المتنقبات و المتنقبين....

المصدر

كل اثنين بروح انا و بنات خالي و بنات خالتي لدرس دين في بيت دكتوره فاضله ورائعه جدا, الدرس عالساعه 5:00, هلأ بالتوقيت الصيفي 5 مش كتير متأخر لكن بالتوقيت الشتوي فهو متأخر نسبيا و خصوصا انّا كلنا بنصلي المغرب قبل ما نطلع و بهيك وقت الترويحه بكون متأخر 8:30 او 9 , المهم بعد المداولات اتفقنا نروح كلنا بسياره وحده مع بنت خالي.

الاثنين الماضي و احنا مروحين صار معنا موقف حيرني بالبدايه بعدين فهمته, روحنا عال 9 و بالطريق وقفتنا دوريه شرطه, بنات خالي التنتين متنقبات, وحده بتسوق و التانيه قاعده جنبها, صفّت بنت خالي بتسألها اختها " اطول رخصه السياره ويلا ما في داعي" ؤدت عليها انو لأ, وصل الشرطي لشباك السياره, حكتلو بنت خالي اللي بتسوق السلام عليكم, وبنت خالي اللي جنبها طملت شوي لحتى يشوفها الشرطي و حكتله السلام عليكم, اتفرج علينا انا وبنت خالتي اللي قاعدين ورا,سألته اذا بدو الرخص حكالهم لا خلص الله معكم.

انا استغربت الموقف, انو يعني مبينين بنات بالسياره ليش الزناخه هاي و ليش يوقفنا, بتحكيلي بنت خالي لا تزعلي ولا تدايقي بالعكس انا بس يوقفونا بنبسط :$ , انا استغربت كيف بتنبسطي, بتحكيلي خليني اجاوبك بحادثه صارت معنا شخصيا.

بتحكيلي " اول يوم بعيد الاضحى كنت رايحه الصبح علشان اوزع لحمه على اهل النصيب , و فجأه وقفتني دوريه شرطه, اجا الشرطي ولاجل الصدف كنت ناسيه شنطتي كلها بالبيت, حكيتله اني ناسيه الشنطه واذا بدك بترك موبايلي عندك لاروح واجيب الرخص والبيت مش بعيد" بتحكيلنا " وانا بحكي معه في اشي ماسكه بايده كأنه بطلع فلاش, كأنه كاميرا او اشي و انا مش فاهمه, حكالي الشرطي خلص يختي الله معك بس ما تنسي الرخص مره تانيه" و بعديها بدت تحكي اختها - بنت خالي التانيه - بتحكيلنا " بنفس اليوم كان عندي مشوار لجبل الحسين صفيت سيارتي و نزلت عالمحل و انا بطريقي للمحل شفت شرطيين ماسكين ست منقبه و بجروها جر, انا انصدمت كيف هيك بعملو فيها و عيني عينك, شوي واحد من الشرطه مسك الحجاب و النقاب للست و سحبهم واذ بالست المنقبه واحد...زلمه " بتحكيلنا والله شفته وهو منقب وفكرته ست, و صحاب المحلات صارو يسبسبو و هلأ كان عنا و هلأ مشي من هون و صارو يتطلعو عبنت خالي و مبين الشك بعيونهم, حكت السلام عليكم و دخلت المحل.

و من يومها و كل ما راحو مشوار بتوقفهم دوريه شرطه و بس يحكو السلام عليكم ويتأكدو انهم بنات , بمشوهم وبنات خالي بحكو انهم مش متدايقين بالمره, بالعكس خليهم يكشفو اللي بتسترو تحت غطاء هدفه ديني وسامي ليعملو افعالهم الدنيئه, لا اخفيكم اني انصدمت, سمعت عن هالقصص كتير و سمعت بمصر شو صار و كيف صار في اعتراضات على موضوع النقاب بالازهر و بالجامعات, لكن بس تسمعي القصه من ناس مقربين الك و بهالاكشن هاد الا ما تنصدمي...

نتائج التوجيهي ...كلاكيت تاني مرّه

هالموضوع راح ارجع انشره للمره التانيه على التوالي لاني حسيته شامل كامل وما في اشي جديد اضيف عليه, وصف شامل للاحداث اللي راح تصير بكره :)

-----------------------

اول شي بتمنى للجميع النجاح في كل صباح - زي ما كنا نكتب بالتاني ب على الكتاب :)
وبما ان النتائج المسا فبتمنى للجميع الهناء في كل مساء -كنت كاتبه الحساء في كل مساء بس شكرا للمدون Mabsoo6 على اقتراحه السابق

السيناريو الطبيعي لاحداث اليوم

المفروض النتائج بتطلع عالساعه 10:30 عال 8 ببدو العالم يزمرو, انهم واصلين والهم ناسهم اللي بجيبولهم الاخبار قبل ما تنزل عالسوق.
بتطلع النتائج وببدا الطخ,عند الناجحين وعند الراسبين , وطبعا في عده انواع للطخ, نبدا بالناجحين

الطخ الفشك اللي بالسما عند الناجحين, والموجود بعمان الشرقيه والغربيه و الوسط واي مكان بدك اياه, الطخ طخ مع اختلاف نوع المسدس ولبس الطاخخ - كل ما اسمع الصوت بتزكر دعايه كانو يجيبوها عن مديريه الامن العام, بيجي شب وبكون كتفه ملفوف و بحكي "كنت قاعد بالحوش و فجأه ما حسيت غير اشي سخن على كتفي ويلا الدم بنفر نفر", فانا كل ما اسمع صوت الطخ بحكي لاهلي "كنت قاعد بالحوش" وببعد عن اي شباك بالبيت :$

وفي طخ الالعاب الناريه اللي كنا من عيد استقلال لعيد استقلال لنشوفه ونطلع كل الاردن عالسطوح علشان نشوفها,صار بسبب وغير سبب هلأ.

وفي طخ العين اللي راح تضرب الناجحين , مع كلمه مبروك بنطخ الشب او الصبيه عين بتطرحه ارضا لمده اسبوع.

وطبعا الكلمه الشهيره عند الاب " ابني" ..."بنتي"..."تربايتي"

نيجي للراسبين, الراسبين نوعين

اللي بعترفو اهاليهم بانهم راسبين, وبرضه في طخ بس بنص راسه هالمره.


و برضه في طخ الحكي, ولك يا هامل طول نهارك عالاساطيح ,ولك يا صايع ولا مسكت كتاب خلي صحابك الصيع ينفعوك, ولك فضحتينا طول نهارك من مسلسل تركي لمسلسل تركي تاني, و كل ما اتصل حد من العيله ويحكولو الاخبار المشؤومه ببدا الموشح من اول وجديد, و الكلمه اللي راح تتكرر بكل بيت من الاب للام "شايفه ابنك" ..."شايفك بنتك و تربايتك".... وبصير ولادها لحالها ساعتها.


واللي ما بعترفو بان ابنهم راسب و بطخو, و بوزعو حلو واحتفالات والمشكله ان الشب بعيش الدور و بصير يرقص و ينادي صحابه
صاحبتنا بتحكيلنا ان ابن خالها السنه الماضيه نجح و عمل حفله كبيره وعزومو كل العيله و بس صار تقديم للجامعات حكو انهم قدمولو و ما طلعلو وبدهم يسجلوه بجامعه خاصه, صاحبتي بتحكيلي كنا ندور عالنت عاسماء الناجحين فخطرلنا نشوف معدلاته, طلع الشب راسب :)


اذا اليوم حضرو حالكم, اصوات زوامير وسيارات طالين الصبايا من الشبابيك وبصرخو و الشباب فرحانه من كل قلبها مش لنجاحهم الشخصي ابدا, فرحانين بفرحه الصبايا,واللي عنده حد ناجح توجيهي واللي ما عندو طالع بالسيارات وهات يا زوامير, نوع من انواع المشاركه الوجدانيه يعني.
اصوات الالعاب الناريه - النوريه- و اصوات اطلاق العيارات الناريه- بديش استخدم كلمه الطخ للمره المليون- .

مره تانيه مبروك للناجحين وحظا اوفر في السنوات القادمه للراسبين

Home Sweet Home :)

يوم السبت الماضي و تحديدا الساعه 10:35 دقيقه رجعت سالمه الى ارض الوطن :)

الحمد لله كانت الاجازه بتجنن و ما خليت دقيقه ولا ثانيه تروح علي , كل شي زي ما بدي و اكتر و الشكر اولا لله و من ثم لاخواني و مرتاتهم و لفروووحه و عبوود

كتير اشتقت لمدونتي و لكتير من المدونات اللي بحب دائما اقرأها و للاسف ما صحلي اقرأها الفتره الماضيه, بس على ميين كله ان شاء الله راح ينقرأ, المدونات اللي كانت تفتح معي عالموبايل كنت اقرأها بس ما اعلّق مع انو في كلام كتير يكون عندي و هلأ راح الف عليهم كلهم و اقرأ اللي راح علي

اسفه كتير لتأخري بنشر و الرد على تعليقات المدونه الماضيه :$ و هلأ بس اخلص من تحميل الصور هون راح اروح و ارد

شكرا لكل اللي ضلو يتابعو مدونتي و لكل اللي زاروها بالفتره الماضيه لان العداد ببين انهم ما تركوها و غابو عنها زي ما انا غبت

بس كلّه بتعوض ان شاء الله...عندي كتير مواضيع حابه اكتب عنها و خصوصا مطارنا العزيز :(

انتظرونا و زورونابتمنى انكم تجدون ما يسركم :)

صحيح...صحيح انسيت احكيلكم مش ارجعت لقيت مديري طاير :) ان شاء الله المدير الجديد يكون منيح, هو موظف من اللي كانو معنا و اللمفروض كان يعاني متلنا من المدير, ان شاء الله ما يكون تأثير الكرسي عليه كبير و يتحول متل اللي قبله , مبدئيا كل شي ممتاز و الوضع مستتب و ضغط الشغل شوي خف عن قبل لانه توزع عالكل, بكره بدوب التلج و ببان المرج زي ما بحكو و بنشوف

و عسيرة التلج :) سمعت ان الخميس والله اعلم تلج ياااااااااااااااااااي بدنا نعطل :)))

هلأ نيجي للصور

مش متزكره شو اسم كل مكان اللي متزكرته راح اكتبه

دبي مول

كنا قاعدين بكوفي شوب مش متزكره وين بالزبط وكان هاد الفندق قدامنا اعتقد دبي مول

الممزر

دبي مول

هاد المحل فيه كل انواع الكاندي اللي ممكن تخطر ببالكم اشي زي الاحلام حسيته

بالبدايه قررنا انه بس نتفرج و بالاخر طلعنا بكيس ملياااااااااااان كاندي :)

حديقه بالعين

فيستيفال ستي ...اعتقد :$

قناة القصباء

الغروب من بلكونه اخوي الطابق 14

مسجد الشيخ زايد الله يرحمه - ابو ظبي

افكار ما الها لازمه

هلأ انا بدوّن مباشره من دبي, اجينا يوم الجمعه من العين لدبي و رحنا رحله على حديقة زعبيل, جد اشي بجنن ما شاء الله و للاسف ما اخدت صور للموقع كل الصور اللي اتصورت كان فيها حد من افراد العائله الكريمه :) ,دبي بتجنن اكتر من العين بصراحه, العين حلوه بس ما في مواقع كتيره نروح عليها, مولات صغيره بساعتين بنكون مخلصين لفلفه.

انا كتيييييييييييييييييييييييييييييييير مبسوطه ولله الحمد جد تغيير جذري, بس في افكار بتضلها تضرب , بتعرفو العقل النكد بس يضل يطلع مرات, هو مش نكد نكد بس في عند كل واحد فينا مود بطلع بالوقت الغلط, انا هالمود عم بطلع اله فتره, الموضوع ما بخص اجازتي اللي جد اخواني ما قصرو ومش مقصرين, التنين عاملين جدول زيارات و طلعات اشي بجنن, اللي بضرب اله فتره اشي لاحظته على علاقه اخواني و حتى اصحابهم مع زوجاتهم, ليش اللي بتزوجو جديد بسرعه بتفتر العلاقه بينهم ؟؟ اخوي الو متزوج 5 سنين و التاني سنتين و في الهم صحاب بعرفهم وكلنا بنطلع مع بعض من الزيارات في السنوات الماضيه, برضه اكتر شي الهم 5 سنين متزوجين., كلهم طريقه تعاملهم مع زوجاتهم اختلفت 180 درجه, في حب بس كتيييييييييييييير اخف من قبل, في تعود بطريقه غريبه و الملل واضح بشكل كبير.

انا موضوع الزواج مش خاطرلي بالمره, بس جد اشي مقلق هالظاهره :$ يعني صار في موضوع جديد يخليني افكر فيه بما يبخص الزواج ....ما بعرف انا حاسه انو كتير بكير على هالمشاعر تبين من هلأ, يعني النموذج اللي عندي هو ماما وبابا اللي ما شاء الله الهم 37 سنه متزوجين و لهلأ بشوف مظاهر الاتفاق التام بينهم, اكيد لا يخلو الموضوع من ملح الحياه زي ما بحكو بس الغالب هو الحب و الاتفاق و التعلّق الواضح بتصرفات التنين, عمري ما حسيت واحد منهم مال من التاني او نفسو يبعد عن التاني, كل شي بعملوه سوا.

انا مع زوجات اخواني اخت الهم, مش لازواجهم, وانا معهم قبل ما اعرف شو المشكله, و همه بحكولي و بشكولي من تصرفات خواني, واللي اكتشفت انهم ماخدين الجزء اللي بس بخص ملح الحياه بعلاقه بابا وماما و مش ماخدين الجزء الحلو, ليش شباب الجيل الجديد بسرعه بملو من الحياة الزوجيه؟؟ يعني اول فتره الزواج بكون كل شي تمام, و هلأ بيجي اخوي من الشغل بتغدى بحكي شوي بلعب مع ابنه او بنته و فورا عالتلفزيون او عاللاب توب و بعدها عالنوم ...

مش عارفه اذا الفكره وصلت بالزبط لانها عباره عن تصرفات و طريقه تعامل مش عارفه احولها لحكي :$ بس جد اشي بحبط يا جماعه...عاساس انو انا بعد بكره بدي اتزوج ههههههههه بحكيلكم افكار ما الها لازمه هلأ :)

نراكم على خير...هلأ بدي الف عالمدونات اللي من زمااااااان ما قرأتها و اقرأ كل اللي راح علي :)

Live from Al3ain

مساء وصباح الخير عالجميع :)

الساعة الان 10:35 دقيقه تماما في توقيت الامارات العربيه المتحده :)

انا هلأ بالامارات و تحديدا بالعين :)

وصلت الجمعه العصر و الحمد لله كل يوم كان احلى من اليوم اللي قبله

اخوي محضرلي جدول حافل , و الطقس بجنن كتييير

رحنا على ابو ظبي ورحنا على البحر

, و طبعا ما قدرت اقاوم البحر نزلت مشيت فيه و اخدت فرووحه معي كتييير انبسطنا

و بعديها غسلّنا و زبطنا امورنا ورحنا تغدينا بالمرينا مول

الجمعه ان شاء الله رايحين على دبي عند اخوي التاني

اللي راح اقعد عنده الفتره الجاي

احلى اشي بالدنيا تبعد عن الشغل و هم الشغل وخاصه بوقت يكون كتيييييييييييييييييير ضغط

مع انهم استهلكوني لاخر دقيقه :(

الاربعاء و الخميس قبل السفر كنت مريضه كتير و اخدت اجازه مرضيه

و مع اني كنت تعبانه بس انبسطت اني طلعت من جو الشغل قبل السفر

اشتقت لمدونتي و اشتقت لمدوناتكم

كتييير اشياء راحت علي بس ان شاء الله راح اقرأهم كلهم

مسائكم و نهاركم سعيد :)

نراكم

صحيح...نسيت احكيلكم اني حضرت فيلم "ِِAvatar" والفيلم بجنن

بنصح اللي لسا ما حضروه يحضروه لانه جد بستاهل

اول 10 دقايق من الفيلم راحو علي انا و اخوي

واحنا بنضحك مبسوطين عال 3D :)

------------------------

مع اني كنت بس بدي اسلم عليكم لكن في موضوع قاهرني و بدي اكتبه و اخلص

هلأ الشيخ العريفي لمّا يحكي عن السيستاني بقوم المالكي بعترض و بطلب اعتذار رسمي من السعوديه لانه مس اشي كتير مهم بالنسبه الهم وهاد كله مع ان السيستاني ايراني اساسا

و لمّا شيوخهم الافاضل يحكو عن الصحابه ويسبو مش مشكله كل العالم تضلها ساكته هوووون بصير ما في اثاره للنعرات و لا في اثاره للفتنه

ولمّا تنتشر الرسوم المسيئه للرسول صلى الله عليه و سلم مرّه تانيه بالصحف الدنماركيه

برضه ما حد بحكي اشي لانه هاي اسمها حرّيه الصحافه

افففففففففففتتتتتتتتتتتتتتتت بس على هيك عالم

بتحب تضلها هاديه و ساكنه و راكده بامور مهمه

و بتموج و بتلوج عاشياء فاضيه

وبس ....

عن الاعتصام

اضعف الايمان اللي بنقدر نعمله كشعب بما انّه ما في بايدنا شي غير انّا ندعم غزّه الا دعم مادي او معنوي لانه بمنتهى البساطه مش مسموحلنا غير هيك...
او إنّا انّظم اعتصامات او مسيرات بنبين فيها رأينا بالنسبه لشي معين لانّا كشعب مش مسموح النا نعبرّ إلاعن طريق الاعتصامات والمسيرات - هاد في حال انسمحلنا- وانا مش مع انها تعم الفوضى و يتم تخريب ممتلكات الناس, يعني بهيك حاله المفروض يتدخلو الامن لكن بس تكون مسيره او اعتصام سلمي بس بدهم الناس يوصلو صوتهم و يسجلو اعتراضهم على شي ما في حد عاقل بقبله فالمفوض ينسمحلهم بهالشي...

ما بدي احكي عن اللي شفناه عالتلفزيون عن الاعتصام ضد الجدار اللي بتبنيه حكومه مصر , وطريقه التعامل الغير بشريه مع المعتصمين و المعتصمات والاعتقالات من قبل رجال الامن....

اللي فاجأني و قهرني و كان بدو يجلطني هو تفكير بعض الناس عنّا و اللي عايشين حوالينا و بفكرو طريقه سطحيه غريبه بتصب بمصالحهم فقط!!
تعليقات بعض الناس على موضوع الاعتصام , انه الموضوع مش محرز وان هالعالم "عالم فاضية,, انتبهوا لاولادكم وبناتكم احسن وربوهم احسن من هالحكي الفاضي اللي لا بودي ولا بجيب" حسب تعليق واحد من المعلقين و غيره علّق "والله يا هاي قلت العقل يا بلاش احنا ومصر علاقاتنا مثل السمنه على العسل والي بدو يخرب العلاقه..!!بس ما تحلمو مصر والاردن اخوه ليوم الدين"

وغيرها كتير من التعليقات اللي بتشدّعلى ايد هالمعلقين...معقول وصل فينا الوضع انّا نكون بس بنحب مصلحتنا وما بنفكر بحد؟؟؟ يا جماعه الخير الاجانب سافرو لمصر وعملو احتجاج بسبب منع قافلة شريان الحياة(3) من العبور عن طريق مصر , و العالم كلّها بتستنكر هالجدار و انتو بتحكو مصالح و علاقات؟؟؟
معقول العالم بطلت تحس؟؟ يعني لا شرع ولا عادات ولا تقاليد بتسمح لجار يعتدي على اخوه . ولا بتسمح لاخ يوقف مع العدو ضد اخوه, ولا بتسمحله انه ما يحس بالم اخوه كأنه المه هو...

"بلاش مافي داعي مصر دولة الها سيادتها اتركوها بحالها وبعدين الي يطلع من المساعدات لايصل الى ابنا غزة بل يصل الى قادت حماس فقط فقط فقط فقط وكل الحب الى صقر الشوبك"

"الله يحيي رجال الامن العام رجال الوطن واي واحد يحاول يخرب مسيرة تطور الاردن وعمل رجال الامن العام يطبقوا النظام بس لا حدا يزعل امن الاردن اهم من اي شي ."
يخرب مسيره تطور الاردن وااااااااااااااااااااااااااااااااااااال يعني جد كلام كبير صادر عن ذو عقل صغير.....


لمزيد من حرقّه الدم و التعليقات بتقدرو تقرؤهم هون

فرصه جديده....لكن لمن!!!

سمعته يهمهم بكلمات غير واضحه وهو يقف على البلكونه ليدخن سيجارته,لحين انتهائها من تحضير نفسها للخروج معه, هي تعلم انه حين يقوم بعمل طائش او ينوي القيام بعمل طائش هنالك عزومه غداء فاخره, لاعتقاده بان هذا كافي لينسيها تأخره عن البيت الى اولى ساعات الصباح.

اقتربت اكثر من الباب, سمعته يروي تفاصيل مغامرته في الليله الماضيه, ومن الكلام تأكدت انه يرويها لفتاه اخرى, وهو يردد عليها كلمات كانت تعتقد انه اوجدها لها فقط مثل " يا حب" و "عيونو" وغيرها من الكلمات التي كانت تكفيها سماعها من شفتيه فيما مضى, انها مكالمته مع انهاء سيجارته و هربت بسرعه الى غرفتها لتكمل تجهيز نفسها.

دخل الغرفه ولاحظ الاختلاف على وجهها, سألها بكل حنان الارض عن سبب تغيرها و هل تشعر باعياء او تعب, اجابت بالنفي وبانها فقط بحاجه لساعات نوم اضافيه و اخبرته بانها جاهزه و انطلقو.

لم تذهب من بالها تفاصيل المكالمه, و انتقلت من مشاعر الاشمئزاز منه الى مشاعر لوم النفس, كلما اشتكت لاحد تصرفاته هذه ينقلب الموضوع ضدها و جميعهن يلمنها , انت السبب, لولا انك اهملته لما اجبر ان ينظر الى الخارج, كيف اهملته؟؟؟ كيف وانا دائمه التجديد بكل شيء حوله, في نفسي, شكلي لون شعري طريقه لبسي دائما متغيره ومتجدده , في ديكور البيت, حتى في تحضير الاكل تعلمت جميع اطباق مطابخ العالم حتى لا يمّل من صنف معين, كيف اهملته وهو دائم المديح والشكر بسبب اهتمامها به, كيف اهملته وهي دائمه التفكير بما يسعده اولا.

سألته عن سبب تأخره في الليله السابقه, اجابها بانه قد حصل معه مشكله كبيره و سوء فهم بينه وبين صديق عمره, واضطر ان يبقى لينهو الموضوع حتى لا يفترقو وهم على خصام, فاولا واخرا هو صديق العمر ولا يمكن ان يتنازل عنه, سرد القصه وكأنه حفظها عن ظهر قلب, سردها بتفاصيل جعلتها اقرب من ان تكذب ما سمعته باذانها و تصدقه...

وهم في طريق العوده طلبت منه ان لا يتوجه فورا الى البيت, ارادت ان تفكر اكثر , وفجأه خطرت لها فكره, ما رأي زوجي العزيز و رأي اللاتي دافعن عنه لو انا التي فعلت فعلته القذره تلك, هل سيلومه رجال العائله لاهماله لها؟؟ هل سيقولون له انت الذي اجبرتها ان تنظر الى الخارج؟؟؟ هل سيتمالك نفسه حتى يخرج معها و يتناول وجبه الغداء ويسمعها تروي تفاصيل كاذبه ؟؟؟؟

بالطبع لا, سيكون مصيرها فوري منه و من رجال العائلتين ومن نساء العائلتين, ولماذا...لانها بكل بساطه امرأه, و هذه لوحدها تهمه قد تستحق عليها القتل, هو رجل و الرجل لا يعيبه شيء, لا الكذب ولا الخداع ولا الخيانه, الهذا يتصرف الرجال بحرّيه تامه ؟؟؟

حاول ان يبدأ اكثر من موضوع ليتحدثو به ولكنها كانت تنهيه باجابات مختصره جدا..لا..نعم...حسنا...اذا انت اردت ذلك, ولكنها احست بان شي داخلها سينفجر, احست بانها ستصرخ من شدّه الالم, وبدأت بتهدئه نفسها شيئا فشيئا...

"حسنا ماذا تريدين" سألت نفسها هذا السؤال " اتريدين الطلاق؟؟" ..." اتريدين الانتقام؟؟...ماذا تريدين" سكتت لبرهه و طلبت منه ان يتوقف, سألها ما بها رددت الطلب وبصوت لا حياة فيه, توقف و نظر اليها, هل تشعرين بالتعب؟؟ هل اخذك الى المستشفى؟؟...

نظرت اليه " لماذا كل هذا الحنان والاهتمام اذا ما عدت اعني لك شي؟؟"

علامات التعجب واضحه على عينيه " ما الذي تتحدثين عنه؟؟"

بالرغم من محاولاتها بان تتماسك ولا تبكي روت له تفاصيل المكالمه التي سمعتها ودموعها تملئ وجهها

سكت لم ينطق بشيء , واختفى اللون من وجهه و حاول ان يستجمع شيء ليبلع به صدمه الموقف ولكن دون جدوى

"اقسم لك بان شيء لم يحصل, اقسم لك بانها كانت اول مره و اخر مره, اقسم لك بانني شديد الندم على ما فعلت , اقسم لك..اقسم لك..."

" لا اصدقك..." قالتها وهي تفتح باب السياره

" اين تذهبين؟؟؟ ارجوكي لا تتركيني , ارجوكي لا استطيع الحياه بدونك"

غادرت السياره و بدأت بالمشي بعكس اتجاه السيارات حتى لا يستطيع اللحاق بها

نزل من السياره و ركض اليها " ارجوكي سامحيني, اقسم لك بانني سأتغير, ارجوكي.."

فجأه تذكرت ما الذي جعلها تذهب الى البلكون خلفه اليوم, لقد ارادت ان تخبره بانها ذهبت الى الطبيب اليوم الذي نقل لها خبر حملها, كيف سيعيش هذا الطفل, ماذا افعل, يا اللهي دلني , نظرت اليه و اشفقت على مظهره , اصفر اللون , دموعه تنهمر بلا سيطره, و هو يمسك يداها و يضمهم اليه.

قالت له " اتقسم؟؟؟"

" اقسم"

" اتقسم بالله؟؟؟"...."اقسم بالله ان لا اعود الى ذلك"

" اتقسم بالله الذي رزقنا طفلنا".." اقسم ب... ماذا" و اتسعت عيناه المليئتان بالدموع

" امسكت يده و وضعتها على بطنها و قالت له " بطفلنا هذا"... ضمها اليه و كأنه اول مرّه يضمها, وهمس في اذنها

اقسم بالله الذي رزقني اياكي ان لا اعود الى ذلك ابدا"

ابتسمت, ربما صدّقته و ربما ارادت ان تصدقه لا تدري و لكنها تعلم انها ستغفر له كل اخطاءه لانه تحبه اولا و لانه والد طفلها الذي لن تحرمه من والده, ولانه الرجل...نعم الرجل الذي سيغفر له الجميع اعماله فلماذا هي لا تغفر له ايضا.....