انا عندي حنين و بعرف لمين

يا الله كيف الدنيا بتبعدنا و بتقربنا, كيف القريب بصير بعيد و البعيد و الغريب بصير اقربلنا من نفسنا, ما بعرف هي الدنيا القاسيه ويلا قلوبنا اللي قاسيه, بننولد بقلوب صغيره صافيه و بنبدا نحط فيها القسوه اشي عشناه و اشي اكتسبناه من اللي حوالينا, ياما حبينا ناس لان اهالينا او اللي حوالينا بحبوهم و ياما كرهنا ناس لنفس السبب.

عالمنا الافتراضي اللي قررنا نلجأله من قسوه الواقع اجمل بكتير, عرفنا على ناس رجع ثقتنا شوي باللي حوالينا, بالرغم من بعض الشوائب اللي زي الفيروسات بتدخل حياتنا و بتخرب فيها و لكنها قليله مقارنه بالواقع, الاجمل هو تقاطع  العالمين مع بعض الواقعي و الافتراضي, ناس عشتو معهم اجمل اللحظات و احلى الاوقات وبعدتكم الدنيا عن بعض و خلقت زي جفا بينكم من باب اللي بعيد عن العين بعيد عن القلب, و بالصدفه تتلاقو بهالعالم الافتراضي و بجمله بسيطه يرجعوكم لهديك الايام ولا كانه سنييين مشيت و يرسمو على وجهكم ابتسامه نابعه من القلب, ساعتها بصير عندكم حنين و بتعرفو بالزبط لمين.

ملاحظه ع الهامش

هالبوست وليد مشاعر غمرتني من تعليق لقريبه الي الي سنين ما شفتها و جديد تلاقينا عالفيسبوك و ختمت تعليقها بهالاغنيه اللي رجعتني لايام جميييييييييييييييييييييييله كتير

تعب المشوار

غريب الانسان كيف مشاعره و قلبه و مزاجه كلهم بتحولو بمجرد مرور ريحه او مذاق او صوت قديم برجعهم لايام ناسيها , لذكرى قديمه تراكمت عليها الاف الذكريات و الاحداث, و بتطلع هالذكرى بنفس مشاعر و احساس الانسان بوقتها, بطفوله بريئه بشباب متهور او ممكن بقلب مكسور, حتى بالوانها بوقت ما حصلت

لما سمعت هالاغنيه قبل كم يوم تذكرت سيارتنا المرسيدس الخضرا, تذكر التمشايه بشارع الاستقلال و الدنيا منوره باضاءة الشارع و اللي كنت اعتبره مكان سحري و خاص فينا, بجبل الحسين و دوار فراس و لعب الغمايه مع اخواني على هالدوار, بسندويشات الفلافل و الشاورما من جواد, بالايس كريم من محل ما بعرف شو اسمه بجبل الحسين, بانذهالي بدمج نكهتين من الايس كريم في "قرطوس" واحد, ضحكتي و فرحتي وريحة الدنيا و صوت السيارات, بسباقاتنا انا و اخواني و بابا يمشي ورانا بالسياره هو وماما.

كنت احس الاغنيه مفرحه, ما كنت اسمع الكلمات, شي جديد اكتشفته بالطفوله, القدره على تحويل اشد الكلمات حزن لمعاني حلوه, يمكن لان مشاعرنا كانت حلوه و دماغنا ما بتقبل اي شي غير السعاده.

اليوم و بعد اشي و عشرين سنه من فتره سماعي هالاغنيه, بسمعها منيح, بسمع الكلمات و بفهم وجعها, شكلنا بس نكبر بنصير اكثر هشاشه, مع ان المنطق بقول ان الطفل هو الهش و الانسان بس يكبر و تزداد خبراته و تجاربه بصير اقوى, شكله لأ, بنصير ارق و قابلين للكسر بسهوله, ذاكرتنا بتصير اقوى , فبتستمر مده وجعنا.

انا حكون اقوى و اصلب, طفولتي "يمكن" انتهت - الله اعلم - لكن ما راح اتخلى عن ذكرياتها, ما راح اتنازل عن مشاعر بفتقدها حاليا حتى ولو كانت بتوصلني عن طريق ذكرى لدقائق, بدي احاول ما اغير ولا اعدل بالذكريات و مؤثراتها و خصوصا الذكريات الحلوه, بدي اتضل هالذكرى بانوارها و بطعمتها و بريحتها و بضحكتها مثل ما هي و بدون تغيير حتى ولو انه فعليا.....تعب المشوار.

اعز الناس

كلام كتير و احداث كتير

و كالعاده

....ما في كلام راضي يطلع

بس حبيت امسي عليكم يا اعز الناس

مساكم فل

انا عندي حنين

تصوير صديقي مؤيد حباس....المصدر

دائما ما احببت مشهد المقعد الفارغ, للبعض المقعد الفارغ يعني الوحده و العزلة ولكنه مشهد يبعث البهجه في قلبي, مشهد يعني لي الذكريات المضحكه والمبكيه احيانا, ذكرى الم ام ذكرى سعاده لا فرق جميعها تزيد من دقات القلب, تسارع دقات القلب ارتجاف القلب و القشعريره اللذيذه التي تسري في الجسد مع كل ذكرى .

قد لا تكون ذكريات عشتها بنفسي , ولكن دائما ما يخطر في بالي كم الذكريات التي مرّت على ذلك المقعد عبر السنين, كم من جسد منهك تعبا او حبا او الما او سعادة القى بنفسه على ذلك المقعد, كم من جسد عانق ذلك المقعد شوقا او فرحا او بحثا عن الامان, كم من حرف كتب عليه وكم من اسم نحت على حوافه...

انظر اليه و ذكرياتي التي لم اعشها تبدأ في التحرك داخل ارشيف عقلي, تعرفون ذلك الشعور عندما ترى نفسك مع من تحب ومن لم تلتقي بعد , شعور مجهول لشخص مجهول ولكنه يتحرك داخلنا, او ربما لا تعرفونه و يكون شيء اضافي في قائمتي الخاصه , لا لابد انكم تعرفونه,انه ذلك الشعور الذي تحدثت عنه فيروز ب "انا عندي حنين...ما بعرف لمين" , لكل شخص فينا احلامه التي لم يعشها, في مخيلته تقطن ذكريات و مواقف لم تحصل, ليس ضرورا ان يكون بطلها المعشوق الضال, قد تكون ذكرى مع اب او ام, صديق او اخ...طفل لم يصل بعد.

اه كم احسد ذلك المقعد, كم اتمنى ان اسمع تلك الهمسات التي همست حوله, كم اتمنى ان اقرأ الاسطر التي كتبتها اعين المارين عليه, كم اتمنى ان ارى احلام ذلك العجوز الذي اتخذه سريرا لنصف ساعه, كم اتمنى ان اسمع شكوى تلك الفتاه, واسمع ضحكات ذلك الطفل.

ايديك

اريد ان امسك يدك و القي نفسي في الهواء و انا متيقنه بانني في امان ولن يؤذيني شي او احد حتى نفسي

اريد ان اغمض عيناي و اسير وانا اتبع صوت خطواتك وانا مطمئنه بانني لن اسقط...

اريد ان انام قريرة العينين و احلم باجمل الاحلام متأكده بانني عندما استيقظ ستكون عيناك امامي و ابتسامتك صباحي

اريد ان امسك يدك و اسير ...اعلم انني ساشعر بانني اطير و كأن الارض لا وجود لها ففرحتي تحملني على اكفها

دائما ما تسألت لماذا الحزن يجذبنا اكثر الى الارض وكأن جاذبية العالم تمركزت تحت اقدامنا نحن وعند الفرح نفقد اي جاذبيه ونشعر بان شي ما يرفعنا الى السماء!!!

لا اريد ان افكر الان...اريد ان يتوقف الزمن للحظات لانظر الى عينيك و اغوص فيما وراءهما دون ان تنتبه

اريد....

اريدك ان تكون حقيقه لا خيال....يوما ما....ربما...وربما لا

ولكنني ما زلت اريد ان امسك يدك

______

من وحي الاغنيه :)

عالم وهمي

دائما ما تتعلق بالاسماء, تبني لها ملامح و وجوه و تعشقها اكثر, وتبدأ في بناء القصص و الحكايات, تحلم و تحلم, همسات و لفتات, كلمات و احاديث كلها محض خيال تبنيها و تتفنن في البنيان.

تحبك القصص كما تريد و تحل العقد بطريقتها, تمر الايام و تتعلق اكثر و اكثر, تلاحق الاسم في كل مكان و تلاحق اخر تحديثاته و اخباره, و تبدأ بتحليل كل حرف و كل كلمه و تبني عليها الاف الجمل, تفرح و تحزن و تسهر و تحلم كلما قرأت جديده,تحاول استفزاز كلماته و استعطافها احيانا.

ستدور الايام و سيختفي كما بدأ.....مجرد اسم مرّ عبر احرفها, اسم جديد من بين اسماء كثيره عبرت شاشتها.

الاغنية ما الها دخل بالموضوع لكني كتير بحبها :)

مسائكم فل و ياسمين

و جمعتكم مباركه ان شاء الله

انبسطو بالعطله و المش معطل -يا حرام- .....انبسطو بالدوام :)

مشتاق و مضنيني الفراق

اشتقت للاطافيل

ارجعنا مرّه تانيه للتلفونات اللي ما بتفش القلب

و للحكي عالنت اللي بقهر اكتر ما ببسط

اليوم حكو معي اهلي من الامارات و ما حكيت مع فروحه

حبيبتي مريضه :(

اشتقتلهم كلهم كتير كتير كتير

اشتقت لبابا وماما

اشتقت لاخواني و مرتاتهم

و اشتقت لحبايب قلبي كلهم

كتير بقهر انّا نسمع عن حركاتهم و تطوراتهم سمع

اول ضحكه

و اول صوت

و اول كلمه

و اول خطوه

كلّه بروح علينا

الله يجمعنا على خير

الله الله يا مصر

ساعات بشتاق

انا و الحمد لله مبسوطه كتير كتير كتير

الاجازة توقعت و اليوم رحت اعمل بطاقات التأمين لاهلي و اللي همه اهم سبب لاني اخد اجازه مش استقيل غير انو اذا لا سمح الله ما زبط موضوع الشغل اقدر ارجع عشغلي كأخر خيار - بعيد الشر :(- اللي بتعود عالشغل و الراتب ما بقدر يقعد هيك عادي, انا مأمنه حالي ماديا لشهر 2 , ان شاء الله لوقتها بكون ربنا ميسرلي شغل منيح, بالامارات في شغل ولكن خواني خوفوني بانه ممكن الجو العام ما يعجبني, وبالعقد في فتره تجربه 6 شهور الي والهم و لهيك بديش اخد قرارات سريعه و برضه بديش اتأخر :$ الله يجيب اللي فيه الخير,بس حاليا انا بأجازه راحه لحتى اسافر عالامارات فبدي ارتاح جسديا و عقليا :)

هلأ جسديا ماشي الوضع و حبيبي النوم عم باخد منه اقساط واقساط تعويض :) بس مشكله الراحه العقليه من التفكير فهاد شي مش بأيدينا, افكار كتيره مع ان كل اللي حولي بطمنوني , لدرجه ان اخوي حكالي تعالي عيشي عنا وما تشتغلي :) - الله يرضى عليهم يا رب و يعطيهم ليرضيهم قد ما بريحو بالي - بس زي ما حكيت ما بقدر ارجع اخد مصروف :$ وانا بحب الشغل وخصوصي اني ما عندي اي التزام

هلأ افكار الشغل والمستقبل تقريبا نحلّت بضل الافكار بخصوص الماضي, حاسه الشغل والحياة غيروني كتير, بدي ارجع مرّه تانيه ويسبر القديمه, بدي انسى كل شي و ارجع لمزاج الابتسامه الدائمه , بدي ارجع الاقي واشوف الاشياء حلوه مهما كانت, ارجع لمزاج البساطه بالتفكير بكل المواقف, بدي ارجع يبطل كل شي يدايقني و ارجع اهوّن اي شي بصير معي, حاسه اشي من جوا انطفى, ما بدي اكون متشائمه بس مش عارفه كيف اوصل الفكره بس فيي اشي انطفى, انطفى بس ما مات الحمد لله لهيك بحكي اني بدي ارجع و ان شاء الله حرجع.

بعد تفكير لقيت ان احنا اللي بنختار, بصير معنا احداث ممكن غصب عنّا وممكن بأختيارنا ولكن ردود الفعل و تأثيرها علينا احنا بنختاره, فااااااااااااااااااااا من اليوم قررت , اليوم اول يوم اجازه رسمي الي قررت اني ارجع ويسبر القديمه, القديمه يعني قبل 4 او 5 سنين , و مدام انا من جوا مقرره فأكيد ربنا حيساعدني لاني اتغير

قبل كم يوم كنّا انا واخوي بنعمل ال Drive تبعت كل فتره و اجت اغنيه لمحمد فؤاد , انا مش من محبي ولا متابعي الاغاني ولكن ال Drive فيها جزء اسمه DJ تخصص اخوي فلازم نسمع كم اغنيه , الاغنيه لخصت مشاعر جواتي بشكل كبير و سرحت فيها لبعيد بعيد كتير, اسمعوها و ركزو بالكلمات اكيد حتعجبكم ....تصبحو على خير يا احلى الناس :)

اشتقتلو ...

اخواني اللي متغربين من 12 سنه تقريبا ,متعوده انهم كل فتره و فتره يحكو معي تلفون بدون داعي بس سلام وكلام , او ممكن قاعدين مع بعض و تذكرو موقف من ايام الطفوله بحكو معي ليذكروني و نضحك سوا, او ممكن اغنيه بعرفو اني بحبها, او كانت ضاربه بفترة وجودي عندهم والها ذكريات مع بعض, ممكن يتصلو و ما يحكو اشي بس يسمعوني شوي من الاغنيه و يسكرو, لكن من يوم ما اجاهم اولاد -الله يخليلنا اياهم و يحماهم- خفّت هالحركات كتير و حسيت خواني بعدو عنّي, و حكيت هالشي طبيعي مشاغل الحياه, مع انهم ضلو يتصلو عالاغاني و نحكي كل ما اتصلو بالعيله كل اسبوع, لكن بطل في مكالمات خاصّه الي انا, و يمكن هاد اللي خلاني افكر بموضوع شرايه الشقه, و سبحان الله انا كتبت الموضوع من هون اخواني التنين كأنهم حسّو :), امبارح حكا معي واحد منهم و بحكيلي امبارح كنت قاعد مع اخوي و ما بعرف فجأه خطرتي ببالنا, وحكينا ساعه كامله, حكي جدّي عن العيله والاوضاع وبابا وماما و زوجته و حكي ذكريات :)

من الاشياء اللي حكينا عنها الكلمات المتداوله عنا بالبيت, اكيد كل عيله في كلمات بكرروها بمواقف معينه بتخصهم همه بس, مثلا احنا بالعيله بس حد ما بدو يحكي الصح و بدو يعرّف اللي قدامه انّه ما بحكي صح بنستخدم جملة " ما الك علي يمين" بس تنحكى بنعرف ان الكلام خرط بخرط :) , و بنستخدم " أباااااااااااااه" عأساس انه صوت بكى علشان اللي قدامنا يشفق علينا, يعني مثلا اخوي بدو اياني اعملو اشي بحكيلي "يا بااااايه يا ام السوس شو تعبان.... أبااااااااااااااه " بحكيلو "من الاخر...ايش بدك ؟؟؟" :)

وفي عنّا حركة الترميش, يعني بس حد يحكي يعمل اشي و يكون كتير غلط, بنصير نرّمش بقوة و نحكي " ايش في؟؟" , او ممكن بدنا نروح مكان و مفلسين , بنحكي لبعض في وقت ويلا ما في وقت و بنأشر بايدنا اشارة الفلوس - ثني 3 اصابع مع تحريك الابهام على السبابة :) - حتى مرة اخوي صارت زينا تستخدم هالجمل و هالحركات و مرة اخوي الاجنبية صار تحكي "Let us go out or there is no Time" :)

او ممكن نقعد و انا بغرفتي و اخوي بغرفته, انا انادي " عدنااااااااااااااان " هو يرد علي "ليييييييناااااااااااااا" :) لحد ما بابا او ماما يزهقو و يحكولنا خلص ....

الله يخليلي اياهم يا رب وما يحرمني منهم همه و زوجاتهم و اولادهم و يخليلنا بابا وماما فوق روسنا يا رب, و يخليلكم كل اهلكم واحبابكم :)

و بدّي اوصّي كل مغترب...احكي مع اخوانك و خواتك هيك مكالمه الهم لحالهم..ما بتعرفو قديش بتغيّر النفسية و بتبسط هالحركه :)

اشتقتلهم كتير كتير الهم كلهم و لعبود و فروحه, و خصوصا لفروحه اللي سافرت من اسبوعين :( كل شي بالبيت بزكرنا فيها و لهلأ مش قادرين نضب العابها , و كلنا بالبيت بنحكي بطريقتها و بنغني اغانيها, والي فتره بال Gym كل ما اسمع اغنية اشتقتلو ادمّع, هاد وانا من الناس اللي دمعتهم مش قريبه ...جد اشتقتلهم كلهم

زهرتي يا زهرتي

بحب كل فترة وفترة اغير ديكور المكتب ليصير في تجديد نفسيه شوي, من يوم ما سافرت صاحبتي اللي كانت معي بالمكتب و انا مش جاي ابالي اعمل اشي جديد, مع ان اللي اجت مكانها صاحبتي برضه بس في اشي ناقص, الاشي الوحيد اللي بعمله هو تنظيف المكتب و اجيب نوع جديد من المعطر و اغير الالعاب المحطوطين على طاولة الكمبيوتر, انا من محبين تجميع الالعاب من كندر سيربريز :$ بعرف ان عمري 150 سنه بس بحبهم شو اعمل, جديد حسيت اني لازم اعمل شي, فاشتريت زريعه واللي هي عبارة عن وردة اسمها حسب ما روى البياع "عرف الديك" سبحان الله شكلها بجنن وكأنها صناعيه و لونها كتير حلو, وفيها اشي زي المخمل, جبتها و حطيتها بالمكتب و كل يوم بسقيها مع انها باخر موجة شوب حسيت انها تضررت بس ان شاء الله ما يصيرلها اشي, كنت حابه اشتري سمك بس بصراحه خفت من المسؤوليه وخصوصا اني بعطل يومين, و بخاف تموت و ما راح اسامح حالي بصراحه :$

المهم من يوم ما جبت الزريعه وانا كل ما اسقيها الصبح لازم اصير اغنيلها :$ جد مش عارفة كيف خطرتلي الاغنيه مع انها اشي من زمااااااااااااااااااااااااااااااااااااااااان , بس فجأه رجعت :)

انطلاقة مدون جديد...2

مدون جديد...يمكن بتعرفوه من التعليقات

بس برضه حابة ارحب فيه

Sh3rawi

صاحب مدونة

زي الهم على قلبي

انا شخصيا بحب تدويناته كتير

مع انه بعد فترة ما راح يفضالنا

علشان الامتحانات

اهلا وسهلا فيك في عالم التدوين :)

وانا بقرأ بوست في مدونتة بعنوان اصوات ملتزمة

اتزكرت هاي الاغنيه من زمان ما سمعتها

بيب بيب هاريدي

مع الشمس اللي طالعه الها كم يوم بضل يخطر ببالي ايام زمان, كنا ساكنين احنا وعمامي بنفس العمارة, و كان احلى يوم لمّا اروح بكير , يكون في معلمه غايبه و معوضين حصص, و اروّح عالبيت الاقي ماما عالسطوح هي و مرتات عمامي - زوجات عمامي مش عارفه كيف بتنكتب :$ - المهم بكونو بشربو شاي او قهوه.

يا الله ما احلى الشعور, اروّح عالبيت و انا طول الطريق بدعي ادق عالباب وما الاقي ماما بالبيت من غير شر, وهالشي بعني انها عالسطوح.

تكون الشمس مش كتير حاميه, وريحه القهوه معبيه المكان,وصوت العصافير اللي معبيه السطوح, عمو هوايتة صيد العصافير و صيد السمك, السطوح مليان قفاص عصافير, صحيح يا دوب اقعد 10 دقايق و ننزل عالبيت, لكن هالعشر دقائق كانت من احلى الاوقات, وخصوصا لو حد من اخواني او اولاد او بنات عمي مروحين بكير.

كنّا بس يكون عيد استقلال او في مناسبه نطلع كل العيله بالليله عالسطوح بالليل علشان نشوف الالعاب الناريه, كانت بوقتها اشي مميز مش هيك بسبب ومن غير سبب بتنعمل, ومين هب و دب يعملها, من انا صغيره بحب الالعاب الناريه و حتى لمّى كبرت ضليت احبها لكن هلأ بعد ما صارت مستهلكه بطلت انطنط والفلف عالشبابيك لاشوفها زي قبل

واشي تاني بيخطر ببالي اله فتره, بس هو اشي غريب بوقتها و هلأ, في اغنيه كنّا نغنيها كتير واحنا صغار, اغنيه هبوله بصراحه, دورت عليها عالنت و مش فاهمه كيف لقيتها

الاغنيه هيه " هاريدي" :) بيب بيب هاريدي..حيعيط حيموت ..حيقلد الكتكوت

الي كم يوم انا واخوي بالبيت بس نكون صافنين و بنتفرج عالتلفزيون, فجأه نتطلع عبعض و نقلبها عرس بالبيت, وبابا وماما مصدومين من اللي بصير و من الاغنيه :)

وفي جزء بالاغنيه او بالشريط...ايون اشتريت الشريط بوقتها تخيلو :) في اغنيه مين اللي سرق العمود, برضه كانت تحشيش

كنت احب كيف الكورس البنات اللي بعيدو اللازمه او المذهب زي ما بسموه للاغنيه يكون صوت المظرب كأنه بدو يبكي, وصوت البنات كتير مبسوطين

كانت ايام...بصراحه من احلى الايام :)

اترككم مع الغنيه

و بيب بيب هاريدي :)

الصورة ما الها دخل بالموضوع, بس هي كانت من ضمن الاشياء الحلوه بفترتها :)

على البال...

المصدر

قبل فتره كنا انا و اخواني نسترجع ايام زمان والعاب ايام زمان والمسميات اللي كنا نطلقها على العاب ايام زمان

في اسماء متداوله وواضح اسمعها مثل لعبه" السبع حجار", اللي عباره عن فريقين , فريق بضرب الطابه على مجموعه حجار والمفروض يوقعهم و بهرب هو وفريقه, والمفروض ان الفريق التاني يرتب الحجار كلهم فوق بعض قبل ما يرجع حد من الفريق الاول يرد يضرب الطابه مرّه تانيه ليوقع الحجار, والفريق الثاني المفروض يرجع الطابه للشخص اللي بضل عند الحجار يرتبهم وبس توصله الطابه بضربها على واحد من الفريق الاول, واللي بتضرب فيه الطابه بطلع برّه اللعبه , واللي كنّا نحكي عنها برّيييت اللعبه - البطيخه...بعرف الشرح واضح وما بتوّه :)

اللي استغربناه انا واخواني لعبه تانيه كنّا نسميها "علي وط وط" واللي هي عالي واطي , اللي لازم يضل واقف على اشي اعلى من الارض و واحد بلحق اللي بنزل عالارض واذا مسكه بطلع هو على اشي عالي و بصير هداك يلحق العالم :)

من وين جبنا كلمه ؟؟؟ "علي وط وط"

لعبه تانيه" الطمّايه"... واللي بتعني الغمايه او الاستغمايه

اللي واحد "بطم" راسه و بصير يعد للي ربنا بقدره عليه, وبعدين بصير يدور عاللي متخبين و بس يلاقيهم بركض يضرب محل ما كان "طامم" راسه و بحكي "كمستير" وبحكي اسم الشخص اللي لقاه :) وبصير هالشخص اللي كان حظّه يلاقيه اول واحد يتمنى انه ما يلاقي الباقي علشان اذا لقاهم و ولا واحد منهم عمل "كمستير" قبل اللي كان "طامم" راسه بصير "عأمّه" يعني بصير دوره

و ببلش يغني " اتخبى منيح...اجاك الريح" بس يكون اللي كان "طامم" قريب على واحد من المتخبيين , او حتى بعيد كنوع من انواع التوهيم :)

يعني مصطلحات مش عارفه من وين جبناها و متداوله ومفهومه بينا كانت

"جلول" ... "علي وط وط" ...."كمستير"..."عأمّه"..."كمسرت اللعبه" اللي لمّا يحكي "كمستير" ويحكي اسم شخص غير عن اللي لاقاه :)

وايام ما كنّا نلعب جلول بالشتا بغرفتنا, مكان ما لازم نحط الجلول كان مكان حرق جمره وقعها اخوي من ارجيله بابا اول يوم جبنا فيها السجاده :)

والله كانت ايام بتجنن

انتو شو بتسموها؟؟؟

كل شخص فينا بمر بأزمه معينه بحياته

بحس انه خلص ما راح يقدر يستحمل بعدها

طبعا بحكي يستحمل مش يعيش

لانه مهما صار بدنا نعيش و بدنا نستمر

بدنا نتعلم من خبراتنا و قراراتنا ان كانت خطأ او صح

انا كل مره بمر بأزمه

و لله الحمد كتيييييييير مريت بأزمات بحياتي

بقرر اني عمري ما اعرض حالي لاي موقف بالحياه يقهرني او يدايقني

و بحكي اني ما راح اسمح لنفسي ولا لاي شخص بالدنيا يأذيني

و برجع و بعيش و بنسى و بستمر

و بترجعلي ضحكتي و برجع لحياتي الطبيعيه

و برد اعرّض حالي لموقف جديد

او بمر علي ناس جداد او قدام و بسمحلهم انهم يأذوني

الموضوع مش ضروري يكون جرح قلبي

يعني مش حب او اي شي بهاد الاتجاه

لاني سكرت قلبي من زمان

وما راح يفتح الا لصاحب النصيب اللي الله اعلم راح يجي او ما يجي

انا بحكي عن الناس اللي بنواجهم بحياتنا

اللي بصدمونا او بخونو ثقتنا

بننجرح وبنتألم و بناخد قرارات جديده

و بنرجع مرّه تانيه لنقظه البدايه

كأنها دائره مفرغه بندور فيها

اللي بكل بساطه بقدر اسميها

الحيــــــاة

شفتو المطر اليوم ...شكله رجعت الشتويه :)

السنه متل السنه الماضيه تماما, حكو انها راح تمطر الدنيا وانا ابدا مش اني اعمل اشي
و بالصدفه المره هاي كنت بالشارع لما بدت تمطر
لكن الاشي المختلف اني السنه حابه المطر كتير, شعوري و انا بمشي تحت المطر لحتى اوصل السياره كان بجنن معى اني كنت بدي اتزحلق و اواعي تملو مي :)

اليوم كنت مع صاحبتي بالسياره ولانها هي كانت تسوق انا اخدت راحتي بالتصوير عالاخر, مع اني ما بقدر انشر كل الفيديوهات لان صاحبتي العزيزه ضلت تحكي و انا بصور :)

امّوووووون سامحيني اني التهيت بالتصوير وما ركزت معك وكمان بدي اياكي تضلي ساكته :)

المهم طبعا وكالعاده سكرت الدنيا بهالشتوه
الشوارع تملت مي وصارت انهار الاردن بكل الشوارع وضلينا على دوار المدينه قريب الساعا بس كان اليوم كتير حلو بصراحه وما تدايقت بالمره

ابصر ليش حابه الشتا هالسنه, ما بعرف ممكن اغير رأيي بس تبدا تبرد الدنيا لاني مش صحبه مع البرد اطلاقا
بخبركم ساعتها عن مشاعري :)


بس هلأ يا جماعه..... رجعت الشتويه :)

اترككم مع الصور والفيديو

طول اليوم وانا عبالي اغنيه " تحت الشمسيه بلا وعد تلاقينا انا وهي " غبره بعرف :)

صحيح نسيت احكي اشي مهم
شكرا كتير كتير لرجال وستات المرور لانهم زادو الازمه ازمه :)

هي الاغنيه للي ما بعرفها :)

نسوان....

انا اكتر كلمه بكرها بالحياه هي كلمه نسوان
بحبش اللي بستخدمها
يعني الكلمه اللي لازم تستخدم هي ستات
لكن اكتشفت ان في مجموعه من الستات بحس لازم يطلق عليهم كلمه نسوان
النكده الزنخه اللي دايما مكشره اللي بتزهق اللي حواليها وبتسم بدنهم
اللي بتهمل حالها و بتهمل زوجها وبيتها واولادها

فاااااااااااا
هاي الاغنيه مهداه لكل نكده و زنخه بتنكد عاللي حواليها وخصوصا على زوجها العزيز

زمااااااااااااااااااااااااااااان

اليوم فجأه خطر عبالي اغنيه قديمه
وانا بدور عليها طلع معي مجموعه من الاغاني
اللي كان الها صدا بايامها
هي مجموعه من اللي عملو عمايلهم بوقتها
وكانو تقريبا بكل عرس
اتركم مع اللي تزكرته منهم :)


وازا في اشي ناسيته زكروني :)

هاي الاغنيه بناء على طلب احمد المحروق

وهاي الاغنيه لاسماء سم سم :)

وانا تزكرت هاي الاغنيه الصبح ...كتيير بحبها
بتزكرني بايام الجمعه الصبح زمااااان

هاي الاغنيه لدريمي فيلجر



و اول ما سمعتها تزكرت هاي الاغنيه بنفس الوقت كانت

قبقاب غوار

انا بالعاده بس اي شخص يطلع من باب البيت لازم احكيله "جبلي معك اشي زاكي" واهلي بعرفو ان اي شي برضيني, شيبس ايس كريم حبه شوكلت , اي شي بمشي معي المهم انك تزكرتني باشي.

ونفس الشي خواني بس يجو من بره, كل تلفون لازم يا ام السوس شو بدك,يا ام السوس احكيلي لاني راح اجيب اشي فاجيب اشي بدك اياه احسن, دايما نفس الجواب " ما بدي غير سلامتكم" وباخر تلفون قبل ما يجو بحكيله "ازا ما بتجبلي اشي راح ازعل " و بما اني البنت الوحيده فبصراحه عايشه الدور عالاخر, والله يخليلي اياهم كلهم ما بقصرو :)

اخوي بدو يجي باول 10 ان شاء الله, طبعا مش مصدقين حالنا لانا كنا مفكرين انه مش جاي الا عالصيف السنه الجاي, اكيد اشتقناله ولكن اشتقنا لفروحه كتير كتير - بنت اخوي و اول حفيده بالعيله - الصور و الفيديوهات ما بتغني بالمره عن وجودهم حوالينا, امبارح بحكيلي شو قصه الشنطه اللي بدك اياها, حكيتله اي شنطه, بحكيلي الشنطه اللي حكيتي لاخوكي عنها, انا اي نعم بدي بس مش متزكره حكيت لحد, حكيتله ما بجي اشي بدي سلامتكم... بحكيلي من نفسي مره توصيني على اشي محدد, وهالمره حكيت بسحب عليها فيلم بتحكي وهيو ما زبط :")

اليوم اخوي الصغير نزل عالبلد, وهو طالع حكيتله جبلي اشي زاكي معك, و بس رجع جايب كيس و بحكيلي احزري شو جبتلك.....ولما فتحت الكيس و اذ به جايبلي "قبقاب غوار" كتييييييييييييييييييييييييييييييييير بحبه, فوق ما تتصورو, جايب كيسين بعرفني نص الكيس اكلته على طول , انسو اني صرت افتش عاشي مالح بالبيت بعدها , جد انبسطت وتزكرت لما مره لقيت بخزانتي تعريفه - بتتذكروها للتعريفه - نزلت عالدكان اشتري اشي, وانا رايحه شافني اخوي و لحقني و بعدها اخوي التاني و لحقني و بنات خالتي اللي كانو عنا, ما وصلنا الدكان الا احنا 7 :) ولما اعطيت العمو بالدكانه التعريفه اتطلع علينا و حكالنا ككلكم جايين على تعريفه!!! قام اعطى لكل واحد فينا قبقاب غوار , زليتهم انا طبعا, كنت مفكره انه هاد كله بتعريفتي اشتريتلهم اياه :)

الاغنيه ما الها دخل بالموضوع بس زكرتني بهديك الفتره و بالايام الحلوه :)

ليليه بترجع يا ليل

افكار كتيره ببالي
اشياء الها معنى واشياء ما الها معنى
بكره الاحد....يا الله شو بكره اول يوم دوام
جد بحسه بقعد اسبوع ليخلص هاليوم
الله يمشيه على خير
بكره الاحد مناقشه مياسي
موفقه مياسي :)
كان نفسي اكون معهم بس للاسف
شغلي اللي كتييييييييييير بكرهو راح يمنعني اني اروح
يلااا شو بدنا نعمل :(
احسن اشي اقوم انام
يلاا تصبحو على خير