لو سمحتي....اسفه...اخر مره...شكرا

النا فتره بنعلم فروحه كيف تطلب بأدب و كيف تعتذر اذا عملت شي غلط و تشكرنا اذا عملنالها اشي, ولكن هالشي بخلينا نمشّيلها اشياء كتير, يعني كلمة لو سمحتي او "امتّي" زي ما هي بتحكيلها تعتبر كرت اخضر لكل شي ضمن المعقول طبعا, يعني بالليل بعد ساعة معينه ممنوع السوائل منعا لخروجها وقت النوم فكلمة "امتّي قطّه" يعني لو سمحتي نقطه مي- مني اخدت هالكلمه :) - فأحنا مضطرين نعطيها بما انها حكت لو سمحتي, و لو كبت صحن الاكل عالارض و حكت "اتّه ...ملّه" يعني اسفه اخر مرّه برضه لازم نسامحها, لنشجعها على استخدام هالكلمات دائما.

يعني بدنا نقدم تنازلات لحتى نحصل على طريقة تعامل معينه منها, بدنا شي لازم نقدم شي مقابله, لازم نغض بصر, لازم نبالغ بفرحتنا باستخدامها الكلمات ولازم نزقف و لازم نحكي "آآآآآآفوووو" .... برافووووو.

وضعنا زي دولة مصغره, فرووحه الشعب و احنا الحكومه, بتغلط بتتعاقب, بتتعامل منيح بتتكافئ, لكن لمّا فكرت بواقعنا احنا كشعب و حكومتنا لقيت ان كل هالحكي ما في منو, مافي غير احنا بنعطي و همه باخدو بدون اي تقديمات بالمقابل , احنا بنموت وهمه بعيشو, احنا بنحترم وهمه بدعسو على كرامتنا, احنا بننحت وهمه بحملونا جميله بالكم دينار اللي بعطونا اياهم, احنا بنزرع و بنحصد و باخدو كل شي و بعطونا باقي اكل السنه الماضيه

هل اللي بنعلّمه للصغار غلط و المفروض نعلمهم يكونو كذابين و نصابين و بس ياكلو حقوق العالم نزقفلهم؟؟؟ ويلا لازم نعاقبه بس يكون مؤدب ؟؟ويلا نعلمه لا يحترمنا ولا يحترم حاله؟؟ ويلا احنا اللي عايشين بعالم اعوج؟؟؟

اللي بعتذر و اللي بستسمح و الماشي صح يستغل و ينحرث عليه و مرات بندعس عراسو و معظم الاحيان يطلق عليه لقب "هبيله" !!!

و اللي بسرق و بشتغل من تحت لتحت و بكذب و بتأمر و بطلع بخطط لئيمه بنحكي عنه ذكي و فتح و بلعبها صح وما بيجي غير واقف..

اللي بعمل شي منيح و اذا لا سمح الله قدر يبين اللي عمله بعد محاولات الطمس اللي بعملوها بحبطوه و بخلوه يندم انه فكر, واللي بعمل غلط بكرموه و بيعطوه جوائز و ممكن يصير سفير النوايا الحسنه للذمة والضمير, بنحكي للحكومه لو سمحتي بضربونا عراسنا, بنحكيلهم شكرا بضربونا كف, بنحكيلهم اسفين بضربونا الكف التاني.... احنا ما بدنا اياهم لا يزقفولنا ولا بدنا يحكولنا برافو ولا بدنا ضحكه رضا...بدنا حقوقنا ناخدها بدون ما ندوق المر, بدنا نعيش وناكل لقمتنا اللي بنستاهلها بعد تعبنا و كدنا, بمنتهى البساطه....بدنا نعيش.

فكرة حلوه كتير

من الاشياء اللي بتتغير بحياة الشخص بس يتزوج هو اكتسابة لبعض العادات من الطرف التاني و اللي بتصير تلقائي عاداته هو, في منها السيء و في منها المنيح, مثل حب القراءة مثلا, في ناس بتشجع الطرف التاني للقراءة وفي ناس بتشجعه على اهمال القراءة و البعد عنها ومش عن قصد هالشي, هو بس انه ما بحب القراءة و يومهم ما بكون في وقت مخصص للقراءة.

انا و اخواني عندنا تعلّق رهيب باغراض الماضي و خصوصي الاواعي, يعني اكيد بنحب نتبرع بالاواعي و لكن في اشياء كتيره محطوطه بالخزانه بركي بيوم صحلّنا نلبسها او كنّا نحبها بوقت ما كان موديلها و مش قادرين نستغني عنها و الها سنه او اكتر بالخزانه, مميتي دايما بتعاني منّا بهالخصوص و لكن للاسف ما عرفت تخلصنا تماما من هالموضوع.

تزوجو خواني واحد ضلّت عنده هالعاده و مرته بتعاني منه و واحد "شفي" - على اعتبار انها حاله مرضيه يعني - زوجة اخوي التاني ما بتحب تخلي شي ما بتستخدمه و هالشي يطبق على كل شي مش بس الاواعي, اذا اشترت تنورة جديده القديمه فورا بتنحط للتوزيع, هي هيك طبيعتها من الاردن و بالامارات استمرت, انا بالاردن بس اقرر اعمل غارة عالغرفه لانظفها بالرغم من استمرار الحاله ولكن بطلع بكم كيس للتوزيع, كنّا ننقلهم من مكان لمكان مش عارفين وين نروح فيهم و لمين نعطيهم و مرات نعطيهم لاي حد بنتوقع انه يستخدمها بس مش دايما في احتماليه لاستخدام الاواعي لانه مستحيل كل شي يكون مقاسه صح, و بعدين اندليت على جمعيه صنّاع الحياة و اللي الهم مخزن خصوصي لهيك شي و في منهم شباب و صبايا بوزعو الاواعي بين الصالح للاستخدام و الغير صالح للاستخدام و بوزعوهم حسب المقاسات, وهمه بعرفو ناس محتاجين و شو عندهم ولاد و بوزعو الاواعي, الله يجزيهم كل الخير يا رب.

الاشي اللي عجبني بالامارات هو اني شفت باكتر من مكان فيه تجمع سكّاني زي صندوق كبير مخصص للاواعي زي اللي واضح بالصورة هاي

حسب ما فهمت من اخوي انه هالصندوق تابع لشركه ممكن تعيد تصنيع الاواعي او توزعهم, هالصندوق بدبي شفته و اخوي ساكن بالعين, بحكيلي ان عندهم شي تاني وهو انه في سيارات كبيره تابعه للهلال الاحمر موزعه باكتر من شارع بالعين و الكل بعرف مكانهم, بياخدو الاواعي و همه ماشيين بحطوهم بهالسيارات و بضلهم ماشيين بدون ضروره ان حد يكون موجود او ياخدهم منهم و هالشي سهّل كتير عليهم موضوع التخلص من الاواعي القديمه و همه متأكدين انها ان شاء الله بتوصل لللي بحتاجها عن جد.

اشي تاني شفته بدبي لكن مش بكل مكان هو انهم بحطو سلاّت جنب بعض لتوزيع القمامه حسب نوعها حتى يصير اعادة تدوير الها هالشي مش الكل بتعامل معه لانه لسا عدد قليل اللي اساس بوزعو مهملاتهم بالبيت و بصنفوهم هيك ليسهل كبهم بالمكان المخصص و لكن كفكره و كبدايه كتيييييييييييير حلوه و مع الوقت الناس ببتعود.

يا ريت نبدا نطبق مثل هالافكار بالاردن ليتشجعو الناس على التخلص من الاشياء اللي مش محتاجينها و بطريقه سهله و يسره , و لحتى شوي نحافظ على البيئه اللي عنا, هو اي نعم في مواقع كتيره بتكون سلات القمامه محطوطين بكل مكان وفاضيين و الارض مليانه اوساخ و كياس و قناني و علب عصير و بلاوي زرقه, اي مرات بشوف بامبرز بيبي مرمي بنص الحديقه هيك ولا حتى مسكر زي العالم والناس :$ بس برضه يمكن يمكن يكون في امل لو حد بدا و بعدين الباقي قلدو او استحو عالقليله.

ان الله يهدي من يشاء

بعد ما تخرجت من الجامعه قعدت سنه كامله بالبيت بدور على شغل و من غير ترتيب اجا الشغل, كنت رايحه زياره لبيت عمي و اجا ابن عمي اخر الزياره اول ما شافني بحكيلي " كيف رحتي من بالي!!" طلعو بدهم بالكليه اللي بدرّس فيها محاضر حاسوب و اتفقنا تاني يوم اروح عالكليه و اقابل مساعدة الرئيس وفعلا و بعدها قابلت الرئيس و وقعت عقد و بديت تدريس تاني يوم فورا :).

مرحله التدريس كانت لسنه اولى و سنه تانيه و كانت كتيييييييييير حلوه وفيها مواقف كتيره خصوصي اني كنت بال23 فكنت تقريبا بعمر الطلاب و احيانا اصغر منهم, وكانت كتيييييييييييييييييييييييييييير متعبه و سبحان الله عأخر الفصل طلعلي بالحكومه و طبعا على رأي المثل .....مش متزكره منه الا الميري واتمرمغ فيه :$ المهم خلصت الفصل وطلبو مني اراقب شامل و فعلا كان لسا في وقت لبداية الدوام بالحكومه.

خلال مراقبتي للشامل تعرفت على مدرسات من كليات تانيه, وحده منهم اول ما شافتني انصدمت وانا قلبي من جوا فرح - ببقى احكيلكم قصتها بعدين - المهم وحده من المدرسات كبيرة بالعمر و كان الكل بباركلها عالحجاب و هي صارت تبكي , حكتلنا قصة حجابها

تزوجت مباشرة بعد التخرج , زوجها كان متخرج من روسيا تخصصه بشي بخص الديانات مش متزكره شو بالزبط و معه دكتوراه و كان شيوعي و معلنه هالشي, و اهلها بوقتها ما عارضو وما كان عندهم مشكله و اول ما اجا عالاردن اشتغل بجامعه من الجامعات الاردنيه و افضل ماده قريبه من تخصصه كانت الثقافة الاسلاميه :$ كان يدرس الطلاب الماده و يحكيلهم انه مش مقتنع باللي بدرسه و يحاول يدخل افكار شيوعيه من خلال المحاضره, طبعا ما كان معترف باي ركن مطلوب لا صلاة ولا صوم ولا اشي, وهي كانت ملتزمه بالصلاه و كانت توصل فيه انه وهي بتصلي يحط ابنها على ظهرها لحتى يدايقها, كانت تحكيله عن رغبتها بلبس الحجاب و كان ردّه " يوم ما بدك تحطي هالشريطه على راسك فورا بتروحي عبيت اهلك" و كلنا بنعرف ان ايام زمان كانو الناس مش كلهم ملتزمين بالدين, كان العادات و التقاليد و ثقافة "العيب" هي اللي بتحكم مش "الحرام", و طبعا فكرة الطلاق مرفوضة تماما بوقتها و لهلأ, فأستمرت بحياتها زي ما بده, كانت تصلي لانه ما بقدر يمنعها من الصلاه بس دايما يحاول يعيق هالموضوع.

بيوم كانو طالعين يسهرو كعادتهم براس السنه الميلاديه, كانو ساكنين فوق بيت والدته, و لازم قبل ما يطلعو يمرو عوالدته يسلم عليها و يحكي معها و يطلع, وبالفعل نزلو وحكو و ضحكو و ودّعوها و طلعو, بوقتها ما في موبايلات كان روحو لقو عجئه و ناس, اكشفو ان والدته توفت بعد ما ودعوها بفتره قصيره, و كانت هاي اول صدمه اله, تاني يوم وقت الدفن وبما انه لازم المحارم اللي يحطو المرحومه بالقبر نزل هو عالقبر, ومن وقت ما حط والدته بالقبر لرجعو عالبيت و هو منهار و ببكي, عرفت زوجته و راحت لتهديه و تواسيه , بعد ما هدي حكا لزوجته انه حس بشي جوا القبر بسحبه و كأنه مش قادر يتحرك و حس قديش الدنيا ما بتسوى شي و كيف اخرنا كلنا للقبر, وفورا حكالها بتمنى انك لسا بدك تتحجبي و فعلا من يومها تحجبت و هو التزم بالصلاه بالمسجد و كل سنه بروحو عمره و ربنا رزقهم بالحج

ما حد بعرف شو نهايته و شو نهايه غيره, كتير منا بطلقو احكام على غيرهم وممكن توصل انهم يلعنو و يسبو على ممثل او ممثله و احنا ما بنعرف شو مقدار الدين اللي بقلبهم, تذكرت القصه هاي لموقفين مرو بهالفتره, اول شي جديد حضرت فيديو لحلقه اللقاء مع حلا شيحه و زوجها على قناة الناس عاليوتيوب و جد هزني كلامهم و طريقة هدايتها و اشي تاني تعليق ما نشرته بناء على طلب صاحبه وصلني على بوست بكفي تقييم للعالم و حبيت احكي هالقصه لعل و عسى هالقصه تريّح البال

اللهم احسن خاتمتنا

كل عام وانتم الى الله اقرب

كل عام وانتو بالف خير

ان شاء الله تحققو بهالسنه كل احلامكم اللي ما تحققت بالسنوات الماضيه

و ربنا يستجيب لكل صلواتكم و ادعيتكم

سنة خير عالجميع ان شاء الله

و لا تنسو صيام عاشوراء

9 محرم ان شاء الله حيكون يوم الاربعاء

تقبّل الله من الجميع

Open minded

المصدر

نفسي اعرف شو يعني؟؟؟

شو يعني بس وحده تحكيلي خليكي Open minded!!!

شو يعني لما الشب او البنت بس يجو يتزوجو يحكو ان اهم شروطهم ان شريك الحياة يكون Open minded!!

وهل يا ترى قصدهم يكون Open minded بتصرفاتهم ويلا بردود افعالهم؟؟

بعض اللي كررو هالكلمة قدامي كانت جملةOpen minded بتعني اني انا او الشخص المقابل يسكت عن اي مخالفة دينيه او مخالفة لعاداتنا وتقاليدنا

Open minded يعني تقبل البنت انها تستغل من قبل زملاء الشغل و الادارة الاستغلال القذر

Open minded يعني الشب يقبل اخته او زوجته تقضي السهره وهي بتجامل س من الناس بطريقه مبتذله علشان مصلحه شخصيه الها و احيانا للاسف اله

Open minded يعني ان الشخص يسكت و ياكل هوا و يكون زي رجل الكرسي باي مكان و ينمسح بكرامته الارض وما يعترض على اي شي و يتقبل كل ما هو جديد مخالف لكل القيم الدينيه والدنيويه اللي انغرست فيه لحتى ما يكون انسان رجعي وغير متفهم و غير متحضر و مواكب للعالم بتطوره

لهلأ مش فاهمه...... كيف انه الشخص يكون Open minded بالمعنى الصح و الايجابي...اذا في معنى ايجابي اساسا

.يا ريت حد يفهّمني.....

بكفي تقييم للعالم....

موضوع لبس الحجاب كان من المواضيع المصيريه بحياتي, لبسته وانا بسنه رابعه جامعه, كنت افكر فيه من سنوات ولكن قبل ما البس الحجاب بشهر خلص وصلت للاقتناع التام انه لااااااازم اتحجب, و سبحان الله ربنا بعتلي عدّة رسائل, يمكن متهيئلي و ممكن فعلا صارت بس انا مقتنعه تماما ان ربنا ببعت لكل واحد فينا رسائل بكل شي بحياته لحتى يهدينا للطريق الصحيح و احنا اللي بنفهمها او ما بنفهمها و احيانا كتير بنفهمها بس في منّا بطبقها و منّا اللي ما بطبقها.

كنت كل ما اجرب البس حجاب الاقي حالي ابشع وحده بالدنيا, حتى يوم ما اشتريت الحجابات كنت اقيسه و احكي يا الله ما ابشعك و اعطيه للبياع اني بدي اشتريه

من القصص اللي صارت معي و اعتبرتها رسائل, قبل ما اتحجب باسبوع كنت راكبه بالباص مروحه من الجامعه, ركب الباص حج كبير بالعمر, كبير كتير وماشي على عكازات, قام واحد من الشباب علشان يقعد حكاله اشي بما معناه انه ليش نقعد وما في وقت لنقعد و الدنيا ماشيه ولازم ما نضيع اي وقت ولازم تعمل لاخرتك لانها جاي و شو خمس دقائق واقف وشو 10 دقائق واقف والعمر كله بمشي, انا حسيت الحج بحكي معي انا...انو شو بتستني ولايمتا!! روحت حكيت لماما هلأ بدي انزل عالسوق اشتري حجابات و هاد اللي صار, اشتريت حجابات و طبعا اشتريت اواعي جديده, مش لان اواعيي مش مناسبه للحجاب هو كان بس ناقصني الحجاب و لكن لحتى نفسيتي تتحسن شوي

يوم ما قررت البس الحجاب طلبت من صاحبتي انها تستناني بالمجمع لاني بدي اياها تكون معي بس الكل يشوفني, و فعلا تلاقينا هناك , ردود الفعل انقسمت لعدّه اقسام, اشي حكالي انهم كأنهم متعودين على شكلي بالحجاب و انه ما في شي تغير, و جزء باركلي بحراره جد فرحتني وكان عنّا استاذ مساعد كان في بيني و بينه مشكله في ماده بحوث العمليات عاسلوب المناقشه المهم شافني من بعيد ضحك و رفعلي اشارة الابهام انه جود فور يو :) كتير انبسطت يومها هو اي نعم ردينا تمشكلنا وقت مناقشة مشروع التخرج بس عادي .

هلأ الشباب يمكن ما بعرفو معاناة لبس الحجاب مش النفسيه لأ السمعيه :) اول فتره كل بنت متحجبه جديد بكون صوتها شوي اعلى من قبل, مش للفت الانتباه لا سمح الله لأ بس لانها بكل بساطه مش سامعه غير صوت حالها :), تخيل ان فجأه في شي على دينيك مرافقك بكل حركه, حتى صوت حت القماش ببعضه جنب دانك بكون بقوه 10000 فولت , و اشي تاني ان في بنات متحجبات جديد مع العجئه و مع قلّه الاحتراف بحط الحجاب فجأه الشعر بنطلق للخارج من كل جهه من دون قصد - هون بعني اللي مش قصدهم تبين غرتهم و طراف شعرهم لان لهلأ في ناس بعملو هالحركه الغريبه عن قصد - فأنا طبيعي لسا اول يوم و كل شوي لازم اروح ازبط الحجاب, شافتني بنت من بنات " المصلّى " بتحكيلي شو هالحجاب اليوم بس و يلا لكل يوم, حكيتلها طبعا لكل يوم, بتحكيلي طيب مدام تحجبتي بلاها تطليع الغرر هاي, قهرتني و كنت لساتني من اللي بكتمو بنفسهم و ضليتني ساكته.

شوي رحت عالمصلى كعادتي من قبل ما اتحجب لاصلي الظهر, شافتني صاحبتي اللي معي بالقسم واللي معي بمشروع التخرج وبرضه من اللي يطلق عليها "بنت مصلّى" اتطلعت علي من فوق لتحت و رفعت حاجبها و حكتلي " لساّ....قدامنا كتير لسّا لنوصل" و كبّرت و بدت تصلي !!! شو هالاحباط!!!

مشكلتنا ان في بعض الناس حوالينا بفكرو حالهم ختمو العلم بالدين و وصلو للقمه مع اني مقتنعه ان بعد رسول الله صلى الله عليه وسلم ما في حد بوصل للقمه و اللي بفكر حاله وصل يعرف انه كتييييييييييييييير بعيد عن الدين الحقيقي, ناس بتفكر حالها بموقع يسمحلها انها تقّيمني و تقّيم ديني و تديني, بحكولي انتي مش مجلببه وانا الي الظاهر و الظاهر اللي مبين مش كامل لهيك انتي دينك مش كامل!!! ومين انتي لتقيميني؟؟؟ ومين حضرتك لتفكري ان انا ما الي انتقادات على تصرفاتك!!

المشكله ان في ناس ايمانهم بكون ضعيف او متزعزع و تصرفات مثل هالنوع بتخليهم ينفرو و يبعدو عن الدين بدل ما يقربو و يتمسكو اكثر و يحاولو يستزيدو , دائما بحد ربنا الغفور والرحيم اللي خلّى المحاسبه و العقاب و الثواب بايده هو مش بايد واحد من هالبشر....

ملاحظه ع الهامش

كنت متصوره صورة لكتاب التخرج و تحجبت بعدها و ربنا يسر اني اعطيهم صورتي بحجاب و اللي طلعت دمار مع اني اخدت صاحبتي لتتأكد ان شكلي منيح....عجييييييييييييييب منظر الحجاب طلع اشياءات طالعه و مزيوحه و ملفوفه :)

ظاهرة "واعظات" بيوت العزاء

كتير ستات صايرين يحضرولهم كم من محاضره عند داعيه او حتى مش ضروري يتعبو حالهم ويطلعو, بفتحو التلفزيون على محطه دينيه و بسمعولهم كم من حلقه لبرنامج لشيخ من الشيوخ الثقه و بعد فترة بتعتبر نفسها مؤهلة لانها تصير تعطي دروس دين و مرات ممكن تفتي و تقرر شو الحلال و شو الحرام بناءا على ثقافتها اللي وصلتلها والللي بنظرها قمّه و خاتمه للعلم.

هلأ انّا نحضر محاضره بالعاده بتحرّى الشخص انها تكون ثقه و متأكد من خلفيتها الدينيه للداعيه ليعرف مدى استفادته من هالمحاضره - مع اني قبل فترة حضرت محاضرة لربى قعوار الله يهديها و كتير تأثرت بكلامها وقتها :( - ولكن مرات بنفرض علينا انّا نسمع لمثل الصنف الاول في بيوت الاجر, بتيجي وحده من هالجارات او القريبات او حتى ادلاء الخير على هال"واعظات" - او شيخه هيك بنادولهم - بتبرعو بأنهم يدلو عليهم او مرات يترجوهم ليجو يعطو درس دين للمعزيات , حتى يكون الكلام كله بالدين و يبعدو الستات عن الحديث - واللي صاير مشكلة العصر هالايام عدم احترام بيوت الاجر و خصوصا بالنسبة لصغار السن

المشكله ان في ستات من اللي حيسمعو كلام هال"واعظه" حيقتنعو فيه ومش هون المشكله...المشكله انهم راح يتناقلوه بينهم و عأساس انه حقيقة ثابته ما بصير يتشكك بصحتها.

بتذكر لمّا توفت قريبه النا اجت وحده من الجارات و صارت تحكي درس , اسلوبها جدا بسيط ولكن مناسب لبساطه الموجودين ومخاطبه مباشره لعقولهم, حلو وعادي و لكن حكت اشي غريب , ان ملك الموت عزرائيل , ان جسمه عباره عن عيون بعدد البشر و كل ما حد توفى بتتغمض عيونه على جسد عزرائيل O_o الستات كلهم انفعلو و بدو يسبحو و يكبرو ويهللو, انا انصدمت بس ضليت ساكته, مرة ابن عمتي ما شاء الله عليها انسانه رائعه خلقا و خُلقا , جميله من الداخل ومن الخارج, ابتسمت و سألتها طيب هلأ انا عيوني كبار و خضر, و عيون فلانه سود, العيون اللي عليه بكونو بألوان عيونا و احجامها ويلا كلنا نفس الشي, مع ابتسامه بتبين انها بتسأل السؤال كنوع من عدم الاقتناع بالكلام, انحرجت الست و الستات بين عليهم انهم بدو يفكرو بمصداقيه الكلام.

قبل كم يوم كان في بيت اجر لناس بعاد و انا حبيت اروح مع ماما , المهم في ست اجت و قعدوها بنص القعده و بدت تحكي زي درس صغير, البدايه حلوه و دعاء و عن الاتعاظ من الموت, وانتقل من موضوع لموضوع و صلت لموضوع الهجوم على سيدتنا عائشة ووالدها الكريم ابو بكر الصديق رضي الله عنهما, وصلت لقصه غريبه عجيبه عن سيدنا ابو بكر الصديق, عن ان سيدنا ابو بكر الصديق تصدق بكل امواله حتى انه تصدق بملابسه و انه بقي في الملابس الداخليه, و انه بطل عارف يطلع من البيت, بعدين راح لسيدتنا عائشة - رضي الله عنها - يطلب منها ملابس فما كان عندها غيرعبائه ممزوعه, فحاولت تخيطها على قدر ما بتقدر و بعدين لبسها سيدنا ابو بكر وهي مرقعه , طبعا الستات كلهم مشدودين و منتبهين و منسجمين مع القصه, وكان صوت الاخت يعلى و يوطى بأحداث القصه, و علّت صوتها بان جاء الرسول صلى الله عليه و سلم يحكي لستنا عائشة بأن جبريل نزل عليه بعبايه ممزقه و لمّا سأله الرسول عن السبب قال انه نوع من انواع التكريم لسيدنا ابو بكر الصديق, طبعا الستات بدو " لا اله الا الله" واللي بكت واللي اقشعر بدنها, انا بصراحه انصدمت, انو انا بعرف قصه ان سيدنا عمر تبرع بنصف ماله و سيدنا ابو بكر تبرع بكل ماله ولكن هالتفاصيل حسيتها مبالغ فيها و اول مرّه بسمع فيها, الاسئله صارت تتدافع بعقلي و وصلت لحلقي و طلع السؤال لا اراديا, شكرتها و حكيتلها الله يجزيكي الخير عاللي عملته و تذكيرنا بالموت ومن هالحكي وسألتها عن مصدر القصه, لاني اول مره بسمعها, بعد ما كانت مبتسمه و ملامح وجهها كلها سماحه قلبت, ما عجبها و حكتلي انها مذكورة بكتب كثيره و انها مرويه من ناس ثقه و انها لو انها مش متأكده منها كان ما حكتها , مع ذكر يا بنتي و حبيبتي كنوع من تلطيف الجو و تحجيمي :)

وفجأه كل الستات صارو يتفرجو علي و يتوشوشو, كنت بدي ارد اسألها اسأله اكتر او عالقليه عن اسم كتاب اللي ما حكتلي اسمه بس ما حبيت اعمل شوشره و ترجيت ماما ما تعلق هي كمان لانها كانت بدها تبدى هجوم عالاخت,بضل بيت اجر و ناس ما بعرفهم كتير , بس عالقليله عملت اللي علي و اذا في حد من الستات كان عنده تساؤل بخصوص مصداقيه القصه صارو يفكرو اكتر, و بعد كم من دقيقه استأذنا انا وماما و روحنا :)

عمره حد سمع بتفاصيل هيك قصه؟؟

للاسف كترو هالنوعيه من الستات بحياتنا و اللي بعتبرو حالهم وصلو لقمّه المعرفه بالدين و بالتدين, و للاسف في ستات بصدقو اي شي بنحكالهم بما انه تحت مسمى الدين او اذا صاحبه يعتبر او يطلق عليه اسم " متدين" من دون اي تأكد من الكلام اللي بنحكى او عالقليله ترجيعه للمنطق و التفكير فيه بالعقل مش بالعواطف.

زيارة مع السلامة

كتير رجال بشكو من مرتاتهم او خواتهم او الستات اللي معهم انهم بعد زيارة طويله عريضه لمدّه ساعات, بس يقومو يروحو بتبدا الستات زيارة جديده قد تمتد لساعه قدام الباب :)

بأخر لحظه من الزياره بتتذكر وحده منهم اشي مهم ما حكو عنه, اواتفاق المفروض يتفقو على تفاصيله بس ما خاضو فيها لسا, الرجال ما بعرفو ان زيارة وقفة الباب الحكي فيها بكون اهم كتير من حكي الزياره كلها , بنودع و بنوقف لنحكي مع السلامه وفجأة بتظهر جمله اه صحيح.... او نسيت احكيلك او سؤال بستغرق الرد عليه و شرحه نص ساعه :)

هيك احنا شو نعمل, او يمكن معظمنا اذا مش كلنا, حتى عالمسنجر بكون في النا زي وقفة الباب, 15 الف تصبحي على خير بنحكي بين الكلام و بعد ما نكون خلصنا الحكي بنص ساعه بنسكر المسنجر - طبعا هاد بس نكون فاضيين مش يحظه و بتغيبي اسبوع وخده بالك حضرتك :)

مهما شرحت و مهما شكو الرجال من الموضوع ما النا غنى عن هالزياره , فبدكم تتأقلمو و تبرمجو حالكم على هالوضع, بدكم تلاقو حلول غير انّا نبطل هالعاده الحلوه هاي, بابا مثلا بعد ما يأس منا انا و مميتي , بس نكون بمشوار بحكي لماما يلا, بتناديني ماما اذا كنت قاعده مع الصبايا و بضل بابا قاعد لحتى نخلص كل احاديثنا و نوقف عالباب انا وماما وحاملين الشنط , بعرف ان 3\4 زيارة وقفة الباب خلصت بقوم بشغل السياره و بنلحقه :)

فرتبو اموركم يا الرجال على الوضع و ما تتذمرو منه, هاي مش مشكلتكم الشخصيه, هاي مشكله عامه وما حد لهلأ وجدلها حل , فبدكم تتأقلمو :)

شو بالنسبه...7

ملاحظين ان في ناس بطلت تميز بين الجرأة - كنت بدي احكي الصراحه بس الموضوع صار اكبر من بس صراحه - و بين الوقاحه؟؟؟

ما بعرف ايمتا بالزبط تعدينا حاجز الخجل المحبب والمطلوب و الادب و الاخلاق لوصلنا لمنطقة الوقاحه بالخوض بتفاصيل الامور

بدت بالافلام و بعديها بالدعايات و بعدها المسلسلات و للاسف هلأ صارت موجوده على ارض الواقع, من ايمتا حياء البنت صار اشي غلط و ما بتصير كول و صريحه الا بس تخوض بمواضيع يدنى لها الجبين, و تحكي عن تفاصيل خاصه بحياتها كبنت؟؟

من ايمتا خوض الشب واعلانه عن مغامراته و افكاره و خيالاته اللي بتكون بكثير من الاحيان مرضيّه بحته هو جرأة و حريّه تعبير؟؟؟

اشي كتير مستغربته و مع الوقت بتطور و بتتطور المعلومات و التفاصيل اللي بتنشر عالملأ هيك بدون اي رقابة ذاتيه للي بنحكيه و اللي بنكتبه....

شكله من ضمن المقاطعات اللي لازم نعملها بحياتنا, كالتلفزيون و المولات....صار لازم نعمل مقاطعه للناس.

ملاحظه ع الهامش....

لتكونو فكرتو من الصورة اني بحكي عن الانتخابات...لاا لاااااا الله يخليكم مش تورطوني, انا ما الي دخل و خصوصا انه كما ذكر المصدر الاوقاف افتت ان التحريض على مقاطعة الانتخابات في المساجد تعتبر من الكبائر....فما بالكم فيي انا المواطنه الغلبانه !!! O_o

جد شوووووووووو بالنسبه

مش حياة زوجيه

قبل فترة كنّا بنحكي انا و صاحباتي و كل وحده بتشكي من زوجها , قصصهم بصراحه بتكئب, بالذات قصص صاحباتي اللي ساكنين عند او قريب من اهل الزوج, ما بعرف شو هالقصه اللي مش راضيه تنتهي, موضوع الحماه, قصص جد مزعجه و بتخليني احمد ربي اني مش متزوجه, وجع راس و هم و نكد, لكن بعد ما سمعت القصص و طريقة التفكير حسيت ان طبيعي يصير هيك معهم.

من ضمن الحكي بحكيلهم ان الحياه الزوجيه المفروض تنبنى على مبدأ ان كل واحد بده يعمل جهده ليرضي الطرف التاني و ليثبتله محبته , نطت وحده منهم بتحكيلي " غلطانه" وقعدو يعددولي اسس الزواج من اول يوم, و من وجهة نظرهم ان الزلمه من اول يوم بفكر كيف بدي اجيب مناخيرها الارض و كيف بدي افرجيها مين الزلمه و الست بتفكر كيف بدها تخلي زوجها يمشي عالعجين ملخبطوش و انها مش زي باقي البنات و كرامتها ما بتسمح لحد يدوس عليها - هاد تقريبا حرفيا للي حكوه - انا بصراحه انصدمت, شو هالحياه هاي اذا!!! و طبيعي جدا توصلو للي وصلتوله اليوم.

انا ما بدي احكي مثاليات, بدي احكي عن واقع قدامي, عن النماذج اللي قدامي وهي علاقه بابا وماما و علاقة اخواني مع زوجاتهم, انا ما بنكر ان اي حياه بين زوجين فيها ايام هيك و ايام هيك, فيها ايام بكونو كتير متفاهمين و ايام تقريبا مش مستحملين كلمه للتاني, ولكن ما شاء الله اجمالا كتييييييييييير حلوه حياتهم, بابا متقاعد من 8 سنين و بعد التقاعد حسيت بابا وماما قربو من بعض اكتر, ماما لمّا تزوجت اختارت تيتا - والده بابا الله يرحمها - انها تسكن عند بابا مع انه مش الكبير, ولهلأ عمري ما سمعت عن اي مشكله من هالنوع حصلت بينهم, لان بابا كان موضح علاقته بوالدته و بزوجته من اول يوم, خواني نفس الشي بيجو بالعطل عنا او احنا بنروح هناك, زوجات خواني ما في منهم و حتى انهم بشكو الي و احيانا لماما و طبعا تلقائي انا وماما بنوقف بصفهم :) , صاحباتي بحكولي ان ماما حماة من نوع خاص و يا ريتهم زوجات خواني يكونو مقدرينها, وانا متأكده ان مميتي اكيد مميزه لكن بالنسبة لوضوع الحماه فأكيد في كتير بتعاملو مع زوجات اولادهم كبنات الهم, الموضوع بده الطرفين يكونو عاقلين, البنت بدها تعتبر والده زوجها ام الها و الحماة بدها تعتبر زوجة ابنها بنت الها, طبعا لمّا حكيت هالجمله لصاحباتي فقعو ضحك, طيب اذا انتي هاد موقفك و اكيد هاد اللي موصلتيه لام زوجك فأكيد هي التانيه حتتعامل معك بنفس الطريقه, انا ما بنكر ان في امهات بخربو بيوت اولادهم بدون سبب و في ستات ببعدو زواجهم عن اهلهم.

علاقه الرجل بأمه شي و علاقته بزوجته شي, ومحبته الهم تختلف تماما ولا تتقاطع ابدا مع بعضها, ما في مجال للمقارنه لهيك ما في مجال للغيره اللي بتصير, وانا بحمل الزوج كامل المسؤليه, المفروض ما يكون طرف متفرج و في اساسيات بالحياه المفروض يكون الو رأي فيها لتنهي هالمواقف الغريبه, المفروض يوازن بعواطفه و يعطي كل طرف حقّه منها, غير اني مقتنعه تماما ان اذا الزوج ما كان اله خير بأهله فأكيد ما حيكون اله خير بأي حد تاني.

ملاحظه ع الهامش

الصورة كيكه عيد زواج بابا وماما ...5\10 صادف عيد زواجهم ال 38 ما شاء الله ...العمر كله يا رب :)

ماذا لو كنت انا!!!...ماذا لو كنت انت!!!

طل الملّوحي....اسم سمعته لاول مرّه قبل اشهر بسيطه, علمت من خلال ما قرأت بانها فتاه سوريه احتجزت في السجون السوريه و منع ذويها من الاتصال بها, الموضوع لم يلفت نظري كثيرا اذ انني سمعت و قرأت مسبقا عن مدونين و مدونات قد تم اعتقالهم على خلفيه موضوع يمس او يذكر اخطاء حكوماتهم او حكّامهم بشكل مباشر و قد افرج عنهم بعد مده من اعتقالهم او ما زالو خلف القضيان لحين انتهاء مدّه حبسهم,الموضوع مقلق و خطير ولكنني اعترف بأن الموضوع لم يتحمّل مني نهايه اليوم على اكثر وجه لنسيانه.

تكرر اسم طل الملّوحي امامي في اكثر من مدونه و حفظت صورتها عن ظهر قلب, فضولي المتأخر دفعني للبحث عن قصه هذه المدونه , صعقت لما قرأت, طل والتي لم تبلغ العشرون من العمر لها تقريبا سنه "مختفيه" تم التحقيق معها لاول مرّه بسبب مناشدة وجهتها ـ عبر موقع النادي السوري ـ إلى الرئيس بشار الأسد للإسراع في عملية التحول الديمقراطي بالبلاد و قد وقعتها بأسمها الثلاثي, و بعد ذلك تم التحقيق معها على خلفيه تدوينات سياسيه و ضد الحكومه قد كتبتها في مدوناتها . المصدر

قرأت محتويات المدونات الثلاث التي تملكهم المدونة طل الملوحي - المدونه الرئيسيه, Latters , عن القرى الفلسطينيه المهجرة - و للحقيقه لم اجد اي شيء يمس سياسة البلد او الحكومه او الحاكم نفسه, هي تدوينات و قصائد تؤيد القضيه الفلسطينيه و النضال والمناضلين في فلسطين

فكرت في طل, يا ترى ما الذي يخطر في بالها الان وماذا تفعل في هذه اللحظه؟؟؟ ما الذي تتعرض له الان وما الذي تعرضت له؟؟؟ هل يا ترى علمت سبب احتجازها؟؟ هل هي حيّه ام....!!! مع العلم بأنه قد وصل الى عائلتها خبر وفاتها تحت وطأة التعذيب ثم جاءهم ما ينفي هذا الخبر

فكرت في عائلتها, والدتها, قلب الام يكاد ينفطر علينا نحن الابناء ونحن امام ناظرهم و يراقبون حياتنا عن كثب, فما بالكم بقلبها وهي لا تعلم اخبارها و ممنوع ان تراها او تسمع صوتها؟؟؟ وما اخبار قلب والدها؟؟ اخوتها ؟؟؟ ماذا حصل لهم في كل يوم غابت به عنهم, في رمضان, في العيد, يوم ميلادها .... في كل ذكرى مضت و في كل حدث يحصل معهم؟؟

افكر في نفسي, انا والتي اعتبر نفسي قد وصلت الى مرحله ما من الوعي, انا التي كنت ارى في نفسي الجزء العطوف الذي يشعر مع الاخرين,انانيتي و انشغالي في نفسي منعني ان افعل اقل شيء ممكن بالضغط على بعض الازرار للتعرف اكثر على شخصيه هذه الزهره, منعني من بذل اقل عناء لاحاول معرفتها اكثر, شكرا لصديقنا المدون خالد أبجيك الذي بتدوينته الاخير ايقظني, للاسف ليس في يدي ان اقوم بأي شيء ليساعد طل او عائلتها سوى هذه الكلمات لمحاوله نشر قصّه طل لمن لا يعرفها لعل هناك احد يستطيع ان يقوم بما اعجز عنه او يدلني على طريقه للمساعده.

بس بالافلام...

ليش دايما بالافلام و المسلسلات البنت بس تدايق من شي و تزعل, بتدخل غرفتها و بتسكر الباب و بتتركى عالباب و بعدين ايهيء ايهيء و بترمي حالها عالتخت !!!

يعني انا البنت الوحيده وانو يعني عايشة الدور بموضوع الدلال عالاخر, و الي غرفتي الخاصه و عمري بحياتي ما عملت عالمنظر, ارمي حالي عالتخت !!! ليش خير؟؟؟؟ جد لو بعملها كان كرهت حالي

اشي تاني, غرفتي عفكره مش معبيّه دباديب ولا مخده عشكل قلب O_o اي نعم بحبهم و عندي زاويه بالغرفه حاطه فيها دبدوب كبير جبلي اياها اخوي على عيد ميلادي وانا بالاول اعدادي و عندي كمان سلحفاة بتجنن هدية من مرة اخوي محطوطه عالتسريحه, بس ما في غيرهم, ابدا ابدا ما في عالتخت شي و لا عمري حطيت شي, عندي لعب السيندي و الباربي بس محطوطين بكرتونه بالمخزن مش مرميين على كل زاويه من زوايا الغرفه, ونفس الشي سياراتنا, فيها معطّر فيها لمسه بنّاتيه اه بس برضه ما فيها 100 دبدوب

وليش غرفة بنت اذا لازم تكون كل الحيطان صوري و صور الفنانين وصور اطافيل؟؟ عندي بالغرفه صورة عائليه ببرواز صغير عالتسريحه ما في غيرها, بحب صور الصغار بس اكتر من سكرين سيفر للكمبيوتر و الموبايل ما في مكان الهم

غرفنا و سياراتنا حلوة و مرتبه و كل شي بمكانه و انيقه و مزينه "بالعقل"....

لكن هالاشياء اللي بجيبوها بالافلام.....كلها حكي افلام مش اكتر :)

و اذا في حد من البناويت بعمل هيك او بتعرفو حد بعمل هيك احكولي...ليكون انا الغير عن العالم :$

القلوب

كلنا بننولد بقلوب بيضاء صافيه قلبا وقالبا, و منختلف بمدّة احتفاظنا بهالقلب الابيض, او قدرتنا على ارجاعه ابيض مرّة تانيه, مع مرور السنين و مرور الاشخاص بحياتنا, مع تجاربنا و مأاسينا و افرحانا و احزانّا و اخطائنا ببدا هالقلب يتلون, ببدا الموضوع بنترات سوداء مع جروح بسيطه مثل شكّة الدبوس, بتوجعنا بوقتها و ممكن تنزف بسيط وممكن لأ ولكنها اكيد بتشكّل نقطه ضعف في المنطقه لكن بضل القلب محافظ على صفاته من النقاء و البياض يطغى عليه.

بتمشي السنين و بدخل بحياتنا ناس, بارادتنا او بأرادة الظروف, و بتبدا هالنترات تصير بقع و تنتشر بأكتر من منطقة, اذا كنّا من سعيدي الحظ بيدخل بحياتنا الاشخاص الصح, ناس اثرو ايجابا على طريقه تفكيرنا و حياتنا و بفترة معرفتهم بتطيب الجروح و بترجع تصير بيضا مع الوقت

المشكله بس نضل نتعامل مع الناس الخطأ و تصير البقع الصغيره تتلاقى لتشكل بقع اكبر, و نوصل لمرحلة يصير قلبنا مدمي و نصير كل ليله نطوله و نمسحه و نظفه و نلفه و نخبية بعلبه بعيده عنّا و عن الناس, لابدنا احنا نستخدمه لانّا جربنا حالنا و لقينا انّا بنضرّه اكتر ما نفيده, ولا بدنا حد تاني يأثر عليه بحكم انّا ما عم نتعامل الا مع الناس الاسؤ.

بعدين بيجي ناس جديده بوهمونا بأنهم غير, مرات بنساعدهم بأنهم يوهمونا و مرات النترات البيضا البقيانه بقلوبنا بتقنعنا انهم غير, بنطول هالعلبه وبنعطيهم اياها و بنوصيهم انهم يديرو بالهم عليه و ينظفوه و يداووه و يخبوه بالعلبه, مع الوقت بنكتشف انّا غلطنا بحكمنا, بنطلب قلوبنا وبرجعو القلب و هو بنزف و بعتذرو انهم بغمرة الحياة نسيوه برّه العلبه و انهم مرّه وقعوه و نسيو يلفوه, برجع اسؤ من قبل, بنرجع بنلفه و بنلعن اليوم اللي خلينا شوية هالابيض تقنهعنا ان لسا في ناس كويسين, وهيك لننسى بيوم ان في النا قلب كان ابيض و كان يتحرك وكان نقي...

زغلول النجار....1

مثل ما خبرتكم قبل كم يوم بأن الدكتور زغلول النجار حيكون ضيف عالمسجد اللي بصلّي فيه التراويح, و ان شاء الله النيّه انه يضل يجي من 5 ايام لاسبوع و انا حابه اني الخص اهمّ الاشياء الجديده اللي بحكيلنا اياها بالثلث ساعه اللي بين ركعات صلاة التراويح, حكتب المعلومات الجديده عالقليله علي وحكتب اللي بقدر اتذكرة و ان شاء الله النيّه اني حركز كتير :)
اكيد في منكم من هو اعلم مني بالدين , فلهيك حتكون المعلومات قديمة الهم , ريت اذا بعرفو اكتر عن الموضوع ينورونا احنا كمان :)

امبارح كان يحكي بشكل عام عن رمضان, و معظم المعلومات اللي بنعرفها عن فضل هالشهر الكريم و مضاعفة الاجر في الحسنات, وعن نزول القرآن بهذا الشهر و عن الجهاد و الغزوات والفتوحات اللي صارت بهذا الشهر

من ضمن الحكي في معلومتين حكاهم الدكتور الله يجزيه الخير انا اول مرّه بعرفهم

اول معلومه بموضوع قرأة القرآن الكريم و تدارسة, انه من السنّه انّا نتدارس القرآن بالاضافه لقراءته اسوة برسول الله صلى الله عليه و سلم , كان الرسول الكريم يتدارس القرآن هو و سيدنا جبريل كل رمضان,المعلومة الجديده هي ان مضاعفة الحسنات تختلف بحسب طريقة قراءة القرأن, اللي بقرأ القران يكون في ملك يسجّل قراءته ويضاعف الاجر 10 اضعاف,و اللي بقرأة مع تدبير بعض المعاني و البحث عن تفسير بعض الايات بكون في ملكين يسجلو قراءته و يضاعف الاجر 20 ضعف و حكالنا الشيخ عن فضل قراءة القرأن مع تفسيبر معانيه بشكل كامل بكون في 4 من الملائكة بسجلو و يضاعف الاجر 70 ضعف , للاسف مش متزكرة شي من الحديث :$ وما قدرت اتأكد من صحته, ولكن الله اعلم ان الدكتور مستحيل ينقل حديث ضعيف.

الاشي التاني و هو بختص بعلم الفلك, حكالنا الدكتور ان بداية الشهر الهجري تقاس بتكون الهلال, وبالعادة الهلال يمكن رؤيته وقت المغرب, لهيك يعتبر اليوم بدا من المغرب, فأول صلاة باليوم هي المغرب و بتبعها العشاء و بعدها الفجر, وصلاة الفجر هي الصلاة الوسطى وليس العصر...انا اول مرّه بعرف هالمعلومه, علشان هيك بنصلي التراويح بس يعلن شهر رمضان, لانه يعتبر بداية اليوم بالشهر


وحكا الشيخ عن لزوم توحيد يوم الصيام, وان اسلامنا دائما يدعو - الامة الاسلاميه - يدعونا للوحده ويشبهنا بالجسد الواحد, ولكن احنا ما بنستغل هالشي و دائما متفرقين, مع ان في اشياء كتير بدينا بتوحدنا و بوحدتنا اكيد حنكون اقوى

________________

اشي تاني عجبني حكاه الشيخ السابق قبل بيوم, اللي حكا عن اثر المعلم في حياتنا, حكا انه من اعلى صوت في بيوتنا نحدد نهجنا بالحياة و هل تربيتنا صحيحه او لا, فهل صوت تلاوة القرآن هي الاعلى او صوت دروس العلم والنقاشات فيها, وحتى لو تلفزيون وهو الاغلب صاحب الصوت الاعلى ببيوتنا, هل هو صوت قرآن او صوت شيوخ افاضل دروسهم وبرامجهم ويلا صوت اغاني و افلام!!

هالمرّة ما عدّاك العيب

انا من متابعي و محبي قناة الاذاعه حياة اف ام وقبل هالمره حكيت عن هالاذاعه و كيف اني ما بستغني عنها و بحب اسمعها وين ما كنت, بالبيت و بالسيارة وبالشغل, و اخوي خلص حفظ الدرس بس ياخد السيارة بالليل تاني يوم بس اشّغل السيارة ما بحب تكون اي اذاعه تانيه غيرها و خصوصي انه بحطلي عأغاني غريبه, لسا بتحكي بسم الله بتطلعلك مش عارفه مين بتتغنوج و بتغني, او على هالصبح اغنيه لميتاليكا :$

المهم, حاليا في برنامج بسمعه وانا مروحه اسمه " عدّاك العيب" برنامج درامي اجتماعي خلال 10 دقائق حوار عائلي بين ام و اب و ابنه و ابن, بحكي عن قصّه معينه لابراز هدف و قيمه اسلامية معينه , مثل عن عدم الاسراف في رمضان, و عن التملّق و هز الذنب بالشغل وكيف اللي بحكي الحق بتوجهله انذار وممكن ينتقل لمنطقه نائيه لكن المهم الواحد يحكي كلمة الحق.

حلقة امبارح الفكرة حلوه و لكن الحوار كان غريب, حلقة امبارح كانت ان الجارة بتيجي و بتسأل الام " انتو غيرتو سيارتكم؟؟" و بعد لف دوران بتحكي " فكرتكم غيرتوها لاني شفت بنت بتتسحب و بتركب سيارة غير سيارتكم وما في بنت بالعمارة غير بنتك" طبعا هون الام بتبدا تولول , و بس يجي الاب و بشوف الام مهمومه بسألها بتحكيله ان جارتنا فلانه, ما بعرفها بتحكيله فلانه اللي خطبت بنتنا لابنها و ما وافقنا, و بتحكيله شو حكتلها, بنتقل الحوار لتاني يوم بين الام اللي مقطّعه حالها بكا و بين الجارة ذاتها, و بتشكيلها كيف الاب منع البنت تروح الجامعه و حبسها بغرفتها و "ابصر شو راح يعمل فيها " .

و فجأه بدخل الاب و ببدا يهزّئ بالجارة و بحكيلها انه كان قاعد مع زوجها وحكاله ان مرته كذابه وعملت كل هاد بس علشان ما وافقتو عالخطبه, و طردها من البيت و هو بحكيلها " بدك اياني اقتل بنتي....بدك اياني اقتل بنتي"

فااااا الاب و الام صدقو الجارة اللي ابصر من وين جاي مع معرفتهم بأنها كاهتهم من يوم ما انهم رفضو المحروس, وما فكرّو للحظه يتأكدو من البنت و نسيو تربيتهم لبنتهم 19 سنه - على اعتبار انها سنة اولى- و كان التصرف الوحيد اللي قدامهم انهم يحبسو البنت و ما يخلوها تروح عالجامعه و الطامّه الكبرى ان العمل الوحيد اللي بقدرو يعملوه بهيك موقف هو قتل البنت!!!

بحب احكيلكم ان هالمرّه العيب ما عدّاكم وبالعكس قاعد بوسط البيت كمان ...

حتى تترك اثرا

على مدى دراسة 12 سنة بالمدرسة و 4 سنوات في الجامعه, حاولت افكّر بمدرّسة او دكتور ترك اثر ايجابي في نفسي, وللاسف ما لقيت غير 3 معلمات, معلمة الصف الاول و معلمات الانجليزي بالصف الاول اعدادي " السابع" و الثاني الاعدادي " الثامن" , ما بنكر ان حبي لمعلمات الانجليزي فادني كتير بدراستي و بالتوجيهي جبت 95 بالانجليزي, مع ان البعد عن الممارسه خلّاني افقد كتير من المخزون و خصوصا القواعدي, بفهم قرأة و محادثه ولكن بالكتابه, الاخطاء الاملائية و القواعديه بتخليني اعيد كتابه اي شي اكتر من مرّه.

هالشي خطرلي بعد درس الدين بين ركعات التراويح امبارح بالمسجد, الشيخ سأل الحضور عن مدّرس تربية اسلاميه ترك اثر ايجابي في نفسك و خلاك اقرب للدين, وللاسف ولا واحد من المصليين اجاب بأسم, و حكا الشيخ اللي طلع عامل دراسة عن الموضوع انه بعد سؤال عدد كبير من الناس, و بعد سؤالهم عن اي مدّرس ترك اثر في نفسك, كانت اعلى اجابه هي 3 مدرسين و من ناس قلال جدا.

للاسف مدرسين و مدرسات في مدارسنا بدخلو الصف بأدّو واجب تلقين و حشي المعلومات في دماغ الطالب, مع عدم مسؤوليتهم عن مدى استيعاب و فهم الطالب للمادة او مراجعه التفاصيل المهمه مع الطالب, فما بالكم بماده مثل التربية الاسلاميه, اللي بتبدا من الصف الاول الابتدائي, هلأ لو كان تأسيسنا الاسلامي صح من صف اول و هالموضوع اخذ رعايه زياده لاهميته الكبيره على حياة الانسان بعدها النفسية و الاجتماعيه و الاخلاقيه, كيف ممكن يطلع الجيل الجديد و شو ممكن يطلع منه.

تطرق الشيخ لاساليب التدريس و انها بتستخدم اسلوب التدريس احادي المحور, وهو التلقين فقد ومخاطبه العقل , و هاد السبب بخليها فيها جمود وما توصل للطالب بسرعه, و قارن مع اسلوب المعلم الاعظم, سيدنا محمد صلى الله عليه و سلم, واللي كان طريقة تدريسة ثلاثي الابعاد, فكان يخاطب العقل باعطاء المعلومه, وكان يخاطب الوجدان والقلب, مثل موضوع الصيام , لمّا فرض الصيام, و عرض رسول الله صلى الله عليه وسلم الموضوع على المسلمين , كان المخاطبه العقليه بأوامر الله سبحانه وتعالى , ومخاطبة القلب بحيث كل الموجودين طلعو من الجلسة وهمه مش بس مقتنعين بالصيام لأ و بحبو الصيام و نفسهم يطبقو هالعباده بأقرب وقت, و المحور الثالث هو المحور العملي, بحيث كان الرسول الكريم صلى الله عليه وسلم يطبق الاوامر امام المسلمين حتى يكون تركيزها بالعقل اكبر, فمثل الوضوء, طبّق الرسول الكريم خطوات الوضوء امام المسلمين و من وقتها لهلأ عم نتناقلها من جيل الى جيل.

فيا ريت يصير اهتمام اكبر بالتعليم عموما وبتعليم التربية الاسلاميه خصوصا ليتأسس الطالب منذ الصغر و يتعود على اساسيات الدين, وما يكبر و هو اقل تطبيق عملي مثل الصلاة مثلا ما يكون بعرف يعملهم, و انا بحكي هالشي لاني شفت ستات و رجال دارسين و متعلمين - المقصد انهم اخدو المعلومه بالمدرسة - و بس ربنا هداهم على كبر و بدو يصلو ,بدون مبالغه ما عرفو كيفية اداء الصلاه ...

ذكرى الاسراء و المعراج

كل مرّه بسمع الدعاء اللي دعاه سيدنا محمد صلى الله عليه وسلم وهو راجع من الطائف بعد الاذى اللي تعرضله و اللي بناءا عليه وعلى وفاة سيدتنا خديجه و ابو طالب عم الرسول الكريم, لمكافئته و لتصبيره صلى الله عليه وسلم, أيده الله بالاسراء و المعراج , كل ما اسمع هالدعاء ما بقدر اقاوم دموعي

اللهم إني أشكو إليك ضعف قوتي ، وقلة حيلتي ، وهواني على الناس

أنت رب المستضعفين وأنت ربي ، إلى من تكلني ؟

إلى بعيد يتجهمني ، أو إلى عدو ملكته أمري ؟

إن لم يكن بك غضب علي فلا أبالي ، غير أن عافيتك هي أوسع لي

أعوذ بنور وجهك الذي أشرقت له الظلمات وصلح عليه أمر الدنيا والآخرة

أن يحل علي غضبك ، أو ينزل بي سخطك . لك العتبى حتى ترضى

ولا حول ولا قوة إلا بك

رسولنا الكريم علمنا انّا لازم نصبر على الابتلاءات, و كل ما الواحد كان بدعو للحق و كان للدين اقرب الناس بتتكالب عليه اكثر , فلازم يصبر و يتأكد انه على حق و ان شاء الله ربنا حيكافئه.

دعاء تاني كتير بأثر فيي

الهم لا تسلط علينا بذنوبنا من لا يخافك ولا يرحمنا

لو فكّر كل انسان بهالدعاء لربط قصص كتيره بتصير معه و مشاكل بأعماله, يا الله ما اصعب انه حد ما بخاف ربنا ولا في قلبه رحمه يستلم انسان و يعملّه مشاكل, ما في اشي ممكن يردعه, وما في حد ممكن يوقف عنده

كل ذكرى اسراء ومعراج وانتم الى الله اقرب

وان شاء الله نكون مشاركين وموجودين في التاريخ الجديد اللي حينكتب على الرزنامه لذكرى استرداد بيت المقدس

غباء اجتماعي

الذكاء الاجتماعي مطلوب للبنات و للشباب, في مواضيع مشتركه مهما اختلفت الاعمار و التخصصات والاهتمامات ممكن ينحكى فيها ليبدا اي حوار, بس تتكرر دقائق الصمت اذاً في شي غلط وما في انسجام, ممكن ننتقل من موضوع لموضوع لنلاقي اشي ننسجم فيه, بس برضه نوعية الردود على المواضيع اللي ما صار فيها انسجام بتعطي فكرة عن طبيعه تفكير اللي قدامنا

انا بطبيعتي مش من الناس اللي بسرعه بنسجمو مع حد جديد و باول لقاء, ما بعرف هو حذر او استكشاف للي قدامي, بس بنفس الوقت مش من الناس اللي بضلو ساكتين وما باخدو وبعطو, يعني اجتماعيه بحدود - بس اذا انسجمنا بالحكي هات سكتوني :) - بالبدايه بكون بدي استكشف اللي قدامي فالمفروض انه يصير حوار بسيط لاعرف شو الاشياء المتشابهه بينا لنحكي عنها, واشوف ابسط الاشياء بشخصية اللي قدامي واشوف ممكن تتلاقى افكارنا او لأ.

اكتر اشي بكرهو بس اصير انا اسأل واللي قدامي يجاوب على كل اسئلتي ب "اه" او " لأ" او بكلمة, كيف الشغل...منيح, شو طبيعه شغلك....عالكمبيوتر, جد بنرفز وممكن ابطل احكي بالمره, يعني كيف ممكن ننسجم بهالطريقه, خصوصا بس انا احكي نص ساعه عن شغلي مثلا و بس هي تحكي تجاوب بكلمه :$

و برضه ممكن اسكت اذا الحوار بالاخر صفى على لبسة فلانه, و حفلة علان, واخر كليب....هيك برضه بتخسرني للابد اللي قدامي,و مشكلتي ان الانطباع الاول عندي باخد فترة لاغيره, ان كان ايجابي او سلبي, وما شاء الله علي اذا حبيت حد بحبه كتير و اذا كرهته بكرهو كتير, لهيك ياما انصدمت بالناس :)

كتير في ناس مثقفين و متعلمين بس ما عندهم ذكاء اجتماعي وهالشي بأثر و بنعكس على شخصياتهم, ممكن يكون في خجل و ممكن يكون في انطواء, وهون بيجي دور الشخص التاني بأنه يخلي اللي قدامه ينسى هالشي و ينسجم وهاد باختيار المواضيع , المفروض ما ينحكى باشياء شخصيه, او اشياء ممكن تكون مخجله للي قدامنا, بنختار مواضيع عامه شاغله الكل بوقتها وبنبدا نحكي فيها, بس اذا ما صار انسجام وما صار اخد وعطا فالموضوع منتهي والافضل نروّح : )

بدكم افكار...احنا بنعطيكم افكار

انا شخصيا مش عارفة هالخبر سعيد ويلا تعيس

يعني هل هو انه العالم حسّت انّ المواطن خلص فلّس و ما ضل اشي يتم اقتطاعه للضرايب, ويلا انهم بطل عندهم افكار جديده للضرايب, ويلا حسو انّا قربنا ندخل جينس بعدد الضرائب علشان هيك تراجعو...طيب كان حكو الله يسامحهم كان ساعدناهم, في اشياء كتيره لسا ممكن ينحط عليها ضرايب, ومش مهم في فلوس ما في فلوس, بندبرها, يعني مثلا كل اردني مغترب - اسمهم معبيين مصاري و الاشاعه منتشرة بقوه - لازم يدفع هو او اهله عنه ضريبه عن كل شهر بقعد برّه البلد, شو نسميها هالضريبه....امممم اه بدل جنسية :) و علشان يستفيدو اكثر كل واحد ببعت بعملة البلد اللي هو فيها وبهيك بتيجي بالدولار و باليورو دراهم ريالات...

ايش كمان...ايش كمان.. اه ممكن بدل اقتناء طفل, وهاي مراعاة للطبقة الفقيره , كل عيله بقل عدد اطفالها عن 3 بدفعو هالضريبه :) علشان انو بس الاغنياء اللي يدفعو, الله يسامحكم و بتظلمو هالعالم وبتحكو انهم ما بحسو بالمواطنين اللي تحت خط الفقر.


وفي ضريبه بدل حكي, اللي بزيد عدد كلماته عن 1000 كلمة باليوم بدفع مبلغ عن كل كلمة زياده, وبهيك بخف وجع الراس من الناس كتيرة الحكي...وهاي مفيده قبل ما تبدا الانتخابات, فكل مرشح بس بحكي اللازم وما بنضل نسمع الخطب الرنانه و الوعود الوهمية اللي بحكوها.

يعني اذا بدهم افكار بنعطيهم, وما يحملو هم ابدا ابدا...المواطن تعود و اكتر من موته وحده ما راح يموت و هي راس مالها جلطة - بعيد الشر عنّا وان شاء الله اللي بكرهونا -