العلبه ....كتير زاكي...بحب اكل خلطه الكيك ني ...بحب الذرة بكل اشكالها...بحب المراجيح والسحاسيل...بعشق السباحه...بعشق البحر والغروب
مرة وحده شفت الشروق بحياتي...بحب يكون عندي فلوس بس راضيه  برزقتي والحمد لله.

حبي ماما وقلبي ماما وعمري ماما وبعدين بيجو كل الناس من وراها باختلاف معزتهم بقلبي...بحب الهدايا مهما كانت وشو ما كانت...بحب التسوق وبحب اكتر اشتري كحاويش ابو كل شي بدينار و بنص دينار وبطلع شاريه ب 40 دينار وانا بضحك
اول ما اوصل البيت ببدا اقيس اللي اشتريته و بفرد الكحاويش وبتطلع عليهم وانا سعيده...سعيده من قلبي.
بس ان اشياء بسيطه بتفرحني ما بيعني ان عقلي كبير و بتفهم وبستوعب...مرات بكون هيك...ومرات بكون عقلي صغير و بزعل و ببوز وبتدايق...بس قلبي كبير وبيرضى بسرعه..ومرات بكون هبول و براضي اللي زعلني لاني اقتننعت بالحجج اللي اعطيته اياها في بالي

قلبي مسكين داق كتير...مو حب وهاللخبطه...لا بس داق وانكسر و عملت حالي داويته...ببين قويه وانا من جوا هشه...بس حياتنا و واقعنا و مجتمعنا بدو تكون الوحده قويه...ونفس هالمجتمع بدو اياكي تكوني مهيضه الجناح...حسب المزاج

المهم شو بدكم بطول السيرة... انا عمري 38 وبحب اعمل دنبه بنص راسي وامشي بالبيت

انفصام في انفصام






بعد تفكير تمحيص بالمقارنه بين جيلنا و الجيل الجديد لقيت الفرق الكبير هو مش بطريقة التربية ولكن بطريقة التعبير 
يعني الطفل هلا بحكيلك بدي وما بدي مع شرح مفصل لشعورة بدون اي صعوبة 
بحكيلك انك مدايقه بتصرف معين بكل براءة و وضوح وبستخدم جمل صحيحه بدون تنسيق ولا اعادة صياغه، بعبر عن مشاعرة بسهولة متناهية بتستوقفك وبتخليك تعيد التفكير باللي عملته وقد تصل فيك انك تعتذرله بشكل واضح وصريح وقد توصل انك تبررله فعلتك وردة فعلك 

جيلنا تربى عالخوف، التعبير عن اي شي غير الفرح والرضا كان ممنوع، انك لا سمح الله تعبر عن حزنك او زعلك ممنوع وبالعكس حتى وانت زعلان لازم تكون زعلان و وجهك مفرود في حاله انسمحلك ما تبتسم 
وحتى التعبير عن الفرح لازم يكون بالدرجه والطريقه اللي الاهل بلاقوها مناسبه والا بتكون ما بتستاهل اللي انعملك واللي هو بكون اساسا حقك الطبيعي، طبيعي اتطعميني وطبيعي تشتريلي اواعي العيد وطبيعي تدرسني... 
كل هالمقدمه ليش!!!!  علشان اوصل لعلاقات جيلنا مع بعضه، طبيعي بعد اللي بنواجهه من كبت للمشاعر وعدم قدرة عالتعبير يصير عنا انفصام، بنحب اهلنا وبنقدرهم و بنحترمهم و بنقدر تعبهم ولكن بدون القدرة او الحريه بالتعبير عن هالمشاعر 
بعدين بنيجي نكون عائله جديده فاااا بنحط تنين منفصمين كل واحد منفصم بطريقه خاصه وبنجمعهم مع بعض، ردود الفعل على هالانفصام قد تكون ايجابيه وقد تكون سلبيه. 
ايجابيه بحيث انا استوعبنا مشكلتنا واعترفنا فيها وصلحنا من افعالنا و ما كررنا اللي انعمل فينا مع اولادنا وشريك حياتنا، و برضه قد يكون لهالموضوع اثار سلبيه بالمبالغه بالتفهم ليوصل الموضوع ويصير مرقه وما في حدود. 
او سلبيه بحيث انا بنتقمص دور اللي فصمنا و بنقنع حالنا انه اصلا افضل اسلوب كان وهي الطريقة الصحيحه بالتعامل وهون بنجب مفصومين يمارسو كل اللي بكرهو على الابناء و يرفضو انه يتمارس عليهم من الطرف التاني و بينتج عن هالمعادلة جيل جديد ثنائي الانفصام، ولكن الجيل الجديد زي ما حكينا فوق سبحان الله مولود معبر عن شعورة فاااااا لهيك بنحس الجيل الجديد اكبر من عمره واكبر منا احيانا، لانه ثنائي الانفصام ومعبر عن شعورة وبكل ثقه. 

ملاحظات ع الهامش
... الكاتب يعبر عن رأيه الخاص دون ضرورة اسقاط الكلام على ة سصيته واحتماليه هو انفصامها

....بدي ادون قبل مرور سنه على هجري المدونه

....في مدونه تانيه بالطريق...اللي فرمتت الجهاز ونسيت انسخها :$
....بدي ارجع اكتب واشخبط زي زمان فااااا اتحملونا

تنويه... اي تشابه بين الانفصام المكتوب اعلاه مع الانفصام الشخصي للقارئ مقصود... اقتضى التنويه