Things I Like To Whisper About

Would You Hear Me Whispering

الى متى!!




كان يحب السير كثيرا, يجد فيه الفرصه الوحيده لممارسه حريته, بحيث يكون لوحده, لوحده تماما وخصوصا مع سماعات الاذن التي تفصله تماما عن العالم الخارجي, يختار القناة المفضله فلا احد يزعجه ولا احد يعترض, ولا يسمع اي صوت غير صوت افكاره تقاطع ما يسمعه بين الحين والاخر, ولكن حديثا اصبح هنالك ما يقاطعه و يفصله عن هذا الجو الروحاني و الطقس الجميل الذي تعوّد عليه, مجموعه من الحجاره او سياره قد تركت الشارع بما رحب لتصطف على الرصيف الضيق بالمكان الوحيد الذي تركته "اشجار الزينه" كما يسمونها بالرغم من انها بنظره قد افسدت المنظر و شوهته و افسدت عليه حريته.

اليوم المشؤوم بالنسبه له هو يوم التقاءه صدفه باصدقائه وهو يمارس هذا الطقس الجميل, لقائه باصدقائة يعني التوقف و نزع السماعات وبذلك يكون انتزع تماما من عالمه و رجع الى ارض الواقع, حديث ليس له معنى قد يستمر اقله الى نصف ساعه و قد يتخلله بعض المكالمات الهاتفيه و جلب سيرة فلان و علّان و قد يتخلله ايضا زجاجه من العصير او احدى المشروبات الغازيه, و بذلك يرحع الى عالم تلبية رغبات الافراد و البعد عن "عالمي" كما يحب ان يطلق عليه وهو ما يتخلل الفتره التي يقضيه فيه اقلها ساعتين خلال سيره.

ولكن اليوم حدث ما لم يكن بالحسبان, اليوم سحب احد اصدقائة السماعات بشده كنوع من المزاح و انسحبت السماعات ليظهر الصوت عاليا مجلجلا في اذان كل من حولهم, و بدأت التعليقات من حوله " ما هذا!!"..." والله ما عرفتك"..." زي اللي عنجد"... و بدأت الضحكات تتعالى حوله, شعر بخجل كبير و لم يدري ماذا يقول وبماذا يبرر الذي حصل, " ياليتني اغلقته قبل ان اقف معهم" و فجأه احس بان العالم كله توقف من حوله و اختفى الاصدقاء و اختفى الشارع و احس نفسه في منطقه سوداء لا يظهر منها الا بقعه ضوء وحيده يقف تحتها, " ولم و من ماذا تخجل!!" سأله صوت من داخل عقله, " وما العيب او الخطأ بالذي تسمعه!!! ءانت الذي يجب ان تشعر بالخجل ام هم!! " و بلحظه رجع ضجيج الشارع و قهقهات الاصدقاء و حرارة نظراتهم المستهزءه .....نظر اليهم وقال " نعم وما العيب في ذلك؟؟؟ ما العيب في ان استمع الى ما احب ؟؟ " ثم سأل نفسه " و لماذا اخبئ ما اسمع؟؟؟ لعلّ العلّه موجوده في نفسي انا و ليس بمن حولي!! " ..."لماذا افكر في رأي الناس عندما اكون مقتنع تماما بما افعله!! لماذا دائما نسعى لارضاء الناس مع ان ارضائهم ان لم يكن مستحيل فهو يعني في كثير من الاحيان عمل مالا نحب و اجبار انفسنا على ممارسات لا نطيقها"

ابتسم....اشار لهم بيده مودعا....وضع السماعات جانبا, رفع الصوت و مضى

ذلك الشعور



نعم اعرفه تماما
ذلك الشعور بانك قد وصلت الى القمه بالرغم من انك لم تراها بعد, عندما يتسلل الاحساس بان كل شيء سيكون على مايرام , وفجأة....تجد نفسك تستيقظ من دوران عنيف اصابك بعد سقوطك لتضرب باحدى الصخرات التي كنت تعتقد انك قد انتهيت من عبورها

و تتكرر تلك السقطات مع اختلاف الازمان و اختلاف شدّة الالم و اختلاف الصخرة التي عدت اليها, فقد يكون السقوط عنيفا مدويا او قد يكون انزلاقه خفيفه ليس لها ذلك الاثر, قد تسبب غيبوبه لفتره, قد تسبب كسر مع اختلاف العضو المكسور, يد!!! من الممكن ان تستمر بيد واحده او رجل واحده لفتره, نعم هنالك نوع من التأخير ولكن في النهايه ستشفى و تستمر بالتسلق, قلب!!! هنا نختلف , منّا من يستمر بقلب مكسور ومنّا من لا يقاوم, منّا من قد يلثئم جرحه و ينسى ومنّا من قد يلثئم جرحه و يحاول ان يتناسى, و احيانا قد نصاب بتوقف دماغي وفكري يختلف في حدتّه وفي فترة استمراره, و هناك ما هو اكبر باعتقادي....عندما نقف هناك عند تلك الصخره و لا نرى شيء, كل شيء ظاهر ولكننا لا نراه كل شي موجود و ابواب كثيره تفتح بعدما اغلق ذلك الباب في وجهنا و سقطنا الى هنا, ولكننا نبقى واقفين بين تلك الابواب المغلقه و الابواب المفتوحه نقف بلا حراك بلا امل .... ومنّا ايضا من يستطيع ان يستمر.

و يبقى السؤال الذي يعود في كل مرّه.....هل فعلا كنا نسير بالطريق الصحيح ؟؟؟ وهل فعلا تلك كانت القمّه؟؟؟

كأنهم زودوها!!!






كأنه بس الناس تمل بصير فيها اشياء غريبه و بتطلع بافكار عجيبه؟؟؟
بس العالم تبطل تهتم بأشي غير بتوافه الامور بتبالغ اكتر من المبالغه اللي بتبالغها؟؟؟

وين ما الف وجهي هاليومين بلاقي مقاله طويله عريضه عن الفقيد الغالي على قلوب الملايين - كما تبينلي - "بول الاخطبوط"

من اللي قرأته اكتشفت ان بول اللي مات عن عمر سنتين ونص كانت حياته احسن من حياة ملايين البشر
في جريدة الامارات اليوم عرفت انه " وينحدر «بول» من أصول أرجنتينية رغم أنه ولد في إنجلترا ويحمل الجنسية الألمانية" و حصل على تكريم من اسبانيا و انه " على الرغم من أن الأخطبوط الشهير قد توقع خسارة المنتخب الانجليزي أمام منتخب ألمانيا في دور الستة عشر - وهو ما حدث بالفعل - إلا أنه أعلن ولاءه لإنجلترا، وتم اختياره ممثلاً لملف استضافتها لكأس العالم قبل أن ينفق"

كيف يعني!!! حد يفهمني كيف اعلن ولاءه لانجلترى!! شو ممكن عمل ليعلن ولاءه!!
و بعدين حصل على تكريم ملكي من اسبانيا و على لقب "مواطن فخري"

الحلو بالتعليقات في واحد معلق تعليق مضحك و محزن بنفس الوقت التعليق كان
" الاختبوط بول احسن مني على اقل عنده جنسية "

ومع استمرار البحث و شكرا لعمو جوجل اكتشفت ان لبول صفحه عالويكيبيديا بالعربي و بالانجليزي


و منهم عرفت ان بعد فوز اسبانيا الشعب الالماني زعل " فنزلت عدة مقالات بالصحف الألمانية منها بوضع الأخطبوط بول بالمقلات و الأخرى وصفة لطبخ الأخطبوط بزيت الزيتون و الحامض فأمر رئيس الوزراء الأسباني بإرسال حراس شخصيين إلى الأخطبوط لحمايته من المشجعين الألمان."

و انه " أختير بول للمنصب "سفير" الرسمي لإنجلترا بنهائيات بطولة كأس العالم لكرة القدم 2018 ."

طيب كيف 2018!!!
طب مهو الاخطبوط ما بعيش اكثر من 3 سنوات كيف بدكم تخلوه لل 2018

وحتى بعد ما مات الشب برضه اسبانيا تقدمت بطلب لحتى تاخد الجثمان و تحطه بمتحف عأساس انه تكريما لبول, طبعا اكيد كلنا عارفين ان هالاهتمام هاد مش علشان ولاء وانتماء و صفاء و هالقصص اللي بحكوها, كله علشان الفلوس اولا و اخرا, و مش بعيده ابدا يحنطوه و يصير هو رمز كأس العالم ل 2018 مهو قصّه و العالم فاضيه خليهم يلتهو شوي


اه صحيح.....و اكتشفت انهم ألفوله اغنيه بعنوان "we love you Paul"
عجبني تعليق عالفيديو بحكي "goodbye Paul you would have made a great sushi"


من كل هالكلام صرت مش عارفه كيف ممكن نكمل حياتنا من غيرك يا بول :"( يللي جبتلي النابوليا بالشيء الفلاني يا بول, يعني بعمر سنتين ونص كل هالانجازات و التقديرات و الجنسيات و الحرّاس الشخصيين و السفرات و الاستضافات و الالقاب!!!

كتير...صح!!
كتير كتييييييييييييييييييير كمان

العيد مع الاقارب





اول يوم بالعيد بالامارات بكون بالعاده تجمع لكل افراد العيله المتواجدين بالبلد و بالعاده بتكون عزومه ببيت شخص منهم وكل واحد من المدعوين عليه بجيب معو شي بحدده صاحب العزومه , اخواني مثلا واحد كان عليه يجيب الحلو, جاب اشي اسمه حلو ملوكي بالقشطه, طعمه اشي خيااااال بصراحه, و اخوي التاني كان عليه الحمص والفلافل و هالاشياء و الخزعبلات كلها اللي بعملها عمو صاحب المطعم :) فول , مسبحه, باباغنوج, متبل, حمص بالفول - مش متزكره شو اسمه - بس اشياءات كتير زاكيه ,لان الجو حلو كتير هالايام فالعزومه كانت بالهواء الطلق, وصلنا متأخرين طبعا بسبب الصغار, عبود قرر يعمل اشي و احنا بالسياره فرجعنا لنغيره البامبرز :)

بس وصلنا انصدمت من عدد الاشخاص الموجودين و عدد الاطفال ما شاء الله, همه قرايبنا من بعيد و من جهة ماما, نص الموجودين ما بعرفهم, الجو اجمالا كان غريب, جايبين مايكريفون وسماعات و اشي بغنو واشي بحكو نكت و اشي حاطين اغاني, بالبدايه كان دمهم خفيف بعدين ضوجونا بصراحه, صغار بنطو وبلعبو وبتقاتلو وببكو وبضحكو و الشباب بغنو و بتخوتو, المشكله وين كانت يا حزركم!!! لا مش بأي شي من اللي حكيتو, المشكله بصبايا العيله و بزوجات القرايب, ايش فييييي!!! جد ايش مالهم؟؟؟
عايشين الدور بطريقه غريبه, واي دور مش عارفه, مالك يختي منك الها, ايش الألاطه و شوفة الحال هاي وشو بالنسبة للخنف و للحكي اللي بطلع بالعافيه, جد جد الله يرحم جدك منك الها.

اكيد لازم تحكي مع ابنها بالانجليزي لانه العربي يك مش كول بالمره و شوي على فلجر بيجي, المشكله ان في وحده منهم كانت معي بالجامعه وكنّا صحبه كتير وبعرفها وبعرف كيف بتحكي, و كل سنه بس اجي عالامارات واشوفها لازم تسوي حالها مش عارفتني :$ طيب ليش يعني؟؟؟ اصلاطن قلّة ذوق و بعيد كل البعد عن الادب انك تبين بكل طلاقه انك مش عارف اللي قدامك وخصوصا بس يكون هو طيب و على نياته و يقبل عليك زي ما انا عملت :( يعني مستحيل كل مرّه تعملي حالك مش عارفتيني و بس شفتي مرة اخوي اللي هي بنت خالتك تحكيلها طيب قولي انك متزوجه اخو "ويسبر" !!!! طب ما انتي عأساس ما بتعرفيني هلأ صرتي تعرفيني؟؟؟؟


اوك بلعناها و بدينا نتحدث , بنحاول انا ومرتات خواني نحكي مع الموجودات - مرة اخوي بتكون بنت خالة بعض الشباب و الصبايا الموجودين وبرضه مش عارفه تنسجم - كل ما نحكي ما بناخد اكتر من هزّة راس وفي وحده عروس جديد حامل بالشهر السادس , من باب فتح المواضبع مرتات خواني بحكولها عن تجربة الحمل لاول مره و بنصحوها و الرد كان جمله طويله عريضه تبين مدى خبرتها للاخت وانها ما بدها حد يدلها مع انها هي اللي بتشكي, قاعده الاخت و محملتنا جميله بحملها مع ان مرتات خواني وحده والدت قبل شهر و التانيه حامل بالشهر التاسع و هي بس قالبه خلقتها بوجهنا , اللي انسجمت معهم همه ضيوفهم, الضيفة التونسيه اللي بتكون حماة واحد من قرايبنا و الضيفة اللبنانيه اللي بتكون اخت واحد من ازواج القريبات :) الباقي بس نظرات من بعيد لبعيد

ما بعرف ليش المغتربين بالخليج خصوصي بفكرو حالهم اشي كتير صارو!!! ليش يختي الخنف وليش تغيري صوتك وطريقة كلامك!! يعني لو بتشتغلي ماشي لانه بتضطري تحكي انجليزي كتير وبنحكي متعوده و زلة لسان, بس انه بطلتي تعرفي المصطلحات العربيه و بتستخدمي انجليزي مع ابنك و بس يعملها على حالو ابوه يحكيلي " شخيت" - بعتذر عالكلمه بس بدي افرجيكم مدى التناقض - هيك كلمات بلا منها , وبس احكيلك وين الفحم تطلعي علي من فوق لتحت و تحكي لابنك " مامي كوكي جيب الشاركول لآنتي " فأنا اكيد مضطره احكيلك.....يرحم جدك :)

المهم ان العيد كان حلو لان ختامه كان مسك , روحنا و قعدنا بالحديقه شربنا قهوتنا و تحدثنا وحكينا و تذكرنا ايام زمان و كتييييييييييير ضحكنا و ضلينا نلعب مع فروحه و عبود بال Bubble Maker"" عرفتوها!!
هديك ال stick اللي بتعمللها "هفت" بسير يتلع منها bubles :)
بتعرفو اسمي الي اكتر من اسبوعين بالامارات فااااااا انعديت :)


صور توضيحيه....اخو امك يبقى عمك :)

متذكرين لما حكيتلكم قصه اخو امك يبقى عمك والمعظم ما فهم الشرح المسهب اللي كتبته !!!!

هي الصور التوضيحيه و ياااااا ريت تركزو معي :)



لنفرض ان التنين اخوان ... علي و ابراهيم :)






علي تزوج سميرة و نتج عن هالزواج محمد


>> >



و ابراهيم تزوج هدى و نتج عن هالزواج بنوته حلوه اسمها عايشه

>>>



سميره ماتت :(



و ابراهيم مات



علي و هدى تزوجو






نتج عن الزواج

ابراهيم و صالح و مريم و طبعا سكن معهم عايشه بنت انجلينا...قصدي هدى
و محمد ابن علي
بهيك الكل صارو خوان الكل :)






ملاحظه ع الهامش

اللي بحكي ما فهم راح ازعل منه لان تجميع الصور كان متعب مع التقطيع كل دقيقه لنحضر
بوب ذا بيلدر و بارني و الهوس الاكبر لعبود هالايام توماس :$
فااااااا ان شاء الله الكل تكون الصورة وضحت اله

ثاني شي ....

انا مش كتير مهووسه بقصصهم وما بحبهم اساسا...بحب جينفر انستون بس :)
ولكن ما شاء الله علاقاتهم خلّت المجال للصور مفتوح جدا


ثامن اشي....

انا بحب الرقم 8 و ما في شي احكيه لاوصل ل 8 ومن يوم يومي بحب القفزات النوعيه
فاااااا قفزت :)

تصبحو على خير....او صباح الخير حسب التوقيت المحلي عندكم
سلام فور ناو


إرفع رأسك



ارفع رأسك ولا تهتم
ارفع رأسك و افرد قامتك و سر

"لم يبقى ما مضى" ستقول لي
"اذا هناك ما تبقّى لنستمر"

ارفع رأسك و ارمي عصاتك وخذ بيدي
فأنا احتاجك ....

دعني انفض غبار الزمن عن عبائتك
فلم يعد مكان لأوسمه جديده على يدك

سر معي و علمني مما تعلمته وترك ذلك الاثر
ارفع رأسك وانظر الي و ابتسم
فقلبي لم يعد يحتمل...




ملاحظه ع الهامش

من وحي الصورة
الصورة استوقفتني طويلا.... و لا اخفيكم انها ادمعت عيناي
الملابس غير ممزقه و لا يوجد رقع او اهترائات
اعتقد ان ما به من فعل البشر وليش من فعل الزمن....هناك من خيّب اماله :(



اقدم ذكرى



كل عام وانتو بالف خير مره تانيه و ان شاء الله تكونو قضيتو اول يوم مبسوطين
امبارح كان حلو مع ان ابشع فتره كانت عزومه الباربكيو :$ بس وانا قاعده هناك و بتفرج عالصغار اللي كانو مليون يمكن و همه بلعبو تذكرت هالبوست اللي كتبته من مدّه و نسيت انشره فحكيت ممتاز بما اني مش لاقيه وقت اكتب مع انو في اشياء كتيره اكتب عنها , مثل المقابلات اللي عملتها مثلا و في صور كتيره افرجيكم اياها مثل زيارة جبل حفيت مثلا :)
بس يلا هالبوست القديم الجديد بمشي هالمرّه :)



انا من انا صغيره وانا ما بعرف انام الا بتختي, و لهلأ بس اضطر انام بتخت غير تختي, بس حد من قريباتنا ينام عنّا بنام بغرفة اخوي لانه فيه تختين, بهيك حاله باخد مخدتي, وحتى بس اسافر كنت اخد مخدتي معي, كنت ...لان مميتي اقنعتني - هو اجبار بالعقل كان- المهم بطلت اخدها , لكن حليتها بأني اشتريت مخده وانا عند اخوي كتييييييييييير بتشبه ارتفاع و مساحة و طبيعه مخدتي :)

و حتى وانا صغيره بس كان بابا يسافر, كنّا انا و خواني كل ليله ينام واحد فينا عند ماما, بالنسبة لخواني و الي كانت متعه كبيره و مغامره جميله, خواني تمشي ليلتهم و بس يجي دوري, انبسط و انام عند ماما و بس يمشي 5 دقائق احكي لماما " بصير اروح عتختي...تحكيلي روحي الحق علي اللي ببدل غزلاني ب" و تضحك :) ......بعرف تتمه المثل , لكن ماما ما كانت تكمله, لانّا بطبيعة الحال غزلان بعيونها :)

المهم بتذكر و انا صغيره كنّا نروح على الشام كتير, عمّة بابا و اللي هي خالتو برضه - راجعو البوست القديم :) - كانت عايشة بالشام , انا ما بتذكر اي شي من السفره غير موقف واحد, اني بالليل بدنا انام و بديت انا ابكي بدي تختي , و الكل يقنع فيي و انا ابدا بدي تختي, بتذكر الغرفه بكل تفاصيلها و بتذكر انه في درج , و بتذكر ان بنت خالة بابا , اللي هلأ انا صحبه معها و بحبها كتير كتييييييييييييييير , بتذكر انها صرّخت علي بالبدايه و انا طبيعي صرت ابكي بزياده, المهم قامت جابتلي فرشه صغيره و حطت مخدات على كل الطراف و صارت زي تخت صغير و جابتلي حرام صغير و انا انبسطت عليه كتير و رضيت و نمت :), بسأل ماما كم كان عمري بوقتها, بتحكيلي اني كنت سنتين و نص :)

انتو شو اقدم ذكرى عندكم؟؟؟ شو اقدم شي بتتذكروه بحياتكم؟؟؟

تقبل الله منا و منكم





ربنا يتقبل طاعاتنا و طاعاتكم و كل عام و انتو بالف خير يا رب

لا تنسو تحسبو حسابي بالشوكلت هالعيد
و كترو من القهوة الساده
لان العيد هون طلع عباره عن رحلة باربكيو بتتجمع فيها العيله و بعدها بخلص
منيح ما رديت على اخواني واشتريت اواعي عيد
لانه العيد حيكون بالجينز السنه :)

Miss U All

** من الصبح وانا بحاول افتح موقع الدرر السنية لاتأكد من صحة الحديث اللي كان على الصورة القبل, اه صحيح غيرت صورة البوست لاني ما لقيت اصل للحديث او انا مش عارفه ادور :) بعملها بعرف حالي
عكلن ...عيدكم هنا و سرور ان شاء الله :)

تحيّة من العين



كيفكم وشو اخباركم؟؟
ان شاء الله يكون الجميع بأفضل حال
انا اموري تمام التمام و الحمد لله, وصلنا بالسلامه وكانت الرحله كتييير سهله والحمد لله, يعني تقريبا اسهل رحلة بتمر علي, اول شي ما دخت :) ولا صار معي شعور الغثيان الغريب اللي بخليني مسطله كل الرحله, وكنّا حاملين هم فروحه حبيبتي قد ما هي حركه ما نعرف نسيطر عليها قامت نامت ساعتين و صحيت تغدت و وصلنا :)

وقتي كله مقضيته لعب مع فرووحه , كل شي بدها "ناني" تعمله الها, و ما تفكرو بالاسم بالنسبه الها تاني و كاندي و اسمي بنحكو ناني ,اذا اسم بنت خالتها ريم بتناديها "لولو" واسمها "فرح" بتحكيه "توتا" يعني الاحرف ضاربه عندها لسا :)

ما صار شي بالنسبة للشغل عم بستنى لسا و شكله لبعد العيد ليصير شي, لكن اجمالا كتير مبسوطه والحمد لله, هو صحيح كل ما حكيت مع ماما ببكي لانها هي بتبكي :( شكلي والله اعلم ما حستمر اذا بضل الوضع هيك, لكن اخوي اللي حاليا موجوده عنده مش مقصر لا هو ولا مرته,و بدينا صيام اليوم :) اخر الاسبوع بدنا نروح عدبي عند اخوي التاني واللي حقضي عنده الفترة الجاي و لاخر العيد بعدين ارجع عالعين, حضلي متنقله لحتى يصير شي بالشغل, حاليا عايشة الاجازه على اصولها :)

اخوي سافر قبلنا بأسبوع علشان يكمل اجراءات اقامة نور و اول ما وصلنا البيت لقناه محضّر مفاجأة لكل وحده فينا و حاططها بفرفتها
هي كانت مفاجأتي :)






بس حبيت اطمنكم علي- انو يعني انتو قلقانين ال ...مش هيك الثقه...وثقة من نفسيها :) - و اتطمن عليكم طبعا



ملاحظه ع الهامش

بتحسو هالبوست كأنه ايميل صح O_o

بالنسبة للرسم التوضيحي للخلطبيطه بالقرابة اللي تهتو فيها ف بلبال...انتظرونا قريبا :)

see u later :)




UAE here I come :)



بكرة السفر ان شاء الله

بس الليله لحسيت بالموضوع :( مش تردد بس خوف و اشتياق فظيع بدا من هلأ لاهلي و خصوصا لمميتي, لمّا اجت باستني قبل ما انام احساس غريب صابني, اللي مصبرني انّا ان شاء الله بشهر 12 حنلتقي , بدهم يجو عالامارات :)

ديرو بالكم على حالكم و ديرو بالكم على بعض, بدي ارجع الاقي الكل مبسوط و عندو اخبار بتجنن ان شاء الله - عشت دور الام الروحيه شكلي :)

مش حطول كتير عليكم بس كم يوم لاستقر و برجع بخبركم بالاخبار الجديده :)

ادعولي ربنا ايسرلي اموري و اتوفق بالشغل وارتاح هناك :$

سلااااااام فور ناو :)

صحيح....لا تنسو تصومو العشرة الاوائل من ذي الحجه....يا السبت يا الاحد ببدا الشهر فالافضل نبدا الصيام يوم السبت
و كل عام وانتو بالف خير مسبقا :)

أخو امك يبقى....عمك !!!






لأ ما تتفاجئو ....بتصير صدقوني :)
هلأ بالعاده او الطبيعي ان اخو امك يبقى خالك, بس بابا اخو امه بكون عمّه....كيف؟؟؟ انا بحكيلكم

هلأ خلينا نعطي اسماء لنفهم الموضوع, انا شخصيا بابا رسمها رسم لافهمها :)

في اخين "علي" و "ابراهيم" ....علي متزوج من سميره و ابراهيم متزوج من هدى..

علي و سميره جابو ولد سموه "محمد"
ابراهيم و هدى جابو بنت سموها "عايشة"

سميره توفت....وبعدها بفتره ابراهيم توفى
فأصرّت العائله ان "علي" يتزوج "هدى" خصوصي ان هدى من مصر وكل اهلها موجودين هناك, صارو اهلها بدهم اياها ترجع عندهم وصار مشاكل على موضوع تاخد البنت معها او لا و طبعا اهل الزوج المتوفي بدهم بنتهم تتربى عندهم و حرام البنت تتربى بعيد عن امها - احداث حقيقيه .... ايون تيتت بابا من مصر .... علشان هيك خفة الدم طلعت زياده , خليط من خفّات الدم :)

المهم علي و هدى تزوجو و جابو ولاد و بنات... " ابراهيم" و "فاطمه" و "مريم" و "صالح" و هدول الاولاد و البنات صارو اخوان ل "محمد" واخوان و خوات ل "عايشة" ..... وسبحان الله بس كبرو "محمد" و "عايشة" تزوجو :)

"محمد" و "عايشة" همه تيتا و سيدو :) و بهيك صار اخو ام بابا بكون ....عمّه :)

خالاته همه نفسهم عماته ...وخواله همه نفسهم عمامه :$
مش عارفه حلو ويلا مش حلو, سألت بابا بحكيلي "عادي" ...

و توتا توتا ...خلصت الحدوته :)

يلا فرفشو سنانكم و اطفو الضو و نامو....تصبحو على خير :)