كتير اهالي بياخدو قرارات رئيسيه بحياه اولادهم, من منطلق انهم ادرى بالحياه وانهم بقدرو يحكمو عالاشخاص و عالمستقبل اكتر من ولادهم, وللاسف مرات كتير بعاني الولد او البنت طول عمرهم من هيك قرارات.
بتختلف القرارات وتأثيرها عالحياه, بتبدا يمكن من يوم ما اختارو اسم المولود, و بتمر بالعلمي و الادبي بالتوجيهي , بنسو ميول الطالب نفسه وبركزو على مصالح وافكار اجتماعيه بحته , ابن فلان علمي وابني ادبي لا والله, بدك تطلع دكتور و بدك ترفعنا من هالحياه اللي زي الزفت, بدك تدرس مهندس و تتعين عنا بالشركه...الخ من هالمعتقدات والفرضيات وكلها بتروح في خانه, ابوك اعرف منك بمصلحتك , لاتعانده واكسب رضاه.
اليوم بدي احكي عن قصه صاحبه الي, وكيف تدخل اهلها بحياتها خرب حياتها و حياه اولادها بعدها
صاحبتي جابت معدل عالي بالتوجيهي, وانقبلت بجامعه مؤته الفرع المدني , و لانها من عائله محافظه و ببتكون من 4 بنات والاب بشتغل بره البلد, ففضل الاب انه يحاول ينقلها على جامعه بعمان, وبحكم انه بره البلد استنو لاجا وبس قدمو طلع فتره التسجيل خالصه بالجامعه, واعتبرو البنت مستنكفه و راح مقعدها.
البنت ما يأست وقعدت سنه بالبيت وتعلمت تجميل و صارت تشتغل بصالون ليجي موعد التقديم للجامعات السنه اللي وراها, وللاسف بوقت التقديم للجامعات كان الاب عنده مشاكل بشغله , و وضعه المالي بالمره وما بقدر يدّرس حد جامعه, البنت قدمت على كليه و درست وقدمت دبلوم و اشتغلت, وهي بالشغل جسرّت جامعه - يعني بعادلولها ساعات الكليه والدبلوم و بحسبو كم ضايل ساعات لازم تدرسهم بالجامعه ليعادلولها شهاده الكليه بشهاده بكالوريوس - اشتغلت و صرفت على دراستها وكتير عانت خلال هالمده و الحمد لله خلصت و جابت معدل جيد جدا.
وهي بتدرس تقدملها شب من العيله, هي ما بتحبه ولا بتحب اسلوب حياته, الشب اتكالي على اهله بكل شي, وغير ملتزم لا دينيا ولا اجتماعيا, و رفضته بالرغم من معارضه امها بالزات , هو الشب من قرايب الام و بدها تطمن على بنتها على رايها.
قبل التخرج بكم يوم, اكتشفو ان والدتها عندها سرطان, تكركبت العيله و اتدمرو نفسيا وتعبت الام كتير و بدت المطاردات و جرعات الكيماوي - الله يعينهم ولا يبلينا ولا يبلي حد- تخرجت البنت و قدمت لوظائف بشهادتها البكالوريوس وانقبلت براتب ضعف الراتب اللي بتاخده و تركت الشغل وانتقلت للشغل هناك, بس هي كانت تحكيلنا انها نفسها تطلع تشتغل بره الاردن بس اللي صار لوالدتها هو اللي راح يخليها بالبلد.
وبهالفتره رجع تقدم نفس الشب للبنت, الام لانها مريضه عملت مشكله كبيره مع البنت انها لازم تتزوجه, والبنت رفضت مره تانيه, بس هالمره الام تعبت و بطلت بدها تشوف بنتها و لا بدها اياها تاخدها عالدكتور, البنت تحت تأثير الام رضيت تقعد مع الشب مره تانيه, و بتحكيلنا حكيتله انا ما بدي اياك و انا ما بدي اتزوج هلأ, و والدتي هي اللي بتضغط علي, الشب بكل برود بحكيلها بكره بتتعودي علي, انا بدي اياكي, حكتله انت بتحبني يعني؟؟؟ حكالها لأ مش حب بس انا حسيتك مناسبه الي!!!
استمر الموضوع اشهر والبنت تحاول تتخلص من الشب وبالاخر الام حكتلها بموت وانا غضبانه عليكي, وتحت كل تأثيرات العيله اللي حست البنت مجرمه بحق امها ومش مراعيه ظروفها و مش مقتنعه ان الام بدها مصلحتها, وافقت و انخطبت وتزوجت.
بعد ما تزوجت بفتره صار عندها مشاكل بين تعارض اجازتها اللي ماخدتها من عنا و انها اشتغلت بالبلد, فتركت الشغل الجديد ورجعت عنا.
صاحبتي الها سنتين متزوجه عندها ولد و حامل بالشهر الثامن,سنتين من الجحيم و المشاكل, سنتين من الكره , سنتين مش طايقته ولا هو طايقها, بس المهم قدام العالم متزوج و عنده بيت و ولاد, سنتين وهو اله علاقات مع بنات, في عنده خط موبايل ممنوع حد يمسكه وطول نهاره واقف عالبرنده بحكي فيه تلفونات, حاولت انها ما تحمل عالقليله بالتاني, بس هو اصر عالموضوع وحكالها, ولدين صعب تتركيهم , يعني بعرف انها ما بدها اياه وممكن تتركه باي لحظه و موافق يعيش معها بالغصب.
سنتين لا فيهم كلمه حلوه ولا حركه حلوه ولا حاول انه يقرب منها خطوه وحده, احنا كنا وما زلنا بنحكيلها انها هاي صارت حياتها وانها تحاول تقرب منه و تحاول تستوعبه وتتعود عليه تحاول تكسبه, مع انا كلنا مش مقتنعين باستمرا هيك حياه لا الها ولا للاولاد.
هي بتحكي اذا صار اشي لا سمح الله لامي , اول شي بعمله بتركه واذا اصر ياخد الاولاد بتركه هو و اولاده , بنحكيلها حرام عليكي الاولاد شو ذنبهم, وما راح تقدري تبعدي عن اولادك.
امها هلأ كتير مبسوطه, وهو صار عندو مشاكل بالشغل اله 5 شهور قاعد بالبيت وهي واهلها بصرفو عالبيت, و بدفعو لاهله مبلغ شهري مع ان ابنهم قاعد بالبيت بس لازم يدفعو لاهله, بتحكيلنا ازا هلأ واول سنوات زواجنا هيك عشناهم, شو بدو يصير بعد خمس سنين.
ما بعرف شو ممكن احكي, انا من جوا مقتنعه انها مش مجبوره تتحمل هيك عيشه, بس هلأ صار في ولاد, ولاد هو اصر يجيو بسرعه علشان ماتتركه, الشب ما بعمل حركه وحده تبين انه منيح وشاري البنت, طيب ليش تزوجها, ليش ما شاف وحده تانيه ترضى بهالحياه, لا عندها طموح ولا عندها اشي مهم غير انها تتزوج, انا بضل احكيلها لأ بدك تتعودي و بدك تيجي على حالك علشان الاولاد, بس مرات بحط حالي مكانها, ما بقدر استحمل ولا بقدر اكمل, شو ممكن تعمل؟؟؟ تعيش هي و اولادها ولا كأنه موجود بالحياه؟؟؟ تتأقلم على حياه بدت غلط اساسا؟؟؟
مش عارفه.....الله يعينها ويسامح امها ....
