Things I Like To Whisper About

Would You Hear Me Whispering

نيسان دق الباب


اول شي كل سنه وانتو سالمين شكله والله اعلم الربيع بدا رسمي
اي نعم بالليل في نسمه هوا بارده بس اجمالا بالنهار الجو كتير حلو ,و هي بالنشره الجويه بحكو ان نهايه الاسبوع و الاسبوع الجاي درجات الحراره راح تكون فوق ال 30.

تاني شي بدي انبهكم يا جماعه ان بكره 1 ابريل....
يعني بكره في ناس راح تخفف دم و تتناغش وتعمل مقالب سمجه وتسحب افلام عالعالم التانيه فديرو بالكم.


ياما سمعنا عن ناس انفصلو وناس انجلطو وناس ماتو من ورا خفه دم بعض الناس,في قصه كل سنه بواحد ابريل ماما بتحكيلنا اياها علشان تزكرنا ان انتبهو لحد يسحب افلام عليكم اليوم.

القصه ان خالتي بعد 5 بنات جابت الولد -كانو بدهم يسموه بدري بس غيرو رأيهم باخر لحظه :) - المهم طبعا و كأي عائله بتسيطر عليها فكره ان الولد هاد هو اهم انجاز بحياتهم و انه ما شاء الله الوريث الشرعي -على اساس الشركات و المصانع و الاموال اللي بالبنوك معبيه الدنيا - المهم طار عقلهم فيه, زوج خالتي كان يشتغل بالجيش بيوم من الايام اتصل فيه واحد و هو بالشغل و حكاله ان ابنك دعسته سياره ومات -بعيد الشر- طبعا وقتها ما كان في خلويات ولا كان عندهم تلفون بالبيت و برضه ما كان عندهم سياره, و المسكين صار يركض بالشوارع زي المجنون و لوصل البيت كان شوي و بده ينجلط لقى ابنه بلعب وماشاء الله عنه. اتصل فيه النغش و بضحك ال مشيت عليك كزبه نيسان!!!


فيا جماعه ديرو بالكم




للمره المليون على التوالي ......

خبرين بجريده الغد بوضحو ان هالقمه ما راح تختلف عن القمم السابقه

نفس الاحداث بس بمشاهد جديده مش اكتر

كلااااااااااكيييييييييت عاااااااااااااااااشر مره

الخبر الاول


الخبر الثاني

احلام فتاه اردنيه....


هيك علق علي اخوي وانا ماسكه الموبايل ومشغله الكاميرا وبدي اصور لحظه اطفاء الكهربا عنا بالشارع علشان ساعه الارض!!!!


طبعا من يومين وانا ببعت ايميلات لكل اللي بعرفهم عن موضوع طفي الكهربا وعن الاحتباس الحراري و انه يا جماعه السبت ما تنسو من ال 8:30 لل 9:30....



اخوي بحكيلي وانا شو دخلني بالاحتباس الحراري , احكيلك علشانك بس يلا اطفو الضواو..

وبابا وماما اقتنعو بسرعه مش عارفه ليش.


حضّرت القهوه و الكيك و الشموع و عال 8:28 طفينا كل شي وبديت التصوير وعاساس شو بدي اصور لحظه الاطفاء العالميه... مشيت خمس دقايق ما صار اشي حكيت يمكن ساعتي مقدمه...طفيت ورديت صورت فيديو جديد...صارت الساعه 8:45 و لا حد اله دخل, حتى على راي ماما بتحكيلي حاسه الناس شاعلين ضواو اكتر من العاده :$


المهم ما حد عنا بالشارع طفا الضو, اتصلت بقرايبنا ما حد طفى الكهربا...حتى اللي حكيتلهم بقولو, احنا توقعنا شركه الكهربا تطفيها ولما ما انقطعت حكينا اذا مش اليوم :"( هاد وانا حاكيه معهم كلهم.


بس جد ضحكني اخوي من كل قلبي وهو بعلق علي...احلام فتاه اردنيه...انت مفكره حالك باليابان ....وبعد التصوير الثالث بحكي...وبعد سنتين ويسبر واقفه نفس الوقفه وبتستنى الكهربا تطفي :)


المهم احنا طفينا وقعدنا قعده رومانسيه عالشموع واكلنا الكيك وشربنا القهوه وبابا قعد يحكيلنا قصص الشباب....بحب هاي القعدات انا


كل ساعه ارض وانتو بالف خير :)


وين سامعه هالكلام من قبل؟؟؟

دعا المشروع مجلس الامن الى تحمل مسؤولياته في اقرار السلام.....

تأكيد على الدعم العربي.....

قمه عربيه طارئه....

ووقعت ثلاث دول عربيه فقط....

الى جانب مبارك, لن يحضر الرئيسين اليمني و الجزائري و الملك المغربي قمه الدوحه.....

جهود حثيثه...

سلام شامل....

وبالاخر ايش كمان "سابقه خطيره تستهدف رئيس دوله ما يزال يمارس مهام منصبه".....الله يرحمكم يا صدام حسين ويا ياسر عرفات

الخبر القاده العرب يدرسون عقد قمه طارئه في الخرطوم تضامنا مع البشير

Today is...






اخبارنا.....

ما بعرف شو رايكم انتو بس انا حاسه حالي بقرأ جرايد شيكاغو !!!

جد ايش في ؟؟؟

العالم مش طايقه حالها من الغلا و من الازمه الماليه و قلّه الرواتب ..طيب يعني طوشه بوكسات, شلاليط , مسبات وانت سايق , كشره فوق الكشره, نكد و سمه بدن كل هاد ماشي

بس ان العالم نازله قتل ببعضها؟؟؟

جد اشياء غريبه

اعطيكم امثله على عناوين الاخبار اللي صايرين نشوفها كل يوم

وفاة فتاه"تعذيبا" بيد والدها و شقيقها

لانها كانت متمكيجه و بتحكي مع شب بالمجمع....هعو بسألها عن الطريق...هو بتحركش فيها...هو فعلا متواعد معها الله اعلم

فالاب و الاخوان نزلو ضرب فيها "ببرابيش " وعصي حتى توفت.....و هاي جريمه القتل الرابعه بحجه الدفاع عن الشرف منذ بدايه 2009 ..تخيلو رعاكم الله.


الحكم على زوج أحرق زوجته بعدما عاد متأخرا من لعبة "الشدّة"


القصه انه الخلافات منذ بدايه الزواج, و حادثه القتل صارت و الزوجين عندهم طفلين يعني شوفو بعد كم سنه.

ضرب واهانه و بعدين حرق, لانه مش قادر يتفق معها.....حسبي الله ونعم الوكيل

أخطر مطلوب حاول خطف فتاة بإربد في قبضة الأمن

البنت كانت راح تنخطف مين بيتها.... هاي مش جرئه هاي وقاحه.


إعتداء على محامي اردني وزوجته كعملية انتقامية لكثرة ما نجح في تطليق نساء من أزواجهن

هاي لحالها فيلم هندي جد....اقرأوه بانفسكم.


الخبر الاخير اللي جد قهرني , يعني لو يعدموه هالخفيف الدم ما راح ازعل عليه


كذبه تمزق قلب ام هلعا على ابنها


الاخ سرق موبايل الشب و اتصل مع امه وحكالها انا العقيد فلان الفلاني و ابنك عمل حادث و انصاب, وبعد ما راحو اهله عالمستشفى ومالقو اثر لابنهم حكو مع االلي سارق الموبايل حكالهم. ابنكم مات و المستشفى ما بدهم يحكولكم....

حسبي الله ونعم الوكيل

خير اللهم اجعله خير


الله يسعدهم ويخليهم ذخر لامتّهم

قرأت خبر جد اسعدني وكتير انبسطت منه وحسيت انه لسا الدنيا بخير

الخبر بقول ان برلمانيون من احزاب مختلفه اعترضو وبشدّه على زياده رواتبهم السنويه, وكمان طالبو بان رواتب الوزراء تضل كما هي دون زياده, مع العلم بان الزياده كانت نسبتها 10% .



يا الله يا جماعه واحنا بنفكر ان الدنيا خربت و ان اللي بحسو بمعاناه الشعب راحو.

ولكن الله يسعدهم هالبرلمانيين شو فشّو قلبنا و اسعدونا على هالصبح.



*ملاحظه صغيره خارجه عن الموضوع, البرلمان هاد بالسويد :)

* الصوره توضيحيه محاوله لمحاكاه الاحلام




ذكريات

اليوم وانا برتب باغراضي لقيت دفتر زكرياتي

بديت اكتب فيه واخلي صاحباتي يكتبولي فيه بعيد ميلادي بال 91 يعني من زمااااااااااااااااان

في صفحات كاتبه التاريخ و كاتبه كلمات , كلمه على كل سطر,اشي تذكرت شو يعني واشياء كتيره ما تزكرتها

كاتبه اشياء باول ايام التوجيهي و كل صاحبه من صاحباتي كاتبه موقف صار معنا, هديك الايام بتزكرها بادق التفاصيل.

و قرأت اللي كاتبينه صاحباتي , يا الله كيف كان تفكيرنا صح كتيير ابسط من هلأ بس فيها شويه حركات صغار زي ما بحكو, بحبك وما بحبك و مقاتلات وعتب ههههههههه جد ضحكت من كل قلبي.

في خرابيش من اخوي ورسمه المفروض انها عصفور وهو بالصف الاول.

وخرابيش من بنت عمي وكاتبه ان عمرها سنه J

و في جزء كاتبه فيه اغاني

اغنيه "متى ستعرف كم اهواك" لنجاه الصغيره كاتبتها مرتين و بنت خالتي كاتبتلي اياها مره , ابصر شو اللي كان شاغلني وقتها مع اني لا ازكر ان كان الي هالحركات, صح كان في ناس توقف على باب المدرسه وتضلها ماشيه وراي لاوصل البيت , وبايام الشتا كانو يضلو واقفين لادخل المدرسه, بس انا ولا كأني هون لولا صاحبتي اللي كنا نروح ونيجي مع بعض انها نبهتني مره ويلا انا مش شايفه حد, وحتى بعد ما نبهتني صرت اطنش اكتر,من انا وصغيره و انا تفكيري اكبر من عمري ما شاء الله علّي.

وفي اغاني لدليدا رحمه....يا الله وين ايامها هالمطربه من زمان ما سمعت عنها.

وفي صفحات ملزقه فيهم ورد من مناسبات كتيره وكاتبه التاريخ و شو المناسبه.

والله كاينه فايقه ورايقه وانا مش عارفه.

وفي ورقه مكتوب فيها كلمات دعايات من صاحبتي وكاتبه انها بالحصه السادسه يوم السبت 13/3/93

والله كانت ايام جد ما بتتعوض.






هاي ذكرى تانيه كاتبها اخوي بال 93


جزء من الدعايات اللي كتبتهم صاحبتي
يا الله ....ايام بتجنن






الى امي

لم اكن قد رايت عمق البحار الا في خيالي , وكنت اصف حبي لك بذلك العمق....


ولكنني اليوم وانا هنا وسط الباخره انظر الى البحر و اشعر بعمقه تأكدت ان حبي لك اعمق من ذلك العمق بكثير.


كنت اتخيلك معي على ذلك المقعد فوق سطح الباخره يلفحنا ذلك الهواء البارد, تتساقط فوق الشراع حبات المطر التي يتناثر اكثرها فوق وجهينا وكأنها تقبلنا, فتذكرني بتقبيلك لي فاشتاق اليك, حقا اشتقت اليك .


اشتقت الى حضن دافئ, ذكرني به ذلك الهواء الذي اوجع اعضائي و ذكرني بخصلات شعرك التي كثيرا ما الحف بها وجهي.

انني هنا وانت هناك, ولكننا معا روحان يتعانقان دوما و بعمق, لن اقول كعمق ذلك البحر....


مع غروب الشمس ومع شروقها اتذكرك, فوق الجبال وبين الاشجار اتذكرك, في كل خطوه اخطوها اتذكرك واتمنى وجودك معي.

نركض سويا في شوارع تلك المدينه المزدحمه, نداعب طيورها, نقطف ازهارها, يحتضنني ذراعك لتحميني من حبات المطر البارده.

و ننزوي معا تحت شجره بعيدا عن تلك الضوضاء التي تسرقك مني.......


** خاطره حافظتها من انا صغيره قرأتها بالجريده من مشاركات القرّاء, وكل مره بتأثر فيي كتير



اولا كل عام و ماما بالف خير والله يخليلي اياها يا رب و ما يحرمني منها ولا يبعدني عنها

وكل عام وجميع الامهات واللي راح يصيرو امهات بالف خير

الله يخليلنا اياهم كلهم يا رب






بعرف ان في يوم لعيد الاب بالبلدان الاجنبيه ب 15\6 اعتقد, بس احنا هون بالاردن ما بنحتفل بعيد الاب.

ربنا يخليلنا اباءنا و امهاتنا ويضلو فوق راسنا على طول
هاد الفيديو كتير أثر فيي و حبيت اشاركم فيه, بحكي عن الاب وكيف بعمل كل اللي بقدر عليه بس علشان يسعد ابنه