Things I Like To Whisper About

Would You Hear Me Whispering

رمضان كريييييييييييييييييييييييييييييييم





اول شي كل رمضان و انت بالف خير يا رب و ان شاء الله ربنا يتقبل منا صيامه و قيامه و يقدرنا ما نقصّر باي عباده و خصوصا المفهوم الرئيسي لشهر رمضان, ما بدنا طبايخ كتير وما بدنا نضيّع وقتنا بالطبيخ و العزايم, نزيد من نوافلنا و نزيد من دعائنا و تقربنا من ربنا و ان شاء الله ما ينتهي هالشهر الفضيل الا و ربنا مكرمنا بيعتق رقابنا اجمعينمن النار.....اللهم امين.

رمضان السنه غير بالنسبة الي, بس بدي اتفائل و ما اكتئب, هو اي نعم ما في "اهلا اهلا يا رمضان اهلا وسهلا يا رمضان" زي كل سنه , ما في بوسة ايد بابا و ماما الله يخليلي اياهم يا رب و سماع رضاهم بمناسبة اعلان رمضان, وما في صلاة تراويح بالمسجد من اول اعلان لرمضان و شوفة الجيران و الاصحاب و اصدقاء المسجد زي كل سنه, ما في قيام ليل و احياء العشر الاواخر في المسجد زي كل سنه, بس الحمد لله ربنا اكرمني بان خواني يكونو معي و ما اضل لحالي بكل ما تعنيه و تحمله الكلمه من معنى موحش :)




اشي تاني وهو انّا لازم نبدا هالشهر بصفحه جديده و قلب جديد صافييييييييييييي ابيض , لا فيه حقد و لا غل و لا كره لاي شخص بهالدنيا, و قبل ما نطلب هالشي من الناس المفروض نكون مطبقينه....فااااااااااااااا من موقعي هذا بدي اعترف ان في اشخاص بحياتي مش قادره اسامحهم :( اه الاعتراف بالذنب فضيله, في اشخاص مش قادر قلبي يسامحهم و كتير بقعد اتحاور مع نفسي ان ليش هيك وان ربنا راح يعوضني خير و يجازيني على مسامحتهم بس مش قادره :( الله يقدرني على الوصول لهالدرجه من شفافيه القلب و قوة الايمان لاقدر اسامح كل الناس.

بعيدا عن العيله اللي فوق - اه هي عيله كامله علشان تعرفو قديش قلبي اسود- فاااااااا من موقعي هذا اعلن اني مسامحه كل شخص اذاني و كل شخص استغابني و كل شخص ذكرني او ظن بي السؤ, مسامحتهم دنيا و اخره, مثلا لمّا زرت ام عمر و حكينا عن كل مدون و مدونه بالخير طبعا و على سيرة الكعك ذكرنا عمو صال صال و حكيتلها مش فاهمه هو عمو و يلا مش عمو ؟؟؟ يعني كبير؟؟؟ حكتلي اه كتير اكبر منا , بحكيلها كم يعني , بتحكيلي 34 او 35!؟!؟!؟ و انا بهديك اللحظه كنت 34 O_O فلكم ان تتخيلو مشاعيري اللي تبعثرت, كرهتها ...ليش الكزب كرهتها لفواني معدوده بس انفش قلبي بس سمعتها كم كلمه عن انو بالله عليكي و شو قصدك والله يسامحك :(, هذا على سبيل المثال لا الحصر, فااااا ام عمر...الله يسامحك :)

اشي ثالث, هلأ ظروفنا مش متشابهه في اللي ظروفه بتسمحله يصلي كل صلاه بالمسجد و اللي بتسمحله يقوم كل ليله, عفكره قيام الليل مش معناته ما ينام الواحد , قيام الليل حسب ظروف الشخص ما بين صلاة العشا لصلاة الفجر, خلينا كل واحد قد ما يقدر يحاول يقوم ولو جزء بسيط من الليل ندعي لانفسنا و ندعي لغيرنا و ندعي ربنا يفرجّها على الجميع ولا يمكن انكم تتخيلو قوّة الدعاء و اثره على حياتنا, لانه حتى لو ما صار الشي اللي بندعي اله عالقليله بنعرف ان ربنا الذي لا يرد الدعاء مخبيلنا اشي احسن و ممكن اللي بندعي بحدوثه يكون بظهره خير النا و لكن باطنه سيء فربنا بتقبّل دعائنا بانه يكتبنا الخير ولكن في وقته.

كل رمضان و انتو بالف خير....سامحوني جد اي شخص اسأت اله و اكيد ما كان قصدي فبتمنى انه يسامحني و اللي حامل بقلبه علي فيبعتلي تعليق وما راح انشره و انا بعتذر منه مقدما :) .....و لا تنسوني من دعائكم قبل الافطار, كتير مهمه هاي, ادعوووووللللليييي باي شي بتدعوه لانفسكم علشان ما تتغلبو بالتفكير و انا راح ادعيلكم اكيد :)

عالم غريبه



اشي كتير شفته و مر علي هون بدبي و كتير استغربته, التصريح بانك كفتاه مسلمه بتشربي و بتروحي على Night club و بتعملي علاقات كامله غير مشروعه مع الشباب و انك ما بتصلي و"اعوذ بالله " ما بتصومي - حرفيا انحكت قدامي- شي بتتفاخري بانك تذكرية بكل جلسه و شي ما بدفعك لانك تستحي على دمك, بنمشيها و بنحكي ان العالم حرّه بحالها و قحه مش وقحه مش مشكلتنا .

لكن انك تيجي وتحكيلي " الله يعينك ما بتسهري " و بتعتذري مني انك بتسهري وبتيجي تحكي عن مغامراتك وان انا قاعده بالبيت , فمن الطبيعي اني افهمك وجهة نظري فيكي و افهمك ان القعده بالبيت و عدم السهر مش الحجاب اللي بفرضه علي لا انا اللي بختاره, انا بختار اكون غاليه بنظر نفسي و نظر الناس و ان كل بنت بامكانها تبيع حالها و بامكانها تكون رخيصه بس هي اللي بتختار مكانها بالزبط و انا مكاني فوق ...فوق كتير وما حد بسترجي يتطلع علي مش اني اكون لعبته.

و بس تحكيلي اطلع معك مع باقي الشلّه, فبرضه بحكيلك اني ما بشرفني انشاف معك و لا بشرفني لقب صديقة فلانه

حوار طويل عريض مختصره ان الاخت مفكرتني "كبيره" و "يأسانه" و انو "اكيد لسا الا ما تلاقي حد يعجب فيكي بس انت تلحلحي شوي" و بعدين وصلت ل " لا تكوني معقده و متزمته و هالشي ما راح ينفعك" فاضريت احط النقط عالحروف ...المشكله انها لساتها مصرّه تضلها تحكي معي O_o

لنكتب عن....انعدام الحوار و رفض الرأي الاخر/ شهر تموز



اختلاف الرأي يفسد كل قضيّة


من واحنا صغار علمونا اهلنا ان عيب الواحد يتدخل باللي ما بعنيه, واللي بعنيه برضه بما انه عيب تضلك تسأل و عيب تناقش اللي اكبر منك, كبرنا و ضلّينا نعاني من نفس الشي لانه دائما في "الاكبر" منا....دخلنا المدرسة تعلمنا انّا ما اناقش المعلمه و لا المديره, اللي بحكوه هو الصح لانهم اعلم منّا بكل شي, , كبرنا اكتر وبكل سنه كبرنا فيها لقينا الشخص اللي بعرف بكل شي و ممنوع تناقشيه لحد ما صار عند بعضنا عقدّه خلته يصير بس يحكي يسمع صوت حاله بما انه ما حد بحب يسمع صوته, حتى مع نقاشاته مع التانيين برضه بس بسمع صوته, جزء تاني المشكله و العقده عنده تأثيرها اكبر ,صار عنده مشكلة تفسير رد اي حد بخالفه الرأي انه اهانه شخصية اله, وصار خلاف الرأي يفسد كل قضيه و بقلب الدنيا رأس على عقب.

تعلمنا نسكت و ما تعلمنا نسمع , نسكت بالغصب و مرات ما نضل مركزين سبب اسكاتنا لانّا بنسرح في عالم المناقشة مع الذات بسبب التجبر و الظلم اللي واقع علينا من كل الاتجاهات, فراحت علينا, لا تعلمنا نعرف الاسباب و لا تعودنا نسمع, و المشكله الاكبر ان اللي حوالينا برضه تعودو على صمتنا لهيد اذا لا سمح الله حاولت تحكي و لا قدّر الله انسجمت شوي و خالفتهم الرأي فراحت عليك, الكل مقتنع انه اعلم واحد و اعرف واحد, كل واحد فينا في محلل سياسي و معلق رياضي و قارئ و كاتب و راقص باليه في شخصه, فهو رأية الصواب و اي رأي تاني فهو غلط.

نوع جديد تعرّفت عليه هوّن علي كل الاصناف السابقه, هالنوع اللي بحب بس تسمعله, حتى لو كنت مؤيد للي بحكيه ما بعجبه, بدك تكون محاور صامت, بس تبدي ايماءات و اصوات ايحائية باعجابك باللي بحكيه و حتى بهاي ما تبالغ لانه برضه ما بعجبه و بعتبره نوع من انواع المقاطعه.

مش عارفه وين اساس المشكله....ان اهلنا عودونا نسكت مش نسمع؟؟؟ ويلا لانّ في كل مرحلة كان في كبير لازم ما اناقشه؟؟؟ ويلا لانّا انقمعنا صرنا نمارس نفس وسيلة القمع اللي عشنا فيها؟؟؟ويلا العيب فينا اللي سكتنا دهور لحتى صرنا بس نحكي ما حد يسمع صوتنا لانهم تعودو علينا ما نتخنفس؟؟؟

ايديك




اريد ان امسك يدك و القي نفسي في الهواء و انا متيقنه بانني في امان ولن يؤذيني شي او احد حتى نفسي
اريد ان اغمض عيناي و اسير وانا اتبع صوت خطواتك وانا مطمئنه بانني لن اسقط...
اريد ان انام قريرة العينين و احلم باجمل الاحلام متأكده بانني عندما استيقظ ستكون عيناك امامي و ابتسامتك صباحي
اريد ان امسك يدك و اسير ...اعلم انني ساشعر بانني اطير و كأن الارض لا وجود لها ففرحتي تحملني على اكفها
دائما ما تسألت لماذا الحزن يجذبنا اكثر الى الارض وكأن جاذبية العالم تمركزت تحت اقدامنا نحن وعند الفرح نفقد اي جاذبيه ونشعر بان شي ما يرفعنا الى السماء!!!
لا اريد ان افكر الان...اريد ان يتوقف الزمن للحظات لانظر الى عينيك و اغوص فيما وراءهما دون ان تنتبه
اريد....
اريدك ان تكون حقيقه لا خيال....يوما ما....ربما...وربما لا
ولكنني ما زلت اريد ان امسك يدك




______
من وحي الاغنيه :)

اذكرك...




يذكرك قلبي قبل عيناي...تذكرك روحي قبل يداي...

اذكر عندما رأيتك اول مره جالسا هناك, لا اعلم هل كنت مشغول حقا ام كنت تتظاهر بالانشغال, احساس غريب وكأنه يد خفيه امسكت بحدقتاي و ادارتهما ناحيتك, رفعت رأسك بعيون مغبشّه, نظرت الي وكأنك لا تراني و عدت الى اوراقك من جديد, منذ ذلك اليوم و منذ تلك اللحظه اصبحت قلبي.

لم نتحدث يوما زياده عن جمل بسيطه, جمل عاديه يوميه كنت استخلص منها ما يشبع غروري و يرضيني و يريح تأنيب ضميري من تلك الدقات الزائده في قلبي بمجرد مرور عبق رائحه عطرك الى انفي, انتظرت العيد اشهر حتى تأتي لتهنئني و خبئت لك افخر انواع الحلوى لاقدمها لك وحدك, تلك الحلوى التي افضلّها و اجدها الذ ما تذوقت لتوقعي بانك ستعتبرها كذلك, لم يفاجأني انك اعطيتها لابن المراسل الذي جلبه معه الى العمل تكملة لاحتفالات العيد, فهذا انت و هذا ما يعجبني فيك, لم اغضب بل سعدت بانني اعرفك اكثر منهم بل بالغت و اعتبرت نفسي اعرفك اكثر من نفسك.

اذكر ذلك اليوم الذي تغيبت فيه اسبوع عن العمل لمرض الم بي, و كم كانت رجلاي تسابق الريح يومها لارى وجهك, كم تمنيت ان ارى علامات القلق على وجهك, و قد كان, كم سعدت يومها باهتمامك و بالورود التي اشتركت انت وبقية الاصدقاء بجلبها لي و اقنعت نفسي بانك من اختارها خصيصا لي, وكم سعدت برائحه عطرك التي تركتها على يدي يومها بعد تهنئتك لي بالسلامه, شكرتك يومها ولم اكذب بانني و لحظتها فقط احسست بانني بخير.

تحديث - تم اضافة مشاركة الاصدقاء



كيكي.....
لم يكن عطرك فقط..كل ما فيك صار محبباً..صوتك.. وقع أقدمك.. شعرك المتناثر الذي غالباً ما تنسى تمشيطه.. قميصك ذو المربعات والألوان المتداخلة.. لم أكن أفضله.. لكنني صرت أحبه..

Hana...
عندما واصلت الأهتمام بي خفت منأن يظهر الخجل على وجهي ويطفح الحب من عيوني فتعلم ما أكنه لك من عشق لذلك أصبحت احاول تجاهلك لكن دون فائدة فأمامك فقط اشعر بروحي ....

مياسي...

وكانت الحياة محتملة عندما لم تكن موجودا فيها
ولكن صارت فكرة الحياة بدونك شبه خيالية أو مستحيلة ربما
ومضت أيام
ولكن غول الوقت بدأ يغتالني كما يغتال كل أنثى
وكانت كلمات تذهب وتعليقات تجيء
أمان ودعوات وشائعات وحسد

وماذا عن التلميحات؟
؟وماذا عن العلاقة الفضفاضة التي لا يبدو لها مستقبل واضح
والعلاقة التي لا تتطور يا عزيزي لا بد أنها عائدة إلى الوراء
وهكذا جاء يوم رأيت فيه الزملاء يهنئنونك ورأيت محبسا يلمع في اصبع يدك

وهكذا أدركت أخيرا أن علاقة تكتفي بالتكهنات لا تكفي لتصنع حبا ناجحا
صارت قصتي واحدة من ألف قصة في البلد
تكبر في خيال أصحابها ولكنها لا تنزل أبدا إلى أرض الواقع

ويسبر..

في ثواني عديده كنت اسبح في بحر عميق و ضاق نفسي..الا يوجد اوكسجين كفايه هنا؟؟؟ و يالصدمتي عندما اعدتني الى الحياه و وضعت لي جهاز الانعاش و مددتني بصوتك -اوكسجيني الذي اتنفسه - و قلت خجلا انه ملك لاخيك اعطاك اياه حتى تذهب الى توسعته في السوق حيث انه لا يجد الوقت الكافي للذهاب بنفسه...

ابو زينه....

قلت لنفسي : ما أسخفه من مبرّر , تذكّرت حينها تبرير أخي لوالدي عندما ضبطه مدخّنا : كنت أحملها لصديق - السيجارة

ولكن هنا تدخّل قلبي , القى برباط حريري على بصيرتي وقال لعقلي هامسا : ان التهنئات لم تكن جديّة , على الأرجح أنه صادق بما يدّعيه

ابتسمت له

كيكي...

والآن...
ماذا لو فاتتني الفرصة حقاً؟ ماذا لو تكرر ما حدث؟ وكان جاداً هذه المرة ً؟
هل سأسمح بهذا؟
ماذا علي أن أفعل؟ كيف أقول وكيف أعبر؟ ألم يشعر بي هو؟ ما السبيل كي يشعر بي؟ هل أقولها صراحة؟
لكن كيف؟
ماذا علي أن أفعل؟

ويسبر...
ولكنني لم اكن يوما من الاشخاص القادرين على التعبير عن مكنونات قلوبهم, لم اخض يوما احاديث المشاعر و القلوب, و اخاف ان يظنني واحدة من الفتيات اللواتي يتبعن قلوبهن و يغيرّن ساكنيه كما يغيّرن تسريحة شعورهن, لا ...لا ...سأرقب من بعيد لعل قلبه يسمع نبضات قلبي, سمعتهم يقولون مرّه ان للقلوب لغّة لا تفهمها الا القلوب..... ولكن اترى قلبه يسمع ؟؟؟

orangee


ودوما كنت تلك الفتاه التي ترفع شعارات رنانه كتلك التي تقول بانه على الرجــل أن يكون هو المبــادر أولا !!! ولكن ماذا لو.. ؟!! ماذا لو لم يلحظني أصلا ؟! كيف ومتى سيبــادر عندئذ ٍ ؟ هل من الممكن بانه لم يلاحظ ؟! أم أنه يتجنبني ؟
لم أكن تلك الفتاه التي تتقن حركات الفتيات الأخريات ولم يصادف أن سرت مع تلك اللواتي يتقّن فن ال... هل ذكرت فن؟؟؟ ههه نعم فهو في نظر البعض فن ودهاء أيضا !!!! ولكني لم أقتنع يوما بتلك الأساليب الأنثوية الماكره والمبالغ فيها أبدا !! لا أدري أسيحدث يوماً أن يلاحظ !!! أسينزل عن عرشه العاجيّ المرصع بالأضواء التي تعمي عيونه عني!!! فما أجمل ما لم يحدث وما أجمل الذي لن يحدث !!!


___


لا اخفيكم بان افكاري تأخذني الى نهايه غير محببه الى قلبي, لذلك لن اكمل

هنا تتشعب القصه, هنا تأتي العقده التي قد تحل وقد تنهي المشوار, قد تنتهي نهاية مأساويه كعادة واقعنا, وقد تنتهي كما نريدها نحن, كما نحب و كما نتمنى, لذا سأترك التتمه لكل شخص منكم يكتبها كما يحب, قد تنتهي بواقع متفائل و حلم رمادي لا نعلم, اتمنى من كل شخص ان يكتب جزء من المقطع التالي ويترك لباقي الاصدقاء ان يكملو الحكايه, لا اريد من احد ان يكتب النهايه, بل ينقلنا الى مكان اخر و حدث اخر من القصه , الى حبكات و حلول لتلك الحبكات .....سأفتح التعليقات لهذا اليوم حتى نقرأ ما يكتب الاصدقاء لنكمل عليه.

تصبحون على خير :)

Thanks LioneSS for the lovely day :)






من اول ما اجيت عالامارات وانا حامله هم نهاية هالاسبوع, لان هاد الاسبوع هو اول اسبوع بقضيه لحالي لان خواني التنين من غير شر مش موجودين بالبلد, كل واحد فيهم سافر لحتى يجيب زوجته من عند اهلها, وبالعاده نهاية الاسبوع بقضيه معهم فضليت كاتمه بقلبي ومش حاكيه لحد لكن الحمد لله ربنا يسرلي يومين نهاية اسبوع بجننو.

بدو بعزومة غدا يوم الجمعه من جيرانا اللي بالاردن و مقيمين بدبي , رحنا على مطعم لبناني اسمه الحلّاب اكله بشهي و قضينا وقت كتير حلو الحمد لله, والمشوار التاني و اللي كان يوم من احلى الايام اللي قضيتها هون هو الاتصال التاني و اللي كان من صديقتنا لبؤه بتعزمني فيه عالفطور يوم السبت و اللي كان اليوم ..... اليوم كان بجنن بكل ما تحمله كلمه بجنن من معنى, من زماااااااااااااااااان ما ضحكت من كل قلبي مثل اليوم, و المفروض تخلص العزومه عالفطور و اللي كان بشهّي زي ما هو واضح بالصور :)




يا دوب لبؤه بتحكيلي شو رايك تكملي اليوم معي لان PP و خواتها و صاحبتهم جايين عندي و انا ما خليتها تكمل الجمله و كنت موافقه على طول :)
رحنا تسوقنا و روّحنا عالبيت حضرنا الاشياءات الزاكيه واللي للاسف نسيت اصورها ....تبولة فرّمناها بكل دقّة و نعومه :) و لبؤة جرحت اصبعها :( و عملتلنا ازكى سلطة فواكه و انا عملت بلاك فورست و الحمد لله طلعت زاكية




قضينا وقت بجنن انا lioneSS و PP و اخواتها و صديقتهم, كتير انبسطت بتعرفي عليهم كلهم, حكينا و ضحكنا و انسجمنا....كتير مبسوطه اني اخيرا لقت حد هون مثلي و بطريقة تفكيري و عقلي بتوافق مع عقله, ان شاء الله الايام الجاي راح تكون احلى واحلى بوجودهم حوالي.

شكرا حبيبتي Lioness على كل شي....شكرا عاليوم البجنن ... وشكرا لانك استحملتي كتر حكيي لاني حكيت كتير عن الماضي و الحاضر و فشيت قلبي, شكرا انك حسستيني اني مش لحالي , شكرا انك فتحتيلي قلبك , شكرا على راحة البال و الاطمئنان اللي دخلتيه على قلبي بوجودك ....شكرا على تعريفي بصديقتنا PP على ارض الواقع ...و طبعا شكرا عالفطور و الاشياءات الزاكيه :)

ملاحظه ع الهامش

ابدا ابدا ما اخدت الصور بنيّه مقاهره اي حد ببدا اسمهم بام عمر....اطلاااااااااااااااقا مطلقا :)

اليكم ....


الى كل من تسول له نفسه او سوّلت له نفسه بترك العالم التدوين
من موقعي هذا - و هو عفكره غير عن الموقع اللي كل ما سكرت معي كنت اقرر اني اسكر البلوج و طبعا قرار لحظي بحت يكون وارتاجع عنه زي الشاطرين - اليكم انت

يمنع منعا باتا ....

التقاعد....التقاعد المبكر.... اللي بقررو يتقاعدو وبسوو انهم برتاحو... ...الاجازات....الغياب الغير مبرر و المبرر و حتى لو بانذار سابق - الا صديقنا يوسف لانه يحق له ما لا يحق لغيره على ان لا تزيد الاجازه عن اممممممم 3 ايام يلاااا احنا مناح و صديقنا يوسف بستاهل :)

اما بالنسبة للي سكرو مدوناتهم, ما في ...اه ما في و ممنوع, واللي سكروها بس مش بالاشي الحديد - ما بعرف شو اسمه - بس خلو الفترينه مبينه انو مر و شوف و تصفية نهاية الموسم و شوي شوي بنسكر بدون ما حد يحس فاااااا برضه ممنوع و الحكي الك يا نادر و اسمع يا ابو زينه....اه اه بحكي معكم بالذات.


بننشغل...بنطول...بنغيب...بتخلص المواضيع....بتتراكم المواضيع و ما بنعرف نعبّر...بنكتئب....بتسكر معنا...بننعجئ مع الدنيا...بننعجئ مع الاهل والاصدقاء
كلّه ماشي بس نبعد و نسكر و نختفي ....لأ .... نو .... نيه - بلغاري هاد - و هئه ......ممنووووووووووووووع

في اصدقاء كتير بغيبو عنا فترات طويله و بنشتقلهم بس بنعرف انهم راح يرجعو اكيد, زي ما ام عمر بتعمل و جفرا - لبنى- و جفراء - ليلى- واشرف - اللي اختصر لمدونه وحده بالاسبوع و بطل يطلطل علينا - و كعكي - اين انت يا كعكي- و فرح و هنا - اللي الها فتره مختفيه -مياسي اللي بتكتب كل شهرين مرّه - هاد تشجيع لتكتبيلنا عن اخر رحلة :) - وفاء و وايت فريدوم اللي بغيبو كتير برضه, عروستنا و لبؤتنا الغاليه اللي مش عارفين نزبط موعد نتلاقى فيه :$ و نورا - شكلي لازم اعملك تاغ لترجعيلنا - و رولى - قرابتي الغاليه اللي اشتقتلها - منمن جرّه العسل المصفى,هموسة يلا عطلت المدارس و بدنا همه تدوينيه عاليه, اورانجي اللي بتغيب و بتيجي بتنزل عشرطعش بوست و بترجع تغيب, كيكي اللي بتغيب و بتيجي بتكتب اشياء بتخلينا اسبوع نفكر, نيسانه اللي عاقبت حاله مرّه وحده و ابدعت - شكله لازم نضل نعاقبها - جعفر ولو انك حاطط بوست اليوم بس برضه بتطول كتير, صديقنا مالك مسامح لانه بالعطله ما بقصّر, و مواطنون اللي كنت ناويه انزل فيه اقصى عقوبه بس الحمد لله رجع بالاخبار الحلوه فبرضه مسامح , دكتور وحل, شايفتك بتقرأ الاسبوع الجاي اخر فرصه الك عفكره .... و الكم كمان احمد المحروق و احمد مرعي و احمد حمدان و دريمي و PP....هيني بخبركم, دراسه...شغل...ما بعرف طولتو كتير.


الكل بغيب فتره و برجع, بس البعد بعمل جفا يا جماعه فلا تطولو, لانه شوي شوي بتخف المتابعه - مثل صالح و صديقنا ثائر على سبيل المثال لا الحصر -و فجأه بتبطلو تمرو علينا بالمره و هالعالم اللي مجمعنا حلو بكل واحد فينا

شوفو هيثم مثلا - مضطره احطك مع اللي في الهم نجم- شوفو سوزان اللي صرت اعرف اخبار الاردن منها, و نورانياتي اللي جديد تعرفت عليها و جدا بستمتع باللي بتكتبه, و سمسم - عروستنا الثانيه - اللي هلأ بالاردن بين الاهل - ربنا يتمم عليكم الفرحه و الف مبروك عرس اخوكي - و رند - عروستنا الثالثه- بتضلها اتطلطل علينا , شوفو رين اللهم لا حسد, مدونتين ونازله ادراجات....بتذكرني بطفولتي التدوينيه :)

فاااااااااااااا برجع و بحكي....الكل بدو يرجع ان شاء الله, خدو وقتكم, ما راح احدد مدّه يلااا عيشو, بس الكل ..سامعين الكل بدو يرجع اوكيز؟؟؟؟؟
ايوه هيك بدي اياكم

الله يرضى عليكم و يسعدكم يا رب - اسمي الام الروحيه للمدونين و نانا ويسبر على رأي هيثم اللي عصباحو نجمه - و جمعه مباركه مقدما ولا تنسو تقرأو سورة الكهف :)


ملاحظه ع الهامش

لفيت عالمدونات مرتين فاي اسم سقط فتأكدو انه سقط سهوا و اعذروني لان تركيزي صاير صفر و سووووووووووووووووورررررررريييييييييييي مقدما :)

عالسريع




طولت الغيبه بس بصراحه كانت بتجنن بوجود مميتي و بتنويرها لدبي, للاسف 10 ايام مشيو زي غمضه عين وماما تسهلت اليوم عالاردن :( الحمد لله اللي ربنا يسر اشوفها وما تطول فتره الغيبه اكتر من هيك, ان شاء الله قريبا راجعه لاكتب عن زيارتها حبيبتي

هالفتره مشغوله بامتحانات و دورات و بشوية تنظيم للوقت و الحياه, غبت 10 ايام رجعت لقيت 82 موضوع جديد مش قارئتهم :$ نشيطين ما شاء الله عليكم, رجعت لقيت طوش و قصص, وناس مزعلين ام عمر - سلامة قلبك يا قمر - و قبلها ناس عاملين حادث - الحمد لله على السلامه- و ناس مقررين يبعدو مع اني لا اذكر اني اعطيت اي اذون بالمغادره او بتسكير اي موقع, وناس اجا عيد ميلادهم و ما فضيت اعمل شي , كل عام وانت بالف خير سوزان العمر كله يا رب, وقصه كبيره وتعليقات على مدونة صديقنا يوسف مش فاهمتها لسا , وناس بدو يشتغلو بنشر الاشاعات , مساء الخير صديقنا صالح :) -الموضوع حجه لاني اكتشفت اني ولا مره كاتبه عن مدونتك O_o

شكرا لكل اللي تذكرني و استفقدني, شكرا لتعليقاتكم و لايميلاتكم و لاتصالاتكم .... و اللي ما استفقدني فاااااااااااا الله يسامحه :)
اسفه عالتأخر بنشر التعليقات و بالرد و لكن قريبا ان شاء الله راح افضى و ارجع

بس حبيت اجي عالسريع و امسي عليكم ....
لجميع اصدقائي و صديقاتي ...اخواني و اخواتي... مسااااااااااااااكم فل و ياسمين :)