Things I Like To Whisper About

Would You Hear Me Whispering

بلاش سوسو...خد ناديا

في يوم من كل اسبوع بروح انا و2 من بنات خالتي اللي بنفس عمري بحضر درس دين عند محاضره رائعه و كتير بحبها - ما بدي احكي اسمها علشان ما حد يعرف القصه اللي بدي احكيها عن مين, بهيك مواقف سبحان الله الدنيا بتصير كتييييييييييييييييييييير صغيره- المهم في مجموعه من الصبايا اللي اكبر منا واللي اصغر منا بحضرو الدروس وفي خالتو كبيره سوريه بتحضر معنا.

الخالتو هاي بتضلها تقطّع المحاضره وتناقشها ببديهيات وبأمور مكتوبه صريحه بكتاب الفقه اللي بندرس فيه, بس علشان تحكي و ينسمع صوتها, والمحاضره ما بتدايق منها بحكم انها كبيره بالعمر و بتتركها تحكي اللي بدها اياه و بتحاول تفهمها و توصللها المعلومه باحسن طريقه و بوجه مبتسم.

عاده انا وبنات خالتي بنقعد جنب بعض بالدرس واجت قعده الخالتو جنب وحده من بنات خالتي, سمعتها بتطلب من بنت خالتي تلفون البيت ال عجبتيني و بدي ادل عليكي هالعريس, بنت خالتي انحرجت, وما عرفت شو تعمل, اصرّت الخالتو قامت بنت خالتي كتبت الرقم على ورقه و اعطتها اياها.

و احنا مروحين, سألت الخالتو بنت خالتي - اللي اعطتها التلفون- عن طريقنا بالترويحه علشان نوصلها لاقرب مكان يكون قريب لبيت بنتها, حكتلها بنت خالتي انها تسألني انا لاني انا اللي بسوق السياره وانا بعرف الطريق, وبعد ما عرفت عنوان بيت بنتها, تبين انه عالشارع المقابل لبيتنا .

و بالطريق كنت انا بسوق, والخالتو جنبي, وبنات خالتي التنين ورا, وضلت تسأل عن عناوين بيوتنا حكينالها ان انا وبنات خالتي تقريبا جيران, وبين بيوتنا يا دوب 5 دقايق بالسياره, و انا بسوق شايفتها بتطلع علي من فوق لتحت و بتعاين و بتدقق, انا بهيك حاله بحب ابين للي بعمل هيك اني انا شايفته, سألتها في اشي خالتو, بتحكيلي انتي ساكنه مع اهلك - يعني مش متزوجه بمعنى تاني - حكيتلها اه , لفت وجهها على بنات خالتي وبتحكيلهم هلأ انا عندي فكره, بس جاوبوني بالاول, انتو بترضو تطلعو انتو التنتين لما يجي عريس يشوفكم, جاوبوها بنات خالتي "طبعا لأ" و فهّموها انهم مش بضاعه بيجي و بنقي الشب و بختار اللي بدو اياها, حكت يا الله عاد انا فكري يشوفكم انتو التنتين و فرد مره -يعني مره وحده بس بالسوري - بروح بزور بنت خالتكن -اللي هي حضرتنا - بنفس اليوم!!!!

سكتو بنات خالتي مصدومين, حكيتلها انا " شو رايك خالتو اروح انا يومها عند بنات خالتي بالمره يشوفنا مره وحده و حتى هيك المقارنه بتصير اسهل عليه" , بتحكيلي " لأ يا عيب الشوم ما بصير".....انا صرت اضحك وحكيتلها " يا خالتو طبعا انا بمزح, واللي حكيتيه هو اللي ما بصير, وعلشان اريحك انا عن نفسي بحكيلك شكرا كتير الك ما تدلي حد علي انا ما بدي اتزوج...." و بنات خالتي التنين حكو مع بعض " وانا كمان" وفهّمناها إنّا ما بدنا تدل حد علينا, و إنّا ما بدنا نتزوج بهالطريقه,و زواج البضاعه هاد والتنقايه ما بمشي معنا
.


19 التعليقات :

:/شو هالعالم
بتعرفي..مرة سمعت قصة انه فيه شابين أخوة راحوا يخطبوا نفس البنت وهي تختار بيناتهم..بس الحلو انها اختارت واحد واتزوجوا :(

 

لاااااااااا كتير هيك
كيف راح تقدر تتعامل مع اللي ما وافقت عليه بعدها...يعني اخوه وراح يضل بحياتهم :$

 

بعض الناس بفكرو بطريقة غريبة ... وسبب هل التفكير العنصر النسائي
يعني الام بتحكي لابنها ... تعال شوف البنت عجبتك عجبتك ما عجبتك بلاش.
زي شب بعرفو بقلي فيه عروس بدي اروح اشوفها
بدي اعاين البضاعه
وواحد تاني قال اجتو اجاها النصيب وبدو
يجيو اهلو يفاصلو ؟؟
يعني تعابير جارحه ومهينه

 

Ammar

للاسف كتير ناس بعتبرو الزواج زي بضاعه و بدها تنباع و بدهم يحاولو ياخدوها بارخص سعر

بنسو ان الموضوع اولا واخرا علاقه انسانيه بحته, ان هالبنت امانه برقبتهم و انها اللي راح تكون محافظه على شرفه وبيته وماله واولاده للزوج, مش مزهريه بده يصمدها بالصالون علشان تيجي قريبته الفلانيه وتحكي عنها احلى من كل بنات العيله

 

يعني فكرك الخالتو بتحضر الدرس عشان تتعلم
بكل بساطة شافت انه في بنات كثير و حكت لحالها: فرصة و لاحت بدل ما بنت واحدة بالمرة الواحدة بتشوف المجموعة كلها مرة واحدة و بتنقي على كيفها
بتفكر انه هالحركات مش مبينة :)

 

هاي ممكن نسميها ... الغباء الاجتماعي
كون الزوجه هي الي بتشكل شخصية الابناء
واذا كانت بنفسيه سيئة حينعكس عتربيتها لاطفالها

 

Mohammad
للاسف ممكن كتير يكون معك حق :$
بس المشكله ان هي شخصيا عندها بنات ومتزوجات, ما بعرف ممكن تكون زوجتهم بنفس الطريقه وخصوصا انها قعدت نص ساعه تقنع اللي بتعطبنا المحاضره انهم ما بطلبو مهر للبنت و المحاضره تحكيلها ما بصير مكتوب بالعقد على مهر وقدره وهو شرط اساسي بالعقد, بتحكيلها لأ ما كتبنا اشي.....بتعرف هلأ شو خطرلي :)
معقول كاينه بس بدها تسمعنا الخالتو هالحكي
مش بعيده عليها هههههههه والله ما انت قليله يا خالتو :)

Ammar

صح بنحكى عنه غباء اجتماعي وللاسف كتير ناس بعانو منه هالايام

 

ههههههه
وجيبيي كمان باقي قرايبك البنات وبالمره ما هو سوق وماشي!!!

اشي زي سوق النخاسه ولا مؤاخذه مع احترامي؛ زي لما كانو يعرضو الجواري زمان

ويا ستي المهم انو يجيبو وحده يقاهرو فيها العالم وينحكى فلان جاب

مش المهم شكلو حد يتجوز وينستر

اللهم عافينـا

 

بتعرفي هالموقف صار مع احد الناس اللي باعرفهم اجا الخاطب وشاف خوات 2 واختار وحده منهم بتصير كتير والاسف من خوف الاهالي انه بناتهم يعنسوا فبيقبلوا بامور عن جد مهينه للبنت ولكرامتها

 

looooooool
wala eshi!!
Nafs el ta3leeq elli btesta3melo sa7ebti :-D Balash susu... 5od nadia!!
2aaaa55555 men hadi el 2esas...
bte3rafi ween el moshkele? Sayyadat el 3arayes ma bye3te2uki... o betla2eehom 7awaleeki wen ma kan... o belzat be droos el deen... ma ba3raf leeh ma bye6la3 men ras-hom el mawdoo3???
Walla el 7ayah bedun hadi el 2esas 2a7la o as-hal... 7elu enno el wa7ad lamma yla2i tneen lay2een laba3ad ywaffe2hom, bs lamma ykunu LAY2EEN LABA3AD, o kawno huwwe shab o heyye benet mesh sabab kafi mshan ylee2u la ba3ed :-)

 

مياسي

اه ونصف قدمه و مع كل وحده شهاده ميلاد وصوره شخصيه و شهاده خلو امراض وحسن سير وسلوك :)

بالزبط, يعني لو بدي اموت على عريس ما بعملها :$
امين يا رب

Sozan

كيف العالم بعملو هيك ببناتهم :(
يعني كيف بدو يحترمها ويقدرها وهي مبينه مش غاليه على اهلها
الله يسامحهم

Naryat

allah wkelek bkeol makan lazem wa7deh teqtare7 w te3red 5adamat-ha bhalmawdoo3...la2eno beddo wa7deh bmwasafatek...6ayeb keef mwasafatee wma 7akete m3e kelmeh,dayman shaklan elmawdoo3 bekoon 6aweleh,lonha mesh 3arfeh shooo whalsha3'lat...

 

والله احلى شي مسرحية سك على بناتك :) مش بكفي عنده شقة مطرحين و صاله و عفشة ميه !!!
يعني اكتر من اللي قاله عمار ما في ... طريقة جارحة ومهينه للكرامة ...استغفر الله بهاد الوقت صار الواحد يقول لو انه بيعرف حدا براني احسنلوا من بعد هالمصايب اللي عم نسمع عنها و بصراحة اكتر عم نعيشها !!!
و احلى شي لما تقبلي تشوفي حد انتي عارفة انو مو مناسب واجيانا ( معفن) و بالأخير ما تعجبيه !! يعني رضينا بالبين و البين ما رضي فينا ...
في اقتراح كان لازم اقترحتيه انو ياخدكم التلاته و بتعملوا عرض يعني تنزيلات شو رأيك ؟؟؟

 

بتعرفي هي الجملة بالزبط (بلاها سوسو خد ناديا) انا سبق صار معي موقف وقلتها لأمي !
أجت عنا ست بدها عروس لأبنها وكانت شايفة اختي .. بوقتها اختي كان بعد كم يوم كتب كتابها .. لما قلنالها هيك ..ولا بتقول طيب اختها التانيه خلينا نشوفها
يعني ما حبت تطلع من عنا ايدها فاضية !

عنجد اسلوب فيه اهانة وتقليل قيمة ..كلو كوم و قال بيجي عريس الغفلة و بدو يشوف ( كشف هيئة )و يطلع يقول الرد من عنا !هي كوم لحالها

الله يهدي الناس ويكبر عقولهم

 

Maroo

انا حكي لماما انا هالطريقه بكرها ويا انا بتعرف عالعريس و بيجي عالبيت للامور الرسميه بس يا ما بدي اتزوج
وانا وهي بنعرف اني مش من هالنوعيه :$
بس جد بكره هالطريقه

انا علشان هيك بطلت استقبل حد بالبيت نهائيا وخصوصا اللي في الي وجهه نظر تجاهه, اي نعم كل العالم خير وبركه بس ازا مش عاجبني ليش يجي عالبيت؟؟؟

هههههههههه اتزوج تنتين تحصل على الثالثه مجانا
بدنا نحل ازمه المهر والزواج ما احنا :)

همسة

مرات بكونو الناس مش قصدهم اشي سيء بس التعابير والتصرفات بتخونهم, يعني في ناس ما بصدقو يشوفو بنات عالم وعيله و ما بدهم يخسرو هالتربايه بس التعابير المستخدمه مرات كتير بتكون مش حلوه :(
اميييييييييين يا رب

 

من الاصل ما كان لازم تفتحولها المجال لتحكي

انا من بداية القصة ما استظرفت هالخالتو

ولو محلك ما كان وصلتها من الاساس

 

طيب وشو الحل لهيك ناس ؟!!

والحل الك ولكل البنات كمان بهيك حالة

في اهل بقبلو على بناتهم

وانا بعرف كمان بنت خطبها واحد , قبل كتب الكتاب عجبها اخوه
ومش عارف كيف اخوه حبها

راح تنازلو عنها المحترم ... وخطبها التاني
وهلا عندهم بنات من عمري
;)
شو رايك بهالوضع
لسى اللي حكيتي عنه ارحم
:S

 

Ahmad

ما انت بدرس دين وبدك تكون نفسك طيبه و تعمل خير مع العالم, لسا بموود الدين كنا
بس هي الله يسامحها زودتها :$

eNAS
والله ما لنل عارفه شو الحل يا انوسه!!!

المشكله انا بكون لاقيه الموضوع كبير , بس من التعليقات والقصص اللي بتكتبوها بنصدم ان اللي صار معي ولا اشي بالنسبه للي بصير مع العالم
يعني ما نلومها الست لانه في قصص كتير شكله من هالنوع والعالم ما بفرق معها
جد كتير ارحم :$

 

عجبني العنوان هههههههههههههههه

عن جد العالم مسطلة

 

SimSim </b
ما لقيت عنوان انسب لانه بالزبط اللي صار :)