Things I Like To Whisper About

Would You Hear Me Whispering

اهلك ادرى بمصلحتك....

كتير اهالي بياخدو قرارات رئيسيه بحياه اولادهم, من منطلق انهم ادرى بالحياه وانهم بقدرو يحكمو عالاشخاص و عالمستقبل اكتر من ولادهم, وللاسف مرات كتير بعاني الولد او البنت طول عمرهم من هيك قرارات.

بتختلف القرارات وتأثيرها عالحياه, بتبدا يمكن من يوم ما اختارو اسم المولود, و بتمر بالعلمي و الادبي بالتوجيهي , بنسو ميول الطالب نفسه وبركزو على مصالح وافكار اجتماعيه بحته , ابن فلان علمي وابني ادبي لا والله, بدك تطلع دكتور و بدك ترفعنا من هالحياه اللي زي الزفت, بدك تدرس مهندس و تتعين عنا بالشركه...الخ من هالمعتقدات والفرضيات وكلها بتروح في خانه, ابوك اعرف منك بمصلحتك , لاتعانده واكسب رضاه.

اليوم بدي احكي عن قصه صاحبه الي, وكيف تدخل اهلها بحياتها خرب حياتها و حياه اولادها بعدها

صاحبتي جابت معدل عالي بالتوجيهي, وانقبلت بجامعه مؤته الفرع المدني , و لانها من عائله محافظه و ببتكون من 4 بنات والاب بشتغل بره البلد, ففضل الاب انه يحاول ينقلها على جامعه بعمان, وبحكم انه بره البلد استنو لاجا وبس قدمو طلع فتره التسجيل خالصه بالجامعه, واعتبرو البنت مستنكفه و راح مقعدها.

البنت ما يأست وقعدت سنه بالبيت وتعلمت تجميل و صارت تشتغل بصالون ليجي موعد التقديم للجامعات السنه اللي وراها, وللاسف بوقت التقديم للجامعات كان الاب عنده مشاكل بشغله , و وضعه المالي بالمره وما بقدر يدّرس حد جامعه, البنت قدمت على كليه و درست وقدمت دبلوم و اشتغلت, وهي بالشغل جسرّت جامعه - يعني بعادلولها ساعات الكليه والدبلوم و بحسبو كم ضايل ساعات لازم تدرسهم بالجامعه ليعادلولها شهاده الكليه بشهاده بكالوريوس - اشتغلت و صرفت على دراستها وكتير عانت خلال هالمده و الحمد لله خلصت و جابت معدل جيد جدا.

وهي بتدرس تقدملها شب من العيله, هي ما بتحبه ولا بتحب اسلوب حياته, الشب اتكالي على اهله بكل شي, وغير ملتزم لا دينيا ولا اجتماعيا, و رفضته بالرغم من معارضه امها بالزات , هو الشب من قرايب الام و بدها تطمن على بنتها على رايها.

قبل التخرج بكم يوم, اكتشفو ان والدتها عندها سرطان, تكركبت العيله و اتدمرو نفسيا وتعبت الام كتير و بدت المطاردات و جرعات الكيماوي - الله يعينهم ولا يبلينا ولا يبلي حد- تخرجت البنت و قدمت لوظائف بشهادتها البكالوريوس وانقبلت براتب ضعف الراتب اللي بتاخده و تركت الشغل وانتقلت للشغل هناك, بس هي كانت تحكيلنا انها نفسها تطلع تشتغل بره الاردن بس اللي صار لوالدتها هو اللي راح يخليها بالبلد.

وبهالفتره رجع تقدم نفس الشب للبنت, الام لانها مريضه عملت مشكله كبيره مع البنت انها لازم تتزوجه, والبنت رفضت مره تانيه, بس هالمره الام تعبت و بطلت بدها تشوف بنتها و لا بدها اياها تاخدها عالدكتور, البنت تحت تأثير الام رضيت تقعد مع الشب مره تانيه, و بتحكيلنا حكيتله انا ما بدي اياك و انا ما بدي اتزوج هلأ, و والدتي هي اللي بتضغط علي, الشب بكل برود بحكيلها بكره بتتعودي علي, انا بدي اياكي, حكتله انت بتحبني يعني؟؟؟ حكالها لأ مش حب بس انا حسيتك مناسبه الي!!!

استمر الموضوع اشهر والبنت تحاول تتخلص من الشب وبالاخر الام حكتلها بموت وانا غضبانه عليكي, وتحت كل تأثيرات العيله اللي حست البنت مجرمه بحق امها ومش مراعيه ظروفها و مش مقتنعه ان الام بدها مصلحتها, وافقت و انخطبت وتزوجت.

بعد ما تزوجت بفتره صار عندها مشاكل بين تعارض اجازتها اللي ماخدتها من عنا و انها اشتغلت بالبلد, فتركت الشغل الجديد ورجعت عنا.

صاحبتي الها سنتين متزوجه عندها ولد و حامل بالشهر الثامن,سنتين من الجحيم و المشاكل, سنتين من الكره , سنتين مش طايقته ولا هو طايقها, بس المهم قدام العالم متزوج و عنده بيت و ولاد, سنتين وهو اله علاقات مع بنات, في عنده خط موبايل ممنوع حد يمسكه وطول نهاره واقف عالبرنده بحكي فيه تلفونات, حاولت انها ما تحمل عالقليله بالتاني, بس هو اصر عالموضوع وحكالها, ولدين صعب تتركيهم , يعني بعرف انها ما بدها اياه وممكن تتركه باي لحظه و موافق يعيش معها بالغصب.

سنتين لا فيهم كلمه حلوه ولا حركه حلوه ولا حاول انه يقرب منها خطوه وحده, احنا كنا وما زلنا بنحكيلها انها هاي صارت حياتها وانها تحاول تقرب منه و تحاول تستوعبه وتتعود عليه تحاول تكسبه, مع انا كلنا مش مقتنعين باستمرا هيك حياه لا الها ولا للاولاد.

هي بتحكي اذا صار اشي لا سمح الله لامي , اول شي بعمله بتركه واذا اصر ياخد الاولاد بتركه هو و اولاده , بنحكيلها حرام عليكي الاولاد شو ذنبهم, وما راح تقدري تبعدي عن اولادك.

امها هلأ كتير مبسوطه, وهو صار عندو مشاكل بالشغل اله 5 شهور قاعد بالبيت وهي واهلها بصرفو عالبيت, و بدفعو لاهله مبلغ شهري مع ان ابنهم قاعد بالبيت بس لازم يدفعو لاهله, بتحكيلنا ازا هلأ واول سنوات زواجنا هيك عشناهم, شو بدو يصير بعد خمس سنين.

ما بعرف شو ممكن احكي, انا من جوا مقتنعه انها مش مجبوره تتحمل هيك عيشه, بس هلأ صار في ولاد, ولاد هو اصر يجيو بسرعه علشان ماتتركه, الشب ما بعمل حركه وحده تبين انه منيح وشاري البنت, طيب ليش تزوجها, ليش ما شاف وحده تانيه ترضى بهالحياه, لا عندها طموح ولا عندها اشي مهم غير انها تتزوج, انا بضل احكيلها لأ بدك تتعودي و بدك تيجي على حالك علشان الاولاد, بس مرات بحط حالي مكانها, ما بقدر استحمل ولا بقدر اكمل, شو ممكن تعمل؟؟؟ تعيش هي و اولادها ولا كأنه موجود بالحياه؟؟؟ تتأقلم على حياه بدت غلط اساسا؟؟؟
مش عارفه.....الله يعينها ويسامح امها
....

15 التعليقات :

نحلم ونحلم بالحياه المفرحه واتاري احلمنا بلا اجنحه
:(

الله ايكون بعون الاطفال

 

قصه عاديه يا همسه هاي كتير بنات بيعانوا منها وكانت منهم اختي بس الحمدلله اختي خلصت وهي على البر لو الاهل يقدروا رغبات اولادهم ما كان بيصير في ضحايا باسم انا بافهم اكتر منك وللاسف في امهات كثير بدهم بنتهم بس يكونوا متزوجين مش مهم اذا كان مناسب ولا ولا المهم لقب متزوجه

 

عفوا انا ما انتبهت على آخر جمله وين انها تيجي على حالها
اسمعي يا همسه العمر واحد والرب واحد والواحد مش راح يعيش عمره وعمر غيره وليش هي تتحمل خطأ هي مش صاحبته لا تتحمل ولا تيجي على حالها اذا عندها فرصه للحياة لا ضيعها الاولاد مسؤوليتها ومسؤوليته هو كمان ليش المراه اللي لازم تتحمل مسؤولية امتاع الرجل وغباؤه يعني آسفه على هالكلمه بس يعني هو مش سائل ليش تسأل

 
قط البكتريا والفيروسات

بالعالم النسائي فيه ازمة انا هيك بشوف
على اعتبار انو الام بس تحب الام البنت حتي لو مش كويسه بتصير منيحه
والعكس صحيح
يعني في صحابي ... امهم راحت شافتلهم بنات وبتقلو بنت بتجننن بقلي بس رجت شتفتها لا بتجنن ولا اشي بلعكس ... بتحكيلو امو بس امها منيحه
وشب تاني بدو بنت ومقتنع فيها امو راحت شافتها والبنت ما قصرت
رجعت تحكي عننها مش منيحه اسؤ عيب انو ما عجبتها امها ...
نحنا بنركز على التوابع وبنسي الاصل


عفكرة صوتي للبيع بليرة بلش المزاد اذا الك مصلحه :D

 

Anonymous

احلام و واقع وحياه ومستقبل كله راح بنفس الوقت :(
الله يكون بعون الجميع

Sozan

الحمد لله على سلامه اختك, الاهل بعتبر ابنهم او بنتهم بفتقرو للخبره بالحياه وما بقتنعو بارائهم
انا مش مع هالحكي بس ما بتقدري تشجعيها انها تترك زوجها, هي اللي بتاخد هالقرار من نفسها وما بصير حد يأثر عليها :(

قط البكتيريا

عاساس ان انتو الشباب او معظمكم بهمكم ان الماما تكون موافقه عالبنت اللي بدكم تتزوجوها وعلى اهلها هههههههه

بالنسبه للصوت فااااااا
ليره كتير بدي استنى تعمل ديسكاونت :)

 

يعني هيي الحقيقة المرة اللي الاهل مش قادرين يتقبلوها انو كل واحد اكيد اكيد ادرى بمصلحة حاله .. وانو هم مش اقدر من صاحب الشأن بالحكم على شو الافضل إلو
كتير اهالي كانو السبب بتعاسة اولادهم .. لانو اجبروهم على تصرف او قرار معين
في بعض الامور ما لازم يتدخلوا فيها الاهل .. يعني الدراسة ، الزواج (وخصوصي الزواج )
لانو حياة بالطول والعرض ولو كان القرار غلط يعني دمروا حياة انسان ولو صار اولاد بتكون حياة اسرة

عنجد شغلة بتقهر و انو لو هيي اختارت هيك ممكن الواحد يقول هي نتيجة اختيارها

الله يعينها يا رب و " ما بعرف كيف " بس الله يشيل عنها الهم و تنحل مشكلتها

 

الله لا يسامح امها

جد مرات الاهل بجروا على خراب حياة اولادهم

 

همسه

الله يسامحهم :(
موضوع الزواج هو موضوع مشترك بين الاهل وبين العريس او العروس
يعني في دور كبير للاهل ما بنقدر ننكره بس القرار النهائي بكون للشخص صاحب العلاقه
امين يا رب ويصبرها و يفرجها عليها

SimSim

هي هيك بتفكر انها أمّنت بنتها وانها هيك بس بتتطمن عليها

الله يسامحها و يفرجها عالبنت

 

يعني شو بدك اياني احكي؟

البنت وضعها عطب بعطب من العيله لحد الزوج ولا مؤاخذه!!!

يعني يا همسه كيف ما بدها تتطلق والزلمه مالو ولا حسنه؟

ويا حبيبتي حتى عشان الولاد؛ الزلمه العاطل بيخليك تعوفي كل شي بس مشان الله!!!

 

La 7awla wala quwata 2ella bellah...
O b3den m3 hal2esas?
Listen, a7san eshi momken enha el benet tsaweeh hu enha tdal troo7 3ala beet 2ahelha 7ardaneh, o tdal teshki 2odam 2omha belzat, o te7kilhom kol eshi mesh mnee7 3m beseer m3aha, mshan 2ahelha - o belzat 2omha - tefham enno kteer 3'ala6 elli 3mlato o enno ma beseer hek!
La ya 3ammi... ana mesh m3 had el 7aki... enno al 2ahel adra bmasla7etna... l2, abadan mu sa7... had le7aki bejooz bentabeq 3ala natat tawjihi, madraseh... 2amma mesh bent kbeereh o fahmaneh o te3bat 3a7alha o 3adraset-ha!

 

مياسي

المشكله ان العيله كلها اتدمرت,هي و زوجها اللي مش حاسس باشي,و الاولاد

هو احسن اشي تتركه :(

Naryat

2azedek men elshe3er bayt zay ma be2oloo

2ahelha 3arfeen bekul 2eshee w bs tez3al belomoha w be5aloha terga3 3endo w had 2elly mkabber rasoo
w bs ytmashkaloo beroo7 beshke la 2emha w 2emha betbhdelha w betrag3eha 3ala bet-ha
w zay ma 7akeet 2ahelha besrefoo 3aleah :S

allah yfrejha 3alehaaa

 

Ana hala2 ba6alt fahmeh!!!!
Ana elli b3rafo enno el benet betkoon mtann7a 3ala shab m3ayyan o 2ahelha m3ardeen, o bs el benet to56of 7atta law 2helha ze3lu shwai bel2awal, bs yshufuha met-hannyeh o mbsota ma3o be2ulu 5alas! e7na shu bedna aktae men sa2adet-ha!
Amma el benet tkun metbahdeleh o 2ahelha mabsooteen 3aleeha, hai 2awal marra basma3!
Hadol metta2leen menha o bedhom bs ye5lasu (3a2asas el benet hamm y3ni!)

 

he kanat tsa3ed be masroof elbeait 3end 2ahlha...hallah 2ahelha besrefoo 3al teneen :S

wallah ya Noura hommeh shayfeen 2eno madam fe zalameh - elmafrood - fe 7ayat-ha fa 5alas me6amneen 3aleha :S

heak elmafrood satarooo elbenet :S

 

والله ما عندي اشي أحكيه غير الله يصبرها ويفرجها عليها..والله يهدي زوجها..والله يسامح أمها..آمين

 

Dreamy Villager

اشي بقهر بصراحه
امين يا رب