Things I Like To Whisper About

Would You Hear Me Whispering

فراقة عيد



كيفكم و شو اخباركم؟؟ ان شاء الله كلكم تكونو بالف خير

الي فترة بقرأ وما بلحق اعلّق مع انو في مواضيع كتير حبيتها, ما في وقت بالبيت و عندي موضوع بالشغل ادعولي ربنا ايسرلي الخير يا رب :$

مش مصدقة انّا صرنا بال 10 الاواخر...حاسة رمضان طاااااااار بسرعه :(
لسا قبل كم يوم كنّا نحكي اللهم بلغنا رمضان , تخيلو بعد اسبوع و شوي حيخلص رمضان
ان شاء الله نكون قمنا بالطاعات على اكمل وجه و ربنا يتقبّل منا و يغفرلنا اذا قصرّنا او نسينا او غلطنا بأي شي

من وانا صغيرة وانا بسمع جملة " فراقة عيد" وكنت افكرها انها جد بما انه بعد رمضان بيجي العيد و لكن بعد ما كبرت و صار لرمضان مفهوم جديد و عزيز و كبير بقلبي و خصوصا بعد ما الحمد لله ربنا يسرلي صلاة التراويح و القيام بالمسجد و بمسجد بحبة من كل قلبي بالنسبة الي فراق رمضان كتير صعب, و بالدعاء بس يحكي الشيخ " وداعا وداعا يا رمضان" ما بستحمل و دموعي لحالهم بنزلو
ما في بركة بوقتنا بالمره, ان شاء الله نقضي اوقاتنا بكل شي برضي ربنا

فبالعكس فراق رمضان بترك غصّه بالقلب, واللي بصبرنا انّا ندعي ربنا يبلغنا رمضان اللي بعده و ان شاء الله ربنا يستجيب

يلااا انا رايحه عالتراويح وعفكرة انا بدعي لكل اللي بتزكرهم, صح حيكون بالاسم التدويني تبعكم بس ان شاء الله ربنا يتقبل و انتو ادعولي وخصوصا انّا بدينا بالعشرة الاواخر و ما بتعرفو ايمتا بتكون ليلة القدر فأبتداء من اليوم حنبدا نتحرى ليلة القدر " اللهم بلغنا ليلة القد يا رب"
لا تنسوني من الدعاء :)

2 years :)



تخيلو ان هالمدونه صار عمرها سنتين :)
سنتين مرّو بسرعه خياليه, سنتين بقدر احكي انهم غيرو فيي كتير, غيرو بافكاري و طريقة تفكيري, غيرو في علاقاتي الانسانيه والاجتماعيه غيرو بأهتماماتي و الحمد لله كلّه للافضل كان

تعرّفت على اخوات و اخوان و اصدقاء و صديقات كتيييييييير بعتز بوجودهم بحياتي, و تعرفت على شخصيات و طرق تفكير مرات كانت تكون كتير بعيده عن طريقة تفكيري و اتفاجأت اني ممكن انسجم معها لابعد حد.

بتمنى ان هالسنتين ما كانو وجعة راس الكم, و بتمنى اني اكون رسمت على وجهكم ولو ابتسامه خفيفة او حفزّتكم للتفكير بموضوع او نقطه معينه, و بدي اطمع اكتر و اتمنى اني اكون اثّرت ولو على شي بسيط في جزء من يومكم.

549 من قصصي الطرمه - بحكيلكم وجعة راس
و 6684 تعليق - انا انصدمت بس شفت الرقم :)))
وتقريبا 100 متابع وشوي بين معلنين و بين متابعين بالخفاء, شكرا الكم لانكم انتو اللي شجعتوني استمر بالمدونه
و بعتذر لمدونتي اني فكرت اتركها في لحظة طيش شباب, لكن الحمد لله عقلت

سنتين و زارني فيها كتير ناس من قارات مختلفه و دول مختلفة منهم انا اول مرّه بسمع فيهم او بعرف شكل علمهم, اشي اجا استنصاد و اشي اجا توهان , بشكركم كلكم لانه وجودكم كان يفرحني :)

بتمنى اذا في حد عنده نصيحه او توجيه او عتب على موضوع انه يحكيلي, و بتمنى تحكولي شو اكتر موضوع كتبت عنه حبيتوه بهالسنتين - وثقة من نفسيها - و شو اسؤ موضوع كتبت عنه او كان يفضّل اني ما اكتبه :)

نفسي اشكر كل اللي زارني بالاسم ,اللي اسعدتوني بتواجدكم و تعليقاتكم كتير لكن خايفة انسى حد :$
بس اسمحولي اني اخص بالشكر Qwaider Planet لانه لولاها كان ما تعرفت عليكم و ما تعرفتو علي :)


و كل سنة و انتو وقصصي الطرمه بالف خير :)

بابا



انا اكيد بحب بابا كتير, لكن بعد ما اشتغلت و خصوصا بس ارجع عالبيت واكون كتييييييير تعبانه وما بكون نفسي حد يحكي معي, بحب بابا اكتر و اكتر, مرات بروّح عالبيت ما نفسي حتى اكل من كتر التعب و بس نفسي انام, كيف بابا كان يستحمل و يضل مبتسم و يضحك معنا و يضحكلنا.

و احنا صغار كل يوم بس بابا يروّح من الشغل, وكل يوم يعني كلّ يوم, و حتى فترة ما اشتغل بابا بمادبا و كان يجي وجهه احمر من الشوب, لازم انا و اخواني التنين نتخبّى و بابا يدور علينا بالبيت, طبعا كانت ماما تساعده بأنّه يلاقينا وبعديها فهمت ليش ماما كانت تترجانا كلنا نتخبى بنفس الغرفة, و كان يدور علينا و يعمل جو سسينس ليلاقينا , و "كأني شامم ريحه فلان هون".." كأني سامع صوت نفس" و بعد ما يلاقينا كلنا, لازم نصف و كل واحد يركض على بابا و بحكم ان بابا طويل ما شاء الله فلازم يحملنا و يرفعنا و يرمينا لفوق لنلمس السقف :) هالشي ياخد اقل شي ساعه و بعدها يغيّر و ناكل.

غير طبعا اللعب بالطابه و قعدات حكي القصص و الذكريات خصوصا بس تنقطع الكهربا, كلنا نتمدد على تخت بابا و ماما و يبدا بابا بحكيلنا عن مغامراته ايام زمان :)


و بتزكر لمّا كان بابا يسوق جوا نفق, ما بعرف اي نفق, كان طويل و شوي على دائري و فيه اضوية , كان لازم بابا يضل يزمر من اول ما ندخله لحتى نطلع منه و احنا " هاااااااااااااااااااااااااااااااااااااااااااااااي" كل مرّه كل مرّه نمشي فيه لازم يعمل هيك والعالم اشي يزمر معنا و اشي يزعل و يكشّر بفكر بابا بزمر اله, واشي يأشر و يشبر وبابا ولا عنده مشكله مدام احنا مبسوطين

حاليا هالشي عملته مع فرّوحه, حبيبتي طلعت زينا, او يمكن زي كل الصغار بتحب الانفاق, صرت ازمر و ما عندي اي مشكله, و اخوي بحكيلي انه بس يرّوح من الشغل لازم تنط عليه فروحه و يرفعها لتلمس السقف, واخوي التاني بحكي انه اول مايدخل البيت عبود بصير يركض ليتخبى و هو يدورعليه و كل ما طول ليلاقيه كل ما عبود فرح اكتر

سبحان الله كيف الدنيا بتلف وكيف مشاعر و اشياء ما كنّا نقدرها ولا نفهم معناها بس نوصل لعمر معين او وضع معين بنفهمها و بنقدّرها

كان بابا يحكي لاخواني" بس تصير اب بتفهم "و ماما تحكيلي " بس تصيري ام بتفهمي" و طبعا بوقتها كنّا نحس انها نصائح و مبالغ فيها,لكن سبحان الله هلأ بس خواني جربو يصيرو اباء الحمد لله بحكولي انه شعور غريب غير عن كل المشاعر اللي حسّو فيها بحياتهم.


الله يخليلنا اباءانا و امهاتنا ويقوينا لنكون و نضل مرضيين يا رب ...والله لا يحرم حد من الاولاد

مساكم و صباحكم ورد وياسمين :)

أوهام في الظلام



كنت قاعده لحالي بالبيت و اهلي رايحين يزورو الجيران , جهزّت اموري لتاني يوم, كويت الاواعي - بكرّرررررررره الكوي انا - وجهزت الشنطه و بعيد عنكم الكندره و وكل شي تمام, ما خلصت من هون بفتح التلفزيون من هون لاشرب فنجان القهوه على شي, هب قطعت الكهربا, وكان هاد القطع للمرة السادسه بهداك اليوم, من قبل بيوم بتقطع و يومها اتصلنا بشركة الكهربا المحترمه, ال هاد قطع مبرمج, اي اذا عشؤائي ما بطلعلنا 6 مرات, فكيف مبرمج و هالقد قطعت عنّا !!!

المهم انا مش خويفة بالمره - و افهمولي بالمرة منيح - عادي عادي يا بنت اخدت موبايلي و اللّوكس و مج القهوه و رحت اقعد عالبرنده, طبعا كل الشارع مقطوعه عنهم الكهربا, ما شاء الله ضو القمر كان منور بزياده, و منظر الشموع من ورا شبابيك الجيرن اللي فتحو الاباجور كتير حلو, وصوت اولاد الجيران القاعدين بالحديقه ومبسوطين عالشمع بجنن.

فجأه سمعت صوت زي باب فتح, ما عرفت من وين, المهم فجأه ضو احمر صغير بيّن في بلكونة الجيران, شوي بين و يختفي, و بقوة ملاحظتي ما شاء الله علي لقطت انه ضو سيجاره, في النا جار بطلع عالبرنده بدخن, وطول ما هو بدخن و هو مرّة بتركى على رجل اليمين و مرّة بتركى على الرجل اليسار, فبصير شكله كأنه بمشي وهو واقف مكانه, المهم مع السواد المعبّي الدنيا و الباب الاسود اللي وراه, قدرت اميز حركته هاي حتى و هو ما بسحب نفس من السيجاره, يعني ضو السيجارة بروح و بيجي بس ياخد نفس و لكن بعديها بختفي.

المهم ضلّت حركته موجوده و شايفتها بوضوح, شوي شوي حسيته بقرّب O_o و شوي حسيت حالي كأني بديت اشوف ملامح وجهه, لا اخفيكم اني خفت, غمضت عيوني و رجعت فتحتّهم اختفى, بركز شوي ضو السيجارة ضوا, لا ابدا ما خف عقلي ولا انو قلبي بدو يوقف, مش فاهمه ليش , مهو ببيته وانا ببيتي شو قصتك, حاولت اقنع حالي و بعد خمس دقايق طلعت بقرار

أبااااااااااااااااااااااااااااااااااااااااااااه.....بدي مامااااااااااااااااااااااااااا :(

بعد بربع ساعه رجعو اهلي, وبدت ماما " يا على امك" .."تقبري امك" و ديما بحكيلها " بعيد الشر ..ما تحكي هيك" بتحكيلي " مش اليوم...بس يصيرو ولادك كوم :) " حبيبتي لسا عندها امل مني هههههه ما علينا المهم بتحكيلي وانتي شو صار فيك, اتطلعت فيها و في بابا اللي بستنى جوابي, حكيتلهم " ولا اشي شو بدو يصير يعني...شربت قهوتي عالبرنده وكله كان عادي ...عاااااااااااادي "

__________

بس كيف العنوان....المفروض يكون عنوان لرواية من 458 صفحه :)
عجبني بصراحه :)

Shallow


                 
اكثر من مرّه قرأت بمدونات بحكو فيها عن مستوى التدوين الاردني و دائما ما يذكرو ان كم مدونه معدوده على اصابع الايدين اللي منيحه و بوصفو الباقي بانهم سطحيين.


هلأ انا لا خبيرة سياسية و لا ناقدة ادبيه ولا محلله اقتصاديه ولا كاتبة صحفيه, انا انسانه بسيطه بديت التدوين لاكتب اللي بخطر ببالي و مشاهداتي اليوميه اللي بصادفها واللي اكيد بتشارك ولو بجزء بسيط بنفس المشاهدات ونفس التجارب مع ناس بهالعالم التدويني.


انا ما بدي احكي عن مدونتي, انا بدي احكي عن المدونات اللي بستمتع بقراءة كل شي بنكتب فيها, و هالمدونات عددها كبير كتير, الي ما ببدا نهاري الّا بس ازورهم  كلهم و اقرأ اخبار اصحابهم ومغامراتهم و اعرف المواقف اللي صارت معهم, اعرف عن اخوان واخوات صارو بفترة قليله كتير قراب لقلبي, بهمني اعرف اخبارهم و اتطمن عليهم .

مدونات مميزين جدا, بافكار اصحابهم و بشخصياتهم اللي بتنعكس على كتاباتهم, بصراحتهم و بتلقائيتهم, بنقاء وصفاء قلوبهم, بحكاياهم و  بأيامهم و بذكرياتهم و بحاضرهم و بافكارهم واهدافهم و مستقبلهم.


اللي بحكمو على المدونات انها سطحيه مش ضروري يكونو كلهم من اللي قاعدين على برج عالي عاجي و بحكمو عالباقي من وجهة نظرهم الخاصه كنوع من انواع التنظير, في جزء بدهم يكون في مدونين مميزين ,و هالتميز من وجهة نظرهم انّا نكون متابعين للاحداث السياسية والاقتصاديه بلغة الكتّاب و الادباء العالميين, او مرات وللاسف في ناس بحسو المتميزين همه اللي بكتبو عن مواضيع جريئه و مرات بتكون ميّالة للوقاحه البحته, فجأه هدول المدونين بصيرو مميزين و افكارهم حرّه .


انا بمفهومي البسيط ان المدونه هي مساحه خاصه حرّه لصاحبها , يكتب فيها اللي بدو اياه, و حتى مع اني مش مع كتابة المغامرات و الذكريات الجريئة والغريبة, ولكن بتبقى هاي المساحه مخصصه للشخص و انا كقارئة الي حرّية المرور على هالمدونه او لأ, المدونه هي زي الدفتر اللي بنكتب فيه اي شي بخطر ببالنا, دفتر الكتروني و مفتوح للجميع, و كل شخص بقرأ حسب اهتماماته ولكن برأيي البسيط برضه انه ما بحق لحد انه يقرر او يحكم ا هالمدونه سطحيه او لأ, ما بحق لشخص انه يقلل من افكار و ذكريات اي شخص...ما بحق لأاي شخص انه يحكم على حياة الشخص التاني ابدا بأنها سطحية او ما الها قيمة او غير مميزه.




_____________

جديد عرفت اني بقدر اكتب بوست جديد عن طريق الايميل و فورا انشرة عالمدونه, فهالبوست اول تجربة و ان شاء الله يزبط Open-mouth smile

#

شو بالنسبة...5



شو بالنسبة للي بعدلو المعلومات الخاصه فيهم على الفيس بوك و بكتبو In A Relation With.... شو يعني ؟؟؟
انا بعرف ال Relation يا خطبة يا زواج, و بما انه هالخيارات موجوده و الشباب و الصبايا ما استخدموها فمختصر ال Relation الجديده هاي هي " صحاب"

و الاشي اللي بجلط اكتر هو انه بيجي على هالتعديل 1000 Like و 5000 تعليق
" واااااو ".... " مبروووووووووووك" على شو مبروك انت و اياها و اياه؟؟؟

و بعدين صاحبة الحظ او صاحب الحظ السعيد اللي انكتب اسمه ورا ال With بعلقو
" شكرا.." .."I'm Soooo HAPPY".... " عقبالكم" عقبالك لحالك O_o

و شهر شهرين بالكتير بترجع المعلومه
Single :)

لشو هالتقليد الاعمى اللي ما اله دخل لا بدينا ولا بقيمنا ولا بأعرافنا...احنا من ايمتا في اشي اسمه "صحبه" عنّا و من ايمتا بنشجع على هالشي و بنبارك فيه كمان ...
لشو بتغلبو حالكم و بتعذبو حالكم و بالاخر بتطلعو بسوادة الوجه و ما شاء الله الموضوع بكون معلن بأوله و بأخره


_______________

الحمد لله على سلامة ال Blogger الله يسامحه قطعنا هاليومين :(
بس بسيطه مدامنا رجعنا
Back To The Track :D

متى ما عشر دشر...

زي ما المعظم / الكل عارف فال
Blogspot
زعلان وبشده هاليومين,لا عارفين نكتب شي جديد ولا عارفين نعلق ولا اساسا نفتح مدوناتنا,الله يخلي الموبايلات :) فهالبوست مباشره من الموبايل وعلى ضو الشمعه,لانه شركه الكهربا المحترمه ما اجت تقطعها الا بأشوب يوم بالتاريخ :(
فأذا كان تنسيق الكتابه مش ولا بد وهو المتوقع فسامحونا :$

مشي 10 ايام من رمضان تخيلو !!!
جد طيرااااان حسيتهم مشيو ان شاء الله يكون ربنا تقبل منا الطاعات وغفرلنا ويتقبل و يعينا على صيام وقيام الباقي
تيتا الله يرحمها كانت تحكي" متى ما عشر دشر " مع تشديد الشين بما انه مافي شده بالموبايل :) فالله اعلم الباقي برضه حيمشي بسرعه :(

اليوم كان بجنن ولله الحمد,كان عنا افطار مع الايتام وكتييييير انبسطنا معاهم, وكان في العاب مكان ما افطرنا ولولا وجود شباب معنا كان فعنا اكتر وخصوصا بلعبه السيارات.... المهم انهم انبسطو :)


هالبوست فشه قلب... في كتير اشياء في بالي اكتبها بس عطله البلوج طيرتهم
سامحوني اخر محاضره لزغلول النجار امبارح ما سمعت منها اشي لاني امبارح تقابلت مع بنات خالتي بالمسجد اللي الي من اول رمضان مش شايفتهم وبعد السلام والمعايده وشويه -وركزولي على شويه- حكي بنات فجأه الشيخ بحكي قومو الى صلاتكم :$
بصراحه ...اول مره بحس حالي نسوانه :(

وتصبحو على خير او صباح الخير للجميع :)

زغلول النجار....2

صورة تمثّل نظرية الانفجار الاكبر


حتى بداية القرن العشرين والعلماء يظنون بأن الكون ثابت ولا يتغير, و بدأت الحكايه عندما كان احد العلماء ينتظر القطار في المحطّه, و رأى الدخان المنطلق من القطار يبدو صغيرا من بعيد ويكبر كلمّا اقترب القطار, فكر بأن هناك امواج وخطوط يسير بها الدخان و بسرعه معينه, ثم درس العلماء عن الضوء و هل ايضا يسير بخطوط و استخدم منشور ليتأكد من ذلك و ظهرت الوان الطيف التي تشكل الضوء و من ثم انتقلو الى دراسة النجوم و اكتشفو بأن النجوم تتحرك مبتعدّه عن الارض فأكتشفو بأن الكون في اتسّاع مستمر وذلك في عام 1935 \1936
و لو رجعنا الى القرأن الكريم فأن هذه المعلومه موجوده منذ ما يزيد عن 1400سنه
(والسماء بنيناها بأيدٍ وإنا لموسعون) سورة الذاريات آية 47

و من ثم انتقل العلماء الى دراسة بداية الكون و اكتشفو ما يسمى بنظرية " الانفجار العظيم" او " الانفجار الاكبر" و ذلك بعد دراسة المجرات و بعدها عن بعضها و زياده بعدها مع الوقت, و تتلخص هذه النظرية بأن الكون كان عبارة عن نقطه واحده ذات كثافة وحرارة عاليه و قوة جاذبيه كبيره بينها و بسبب زياده قوة الجاذبيه حصل الانفجار الكبيير وتم اكتشاف هذه النظرية في عام 1964
ولو رجعنا الى القرآن الكريم لوجدنا الحديث عن بداية الكون موجوده فيه منذ ما يزيد عن 1400 سنه
(أَوَلَمْ يَرَ الَّذِينَ كَفَرُوا أَنَّ السَّمَاوَاتِ وَالْأَرْضَ كَانَتَا رَتْقاً فَفَتَقْنَاهُمَا وَجَعَلْنَا مِنَ الْمَاء كُلَّ شَيْءٍ حَيٍّ أَفَلَا يُؤْمِنُونَ) سورة الانبياء آية 30

ثم بدأ الاختلاف بين العلماء بان هل سيبقى الكون بأتساع ام انه سينكمش و ينسحق من جديد, بحيث ان العلماء الذين يرجحون عملية "الانسحاق" وعللة ذلك بأنه بسبب بعد المجرات انخفضت درجه الحرارة و من الممكن ان ترجع قوة الجاذبيه تقوم بعملها من جديد لتقريب المجرات من بعضها البعض و سميت هذه النظرية بنظرية " الانسحاق العظيم" ونحن المسلمين قرآنا الكريم وضّح لنا صحّة هذه النظرية
﴿يَوْمَ نَطْوِي السَّمَاءَ كَطَيِّ السِّجِلِّ لِلْكُتُبِ كَمَا بَدَأْنَا أَوَّلَ خَلْقٍ نُعِيدُهُ وَعْدًا عَلَيْنَا إِنَّا كُنَّا فَاعِلِينَ﴾ سورة الانبياء آية 104


و من ثم حدث خلاف جديد بين العلماء المتفقين على نظرية " الانسحاق العظيم" بحيث هل سيتم الانفجار من جديد و تستمر العملية الى ما لا نهايه ام ستبقى مترابطه بجزء واحد!!
و قرآننا الكريم وضح بانه سوف يحدث انفجار جديد ويكون ارض جديده غير الارض القديمة وسماء جديده غير السماء القديمه و لكن لن يكون هناك حياة لانه سوف يكون وقت البعث
(يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَاوَاتُ وَبَرَزُوا لِلَّهِ الْوَاحِدِ الْقَهَّارِ) سورة ابراهيم آية48
و حديث الرسول صلى الله عليه وسلم (يحشر الناس يوم القيامة على أرض بيضاء عفراء كقرصة النقي ، ليس فيها علم لأحد)

بالرغم من جميع المعلومات العلمّية المختلفه من علم فلك وعلم حيوان و علم نبات فأن القرآن الكريم هو كتاب هداية وليس كتاب علمي, ولكن العلوم التي به من اجل جعلنا نستوعب و نيقن بأعجاز القرآن الكريم و لنفهم معانيه و نتفكر بها.

زغلول النجار....1



مثل ما خبرتكم قبل كم يوم بأن الدكتور زغلول النجار حيكون ضيف عالمسجد اللي بصلّي فيه التراويح, و ان شاء الله النيّه انه يضل يجي من 5 ايام لاسبوع و انا حابه اني الخص اهمّ الاشياء الجديده اللي بحكيلنا اياها بالثلث ساعه اللي بين ركعات صلاة التراويح, حكتب المعلومات الجديده عالقليله علي وحكتب اللي بقدر اتذكرة و ان شاء الله النيّه اني حركز كتير :)
اكيد في منكم من هو اعلم مني بالدين , فلهيك حتكون المعلومات قديمة الهم , ريت اذا بعرفو اكتر عن الموضوع ينورونا احنا كمان :)

امبارح كان يحكي بشكل عام عن رمضان, و معظم المعلومات اللي بنعرفها عن فضل هالشهر الكريم و مضاعفة الاجر في الحسنات, وعن نزول القرآن بهذا الشهر و عن الجهاد و الغزوات والفتوحات اللي صارت بهذا الشهر

من ضمن الحكي في معلومتين حكاهم الدكتور الله يجزيه الخير انا اول مرّه بعرفهم

اول معلومه بموضوع قرأة القرآن الكريم و تدارسة, انه من السنّه انّا نتدارس القرآن بالاضافه لقراءته اسوة برسول الله صلى الله عليه و سلم , كان الرسول الكريم يتدارس القرآن هو و سيدنا جبريل كل رمضان,المعلومة الجديده هي ان مضاعفة الحسنات تختلف بحسب طريقة قراءة القرأن, اللي بقرأ القران يكون في ملك يسجّل قراءته ويضاعف الاجر 10 اضعاف,و اللي بقرأة مع تدبير بعض المعاني و البحث عن تفسير بعض الايات بكون في ملكين يسجلو قراءته و يضاعف الاجر 20 ضعف و حكالنا الشيخ عن فضل قراءة القرأن مع تفسيبر معانيه بشكل كامل بكون في 4 من الملائكة بسجلو و يضاعف الاجر 70 ضعف , للاسف مش متزكرة شي من الحديث :$ وما قدرت اتأكد من صحته, ولكن الله اعلم ان الدكتور مستحيل ينقل حديث ضعيف.

الاشي التاني و هو بختص بعلم الفلك, حكالنا الدكتور ان بداية الشهر الهجري تقاس بتكون الهلال, وبالعادة الهلال يمكن رؤيته وقت المغرب, لهيك يعتبر اليوم بدا من المغرب, فأول صلاة باليوم هي المغرب و بتبعها العشاء و بعدها الفجر, وصلاة الفجر هي الصلاة الوسطى وليس العصر...انا اول مرّه بعرف هالمعلومه, علشان هيك بنصلي التراويح بس يعلن شهر رمضان, لانه يعتبر بداية اليوم بالشهر


وحكا الشيخ عن لزوم توحيد يوم الصيام, وان اسلامنا دائما يدعو - الامة الاسلاميه - يدعونا للوحده ويشبهنا بالجسد الواحد, ولكن احنا ما بنستغل هالشي و دائما متفرقين, مع ان في اشياء كتير بدينا بتوحدنا و بوحدتنا اكيد حنكون اقوى

________________

اشي تاني عجبني حكاه الشيخ السابق قبل بيوم, اللي حكا عن اثر المعلم في حياتنا, حكا انه من اعلى صوت في بيوتنا نحدد نهجنا بالحياة و هل تربيتنا صحيحه او لا, فهل صوت تلاوة القرآن هي الاعلى او صوت دروس العلم والنقاشات فيها, وحتى لو تلفزيون وهو الاغلب صاحب الصوت الاعلى ببيوتنا, هل هو صوت قرآن او صوت شيوخ افاضل دروسهم وبرامجهم ويلا صوت اغاني و افلام!!

هالمرّة ما عدّاك العيب




انا من متابعي و محبي قناة الاذاعه حياة اف ام وقبل هالمره حكيت عن هالاذاعه و كيف اني ما بستغني عنها و بحب اسمعها وين ما كنت, بالبيت و بالسيارة وبالشغل, و اخوي خلص حفظ الدرس بس ياخد السيارة بالليل تاني يوم بس اشّغل السيارة ما بحب تكون اي اذاعه تانيه غيرها و خصوصي انه بحطلي عأغاني غريبه, لسا بتحكي بسم الله بتطلعلك مش عارفه مين بتتغنوج و بتغني, او على هالصبح اغنيه لميتاليكا :$

المهم, حاليا في برنامج بسمعه وانا مروحه اسمه " عدّاك العيب" برنامج درامي اجتماعي خلال 10 دقائق حوار عائلي بين ام و اب و ابنه و ابن, بحكي عن قصّه معينه لابراز هدف و قيمه اسلامية معينه , مثل عن عدم الاسراف في رمضان, و عن التملّق و هز الذنب بالشغل وكيف اللي بحكي الحق بتوجهله انذار وممكن ينتقل لمنطقه نائيه لكن المهم الواحد يحكي كلمة الحق.

حلقة امبارح الفكرة حلوه و لكن الحوار كان غريب, حلقة امبارح كانت ان الجارة بتيجي و بتسأل الام " انتو غيرتو سيارتكم؟؟" و بعد لف دوران بتحكي " فكرتكم غيرتوها لاني شفت بنت بتتسحب و بتركب سيارة غير سيارتكم وما في بنت بالعمارة غير بنتك" طبعا هون الام بتبدا تولول , و بس يجي الاب و بشوف الام مهمومه بسألها بتحكيله ان جارتنا فلانه, ما بعرفها بتحكيله فلانه اللي خطبت بنتنا لابنها و ما وافقنا, و بتحكيله شو حكتلها, بنتقل الحوار لتاني يوم بين الام اللي مقطّعه حالها بكا و بين الجارة ذاتها, و بتشكيلها كيف الاب منع البنت تروح الجامعه و حبسها بغرفتها و "ابصر شو راح يعمل فيها " .

و فجأه بدخل الاب و ببدا يهزّئ بالجارة و بحكيلها انه كان قاعد مع زوجها وحكاله ان مرته كذابه وعملت كل هاد بس علشان ما وافقتو عالخطبه, و طردها من البيت و هو بحكيلها " بدك اياني اقتل بنتي....بدك اياني اقتل بنتي"

فااااا الاب و الام صدقو الجارة اللي ابصر من وين جاي مع معرفتهم بأنها كاهتهم من يوم ما انهم رفضو المحروس, وما فكرّو للحظه يتأكدو من البنت و نسيو تربيتهم لبنتهم 19 سنه - على اعتبار انها سنة اولى- و كان التصرف الوحيد اللي قدامهم انهم يحبسو البنت و ما يخلوها تروح عالجامعه و الطامّه الكبرى ان العمل الوحيد اللي بقدرو يعملوه بهيك موقف هو قتل البنت!!!


بحب احكيلكم ان هالمرّه العيب ما عدّاكم وبالعكس قاعد بوسط البيت كمان ...

حتى تترك اثرا



على مدى دراسة 12 سنة بالمدرسة و 4 سنوات في الجامعه, حاولت افكّر بمدرّسة او دكتور ترك اثر ايجابي في نفسي, وللاسف ما لقيت غير 3 معلمات, معلمة الصف الاول و معلمات الانجليزي بالصف الاول اعدادي " السابع" و الثاني الاعدادي " الثامن" , ما بنكر ان حبي لمعلمات الانجليزي فادني كتير بدراستي و بالتوجيهي جبت 95 بالانجليزي, مع ان البعد عن الممارسه خلّاني افقد كتير من المخزون و خصوصا القواعدي, بفهم قرأة و محادثه ولكن بالكتابه, الاخطاء الاملائية و القواعديه بتخليني اعيد كتابه اي شي اكتر من مرّه.

هالشي خطرلي بعد درس الدين بين ركعات التراويح امبارح بالمسجد, الشيخ سأل الحضور عن مدّرس تربية اسلاميه ترك اثر ايجابي في نفسك و خلاك اقرب للدين, وللاسف ولا واحد من المصليين اجاب بأسم, و حكا الشيخ اللي طلع عامل دراسة عن الموضوع انه بعد سؤال عدد كبير من الناس, و بعد سؤالهم عن اي مدّرس ترك اثر في نفسك, كانت اعلى اجابه هي 3 مدرسين و من ناس قلال جدا.

للاسف مدرسين و مدرسات في مدارسنا بدخلو الصف بأدّو واجب تلقين و حشي المعلومات في دماغ الطالب, مع عدم مسؤوليتهم عن مدى استيعاب و فهم الطالب للمادة او مراجعه التفاصيل المهمه مع الطالب, فما بالكم بماده مثل التربية الاسلاميه, اللي بتبدا من الصف الاول الابتدائي, هلأ لو كان تأسيسنا الاسلامي صح من صف اول و هالموضوع اخذ رعايه زياده لاهميته الكبيره على حياة الانسان بعدها النفسية و الاجتماعيه و الاخلاقيه, كيف ممكن يطلع الجيل الجديد و شو ممكن يطلع منه.

تطرق الشيخ لاساليب التدريس و انها بتستخدم اسلوب التدريس احادي المحور, وهو التلقين فقد ومخاطبه العقل , و هاد السبب بخليها فيها جمود وما توصل للطالب بسرعه, و قارن مع اسلوب المعلم الاعظم, سيدنا محمد صلى الله عليه و سلم, واللي كان طريقة تدريسة ثلاثي الابعاد, فكان يخاطب العقل باعطاء المعلومه, وكان يخاطب الوجدان والقلب, مثل موضوع الصيام , لمّا فرض الصيام, و عرض رسول الله صلى الله عليه وسلم الموضوع على المسلمين , كان المخاطبه العقليه بأوامر الله سبحانه وتعالى , ومخاطبة القلب بحيث كل الموجودين طلعو من الجلسة وهمه مش بس مقتنعين بالصيام لأ و بحبو الصيام و نفسهم يطبقو هالعباده بأقرب وقت, و المحور الثالث هو المحور العملي, بحيث كان الرسول الكريم صلى الله عليه وسلم يطبق الاوامر امام المسلمين حتى يكون تركيزها بالعقل اكبر, فمثل الوضوء, طبّق الرسول الكريم خطوات الوضوء امام المسلمين و من وقتها لهلأ عم نتناقلها من جيل الى جيل.

فيا ريت يصير اهتمام اكبر بالتعليم عموما وبتعليم التربية الاسلاميه خصوصا ليتأسس الطالب منذ الصغر و يتعود على اساسيات الدين, وما يكبر و هو اقل تطبيق عملي مثل الصلاة مثلا ما يكون بعرف يعملهم, و انا بحكي هالشي لاني شفت ستات و رجال دارسين و متعلمين - المقصد انهم اخدو المعلومه بالمدرسة - و بس ربنا هداهم على كبر و بدو يصلو ,بدون مبالغه ما عرفو كيفية اداء الصلاه ...

انطلاقة مدّون جديد...4





جعفر حجير صديقنا المعلّق اقتنع اخيرا يعمل مدونه
و انا متأ:ده انكم حتحبوها

فرحبو معي بصديقنا القديم
و المدون الجديد جعفر
في مدونته الجديده
مباشره من فلسطين




ملاحظه ع الهامش....صديقنا جعفر , هو احد مؤسسي موقع منحه اللي كتبت عنها مسبقا :)

ملاحظه ع الهامش 2....الى اخي أشرف محيي الدين ...بنصحك انك اتابع المدونه لاني متأكده انها حتعجبك, خصوصا ان صديقنا جعفر بدو يكتبلنا عن حكاوي " الختايره" عن اللد :)

أحبك يا رمضان



طبعا زهقتكم قد ما حكيت اني بحب ال Tag فما حخوض بالموضوع, بس صديقنا المدون LUNAR عزمني على Tag رمضاني :))))
اني اكتب عن رمضان وشو بعنيلي و شو بحب و شو بكرة فيه - شكرا لونار :)


بحب برمضان اني بصير اروح عالمسجد اللي بحبه كتير كتير كل يوم ومرات اكتر من مرّه باليوم, مسجد ابو غزال, عمري ما توقعت اتعلق بمكان لهدرجه, بحكي لبنت خالي قد ما بحبه هالمسجد بكون نفسي اضمّه, ما بعرف كيف بدها تزبط بس جد بحبه هالمسجد, ما شاء الله عن الشيخ اللي فيه مبدع بصوت جميل في القرأن و بخطبة مميزة بالجمعه وما بين كل 4 ركعات بالتراويح

بحب برمضان قيام الليل بالمسجد بالعشرة الاواخر, ربنا يسرلي اياها لاول مره السنة الماضيه و ان شاء الله تتيسر السنه, ما في احلى من قيام الليل و الخشوع والبكا وبعدين صلاة الفجر بجماعه , بحس حالي بنظف من جوا و بتنظف نفسيتي و تفكيري و روحي, كل شي بصير نقي لابعد الحدود....الله يثبتنا بعد رمضان

بحب برمضان جمعة العيله عالسفرة , من وقت ما اخوي اشتغل واحنا بطلنا نجتمع عالاكل, و خصوصا ان العيلة كانت تتغدى على موعد ترويحتي قبل ما يشتغل اخوي, وبس اشتغل طلعت ترويحته بعدي بساعه ونص, وانا بديت رجيم فصار كل واحد ياكل لحاله, وهلأ كلنا بنقعد مع بعض, و بناكل وبنحكي, ولهيك ماما بتكره حد يفطر برّه , بتحكي كلنا 4 من غير شر و بس واحد يغيب بتفضى السفره.

بحب برمضان ان كل القنوات و لو مش بأرادتها تحط برامج لشيوخ بحبهم, مين كان يتصور ان ال LBC تجيب العريفي :)
بحب برمضان عمرو خالد, العريفي, النابلسي, خواطر, طارق سويدان, عمر عبد الكافي وبحب كيف بصير سهل نحضر 4 برامج على نفس القناة او ننتقل من قناه لقناه بين هالشيوخ بكل استمتاع.



بحب برمضان ذكريات الطفولة اللي بترجعلي كل يوم برمضان عند الغروب, بتذكر لما كنّا ساكنين احنا و دار عمي مع بعض بنفس العمارة, قبل المغرب بنص ساعه نطلع عالسطوح ونلعب, كانت احلى الايام, اليوم بس حكينا مع خواني عال Skype تذكرنا هديك الايام, واول ما جبت سيرتها كل واحد فينا سرح في عالمة لثواني و ارتسمت على وجوهنا نفس الابتسامه :)

بحب برمضان العزايم والزيارات العائليه, لانه بالعزومه بشوف ناس الي سنه مش شايفتهم - من رمضان الماضي :$ - و بكره بالعزايم ان اذا ما راحت صلاة التراويح كامله علينا بالمسج , بنضطر نصلي 8 ركعات ويروح علينا الدعاء.


بكرة برمضان بس اروح متأخرة عالمسجد, لاني بضطر اصف بالصفوف الخلفيه اللي كلها صغار و اطفال و عدم خشوع بالمرّه :$

بكرة برمضان الستات اللي بفهمو مبدأ " سدّو الفرج" غلط, يعني بعرف ان المفروض نلزق ببعض وما عندي مانع, لكن انها تتركى تماما علي و اصير مش عارفه اتحرك, واني اصير من دون اي سيطرة مني اتحرك حسب حركتها و الشيخ بقرأ لانها بمنتهى البساطه متركيه علي, بصير اموج معها و كل ما ابعد شوي عنها و طبعا نضل طابين ببعض ترد تقرّب اكتر, و بهيك بروح مني الخشوع غير ممكن مرات اخد اثم اني اصير احكي عليها بعقلي و اكرها :( ما بعرف اذا واصله الفكرة بس اشي بفرفط الروح


بكره برمضان الازمة اللي ما الها داعي, مع اني والحمد لله كل سنة بالشغل بنروّح قبل باقي الدوائر, هالشي الوحيد المنيح بشغلي :) لكن برضه العالم مش طايقه بعضها بزياده ويا ويل اذا واحد وقف دقيقه


رمضان بالنسبة الي من احلى شهور السنه, لاني بكتشف الحمد لله ان نفسي مش أمّارة بالسوء بشكل كبير زي ما كنت اظن,و ان اخطائي بالغالب هم من وسوسة الشيطان ....الله يغفرلي و يغفر للجميع و يقوينا و يثبتنا يا رب

المفروض انقل الواجب لثلاث اشخاص , لكن انا حترك الموضوع دعوة مفتوحه للي بحب يشاركنا بمعنى رمضان بالنسبة اله مع انو في كم شخص ببالي :) فأذا ما عملتو الواجب الاختياري حنخليه واجب اجباري :)

اهلا اهلا يا رمضان ...2010




اول شي كل عام وانتم بألف خير يا رب
هيهم هلأ اثبتو رمضان بكرة ان شاء الله
الله يتقبل صيامنا و قيامنا يا رب
و يجعلنا من المقبولين و المغفور ذنوبهم ان شاء الله
اللهم اعتق رقابنا يا رب
لا تنسو صلاة التراويح الليله
و هي اغنية او انشوده ما بعرف
"اهلا اهلا يا رمضان...اهلا و سهلا يا رمضان"

هي للي ما سمعها :)


الصورة اللي فوق للبلكون عنّا
هي بتضلها لعيد الاضحى ان شاء الله
و في فانوس بس نركبه بصورة ان شاء الله :)

مغامرات على الطريق :)


اول شي الله يسعد صباحكم ومساكم وكل اوقاتكم :)
الي فترة ما بشبك عالنت واذا شبكت يا دوب , بالشغل ضغط رهيييييييييييييييب , ما حد بصدق انو حكومة وبتشتغلو, ما بعرفو انّا ما بنرفع راسنا, وبالبيت للاسبوع حافل ما شاء الله :)
فللاسف مش كل البوستات الجديده قرأت و للاسف ما علقت على شي, وهلأ لاقرأهم واعلّق بكون راحت الافكار اللي اجت ببالي اول ما قرأتهم بصير مش عارفه اعبّر وخصوصا بس كل المعلقين يكون كاتبين اللي ببالي :)
ولكن ...اكيد حينقرأة و كلهم ان شاء الله


اول مغامرة لمّا كنت ماخده مغادرة و مستعجله بدي اروح عالبيت عندي مشوار, و لقيت سياره صافيه تقريبا جنب سيارتي و بالصدفة السيارة اللي وراي تارك السائق او السائقه مسافه محرزه, انا حكيت بدل ما ارجع هلأ عالشغل وهات لاقي المراجع صاحب السياره, حكيت يلا يا بنت اكيد بتطلع, صرت امشي شوي لقدام و شوي ارجع, وبعد عدّه روحات ورجعات, اجا شب, قرفص جنب شباك السيارة, وركى راسه على ايديه اللي حطهم على طرف الشباك الكرسي اللي جنب السائق, وبحكيلي "عفكرة طالعه السيارة, ولو تردي علي بساعدك و بتطلعيها" حكيتله شكرا وهيني بحاول اطلعها, اصرّ يدلني حكيت ماشي فيه الخير, وصار ليثبتلي وانا برجع ان سيارتي بعيده عن السيارة اللي وراي يوقف بين السيارتين, وانا خايفه اطب فيه اتورط, المهم ضليت هيك لطلعنا السيارة, حكيتله شكرا و بدي امشي, بحكيلي " بس ما في ثقه حكيتلك بتطلع وما صدقتيني" و مشي للسيارة اللي واقفه جنبي و خلتني اعمل كل هالشي و ركب فيها ومشي :$ طلع صاحب السيارة اللي عملت العجئه وانا والله ولا زمرت ولا حكيت , رضيت و ضليت احاول, وكان على وجهه نظرة انتصار غريبه, ضحكتني :)


تاني مغامره قبل اسبوع رحت عند صاحبتي اللي ولدت جديد, وانا رايحه مريت على صاحبه تانيه اخدتها هي وبناتها معي, وانا مروحه من عندها لاحظت ان النمرة معلقه من جهه وحده والبرغي التاني مفكوك, حاولت ازبطها ما مشي, شكله في سيارة ضاربه فيها وهي صافه, حاولت اشيلها كلها برضه ما زبط, حكيت خلص مدامها ثابته ما حتوقع, ومشيت :)
نص تكاسي البلد زمرتلي, و اشي يوقف جنبي على الاشارة يحكيلي " يختي النمرة بدها توقع" وانا اشكرهم واصف على جنب واحاول اشيلها مش راضيه, المهم ضليت هيك من الحسين لبيتنا قريب الثامن :) بس جد الناس فيها خير الكل ينبهني, لدرجه ان بنات صاحبتي ارتعبو و وحده منهم سألت امها " ماما شو بصير لو النمرة وقعت, بتقلب السيارة" و بدها تبكي, حكيتلها لأ و وقفت و نزلتهم وفرجيتهم شو اللي فالت ليهدو شوي , واحد من الشباب اللي بسوقو بكب - في مقولة تانيه بكم - بحكيلي النره فالته, ابتسمت وحكيتله اه شكرا انتبهتلها و ان شاء الله ثابته, مشيت شوي صار يسوق جنبي و يصرّخ علي " بتعرفي كم مخالفتها هاي....50 ليره" و الشب معصب لدرجه اني حسيته هو اللي حيدفعهم :$ بحكي لاخوي بحكيلي شكله الشب دافعها لهالمخالفة قريب و محروق راسه :)

ثالث موقف...امبارح وانا مروحه من درس الدين انا وبنات خالي و بنات خالتي , كنّا 5 و بالصدفه طولنا و روحنا عال 9, وبدت التلفونات ترنرن ماما و خالتي و خالي, وينكم و ليش تأخرتو, ماما حكيت معها قبل ما اطلع لاني متأكده انها بتكون قلقانه و خايفة ترن لاكون بسوق, المهم و احنا مروحين من صويلح باتجاه الدوار الثامن, فجأه تحت جسر خلدا طلع صوت غريب بالعجل, انا حكيت خلص بنشر العجل, صفيت على جنب و نزلنا, ما في شي, لفينا على كل العجال ما في شي, وانا حسيت الصوت من العجل الامامي من جهة الراكب جنب السائق برضه ما في شي, مشينا شوي بدا يطلع الصوت وكل ما اسرعت شوي يطلع اقوى, الصوت واضح ان في شي معلق بالعجل و بضرب بالحديده من جوا, وطبعا الدنيا عتمه صفيت تحت ضو و انو نلاقي شي ابدا, ضليت ماشيه عأقصى اليمين و الفلشر ضارب و بهدوء ممل جدا جدا, لوصلنا لبيت خالي, نزلنا نطلع لانه في ضو اكتر, مرو شباب من جنبا, ةالسلام عليكم بنقدر نساعدكم, حكينالهم , طلب شب اركب السيارة و امشي شوي شوي, وفعلا, واذ بقطعه مطاط فالته من العجل من مكان الفرزات :$ مش عارفه هي زياده ويلا اساسيه, قطعناها و مشيت اختفى الصوت :) بنت خالي بدها ترميها حكيتلها لأ هاتيها بدي احتفظ فيها اللب عمللتلنا فلم الرعب هاد , وهيها معي بالسيارة :)

المغامره الاخير....اليوم الصبح, بتطلع عالعجل اللي رعبنا امبارح ليكون ماله اشي, ولكن ما شاء الله عليه ولا فيه اشي, كملت تفقد العجال , طلع العجل الخلفي مبنشر , لكن مش منفس عالاخر, بحكي لاخوي اللي بوصله عالشغل كل يوم, بح0كيلي خلص روحي عالكازيه و بزبطولك اياها, الكازيه يعني بعد شغله و يعني اروح لحالي و يعني استنى ليفتحو لانهم بعد ال 8:30 ببلشو بنشر, انئمصت و قلبت خلقتي :) انو كيف اروح لحالي !!! المهم بحكيلي خلص وصليني عالشغل و بختم و بطلع بزبطلك اياها و هاد اللي صار :)
الله يرضى عليه هو وصاحبه التنين ببدلاتهم شلحو الجاكيتات و بدو يغيرو البنشر :) و مشي اليوم على خير :)

يعني مغامرات لكن كلها انتهت منيح والحمد لله :)

سبعين مليون!!!!...اي يلا عاد



بحسب المقال بجريدة الغد, بعد دراسة - مش عارفه مين اللي عملها و كيف طلعو هالارقام - طلع ان قعدة موظف الحكومه ساعه عالنت يوميا بتصفح مواقع ما الها دخل بشغله بتكلف الدولة 70 مليون سنوي


أنّ هذه الخسارة تتوزع بين 68 مليون دينار في كلفة ضياع وقت الساعة من عمل الموظف بمعدل راتب شهري يصل الى 350 دينارا، ومليوني دينار هي كلفة الهدر في فاتورة الإنترنت والأجهزة سنوياً.

انهم يعني حاسبينها بالقرش, و الحلو انهم حسبو راتب الموظف الحكومي 350 دينار و هاد المتوسط الحسابي للراتب يعني :) من وين جابو هالرقم المهول مش عارفه - قصدي الراتب هون - 350 راتب موظف حكومي !!!!



كما وأوضح الوزير أن هذه السياسة ستطبق فقط على موظفي القطاع العام من مستخدمي الشبكة العنكبوتية ويقدر عددهم بـ 100 ألف موظف، وليس على جميع الأفراد المستخدمين للإنترنت في المملكة.


هاد الناقص والله, يحددولنا ببيوتنا و بالانترنت اللي بندفعو احنا شو المواقع اللي ندخلها وشو نقرأ وشو ما نقرأ



اوك..نيجي على مؤسسه حكوميه كالمؤسسة اللي بشتغل فيها, عدد موظفينها 250 موظف, الانترنت موصول على 25 جهاز, 20 منهم على اجهزة المدراء و رؤساء الاقسام و 5 على موظفين بحتاجو النت بشغلهم, ال 20 جهاز للمدراء و رؤساء الاقسام بس 5 منهم بستخدمو النت بالشغل و الباقي ولا الهم دخل

ما بنكر ان في جزء من هالرؤساء الاقسام والموظفين طول نهارهم على الفيس بوك و اليوتيوب و بحضرو المسلسلات التركيه, و المدير العام بشغله من الصبح لاخر الدوام عالتلفزيون الاردني بركي حد جاب سيرته بأشي ليرد عليهم, وعجزنا نقنعه ان ال Download بخلص عالفاضي و لو جبت تلفزيون احسن ما في مجال يقتنع :$, وما بنكر ان في موظفين ما براعو ربنا بشغلهم و بتعاملهم مع المراجعين وما بحللو راتبهم وضميرهم ميت و بيجو بشربو قهوه و بفطرو وبروحو, ما بنكر بوجود هالفئه و اللي موجوده بالقطاع الخاص بس يمكن بنسبة اقل.

قبل ما ابدا بالموضوع ...في اشي مش فاهمته انا يا ريت حد يوضحلي اياه...هلأ احنا اشتراكنا بفاتوره محدد السعر الشهري لمزدو الخدمه و للاتصالات, يعني بغض النظر عن كم عدد اللي استخدمو عالسعر مدفوع شهري, و حتى لو خلص ال Download ما بأثر على السعر, كيف عدد المستخدمين حيأثر, بعدين مين حكا ان كل موظف حكومي في عنده جهاز كمبيوتر؟؟؟ اي اذا انا المبرمجه اول ما اشتغلت و انتدبوني عضوه في فريق مكون من 5 مبرمجين لبرمجه النظام اللي كان تقدير قيمة شراءه من شركه خاصه ب 50 الف دينار و قعدنا نشتغل لفتره على 3 اجهزه, ايوه 5 مبرمجين ب 3 اجهزه ليبرمجو نظام ضخم و برمجوه وما سمعنا كلمة شكرا اكيد, فهل بتتوقعو ان الموظفين اللي ما الهم دخل بالكمبيوتر عندهم اجهزه؟؟؟

و بعدين بحكو عن الهدر بالرواتب اللي بتندفع للموظفين اللي بضيعو ساعه عالانترنت, وبنسو الهدر بالموظفين اللي بعينوهم و ما بكون الهم مكتب اساسا ليكون الهم جهاز كمبيوتر, عنّا بمديرية الحاسوب تم تعيين 3 موظفين ضلهم 6 شهور قاعدين على الكنب بالمكاتب لحتى وفرولهم مكاتب خاصه و 6 شهور تقريبا ما عملو شي غير شربو شاي و قهوه, بالمحاسبة تم تعيين 10 موظفين جداد من 5 شهور و لهلأ برضه منتشرين على الكراسي و الكنب بالمكاتب و انجاز الشغل اليومي الهم لا يتعدى الساعه لانه باقي الموظفين اللي بخلوهم يقعدو على مكاتبهم عندهم شغل و بدهم ينجزوه, في فترة هالساعه الموظف الاصلي القديم بقعد عالكنبايه ليخلص الموظف الجديد ساعه شغل

بحكو عن رفع الانتاجية و تحسين واقع الخدمات الحكوميه, اذا بعد تفكير عميق طلعو ان ساعه الانترنت هي السبب في قلّة انتاجية الموظف فهاي مأساة حقيقيه, الموظف الحكومي اله سنين بشكي و ببكي من الراتب اللي زي الزفت, من قلّة العدل و المحسوبية اللي امشية الشغل , ان كفائة هالموظف تقاس بأنتمائه لشخص المدير الفلاني او رئيس القسم العلتاني و اكيد شغلة وانجازه ما الهم اي تأثير, او مثل عنّا بالشغل بيعطى الموظف كتاب شكر و يرشح ليكون الموظف المثالي, لانه بختم عالساعه و بوقع عالدفتر بالمواعيد و بلبس الباجه الوظيفيه بس....مش مزح بس هاد المقياس, وممكن لو موظف تأخر بالشغل لينجز اشي كتير ضروري و روّح عبيته عال 9 بالليل و تاني يوم اجا عال 8:30 يتوجهلة تنبيه لتأخره وصارت.....يا ريت تسمعو صوت الموظف و تعرفو الطريقه الحقيقيه لرفع الانتاجيه و تحسين واقع الخدمات, وما تطلعو بأرقام عشوائيه ما الها معنى و بعدين لتكسبو الشعب و لتبررو ضياع فلوس الضرايب اللي مفروضه على كل شي بحياتنا و تحكو انها هاي كلها ضرائب الشعب بتروح على الساعه اللي بضيعها الموظف الحكومي بقرأه المواقع الاخبارية المعارضه لافكاركم ....كبيرة بصراحه