Things I Like To Whisper About

Would You Hear Me Whispering

ربيع وادي السير



من ضمن فعاليات النادي اللي كنت اروح عليه في رحله تحت شعار " افلا تتفكرون..." و كانت لمنطقة بوادي السير قريبه من عراق الامير, هي زي حديقه لو الاهتمام فيها كان اكبر كان طلعت بتجنن, مي و خضار و لكن قلّة نظافه كبيره, او يمكن مقصوده لتصير مكان للطحالب و الضفادع !!!! مش عارفه المهم انّه كان يوم حلو كتير قضيته مع مميتي و مع خالتي وبنت خالتي رفيقات النادي :)




بداية كانت بصلاة الضحى قبل الانطلاق






هاي ملبسة وزعوها علينا و حكولنا انها من "الضفة"
على زنجبيل وانا بحب اي شي من الضفة و اي شي على زنجبيل :)


كل شي كان بجنن و الحمد لله, الفطور و الغدا كان مشاركه, كل وحده بتجيب طبق و بنحط كل الاطباق و الكل بياكل من كل شي
مميتي كانت عامله كبة بالصينيه
وانا جبت حلو من عند عرافات " قراقيش"

و كل شي كان تمام
لعند ما اجت الاخت و ما لقت غير تقعد جنبي و تعكنن علي :(





هالسحسيله الكبيره من يوم يومها بتلفت نظري و نفسي لو انها كانت على وقتنا
و بما انه ما حد كان موجود حواليها غير انا و بنت خالتي و ولدين صغار
فااااااا
استغليت الموقف :)

صورة من فوق للتذكير :)



صوت الضفادع كان كتير قريب ومش عارفه من وين
طلعو الاخين عم يتشمسو وراي بالزبط :$




لنكتب عن "اسباب تأخر سن الزواج....مع ام ضد " في شهر ايار


هلا ما في خلاف ابدا على ان الزواج نصيب و شي مكتوب من الله سبحانه وتعالى و ما في شي ممكن يغير هالواقع, يعني لا تلحلحي ولا تزبطّي ولا تجملي واللي بالعربي بتعني اكذبي و نفس الشي للرجال برضه, هو نصيب

انا عمري 34 سنة ومش متزوجه و هالشي يعتبر طبعا تأخر في سن الزواج ...ماشي تأخر كتيير في سن الزواج من وجهة نظر بعض الناس ....و قد يصل الى مصيبه من وجهة نظر بعض الناس التانيين مثل عمّاتي مثلا :)

هلأ من تجربة شخصيه, انا ما عندي مشكله والحمد لله, انا انسانه ما بعمري عملت علاقات و طول عمري ماشية صح و اعتقد ان من ابسط حقوقي اني اتزوج شخص انا مقتنعه فيه 100% و مع اني اقتنعت باشخاص و بعدين اكتشفت انهم سيئين وهالشي كان ضمن حدود الارتباط و علم الاهل, لكني لسا مصممه على انتظار الشخص المناسب اذا في نصيب.

بعرف ان ظروف الحياة صعبه وهاد سبب رئيسي من اسباب تأخر الزواج و الحياة بهالايام قليلا ما تقدر عيله تعتمد على راتب شخص بالعاده في جزء كبير من الشباب بفضلو الزوجه اللي بتشتغل و بشغل ثابت و افضل المرشحات بكونو المدرسات و من بعدهم موظفات الحكومه, موظفة الحكومه دوام قصير و اجازات سنويه و اجازات امومه و اجازات مرضيه و المدرسات بزيد عن هالشي الاجازه الفصليه و الاهم الدروس الخصوصيه اللي ممكن تكون دخل جديد للاسرة, طبعا هاي طريقة تفكير ناس معينين وما بنقدر نعمم ولكنها موجوده و بكثره, و لكن هلأ التأخر عم وشمل الكل, حتى المدرسات و موظفات الحكومه , ما بعرف هو الوعي زاد بمعنى تكوين اسرة و التفكير بكل التفاصيل؟؟؟ و يلا المهور غليت؟؟ و يلا الكل بدور و ببحبش على نصه التاني بمنطقيه اكثر من قبل؟؟؟ ويلا الشباب و البنات صارو يحسو الالتزام صعب و مقيّد للحريه؟؟؟؟ ويلا تأثير اللي بنادو بحريّة المرأه و رفضها للوقوع تحت تأثير "سلطه " الرجل؟؟؟؟ شباب عاملين عمايلهم و مش قادرين يقتنعو ان في بنات مناح؟؟؟ اسباب كتيره كل وحده بدها ادراج لحاله.

اللي بعرفه من تجربتي اني مش مع التأخر بالزواج لعدة اسباب, منها ان التأخر بالزواج بعني ان المعايير تغيّرت صحيح و لكنها برضه بتصير مهمه و الها اولويه والتنازل عنها شبه مستحيل, و بتصير فرصه انه "بكره بتغيّر" معروفة انها مستحيله مع قناعتي التامه بانه ما بصير اي وحده او واحد يتزوجو على امل تغيّر الاشي او العاده الغير محببه في الطرف التاني, المفروض الموافقه على الارتباط بشخص انها تكون كامله و بظروفة و عاداته و شكله الحالي و بدون اي وعود شخصيه للنفس بتغيير اللي قدامي ليصير يعجبني.

اشي تاني و هو الاولاد...التأخر بالنسبة للبنت و للشب الكتير بعني انك راح تخسر وقت مع اولادك, الاعمار بيد الله اكيد و القصد مش انتهاء العمر لا سمح الله, القصد هو انك تلعب مع ابنك و انت بال 30 غير عن ال 40 و غير عن ال 50 و انك تحاول تقرب من ابنك بكل فتره من عمره لازم الفجوه العمرية اللي بينكم ما تكون قريبه لحتى يتأكد انك ما عم بتجاريه وانك صح حاسس فيه, مع ضرورة لفت النظر هون لان مش كل الناس هيك, في ناس مهما كبر عمرها روحها بتضلها صغيره و بتقدر تتأقلم مع اللي حواليها بغض النظر عن عمرهم, زي ما في ناس بالعشرينات و الثلاثينات و بتكون نفسيتهم زي اللي بالثمانينات و التسعينات

و اكيد في امور تانيه يا ريت تشاركونا فيها انتو كمان و تحكولي رأيكم بوجهة نظري :)

ملا حيظ على الهامش

هذا الموضوع مشاركه في لنكتب عن "اسباب تأخر سن الزواج....مع ام ضد " في شهر ايار يلا كل واحد و وحده يكتبو عن الموضوع , ما بدنا نوقف هالفكره ...لسا بكير لنتكاسل عنها ويلا شو رأيكم ؟؟ :)

الموضوع جهزّته من فتره و هلأ لان في نت قدرت انشره....الحمد لله

انا اسفة على التأخر بالردود و على التأخر بقراءة ادراجاتكم, ان شاء الله خلال العطله هاي راح امر عليهم كلهم و بدي احكيلكم عن اخر اخباري :)


شكرا لكل اللي لسا بزورو مدونتي بالرغم من غيابي , العداد و بالرغم ان ما في شي جديد من فتره ما نزل عن ال 70 زائر يوميا :) شكرا الكم

A new expatriate joined the club :$




بتتذكرو اول ما رجعت من الامارات حكيتلكم عن مقابلة عملتها بالاردن, الحمد لله استخرت و الامور مشيت وهيني بالامارات :)

الله يجيب اللي فيه الخير ان شاء الله....باب جديد فتح و حكيت اتوكل على الله و اجربه

اشتقت لماما كتيييييييييييييييييييييييييييييييييييييييييييير بس ان شاء الله شهر زمان وبدها تيجي لهون زياره

في سكن مؤقت حاليا و اللي معي بنت لبنانيه بتجنن ومن اول ليله ما نمنا و احنا نتحدث , ان شاء الله تستقر الامور بسرعه

ما في نت ولا تلفزيون حاليا, هالبوست بكتبه عالسريع من بيت اخوي فاذا تأخرت عليكم هون او بمدوناتكم فاعذروني :(

زوجة اخوي و عبود و ايفيلين مسافرين عند اهلها و لسا ما شفت اخوي التاني و فروحه ونور واللي نهاية الاسبوع مسافرين على الاردن , سبحان الله كيف بيوم وليله صار اللي بسافر عالاردن يعني ببعد مش بقرب :(

حاليا النفسية شبه زفت مع شوية فرحه بتجربه جديده, وجود خواني ولله الحمد كتييييييييييير مريح, ممكن انتو بتفكرو اني اخترت الغربه و لكن هي كانت شبه اجباري لاني ما بدي استقيل من الشغل لسبب معين و لهيك ما بقدر اشتغل بالاردن فلازم اشتغل بره, مبدئيا المقرر سنه و بعدين بشوف شو بصير معي

ادعولي......نراكم :)

Happy Birthday Naysaaaaan :)




كل عام وانت بالف خير يا احلى نيسانة تدوين بالعالم

العمر كله يا رب تقضيه بالخير
وربنا يطول بعمرك لتشوفي الاحفاد و تفرحي فيهم

وجودك يا نيسانة التدوين بينا خلّى هالعالم الافتراضي احلى باضعاف

ربنا يديم المحبه بقلوبنا و دائما يجمعنا عالخير


من هنا و هناك



قبل كم يوم بابا كان بسقي الزريعه بالاحواض على البلكونه
وشاف حمامه قاعده و ومش راضيه تتحرك
فعرف ان اكيد قاعده على عش و اكيد في بيض بالعش لهيك ما تحركت
بابا بسقي الزريعه يوم بعد يوم و تفاجأ بس شافها
بيوم و ليله كانت مستقره المسكينه



و فعلا تاني يوم الصبح بكير كانت الحمامه رايحه تجيب اكل كأنه
و شفنا العش
بابا حطلها علبه فيها مي و علبه فيها قمح
وحكا فداها الزريعه اللي بالحوض لانه ما حيقدر يحرك او يسقي شي بلاش يبرد البيض




هاي الصورة قديمه
كنت ماخدتها لبوست رد على بوست شيشاني و العاب هيّوم
و التبادل الثقافي اللي كنت ناوية اعمله بيني وبين هيام :)




هيك بكون شكل الليست بس تخلو حد مش عربي يكتبلكم اياها :)
ترجمو يلا :)




حد بدو يشتري "بكم" يا جماعه ؟؟؟



و بما اني بموضوع الجرايد خليني افرجيكم كم من خبر لفت نظري اليوم بجريدة الغد
بدي اترك تعليق بسيييييط
ويكون بعلمكم
سمعت ان اللي ورا الشمس بشكو من الزحمه و من الشوب هالايام
ونوم برّه البيت ممنوع عنّا ...خالتي مش خالتي برضه ممنوع :$






شيكات ما شيكات وكم المبلغ ما الي ....ان ما بحسد.....انا بس بقرّ
لكن اللي خطرلي
يا ترى السياره وبنزينات السيارة اللي راح ال "شخص" فيها عحساب مين بالزبط؟؟
و هل ال "شخص" هاي هي وظيفته اللي بياخد عليها راتب؟؟؟


طيب
O_o استفدنا


جزء من مقالة "هذه مجرد بداية" نقلا عن جريدة يديعوت احرونوت

مش المفروض كانو 4 !!!
ويلا المفروض "نشكر" اللي حاولو قتل الكرامه في "الكرامه" على غيابها!!!


يوما ما سنجتمع هناك



الي فترة نفسي احلم بالرسول صلى الله عليه وسلم, و لكن للاسف ما تحققت امنيتي شكل الدنيا ماخدتني كتير , اخر مرّه حلمت برسولنا الكريم كانت قبل كم سنة وكان من اجمل الاحلام.

انا اكبر امنياتي بالحياة ان ربنا يحسن خاتمتي و اموت شهيده - ربنا يكتبلي اياها و يكتبها لكل شخص بتمناها - حلمت اني استشهدت و ان جميع الشهداء نايمين على تخوت زي تخوت المستشفى و بتحركو باتجاه باب الجنّة و عالباب بستنانا رسول الله صلى الله عليه و سلم و برحب بالروح اللي بتقوم من الجسد اللي بضل نايم عالسرير, اللي قبلي قامت روحه و رسولنا ضحكله و دخلّة على الجنه و اجا دوري, اجيت اقوم ابتسملي رسولنا الكريم و أشرلي بايده انّه لسا استني مش هلأ دورك

قمت مبسوطه كتير من الحلم, انا فسرته على انه ان شاء الله راح اموت شهيده ولكن مش هلأ و كتييييير انبسطت , الكل حس الحلم حلو الا وحده من صاحباتي بتحكيلي هاد دليل انك مقصره بشي لهيك ما دخلتي الجنه بالحلم , انا مش مع تفسيرها والله اعلم و خصوصا اني قمت مرتاحه و ان رسولنا الكريم كان ببتسملي

دائما بحكي لماما اني حاسة اني حموت صغيره و خصوصا اني مش شايفه ولا عمري تخيلت حياتي لقدام, مع ان كل اللي صار معي برضه ما كنت متخيلته ولا بعمري حفكر يصير و لكن برضه في شعور غريب بضل يجيلي و مع الاحداث اللي بتصير ومع موضوع الانتفاضة الثالثه هالشعور صار اكبر, حسيت انه ممكن تتحقق امنيتي, و طبعا بعد هالكلام ماما رافضة رفض تام اني اشارك باي فعاليه بتصير و حتصير, و بتحكيلي الدعاء مفعوله كبير ادعي ربنا ينصر الشعوب في كل مكان و ادعي للي راح يشاركو ربنا يوفقهم واقعدي عالنت و اكتبي اي شي بدك اياه و شوفي كل الفيديوهات و انشريها ولكن اكثر من هيك ما تفكري

فللاسف مشاركتي اللي كنت اتمنى تكون فعّاله و مؤثرة في التغيير راح تقتصر على اي شي ضمن حدود البيت....ربنا يجعلنا دائما من المغيرين للافضل و من محررين الاقصى الشريف, وربنا يجمعنا في صلاة جماعه في المسجد الاقصى عن قريب و يتقبلنا و يرحمنا و نكون في اعلى مراتب الجنه باذن الله.


يا كاتب التاريخ مهلا

ياكاتب التاريخ اسمعني وقل لي ما الخبر
.. هل راح عهد النصر أم ولّى الظفر.. ؟؟!


خالد ينادي ، أين سيف ابي بكر ..؟!
وابن الزبير اراه يبكي من قهر..

عذرًا رسول الله ...
إذ ليس فينا عُمْر..

ياكاتب التاريخ مهلًا لا تغلق الصفحات..
أحفاد خالد قد اتوا ومحمد ما مات ..

يا كاتب التاريخ مهلًا لاتغلق الصفحات ...
احفاد حمزة قد اتوا ورسولنا ما مات رسولنا ما مات..

اني أراهم قادمين ويحملون مصحاف الجيب الصغيرة .. يقرأون .. يرتلون.. يرددون .. الله اكبر ومحمد ما مات


أنى أراهم قادمين.. يسبحون .. يمجدون.. يرفعوا أكفهم لله بعد الصلوات.. يهللون.. يمجدون .. يكبرون

الله اكبر و محمد ما مات

إننا أبناء سعد إنما دماؤنا وفيه وإذا دعا داعي الجهاد فإنما أرواحنا هدية
إننا أبناء حمزة إنما دماؤنا وفيه وإذا دعا داعي الجهاد فإنا أرواحنا هدية

وليشهد التاريخ دوما أن غزة حرة أبيّة




يا مركب رايح عالعقبه...2011




الفتره اللي غبت فيها اولها كانت كتير حلوه و بدت بسفرة عالعقبه بدون تخطيط, هو اي نعم كنّا انا و بنات خالتي مخططين على زن مشترك بالبيتين لحتى نقنع البهبهات و لكن فجأه وبدون مقدمات وبس يأسنا قررو انهم يروحو يحجزو :)

هلأ احنا اكيد بنحب ان الاباء والامهات يروحو معنا ولكن حاولنا على موضوع نروح بنات لحالنا ما وافقو الاهل و الفكرة كانت مرفوضه فحاولنا نروح مع الامهات لحالهم برضه كان القرار ان الكل يروح ولكن تقادير ربنا انها تزبط

زوج خالتي - الله يرحمه - كان في بداية مرحلة التعب و قررو الاهل انهم ما يروحو و لغو حجوزاتهم و ضلت حجوزاتنا انا و بنات خالتي ال 5 و زوج و اولاد وحده فيهم :)

الرحله كانت كتيييييييييييييييييير حلوه و بكل تفاصيلها حتى المزعج عشناه و قررنا ننبسط فيه و مشّينا حالنا بكل الظروف و الحمد لله كانت رحلة موفقه من اول دقيقه لاخر دقيقه و احنا بنضحك , وبجانب البحر و الغروب و الطقس اللي بالصدفه كان اكثر من رائع اولاد بنت خالتي خلّو الرحله متكاملة و بتجنن

الفندق كان اله ترس بيكشف المنطقة كلها و البحر و الاضواء والغروب كان شي خياااال مع جلسة تحدوت - احاديث - و شيبس وعصير و شوكلت و بسكوت دمار كانت و ما بتتنسى, و بعديها رحنا نتمشى بالسوق و تعشينا بمطعم اسمه "تتبيله" , كنا ناويين نروح على "تشي تشي" ولكن كل المطاعم كانت فل و هاد كان مكتوب عليه قريبا في "عمان" فحبينا نجربة قبل ما يوصل للعاصمه ;)

واكيد اهم شي تواصي ماما و خالتو من المكسرات من محبوب الجماهير "محمص الشعب" :)

اتركم مع الصور و انتظرونا بصور الرحلة الربيعيه التانيه اللي رحناها الثلاثاء الماضي :)



الحيط بواحد من مطاهم الفندق كان كلّه تواقيع و كلام
ما فهمت اشي بس منظره حلو















شو بالنسبة...8





شو بالنسبة للناس اللي بربطو ولادهم وهمه ماشيين بالمول؟؟
جد مش منظر بالمره وما في اي مبرر بالعالم بسمح لانسان انه يربط ابنه زي الحيوان و خصوصا زي الست اللي شفتها اليوم اللي مش ناسية تطلع بكامل اناقتها ولا ناسية الميك اب ولا ناسية الاكسسوارات وماشيه بتحكي هي واللي معها و "بتجر" بنتها جر بالحبل وراها, انا انصدمت وماما انسم بدنها من المنظر, حاولت اصورهم و بدون ما ينتبهو ما عرفت و من 20 صوره هاي اوضح شي للحبل


كان نفسي اخد الصورة هيك عيني عينك او اروح واسألها عن رأيها باللي عاملته و اصورها علنا مدامها موافقه عليه بس ماما حكتلي بدكيش وجع الراس مع انها حبيبتي مميتي ضلّت تراقبلي اياهم لاقدر اصورهم وخصوصي ان معها شحطين - اه مش ححكي رجالين لانهم بس كأنهم حرس للام و بلفلفو حواليها - البنت كتير هادية دخلو على اكثر من محل و وقفو يتحدثو ولو انها مخرّبه كان خرّبت الدنيا و كل العالم بالمول كانو منصدمين من المنظر, لان حضرة الام بتجرها جر وراها و بتشدها مش حتى انها ماشية جنبها.

بدكم تحكو البنت كثيرة حركه....هالشي افضل من انها تضيع.... اي سبب ما ببرر هالشي, هاد رأيي, مش عارفه تسيطري على بنتك؟؟؟ انضبي ببيتك و لتتعلمي كيف تخليها ترد عليكي بتصيري تطلعي امّا هالمعاملة و هالمنظر فمرفووووووووووووض تماما.

هالمنظر و للاسف صرت شايفته اكثر من 5 مرات بالمول بالذات ,و العالم فخورة باللي بتعمله كأنه موضه و مسكو فيها زي باقي هالموض اللي اكلت عقولهم, كأنه نوع من انواع تطور التربيه و همّه بتبعوه, مش انه اشي فاشل و ما بنمّي عند الطفل غير التعود على الذل و المهانه .

الله يهديهم بس شو بدنا نحكي


خلص بكفي....خنقتوني




موضوع الزواج كتير كبير و كل ما كبر العمر الموضوع بكبر اكثر, و اللي بكبر معه الضغوطات المرافقه اله الضغوطات الشخصيه و التفكيريه الخاصه في نفس الشخص و الاسؤ الضغوطات اللي بتصير من الناس

الناس بتفكر بما انك كبيره بالعمر -من وجهة نظرهم لاني مش حاسه حالي كبيره ابدا او عالقليله بالكبر اللي بحاولو يحسسوني فيه - فانتي بس يجيلك عريس فمش طبيعي تحكي انك بدك تفكري او لا سمح الله تحكي انك مش موافقه, العالم ما بتفهم ان سبحان الله الموضوع ارواح و بتتلاقى او بتتنافر, يعني بس الشب يكون ممتاز وما عليه عيب وانا هيك شايفته بس ما في "قبول" يا جماعه ارواحنا ما تلاقت مش قادره اوافق و الكل يقوم يثور عليكي بطريقته

الاب والام و بكل هدوء مصطنع...."زي ما بدك بابا بس انتي خدي وقتك بالتفكير" يعني ضلّك فكري مدّه اطول وقرارك مش مقبول...., "يا ماما يا حبيبتي مش انتي نفسك يصير عندك ولاد و الك فتره مزهقتينا بقراراتك الغريبة عن تتبني و ما تتبني ؟؟؟ تزوجي لحتى يجيكي ولاد" يعني برضه قرارك مش مقبول و فكري اكتر

المحبطات من العائله..."انتي بتفكري حالك بتصغري و اذا اليوم اجالك واحد بكره ما حد بتطلع بوجهك" عأساس الاخت بتمسك حجر الواقع و بتطبشني فيه و بكل اخلاق رفيعه و عأساس هيك بدها مصلحتي

قريبة تانيه " يا ويسبر يا حبيبتي العمر بمشي و بكره بيجي يوم بتكبري ولحقي حالك جبيلك ولدين قبل ما تروح عليكي" عأساس الاخت بتعرف بالغيب و بتعرف شو راح يصير معي و هي اللي بتحدد كم ولد وكم بنت ربنا بدو يرزقني

و وحدة ثالثة بتحكيلك " انا اكبر منك ب 5 سنين و هلأ انا ما بحلم يتقدملي واحد مش متزوج مره و مرتين و عنده ولاد او حتى ببداية الخمسين.....و انتي بتفكري يضل شكلك نفس هلأ بعد سنتين تلاته " الله يكئب اليهود على هالقعده يومها كئبتني عشر اضعاف الكآبة اللي كنت حاسه فيها

الموضوع مش ناقصه ضغوطات, انا بعرف اللي بتحكوه وحاسة فيه, الساعه البيولوجية اللي اكلتو راسي فيها بتك بداني انا فشكرا لمشاعركم الطيبه, عندي ايمان تام بانه الموضوع بايد رب العالمين و اذا الي نصيب بشي راح يكون بوقته و بدون اي تغيير او تأثير مني, الشب منيح والله منيح بس في شي ما بنحكى بالكلام شي بنشعره , و بعرف ان طبيعي العريس يكون مش محبوب باول كم لقاء و لكن في مشاعر ما بنقدر نتجاوزها, القبول و الارتياح كتير ضروري, وبعد ما فكرت و استخرت 50 الف مرّه و بعد ما قعدت مع العريس و اللي جد جد جد ممتاز بكل المقاييس و بعد ما نمت موافقه صحيت الصبح و اول شي حكيته لماما بس فتحت عيوني " ماماااااااااااااااااا ما بدي :(" الموضوع مش دلع ولا زناخة مخ الموضوع اني انا فاهمه و حاسه و عايشة اللي بتحكوه و برغم كل هاد ما قدرت اوافق فتخيلو !!!!

فمن شااااااااااااااان الله خلص تضلو تضغطو علي لاني زهقت و كرهت الموضوع
والله انخنقت ....جد انخنقت :(


ملاحظه ع الهامش

العالم هاي كلها عرفت بالموضوع لان اخت العريس و العريس ولانهم ذوق اجو عبيوت الاجر ...العالم ذوق جد ذوق بس يا جماعه مش قادره :(




كلنا ليلى ام كلنا أمل....نحن من نختار / كلاكيت تاني مرّه


للاسف ظروف الحياة و مشاغلها ما خلتني اقدر اشارك بكتابه ادراج عن موضوع "المعاقين و المسنين...نحن معهم ام عليهم" و حتى اني فكرت اعيد نشر هالادراج اللي كتبته في 2009 كمشاركة ب "كلنا ليلى" وقتها و برضه للاسف ما فضيت
فحبيت اشاركم فيه هلأ و لو متأخر ومع ان في جزء منكم قرأوه بوقتها...

____________________


امل زميلتي بالعمل, تعرفت عليها لمدّه شهر فقط لانني انا كنت بديلتها في العمل, و لكنني كنت اراها كل فتره قد تمتد احيانا الى اشهر عندما كانت تأتي لزياره صديقاتها بالعمل, واللاتي اصبحن صديقاتي بعدها وعن طريقهم اصبحنا صديقتين.

اكثر من روايه سمعتها عن قصه صديقتي امل و اكثرها تداولا بالرغم من شح التفاصيل الدقيقه , انها بدأت وهي في الثانيه عشر من عمرها, عندما حصل انتفاخ غريب في رجلها, شك الاطباء بانه مرض خبيث و اوصو بضروره بتر الرجل كامله حتى لا ينتقل المرض الى باقي الجسم, و بعد البتر اكتشفو سؤ تقديرهم و تشخيصهم للمرض....

و هكذا منذ الطفوله عاشت امل برجل واحده و بلقب ضل معها حتى انه كتب على الصندوق الخلفي لسيارتها " احذر السائق مقعد ", بعد فتره من الزمن بدأت امل تتعود على استخدام الرجل الاصناعيه, و اكملت دراستها بالمدرسه و انتسبت الى الجامعه وكانت من المتفوقات.

لا اذكر انني سمعت امل تشتكي من وضعها الا مرّه واحده, وكانت اول مره ارى فيها رجلها, كان الصيف على غير عادته حار جدا , و قد بررت تأخرها بزيارتنا بسبب الحر, لمناها و اخبرناها بان تلك ليست حجه و هي امل التي لا يقف شي بطريقها, كشفت لنا امل عن ساقها لاكتشف بان البتر كان من منبت الرجل, يصل الى منطقه الحوض, وقد ظهر اسفل الشريط الخاص بتثبيت الرجل تقرحات و جروح عميقه, عرفنا بعدها بان حر الصيف و احتكاك الرجل الصناعيه هي السبب في تلك التقرحات, وبانها معظم ايام الصيف تقضيها في البيت لانها تضطر الى تقليل استخدام الرجل الصناعيه.

علاقه امل بوالديها علاقه وطيده جدا, تزوج الاخوان و تزوجت الاخوات ولم يبقى الا امل, والتي كانت قويه الشخصيه بحد يلفت النظر, واحيانا كانت جريئه بقدر يتعدى الحدود بقليل وكنّا دائما نعذرها لاننا نعتقد بان اصابتها هي المنبع الحقيقي لتصرفاتها, وبسبب كبر عمر الاب و مرضه فكانت امل هي عينه و يده ولسانه في كل ما يخص حياته, و توالت السنين وسمعنا ان امل تكمل دراسه الماجستير وانتقلت الى التدريس في كليه معروفه.

وصلت امل الى سن يصفه الناس من حولنا بانه سن " العنوسه" - لا ادري من وضع هذا القانون ومن حدد سن الزواج سواء للفتاه ام للرجل؟؟ ومن اطلق هذا المسمى وما من اي جذر استنبطه؟؟؟ - لنعود الى امل, في يوم هاتفتني امل على غير عاده, حيث انني اعرف اخبارها من صديقاتنا او من زياراتها للعمل, اتصلت لتدعوني الى حفله عرسها .... كان والدها يملك دكان وكان يريد ان يبيعه, وكالعاده امل هي المتحدث الرسمي باسم الوالد, وجاء شاب تركي وسيم مستقر بالاردن لاتمام دراساته العليا و اراد ان يشتري الدكان, و حسب ما قال لنا انه اعجب فيها من اول نظره, واعجب بها اكثر من طريقه تعاملها " الدفشه" , بعد فتره تقدم لخطبتها و لكنها رفضت, وعندما قارب على انهاء دراسته تقدم لخطبتها مره اخرى , وهذه المره وافقت امل,كان عرسها جميل جدا, وهي كانت اجمل, لم استطع يوما ان اصنف امل اجميله هي ام لا, بيضاء البشره, وجميع ملامح وجهها فيها ضخامه, لو نظرت الى كل ملمح لوجدته اقرب الى القبح ولكن سبحان الله اجتماع هذه الملامح مع بعضها اعطى لوجه امل جاذبيه غريبه,ولكن العريس كان وسيم بالاجماع, كانت جميله في فستانها الابيض و لم تجلس طوال العرس, كانت ترقص و تتمايل و هو معها ايضا لم يجلس, كان عرس لن يتنسى

سمعنا بعدها ان امل تكمل دراسه الدكتوراه و بسبب حملها فانها اضطرت للجلوس في المنزل , وعندما ذهبنا لنهنئها بقدوم "دنيا" قالت لنا بانها وفي الشهور الاخيره كانت لا تضع الرجل الصناعيه اطلاقا بسبب زياده الوزن, وبان زوجها كان يحاول ان لا يتركها لفترات طويله, لانه يساعدها في كل حركه , وحتى في منتصف الليل عندما كانت بحاجه الى الذهاب الى لقضاء حاجتها, كانت توقظه كان يحملها بدون اي تأفف او تذمر, اعترفت لنا بانها لم تكن تتوقع ان تستمر حياتهم معا عندما تقدم لخطبتها, وانها وافقت وهي متأكده من عدم استمرار حياتهم معا, ولكن قالت لنفسها ساخرج من هذا الزواج بطفل يملئ علي دنيتي و يؤنس كبرتي.

قبل شهرين وبالتحديد في 20-10-2009 اتصلت بي امل لتدعوني الى حفله ستقيمها بمناسبه نيلها شهاده الدكتوراه التي حصلت عليها قبل سنه تقريبا , و بالفعل ذهبت وكانت الحفله اقرب منها لتجمع الصديقات , تحدثنا و ضحكنا و رقصنا و اكلنا وكانت جمعه جميله جدا, وتعرفنا على " فرح" الابنه الثانيه لامل ,وفي نهايه الحفل وقفت امل لتشكرنا على تلبيه دعوتها و قالت لنا بانها دعت فقط من تحبهم و تحب ان تراهم, و قالت لنا بان والدها رحمه الله كان يلح عليها لاقامه هذه الحفله, و تلبيه لرغبة والدها اقامت هذه الحفله, و قد اختارت اليوم بالذات لانه في مثل هذا اليوم توفي والدها قبل سنه, وبان الحزن و الجرح لفقدانه سيبقى في قلوبهم ولكنه لم يكن يوما من محبي الحزن وكان دائما يدعوهم الى الفرح والتفائل, وقد سألته يوما ما اكثر شيء يمكن ان يسعدك, قال لها بان يراها في بيت زوجها و هي تحمل اعلى الشهادات, و لذلك اقامت هذه الحفله اهداءا لروحه الطيبه ولتقول له " شكرا "....

________________

بالرغم من الحياه التي قد تفرض على اي فتاه في موقف امل, امل اختارت بان تحدد احلامها و اهدافها و تسعى لتحقيقها, وهذا ما يجب ان نصبو جميعنا اليه.

مبروك عليكم






خبر وللاسف بتكرر بشكل يومي, بننزعج و بنسم بدنا بندعي للي توفاهم الله بالرحمه و للي تسبب بالحادث بالهدايه و بتمشي الحياة و لكن ما بنتذكر ان الحياة ممكن توقف عند صحاب و ابطال هالخبر

خلينا بندا القصه من اولها, اب متوفي من زمان و ام توفت وتركت بنت كبيره تراعي باقي الابناء و البنات, لعنة مرض الكلى صابت هالعيله اخ مرض و اخ تبرّع لاخوه بكلية و بعد ما تزوجو التنين رجع تطور المرض و توفى الاول و بعدها بكم سنة توفى الثاني و زادو الايتام بهالعيله, و زادت مسؤوليه البنت الكبيره, و لعنة هالمرض مستمره اخ مرض و اخت تبرعتله بكليه, الحمد لله الاخت بخير و المريض حاليا بالمستشفى.

بدا الفرح يدخل هالبيت بنجاح الاخين التؤام الصغار بالجامعه و رجوعهم من العراق سالمين من الحرب, و مع زواج الاول و الاحفاد الجداد و زواج التاني و جيّة الحفيده بدت ترتاح هالاخت ولكن للاسف كثرة المصايب ضعّفت قلبها و ما عاد يستحمل اكتر من هيك و خذلها وهي ماشيه و وقف بعد عملية القلب المفتوح اللي العيلة فكرتها نجحت و رجع الحزن يدخل على هالبيت و لولا ضحكات هالاحفاد فيه ويلا ما بقي فيه حياة.

و رجع الحزن على هالبيت يوم الاربعاء الماضي بسبب مباراة كرة قدم....بسبب فوز برشلونة!!!
طبعا و زي ما كلكم بتعرفو و اكيد في جزء كبير منكم بستغرب كيف ان فوز برشلونه او ايطاليا او حتى ساحل العاج اله تأثير مباشر على بعض الناس و بستوجب عليهم التعبير عن فرحتهم "بانتصارهم" باسؤ الطرق اللي ممكن تخطر على بال اكبر مغفلين العالم.

واحد من التؤام وصّل زوجته و بنته لعند اهلها و راح ليحضر مباراة كرة قدم عند اخوه و بعد نهاية المباراه رجع اخدهم و بعد 5 دقايق من خروجة من بيت اهل زوجته مغفل من هالمغفلين قرر يحتفل بطريقته الخاصه و بأنه يسابق السيارات بالشارع و يشحّط و يخمّس بوسط الشارع, و فجأه فقد السيطره على السياره و ضربت بالرصيف و طارت للشارع المقابل و ضربت بسيارة هالعيلة الصغيره و اللي المفروض يحتفلو بعدها باسبوع بمرور سنتين على زواجهم و بثلاث سيارات تانيين, فورا الزوجه (24 سنه) توفت و البنت اللي كمان كم يوم بصير عمرها سنه و 3 شهور وصلت المستشفى متوفيه و الاب بحالة خطره و رضوض بكل مناطق جسمه, تخيلو عائلة طلعت من بيتها و بعد ساعات قليله انتهت هالعيله!!

هالشب قريبي, و حاليا هو لسا بالمستشفى و لليوم صوته و صوت بكاه معبي المستشفى و هو مش قادر يستوعب شو اللي صار, مش قادر يستوعب كيف فقد زوجته و كيف شاف بنته بتموت قدامه, كيف اضطرو يقصو السياره لحتى يطلعو جثة زوجته من السيارة قدام عينيه, كيف دم بنته و زوجته كان معبي السيارة

بدقيقة فرح غبية بدون داعي و مبالغ فيها انقضى على 3 عائلات, عائلة الشب و عائلة اهل الزوجه و عائلة اهل الزوج, البيت اللي ما صدقو يدخله الفرح بضحكات الاحفاد رجع فيه صوت البكا على فقدانهم, الاهل اللي ودّعو اكبر بناتهم و اول احفادهم قبل دقايق صار مليان حزن و الم و قلوب اب و ام و اخوان و اخوات مكسورة و الشب اللي ما صدق و هو يستقر و يتزوج من فتاة احلامه و ربنا كمّل فرحته بانه خلاه اب فقد كل شي بلحظات


مش عارفة لايمتا راح يضل الجهل متفشي في عقول العالم؟؟؟؟ ايمتا بدهم يبطلو يحولو اي شي لانتصار شخصي الهم ؟؟؟؟و ايمتا بدنا نخلص من هالطرق الغبيه في المبالغه بالتعبير عن الفرح؟؟؟؟ و ايمتا بدنا نخلص من هالاستهتار بارواح البشر؟؟؟

لهالعالم بحكي...مبروك عليكم جهلكم واللي بتمثل بعيونكم على انه "انتصار" و ربنا يبعدكم و يبعد اثر جهلكم عنّا