Things I Like To Whisper About

Would You Hear Me Whispering

ظاهرة "واعظات" بيوت العزاء



كتير ستات صايرين يحضرولهم كم من محاضره عند داعيه او حتى مش ضروري يتعبو حالهم ويطلعو, بفتحو التلفزيون على محطه دينيه و بسمعولهم كم من حلقه لبرنامج لشيخ من الشيوخ الثقه و بعد فترة بتعتبر نفسها مؤهلة لانها تصير تعطي دروس دين و مرات ممكن تفتي و تقرر شو الحلال و شو الحرام بناءا على ثقافتها اللي وصلتلها والللي بنظرها قمّه و خاتمه للعلم.

هلأ انّا نحضر محاضره بالعاده بتحرّى الشخص انها تكون ثقه و متأكد من خلفيتها الدينيه للداعيه ليعرف مدى استفادته من هالمحاضره - مع اني قبل فترة حضرت محاضرة لربى قعوار الله يهديها و كتير تأثرت بكلامها وقتها :( - ولكن مرات بنفرض علينا انّا نسمع لمثل الصنف الاول في بيوت الاجر, بتيجي وحده من هالجارات او القريبات او حتى ادلاء الخير على هال"واعظات" - او شيخه هيك بنادولهم - بتبرعو بأنهم يدلو عليهم او مرات يترجوهم ليجو يعطو درس دين للمعزيات , حتى يكون الكلام كله بالدين و يبعدو الستات عن الحديث - واللي صاير مشكلة العصر هالايام عدم احترام بيوت الاجر و خصوصا بالنسبة لصغار السن

المشكله ان في ستات من اللي حيسمعو كلام هال"واعظه" حيقتنعو فيه ومش هون المشكله...المشكله انهم راح يتناقلوه بينهم و عأساس انه حقيقة ثابته ما بصير يتشكك بصحتها.

بتذكر لمّا توفت قريبه النا اجت وحده من الجارات و صارت تحكي درس , اسلوبها جدا بسيط ولكن مناسب لبساطه الموجودين ومخاطبه مباشره لعقولهم, حلو وعادي و لكن حكت اشي غريب , ان ملك الموت عزرائيل , ان جسمه عباره عن عيون بعدد البشر و كل ما حد توفى بتتغمض عيونه على جسد عزرائيل O_o الستات كلهم انفعلو و بدو يسبحو و يكبرو ويهللو, انا انصدمت بس ضليت ساكته, مرة ابن عمتي ما شاء الله عليها انسانه رائعه خلقا و خُلقا , جميله من الداخل ومن الخارج, ابتسمت و سألتها طيب هلأ انا عيوني كبار و خضر, و عيون فلانه سود, العيون اللي عليه بكونو بألوان عيونا و احجامها ويلا كلنا نفس الشي, مع ابتسامه بتبين انها بتسأل السؤال كنوع من عدم الاقتناع بالكلام, انحرجت الست و الستات بين عليهم انهم بدو يفكرو بمصداقيه الكلام.

قبل كم يوم كان في بيت اجر لناس بعاد و انا حبيت اروح مع ماما , المهم في ست اجت و قعدوها بنص القعده و بدت تحكي زي درس صغير, البدايه حلوه و دعاء و عن الاتعاظ من الموت, وانتقل من موضوع لموضوع و صلت لموضوع الهجوم على سيدتنا عائشة ووالدها الكريم ابو بكر الصديق رضي الله عنهما, وصلت لقصه غريبه عجيبه عن سيدنا ابو بكر الصديق, عن ان سيدنا ابو بكر الصديق تصدق بكل امواله حتى انه تصدق بملابسه و انه بقي في الملابس الداخليه, و انه بطل عارف يطلع من البيت, بعدين راح لسيدتنا عائشة - رضي الله عنها - يطلب منها ملابس فما كان عندها غيرعبائه ممزوعه, فحاولت تخيطها على قدر ما بتقدر و بعدين لبسها سيدنا ابو بكر وهي مرقعه , طبعا الستات كلهم مشدودين و منتبهين و منسجمين مع القصه, وكان صوت الاخت يعلى و يوطى بأحداث القصه, و علّت صوتها بان جاء الرسول صلى الله عليه و سلم يحكي لستنا عائشة بأن جبريل نزل عليه بعبايه ممزقه و لمّا سأله الرسول عن السبب قال انه نوع من انواع التكريم لسيدنا ابو بكر الصديق, طبعا الستات بدو " لا اله الا الله" واللي بكت واللي اقشعر بدنها, انا بصراحه انصدمت, انو انا بعرف قصه ان سيدنا عمر تبرع بنصف ماله و سيدنا ابو بكر تبرع بكل ماله ولكن هالتفاصيل حسيتها مبالغ فيها و اول مرّه بسمع فيها, الاسئله صارت تتدافع بعقلي و وصلت لحلقي و طلع السؤال لا اراديا, شكرتها و حكيتلها الله يجزيكي الخير عاللي عملته و تذكيرنا بالموت ومن هالحكي وسألتها عن مصدر القصه, لاني اول مره بسمعها, بعد ما كانت مبتسمه و ملامح وجهها كلها سماحه قلبت, ما عجبها و حكتلي انها مذكورة بكتب كثيره و انها مرويه من ناس ثقه و انها لو انها مش متأكده منها كان ما حكتها , مع ذكر يا بنتي و حبيبتي كنوع من تلطيف الجو و تحجيمي :)
وفجأه كل الستات صارو يتفرجو علي و يتوشوشو, كنت بدي ارد اسألها اسأله اكتر او عالقليه عن اسم كتاب اللي ما حكتلي اسمه بس ما حبيت اعمل شوشره و ترجيت ماما ما تعلق هي كمان لانها كانت بدها تبدى هجوم عالاخت,بضل بيت اجر و ناس ما بعرفهم كتير , بس عالقليله عملت اللي علي و اذا في حد من الستات كان عنده تساؤل بخصوص مصداقيه القصه صارو يفكرو اكتر, و بعد كم من دقيقه استأذنا انا وماما و روحنا :)
عمره حد سمع بتفاصيل هيك قصه؟؟


للاسف كترو هالنوعيه من الستات بحياتنا و اللي بعتبرو حالهم وصلو لقمّه المعرفه بالدين و بالتدين, و للاسف في ستات بصدقو اي شي بنحكالهم بما انه تحت مسمى الدين او اذا صاحبه يعتبر او يطلق عليه اسم " متدين" من دون اي تأكد من الكلام اللي بنحكى او عالقليله ترجيعه للمنطق و التفكير فيه بالعقل مش بالعواطف.

I'm still here :D


لساتني هون بالاردن :)

كان المفروض اني اكون بالامارات هلأ بس في مشاكل على اقامة نور فأجلنا سفرنا للخميس الجاي و اخوي سافر لحاله ليمشي بالمعامله

الاسبوع الماضي كان حافل و ميلان بالاحداث...و اللي حكا "وين ما رحت ولفيت ما في زي قعدة البيت" كان صاااااااااااادق بهالشي
** المصدر موجود بالفيديو اخر البوست ....وطير و فرقع يا بوشار :)

احلى شي بالدنيا قعدة البيت, صحيح عجئة وما في قعده و بوجود فرووحه حبيبة عمتها ما في نوم كمان بس برضه ما في احلى من الشعور بالحرية :)

اهم الاحداث هي عيد ميلاد بابا حبيبي , بابا صار عمره 68 سنه العمر كله يا رب, بابا عيد ميلاده ب 25 الشهر و اخوي الصغير ب 27 الشهر بالعاده بنحتفل فيهم مع بعض, بالعاده بعيد ميلاد اخوي علشان ما يزعل الا بال 60 احتفلنا بعيد ميلاد بابا لحاله :) و بسبب وجود اخوي و عيلته فأحتفلنا بكل واحد لحاله هالمره كمان , و بوجود فروحه فطفينا الشمع و غنينا لكل واحد 5 مرات عالقليله , جديد متعلمه تهف , احنا نغني و هي تطفي الشمع بمساعده حد من العيله بدون ما تنتبه و هي تزقف و تنط و تضحك







chocolate mousse
اشي دماااااااااااااااار بصراحه طعمها, و علشان اسامح حالي بعد ما اكل منها لا افطرت ولا تغديت يومها....بس اكلت منها عالحفله :)



يوم الاثنين زي كل اثنين بروح على بيت دكتورة بتجنن انا و بنات خالي و بنات خالتي و بعض الصبايا اللي تعرفت عليهم ببيت الدكتوره, بنروح وبتعطينا دروس, خلصنا كتاب الفقه و هلأ بتعطينا من "مدارج السالكين" اشي بجنن و برتقي بالنفس كتير و بنفهم معاني اسماء الله و صفاته بشكل روحاني جميل, المهم بعتتلنا الدكتورة انه ما في درس يومها بس حابه تشوفنا, فرحنا طلعت عامله زي حفله توديع الي :)
يااااااااا الله شو انبسطت, عامله اكل بشهي و اشياءات و حلويات يم يم ....و بالاخر اعطتني هدية كتاب بعنوان " عش هانئا" بديت اقرأ فيه و شكله بجنن و ملخصه انه التفاؤل و الرضا بجلب السعاده, بس اخلص قراءته بعطيكم Feedback كامل و اوضح ان شاء الله



انا حكيت من قبل ان المدونه عرفتني على اخوان و خوات بجننو و بعتبر تعرفي عليهم نعمة من رب العالمين, جد هالمدونه عرفتني على شخصيات بتجنن و كتير محظوظه بتعرفي عليهم, بشكرهم على تعليقاتهم و ايميلاتهم و اتصالاتهم و سؤالهم الدائم عني و عن اخباري و بعتذر اني انشغلت و غبت و شكرا الكم لسؤالكم....
يوم الاحد كان يوم بجنن كمان ....بعد يمكن سنه من التخطيط للقاء التقيت بمدونتين من زماااااااااااااااااان بنخطط لهالقاء, الحلو انّا من ساعه ما قعدنا و لحتى روحنا و احنا نحكي, كأنا بنعرف لعض من زمان و بنعرف قصص بعض, يمكن انا حكيت كتير يومها و بتفاصيل زايده :$ بس هاي عادتي السيئه, وحتى الفتوتشيني ما لهانا عن الحكي و كان خيار ممتاز و لذيذ :)

بأخر الجلسه اعطوني هالهديه اللي بتجنن وكانت مفاجأه الي ...." علشان تتذكرينا بريحه طيبه " اكيد دائما حتذكر الجميع باحلى الذكريات و اكيد ما حغيب كتير بعرف حالي....شكرا الكم يا قمرات :)




الحمد لله انا محظوظه بوجود الجميع بحياتي , اللي بحبهم و اللي بحبوني....وهاي نعمه من رب العالمين ان شاء الله ما افقدها و ان شاء الله ربنا ينعم عالجميع فيها




I recommend




الحياة هالفترة مليانه احداث, لكن من كتر العجئه فيهم مش عارفه اجمع اشي ينكتب او ممكن بطلت اعرف اكتب ,مشاعر غريبه ما بيتعبر عنها بالكتابه!!! ويلا شو بالزبط مش عارفه
بس اللي بعرفو اني انا كمان زي باقي اصقائي المدونين و المدونات اللي زهقو , شكلي حاخد اجازه من التدوين قريبا, حاسه ان الوضع مكركب بالوسط - وسط المدونين مش الوسط الفني :) - في شي غلط على مشاعر انسانيه سيئه بنهرب منها من الحياة العاديه فجأة صارت تظهر قدامنا و نواجهها بعالم التدوين, وبهيك فقد التدوين حلاوته عالقليله بالنسبه الي, في جو مشحون مش لطيف ابدا , في اشي ممل من اليوميات اللي بحياتنا فجأه صار يظهر في العالم الالكتروني, ناس بتحكم على ناس و ناس مش طايقه ناس وناس بتهرب من ناس, ايش في يا جماعه !!!! او يمكن انا حسيسه بزياده مش عارفه.

المهم هلأ اتركم من هالحكي و خلينا باللي جاي اكتب عنه :)

بما ان الافكار ما بدها تترتب بكلمات فقررت اشاركم بأفكار حلوه و كلمات احلى لبعض من اصدقائنا المدونين اللي بحس ان حرام الناس ما اتابعهم وما تكون بتعرف عنهم ولا بتقرأ اللي بكتبوه, طبعا و للاسف ما حقدر اكتب عن الكل مرّه وحده , كل اللي عندي بمنطقة المدونات اللي بحب اتابعها كتاباتهم كتير حلوه, بس بدي اخص اليوم اكم من مدونه صديقه :)

  • بدي ابدا اول شي بالترحيب و بتعريفكم بصديقنا المدون الجديد صاحب مدونة " من وحل الواقع" عالم التدوين زاد طبيب جديد بحكيلنا عن مواقف بواجهها بحياته كطبيب و بربطها بقصه تانيه, وانتو المفروض تحزرو شو الرابط العجيب بين القصتين :)

  • وبرضه الترحيب بفرتوشه اللي عرفتنا عليها "حبيبتي" ام عمر :) فأهلا وسهلا فيكي في عالم التدوين

  • مدونة بدت بقصص اسبوعيه لزميلنا المدون " نادر احمد" عن "جبر" و رحلة حياته " من بطن امه للقبر" اسلوب رائع بالكتابه و قصص بتلامس حياتنا اليوميه, متأكده انكم حتضحكو و حتتوقفو عند كتير من الجمل, اي نعم ان القصص صارت اسبوعيه على شكل " نكشات الاربعاء" و اي نعم انها بطلت كل اربعاء, لكن ما فقدت نكهتها الاكثر من رائعه , من المدونات اللي بدك تجهز كاسه ( نسكافيه, شاي بنعنع, قهوه) اي شي بتعدّل مزاجك و تقرأها
** هلأ رحت زرت المدونه و لقيت ان كل اللي فيها ملغي :$
عكلن انا متأكده ان نادر ما حيحرمنا من كتاباته الجميله هو حاول قبل هالمره و لكن الكل طالب برجوع المدونه و متأكده انه هالمره ما حيطول علينا برضه


  • مدونه صديقنا Lunar و صديقنا Jaraad ... مدوناتهم و طريقة كتابتهم ابدا غير متشابهه ولكن جمعتهم مع بعض لانهم بشتركو بأنهم بطولو علينا بالتدوين و بس انا اغيب كل واحد منهم بنزّل بوست بكل يوم بغيبه :$

  • مدونه صديقنا هيثم السلاوي برضه كل 5 سنين بكتب مرّه و لكن اللي بكتبه بكون عالوجع بالزبط :)

ان شاء الله قريبا بكتب عن مدونات تانيه بحب اشاركم فيها...لانهم بصراحه كتار و جد لقراءتهم متعه جميله :)

Nighty :D

NoOor :)



كيفكم و شو اخباركم.... اشتقتلكم كتير كتير
الي كم يوم غايبه والسبب اني كنت Full time babysitter لفروحه ابتداءا من يوم السبت الساعه 6 الصبح و لغاية اليوم الساعه 7:30 المسا :) يعني من ساعه ما ماميتها راحت عالمستشفى علشان تيجي العضوه الجديده في عيلتنا والحفيده الثالثه "نور" الحمد لله رب العالمين, احلى شي بالدنيا كيف بس يتزوجو الاولاد بنحس ان العيله قلّت و بعدين بتبدا تزيد من جديد ما شاء الله :)

وفل تايم يعني فل تايم بالمعنى الحرفي, جد الله يعين مامتها حبيبتي, انا بعرف انها حركه كتير و شفت و لكن بس اكون انا الوحيده المسؤوله عن كل شي جد صعب و جد مش فاضيه احك راسي - على رأي حبيبتي ام عمر ( عفكرة حبيبتي هاي الها معنيين بس تنحكى واحد منيح والتاني بتعني العكس انتو اعرفو شو قصدي) - المهم جد مش فاضيه, بين طعمي و شربي و حليب ومي و والعبي و سلّي و غني و فرجي صور.....وتغيير بامبرز - ايون...انا غيرت بامبرز #1 و #2 :))) و اعتراف زغنون اول مرّه حطيتلها البامبرز حطيته بالعكس :$ لهلأ مش فاهمه كيف غلطت مع انه واضح - و الحلو انها سبحان الله هالزياره هاي متعلقه فيي كتير و اذا بخيروها بيني و بين اي شي بالحياة بتختارني انا وما بتاكل الا مني انا , سبحان الله علشان ربنا ايسر قعدتها معي, اكتر شي كنت خايفة بالليل تصحى و بدها مامتها ولكن الحمد لله ما صار شي, اي نعم صحيت عال 4 الصبح فجأه بتصحيني بتحكيلي "اوتااا" يعني بدها عطر و قمت و رشيتلها عطر بس على قلبي زي العسل والله :)

المهم هلأ ان في عضو جديد انضم للعيله , حبيبتي كتيييييييييييييييييييير هاديه او يمكن بس بالاول هيك, و هلأ هي و مميتها عند اهلها و كتييييييييييييييييير اشتقتلها و اشتقت لفرووحه, الدنيا هدوء بشكل ممل فجأه :( و البيت نظيف و كل شي بمكانه :) بس برضه اشتقتلهم كتير كتير ....

زيارة مع السلامة





كتير رجال بشكو من مرتاتهم او خواتهم او الستات اللي معهم انهم بعد زيارة طويله عريضه لمدّه ساعات, بس يقومو يروحو بتبدا الستات زيارة جديده قد تمتد لساعه قدام الباب :)

بأخر لحظه من الزياره بتتذكر وحده منهم اشي مهم ما حكو عنه, اواتفاق المفروض يتفقو على تفاصيله بس ما خاضو فيها لسا, الرجال ما بعرفو ان زيارة وقفة الباب الحكي فيها بكون اهم كتير من حكي الزياره كلها , بنودع و بنوقف لنحكي مع السلامه وفجأة بتظهر جمله اه صحيح.... او نسيت احكيلك او سؤال بستغرق الرد عليه و شرحه نص ساعه :)

هيك احنا شو نعمل, او يمكن معظمنا اذا مش كلنا, حتى عالمسنجر بكون في النا زي وقفة الباب, 15 الف تصبحي على خير بنحكي بين الكلام و بعد ما نكون خلصنا الحكي بنص ساعه بنسكر المسنجر - طبعا هاد بس نكون فاضيين مش يحظه و بتغيبي اسبوع وخده بالك حضرتك :)


مهما شرحت و مهما شكو الرجال من الموضوع ما النا غنى عن هالزياره , فبدكم تتأقلمو و تبرمجو حالكم على هالوضع, بدكم تلاقو حلول غير انّا نبطل هالعاده الحلوه هاي, بابا مثلا بعد ما يأس منا انا و مميتي , بس نكون بمشوار بحكي لماما يلا, بتناديني ماما اذا كنت قاعده مع الصبايا و بضل بابا قاعد لحتى نخلص كل احاديثنا و نوقف عالباب انا وماما وحاملين الشنط , بعرف ان 3\4 زيارة وقفة الباب خلصت بقوم بشغل السياره و بنلحقه :)

فرتبو اموركم يا الرجال على الوضع و ما تتذمرو منه, هاي مش مشكلتكم الشخصيه, هاي مشكله عامه وما حد لهلأ وجدلها حل , فبدكم تتأقلمو :)

شو بالنسبه...7


ملاحظين ان في ناس بطلت تميز بين الجرأة - كنت بدي احكي الصراحه بس الموضوع صار اكبر من بس صراحه - و بين الوقاحه؟؟؟
ما بعرف ايمتا بالزبط تعدينا حاجز الخجل المحبب والمطلوب و الادب و الاخلاق لوصلنا لمنطقة الوقاحه بالخوض بتفاصيل الامور

بدت بالافلام و بعديها بالدعايات و بعدها المسلسلات و للاسف هلأ صارت موجوده على ارض الواقع, من ايمتا حياء البنت صار اشي غلط و ما بتصير كول و صريحه الا بس تخوض بمواضيع يدنى لها الجبين, و تحكي عن تفاصيل خاصه بحياتها كبنت؟؟

من ايمتا خوض الشب واعلانه عن مغامراته و افكاره و خيالاته اللي بتكون بكثير من الاحيان مرضيّه بحته هو جرأة و حريّه تعبير؟؟؟

اشي كتير مستغربته و مع الوقت بتطور و بتتطور المعلومات و التفاصيل اللي بتنشر عالملأ هيك بدون اي رقابة ذاتيه للي بنحكيه و اللي بنكتبه....

شكله من ضمن المقاطعات اللي لازم نعملها بحياتنا, كالتلفزيون و المولات....صار لازم نعمل مقاطعه للناس.





ملاحظه ع الهامش....

لتكونو فكرتو من الصورة اني بحكي عن الانتخابات...لاا لاااااا الله يخليكم مش تورطوني, انا ما الي دخل و خصوصا انه كما ذكر المصدر الاوقاف افتت ان التحريض على مقاطعة الانتخابات في المساجد تعتبر من الكبائر....فما بالكم فيي انا المواطنه الغلبانه !!! O_o

جد شوووووووووو بالنسبه

قتلتها...


نعم ...

قتلتها ولست بنادمه

حتى انني كنت سعيده في لحظه موتها

او لعلني فرحت و تلذذت برؤيه اثار دماؤها على يدي

لم املك قلب جرئ قط طوال حياتي

ولكنها في تلك الليله بالذات استحضرت اسؤ صفاتي

لم ارى بذكائها من قبل

كانت تختفي فتره ثم تظهر في افضل الاوقات لها

واسؤه على الاطلاق لي

كانت تسرقني من احب الامور الي

ولكنني قلت كفى و خططت و انتظرت و نفذت

وها انا احتفل بأنتصاري واعود لحبيبي

لابدأ حلمي الذي لم تسمح لي بالغوص في اعماقه

هكذا الدنيا...

يوم لك و يوم عليك ايتها الحمقاء الذكيه

ايتها البعوضه....



من وحي مغامرتي امبارح بالليل وانا في حربي مع البعوضه :)

حالة استنفار


امبارح اشترينا ساندويشات فلافل طلعنا احنا وفروحه ومامتها نفطر في حدائق الحسين, الجو كان بجنن و بعد شتوه قبل بيوم الارض كانت شبه مبلوله وفي برك صغيره عالاماكن المستويه, كانو العصافير اخر انبساط وبنتقلو من شجره لشجره وكأنهم بلعبو, في مجموعه عصافير بلعبو في بركه من البرك, حاولت اصورهم بس بسبب اصرار فروحه اني اخدها معي واحملها ما قدرت اقرب الصوره عليهم, لكن وانا بصورهم فجأه شفت اشي زي قطع الزجاج عالارض بلمعو بشكل غريب ,ركزت لقيت ان كل نمل الحدائق مستنفر لجمع مونه الشتا بعد مباغته مطر امبارح الهم, سبحان الله سمعت وشفت التنظيم اللي بشتغلو فيه بس زي هيك ما شفت,ما بتصدقو العدد ,كل ما ارجع لورا خطوه ابعد الاقيهم تحت رجلي بالعشرات


هي من صور المطر قبل بيوم...صورت فيديو بس طلعت مصورته جانبي ...وبما اني ما بحب اضل اقلب اللاب توب لاشوفه فحبيت اغنيكم عن هالشي برضه







صور من الحديقه









اتركم مع الفيديو اللي مش كتير واضح لأني بصور بأيد وحامله فروحه حبيبه "تاتو " - يعني خالتو بتعرفني بحبها تناديني بأسمي بس بتناديني فيه لتلفت نظري بس التهي عنها مع ضحكه بصير بدي اكلها اكل بعدها و اه انا اساسا عمتو مش خالتو لكن عمتو بتحكيها بطريقه ولا حرف اله دخل - وطبعا صوت فروحه مبين وهي بتعرفكم بالمي و بال "نمنه" يعني نمله وبالخلفيه صوت حديث العائله :)





video




video

جلسة صالونات





مع اني ما بعرف كيف امسك السشوار و اوازن بين الفرشايه و السشوار لاسشور لحد شعره لكن اليوم قدمت السيرة الذاتيه تبعتي لصاحبة الصالون.

بس السيرة الذاتيه مش لشغل, لأ لعريس :)

وانا بالصالون اليوم و كالعاده بالصالونات - يمكن بصالونات الستات اكتر- الحكي اللي بكون شغّال وكل اللي بالصالون بسمعوه بكون شيق جدا

كانت وحده قاعده و بتحكي لصاحبة الصالون اللي بتسشورلها شعرها عن اخوها اللي بدو يتزوج, واللي تبين بعدها ان عمره 26 سنه و انه بكفيه و حلّه يتزوج, مواصفات العروس كانت بدايه انهم بدهم اياها قد حالها, لانه بصراحه كتير طيب و هادي فلازمله وحده قد حالها, هيك اتفقو الام والاخت, وبما ان صاحبه الصالون بمر عليها "روس" كتير فبركي وفقت راسين بالحلال

الاخت بتحكي, هو ما بشرب عفكرة, اخوي الكبير بصراحه بشرب و اله عالسهرات و هالقصص, لكن هلأ ربنا هداه, صحيح مرته مش محجبه بس هلأ هدي كتير و بطل تخبيص وصار يصلي الفجر بالمسجد, بس "مؤيد" - العريس- كتير هادي, و بصراحه ما اله تجارب, يعني تخيلي ان البنت اللي بدو يتزوجها حتكون اول تجربه اله - عأساس الموضوع صار غلط كبير و نقطه ضد الشب بهالايام - وبعدين هو ما بدو اياها حلوه, المهم تكون مقبوله و بنت عالم وناس, اهم شي تكون بنت عيله و بنت عالم وناس, والفلوس ما يهمك عندو محل و ابوي بدو يتكفل بكل شي, و هو حتى لو كبيرة مش مشكله 23 او 24 مش مشكله, و حتى لو متعلمه ما عندو مشكله, سألتها الكوافيره هو شو مخلص, حكيتلها يعني اذا هي ما عندها مانع تتزوج واحد مش دارس ما عنده مشكله تكون متعلمه, و بعدين زي ما حكيتلك موضوع الفلوس انسيه, معه و معه كتير - بمعنى الفلوس بتشتري كل شي و بتعمل العجب - و بعدين ابوي بدو يجبله شقه يعني لا اجار ولا اشي, زي ما حكيتلك هو بسيط كتير ..مسكين..مسكين, و انا وامي بدنا نزوجه قبل ما يصير لابوي اشي, لانه بصراحه لا انا ولا اخواني حنفكر نأمنله اللي ابوي حيأمنله اياه, بتعرفي الدنيا كل واحد بصير بدو يفكر بحاله بس يصير معه فلوس, بس برضه هو عندو محل و معه فلوس كتير فلا تحملي هم.

خلصت سشوار و كل اللي بالمحل سمعو قصتها, و طلعت على وعد من صاحبة الصالون تشوفلها عروس قد حالها, انا بدت تسشورلي شعري وحده تانيه متعوده انها تعملي اياه, اجت صاحبة الصالون تساعدها, حكتلها الكوافيره انها قربت تخلص, لكن صاحبة الصالون اصرّت, و بدا الحوار, ما شاء الله عليكي,انتي متزوجه او خاطبه؟؟؟ طيب في عريس هلأ بحياتك؟؟؟ وين ساكنه, شو دراسه, وين بتشتغلي, و كم اخ و كم اخت, وانا بجاوبها و على وجهي ابتسامه عريضه, لاني بستنى سؤال اللي حصدمها فيه , بتحكيلي هيك صار عندي السيرة الذاتيه كامله بس ضل شي واحد, حكيتلها العمر ويلا اني قد حالي ويلا لأ :) ضحكت ضحكه احراج و بتسألني كم عمرك, حكيتلها 33 اختفت الضحكه و بصوت شبه صراخ," ايش!!! قولي و غيري " , هالكلمه سمعتها كتير عفكره ودايما نفس الرد " لو قلت و غيرت حيضل 33 ما في مجال :)"

طبعا بدت بما شاء الله عليكي و انت حلوه و ليش ما في عرسان و الشباب انعمو و ..... و هالحكي
بس انا هلأ صرت متطمنه....موزعه السيرة الذاتيه عالشركات علشان الشغل و عالصالونات علشان العرسان :)




ملاحظه ع الهامش

اكبر غلط انك ما تسمعي كلام مميتك و تشربي قهوه بعد الساعه 11 المسا لانه ما حتعرفي تنامي للفجر زي ما صار معي هلأ...عرأي اخوي " الام دائما تعرف"
يلا خليني اصلي و انام, تصبحو على خير :)

اه صحيح...اللي بتحب او بحب احط السيرة الذاتيه تاعته عند صاحبة الصالون يبعتلي اهم المعلومات ومن عيوني بوصلها :)


مش حياة زوجيه






قبل فترة كنّا بنحكي انا و صاحباتي و كل وحده بتشكي من زوجها , قصصهم بصراحه بتكئب, بالذات قصص صاحباتي اللي ساكنين عند او قريب من اهل الزوج, ما بعرف شو هالقصه اللي مش راضيه تنتهي, موضوع الحماه, قصص جد مزعجه و بتخليني احمد ربي اني مش متزوجه, وجع راس و هم و نكد, لكن بعد ما سمعت القصص و طريقة التفكير حسيت ان طبيعي يصير هيك معهم.

من ضمن الحكي بحكيلهم ان الحياه الزوجيه المفروض تنبنى على مبدأ ان كل واحد بده يعمل جهده ليرضي الطرف التاني و ليثبتله محبته , نطت وحده منهم بتحكيلي " غلطانه" وقعدو يعددولي اسس الزواج من اول يوم, و من وجهة نظرهم ان الزلمه من اول يوم بفكر كيف بدي اجيب مناخيرها الارض و كيف بدي افرجيها مين الزلمه و الست بتفكر كيف بدها تخلي زوجها يمشي عالعجين ملخبطوش و انها مش زي باقي البنات و كرامتها ما بتسمح لحد يدوس عليها - هاد تقريبا حرفيا للي حكوه - انا بصراحه انصدمت, شو هالحياه هاي اذا!!! و طبيعي جدا توصلو للي وصلتوله اليوم.

انا ما بدي احكي مثاليات, بدي احكي عن واقع قدامي, عن النماذج اللي قدامي وهي علاقه بابا وماما و علاقة اخواني مع زوجاتهم, انا ما بنكر ان اي حياه بين زوجين فيها ايام هيك و ايام هيك, فيها ايام بكونو كتير متفاهمين و ايام تقريبا مش مستحملين كلمه للتاني, ولكن ما شاء الله اجمالا كتييييييييييير حلوه حياتهم, بابا متقاعد من 8 سنين و بعد التقاعد حسيت بابا وماما قربو من بعض اكتر, ماما لمّا تزوجت اختارت تيتا - والده بابا الله يرحمها - انها تسكن عند بابا مع انه مش الكبير, ولهلأ عمري ما سمعت عن اي مشكله من هالنوع حصلت بينهم, لان بابا كان موضح علاقته بوالدته و بزوجته من اول يوم, خواني نفس الشي بيجو بالعطل عنا او احنا بنروح هناك, زوجات خواني ما في منهم و حتى انهم بشكو الي و احيانا لماما و طبعا تلقائي انا وماما بنوقف بصفهم :) , صاحباتي بحكولي ان ماما حماة من نوع خاص و يا ريتهم زوجات خواني يكونو مقدرينها, وانا متأكده ان مميتي اكيد مميزه لكن بالنسبة لوضوع الحماه فأكيد في كتير بتعاملو مع زوجات اولادهم كبنات الهم, الموضوع بده الطرفين يكونو عاقلين, البنت بدها تعتبر والده زوجها ام الها و الحماة بدها تعتبر زوجة ابنها بنت الها, طبعا لمّا حكيت هالجمله لصاحباتي فقعو ضحك, طيب اذا انتي هاد موقفك و اكيد هاد اللي موصلتيه لام زوجك فأكيد هي التانيه حتتعامل معك بنفس الطريقه, انا ما بنكر ان في امهات بخربو بيوت اولادهم بدون سبب و في ستات ببعدو زواجهم عن اهلهم.


علاقه الرجل بأمه شي و علاقته بزوجته شي, ومحبته الهم تختلف تماما ولا تتقاطع ابدا مع بعضها, ما في مجال للمقارنه لهيك ما في مجال للغيره اللي بتصير, وانا بحمل الزوج كامل المسؤليه, المفروض ما يكون طرف متفرج و في اساسيات بالحياه المفروض يكون الو رأي فيها لتنهي هالمواقف الغريبه, المفروض يوازن بعواطفه و يعطي كل طرف حقّه منها, غير اني مقتنعه تماما ان اذا الزوج ما كان اله خير بأهله فأكيد ما حيكون اله خير بأي حد تاني.



ملاحظه ع الهامش
الصورة كيكه عيد زواج بابا وماما ...5\10 صادف عيد زواجهم ال 38 ما شاء الله ...العمر كله يا رب :)

ورد و ذكرى



من قال بأن قدواتنا يجب ان تكون اكبر منّا عمرا

ومن قال ان خبراتنا لا تعد و تحصى الا بالسنين

من قال بأن سنوات حياتنا تعلمنّا اكثر

فكم من زهرة نبتت بين اشواك لا يتجاوز عمرها ايام

تعلمنا دروس لو عشنا اعمارا فوق اعمارنا لما تعلمناها


وانا اتنقل بين المدونات التي لم يسبق لي زيارتها من المدونات المتواجده في Qwaider Planet وجدت هذا الفيديو في مدونة Blue Buttons

قد تعلمت درس جديد من هؤلاء الزهور....ان القلوب العمياء هي الوحيده التي تجعل اصحابها فاقده للبصر



ماذا لو كنت انا!!!...ماذا لو كنت انت!!!




طل الملّوحي....اسم سمعته لاول مرّه قبل اشهر بسيطه, علمت من خلال ما قرأت بانها فتاه سوريه احتجزت في السجون السوريه و منع ذويها من الاتصال بها, الموضوع لم يلفت نظري كثيرا اذ انني سمعت و قرأت مسبقا عن مدونين و مدونات قد تم اعتقالهم على خلفيه موضوع يمس او يذكر اخطاء حكوماتهم او حكّامهم بشكل مباشر و قد افرج عنهم بعد مده من اعتقالهم او ما زالو خلف القضيان لحين انتهاء مدّه حبسهم,الموضوع مقلق و خطير ولكنني اعترف بأن الموضوع لم يتحمّل مني نهايه اليوم على اكثر وجه لنسيانه.

تكرر اسم طل الملّوحي امامي في اكثر من مدونه و حفظت صورتها عن ظهر قلب, فضولي المتأخر دفعني للبحث عن قصه هذه المدونه , صعقت لما قرأت, طل والتي لم تبلغ العشرون من العمر لها تقريبا سنه "مختفيه" تم التحقيق معها لاول مرّه بسبب مناشدة وجهتها ـ عبر موقع النادي السوري ـ إلى الرئيس بشار الأسد للإسراع في عملية التحول الديمقراطي بالبلاد و قد وقعتها بأسمها الثلاثي, و بعد ذلك تم التحقيق معها على خلفيه تدوينات سياسيه و ضد الحكومه قد كتبتها في مدوناتها . المصدر


قرأت محتويات المدونات الثلاث التي تملكهم المدونة طل الملوحي - المدونه الرئيسيه, Latters , عن القرى الفلسطينيه المهجرة - و للحقيقه لم اجد اي شيء يمس سياسة البلد او الحكومه او الحاكم نفسه, هي تدوينات و قصائد تؤيد القضيه الفلسطينيه و النضال والمناضلين في فلسطين


فكرت في طل, يا ترى ما الذي يخطر في بالها الان وماذا تفعل في هذه اللحظه؟؟؟ ما الذي تتعرض له الان وما الذي تعرضت له؟؟؟ هل يا ترى علمت سبب احتجازها؟؟ هل هي حيّه ام....!!! مع العلم بأنه قد وصل الى عائلتها خبر وفاتها تحت وطأة التعذيب ثم جاءهم ما ينفي هذا الخبر

فكرت في عائلتها, والدتها, قلب الام يكاد ينفطر علينا نحن الابناء ونحن امام ناظرهم و يراقبون حياتنا عن كثب, فما بالكم بقلبها وهي لا تعلم اخبارها و ممنوع ان تراها او تسمع صوتها؟؟؟ وما اخبار قلب والدها؟؟ اخوتها ؟؟؟ ماذا حصل لهم في كل يوم غابت به عنهم, في رمضان, في العيد, يوم ميلادها .... في كل ذكرى مضت و في كل حدث يحصل معهم؟؟

افكر في نفسي, انا والتي اعتبر نفسي قد وصلت الى مرحله ما من الوعي, انا التي كنت ارى في نفسي الجزء العطوف الذي يشعر مع الاخرين,انانيتي و انشغالي في نفسي منعني ان افعل اقل شيء ممكن بالضغط على بعض الازرار للتعرف اكثر على شخصيه هذه الزهره, منعني من بذل اقل عناء لاحاول معرفتها اكثر, شكرا لصديقنا المدون خالد أبجيك الذي بتدوينته الاخير ايقظني, للاسف ليس في يدي ان اقوم بأي شيء ليساعد طل او عائلتها سوى هذه الكلمات لمحاوله نشر قصّه طل لمن لا يعرفها لعل هناك احد يستطيع ان يقوم بما اعجز عنه او يدلني على طريقه للمساعده.


بابا كول ويلا كشكول....شو بالنسبه... 6




شو بالنسبه للبس البنات هالايام, بنروح عالمول بتلاقي البنات تقريبا من غير هدوم, عادي جدا البلاطين الرش و عادي جدا ان نص جسمها للبنت بالشارع, وعادي جدا ان نص البنات الاندروير مبين - اسفه بس اشي بنرفز - هلأ بتحكولي حرّيه شخصيه, بحكيلكم ان حريّه اي شخص بتوقف بس تبدا حرّيه الناس التانيين, وفعلا هالمناظر بتأذي يا جماعه, والله حرام بنات بعمر الزهور يرخصو حالهم لهالدرجه.

زوجه اخوي البلغاريه و بنت عمي المقيمه بالمانيا حكولنا انه هالمناظر هاي ما بشوفوها مكان مهمه عايشين, في بنات بلبسو شورتات و قصير بس مش بهالابتذال هاد, قبل كم يوم بنت وزنها فوق ال 150 كيلو لابسه جرابات نايلون مخرمه و تنوره يا دوب شبر و فوق لابسه اشي كاين بالزمنات بلوزه لكن الزمن عامل عمايله فيها و حاطه نص كيلو ميك اب على وجهها و شعرها مربوط من نص راسها , البنت ماشيه عادي مع عيلتها و ابوها وامها, والام محجبه , طيب منظر هالبنت بس نشوفو بنتوقع ان البنت قليله ادب رسمي, و برضه بتحكولي حرّه بحكيلكم لأ مش حرّه, لما شباب بسن المراهقه ما بفهمو وبس عباره عن مشاعر مختلطه ماشيه عالارض و يشوفو هالمناظر مرميه هون وهون و يصيرو بدهم يفرغو مشاعرهم و بهالسن حتكون بأشياء غلط اكيد لا دين ولا وعي صحي ولا اشي, فأكيد مش حرّه.

الاسبوع الماضي اخوي وصحابه حجزو بفندق بالبحر الميت و نزلو يومين, هلأ هناك مناظر و بنات و سباحه بحكيلكم هدول حرين, هدول بمكان خصوصي لهالشي و اللي مش عاجبه ما يروح, لكن الغريب القصه اللي حكالي اياها اخوي, بحكيلي كنا قاعدين انا وصحابي و انا ملاحظ ان في بنت بتتطلع علي من بعيد, بس البنت قاعده مع اهلها, طنشت شوي اجت قريب مني و بدت تحكي معي, وليش ما بتسبح ومن هالحكي, بحكيلها طيب انتي ليش ما بتسبحي؟؟؟ " هو بابا كول ويلا كشكول" - انا اول مره بسمع بهالمصطلح بصراحه - بتحكيله لأ عادي بس انا مش حابه, المهم بحكيلي افترقنا و اعطيتها رقم تلفوني, بالليل بتتصل انه في سهره بتحب تيجي, نزل عاللوبي لقاها واقفه هي وابوها, بحكيلي سلمت على ابوها و عرّفته بنفسي و هو عرّف على حاله
الاب...." وين بابا رايحين"
البنت... " عند صحابنا اللبنانيه اللي تعرفنا عليهم اليوم"
باي...باي
اخوي بحكيلي البنت طلعت 18 سنه, خف عقلي انا و خلص صرت بدي انركها و اروح, بس الشباب و "الصبايا" اللبنانيه جوهم حلو فضليت, بحكيلي ضلينا لل 2 الصبح و فجأه اجا ابوها للبنت, انه بابا يلا بدنا انّام, مالت عأخوي و بتحكيله " شو هالتحكم هاد, اذا صحيو لازم نصحي, و اذا نامو لازم انام" بحكيلها اخوي " الله يعينكم على هالاب الكشكول!!! "

غير عن المحجبات اللي بلبسو لبس غريب عجيب, بتكون الوحده ماشيه مع زوجها و ولابسه فستان بعرس اعز صاحباتي ما بلبسه و لابسه تحته Body و الفستان مبين كل تفاصيل جسمها و محجبه !!! كيف زبطت معهم؟؟ و شو هالحجاب هاد ؟؟

مفهوم اللبس تغير عند الناس وانا كمحجبه بعاني لحتى الاقي قطعه منيحه ومناسبه البسها ولازم اجيب الاشي واسع و اديقه عند الخياط ليكون قابل للبس , مش عارفه هو السوق اللي فارض هالنوعيه من اللبس و الا الطلب على هيك لبس ويلا شو بالزبط؟؟ مش عارفه, لكن المتأكده منه ان في كل واحد عنده عقل بعرف يقيس عليه الصح من الغلط والمفروض في اهالي موقعهم للتوجيه و للتصحيح وما عم بقومو بدورهم.

ساعات بشتاق



انا و الحمد لله مبسوطه كتير كتير كتير
الاجازة توقعت و اليوم رحت اعمل بطاقات التأمين لاهلي و اللي همه اهم سبب لاني اخد اجازه مش استقيل غير انو اذا لا سمح الله ما زبط موضوع الشغل اقدر ارجع عشغلي كأخر خيار - بعيد الشر :(- اللي بتعود عالشغل و الراتب ما بقدر يقعد هيك عادي, انا مأمنه حالي ماديا لشهر 2 , ان شاء الله لوقتها بكون ربنا ميسرلي شغل منيح, بالامارات في شغل ولكن خواني خوفوني بانه ممكن الجو العام ما يعجبني, وبالعقد في فتره تجربه 6 شهور الي والهم و لهيك بديش اخد قرارات سريعه و برضه بديش اتأخر :$ الله يجيب اللي فيه الخير,بس حاليا انا بأجازه راحه لحتى اسافر عالامارات فبدي ارتاح جسديا و عقليا :)


هلأ جسديا ماشي الوضع و حبيبي النوم عم باخد منه اقساط واقساط تعويض :) بس مشكله الراحه العقليه من التفكير فهاد شي مش بأيدينا, افكار كتيره مع ان كل اللي حولي بطمنوني , لدرجه ان اخوي حكالي تعالي عيشي عنا وما تشتغلي :) - الله يرضى عليهم يا رب و يعطيهم ليرضيهم قد ما بريحو بالي - بس زي ما حكيت ما بقدر ارجع اخد مصروف :$ وانا بحب الشغل وخصوصي اني ما عندي اي التزام

هلأ افكار الشغل والمستقبل تقريبا نحلّت بضل الافكار بخصوص الماضي, حاسه الشغل والحياة غيروني كتير, بدي ارجع مرّه تانيه ويسبر القديمه, بدي انسى كل شي و ارجع لمزاج الابتسامه الدائمه , بدي ارجع الاقي واشوف الاشياء حلوه مهما كانت, ارجع لمزاج البساطه بالتفكير بكل المواقف, بدي ارجع يبطل كل شي يدايقني و ارجع اهوّن اي شي بصير معي, حاسه اشي من جوا انطفى, ما بدي اكون متشائمه بس مش عارفه كيف اوصل الفكره بس فيي اشي انطفى, انطفى بس ما مات الحمد لله لهيك بحكي اني بدي ارجع و ان شاء الله حرجع.

بعد تفكير لقيت ان احنا اللي بنختار, بصير معنا احداث ممكن غصب عنّا وممكن بأختيارنا ولكن ردود الفعل و تأثيرها علينا احنا بنختاره, فااااااااااااااااااااا من اليوم قررت , اليوم اول يوم اجازه رسمي الي قررت اني ارجع ويسبر القديمه, القديمه يعني قبل 4 او 5 سنين , و مدام انا من جوا مقرره فأكيد ربنا حيساعدني لاني اتغير

قبل كم يوم كنّا انا واخوي بنعمل ال Drive تبعت كل فتره و اجت اغنيه لمحمد فؤاد , انا مش من محبي ولا متابعي الاغاني ولكن ال Drive فيها جزء اسمه DJ تخصص اخوي فلازم نسمع كم اغنيه , الاغنيه لخصت مشاعر جواتي بشكل كبير و سرحت فيها لبعيد بعيد كتير, اسمعوها و ركزو بالكلمات اكيد حتعجبكم ....تصبحو على خير يا احلى الناس :)





Lovely Web Sites


تاج المواقع الالكترونيه...مع اني ابدا ابدا اطلاقا مطلقا ما بحب " التاجات "وما الكم علي يمين بس شو اعمل الواجب واجب



1- من أرسل الدعوة؟

حبيباتي كيكي و جفرا


2- ما هي المواقع المفضلة لديك (كِ) وتزورها باستمرار؟ ضع (ي) رابطها و ما تستفيده منها ؟

اول شي بفتحه موقع القرآن Mp3Quran و بختار واحد من الشيوخ و بالعاده بختار سورة الرحمن بالبدايه و بعدها سورة يوسف

تاني شي هو مجموعه مسميتها My فيها مدونتي و الايميلات Hotmail ,Yahoo & Gmail موقع Qwaider Planet
ومن مدونتي بفتح المدونات اللي بحب اتابعها دائما و بشوف شو في جديد عند الشباب و الصبايا

ثالث شي بفتح مجموعه News واللي فيها




بما اني عاشقه للافلام و قبل فتره كنت مصابه بحمى "grey's anatomy" فموقع Myeygy كان اله اكتر زيارة باليوم وانا بستنى الحلقات, هلأ اله زياره يوميه او اسبوعيه لاشوف شو الجديد بس مش متل اول


وفي موقع لترجمه الافلام , لمّا يكون في حكي روسي او فرنسي او اي لغه ما بعرفها فبنزل الترجمه منه حتى ما يخرب مود الفيلم من هالموقع

المواقع اللي بتحسنلي مزاجي و اللي مرات بكون فيها المضحك المبكي

- موقع بطاقات Hallmark شوفة Hoops & Yoyo دائما بتسعدني وبتزكرني بأيام حلوه :)


جوجل طبعا ما في عنّه غنى و Translate Google



مواقع الفيديو



مواقع الكتب

- مدونة أكبر مكتبة أدبية عربية ....لكن مشكلتهم انهم بعتمدو على موقع Rapidshare واللي دايما عليه ضغط


مواقع الصور واللي ممكن اقضي عليها ساعات

كل الصور بس اول شي بشوف شو جديد صور يافا ...
- او ممكن اعمل بحث على اي موضوع عالصور و اضلي اتفرج خصوصي اللي فيهم اطافيل :)

و اخيرا الموقع اللي ما الي غنى عنه DataBase Journal جدا جدا مفيد هالموقع و بستفيد منه لمّا يكون عندي مقابلات شغل لانه في جزء لاسئلة المقابلات


3 - ارسال الدعوة إلى أربعة مدونين :

اهااا اجينا للتوريطه على رأي الناس :)
في ناس كتير ما بتحب موضوع التاج - زيي بالزبط سبحان الله - فالموضوع اختياري الا عأول اسم :)
بدي احاول اتزكر ناس ما صار عليهم الواجب اساسا

اول شي بدي اكتب ام عمر ...اه انتي وما تحكي مين ام عمر...انتي, انتي... ما تحاولي :)


تاني شي بدي اورط صالح....او عمو صال صال زي ما بنادوه اصدقاءه المدونين




و الدعوه عامه طبعا....اعذروني الي فترة غايبه فمش عارفه مين وصله التاج ومين ما وصله :$