Things I Like To Whisper About

Would You Hear Me Whispering

شباط بشبط و بلبط


الصورة قبل شوي من موبايلي :)



بما انه الهم فترة المدونين بحكو عن الامثلة فاليوم تطبيق عملي لمثل
شباط ان شبط وان لبط ريحة الصيف فيه
بس السنه صار العكس
اول شي شممنا ريحة الصيف بعدين بدا يشبط و يلبط
ايوه اللي بصير برّه هاد هو الشبط و اللبط :)
الجو كتير حلو برة, اي نعم ما بحب الشتا
بس بما اني متدفية منيح و الشباك قدامي ومنظر الشتا بجنن فكتييييييييييير حلو
ما بحسّة "يااااي شو رومانسي الجو" زي ما بعض بنات حكو
بس الحمدلله نعمه من ربنا, و منظر السما و الشتا بجنن ليش الحكي :)

الله يجعلها امطار خير عالجميع
و الله اعلم احنا باخر ايام الشتوية :)
والله يجيبك يا اخوي ...اخد السيارة مني ولهلا ما رجعها
شكلي راح اتشرّد اليوم :"(


انطلاقة مدون جديد...2


مدون جديد...يمكن بتعرفوه من التعليقات
بس برضه حابة ارحب فيه
Sh3rawi
صاحب مدونة


انا شخصيا بحب تدويناته كتير
مع انه بعد فترة ما راح يفضالنا
علشان الامتحانات
اهلا وسهلا فيك في عالم التدوين :)

وانا بقرأ بوست في مدونتة بعنوان اصوات ملتزمة
اتزكرت هاي الاغنيه من زمان ما سمعتها





ممّيتو عندها امتحان




ماما السنة ان شاء الله بتصير 60 سنة , العمر كله يا رب , و الها فترة حابة تتعلم تشتغل عالكمبيوتر, وخصوصا عالنت, مع انو خواني الهم سنين متغربين, لكن مع الاحفاد الموضوع صار جدا طارئ, بدها ايميل علشان اول ما يوصلو صور و فيديوهات الاحفاد تشوفهم وما تستناني لمّا ارجع من الشغل, و بدها بأي وقت تشبك على Skype علشان تحكي معهم و تشوفهم و برضه ما تعتمد على وجودي او وجود اخوي.

انا بيني و بين التدريس عداء كبير, جربت التدريس و لقيتو مش مجالي اطلاقا مطلقا, وماما والحمد لله عارفه هالشي عني, فجأة اجت تحكيلنا انها سجلت بدورة لتعليم مهارات الحاسوب, هي شبه ICDL للمبتدئين, و يا حرام هي بدت الدورة من هون و كل اجهزة البيت ضربت, الاوفس على جهازها هي وبابا اللي بلعبو عليه freecell ضرب , و الشاشة بالجهاز التاني ضرب, و اللاب توب كان فيه مشكله, وحتى بعد ما تصلح, بما انه مش زي الكمبيوتر اللي بتتدرب عليه بالدورة فمش مقتنعه تتدرب عليه.

امبارح سمعت ماما بتحكي لاخوي عندي واجب ولازم احلّه وبدي تساعدني, وفعلا قعد اخوي و بدا يدرسها, وانا كان عندي مشوار, رحت عالمشوار رجعت لقيت ماما بتشتغل عالكمبيوتر, لابسة النظارات و مدققه و بتتطلع عالكتاب و عالشاشة و معجوئه عالاخر, واخوي نايم عتختي جنبها, سألتها "شو خلصتي دراسة " وانا محششه ضحك, لانه هاد كان سؤالها كل ما شافت حد فينا طالع من الغرفة بالامتحانات, بتحكيلي لأ و ما حليت الواجب , ما قدرت اقاوم عبطتها و بستها و قعدت جنبها, درّستها و حلينا الواجب مع بعض.

الفاظ جديده بسمعها من ماما "يييي علينا ما ظللتها" "مش فاهمه" " وين اروح" او كلمة" نسيت" مع ضحكه خجل لمّا اسألها عن شي تعلمناه قبل دقيقتين, الله يخليلي اياه يا رب وما يحرمني منها ولا يحرم حد من امه وابوه, صحي اخوي بسأله شو صار بحكيلي , انا مش اني ما بحب التدريس , بس طلعت من اللي بصيبهم حالات اغماء بس يدرسو العالم :) بحكيلي حسيت انا اللي بدرس و نزل علي النعس العجيب و سطلت و نمت.

اليوم اتصلت في مميتو وانا بالشغل علشان اشوف شو عملت بالواجب, حبيبتي مبسوطه و بتحكيلي اللي بتدربنا سألتني سؤال وفورا عرفت الجواب و حكتلي " والله انك عسل يا خالتو", وسألتها في حد درسك حكتلها اه بنتي, حكتلها سلام خاص لبنتك


و انا بكتب هالبوست ماما قاعده بتعمل Presentation عال PowerPoint و طبعا مليان صور لاحلى الاحفاد :)

الله يخليلنا اياهم فوق روسنا يا رب



تحديثات

البوست هاد مجهزته من الخميس بس ما صار مجال انشره..

صورة النرجس لاني كتييير بحب النرجس و ريحته ولان ماما بتحبة و انا بحبه لانه بزكرني بماما, وهالحكي من قبل ما احضر ساندي بل عفكرة :)

كل عام وانتم الى الله اقرب بمناسبة يوم المولد النبوي

الدنيا برّه شتا و رعد و برق ...الحمد لله عالمطر

اليوم كتب كتاب وحده بحبها كتير كتير و هالمدونة هي اللي عرفتني عليها....الف مبروك يا قمر و عقبال الفرحة الكبيرة :)

التعوّد


اي شي بالحياة اول ما نبدا فيه بنلاقيه صعب واحيانا شبه مستحيل ومع الوقت بنتأقلم معه و بنتعود عليه, و برضه مع الوقت بنستسهله و بنصير نحسه ولا اشي .

تعامل الشباب والبنات بالشغل, وخصوصا اللي بكونو قاعدين بمكتب واحد, بالبداية بكونو حذرين و مع الوقت ببدا التعود يصير, و هالشي مش غلط اذا كان بحدود زمالة شغل و احترام متبادل, ما راح اخوض بموضوع الاختلاط بالشغل و رأي الدين, خلينا بان العلاقه تكون رسميه و علاقه عمل مش اكتر.

لكن في نوع تاني من العلاقات بتتطور لاكثر من علاقة زملاء, مع الوقت البنت بتصير تاخد عالشب و الشب ياخد عالبنت, وتشكيلو و يحكيلها, ومع الوقت بقربو من بعض كتير, و برضه هون في عدّه انواع, هلأ وحده مش متزوجه و واحد مش متزوج ويكون الهدف الزواج - مع اني شخصيا مش مع هالشي اطلاقا - بس يلا بنبلعها انه الله يستر عليهم وان شاء الله بنفرح فيهم, النوع التاني و اللي هو النوع الخطير وهو اللي بدي احكي عنه, علاقه المتزوجين مع المتزوجين.

بتكون الاخت متزوجه و الاخ متزوج, ولكن من كتر ما تعودو على بعض بتصير تتعامل معه كأنه زوجها, وممكن تطلع منها كلمه "حبيبي" عادي ولا كأنه في شي, وممكن توصل انها تمزح معه على شي و تقوم تضربه على كتفه, او تعمل حركه تافهه من هالحركات, و حتى توصل فيهم انه يجبلها هديه او اي شي علشان يراضيها لانه امبارح عصب عليها بالشغل.

هالشي بصير عنا بالشغل كتير, و بطريقه غريبه, في منهم المفروض انه مش بسوء نيه, و بس تحكيلها اشي او تنبهيها بتحكيلك " عادي فلان زي اخوي...وين راح تفكيرك" , و في منهم بتصير قصص حب بينهم, وبصيرو يحكو تلفونات وهمه كل واحد ببيته, قاعد بين مرته و ولاده, واذا واحد فيهم اخد اجازه التاني ما بعرف يشتغل, والمأساة ان الكل شايف وساكت و الكل بعرف زوجها و بعرف زوجته.

و بس تحاول انك تنبهم , بتصير انت العدو و انت بتحكي بشرفهم وانت وانت... و بس تواجههم ان هالشي مش بس عيب و خيانه هالشي حرام, بصيرو يبررو لحالهم و بصيرو يهددو و يتوعدو , من باب خير وسيله للدفاع هي الهجوم.

انا هالموضوع كتير قاهرني, و مش قادرة اضل ساكته, والله حرام اللي بصير و المشكله اني مش عارفه شو اعمل و كل اللي حوالي بحكولي ما تدخلي يصطفلو, بس جد مش قادره اضل هيك, نصحت و حكيت للبنت و قاطعتها و برضه ما في شي تغير, مش عارفه اسكت زي ما الكل بنصحني ويلا اعمل شي, واذا عملت شي شو اعمل, انا ما بدي اعمل فضايح ولا توصل ان يصير طلاق لاسمح الله بس الموضوع زاد عن حدّه و الكل حتى الادراة شايفه هالشي و ساكته, يعني بتسأل المدير وين فلانه, بحكيلك هيها من الصبح عند فلان وهو زعلان, وكأنه مش بايده انه يمنعها تروح مع ان عنّا ممنوع الطلعه من المكتب الا للشغل, انا مقهورة عليهم و على زوجاتهم و ازواجهم, مش هدفي ادّعي المثاليه او بس انتقد, الله يهدينا و يهديهم يا رب



ملاحظه...كنت بدي احكي لو انا عمل فيي هيك كان....بعدين تزكرت اني طخيته قبل كم بوست :)

خللّها يا بوها...خللّها

علشان نوضح وجهة نظرنا احنا المدونات البنوتات بالموضوع اللّي اثارته

SimSim

احنا مع تخفيض اجور النقل, قصدي مع تخفيض المهر للي بدهم يتزوجو, محاولات فاشلة بتخفيف الدم بعرف :$
و ركزولي عاللي بدهم يتزوجو, من الرجال و البنات
وان مش كل الرجال ما بتقدّر تنازلات البنت علشانهم
و اكيد ما بصير نعمم بأي شي
بس بنرد نحكي ان للاسف بعض الرجال ما بقدّرو


اتركم مع الفيديو اللي يمكن وصللكم كلكم بالايميل قبل :)


I WON ....I WON :D


Yesterday I read a post in Melicieuse blog which was a letter for our friend" Facebook " and I wrote a comment asking her to add my name for signing it too :D

what have it to do with winning??

My comment was number 100 at Melicieuse blog, sooo she dedicate me the next post
"Comment 100 - a soft Whisper " YAAAAAAAAAAAAAAAAAY

There is a very nice poem for my name too "whisper" :D

I WON ....I WON





Yahoo mail & Nighty :)

لو فتحت عصفحةالياهوو ميل

بتلاقي الصوره لدعايه الياهو ميل كتير فيها حيويه و فيها محبه


ام و بنتها منسجمين عالاخر







عريس و عروسة كتييييييير مبسوطين





وحده مع كلبها اخر محبة






يعني كلهم بدلو عالانسجام
و الحبة
والسعاده
و الروقان
ما عدا هالدعايه مش عارفة ليش حاطينه






معقول مش ملاحظين ان الشب مكتئب و مش طايق حاله !!!
جد كل ما افتح الياهوو و تطلع هالصوره كتيير بستغرب

و عسيرة الياهو ميل
اليوم وصلني ايميل نكت حسيتهم جداد و عجبوني
واسمه لساتنا اول الاسبوع و لسا في نكد الدوام الطويل
فاتركم مع هالنكت و تصبحو على خير و احلام سعيدة
و صباح الخير و يوم سعيد للي صار عنده صبح
و اذا كانو النكت دبش فمش مشكله اكتر من كئابة الاخ اللي فوق ما حد راح يوصل :)


ولد يسأل أمه: شو يعني ملاك ؟

ردت: مخلوق من نور يطير في السماء

قال الولد: سمعت بابا يقول لسكرتيرته يا ملاكي بس ما طارت !

قالت الأم: اليوم بتطير



طفل عمره 3 سنوات، سأل إمه الحامل .... شو هذا اللي في بطنك؟ ردَت: هذا أخوك. سألها: بتحبيه؟ ردَت الأم: آه . سألها: ما دام بتحبيه ليش بلعتيه؟؟

Nighty :D

بيب بيب هاريدي



مع الشمس اللي طالعه الها كم يوم بضل يخطر ببالي ايام زمان, كنا ساكنين احنا وعمامي بنفس العمارة, و كان احلى يوم لمّا اروح بكير , يكون في معلمه غايبه و معوضين حصص, و اروّح عالبيت الاقي ماما عالسطوح هي و مرتات عمامي - زوجات عمامي مش عارفه كيف بتنكتب :$ - المهم بكونو بشربو شاي او قهوه.

يا الله ما احلى الشعور, اروّح عالبيت و انا طول الطريق بدعي ادق عالباب وما الاقي ماما بالبيت من غير شر, وهالشي بعني انها عالسطوح.

تكون الشمس مش كتير حاميه, وريحه القهوه معبيه المكان,وصوت العصافير اللي معبيه السطوح, عمو هوايتة صيد العصافير و صيد السمك, السطوح مليان قفاص عصافير, صحيح يا دوب اقعد 10 دقايق و ننزل عالبيت, لكن هالعشر دقائق كانت من احلى الاوقات, وخصوصا لو حد من اخواني او اولاد او بنات عمي مروحين بكير.

كنّا بس يكون عيد استقلال او في مناسبه نطلع كل العيله بالليله عالسطوح بالليل علشان نشوف الالعاب الناريه, كانت بوقتها اشي مميز مش هيك بسبب ومن غير سبب بتنعمل, ومين هب و دب يعملها, من انا صغيره بحب الالعاب الناريه و حتى لمّى كبرت ضليت احبها لكن هلأ بعد ما صارت مستهلكه بطلت انطنط والفلف عالشبابيك لاشوفها زي قبل

واشي تاني بيخطر ببالي اله فتره, بس هو اشي غريب بوقتها و هلأ, في اغنيه كنّا نغنيها كتير واحنا صغار, اغنيه هبوله بصراحه, دورت عليها عالنت و مش فاهمه كيف لقيتها
الاغنيه هيه " هاريدي" :) بيب بيب هاريدي..حيعيط حيموت ..حيقلد الكتكوت
الي كم يوم انا واخوي بالبيت بس نكون صافنين و بنتفرج عالتلفزيون, فجأه نتطلع عبعض و نقلبها عرس بالبيت, وبابا وماما مصدومين من اللي بصير و من الاغنيه :)

وفي جزء بالاغنيه او بالشريط...ايون اشتريت الشريط بوقتها تخيلو :) في اغنيه مين اللي سرق العمود, برضه كانت تحشيش
كنت احب كيف الكورس البنات اللي بعيدو اللازمه او المذهب زي ما بسموه للاغنيه يكون صوت المظرب كأنه بدو يبكي, وصوت البنات كتير مبسوطين
كانت ايام...بصراحه من احلى الايام :)
اترككم مع الغنيه
و بيب بيب هاريدي :)







الصورة ما الها دخل بالموضوع, بس هي كانت من ضمن الاشياء الحلوه بفترتها :)

شو بالنسبه للي بسوقو سيارات جديدة


اشي غريب كتير صايره اشوفه بشوارعنا مع ازدياد عدد السيارات الفخمه بالبلد, بحس كتير ناس بستمدو قوتهم ومكانتهم من نوع وموديل السيارة اللي راكبينها, حتى بتجاوزهم, بس بدهم يتجاوزو عنك , كأنه الشارع حق مكتسب الهم و كأنه انت متعدي على حقوقهم وكيف ماشي بالشارع انت اساسا بسيارة موديل التسعينات ....

بكون في عنجهيه غريبه, مش فاهمه على شو, يعني اذا انت انسان بتستمد ثقتك بنفسك من كومه حديد, اي نعم حقها الاف الدنانير بس بتضلها كومه حديد الها اربع عجال, حلو يكون عندك سيارة فخمه, بس شوووو يعني؟؟؟ كيف هالسياره بتحسسك انك احسن من غيرك؟؟ و خصوصا بس يكون البابا هو اللي جايبها لا من مجهودك الشخصي ولا من تعبك ولا من انجاز مميز بحياتك, غير انك طلعت ابن فلان من العالم

بدي احكي للاخت اللي كانت راكبه سياره مرسيدس اخر موديل و بس انتقلت للمسرب اللي جنبها زمرت كأني خلص شوي وراح اضربلها السيارة و اتطلعت علي و هي مركيه راسها على ايدها اللي مركيتها عالشباك و بتسوق بأيد وحده و جحرتني مع طعجه تم و حسستني انها المس وانا بصف تاني "ب" ....كيييييييييييييييييييف حالك انت !!!

ما بعرف ليش نزل علي الضحك بطريقه غريبه من هالموقف , بس انقهرت انها ما خلتني استمتع بمنظر الغيوم امبارح وروحت علي تصويرهم, بدون اسلاك كهربا و لوصلت البيت كانت الشمس مختفيه و المنظر مش كتير واضح من الشباك :(





الزوجة الثانية


قبل كم يوم كنّا نتحدث انا و مجموعه من القريبات عن موضوع الزوجه الثانيه, انا بعرف ان الشرع حلل للشخص يتزوج 4 ولكن في شرط اساسي وهو العدل و عدم ظلم وحده من الزوجات علشان التانيه وهو امر نادر الحدوث جدا,و في حالات معينه مثل مرض الزوجه او عدم الانجاب, مع ان لو انعكست الآية و مرض الزوج او كانت مشكله الانجاب منه, فورا بنحكم عالست بانها قليله اصل ودين والمفروض ترضى بنصيبها وتسكت, وانا مع هالشي لكن للطرفين, زي ما هو قدرها هو قدرك برضه, لكن في حال اني مثلا مثلا تزوجت ولا سمح الله فكر الاخ انه يتزوج وحده تانيه, فانا راح اطخه و اطخها :$


انصدمت كتير لمّا سمعت رأي بعض من البنات بانهم ما عندهم مشكله لو تزوج زوجهم عليهم, او انهم يتزوجو واحد متزوج, و انه هاد حقه وكانت تبريراتهم بتصوير الحياه الزوجيه على انها فقط لاشباع حاجات الزوج , و نسيو التفاهم والانسجام, نسيو الحب و الاستقرار, نسيو التعاون و المشاركه, حسيت الحياة الزوجيه تجردت من كل معانيها, استغربت ان بنت ممكن تفكر بهالطريقه.

بسألها انت بترضي عحالك انك تسرقي زوج من مرته, بتحكيلي هاي مش سرقه هاي شرع رب العالمين, انا بعرف ان شرع رب العالمين, بس انت ما عندك مشكله انك تشاركي حد تاني بزوجها؟؟او ان وحده تانيه تشاركك بزوجك؟؟ بوقته, بمحبته, وحده تشاركك بتفاصيل حياتك مع زوجك بحلوها ومرها؟؟

وحده منهم بتحكيلنا انها بتأمن ان موضوع الزواج التاني عبارة عن قدر, مكتوب للشخص مثل الرزق ومثل الزواج الاول, و ان في كتير رجال بتعرفهم الهم سنين بحكو لزوجاتهم انهم بدهم يتزوجو عليهم و لهلأ قدرهم انهم ما يتزوجو, تخيلو ان وحده الها 22 سنه و زوجها بحكيلها انه بدو يتزوج عليها, 22 سنه من القهر و سمّه البدن...

خطر في بالي سؤال, هل الزوجه مجبره انها ترضى بهالوضع؟؟؟ بما انه شرع فهل من ناحية دينيه ما بصير تعترض؟؟؟ الحمد لله انه طلع انها بتقدر ما توافق و بتقدر انها تنفصل عن زوجها اذا الوضع ما ناسبها, بس انا بضلي عند رأيي.....بمنتها البساطه بطخه و بطخها

قصص المراجعين

يوم الخميس بالعاده بكون معجوء كتير بالشغل, لكن انا ما بهمني, خلص بما انه اخر يوم بالاسبوع فمش مشكله مسموحله يكون هيك مدام تاني يوم عطله, لكن الاحد لأ مش مسموح و لساتني ما بحبه

المهم و احنا قاعدين فجأه دخل المكتب واحد كبير بالعمر ومعه وحده منقبه واضح انها صغيره ومن جيل بناته للعمو, دخل العمو و صار يشرحلي اشي و هو بصرخ,ما فهمت عليه وخصوصا انه بحكي بلهجه بدويه و ببلع اخر الكلام, سألت الست بدت تشرحلي قام اتطلع عليها وحاشرلها بايده انها تسكت ودزها و رجعها لورا, سألته اكتر من سؤال علشان اوصل بسهوله لمعاملته لمنه اكدلي انه ما اله معاملات عنّا و انه في اله معامله بمكان تاني حكولو يراجعنا.

طبعا بعد التمحيص و البحث بكل البرامج اللي عنّا طلع العمو مش صادق و فعلا اله معامله عنّا بتمنعه يستفيد من الجهه التانيه اللي راح عليها, انا بصراحه انقهرت, يعني والله عيب تحلف و تصرخ و بس بدك تاخدني بالصوت وبالاخر تطلع مش صادق, حكيتله بما معناه ان هاي التصرفات بتخلي الموظفين ما يساعدو ولا يتعاونو مع المراجعين, وانه لو حكالي الصح من اول كان ساعدته بس هلأ لأ, قربت الست وصارت تحكيلي انا بدي احكيلك الصح بس هو سكتني من شان الله المعامله بتخص ابني و اله 5 شهور وهو بماطل يعملها و هي هلأ خرب الدنيا, ومن طابق لطابق بكل مؤسسه بلفلف وهو مش فاهم اشي ومش راضي يرد علي,ترديش عليه من شان الله ساعديني اتصلت بالاقسام التانيه وعرفت وين لازم يروحو وشو اللي لازم يعملوه بالزبط وطلع الحمد لله بقدرو يخلصو معاملتهم من عنّا, الست اخدت وراقها و راحت لزميلتي اللي حكيت معها علشان تساعدها و هي طالعه صارت تصرخ على زوجها وما بعرف شو حكتله بس واضح انه تهزيء و حكيتلنا من شان الله استضيفوه عندكم لاخلص المعامله بديش يجي معي.

حكيت لحالي يلا يا بنت مسكين الزلمه وخلص هدّي حالك, اتطلعت عليه بحكيله تشرب اشي عمو؟؟ بحكيلي ان شاء الله بتموت هي و ابنها, الله يخلصني منهم همه التنين, والله يا ريت تموت و والله لاتزوج عليها ست ستها و بتطلع علي و على صاحباتي اللي بالمكتب, بنفس الهدوئ حكيتله, غيرت رأيي عمو, فش تشرب اشي, و صار يشرحلي , مسكت ورقه وحكيتله عفوا عمو عندي شغل و طلعت من المكتب, بس حسيتها خيانه لباقي اللي بالمكتب لانهم تورطو معه, رجعت كمان شوي و صرنا نأشر لبعض انه وحده تتشجع و تحكيله خلص اسكت و اطلع بره, قامت وحده صارت تحكي ييييي أذن الظهر وما صلينا, عندكم سجادات الصلاه, و وقفت وحكت يلا نصلي, هو سكت فجأه وصار يتطلع حواليه و قام وسألني وين راحت مرته بالزبط, دليته عالمكتب و سكرت الباب وراه.

بعد ما طلع حششنا ضحك بعدين كلنا صفنا, انه مش عارفين هو مسكين و يلا لأ, من حكيه فهمنا ان ابنه مريض ودايرين فيه من مستشفى لمستشفى, بعدين فكرنا مش ممكن حكا كل هالحكي لان مرته صرخت عليه قدامنا؟؟؟ مش ممكن فعلا معمي على قلبه من مرض ابنه؟؟؟ مش ممكن قد ما تعب بطل يحيكي الصح علشان يخلص معاملته؟؟؟ و برضه ما كان ضروري يجيب سيرة انه يتزوج مرّه تانيه مع الضحكه الغريبه اللي ارتسمت على وجهه..... اسأله كتير خطرت في بالنا, خلتني اتصل بزميلتي و اتصل باللي بعرفهم بالمؤسسه التانيه انهم يساعدوه, لو مش علشانه ولا علشان مرته اللي بالبدايه ما كنت مستوعبه كيف وحده بترضى تتزوج واحد قد ابوها وبهالعقليه هاي, و بعدها تزكرت ان البيوت اسرار وما بنعرف شو الظروف الاسوء اللي رمتها على هالشي, مش علشانهم علشان ابنهم اللي عمره 19 سنه و مريض و بستنى الفرج بالمعامله هاي......
الله يفرجها على البشر....

آدم و حواء

الجمعه الماضيه الخطبه كانت عن قصه خلق سيدنا ادم و سيدتنا حواء, لكن بطريقه جديده اول مره اسمعها

قال لنا الشيخ انه عندما خلقت حواء استيقظ سيدنا ادم و ووجد حواء نائمه بجانبه - لان انخلقت من ضلع سيدنا ادم وهو نائم وهو لحكمه كبيره هي ان الرجل بطبيعته لا يتحمل الالم مثل المرأه ولو كان مستيقظ لكرهها من شدّه الالم - عندما استيقظ سيدنا ادم جاءت الملائكه تسأله, لم احفظ الاسئله حرفيا ولكنها كانت بهذا المعنى


ما هذه ؟؟...قال هذه امرأة

وما اسمها؟؟...قال اسمها حواء

ولم هي امرأة؟؟... لانها خلقت من امريءٍ

ولم اسمها حواء؟؟... لانها خلقت من حي

اتحبها يا ادم؟؟...نعم احبها

اتحبينه يا حواء؟؟... قالت لا و هي بقلبها اضعاف حبه له

جميع المصليات ضحكن و اكدن على ذلك بامائه بالرأس :)

و اكمل الشيخ كلامه عن اعوجاج حواء وهو شي يرفع مكانتها ولا يقللها ولا يستدعي الاستهزاء بذلك من بعض الرجال
قال الاعوجاج جاء من تحكيمها لقلبها قبل عقلها, اعوجاجها لتحمي زوجها و واولادها و لولا اعوجاجها لكن هناك رجلان بالبيت

و ضرب امثله في تربيه الاولاد من العنايه بالرضيع و الاهتمام به و بنظافته ومن تغيير الحفاض ومن السهر بجانبه بكل الحب وهو مريض, كل تلك الامور لا يوجد رجل على وجه الارض يستطيع عملها و تكرارها لنفس الطفل او لاكثر من طفل على مر السنين.

الهدف من الخطبه كان ان خلق الرجل بتكوين وصفات معينه لذلك اعطي زمام الامور في امور حياتيه مثل الطلاق وغيرها, وخلقت المرأه بتكوين وصفات معينه فعاملها بناءا على تلك الصفات ولا تحاول ان تغيرها او تغير بها شي ولا تصنع منها رجل...

7 things Tag :)

شكرا للقمره SimSim عال Tag , المفروض اكتب 7 اشياء عن نفسي و ارشح كمان سبعه ليعملو هال "Tag"

  • بحب اكل الفاصوليا البيضا مع لبن...ايون احمر و ابيض خبابيص بعرف :)

  • عندي مشكله مع الكنادر, شكله لاني في مرحله المدرسه كنت اعاني اني الاقي كندره مناسبه لسني و بنمره كبيره نسبيا بسبب الطول, حاليا عندي اكثر من 50 زوج كنادر بكل الاللوان و الاشكال :)

  • انا ببرد كتير بالشتا, فلازم عند النوم يكون في حرامات فوقي لدرجه ما اقدر اقلب من جهه لجهه , هيك بس بنام وغير هيك بضل حاسه حالي بردانه, حاليا في حرامين على طاقين و حرام على طاق واحد و الكويلت فوقهم, اختصرتهم بس لانها دفّت الدنيا هلأ :")

  • ما بحب اقعد كعرسي دافي :$ جد بتنكرز, الكرسي اللي بدي اقعد عليه لازم انا ادفيه بمعرفتي :)

  • بحب اتطلع من الشباك , يعني لو يصحلّي اضل طول اليوم واقفه عالشباك ما عندي مشكله, لكن مجتمعنا الحلو ما بقدّر هالشي, فعلشان "انت بنت وما بصير" و علشان " شو بدهم يحكو العالم" ما بمارس هالشي البسيط اللي بمنحني المتعه الا بالليل و انا طافيه الضواو :(

  • المسلسلات الكوميديه ممكن تعدّلي مزاجي 180 درجه, يعني كم حلقه من According To Jim على كم حلقه Friends مع Seinfeld خلص صرت بقمه التفاؤل و السعاده :) كنت اقضي يوم الجمعه على التلفزيون من قناه لقناه احضر كوميدي, مش عارفه ليش غيرو الدوره البرامجيه و خربو كل شي, وال ايش two men and a half من كل عقلهم بسموه كوميدي...بكرهوووووووووووو

  • ما بعرف اذا بصير اكتب هالشي ويلا لأ بس بما انه بوست بكشف فيه عن اشياء بسيطه بس بتعنيلي كتير فاااااااا انا بكره منظر اظافر الرجلين الطوال :$ جد و خصوصا اذا امنكرين يا لهوويييييي, بحس اظافر الرجلين لازم يكونو مقصوصين عالاخر, اسفه اذا ازعجت حد بهالشي, بس هاد رأيي الشخصي :$

ما راح ارشّح 7 , لاني بحس في ناس بكرهو ال TAG مش عارفه ليش :$
لهيك انا بترك المجال مفتوح للي بحب يعمله, خصوصا لكل المدونين اللي بحب اتابع مدوناتهم و بحب اعرف عنهم اكتر :)
انتو حرين اذا بدكم اعملوه :)
و اذا ما بدكم ما تعملوه :(


المطار....يعني و بعدين!!!

كان المفروض اسافر ب 7\1 برحله المسا قبل باسبوعين وصلتني مسج من شركه الطيران بانه التغت رحله المسا وصار موعد سفري ب 8 الشهر و بعد بساعه اتصلت فيي موظفه من عندهم لتتأكد ان الموعد الجديد بناسبني, و حكيتلها اوك حكتلي يا ريت تشرفينا لتاخدي التذكره بالموعد الجديد.

قبل السفر ب 3 ايام وصلتني مسج ان في ضريبه نزادت على التذكره و راح تتاخذ في المطار, و هالمسج زكرتني اني ما غيرت التذكره, رحت لمكتب شركه الطيران علشان اسأل عن الضريبه الجديده و اغير التذكره, طلعت الضريبه مفروضه على كل شركات الطيران من الحكومه و الشب اللي بشتغل هناك فرجاني الكتاب الرسمي من الجريده الرسميه التابعه لرئاسة الوزراء, طلعت الضريبه الجديده 4:30 مكتوبه هيك.

حكيت للشب فيها اشي لو دفعتها هلأ بدل ما اتأخر بالمطار, بنعرف كلنا عجئه المطار, حكالي اه و بالمطار بس بتبيني الوصل و بتمشي, غاب رجع بحكيلي لأ خلص الافضل بالمطار, حكيتله راح يكون ازمه و عالم كتير, بحكيلي لأ انا اللي راح اكون هناك و بسرعه بتمشي الامور, رحت عالمطار صف طويل مش مبين اوله و موظف واحد, هو نفسه اللي كان بالمكتب بتأكد من التذكره, بقطع و صل بتدفعله بعطيك الوصل و بكتب على تذركرتك علامه, ساعه كامله لوصلت للشب اللي كان نفسي امسح بكرامته الارض , ماشي دفعت و وزنت الشنطه و خلصت الاجراءات كلها و ركبنا الطياره.

في بالطياره ست مع اولادها ال 3 و الشغاله, كل شوي ينادو عالست و يشوفو البوردنج اللي معها, طلعو الاخوان اللي عالباب قطعو التذكره و ما شيكو على الاسم عالكمبيوتر فبفكروها مش راكبه او في اشي غلط بالتذكره و نص ساعه على هالحال , رايحين جايين و مين فلانه, وهاتي التذكره, وانت مريتي عالبنت اللي بره, بالله عليكم؟؟؟ يعني كيف ركبت الطياره هي والعائله الكريمه؟؟؟ لابسين طاقيه الاخفا مثلا ...

هلأ نيجي للامارات, وصلت المطار و مشينا للمكان الفيز, طول عمري بلاحظ بالمطارات اللي بكونو حاملين اسم و بستنو شخص, وبكون نفسي اعرف مين هالشخص هاد اللي بستنوه وعاده بكون واحد اجنبي, و بأهلو فيه و باخدو الشنط, و احترامات وحاله, وعاده بحب اقرأ الاسماء المكتوبه, وانا ماشيه بقرأ بالاسماء و اذ بشخص حامل اسمي :))))))

لاااااااا معقول, بحكيله يس, هندي طبعا الشب, بحكيلي اسمي بحروف مكسره مع انو ما في حرف غريب, حكيتلو اه, مشيت معه قعدني بغرفه فيها كنبايات و غاب شوي, اتصل اخوي بحكيلي شو يا VIP كيف الاوضاع :), طلع اخوي دافع لشركه بالمطار 50 درهم مش اشي كتير, وهدول بمشوك و بجيبولك التذكره وبوصلوك لمنطقه الشنط, و كل شي مشي تمام, مع ان اختكم بالله بطلت تعرف تفتح بدون ما ترمش كل ثانيتين علشان بصمه العين, وعيوني دمعو و فضيحه, الشب عالبصمه حشش ,انو مالك يا اختي :") بس الحمد لله بعد المحاوله الخامسه مشيت, وطلعت عالشنط وبكل بساطه وصلت للشنط, خصوصا بالشبره النيليه اللي رابطتها ماما عالشنطه علشان اميزها :") زكرتني بمدونه لناصر عن مغامراته عالجسر

رجعنا عالاردن , صف طويل عريض على منطقه جوازات الاردنيين و 3 صفوف فاضيين ما فيهم موظفين, اجا موظف قسمونا و طبعا بكل فوضويه الدنيا رجعنا عملنا صف وسبحان الله وقفت بالصف الجديد باخره مع انهم لمّا قسمونا كان بس 3 قدامي, مش راح اطاحش بالعالم, راجعه ونفسيتي حلوه و مسالمه, كملنا الاجراءات نزلنا للشنط, دور فتش على عربايه للشنط, مافي و كل اللي معي بدورو, رحت لهندي واقف - في شب بس شافه بحكيلو الله اكبر انتو ورانا ورانا..حلو عنااا ياااا - المهم رحتله و عملت حالي شاطره حكيتله جبلي عربايه والك الحلاوه, بكل برود الدنيا رد علي و هو متركي نفس التركايه عالحيط هلأ بجيبوهم, لفلفت مره تانيه ادور و انا واقفه استنى الشنط بديش تمر و انا مش شايفه واستناها لتلف عالقشاط, رجعتلو للهندي لاني مش شايفه حد غيره, انو يا مان روووح و ما راح تكون غير راضي, رد علي بنفس الطريقه و هو ما زال على تركايته, وظيفته عمود الشب و انا مش عارفه, شوي سمعتهم بحكو هي اجت العربايات , صاروخ كنت واقفه جنبهم , الاخوان جايبين 5 عربايات كل اللي بالطياره يتقاتلو عليهم, لفيت وجهي وحكيت امشي بكرامتي, وحده بنت حلال بتحكيلي طلعو معي عربايتين بدك وحده, لولا العيب والحيا بدي انط عليها ابوسها بين عيونها, بس هديت اعصابي, وقفت عالقشاط بعد ما قرأت عالمونيتور انه القشاط لشنط رحلتنا, ووقفت بين كل اللي كانو معي بالطياره, نص ساعه القشاط بلف وبدور بشنطتين يتيمتين و مش لحد منا.

واحد من الواقفين بسأل واحد من السيكيورتي عن الشنط و بحكيلو انه النا نص ساعه, مسك الورقه المكتوب عليها المعلومات و تفرج عالمونيتور, وبحكيله مكانك صح بش شنطتك مش موجوده شكله, بحكيلو مش بس شنطتي, شنط كل العالم هاي, غاب الموظف و رجع بحكيلنا شنطكم عالقشاط التاني مش هاد, كلنا زي التتار لفينا عالقشاط اللي حكالنا عليه,بعد ربع ساعه واحد من الموظفين الواقفين بحكيلنا, انت جايين من الامارات حكيناله اه, بحكيلنا شنطكم عالقشاط التالت, برضه بروح معنويه عاليه ما حكينا ولا كلمه و رحنا عالقشاط التالت, طلعو الاخوان حاطين كل شنط الطيارات اللي اجت على هالقشاط, والموظفين بنزلو الشنط و بكوموهم فوق بعض عالارض, يعني مسكين اللي شنطته انحطت تحت بدو يستنى لبكره.

عاده بس يجي حد من السفر, خواني يعني ماما بتحب تشوفهم من عند الصراف, في زجاج بفرجيك اللي واقفين عند الشنط, وانا ماشيه بتطلع لقيت ماما , بطلت مركزه باي وقبلات طائره كأني غايبه الي 5 سنين مش 3 اسابيع, بأشرلها انو لحظه بس بدي اجيب الشنطه ومع تأشيره الشنطه اطلعت عالقشاط ويلا هي الشبره النيليه بتلولح قدامي, هلأ تخيلو الموقف بالعرض البطيء,ما في مجال تمررها بين جحافل المسافرين, ولتمررها بتكون الشنطه صارت بين اكوام الشنط, بدون تفكير تركت العربايه اللي ماصدقت الاقيها وعليها شنطة الايد و اللاب توب :$ و دفعت كل مين اجا بوجهي , وهجمت عالقشاط و سحبت الشنطه متل شيخ الشباب و عيني رايحه جاي عالعربايه و عالشنطه وعاللاب توب , اخدت شنطي و اخيرا طلعت من المطار.

هلأ ما في عنّا غير هالمطار الرسمي لكل الاردن, على اعتبار ان مطار ماركا الحركه عليه كتييييير خفيفه و معظمها طيران داخلي, الموضوع ما اله دخل بتزبيطات المطار اللي مش راضيه تخلص و لا بالشارع و المطبات, الموضوع عباره عن تنسيق و ترتيب و شغل صح وهو ابسط اشي ممكن يتواجد بمؤسسه خدميه للشعب و للزوار في المطار, وهاد كله مش موجود بمطارنا...وبعدين يعني؟؟؟؟

عفكره سمعت اللي بكوّم الشنط فوق بعض بحكي, يالله عملو نفس امبارح و حطو الشنط كلها على نفس القشاط, و المشكله انه اصغر قشاط....يعني الموضوع مش اول مره و واضح انه مش اخر مره راح يصير....

المتنقبات و المتنقبين....




كل اثنين بروح انا و بنات خالي و بنات خالتي لدرس دين في بيت دكتوره فاضله ورائعه جدا, الدرس عالساعه 5:00, هلأ بالتوقيت الصيفي 5 مش كتير متأخر لكن بالتوقيت الشتوي فهو متأخر نسبيا و خصوصا انّا كلنا بنصلي المغرب قبل ما نطلع و بهيك وقت الترويحه بكون متأخر 8:30 او 9 , المهم بعد المداولات اتفقنا نروح كلنا بسياره وحده مع بنت خالي.

الاثنين الماضي و احنا مروحين صار معنا موقف حيرني بالبدايه بعدين فهمته, روحنا عال 9 و بالطريق وقفتنا دوريه شرطه, بنات خالي التنتين متنقبات, وحده بتسوق و التانيه قاعده جنبها, صفّت بنت خالي بتسألها اختها " اطول رخصه السياره ويلا ما في داعي" ؤدت عليها انو لأ, وصل الشرطي لشباك السياره, حكتلو بنت خالي اللي بتسوق السلام عليكم, وبنت خالي اللي جنبها طملت شوي لحتى يشوفها الشرطي و حكتله السلام عليكم, اتفرج علينا انا وبنت خالتي اللي قاعدين ورا,سألته اذا بدو الرخص حكالهم لا خلص الله معكم.

انا استغربت الموقف, انو يعني مبينين بنات بالسياره ليش الزناخه هاي و ليش يوقفنا, بتحكيلي بنت خالي لا تزعلي ولا تدايقي بالعكس انا بس يوقفونا بنبسط :$ , انا استغربت كيف بتنبسطي, بتحكيلي خليني اجاوبك بحادثه صارت معنا شخصيا.

بتحكيلي " اول يوم بعيد الاضحى كنت رايحه الصبح علشان اوزع لحمه على اهل النصيب , و فجأه وقفتني دوريه شرطه, اجا الشرطي ولاجل الصدف كنت ناسيه شنطتي كلها بالبيت, حكيتله اني ناسيه الشنطه واذا بدك بترك موبايلي عندك لاروح واجيب الرخص والبيت مش بعيد" بتحكيلنا " وانا بحكي معه في اشي ماسكه بايده كأنه بطلع فلاش, كأنه كاميرا او اشي و انا مش فاهمه, حكالي الشرطي خلص يختي الله معك بس ما تنسي الرخص مره تانيه" و بعديها بدت تحكي اختها - بنت خالي التانيه - بتحكيلنا " بنفس اليوم كان عندي مشوار لجبل الحسين صفيت سيارتي و نزلت عالمحل و انا بطريقي للمحل شفت شرطيين ماسكين ست منقبه و بجروها جر, انا انصدمت كيف هيك بعملو فيها و عيني عينك, شوي واحد من الشرطه مسك الحجاب و النقاب للست و سحبهم واذ بالست المنقبه واحد...زلمه " بتحكيلنا والله شفته وهو منقب وفكرته ست, و صحاب المحلات صارو يسبسبو و هلأ كان عنا و هلأ مشي من هون و صارو يتطلعو عبنت خالي و مبين الشك بعيونهم, حكت السلام عليكم و دخلت المحل.

و من يومها و كل ما راحو مشوار بتوقفهم دوريه شرطه و بس يحكو السلام عليكم ويتأكدو انهم بنات , بمشوهم وبنات خالي بحكو انهم مش متدايقين بالمره, بالعكس خليهم يكشفو اللي بتسترو تحت غطاء هدفه ديني وسامي ليعملو افعالهم الدنيئه, لا اخفيكم اني انصدمت, سمعت عن هالقصص كتير و سمعت بمصر شو صار و كيف صار في اعتراضات على موضوع النقاب بالازهر و بالجامعات, لكن بس تسمعي القصه من ناس مقربين الك و بهالاكشن هاد الا ما تنصدمي...

نتائج التوجيهي ...كلاكيت تاني مرّه



هالموضوع راح ارجع انشره للمره التانيه على التوالي لاني حسيته شامل كامل وما في اشي جديد اضيف عليه, وصف شامل للاحداث اللي راح تصير بكره :)


-----------------------

اول شي بتمنى للجميع النجاح في كل صباح - زي ما كنا نكتب بالتاني ب على الكتاب :)
وبما ان النتائج المسا فبتمنى للجميع الهناء في كل مساء -كنت كاتبه الحساء في كل مساء بس شكرا للمدون Mabsoo6 على اقتراحه السابق

السيناريو الطبيعي لاحداث اليوم

المفروض النتائج بتطلع عالساعه 10:30 عال 8 ببدو العالم يزمرو, انهم واصلين والهم ناسهم اللي بجيبولهم الاخبار قبل ما تنزل عالسوق.
بتطلع النتائج وببدا الطخ,عند الناجحين وعند الراسبين , وطبعا في عده انواع للطخ, نبدا بالناجحين

الطخ الفشك اللي بالسما عند الناجحين, والموجود بعمان الشرقيه والغربيه و الوسط واي مكان بدك اياه, الطخ طخ مع اختلاف نوع المسدس ولبس الطاخخ - كل ما اسمع الصوت بتزكر دعايه كانو يجيبوها عن مديريه الامن العام, بيجي شب وبكون كتفه ملفوف و بحكي "كنت قاعد بالحوش و فجأه ما حسيت غير اشي سخن على كتفي ويلا الدم بنفر نفر", فانا كل ما اسمع صوت الطخ بحكي لاهلي "كنت قاعد بالحوش" وببعد عن اي شباك بالبيت :$

وفي طخ الالعاب الناريه اللي كنا من عيد استقلال لعيد استقلال لنشوفه ونطلع كل الاردن عالسطوح علشان نشوفها,صار بسبب وغير سبب هلأ.

وفي طخ العين اللي راح تضرب الناجحين , مع كلمه مبروك بنطخ الشب او الصبيه عين بتطرحه ارضا لمده اسبوع.

وطبعا الكلمه الشهيره عند الاب " ابني" ..."بنتي"..."تربايتي"

نيجي للراسبين, الراسبين نوعين

اللي بعترفو اهاليهم بانهم راسبين, وبرضه في طخ بس بنص راسه هالمره.


و برضه في طخ الحكي, ولك يا هامل طول نهارك عالاساطيح ,ولك يا صايع ولا مسكت كتاب خلي صحابك الصيع ينفعوك, ولك فضحتينا طول نهارك من مسلسل تركي لمسلسل تركي تاني, و كل ما اتصل حد من العيله ويحكولو الاخبار المشؤومه ببدا الموشح من اول وجديد, و الكلمه اللي راح تتكرر بكل بيت من الاب للام "شايفه ابنك" ..."شايفك بنتك و تربايتك".... وبصير ولادها لحالها ساعتها.


واللي ما بعترفو بان ابنهم راسب و بطخو, و بوزعو حلو واحتفالات والمشكله ان الشب بعيش الدور و بصير يرقص و ينادي صحابه
صاحبتنا بتحكيلنا ان ابن خالها السنه الماضيه نجح و عمل حفله كبيره وعزومو كل العيله و بس صار تقديم للجامعات حكو انهم قدمولو و ما طلعلو وبدهم يسجلوه بجامعه خاصه, صاحبتي بتحكيلي كنا ندور عالنت عاسماء الناجحين فخطرلنا نشوف معدلاته, طلع الشب راسب :)


اذا اليوم حضرو حالكم, اصوات زوامير وسيارات طالين الصبايا من الشبابيك وبصرخو و الشباب فرحانه من كل قلبها مش لنجاحهم الشخصي ابدا, فرحانين بفرحه الصبايا,واللي عنده حد ناجح توجيهي واللي ما عندو طالع بالسيارات وهات يا زوامير, نوع من انواع المشاركه الوجدانيه يعني.
اصوات الالعاب الناريه - النوريه- و اصوات اطلاق العيارات الناريه- بديش استخدم كلمه الطخ للمره المليون- .

مره تانيه مبروك للناجحين وحظا اوفر في السنوات القادمه للراسبين

Home Sweet Home :)


يوم السبت الماضي و تحديدا الساعه 10:35 دقيقه رجعت سالمه الى ارض الوطن :)
الحمد لله كانت الاجازه بتجنن و ما خليت دقيقه ولا ثانيه تروح علي , كل شي زي ما بدي و اكتر و الشكر اولا لله و من ثم لاخواني و مرتاتهم و لفروووحه و عبوود

كتير اشتقت لمدونتي و لكتير من المدونات اللي بحب دائما اقرأها و للاسف ما صحلي اقرأها الفتره الماضيه, بس على ميين كله ان شاء الله راح ينقرأ, المدونات اللي كانت تفتح معي عالموبايل كنت اقرأها بس ما اعلّق مع انو في كلام كتير يكون عندي و هلأ راح الف عليهم كلهم و اقرأ اللي راح علي

اسفه كتير لتأخري بنشر و الرد على تعليقات المدونه الماضيه :$ و هلأ بس اخلص من تحميل الصور هون راح اروح و ارد
شكرا لكل اللي ضلو يتابعو مدونتي و لكل اللي زاروها بالفتره الماضيه لان العداد ببين انهم ما تركوها و غابو عنها زي ما انا غبت
بس كلّه بتعوض ان شاء الله...عندي كتير مواضيع حابه اكتب عنها و خصوصا مطارنا العزيز :(
انتظرونا و زورونابتمنى انكم تجدون ما يسركم :)

صحيح...صحيح انسيت احكيلكم مش ارجعت لقيت مديري طاير :) ان شاء الله المدير الجديد يكون منيح, هو موظف من اللي كانو معنا و اللمفروض كان يعاني متلنا من المدير, ان شاء الله ما يكون تأثير الكرسي عليه كبير و يتحول متل اللي قبله , مبدئيا كل شي ممتاز و الوضع مستتب و ضغط الشغل شوي خف عن قبل لانه توزع عالكل, بكره بدوب التلج و ببان المرج زي ما بحكو و بنشوف
و عسيرة التلج :) سمعت ان الخميس والله اعلم تلج ياااااااااااااااااااي بدنا نعطل :)))




هلأ نيجي للصور

مش متزكره شو اسم كل مكان اللي متزكرته راح اكتبه

دبي مول





كنا قاعدين بكوفي شوب مش متزكره وين بالزبط وكان هاد الفندق قدامنا اعتقد دبي مول



الممزر

دبي مول
هاد المحل فيه كل انواع الكاندي اللي ممكن تخطر ببالكم اشي زي الاحلام حسيته
بالبدايه قررنا انه بس نتفرج و بالاخر طلعنا بكيس ملياااااااااااان كاندي :)


حديقه بالعين





فيستيفال ستي ...اعتقد :$






قناة القصباء





الغروب من بلكونه اخوي الطابق 14




مسجد الشيخ زايد الله يرحمه - ابو ظبي