Things I Like To Whisper About

Would You Hear Me Whispering

معقّدة






قبل كم يوم وصلني تعليق من مجهول واللي كتير بحترم رأيه طبعا, بحكيلي فيه ان من متابعته لكتاباتي بحس اني معقّده :)
وبطلب مني اراجع نفسي , و الواضح ان الدافع من التعليق ان المعلّق بده مصلحتي, ربنا الله التعليق ما كان فيه اي هجوم او تجريح , غير ان المعلّق بحسني معقده.


انا بصراحه بالبدايه ضحكت عالتعليق, خصوصا انه اجا بعد الاحتفاليه السنويه بمدونتي, وبعد ما تشرفت برأيي كتير من اللي دايما بشرفوني بزيارتهم لمدونتي, واللي كان معظمه كلام اسعدني

انا بشوف حالي ابعد ما يكون عن التعقيد!!! حياتي اجمالا والحمد لله ما فيها اشي يخليني اتعقد, اكيد مريت وراح امر بازمات معينه, ما حدى بتخلى حياته, لكن ايماني و تفاؤلي وكرهي للنكد اللي معروفه فيه بين اللي حولي بخليني كتير بعيده عن التعقيد.

لما فكرت شوي قلت لحالي ممكن الحكم هاد اجا من ورا سلسله العرسان اللي كتبتها, مع اني وضحت اكتر من مره اني بكتب القصص اللي كان فيها مواقف غريبه او كوميديه, وان اكيد اجا عرسان كانو مناح و برضه ما صار نصيب, من ناحيتي او من ناحيتهم,وان اي بنت بالعالم ببدا يجيها عرسان من هي بالمدرسه .

انا اللي كنت خايفه يوصل من هالسلسله اني بنت دلوعه وحيده اهلها وعم بتتفاخر او بتلفت نظر بموضوع العرسان, وبتتفنن بتحليل نفسيات عرسان مساكين تورطو بانهم اجو عندها, لانه وصلني تعليق بحتوي على شي زي هيك عالموضوع :$, وانا ما كان قصدي غير تبادل خبرات و وجهات النظر علشان الشباب والبنات يستفيدو مش اكتر.

انا حابه اعرف رأيكم و بصراحه, انا بعرف حالي منيح, لكن حابه اعرف اذا كتاباتي بتدل ان عندي اي مشكله من اي نوع, تعقيد او غيره :)

العادي اللي صار مش عادي

مساء الخير و ربنا يتقبل طاعاتنا وطاعاتكم يارب

اليوم واحنا طالعين من صلاه الجمعه , طبعا ازمه سيارات واقفه و العالم معبيه الدنيا, سائق السياره اللي قدامنا شكله بعرف حد من اللي ماشيين, وقف شوي بعدين صف على جنب ونزل يسلم على صاحبه, ماما بتحكي يا الله شو انه محترم وبعرف بالاصول, اخوي حكالها سبحان الله كيف صار الاشي الغلط هو الاساس , يعني هو عمل اللي مفروض يعمله وهو انه يصف على جنب, بس صار عنا انه يضل واقف بنص الشارع و يأخرنا هو الطبيعي, وانه يعمل اللي مفروض ينعمل هو الاشي المش عادي.


من اول رمضان وانا كل يوم الي طلعه من الشغل, المفروض انه هالشي كتير منيح لان مش مطلوب ارجع عشغلي بعدها, يعني ترويحه بكير بشكل يومي, لكن للاسف كل يوم لازم يطلعلي اشي يخليني اتأخر مرات لبعد الدوام, الحمد لله محظوظه من يومي.


الاربعاء وانا بتحرك من قدام الشغل , اجت سياره مستعجله فاضطريت اكسر عالسياره اللي صافه اللي جنبي, حسيت اني ضربت فيه ضربه خفيفه, فما اخدت كتير بالموضوع وكملت مشواري وطول الطريق وانا بلوم حالي ليش ما نزلت و شفت شو صار و ريحت راسي, ولما وصلت هناك, بتطلع عالسياره لقيتها مشحوطه بالاسود من نص الباب الخلفي لمكان ما بنعبي بنزين, و الشحطه بس افركها بتروح, من هيك فهمت انها فعلا ضربه خفيفه بالاشي الخلفي للسياره , وبدت الافكار ,السياره اللي ضربت فيها ما بعرف نوعها بس من الصغار الخفاف, اللي بتحس لو تركيت عليهم ممكن ينهارو, و رجعت الوم حالي ولارتاح قررت ارجع للشغل وتاشوف السياره, انا بعرف انها سياره من الموظفين اللي عنا بس لمين ما بعرف, المهم خلصت الشغل اللي بدي اشتغله و رجعت لموقع الحدث , لقيت السياره ما فيها اشي , لكن الباب مطعوج :( , استغربت ان الباب مطعوج وسيارتي لونها ابيض والسياره التانيه لونها احمر وما اجا اشي احمر عسيارتي, صفيت و نزلت اسأل الامن اللي عالباب عن صاحب السياره, وانا بطريقي اله بديت افكر, شو اعمل اتصل ببابا ويلا افتح كروكه ويلا احكيله زبطها و بدفعلك, توكلت على الله وحكيت لحالها الامور بتبين.

سألت موظف الامن عن صاحب السياره, صار بدو يعرف ليش, حكيتله انت شو بدك بس احكيلي مين, قال اذا ضربتيها فعادي لسا قبل كم يوم دحلت سياره عليها و طعجتله الباب, انا بصراحه ارتحت وحكيتله خلص انت بس احكيلي لمين.

طلعت السياره لموظف من اللي بحب اتجنبهم و ما بحكيلهم صباح الخير, احنا عنا 95% من الموظفين للاسف شخصياتهم غريبه هاد اذا بنقدر نحكي عنها شخصيه, و اذا حكيت للواحد صباح الخير بكون بحبه وميته بدبديبه و بستلمني اسبوع بعدها ليفهم انها صباح الخير بريئه وانها ما راح تتكرر.

رحت لصاحبتي اللي بتشتغل مع هالموظف بنفس القسم وحكيتلها شو صار, نادته بدون ما تحكيله شو صار, ولما وصلنا لباب العماره حكتله اني ضربت بسيارته ضربه خفيفه, صار يحكي لا خلص بسيطه ومسامحه , حكتله لأ بدك تيجي عند السياره وتشوف شو صاير فيها, وبعد اصرار مني ومنها رضي يجي, سألته عن الباب حكالي لأ هاي ضربه قديمه, سيارته ما فيها اشي بالمره والحمد لله, بحكيلنا بالعكس شايفها حليانه بزياده بعد الضربه -اففففففففففففففففففففت هاي نغاشه موظفينا- حكيتله انا شفت ان ما فيها اشي و علشان الحلال والحرام حبيت انك تعرف , واضاف كم من جمله بنغاشه الجمله اللي قبل و ما صدقت وانا نخلص من الموضوع.

انا استكترت خير حالي بلحظتها واني عملت اشي كبير اني رجعت, اليوم لما صار الحوار مع اخوي فكرت فيها لقيت اني غلطانه وكان المفروض اني ما اتحرك و اكمل مشواري قبل ما اشوف شو صار بالسياره و اخبّر صاحبها, انقهرت من حالي كتير , معقول صرت من هدول الناس اللي بعملو الاشي اللي لازم ينعمل و بحملو الدنيا جميله انهم عملوها!!! من اللي صار عندهم الاشي العادي اشي خارق للطبيعه ونادر!!

ان شاء الله ما اكون منهم
:$



حصل بمثل هذا اليوم :)






بمثل هذا اليوم ويسبر - اللي هو اسمي البلوجّي :) - بدت التدوين , تخيلو الي سنه وانا موجعه راسكم بقصصي الطرمه :)

انا بطبيعتي ما بعرف اعبر كتير, او هيك كنت مفكره حالي لاني هلأ و بعد التدوين صرت اي شي يخطر ببالي احكيه واي تعليق احكيه, حتى اللي حولي انتبهو على هالشي, صار ترتيب و تسلسل افكاري اسرع من قبل.

اول ما بديت التدوين كنت اعمل كوبي و بيست للمقالات اللي تعجبني, وحتى الخط ما اغير, ليش!!! مش فاهمه

كان الي كم سنه بتابع مدونه حريقه و كان مفهوم التدوين لسا مش واصلني , وبعد فتره من متابعه مدونه اسكدنيا اتشجعت على التدوين,عجبني ان يكون في زاويه مخصصه الك و تحكي وتعبر فيها بالطريقه وبالكلمات اللي بنخطر ببالك,اول ما عبّرت عبرت عن الموظفه اللي عنا بالقسم وكنت ما احبها وكانت كتير قاهرتني, وهي قاعده قدامي فتحت المدونه و بديت اكتب عن "الست معجوئه " , و كتييييييييييير ارتحت, ولما قرأتها مره تانيه ضحكت من كل قلبي على طريقه التعبير :)
ما بنكر انّا ما بنقدر نعبر ونحكي عن كل شي بخطر ببالنا او مرات ممنوع نحكي ,لكن يلااا اشي ومنه :)

و بنفس الطريقه كتبت مجموعه "اطلع من راسي ...و شكرا" الاربعه وكنت ارتاح بس اكتب و شوي انفس عن القهر اللي يكون عندي بلحظتها, وبرضه سلسله عرسان اللي كتيير ترددت اني اكتبها لكن مشيت والحمد لله :)


اول تعليق وصلني وكان زي الحلم اللي تحقق لما شفت كلمه"1 تعليق بحاجه للاشراف" كان من عامر الخليلي صاحب مدونه اسكدنيا وكان باول رمضان, حتى ردي كان واضح اني انعجئت بهالتعليق

"شكرا اخي
وشكرا انك فرحتني من كل قلبي ان وصلني تعليق وانو اوافق عالتعليق ...زي اللي عن جد :)
معلش لسا جديده عالوضع" هههههههههه جد تحشيش كاينه :)

وانا لليوم بفرح بكل تعليق جديد زي فرحتي باول تعليق,شكرا لكل اللي اسعدوني بتعليقاتهم وبمرورهم على مدونتي , وشكر لخالد السعود اللي بمتابعته لمدونتي وتعليقاته خلاني استمر بعد ما فكرت اترك المدونه لفتره, وشكر لقويدر اللي لولا اضافتي لكوكبه السحري كان ما كان عندي هالمجموعه الرائعه من الاخوان والاخوات الجداد :)
قبل هالمره كتبت عن اللي كسبته واللي تغير فيي بعد ما بديت التدوين واللي لهلأ لسا بصير معي

سنه تشرفت ب 1700 زائر , و 376 بوست بمعدل بوست وحرفين وفاصله بكل يوم :)

كل سنه وانتو و قصصي الطرمه بخير :)

يوميات رمضانيه - 3

مسا الفل يا جماعه
اليوم الفطور كان اشي من الاخر, اليوم كان روستو " لحمه مفرومه" محشي بالجبنه و الخضار, و ماشت بوتيتو يعني اشي صح صح و الحمد لله

الحلو قطايف , لسا ما زهقنا منه وقلبنا عالكلاج
والعصير كركديه وقمر الدين, وصحتين وعافيه :)

اليوم كان شغل برّه طلعت بسيارتي طبعا , الساعه كانت 11 و مشواري عند دوار الداخليه, والدنيا والحمد لله مش كتير ازمه, وصلت و لاول مره بلاقي مكان فاضي اصف فيه , عاده بروح بصف بكراج بعيد 5 دقايق مشي من المكان اللي بدي اروح عليه, صفيت وعين الله علي و انتبهت ان في وراي سياره شرطه و بالعاده في سيارات بصفو مكان ما صفيت , وللاحتياط دورت على اشاره رايحه اشاره جاي انو ممنوع الوقوف و لله الحمد ما لقيت, لسا بدي اسكر الشباك, واحد امن من قدام مجمع بنك الاسكان بحكيلي يا اختي ممنوع الوقوف هون, انا قلت خليكي ريلاكس يا بنت و كوني لطيفه, حكيتله "الله يخليك كل موضوعي 5 دقايق بروح وبرجع بسرعه" والله يسعدو وافق و اوك وكل شي تمام شوي حد بنادي "يا بنت " لفيت وجهي الا هو زميل الشب الاول قال ممنوع تصفي هون, سألته ليش يعني, بحكيلي ممنوع, سألته طيب فرجيني وين اشاره الممنوع, بحكيلي انا بقول ممنوع !!! حكيتله مدام هيك انا بقول مش ممنوع, عصب وصار يصرخ, حكيتله خمس دقايق وبرجع ولفيت وجهي وبديت امشي, حكالي "انت كم قلتيلي بدك تقعدي" , حكيتله 5 دقايق و برجع, قال يلااا خلص روحي بس ما تطولي, حكيت لحالي خلص يا بنت الشب بدوش يطلع بسواد الوجي مشيها, ابتسمت و كملت مشي , وانا مروحه التنين بتطلعو علي عاساس احكيلهم شكرا او اي شي, ركبت السياره و انطلقت ولااااا كأنه في اشي :)


اليوم بدي احكيلكم عن حمله المليون ختمه اللي حكا عنها عمرو خالد - شكرا لصديقتنا روز اللي زكرتني بالموضوع :)

من 10 سنين وكل سنه برمضان بكون في برنامج لعمرو خالد وكل سنه في حمله تحت عنوان معين الحمله السنه تحت عنوان "سأحيا بالقرآن" ولتحقيق اهداف هالحمله المفروض نجمع مليون ختمه للقرآن الكريم خلال شهر رمضان, و في بموقع عمرو خالد عداد كل شخص بختم ختمه يضيفها للعداد و يضيف ختمه اي حد بالبيت ختم القرأن وما بقدر يدخل و يحطها بالعداد.

وهي بوستر الحمله - اللي المفروض لونه ازرق فجأه صار احمر مش عارفه ليش







دعاء اليوم

اللهم طهر قلبى من النفاق وعملى من الرياء ولسانى من الكذب ،

وعينى من الخيانة ، إنك تعلم خائنة الأعين وما تخفى الصدور

يوميات رمضانيه - 2


الفطور اليوم كان فتّه مكدوس و فتّه سبانخ, اما انا فاكلت حبيبه قلبي مقلوبه, الصحن اللي انبسطت عليه من امبارح انه ما خلص و طول اليوم وانا بفكر فيه :)

الشوربه اليوم كانت شوربه سويت كورن "ذره" وبما اني ئلّوده بطبعي , و اكتر من مدونه حاطه وصفات للاكل فانا راح اعطيكم وصفه هالشوربه , بصراحه هي مش اكتر من مدونه انا شفت مدونه مفعوص بس :) و شفت تعليقات ان في حد راح يحط وصفات فحبيت اكون السبّاقه بالتقليد :)


اخيرا خلصت دوره ال
ASP.Net
يا الله اول مره بحياتي ما بصدق و كورس يخلص , و اول مره بحس حالي قاعده مثل الاطرش بالزفه :(
الاخ المحاضر لانه ما بعرف غير سي شارب قرر يعطينا اياها بهاللغه اللي بعمري ما سمعت عنها, جد كنت حاسه حالي زي اللي داخله محاضره سنه خامسه صيدله على راي صاحبتي اللي استنتجت استنتاج ما عجبني بالمره, استنتاجها كتبتلي اياه على ورقه و حطتها قدامي واحنا بالمحاضره, زكرتني بايام المدرسه, كتبتلي " شكلنا ختيرنا....فعلا العلم بالصغر قالنقش بالحجر"
انا بالبدايه ما مسكت حالي و حششت ضحك , لكن لما روحت البيت انقهرت !!! انو جد كبرت و بطلت استوعب :( لسا بكييييييييييييييييير , وهاد اللي خلاني انزّل الماده عندي بالبيت و ادرس, و فعلا خلصت الدوره وانا بفهم شو يعني سي شارب و شو يعني
ASP.Net :D

طلع الموضوع انه احنا كسلانين على راي بنت جيرانا اللي بالصف التاني, و لما شوي تعّبت حالي و ركزت مشيت الامور, فالحمد لله ما طلعت ختياره و الحمد لله لساتني بعمر بنتقش فيه بمخي و بضل ثابت :)



وصفه اليوم

وصفه الشوربه - ربنا يستر
اول اشي سمّي بالله علشان ربنا يسترها معنا :)

حسب ما روى الراوي واللي هو ماما المقادرير كالتالي

3 معالق كبيره طحين
5 معالق كبيره حليب ناشف
3 كاسات مرقه دجاج وممكن نستغني عن المرقه ب 3 كاسات ماء و مكعب ونص ماجي :) واللي بالنسبه الي ازكى بكتير من مرقه الجاج بهالشوربه
علبه سويت كورن - ذره معلّبه بالعربي :)

بنحط المي عالنار - او المرقه- و بنضيف الحليب و الطحين و بنضل نحرك, اذا المي كانت سخنه بندوب الطحين بشويه مي علشان ما يكبتل, مهم كتير الاستمرا بالتحريك طول الوقت, ازا استخدمنا مي بنحط الماجي بس يبدا يسخن الخليط و لحاله بدوب, نضل نحرك حتى يغلى الخليط و لازم يضل يغلى من 5 الى 10 دقايق حتى يستوي الطحين, وبعدها بنضيف الذره وبنتركه يقلب قلبتين و بس و صحتين وعافيه

** اذا كان السائل كثيف كتير بنضيف مي او مرقه , المفروض تكون الشوربه شوي
thick
وازا كانت كتير سائله بكون لازم نضيف شويه طحين لكن بالمقادير هاي المفروض تكون ممتازه :)



دعاء اليوم









يوميات رمضانيه - 1

كيفكم وكيف كان اول يوم رمضان معكم؟؟
انا ما حسيت فيه بالمره يمكن لانه عطله...او لانه كان عنا عزومه و مشي الوقت بالتحضير!!!!
لمّا اذن المغرب انا ما كان نفسي غير اني اناااااااااام لا اكل ولا اشرب :$

صحللي من وقت لوقت خلال اليوم اقرأ شويه قرآن ...كل سنه و بفضل الله بختم القرأن بليله القدر, السنه ناويه ان شاء الله اختم القرأن اكتر من مره, ربنا يقدرني :)
للاسف ما رحت على صلاة التراويح الليله علشان الضيوف, امبارح رحت و كتير انبسطت, سبحان الله خشوع رهيب بصيب الواحد.


عاده اول يوم برمضان بنطبخ ملوخيه :) اليوم طبخنا مقلوبه بناءا على طلب ولاد عمي اللي كانو معزومين عنا -واللي هي اكلتي المفضله - عمي ومرة عمي بالمانيا عند بنتهم , فكل اسبوع بدهم يجو عنا ولاد عمي نفطر مع بعض, كتير بحب جلساتنا مع ولاد عمي كلها قصص ومغامرات و ضحك :)

انا حشيت القطايف اليوم وحملّت العيله 100000000 الف جميله, انو مش ملاحظين ان القطايف هالمره ازكى مره!!!! يسلمو ايدين اللي حشاهم!!!!! لا يا عمي في اتقان بالحشي و بتقدير كميات الحشوه ليش الحكي!!!
ولما ما حد صار يعبّر تعليقاتي اللطيفه سكتت :")

حكالنا ابن عمي اللي مشارك بمكتب للشغالات قصص جد غريبه عجيبه عن نهفات الشغالات وحركاتهم,قريبا راح اكتبلكم عنهم ان شاء الله :)



دعاء اليوم :)








ابتسامه اليوم :)




يلااا كل واحد يشيك فيس بوءّو و ينام
تصبحو على خير :)

امساكية شهر رمضان -2009

كل عام وانتو بالف خير



اهلا اهلا يا رمضان




جد اشتقنت لرمضان و لجو رمضان, سبحان الله بحس ان في اشي بتغير بالجو برمضان



احنا عنا بالبيت بنعلق على البرنده هلال و نجمه كبااااااار و فوقهم بنحط زي شلال من الضواو الصغيره, كان نفسي اشتري فوانيس احطها برضه بس للاسف ما صحللي فرصه اروح اشتري, يلااا الايام الجاي بجيب احنا فيها :)

صلاه التراويح بالنسبه الي الها معزّه خاصه, في مسجد انبنا جديد جنبنا اول رمضان السنه الماضيه, جد اني بحب هالمسجد و من يومها وانا كل صلاه جمعه وكل صلاه تراويح و قيام ليل بروح عليه, الشيخ الي فيه الله يجزيه كل خير كلامه اكثر من رائع, وصوته ماشاء الله بخلي المصلين يخشعو و تهتز قلوبهم من جوا.

اليوم الخطبه وكالعاده كانت رائعه, وباخرها صار الشيخ يرحب برمضان ولكن باسلوب جد هزنا كلنا
طبعا انا فاشله باني احفظ الكلام حرفي ولكن بما معناه حكى انا نستقبل رمضان بخجل و انا ما بنقدر نرفع وجهنا باستقبال رمضان اللي مر على ناس و شعوب ما خذلو الاسلام والمسلمين, اللي مر على الرسول صلى الله عليه وسلم وعلى الصحابه, اللي مر على ناس بزمن الفتوحات و المعارك, وهلأ بمر علينا و احقر شعب الله ذاللنا و سارق اراضينا و احنا ما في بايدنا غير انا نضع ايدينا بايدي حكماءنا و حكماءنا بيضعو ايديهم بايدي اعدائنا, بمر علينا و احنا مكانا ما عملنا اشي لفلسطين والعراق و افغانستان وكل الدول الاسلاميه اللي بتستصرخ و احنا ما حركنا ساكن لمساعدتها.... الله يفرجها علينا و يهدينا اجمعين :$


للاسف رمضان عند كتير نوم بالنهار و سهر بالليل و مسلسلات و جمعات و سهرات بخيم رمضانيه ما في اشي فيها رمضاني غير انهم بعملوها بشهر رمضان , لازم ننتبه لتصرفاتنا و لكل اشي بنعمله, برمضان الشياطين تحبس فاي عمل سيء بنقوم فيه بكون من انفسنا مش وسوسه شيطان, لو حطينا هالشي بعقلنا الا ما بقدر نسيطر على تصرفاتنا.


في برنامجين شفتهم السنه الماضيه و ان شاء الله السنه لازم اشوفهم اولهم قصص القرآن لعمرو خالد وهي جدول مواعيد الحلقات للي بحب يحضر, وفي برنامج اسمه الطريق الصح لمعز مسعود كتيير حلوة لكن للاسف ما عرفت ايمتا راح يجي, السنه الماضه كان قبل الاذان عالمحور


كل رمضان وانتو بالف خير و ربنا يتقبل منا اجمعين و يرحمنا و يغفر لنا و يعتق رقابنا
اكثرو من قول "اللهم انك عفو كريم تحب العفو فاعفو عنا يارب"

صحيح.....لا تنسو الليله في صلاه تراويح :)


دورت على اغنيه اهلا اهلا يا رمضان اهلا وسهلا يا رمضان اللي ما بزبط رمضان من غير مت نسمعها عالتلفزيون الاردني وللاسف مل لقيتها
يلااا مشو حالكم بهاي الاغنيه
:)



زمااااااااااااااااااااااااااااان

اليوم فجأه خطر عبالي اغنيه قديمه
وانا بدور عليها طلع معي مجموعه من الاغاني
اللي كان الها صدا بايامها
هي مجموعه من اللي عملو عمايلهم بوقتها
وكانو تقريبا بكل عرس
اتركم مع اللي تزكرته منهم :)


وازا في اشي ناسيته زكروني :)


















هاي الاغنيه بناء على طلب احمد المحروق





وهاي الاغنيه لاسماء سم سم :)




وانا تزكرت هاي الاغنيه الصبح ...كتيير بحبها
بتزكرني بايام الجمعه الصبح زمااااان




هاي الاغنيه لدريمي فيلجر



و اول ما سمعتها تزكرت هاي الاغنيه بنفس الوقت كانت



عندي حالة ملل...




عندي حاله ملل مش طبيعيه, ما عم بنبسط بشي وبحاول اجبر حالي اني اتغلب على هالشعور مش قادره :(

ركود فكري و حياتي, ما الي نفس اعمل اشي , ولا اشوف ناس و لله الحمد كل العالم حبتنا هالكم يوم :)

لازم يصير اشي جديد بحياتي, ممكن الروتين الممل هو السبب مع اني بحاول اعمل كل يوم اشي جديد, و كل يوم في اله جدوله و مشواره الخاص, وبشوف ناس جداد و بتعلم اشياء جديده بس بدون نفس :$

بروح بحضر محاضرات فقه , و بروح على دوره برمجه, و بروح دروس قراءة قرآن, و بروح عحدائق الحسين و بمشي وبحضر تلفزيون, وبحضر افلام, ورجعت حضرت كل اعراس اخواني,و...و.. وابدا ولا اشي نافع

حتى المدونه الي كم يوم مش عارفه شو اكتب, اخبار كتيره والحمد لله انتحار و حرق و قتل و حوادث اشي بكئب بزياده وما الي نفس اكتب عن اي موضوع فيهم.

فيااااااا جماعه....
عندي حاله ملل,,,, و اريد حلا :(






** انسو موضوع حب يهزني هاي بلا وجعة قلب بالله مش ناقصه الواحد :)
--- بعد 14 سنه خدمه بثنوي بتقلي ءقف


انا ابيع صاحبي علشان بنت .....كلاكيت تاني مرّه

طبعا هاي الكلمه دايما بنسمعها من الشباب و دايما الحكي انو البنت بتبيع ابوها علشان شب مش بس صاحبتها
وللاسف انا بالجامعه حضرت مشكلتين بين بنات وشد شعر على شب و الشب بكون واقف على جنب بستنى ان يروح مع المنتصره
وبنفس الوقت اكتر من مشكله بين الشباب و بتطلع بالاخر علشان بنت
فالمفروض ما يكون في تعميم ..في هيك وفي هيك

بدي احكيلكم قصه حصلت مع اخوي...اخوي سنه رابعه جامعه و احنا والحمد لله كتير قراب من بعض يمكن بحكم ان ما ضل غيرنا بالبيت والباقي تزوج وطلع,المهم...بحكيلي انه تلاقى هو وصاحبه و صاحب صاحبه خلينا نسميه فلان

فلان بحب بنت بتدرس بجامعه تانيه و متعلق فيها كتير...وطلب من اخوي طلب غبي ان يعطيه رقم تلفون البنت اللي هو بحبها على اساس انو بدو يختبرها... وللاسف كتير شباب بعملو هالشي...المهم اخوي ما كزب خبر بحكيلي اخدت الرقم ورنيت عالبنت ...خلصو كل الرنات وما جاوبت
طبعا نفش ريشه فلان وصار يحكي شايف يا زلمه ما احسنها...حتى عالارقام الغريبه ما بتجاوب..انا حاسسها هالبنت غير ...شايف الادب...شايف الاخلاق...شايف...قطع كلامه صوت رنه موبايل اخوي...بتطلع عالرقم ويلا مين يا معلم...رقم البنت :)

رد اخوي عالتلفون...بحكيلي سحبت عليها فيلم على اساس انو هي صاحبتي وانا بستناها بالكوفي شوب وهي تأخر
وبدا اخوي...انا كم مره حكيتلك ما بحب تتاخري علي واضل استنى...وبعدين مع هالعاده اللي فيكي..بحكيلي البنت بلّمت و بعد فتره بتحكيلو عفوا مين معي
بحكيلها انت مش فلانه..حكتله لأ انا لقيت مسد كول على موبايلي من رقمك وكنت بعيده عن التفلون..حكالها اهااا انا اسف كتير عالازعاج
..هي بدت تساله...انت بتدرس ويلا بتشتغل..حكالها بدرس وبحكيلي صارت البنت تتناغش وشو بتدرس و اي سنه وكم طولك وتمد المكالمه نص ساعه ...بحكيلي اخوي انا انسيت فلان اللي قاعد وفاتح تمه وخانس المسكين...بحكيلي انهيت المكالمه وحكيتلها يلا انا مضطر اروح
طبعا فلان اصفّر و كش...بحكيلي اخوي ما عرفت شو احكيله...

المشكله ان البنت بعد ساعتين ردت حكت...بحكيلي اخوي ان البنت من الاخر حسب الوصف وانا حكيت خلص مدامها طلعت هيك شو بده فيها فلان...فبحكيلي هلأ انا بكون رخيص ازا كملت مع البنت؟؟؟؟

طبعا حاليا اخوي والبنت على اتصال...وفلان طلع من الموضوع وبدوش يتعرف على اخوي ولا صاحبه ....وصاحب اخوي ندم انه مش هو اللي حكى :)
وبرجع بحكي....ان الشباب لا يمكن يبيعو صحابهم علشان بنت!!!!
اه ماااااااااشييييييييي صدقتك


** البوست هاد قديم من 17-9-2008 ,اخوي اليوم حكالي قصه مشابهه لهالموقف فحبيت ارجع اشاركم فيه لانه اعتقد ان معظمكم ما قرأه من قبل ....لاني كتبته في الفتره اللي كنت مبتدأه لسا وما حد بعرفني
عاساس انا هلأ صرت من المشاهير :")

المهم الروووووح

قبل فتره بحكي لاخوي عن اليسا
كيف كان شكلها وكيف صار وان كل هاد تزييف
وعمليات تجميل مش اكتر
حكالي انا مش مهم عندي كيف كانت
انا بهمني كيف صارت :(
و اتهمني باني بحكي هيك او احنا البنات بنحكي هيك بدافع الغيره!!!

و اليوم بحكي عن نانسي عجرم
نفس الشي اتهمنا احنا البنات انا بنغار منها
وهالمره الرد ان اللي بعجبني روحها !!!
بالله جد يعني قبل 10 سنين لما كانت بشعه وما كان حد شايفها
ما كانت روحها حلوه و بعد عمليات التجميل سبحان الله صارت روحها حلوه!!!

اتركم مع نانسي عجرم ايام ما كانت روحها الحلوه لسا مش مكتشفه :)






شر البليّه ما يضحك

لفت نظري خبر في موقع عمون تحت عنوان "اصابه 6 اشخاص اثناء تمرين وهمي للامن العام"

بالله عليكم هاد خبر هاد....يعني لو لا سمح الله الموضوع كان جد كان كل اللي بالموقع ماتو :$

كيف وهمي و6 انصابو؟؟؟؟

لسا لو تسمعو كيف انصابو ......هاد يا جماعه الامن العام جمعو كل اللي بالمنطقه و بالعاده المفروض بالتمارين الوهميه انهم يستخدمو اسلحه صوتيه....قوم ايه الامن العام بالغلط استخدمو قنبله فيها شظايا وهمّه مفكرينها صوتيه !!!!

الاصابات كانت بين المدنيين و رجال الامن العام ,انصابو بحروق وجروح ,ومن المصابين شب عمره 17 سنه ممكن - ان شاء الله لأ - انهم يبترو اصابع رجله اليسرى بسبب شده الاصابه.

وطبعا كالعاده بدايه الخبر بحكو ان الامن حشد لهالتدريب و باخر الخبر مدير المكتب الاعلامي ينفي انهم جمعو الناس وان الناس اتجمعو لحالهم -جد عذر اقبح من ذنب- وان الشب المصاب اصابات "خفيفه" تسلل لموقع التدريب

يا عالم ياللي ما تخافو ربكم...مستخدمين قنابل حقيقيه في تمرين وهمي وحشدتو العالم عليه وبالاخر بتلومو المصابين المدنيين كمان.

حسبي الله ونعم الوكيل....

يا فضيحتك يا ام شحاده.....يا شماته ابله ظاظا فيّا

من وانا بالمدرسه للجامعه وحاليا للشغل, اول ما اوصل البيت لازم اروح عند ماما اللي بتكون بالمطبخ بحكم انه وقت غدا و بكونو بستنو وصولي حتى يحطو الغدا عالسفره, بدخل المطبخ و اول شي بعد ما ابوس ماما لازم اكل لقمه من الاكل, بس لقمه زي نوع من الدوق على التصبير على تحفيز زياده السرعه باني اخلص اموري واجهز حالي للاكل.

و دائما التجهيز بتأخر لاني ببدا احكي لماما ادق ادق التفاصيل للي صارت معي اليوم, ماما عودتني اني احكيلها كل شي المنيح والمش منيح, اللي بنحكى واللي ما بنحكى, مع ان في كم شغله بحياتي ما حكيتهم للماما وهاد عاملي حاله ارق مرات بس ان شاء الله مصيري بيوم احكيلها, منهم عن هاي المدونه :)
وبرضه دائما ماما بتضطر تترك اللي بايدها وتيجي معي عالغرفه وانا بجهز حالي علشان استعجل لانها بتعرفني ما راح اسكت :)


الي فتره وللاسف بس بشكي و ببكي من الشغل ومن مديري ومن عدم التقدير ومن كتر الشغل ومن طوشي مع مديري, الها كم من يوم نايمه عنا وحده قريبه البابا كل فتره وفتره بناديها تيجي عنا و تقعد كم يوم, عمرها اشي و ستين سنه ومش متزوجه وساكنه لحالها , قعدتها بتجنن وبنقضيها ضحك و قصص و للاسف مرات كتير نم :( بس بنحاول نزكر بعض قد ما بنقدر انّا ما نحكي عن العالم :$


المهم طبعا سمعت شكواتي السابقه و شكوتي الحاليه لماما عن مديري وعن اخر طوشه صارت معنا امبارح , والله انا مش مشكلجيه بس مديري من النوع اللي اذا ما طلعتي عليه بالعالي ما بحترم نفسه يعني اذا احترمت سنّه و كنت مؤدبه وهاديه ما بفهم و بضل يسوق بالهبل و بكبر راسه بزياده.

انا بنام مع قريبتنا بس تيجي عنا بغرفه اخوي لانه فيها تختين و اخوي بنام بغرفتي, ما عندي مشكله بالمره مدام مخدتي معي :) , على صلاه الفجر صحينا كالعاده و بس خلصنا صلاه ورجعنا انام بتحكيلي قريبتنا, الله يسم بدنه مديرك, انا اتفجأت انو شو جابه على بالك هلأ؟؟؟ بتحكيلي طول الليل وانت بتحكي و بتتقاتلي معه :") , يااااااااا فضيحتك يا ام شحاده, انا بحكي وانا نايمه !!!!! مااااااااااااااااااااااااااااا بدي, هاي الصفه لاخوي مش الي :"( , اخوي اللي بصير معه بالنهار كله بنسمعه تسجيلي بالليل :) و يا سلام بس يكون عنده لعبه سلّه, ما بنام بالمره ليليتها, " ولك مررها"....." ولكم هيني فاضي هون هووووووووووون" و على الطبقه العاليه كمان :$
سألتها اذا قبل هالمره لما كانت تنام عنّا, عمرها سمعتني بحكي وانا نايمه, حكتلي لأ , سألتها اذا كان صوتي عالي؟؟؟ برضه حكتلي لأ.....الحمد لله يعني هالصفه لحظيه كانت و انا اساسا امبارح كنت هلكانه من التعب وكان في شغل كتير و توتر كتير, لدرجه اني نمت عال 10:30 و هاي ما صارت من سنوات.

هاي سبب جديد يخليني احقد على مديري :"(

على فكره انا قدمت امتحانين و عملت 3 مقابلات في شركه و نسبو اسمي للمدير من شهر, وقبل كم يوم اتصلو فيي يحكولي ازا لسا بدي اشتغل عندهم علشان يحركو الموضوع عند المدير ,حكيتلهم طبعا............ ادعولي اذا فيها خير تزبط :)


قبقاب غوار


انا بالعاده بس اي شخص يطلع من باب البيت لازم احكيله "جبلي معك اشي زاكي" واهلي بعرفو ان اي شي برضيني, شيبس ايس كريم حبه شوكلت , اي شي بمشي معي المهم انك تزكرتني باشي.

ونفس الشي خواني بس يجو من بره, كل تلفون لازم يا ام السوس شو بدك,يا ام السوس احكيلي لاني راح اجيب اشي فاجيب اشي بدك اياه احسن, دايما نفس الجواب " ما بدي غير سلامتكم" وباخر تلفون قبل ما يجو بحكيله "ازا ما بتجبلي اشي راح ازعل " و بما اني البنت الوحيده فبصراحه عايشه الدور عالاخر, والله يخليلي اياهم كلهم ما بقصرو :)

اخوي بدو يجي باول 10 ان شاء الله, طبعا مش مصدقين حالنا لانا كنا مفكرين انه مش جاي الا عالصيف السنه الجاي, اكيد اشتقناله ولكن اشتقنا لفروحه كتير كتير - بنت اخوي و اول حفيده بالعيله - الصور و الفيديوهات ما بتغني بالمره عن وجودهم حوالينا, امبارح بحكيلي شو قصه الشنطه اللي بدك اياها, حكيتله اي شنطه, بحكيلي الشنطه اللي حكيتي لاخوكي عنها, انا اي نعم بدي بس مش متزكره حكيت لحد, حكيتله ما بجي اشي بدي سلامتكم... بحكيلي من نفسي مره توصيني على اشي محدد, وهالمره حكيت بسحب عليها فيلم بتحكي وهيو ما زبط :")

اليوم اخوي الصغير نزل عالبلد, وهو طالع حكيتله جبلي اشي زاكي معك, و بس رجع جايب كيس و بحكيلي احزري شو جبتلك.....ولما فتحت الكيس و اذ به جايبلي "قبقاب غوار" كتييييييييييييييييييييييييييييييييير بحبه, فوق ما تتصورو, جايب كيسين بعرفني نص الكيس اكلته على طول , انسو اني صرت افتش عاشي مالح بالبيت بعدها , جد انبسطت وتزكرت لما مره لقيت بخزانتي تعريفه - بتتذكروها للتعريفه - نزلت عالدكان اشتري اشي, وانا رايحه شافني اخوي و لحقني و بعدها اخوي التاني و لحقني و بنات خالتي اللي كانو عنا, ما وصلنا الدكان الا احنا 7 :) ولما اعطيت العمو بالدكانه التعريفه اتطلع علينا و حكالنا ككلكم جايين على تعريفه!!! قام اعطى لكل واحد فينا قبقاب غوار , زليتهم انا طبعا, كنت مفكره انه هاد كله بتعريفتي اشتريتلهم اياه :)



الاغنيه ما الها دخل بالموضوع بس زكرتني بهديك الفتره و بالايام الحلوه :)




ليليه بترجع يا ليل

افكار كتيره ببالي
اشياء الها معنى واشياء ما الها معنى
بكره الاحد....يا الله شو بكره اول يوم دوام
جد بحسه بقعد اسبوع ليخلص هاليوم
الله يمشيه على خير
بكره الاحد مناقشه مياسي
موفقه مياسي :)
كان نفسي اكون معهم بس للاسف
شغلي اللي كتييييييييييير بكرهو راح يمنعني اني اروح
يلااا شو بدنا نعمل :(
احسن اشي اقوم انام
يلاا تصبحو على خير




.فكركم شو راح يصير


صوره تعبيريه


خبر في موقع عمون الاخباري بعنوان
ضبط مركبه نائب تحمل كميه من المخدرات و اوراق نقديه مزوره على حدود جابر

الخبر ان اخ النائب اللي عمره 25 سنه ماخد سياره اخوه - بعلمه ويلا بدون علمه مصيبه عالحالتين- رايح عالشام و رجع بالسياره النمره حمره و فتشوها عالحدود مع انه بالعاده ما بفتشو سيارات النواب بتعرفو حصانه , وشو لقو؟؟؟

"
( 140 كغم من الحشيش و20 كغم هروين وكمية كبيرة من الحبوب المخدرة ) بالاضافة الى أوراق نقدية مزورة من فئة ( الخمسين والعشرين ) قدرت قيمتها بمئات الالاف حسب المصدر
"

لهون الخبر بجيب صرع , بس بنحكي يلااا كل عيله فيها واحد فضيحه و انت بتحكم عالشخص ما بتحكم على اهله و من هالحكي

اللي بجلط انه
"لفيفا من النواب زاروا مسؤولاً أمنيا الخميس للتوسط والعمل على تخفيف وصف التهمة من متاجرة إلى نقل والسعي لفك الحجز عن المركبة"

طيب جد جد ما استحو يروحو يتواسطو بهيك موضوع؟؟؟

يعني يا سياده النواب اللي المفروض انكم بتخدمو هالبلد
كل هالبلاوي اللي بدها تدخل البلد وبدها تتوزع بالبلد وبدها تخرب البلد وبدها تدمر حياه شباب البلد , كلهم مش مشكله المهم سياره سعاده النائب ينفك حجزها و اخو سعاده النائب ما ينحبس.

شو مفكرين انها تمشي بكم عزومه منسف و كم من هديه وكم من الف هون وهون؟؟؟


بيني وبينكم.......يا خوفي تمشي :"(

بكره بدوب التلج وببان المرج والله يسمعنا الاخبار الطيبه :$



تحديث

شكرا لحميدي اللي زودنا بتفاصيل جديده من موقع عمون
النائب اسمه فرحان الغويري
و النائب كان بمصر و اخو النائب بستخدم السياره من سنتين بوكاله
و زي ما الكل توقع السيناريو....النائب ما بعرف ان اخوه مسافر بسيارته, و انه راح يضرب بيد من حديد حتى اذا...اذا اكتشف ان اخوه اله دخل ولكن اخوه غرر به ......


"وان شقيقه ابلغ الاجهزة الامنية عن هوية الشبكة التي نظمت عملية التهريب وتم القاء القبض على افرادها في الاردن وتتم متابعة اطرافها في الخارج"
.


طيب كيف غرر به وكيف بعرف عن العصابه ؟؟؟

بدهم يطبطبو عالموضوع و بنعرفها بس يا ريت يحاولي يطبطبو عالموضوع بطريقه شوي مخبيه عن العالم مش بهالوضوح...



Shaun The Sheep

من زمان ما شفت كرتون حلو
جد هالجيل الجديد الكرتون اللي بجيبولهم اياه بخزي
من يوم ماتي و وينجي و الكرتون بانحدار
بعدين فجأه صار كل الكرتون ديجيتال و ابطال المش عارفه شو
و مخلوقات فضائيه
و ابطال خارقين
وما في اشي قصه حلوه لطيفه
مثل توم سوير ,عدنان ولينا, جودي ابوت, هايدي, اوسكار
و غيرهم وغيرهم من الكرتون اللي كل واحد منهم بسوى كل اللي بنعرض هلأ

بس جديد اكتشفت كرتون جد حلو على
MBC3
Shaun The Sheep

جد انه تحشيش هالكرتون :)
هي عينه من حلقاته و انتو احكمو :)










الحمد لله...مشيت على خير

اليوم وانا مروحه عالبيت وزي كل يوم ما بتعلم و بروح من الطريق اللي المفروض مختصره و بلاقي كل العالم تاركه الشارع الرئيسي وجاي على هالطريق, وكل يوم بضل اقنع بحالي اني راح امشي بالطريق الرئيسيه و ما بلاقي حالي الا بنص الازمه بالطريق المختصره.

اليوم لاني مروحه بكير حاولت اكتشف طرق جديده و فعلا قطعت مسافه كبيره, لو ما مشيت بهالطريق بدي ربع ساعه عالاقل لاوصل لهالنقطه.

بس دايما و كالعاده في مكان عنق زجاجه كل الطرق بتتلاقى فيه, انا طالعه طلعه كتير قويه و قدامي تكسي, و وراي 4 تكاسي,التكسي و هو طالع لقى بوجهه سياره من اللي ببيعو غاز و قفو التنين و طبعا سكرو الشارع عالمسربين, انه واحد منهم يتحرك ما في فايده, المنطق بحكي ان اللي نازل هو اللي يوقف علشان الطلعه معروفه انها قويه وصعب ترجع تحرك السياره بسهوله, خصوصا للي سياراتهم مش اتوماتيك و اللي سواقتهم او سياراتهم على قدها, اللي صار ان التنين ضلو واقفين و اضطرينا احنا اللي طالعين نرجع شوي لورا, كل سياره رجعت شوي و صار في مجال للمسرب التاني انه يمشي, التكسي اللي قدامي الله يسامحه كل ما ارجع شوي علشان اخلي مسافه بيني و بينه , يرد يرجع معي و انا ازمرله انه خلص مشيت السيارات ليش بترجع, بس ما في فايده.

المسرب التاني طبعا قلب اتوستراد الزرقا وهات ليخلصو السيارات, واللي ورانا صارو يزمرو و انه هالتكسي يتحرك مش راضي, و يا ريته ما تحرك, يا دوب بدو يمشي, ما تحكم بالسياره و رجعت سيارته على سيارتي وضربها , انا طبعا اسودت الدنيا بوجهي و شوبت فوق ما انا مشوبه, المهم كل السيارات اللي نازله, كلها بدون مبالغه - يتطلعو على سياراتنا و يتطلعو علي و يحكولي , ارجعي شوي يا بنت ضربتي سياره الزلمه, اول 5 حكيتلهم ان هو اللي ضاربني مش انا اللي ضاربته, بعدين بطلت احكي صرت ابتسم و الف وجهي, و في سياره فيها مجموعه شباب لبنانيه شكلهم " رجعي...رجعي إختي لورا ضاربتيلو سيارتو للميسكين" رجعت شوي وحكتلهم كتير مضروبين, بحكيلي اللي بسوق "انت سيارتك ما بيها شي بس سيارته للميسكين" انا بصراحه وبعرف اني شريره بس ارتحت :$

المهم ضلينا نرجع شوي شوي لحتى صار بيني و بنينه مسافه منيحه, و حاول يتحرك رجعت لورا و عند اخر لحظه قبل ما تضرب مره تانيه مشيت, بس شو ريحه الدنيا, اشي بنحرق هو البريكات هي العجال مش عارفه و ضلينا ماشيين لحتى وصلنا مكان نقدر نصف فيه.

صفينا السيارات, نزل السائق شكله عمره باواخر الاربعين, الزلمه وجهو احمر زي الدم و كل وجهه معبى فتافيت فاين من الفاينه اللي بايده اللي بضل يمسح فيها عرقه, بصراحه انا شفقت على منظره, فعلا سيارتي ما فيها اشي كتير, المهم ان الضواو بخير و الصدّام الامامي - ما بعرف شو اسمه بس هيك اجا الاسم - ما بتحرك ومش طالع من مكان و في عليه خدوش بسيطه, اما سيارته المسكين فجد مضروبه منيح الضو مكسور والصدام الخلفي مكسور و نازل عالارض.

صار يحكيلي السائق انا جاهز يختي باللي بدك اياه, اللي بدك اياه, انا ما عرفت اتصرف, احكي مع بابا و ليجي بابا و يجي الشرطي و كروكه و بطيخ بكون استشهدت انا, اتطلعت عليه , حكيتله خلص بسيطه ما بدي منك اشي, بحكيلي الحمد لله الحمد لله بسيطه و بتطلع على سيارته وشكله شوي وبدو يبكي, بعد ما ركبت سيارتي بحكيلي, سامحيني يختي, حكيتله الله يسامحك دنيا و اخره.

بس ضل بالي مشغول ومش مرتاحه, لتجربه سابقه صارت معنا بحكيلكم عنها مره تانيه, مختصرها انه لمّا سامحنا انقلب الموضوع وصرنا احنا الملامين, ولكن ما بصير نخلي تصرف واحد ما بخاف ربنا يخلينا نتعامل مع الناس على انهم متلو, والحمد لله مشيت على خير.

اشياء تلفت النظر



*
بس تتعامل منيح مع الناس بفكروك ضعيف و بصيرو يحكو معك بالعالي و بنسو انهم همه اللي بدهم خدمه منك, وبصيرو يتعاملو كأنك انت رايح عندهم مش همه اللي جايين لعندك!!!!


* عمرك ما خبيت اشي و دايما واضح وصريح, وبس تكون بدك تتشطر و تخبي اشي عن العالم كل امه لا اله الا الله بتعرف !!!!

* قبل بيوم او بنفس اليوم من اعلان ارتفاع اسعار اشي , بتصير مصيبه كبيره, حادث, اختطاف , تسمم,تلوث ... بلتهو الناس فيها عن موضوع ارتفاع الاسعار!!!!!

* السوق بكون مليان شنط وكنادر كل الالوان وانت مش بحاجه لاي اشي جديد, وبس تكوني بدك لون معين فجأه بختفي من السوق اللون اللي بدك اياه, و الالوان النادره الوجود بتكون موجوده !!!!


* دايما بس يحطو صوره واحد من المسؤولين لما يكتبو عنه خبر مش ولا بد, بحطو صورته وهو بحلف اليمن؟؟؟ يا ترى بذكروه انو حلف يمين, ويلا علشان احنا نتأكد انه لما حلف اليمين كان حاطط ايده عالكتاب المقدس ويلا لأ او نشوف اذا عامل كروس باصابعه ورا ظهره - انه هالكزبه كزبه بيضا يا رب-

* الناس الخطأ بدخلو بحياتنا بالوقت المناسب و الناس الصح بيجو على حياتنا بالوقت الغلط!!!

* بس يكون في ارتفاع اسعار للمواد التموينيه بزيد استهلاك الناس الها وبس ترتفع مشتقات البترول بتلاقي محطات البنزين مليانه اكتر من دايما!!!

* حسب ما بسمع - ومن اكتر من ناس سمعت - ان احنا الشعب الوحيد - اردني من اصل فلسطيني او اردني من اصل اردني - اللي بنكره بعض في بلاد الغربه, وما بتلاقي عدو الك بالشغل هناك غير الي من بلدك, كل الجنسيات بتتجمع بالغربه الا احنا بنكون اعداء.

* دايما اصحاب المناصب واللي بياخدو القرارات بتكون عندهم صفه السماع من الناس و التصديق من دون التأكد من صحه الكلام والتصرف الفوري بناءا على الكلام اللي بسمعوه!!!!


انطلاقه بكتيريه



اخيرا قط البكتيريا سمع نصيحتي وكلامي و افتتح مدونته الخاصه :)

بحب ادعوكم كلكم لزياره مدونته الجديده
قط البكتيريا

و انا متأكده ان افكاره وكتاباته و خبراته الحياتيه راح تعجبكم و تفيدكم





أزمه سير


اول اشي شو في بالبلد اليوم؟؟؟ كل الاردن بالشوارع, و في باصات مدارس مع انه المفروض معطلين!!!
وين ما تروحي ازمه...حاولت اغير طريقي اكتر من مره و كل الشوارع الفرعيه اللي بمشي فيها عاساس اني خبيره و بختصر الطرق, طلعت كل الاردن اليوم بتعرفها و ماشيه منها
ساعه اليوم بالطريق و عاده ب 10 دقايق بكون بالبيت, وطبعا والحمد لله شوووووووووووووب, وانا الشاطره مش معبيه بنزين الصبح حكيت وانا مروحه بعبي, و ولا كازيه بالطريق و مش عارفه حتى اشغل الكوندشن خفت تقطعني السياره :(
وانا بالطريق شفت مشاهدات كتيره...طبعا ساعه مهي و معظمها واقفين مكانا كنّا

في تكسي كان ماشي جنبي و فيه بنت ورا, واضح انها من الخليج من طريقه لفه الحجاب او يمكن من هون لان الكل صار يستخدم هاللفه اللي انا شخصيا بكرها اللي بكون في كأنه طربوش عراسك - بنت خالتي اللي بالكويت بتحكيلي انهم بحطو بكله كلها ريش هي اللي بتعمل هيك, ومره وحده بالسوق وقعت قدامها وفلت حجابها واذ...اذ بعلبه لبن بتوقع من تحت الحجاب, الاخت علشان يزبط منيح هالطرطور على راسها حاطه علبه لبن - لمهم البنت بتحكي تلفون خلوي , و واضح انها بتحكي مع حبيب القلب -لا تحكو كيف عرفتي ببين- و الشوفير مركز عالمرايه و ابتسامات و ضحك على الحوار اللي بتسلى عليه بهالازمه, و مبسوووط و منسجم اخر انسجام, وهي ولا على بالها بتطلع عليه بالمرايه وشايفته بتسمع على كلامها ولااا في مشكله, او يمكن بدها اياه يسمعها..الله اعلم.

في سياره حكوميه قدامي و الشارع مسربين رايح جاي وما في جزيره وسطيه , وكعادته شعبنا الملتزم مشيت سيارات من ورانا وعملت صف تاني و سكرت المسرب التاني و زادت الازمه و ضلينا ضعف الوقت و العالم تتناقر ما بدهم يدخلو السيارات اللي بدهم يرجعو عالمسرب, المهم في سياره جيب من ابو ظبي بتحاول تدخل من قدام السياره الحكوميه اللي سايقها حج كبير و عصب الحج و صار يضرب على شباك السياره الجيب - طبعا مسكرين الشبابيك كندشن و مصاري, مش حسد بس نق :) - و الشب فتح الشباك وصار بدو يضرب الحج من الشباك و بلشت طوشه ايدين من الشبابيك و احنا واقفين بنزمر انه مش مشكله ابلشو ببعض بس صفو عاليمين :)


شارع الرابيه عند الاتصالات مسكر, الشارع على عرضه مي, مش عارفه من وين كنت بس لما وصلت عالمي عرفت, :"( لااا ابدا مش مجاري بعيد عن السامعين, و ولااا اني مش قادره اتنفس ابدا, سكرت الشبابيك صارت الريحه جوا السياره ومش عارفه شو اعمل, و لوصلت البيت و كل شوي تفحفح ريحه :(


اخيرا وصلت لمحظه البنزين علشان اعبي بنزين, طبعا وكالعاده كل الاردن عند الكازيه و العمال مش ملحقين عالسيارات وفي ناس همه اللي بعبو سياراتهم, استنيت مش مشكله لاني صافه بالفي, اول سياره بتعبي بنزين لشب واقف جنب السياره و معجوء و بحكي موبايل, و شكله هو اللي بعبي سيارته لان فجأه السياره صارت تطفح بنزين بره عالارض, كأنه مش حاططها صح لانه المفروض بس يتعبى لحالها بتسكر, و صرت ازمر واللي قدامي يزمر والشب ولا اله دخل والبنزين يكب عالارض و صار زي بركه لانتبه عليها و المشكله انه ضلو يتطلع عليها ومش عارف شو يعمل لحتى اجا واحد من العمال و سحبها, و جابو تراب و مي و قعدو يغطو بالبنزين, يعني مش بكفي التأخير لاااا مش مشكله خلينا نايمين بالمحطه :(


بالليل ابصر مين ناجح توجيهي ويلا متخرج جامعه من الجيران,طبعا محتفلين و مسكرين الشارع وصافين السيارات قدام الكراجات,طلعنا انا واهلي و بس رجعنا لقينا سياره مسكره باب الكراج استنينا لراح الحارس و نادى صاحب السياره اللي مسكره الكراج لعرفنا ندخل البيت, صورت الشباب المحتفلين وهمه بغنو بنص الشارع و مسكرين الشارع ومش مشكله ان الساعه 11:30 صارت عادي يلا عالقليله هاي كانت اخر وصله بالحفله, و انا بصور طلع صوت فكرته العاب ناريه, و بس اكتشفت انه طلق مسدس اتزكرت " كنت قاعد بالحوش" و فورا طفيت و سكرا الشباك و الاباجور و تخبيت :$

وانا بتفرج عالفيديو انتبهت اني مصوره اللي بطخ :$ ولا انتبهتله وال انا مكمله تصوير و بتطلع عالسما بدور عالفتيش ...بالدقيقه 2:47 ببين











مين هاي؟؟؟؟


احزرو مين هاي
وباي كرتون اجت
وشو كان اسمها
واللي بحزر اله
سيارة متسوبيشي همر بابواب لمبرجيني وضواو فيراري 2012






تحديث

Maroo حزرتها الشطوره


اسمها
شندوخه


وزي ما وعدتها الها السياره

بس مش هلأ بال 2050
لحتى اقدر اشتريها و اهديها اياها
بتعرفو اول شي ليصنعوها
و ثانيا ليعطوني حق الفكره
و ثالثا لترخص بالسوق :)

Jordania -------> Summer blog 2009





مبرووووووووووووووووك لايناس
مدونتها صارت هلأ رسميا مدونه صيف 2009


المسابقه كانت كتيييييييييييييير حلوه
جد انبسطت بهالشهر :)
شكرا لاحمد المحروق عالفكره
و بنشوفكم ان شاء الله يا عالشتا يا السنه الجاي
و اكيد في اشياء كتيره راح ننتبهلها المسابقه الجاي
و اسماء مدونات كتيييييييييييييييييييييييره كانت بتستحق تكون معنا بهالمسابقه
بس للاسف ما كانت بسبب العجئه اللي رافقت اول انطلاقه للمسابقه
بس اجمالا كان الوضع كتير منيح والحمد لله

وطبعا هي البانر اللي وعدنا الفائز فيه
ومره تانيه مبروك لايناس
جد بتستاهلي يا قمر



Create your own banner at mybannermaker.com!
Copy this code to your website to display this banner!