Things I Like To Whisper About

Would You Hear Me Whispering

معك و ﺑﺪﻭﻧﻚ




ﺭأيتك اليوم...
صدفه كانت
كنت تلتحف معطفك وكانه سيطير منك مع انه لم تكن هناك رياح

تتنفس بصعوبه مع ان الطقس ربيعي منعش

هي لحظات لم تتلاقى بها عيوننا ولكن رؤيتك كانت كافيه
ليقفز قلبي ...
ليجف حلقي...
لترتعش اطرافي
تمنيت ان اخبرهم عنك
ان اجري اليك
ان اجعلك تبتسم
ان اطرد شعور الغربة من ملامحك
ان ادفئ قلبك
لكن هي لحظات مضت
ﻋﺸﺘﻬﺎ وحدي
  معك و ﺑﺪﻭﻧﻚ

مشاهدات وسبرية ساعة الصبحية في الانفصامات العلاقاتية...المشاهدة 6




دمك خفيف و دمه خفيف...بتتناغشو على بعض و مستلطفين بعض و مستخفين دم بعض لاقصى درجة بزيدها معك بالمزح بتزعلي او تدايقي , مرات بتعاتبيه بتطلعي كتير حساسه و هو كان مفكرك غير هيك, بتطلع حساسيتك مزعجه, قد تقلّي عقلك و تستسمحيه و قد تصل فيكي مناحه العقل انك تعتذري و هو لانه صاحب قلب كبير بسامحك على مضض وعلى وعد منك انك ما تكرريها و بنفس خفة الدم الاولى برمي كلمة تانيه بتبلعيها انت زي الشاطرين علشان تثبتي انك مش حساسه.

نقلب الموقف و انت تغلطي و تخففي دمك و تمزحي معه نفس ذات المزحه اللي مزحها معك فوق, عن خباثة من باب وحده بوحده و ما صدقتي و هي اجت الفرصه - خلينا واضحين ان كيدهن عظيم ما بدنا نكذب - و قد تكون مزحه بريئه وانت ناسية تماما اللي هو عملة فيكي قبل - عاساس بننسى اشي مهو الاسى مابنتسى يختي - بتقلب جد و رجولة وما بطلعلك و لو وحده تانية مزحت معه هالمزحه كان بكف قلبها سبع براويز عالحيط, بتحكيله و بتحليفيله انك ما كان قصدك وانه ما فيها شي  و ممكن تذكرية بانه مزح معك هالمزحه من قبل ,برد الرد العجيب  " انا شب و الشب غير" او "انت ما راح تفهمي شو بعني كلامك من وجهة نظر الشب"

هلأ برضه انت و اعصابك و حجم المصيبة و ردة الفعل بتقرري شو تعملي و اذا حابة تفهمي شو يعني الشب غير و حابة تفهمي معنى كلامك من وجهة نظر الشب , بدك تروحي لنفس ذات العرّاف  لاستخراج الارواح و التنجيم لحتى تفهمي شو قصده بالزبط :)


مشاهدات وسبرية ساعة الصبحية في الانفصامات العلاقاتية...المشاهدة 5



بدك تخففي عقل الشب؟؟
بدك تتأكدي من صحه مشاعره؟؟
بدك تتأكدي انه ما بتسلى و ما بلعب فيكي و بمشاعرك؟؟

انا بحكيلك الحل الامثل, الحل اللي ما خاب ولا مره بعد استخدامه
جمله شهيرة بجميع العلاقات, بتهز كيان الشب وحتى لو ما كان بتسلى , بتحكيها البنت عن طيبه قلب و عن واقع و حقيقه, او بخباثه لتكتشف حقيقه اللي قدامها

"انا حكيت لماما عنك"....أن أن أأأأأأأأأأأأأأأأأأأأأأأن

ارمي الفتيشة و شوفي ردود الافعال يا حلوه :)

تلات ارباع الشباب بتهرب فورا , الصادق و اللي بتسلى, ببدا الشب بحوار عميق خلال ثواني بينه وبين حاله مع نظرة ازبهلال تستمر لاكثر من عشر دقائق يتخللها اصوات 
"ايش!!!!!!!!!!!"
"طب ..."
"مش بكير..."
"شو حكت..."
"طب..."

و تلقي بعديها سيل الحجج و المببرات بداية من انه فجأه سبحان الله بطل فاضي ابدا طلاقا مطلقا مع انه كان 24\7  عالنت ما بتحرك
نهاية بانه لازم يضحي  - راجع مشاهدة رقم 3 - علشانك انت مش علشانه هو :)

هلأ اذا الشب ما هرب و بقي لاسبوع و بعديها هرب اعرفي انه كان صادق.....بس خاااااااف :)

المشاهدات السابقة



إحراااااااااااااااج




سايقه العصر وطالعه من الدوار, تكسي اجا جنبي و اسرع فا انا ضليت ماشيه بمسربي و ما زحت لاخليه يمر  , مع شوية تناحه لاني بكره امرق اللي بتجاوزو غلط , صار يزمرلي اشرتله انه استنى مسربي هاد فتح الشباك و صار يحكيلي طب وقفي شوي.... انا انصرعت حكيت ابصر شو بدو يسمعني هلا , و انا مضطره اساسا اوقف لاني طالعه من شارع فرعي لرئيسي ولازم اوقف وقف قمت انا وقفت لوراه شوي ﻭﺣﻜﻴﺘﻠﻪ ﺧﻴﺮ ﺷﻮﺑﺪﻙ  وانا عامله حالي ولا هاممني و بنبرة قوية, قام رجع بالسياره لحتى صار شباكه على شباكي و حكالي " يا اختي العجل الخلفي مبنشر و اذا مشيتي بسرعه ﻫﻴﻚ  ممكن تقلب السياره خصوصي عاللفه " و اعطاني النظره العجيبه اللي خلتني احس حالي قد النمله و مشي وانا لسا بشكره بصوت اقرب  للحشرجه :$ 

لفيت و رجعت لمحل بناشر قريب من موقعي و طلع اكبر مسمار بشوفو بحياتي داخل بالعجل و الحمد لله العجل مو منفس عالاخر و لو ما حكالي انه العجل مبنشر كان طلعت من المول بالليل و قعدت اترجى حد يزبطلي اياه,  يا اخي الانسان مرات بتكون نواياه سوده :\

الله يرضى عليه و يسعده و يوقفله اولاد الحلال دائما  و يوسع رزقته و يعطيه ليرضيه ياااااااااااااااااا رب

مشاهدات وسبرية ساعة الصبحية في الانفصامات العلاقاتية...المشاهدة 4





بتحبة بجنون....بحبها ومش شايف غيرها

شايفته ملاك يمشي على الارض...شايفها كاملة مكمله

رجل احلامها...فتاة احلامه

ضحكتها اجمل موسيقى بسمعها... اسمها بصوته اجمل لحن بتسمعه

اقبالها على الحياه و تفتحها اكتر شي حبه فيها....انفتاحه و تفهمه لاسلوب حياتها اكتر شي حبته فيه


بتمشكل مع اهله لانه بده اياها....بتمرض و بترفض كل العرسان اللي بتقدمولها

مشاكل..مشاكل...مشاكل

بنجو منها كلها و "الحب" بنتصر بالنهاية و بتجمعو بعش صغير - او كبير حسب الحالة الماديه - و بتكمل فرحتهم و بحققو حلمهم


شهر سعاده...شهرين عسل....3 شهور محبه....4 شهور نغاشة و بعديها ببدا الواقع

ايه....ليش هيك بياكل؟؟؟

ايه...ليش هيك بتمشي؟؟؟

ايه...ليش هيك صوت ضحكتها عالي؟؟؟

ايه...ليش هيك صوته غريب؟؟

ايه...مين هاد اللي بتحكي معه وكاني رجل كرسي جنبها؟؟؟

ايه...ماله هيك شادد على حاله و بجحر فيي كل ما سلمت على حد؟؟؟

وايه...وايه...وايه...بتتكرر و بتزيد مع الايام ال ايهاااات

و بتبدا الدراما ....كل واحد فيهم بدو يغير التاني

اكتر شي كان يحبوه في بعض بطلع اكتر شي مزعج ....كل الاشياء اللي كانت ما الها معنى ولا كانت مؤثره صارت هلأ اشي لا يحتمل ولازم يختفي لتستمر العلاقه


يا اخي....يا اختي..الحياه عبارة عن تنازلات مستمرة من الطرفين لحتى تكون حياه سعيده

مساومات و تنازلات و تفاهم و تقبل....الوصول لنقطه وسط تتلاقو فيها

الحياه صعبه بدون ما تصعبوها....ليش بتختارو اشخاص و بتحبوهم بصفاتهم و بعدين بصير اكبر مهمه في حياتكم هو تغيير هالصفات؟؟


ملاحظه ع الهامش

هالتدوينات عبارة عن اراء شخصية بحته لا تمت للتعميم بصلة ناتجة عن\من - مش بيناتنا - مجموعة مصادر و مشاهدات و شكاوي وتجارب مضاف الها نكهة ويسبرية لخلطة سرية.


ملاحظه 2 ع الهامش




قد اكون...وقد نكون كلنا هيك :$


المشاهدة 1


المشاهدة 2


المشاهدة 3



قلوب حجر



الي قريبات الله يجزيهم كل الخير بسعو بعمل الخير دائما من اللي ببحبشو و بتحرّو بموضوع توزيع الصدقات و بحبو يوزعو بايدهم و يزورو الناس ليتأكدو من ان وضعهم بحاجه خاصه لمّا يكون  ناس معطيهم فلوس للتوزيع.

بتحكيلنا وحده منهم انها كانت مرّه سايقه في البيادر و شافت ست كبيره بالعمر بتمشي خطوتين و بتقعد عالرصيف ترتاح شوي و تمشي كمان خطوتين و ترتاح, قامت قريبتي عرضت على الحجه انها توصلها لبيتها و فعلا و صلّتها وبس وصلو قررت قريبتي تطلع توصل الحج لبيتها لتساعدها بالمشي .

الحجه ساكنه بغرفة بالطابق الرابع في عماره ما فيها اصنصير و لا في للدرج دربزين او اي شي يحمي الطالع عليه لو لا سمح الله سقط, الغرفة عباره عن مساحه صغيره فيها كل شي, تخت و تلفزيون صغير و غسالة صغيره و تلاجه صغيره مستهلكين عالاخر, قعدت قريبتي شوي عند الحجه, الحجه ما تزوجت و توفى ابوها وامها و ضلت عايشة لحالها و لا حد من خوانها او خواتها رضي يتحمل مسؤوليتها بس كبرت وبطلت تقدر تشتغل وما في مورد الها غير اللي بعطوها اياه الناس من فلوس والاكل, ومن الشباك فرجت الحجه لقريبتي 3 عمارات قدام بيتها و حكت انهم لاخوانها و اولادهم.

حكتلنا قريبتي انها صارت دائما تعمل حساب هالحجه بس حد يعطيها شي توزعه او هي بدها توزع شي و اخر مرّه زارتها كان بعد عيد الفطر, في وحده كبيره بالعمر وما بتقدر تصوم و اعطتها فلوس لتوزعها لانها افطرت برمضان, راحت قريبتي و اشترت بالفلوس اكل و حسبت حساب الحجه منه , بتحكي انه بقي معها دينار و نص من الفلوس فمرّت على الخضرجي اللي بنفس عمارة الحجه, دخلت و طلبت منه تشكيلة خضار بدينار و نص بالزبط, سألها الخضرجي اذا انها توزيع حكتله اه للحجه اللي ساكنه فوق, قام حكالها مداد "للحجه زينب" خدي بزياده و مني, قريبتي شكرته و دعتله ربنا يزيده من فضله و يكثر من امثاله و يجزيه كل الخير.

طلعت عند الحجه ما لقتها بالبيت, الاولاد اللي بلعبو بالشارع حكولها انها راحت تحضر عرس بالشارع اللي جنبهم "علشان تاكل هناك", بتحكيلنا قريبتي انه كان في شباك للغرفه مكسور منه شوي قامت دخلت كم من غرض من الشباك و اخدت الباقي و راحت للخضرجي "الطيب" لتترك الاغراض عنده وهو يعطيهم للحجه بعدين.

سألته اذا ممكن تترك الاغراض وافق و حكالها " انا بوصصلها اياهم مهي عمتي" انصدمت قريبتي و بتحكي ضليت مش مصدقه و اسأله "عمتك عمتك؟؟ يعني اخت والدك؟؟ جد عمتك؟؟ " و هي منصدمه ببروده وابتسامته وهو بأكد انها عمته اخت والده, بتحكيلنا قريبتي انها طلعت من المحل و هي مذهولة و بس وصلت السياره رجعتله وحكتله هات الاغراض ما بدي اتركهم عندك, و اخدتهم و دقت على جيران الحجه اللي ساكنين تحتها و اعطتها الاغراض و حكتلها عن الخضرجي, طلع فعلا العمارات الثلاثه لاخوان الحجه زينب و اولادهم و كل المحلات تحتها الهم و ولا واحد فيهم عمره سأل عنها او زارها او استفقدها باي شي.

سبحان الله , ناس ربنا بفتحلهم باب اجر و باب بر و همه مضيعينه على حالهم بكل بساطه , ناس ماخدتهم الحياه و قسوتها لحتى قتلت مشاعرهم وعمت قلوبهم  قبل ابصارهم.

عادات و طرق التقبيل في ﺍﻟﻤﻨﺎﺳﺒﺎﺕ


  اول شي كل عام والجميع بالف خير ربنا يعيده علينا و عليكم وعلى الجميع بالخير

طبعا و زي ما كلكم عارفين اول يوم دوام وخصوصا بالمؤسسات الحكوميه بضيع بالمباركات والمعايدات و القصص و وين رحتي و وين اجيتي و شو طبختو و مين اجا ومين حكا يعني الحمد لله الحمد لله بكون  زي يوم متمم للعيد  هي بس الصحوه بكير و النكد من شوفة بعض الناس اللي ما بتطيقوهم

 اليوم و بعد اللفه على اربع طوابق ومعايده و تسليم  على ما يقارب ال 50 موظفه لفت نظري شي مهم جدا ...الا وهو اختلاف آلية البوس  من حيث الكم و الطريقه لكل موظفه :)

في اللي بتضرب وجهها بوجهك كانها بتطاوش و بصير خدي جد يوجعني بس بكتم بقلبي و بضل  مبتسمه

في اللي بتختلف عدد البوسات على كل خد وانت بتحتاري خلص ويلا لسا  الف وجهي ويلا ما خلصت من الخد و بصير راسك يبعد و يقدم  انو خلص؟؟ لسا؟؟ تردد  واضح لفقرات الرقبه

  في اللي بتبوس بوسه على خد و خمسين  عالخد التاني و الخمسين بكونو على نفس واحد بتتابع سريع الوتيره وانت بتصيري مش عارفه شو تعملي وكل عشر ثواني تبوسيها انو عيب ما تشاركي بالحدث...الست مغلبه حالها ونفسها انقطع وانت ولا ادنى مشاركه !!  

  هلا كل هدول بشكرهم على محبتهم او حتى مجاملتهم الي لانهم عالقليله اظهروها... اللي بقهرو همه اللي بتسلمي عليهم ما بتعبو حالهم يوقفو او حتى يبتسمو وكانهم اول مره ابشوفوكي بحياتهم غير اللي ما بمدو ايديهم يردو على سلام ايدك الا بعد مده، ثواني بس بر ضه تعتبر مده من التفكير بلاش يختي تسلمي اصلاطن انت الخسرانه

مشاهدات وسبرية ساعة الصبحية في الانفصامات العلاقاتية...المشاهدة 3



انت انسانة رائعه    =======> انت هبلة
احنا مش مراهقين ============> انا بتسلى و اي تورط بمشاعرك انت بتتحملي مسؤوليته
انت انسانة رائعة و انا ما بستحقك  =======> انت هبلة و انا قزيت منك بصراحه
و بالعادة بتبعها جملة
 انا بدي اضحي علشانك انت مش علشاني =========>  انا قررت اخلص منك

الحلو ان الشب بطلع من الموضوع و هو مقتنع تماما انه ما غلط وانه كان واضح و قد تبلغ فيه انه يقتنع انها مشيت عليكي و انه جد ضحى و بس تلتقو بعد فتره بالصدفة او تحكو مع بعض  بكون متل اللي كذب الكذبة و صدقها و مقتنع انه ضحى و انه منيح و انه فضّل مصلحتك على مشاعره.

هاي طيبة قلب منه عفكره مش لئم او شر...هااا شفتي نص القراء الشباب صدقو هالجمله O.o


ملاحظه ع الهامش

هالتدوينات عبارة عن اراء شخصية بحته لا تمت للتعميم بصلة ناتجة عن\من - مش بيناتنا - مجموعة مصادر و مشاهدات و شكاوي وتجارب مضاف الها نكهة ويسبرية لخلطة سرية.

المشاهدة 1

المشاهدة 2






مشاهدات وسبرية ساعة الصبحية في الانفصامات العلاقاتية...المشاهدة 2






انت شب كتير منيح و كتير لطيف بعمرك ما عملتلها اشي سيء ولا غلطت فيها و لا زعلتها, بتحرص على سعادتها دائما و بتعمللها كل شي بتحبه و بتبعد عن كل شي بتكرهه.

قدمت كتير تنازلات بس لارضائها و طيوب كتير معها و بتتركها على راحتها, بتسامحها بس تغلط بحقك و ما بتراجعها ولا بتعاتبها باي تصرف او قول و قلبك صافي دائما تجاهها.

فجأه و بدون ما تقصد بتعترض على شي او بتزعل منك لتصرف بندر
 عنك بدون قصد, بتقلب عليك و بتصير اسؤ شخص بالدنيا و اكثرهم لئما و شرا, و بعمرها ما شافت منك شي منيح و انت عمرك عمرررررررررررررك ما كنت منيح معها .

التفسير لمثل هذه التصرفات هو....اممممم هاي برضة بدها استخراج ارواح و تنجيم لتنفهم, و برضة ما حتفهم, هي هيك بدك تقبلها هيك, بتنسى كل منيح و بتتذكر السيء, ولا يوجد تفسير منطقي لمثل هذه الصفات,وهي كما يطلق عليها طبيعة بشرية للستات, لذلك  يرجى احتساب الاجر من الله تعالى  و نسأل الله ان يلهمك الصبر.


ملاحظه ع الهامش

هالتدوينات عبارة عن اراء شخصية بحته لا تمت للتعميم بصلة ناتجة عن\من - مش بيناتنا - مجموعة مصادر و مشاهدات و شكاوي وتجارب مضاف الها نكهة ويسبرية لخلطة سرية.

المشاهدة 1

مشاهدات وسبرية ساعة الصبحية في الانفصامات العلاقاتية...المشاهدة 1



الشب بحب يتصف بالغموض و بحب البنت اللي قدامه ما تكون فاهمته 100% بحب السسبنس بالتصرفات  لهيك بكره البنت اللي بتواجهه بانها فاهمه تصرفاته و حركاته و اللي بتفهم و بتكشف كذبة و لفه و دورانه.

ما بحب يغلب حاله بانه يخفي افعاله , و بعمل مصيبه كبيره و هو مكشوف و بفكر ان البنت مش فاهمته و اذا بينتله انها فاهمته بكرها واذا غطرشت بمزاجها بكون مقتنع انه اذكى الاذكياء و انها مشيت عليها زي اللي بكذب الكذبة و بصدقها.

و بنفس ذات الوقت الشب بحب البنت اللماحه, اللي بتلقطها على طول, اللي بتفهم عليه من النظر و احيانا بتفهم عليه بدون نظر كمان , سريعة البديهة و التصرف, انفصام بعيد عنكم.

نيجي هلأ لتمييز الاوقات اللي لازم تكوني فيها لمّاحه و الاوقات اللي لازم تغطرشي فيها
هاي يا حبيبتي بدها استخراج ارواح و تنجيم لحتى تفهمي شو بده بهاللحظه, و بما انه كذب المنجمون و لو صدقو فاااااا انسي انك بيوم من الايام تفهمي و شو ما عملتي راح تكوني غلطانه و الحق عليكي بتدمير علاقة كان ممكن ينكتبلها الاستمرار بيوم من الايام
و دمتم

ملاحظه ع الهامش

هالتدوينات عبارة عن اراء شخصية بحته لا تمت للتعميم بصلة ناتجة عن\من - مش بيناتنا - مجموعة مصادر و مشاهدات و شكاوي وتجارب مضاف الها نكهة ويسبرية لخلطة سرية.

جديد و بس على قصص طرمة....مشاهدات وسبرية ساعة الصبحية في الانفصامات العلاقاتية




هاد يا جماعة الخير وبما اني قرقرت ارجع للعالم التدويني خاوااااااااا عن نفسي فااا قرقرت اني الزم نفسي بتدوينه اسبوعيه, بعرف حالي ما بنعطى عين بدون التزام لهيك بدي اعمل زي سلسلة تدوينات اسبوعيه كل احد الصبح  تحت اسم "مشاهدات وسبرية ساعة الصبحية في الانفصامات العلاقاتية " .

هالتدوينات عبارة عن اراء شخصية بحته لا تمت للتعميم بصلة ناتجة عن\من - مش بيناتنا - مجموعة مصادر و مشاهدات و شكاوي وتجارب مضاف الها نكهة وسبرية لخلطة سرية.

وبحب انوه اني مو ضد الشباب و التدوينات حتكون متنوعة لكن لازم تعرفو اني مع البنت دائما, انا مع ماما ضد بابا ومع مرة اخوي ضد اخوي, لهيك راح تحسو بالموضوعية و الشفافية من خلال كتاباتي و الديمقراطية بمفهومي الخاص.

نراكم الاحد الصبح باول نصيحه :)
سلااااااااااااام

ملاحظه ع الهامش...
تم التعديل من نصائح الى مشاهدات...مين انا لانصح!!
 انا بس بشاركم بمشاهداتي و يعطيني العافية :)


ماء و سماء



ماء وسماء...وحب ابدي
واسراب طير تحلّق في داخلي
شمس تغيب بعد يوم سرمدي
طويل ممل مرهق جدا لخافقي
فيه صاحت و صمتت آهاتي
وفيه ابتسمت شفاهي من سخافتي
فيه احببت و فيه كرهت وفيه لاحقت اهوائي
ماء و سماء ..وحب ابدي
و اسراب طير تحلّق في داخلي
وشمس تغيب بعد يوم سرمدي
و أتى المساء و هدأت حواسي
والان...الان فقط  تصالحت مع ذاتي


تصبحون على خير :)


ملاحظه ع الهامش
من وحي الصورة...وسامحونا عالتطبيش :)

الخالتو المصدومة !!!




بعد محاولات اقناع لا تتجاوز المرّه الواحده وافقت امبارح اروح على عرس بنت صاحبة ماما, ماما عندها طريقة بالاقناع بسيطه جدا...هي بس تأمر وانا بوافق على طول :)
حكيتلها ما بدي اروح , اذا بدك بوصلك و برجع باخدك, حكتلي بس انا بكون مبسوطه اكتر و مرتاحه لو اجيتي معي فااااااااااا وافقت اروح شو اعمل ما قدرت اقاوم :)

هلأ بدي احكي عن موضوعين, اولا و بما اني ما كنت حابة و لاخر لحظه اني اروح عالعرس هاد لا يعني ابدا اطلاقا مطلقا اني ما اكون لابسة اللي عالحبل و اكون ماشية لفتين تلاته بعلبة الميك اب, يعني رايحه و رايحه اروح و نفسويتي مش بالعلالي؟؟؟ بعد ما سمعنا بابا بنتناقش بموضوع الروحه و شافني و انا طالعه نظرة الدهشة على وجهو كانت رهيبه, بحكيلي هيك حابة الروحه و مجهزه حالك...اروح بالجينز يعني ياحج؟؟ انت بترضاها؟؟  :)

الموضوع التاني و هو عرض العرايس اللي كان بالعرس, لا لااااا مش هيك, يعني عرض عيني عينك, ستات بلفلفو عالطاولات و بعرفو بناتهم عالعالم, و بنات ماسكين موبايلات و ناسيين يلبسو نص اواعيهم بتمشو بالقاعه و رايحين و جايين بس هيك بتحسوه عرض ازياء, كرهت حالي كل ما اجا حد وسلم على ماما و سألها عني :(, متزوجه حلوه بنتك وين كاينه مخبيتيها, هاتي بوسة يا "خالتو" او يا "آنتي"  مع بعض التحسيس و معاينة البضاعه من بعض الخالتوهات, وماما محششة ضحك ولا على بالها

كل الخالتوهات كوم و الخالتو اللي طلعت من طرف العريس وكاينه دارسة مع ماما بالمدرسة كوم لحالها, لقاء لطيف كان بصراحه و الست كتير كتير طيوبه, قمت و سلمت عليها بمحبه قد ما شفت مميتي فرحانه بشوفتها, و بدت كم ولد عندك و كم بنت و شو مجوزه و كم حفيد و وصلولي , الخالتو تفرجت علي و رفعت حاجب و ابتسمت ابتسامه و حكت لماما " بنتك عريسها عندي"  حاولت ان حواجبي ما يرتفعو و اني اضل محافظه على ابتسامة المحبه استأذنت بكل ذوق و رجعت قعدت على كرسيي و فجأه سمعت الخالتو بتحكي بصوت عالي "هاااي؟؟؟" "هاي 36؟؟؟"  ضحكت , ليش ما انبسط ان ربنا الحمد لله منعم علي بشكل ما ببين عمري!!! و لكن الابتسامه بدت تخف بعد تكرار السؤال "هاي 36!!!" للمره الخامسه, و بعد تكراره للمرة السابعه بصراحه ولا اخفي عليكم بديت اتوه مش عارفة انبسط ويلا ازعل :$  بدى الاحراج يسيطر علي, خلص يا خالتو ابوس ايدك, خلص خلص 28 , 30 ابوووس ايدك ما كانت مزحه مزحناها معها, و فجأه الست انعجئت و ودعت ماما على عجل و راحت و انا و ماما مش قادرين نمسك حالنا عن الضحك, حششنا بكل ما تحمله الكلمه من معنى, بتحكيلي ماما " يا علي انصدمت كتير كأنها" صارت ماما حاسة بالذنب  هههههههههههههههههههههه.




عدّت خمس سنين !!!



هاد يا جماعه و بدون طول سيرة و بدون تبريرات بواقع مدمر ملهي مكسر الخاطر, وبنفس ما عاد الها نفس لشي بهالفترة, اكتشفت ان مدونتي احتفلت وحيدةً بعيدها الخامس قبل يومين و انا ولا تذكرتها ولاااااااااا عبرتها

فاااااااااااااا وفاءً مني للحيز المشرق بحياتي - ولو ان الكهربا مقطوعه عنه من فترة - و للمكان اللي استقبلني و حبني من قبل ما احبه, وللمكان اللي عرفني على ناس علموني دروس بالحياه , اللي كلها رفعت عندي منسوب الصفات  من قوة و فرح و تناحه و نكد و قرف و حب و كره... الخ , ومن موقعي هاد و بيوم الثلاثاء العطله اللي بنص الاسبوع وكلكم بتعرفوني بعشق العطل و خصوصا اللي بتيجي بنص الاسبوع بحب اشكر مدونتي اللي استحملت كل "البوح" اللي بقلبي و بعقلي, استحملت و فهمت الاشياء اللي مرات كنت اكتبها وانا نفسي مش فاهمتها, و بشكركم كلكم انكم استحملتونا انا و اياها و ان شاء الله  السنة الجاي تكون سنة خير علينا و على الجميع و ربنا يهدي بالنا اجمعين يا رب.

و دمتم


ملاحظه ع الهامش

اشتقتلكم :(

انسان بلا قلب



كل انسان خلق وله قلب, قلب فارغ يملئه بما يريد, يبدأ بخفقات تجاه تكل الرائحه العبقة التي تعوّد عليها, لصاحبة ذلك الصوت الذي تأقلم عليه و على دقات قلبه تسعة اشهر كامله, دقات الفها و عشقها و ستبقى تلك الدقات في القلب و لكن قد تصغر المساحة التي يحتلها ذلك الحب مع الزمن واحيانا قد تغلق.

كلما مرت السنين من العمر تزداد انقسامات ذلك القلب, يدخل الاب و الاشقاء و الشقيقات, وجميع الوجوه الباسمة المستبشرة بقدوم هذا الانسان, يكبر اكثر تدخل اصناف المأكولات ما لذ منها وطاب, تزداد انقسامات القلب الصغير ولكن يبقى هناك جزء خاص يحتفظ به الانسان فارغ يعيش به ايامه تساعده على امتصاص مرارة الايام ابتداء من ذهاب الام لوحدها الى السوق وتركه بالبيت مرورا بحبة الايس كريم التي وقعت على الارض الى كسر الفازه المفضلة عند السيد الوالد و حرمانه من المصروف والتلفاز بسببها.

يكبر ليصل الى عمر اعادة ترتيب التوزيعات المناسب لعمره, يخرج اناس و تخرج اشياء و تضاف اشياء جديده, يخرج بعض الاقارب الغير محببين, و تخرج العاب الطفولة و مغامراتها ليضاف مغامرات جديده و العاب جديده, قد يدخل معلم او معلمه, يدخل اصدقاء قد يحتلون اماكنهم الى الابد و بعضهم يكونون من السكّان الطيارين, لا يقيمون لاكثر من اشهر و احيانا ايام.

وهكذا تمر السنون و يزيد العمر و يعاد الترتيب, قد يخرج احدى الوالدين او كلاهما معا في فترة وقد لا يعودا ابدا, وقد يعودا بمساحات اقل من التي كانو يسكناها مسبقا, وتبدأ وجوه واسماء تدخل و تخرج من ذلك القلب, منها من يعيث الالم و المرارة فتبقى مساحته متضررة لفتره قد يأتي من يداويها و يرمها و قد تبقى فاسدة للابد, ومنهم من يبقى او يبقى عطره في تلك المساحات, ويبقى ذلك المكان السري الذي يرقّص فراشات الجسد كلما استنشقنا رائحة عطره في قلوبنا.

ومن الناس من يعتبر نفسة فهلوي و "حرّيف" تقسيم, فيقسّم قلبه الى قطع صغير و يستغل كل الزوايا و الثنايا, كل الحجرات و البطينات, ويقوم بتوزيعها ما بين ذلك و تلك وما بين هذا و ذاك, ويقفز بفرح ما بين تلك الاجزاء, ويرمي كلاما معسولا على ساكني تلك القطعه و يعاتب اصحاب تلك القطعه و دون ان ينتبه انه لم يترك قطعه صغيره له, تلك المساحه المخصصه لمحبتك لنفسك, لتقيس بها افعالك, لتميز بين الصحيح و الخطأ لتعاتب نفسك و تمدحها, تلك المساحه الاهم التي تبقيك على تواصل مع المسار الصحيح الذي يجب ان تسير عليه, تلك المساحه التي تقوم بمكان الضوء الخافت الذي ينير لك الدرب.
و لكثرة ساكني ذلك القلب و لصغر قطعه لا يكون هناك مجال لاعادة الترتيب والتوزيع و تبقى القطع تذوب و تذوى حتى ينسى او يتناسى تلك الدقات, و بذلك يتحول القلب الى عضو اخر في ذلك الجسد يضخ الدم ليبقى ذلك الانسان على قيد الحياه ولكن....بلا قلب.

ملاحظه ع الهامش
بعتذر عن التطبيش الفظيع للغة اللي ورد فوق بس هيك طلع معي و اذا راجعت و عدّلت راح اشطب كل الادراج فاااا تركته....سامحونا :)

اضغط للمتابعه....ورطة ما بعدها ورطة






انا من الناس اللي بكرهو ومستحيييييييييييل يشاركو او يفتحو اي اعلان  باي موقع الكتروني وخصوصا اللي على جنب الشاشة بالفيسبوك, مستحيل اضغط على لينك مهما كانت جوائزه قيمة وخصوصا المسابقات اللي فيها اشتراك عن طريق رقم الموبايل, لانها بتعني ورطه كبيره و انا بعرف هالحكي.

قبل كم اسبوع كان مكتوب عن اشياء عن الاوزان المثاليه و نقصان الوزن, وهل وزنك مثالي, واخخخخخخخخ مسكوني من ايدي اللي بتوجعني و صار الفضول يمشي بجسمي من عقلي لقلبي لايدي وهب كبست عاللينك :( ويااااااااااااا ريتني وقفت لهون لا و بديت اجاوب عالاسئله, نوعية الاكل, كم مره بتروحي عالجيم, وهب السؤال القوي, كم رقم موبايلك لنعطيكي النتيجه, صد ورد و شد و تنتيف قررت انه خلص بشارك و بس يعطوني الجواب بلغي المشاركة وخصوصا انهم كاتبين كيف تلغي المشاركه, و كاااااااااااااان يوم بمبي يوم ما كتبت الرقم, بعيدا انه طلع وزني "طبيعي" و اخدت 22 من 25 و طلع الوزن المثالي 62 ولازم انزل 3 كيلو لاوصله خصمو مني 70 قرش :(, اقنعت نفسي انه عادي و بعتت مسج لالغي الاشتراك و وصلني مسج من الموقع انه تم وقف اشتراكك,. 

بعد يومين من لغي الاشتراك واذ بالموقع ببعتلي مسج عن التفاح وفوائده و هالقصص شيكت الرصيد طلعو خاصمين 70 قرش O.o  رديت بعتت مسج الغاء اشتراك و وصلني رسالة تأكيد باني لغيت الاشتراك و رجعت شيكت عالرصيد و اذذذذذذذذذذ ب 70 قرش تانيين مخصومين :)
 اتصلت بما يسمى "خدمة الجمهور" ردت الاخت بكل لباقه و اهلا وسهلا فيكي ست "هبولة اللي اشتركت باشي بالموبايل باقل من ثواني و هات عاد الغيها" :(
 حكيت للبنت اللي صار فحكتلي بنفس لهجة الادب ان ما ببين عندها اني وقفت الخدمه الا بعد ساعه, وحكيتلها "شوووووووووو بالنسبة لل 140 قرش؟؟" ردت بانها راح تبعت رساله لقسم المتابعه و خلال "48" ساعه بردو علي واني لازم استنى الرد, طيب ماشي بنستنى يومين .

بعد يومين وصلني مسج جديده عن فوائد التفاح O.O وبررررررررررررررضك خصمو 70 قرش , ييييييييييييييييي عليناااااااااا, رجعت اتصلت فيهم و ردت علي وحده تانية برضك بقمة الادب و "الخنف" حكيتلها كل القصه غلطت و حكتلي "ممكن انت اشتركتي فيها بدون ما تنتبهي" انا كنت لحظات لحظات ها و كنت راح اطلعلها من التلفون بس هديت حالي و حكيتلها بما معناه اني اي نعم "هبولة" واشتركت اول مره بس برضه مش لهدرجه تفكرني ولا حبّه لاشترك وبدون ما انتبه :"( , المهم وقفت الخدمه من عندها و بدها تسكر الاخت "اي خدمه تانيه ستي" ... حكيتلها " شوووووووووووووووووووو بالنسبه لل دينارين و عشر قروش؟؟"
 هلأ انا خدي مني عيوني بس ما تضحكي علي بتعريفه وانا عند الاستهبال راسي بقلب حيط  ولا برسل ولا بستقبل, حكتلي ببعت مسج للمتابعه وانه مبين ان في رسالة مبعوته من قبل بس ما حد قرأها, حكيتلها "شو هالشركه الكبيره المحترمه اللي بدها اسبوع لتوقف اشتراك بخدمه و شو هالخدمة الزفت هاي اللي موظفين هالشركه ما بشتغلو شغلهم" المهم رجعت اكدتلي اني لازم استنى "48" ساعه ليردو علي.

صاحباتي ضحكو علي وحكولي انسي الفلوس و اذا بتوقف الخدمه فهاد انجاز وانا ولّعت بزياده, وفعلا 48 ساعه بالدقيقه و حكيت معهم, حكيت للبنت الموضوع وحكيتلها ااااااااااااااااااااااااخر مره بتصل و بعديها راح اتصرف تصرف تاني -هلأ  بالنسبة الي شو هو التصرف التاني فااااا علمي علمكم بس خلص بدي اهدد واتوعد , تعلمت انه بدون تهديد ما بمشي اشي - رجعت حكتلي انا سجلت الشكوى وخلال ... حكيتلها "ما تحكيلي 48 ساعه ترا كرهت هالرقم, بدي رد سريع ومستعجل انا" حكتلي ان اقصى حد 48 ساعه و ممكن خلال ساعه يردو, حكيتلها ان الي اسبوع و هال 48 ساعه تبعتهم ما خلصت و رجعت هددت و توعدت.

بعد ساعتين وصلتني رساله من قسم المتابعه بانهم راح يرجعولي الفلوس :))))))))))))))) هيه هيه لولولولييييييييييييييييييييييش, و اخيرا حد اشتغل, كنت بدي ايعتلهم خليلكم اياهم 
الموضوع مش موضوع فلوس, الموضوع موضوع مبدأ وموضوع سرقه عيني عينك, يعني ليش المشاركه بتكون باقل من فانيه و الغاء هالمشاركه بدها شهر؟؟ و ليش الفلوس اللي "نهبوها" خلال هالفتره يغطرشو عليها؟؟ كم مشترك غيري صار معهم هيك و كانو مقتنعين انه مستحيل الفلوس ترجع و ما طالبو فيهم, كم دينار بدينار و كم اشتراك باشتراك نهبو شركات الاتصال بدون علمنا؟؟؟ 

المهم يا اخوان.....طلع لتاخد حقك لازم تهدد و تصرخ و تبهدل و تعلي صوتك .....للاسف 
و الاهم ان فلوسي رجعتلي :)







ملاحظه ع الهامش

اهلا وسهلا بالمتابعين الجدد نورتونيييييييي و اهلا و سهلا بالمتابعين القديمين  دائما منورينيييي و اللي بطل يتابعني الله يسامحك :(
امااااااااااااا اللي بضل يحط ممل وغير مفيد...فاااااااااا اهلا وسهلا فيك بما انك زائر وقارئ دائم :) و برضة الله يسامحك :$

ايام البلاد

شاطئ بحر يافا



كتير بسمع الكبار بالعيلة بحكو عن البلاد وايام البلاد, البلاد اللي صارت زي عالم خيالي ممنوعين عنه بنراقبه من بعيد و من ورا الشاشات وما في بايدنا نعمل شي  نغير من هالواقع المرير

البلاد اللي بريحة ياسمين نابلس و ريحة شط يافا, البلاد اللي بريحة بيارات البرتقال, اللي فيها خيالات اجدادي بتمشي بشوارعها و اللي فيها طفولة اباءنا بتلعب و بتركض باحيائها

البلاد اللي من قصص اباءانا و اجدادنا تخيلنا اطفالها كبار و كبارها اساطير, البلاد اللي  كانت امان لدرجة ان سيدي يبعت ماما اللي عمرها 4 سنوات مع شوفير الباص من نابلس لطولكرم لتقضي نهاية الاسبوع مع خالتها, البلاد اللي كانت ماما كل اخر اسبوع ترجع من المدرسة و تروح عالسينما وتلاقي تذكرها اللي قطعتلها اياها اختها الكبيرة عالباب مع الحارس, البلاد اللي الكل فيها بحب الكل, اللي الكل بحسن الظن بالكل و اللي الكل ما بتدخل باي حد.

البلاد اللي اكبر مغامره بحكيلنا اياها بابا و بنسأله كم كان عمرك يحكيلنا ست سنوات و على وجهه ابتسامه ما بترتسم الا بعد هالقصص و عيونه بكونو معلقين بالسقف و كانه شايف الصورة بتنعاد قدامه بكل نتفاصيلها وعيونو بتلمع.
البلاد اللي الاطفال انجبرو يدخلو بصفوف الكبار , البلاد اللي الكل حمل روحه على كفة ومشي , البلاد اللي قررو كبارها يتركوها مجبرين خايفين, واللي بلومو صغارها كبارها على هالقرار, البلاد اللي اصغر طفل بلعب بشوارعها بكون عند الجد اكبر سياسي ومحلل و متحدث.


الباد اللي بتتوجع و بتتقطع من سنين , البلاد اللي فيها اطهر شي و اخبث شي, اللي داستها اطهر الاقدام واللي بدوسها اقبحها هلأ, ان شاء الله يجي اليوم اللي ما تضل فيه هالبلاد زي اسطورة بنسمع فيها و بنراقب فيها عن بعد, ان شاء الله بيجي هاليوم اللي نعيش الايام الحلوه اللي عاشوها.

ملاحظه ع الهامش
لكل اللي بزاودو على موضوع الوطنيه, واللي بعتبرو فلسطين خاص بناس معينيين وما بتعنيهم وما الهم فيها,واللي بفكرو ان مجموعه وحده راح تحاسب بكرا عاللي بصير بالمسجد الاقصى,  واللي بعتبرو حب فلسطين يعني كره البلدان التانيه, تذكرو انّا كلنا كنا تونسيين بوقت ثورة تونس, وكلنا كنا مع المصريين وما زلنا في ثورتهم وكلنا مع اهلنا و اخوانا بسوريا و بنزعل على زعلهم و بنبكي على وجعهم كلهم, فياااا ريت بس تفكرو شوي قبل الحكي اللي بدون معنى.

مش حتنازل عنك ابدا




كل مره بنذكر اسم المطربة سميرة سعيد بسألني بابا هاي شو بتغني بحكيله  اغنيه " مش حتنازل عنك ابدا" و كل مره بحكيلي ايش كمان ما بتذكر غير هالاغنيه, انا بصراحه ومع احترامي الشديد لكل فانات و فانين المطربة سميره سعيد مش من محبي صوتها وغير متابعه ابدا لاغانيها و حتى اغنية مش حتنازل عنك ابدا ما علقت براسي الا بسبب ذكرى قديمه عندي.

و احنا صغار كنا ساكنين احنا و اعمامي بنفس العماره, وفي يوم  اهلي و دار عمي طلعو مشوار و تركوني انا و بنت عمي اللي اصغر مني بسنه و اخوي الصغير اللي اصغر مني ب 9 سنوات كان عمره 4 سنين بوقتها لحالنا بالبيت, و كالعاده بس نجتمع انا وبنت عمي لحالنا لازم نحضر فيلم رعب, بنت عمي بتعشق هالافلام وانا بكرهها :( و لكن فرصتنا نحضر شي سوا و بوقتها كان الخيار واقع على جزء من اجزاء "كابوس شارع ايلم"  و اللي حضرنا كل اجزاءة مع بعض 

المهم خلصنا الفيلم و اخوي كان نايم و صحي و طعميناه و مع جو الفيلم شكلنا انسجمنا انا و بنت عمي. نفشنا شعرنا و مسكنا فراشي شعر و صرنا نغني اغنيه " مش حتنازل عنك ابدا" ولكن بطريقه مهاوشة, اخوي الصغير واللي كان دلوع كتير بوقتها المسكين انصدم و خاف و احنا ما صدقنا انه خايف جد و زدناها و اللي تقرب عليه و هي بتغني - او بتطاوش- و اللي تجحره واللي تمسكه من قبة بلوزته...هب الولد فقع بكي و صراخ وحاله و كالعاده بهيك مواقف سبحان الله الاهل بقررو يدخلو البيت , مش يجو وانا بطعميه لا سبحان الله و هو بصرخ.

دخلو اهلي و شرحنالهم الموقف و اخدنا اللي فيه النصيب دروس عن الاخوه و الحب و الكبر و العقل و الاوعية الكبيره و الصغيره اللي تحتوي بعض و عن تحمل المسؤوليه و هالقصص , انتهت المحاضرات باقل الخسائر مع اصراري انه بعرف انّا بنمزح وبالغ بردة فعله...دلووووووووووووووووع :)

قبل كم يوم طلعنا انا وبنت عمي نتغدى برّه و صرنا نتذكر ايام زمان ومنها هاد الموقف و حششنا ضحك و كل اللي بالمطعم صارو يتطلعو علينا, سبحان الله الايام ركضت و مشيت و قصص جديده صارت معنا حلوه و بشعه واشياء ما بتنتسى و لكن الحمد لله بس ترجع هالذكريات ومع مرارتها بتتعدل مرات شوي ومرات كتير, هاي من الذكريات اللي تعدلت كتير :) 

عيد العمال


المشكله الاساسية في مؤسساتنا الحكوميه هي انهم ما بقدرو ولا بحاسبو الموظف على شغله وعلى انجازه, لأ اهم شي اي ساعه اجا واي ساعه روّح, اذا تأخر 10 دقايق يكتب مغادرة و يتحمل عشرطعشر جميله و انه يضل قاعد بمكتبه طول فترة الدوام بغض النظر شو بعمل, نت و فيسبوك, شات العاب مش مهم المهم يكون قاعد بمكتبه.

اليوم المدير مصبح مستنفر, من الصبح واقف مكشر جنب ساعه الدوام ولا صباح الخير ولا برد السلام, و كلّف مدير مديرية موظف اله 100 سنه بشتغل بالوزارة بانه يلف عالمكاتب و يكتب اسماء اللي قاعدين بمكاتبهم و اللي مش قاعدين, ولما سأل عن وحده من الموظفات اللي بالمكتب اللي جنبي و حكوله انها بالتواليت, علّق واسفه عاللفظ لانه لازم انقله حرفي " ول عليكو كل الموظفين  انسهلو اليوم كلهن بالحمام" , انا كنت بشتغل و مجدّه من الصبح والله العظيم انه احبطني و لما رئيسة القسم للموظفه اللي مش بمكتبها وقفت قدام التواليت و نادت على اسمها انصدمت و حكيتيلها "من كل عقلك بتستني تحكيلك نعم من جوا الله اكبر حتى على التواليت لاحقين الموظفين"  استحو و مشيو

هلأ ما بنكر ان في نسبة كبيره من الموظفين ساعه على بعضها ما بشتغلو , وبنسو الضمير و الحلال والحرام, و خصوصا اللي في الهم تعامل مباشر مع المراجعين واحنا مؤسسة خدميه بتخدم ناس مساكين ومحتاجين, طريقة التعامل على النفتره على الذل و الانتظار على الخمسين الف مشوار ليجيبو اوراق لاستكمال المعاملات و اللي بعطوهم اياها بالقطارة و روح وتعال,لانهم عارفين انهم ما بتحاسبو على كل هاد ولكن بتحاسب الموظف اذا ما كان قاعد على مكتبه او اذا روّح قبل بدقيقتين من نهاية الدوام.

غير عن التقدير السنوي و اللي برضه "بعض" المدرء بكون تقديرهم ابعد ما يكون عن انجاز الموظف, صاحبتي المحاسبة اللي ما بعطوها اجازه الا بميت الف واسطه لانها ماشاء الله مخ نظيف و انجاز و دقة و حل لكل المشاكل تقديرها طلع جيد بس, ولما راحت تراجع مديريها بحكيلها " انا باجي عندكم عالمكتب ما بتوقفيلي بس ادخل, وبعمرك ما عزمتيني على قهوه ولا شاي, بعمرك ما جاملتيني بكلمه بصباح"
ردت عليه بانها لما قرأت قانون الخدمة المدنيه وفيما يخص التقديرات السنوية ما قرأت باب المجاملات و العلاقات الاجتماعيه فيه و طبعا ما عملت شي لانه اذا اعترضت بتيجي لجنه من الوزارة تحقق و طبعا طبعا راح تطلع محقوقه غير عن موضوع المحسوبيات و العائلات و العشائر و الوساطات, مستحيل يطلع موظف صح ومدير غلط.

المهم يا جماعه انه خميس جمعه سبت عطله و ان شااااااااااااااااء الله انّا نكيف :)
كل عام و كل يوم و كل دقيقه و الجميع بالف خير دائما :)






ملاحظين هالشي...كلاكيت تاني مرة






موضوع كتبته زمان لكن بسبب تكرار الموقف و بكثره بدي احكي عنه مره تانيه :)



هلأ انك تكوني بتسوقي و فجأه تطلع بسه من بين السيارات بتحصل, انك تكوني بتسوقي و الاخت البسة بتقطع الشارع و بتتمشى على اقل من مهلها برضه بتحصل, انك تكوني بتسوقي وفجأه بسّه هبوله توصل لنص الشارع و بعدين تتردد تكمل ويلا ترجع و تضلها تتقافز رايحه جاي و انتي بتستني بالاخت تقرر برضه بتحصل.

الاشي الجديد اللي ملاحظته ومش عارفه اذا في حد غيري ملاحظه, ان العصافير و الحمام بالاردن بطل يخاف
جد بكون سايقه والحمامه ماشيه وبتهز براسها وانا ببطئ انو هلأ بتطير هلأ بتطير وبحكي خلص اكيد دعستها لكن بأخر لحظه بتقرر اتطير, و نفس الشي العصافير منتشرين عالارض و بأخر لحظه بطيرو, ومرات وانا ماشيه عرجلّي بمشي جنب الحمامه او العصفور, ولا كأني موجوده, وبتضل بتاكل و ولا بتتحرك, مفكرين حالهم بروما الشباب..ما بعرفو ان لو حد مسكهم خلص راحت عليهم

حد غيري لاحظ هالشي, ويلا انا بس اللي الحمام بطل يخاف مني زي البسس بهالبلد, على رأي اخوي اللي بس حكيتله اني بلف من الكراج لاطلع عالسياره لان البسة فارده حالها قدام الباب الرئيسي...بحكيلي " يا ام السوس شكلها البسه مخاويه عليكي" :(
معقول الحمام والعصافير برضه هيك بفكرو !!!!

الله يسامحك يا حج...ويسامحني :)






اول ما نقلنا للمبنى الجديد لشغلي قبل 5 سنين يمكن كان اول شي سألنا عنه مصفات السيارات لانّا كنّا نعاني بالموقع القديم, طمنونا وحكولنا ان في كراج كبييييير للعماره غير ان الشارع فاضي و على هالاساس اختارو المبنى, ارتحنا و لمّا نقلنا انصدمنا بالواقع المر.


هلأ الجماعه ما كذبو بان في كراج كبير للعماره, بس اللي ما حكولنا اياه ان المدير العام قرر ان بس سيارته و سيارات الشغل اللي تصف فيه وسيارات بعض الموظفين والموظفات اللي بختارهم بعناية حسب درجة هز الذنب اله و طبعا انا مش من ضمن المذكورين.

الشارع غير انه طلع في مبنيين خدميين غيرنا فيه طلع كله بيوت و كله ابواب كراجات لهالبيوت, مرات بحس حالي صفيت السياره عند البيت و اجيت مشي قد ما بصفها بعيد, غير عن اللئم اللي صار يصيبنا و السباق على المواقع, لدرجة اني مرّه صرت استدعي ان صاحبتي ما تنتبه للمكان اللي وراها علشان انا اصف فيه و حصل وبس دخلنا المبنى اعترفتها بالرقية الشرعيه اللي دعيتها لحتى ما تشوفو :)

كل الامور اعلاه كوم و اللي بدي احكي عنه كوم تاني , كوم بجلط و بقهر وهو وبالرغم من هالمعاناه اللي كلنا بنعاني منها في بعض الموظفين و الموظفات بس يكون في مصفين فاضيين بوقفو بنصهم وما بتعرف توقف لا قدامهم ولا وراهم و مش واحد ولا تنين ولا عشره, المعظم بعمل هيك و خصوصا اللي جنب الكراجات بتركو بينهم و بين مدخل الكراج نص كيلو ال بلاش السيارات تضرب في سياراتهم وهمه طالعين و داخلين :( و احنا المساكين اللي بنطلع من بيوتنا متأخرين و بنوصل عالوقت بالزبط ما نلاقي مكان نصف فيه :"(.

هلأ وجود بعض سكان المنطقه اللي دوامهم عال 8:30 بخليلنا خيارات لانّا نصف مكانهم برضه بالمسابقه و الدعاء, اليوم و كالعاده وصلت عالوقت بالزبط, وكان في حج صافف سيارته قريب من باب الشغل و قاعد بسيارته هو والحجه, في قدامه مسافه لنص سياره و في وراه مسافه لنص سياره, وقفت و اشرتله انه لو سمحت ترجع شوي مع ابتسامه ملائكيه صباحيه, الحج طنشني ولا كانه شافني , مرّه تانيه زدت من ابتسامتي و رجعت طلبت برضك طنشني, لفيت و رجعت ادور على مكان و انا ماشية بتطلع بالمراية طلع الحج منزل سيارته لقدام لحتى ولا حد يصف قدامه ولا وراه 

صفيت السياره عند بيت اهلي على رأي صاحبتي باااااااااااااااااااااخر الشارع و انا ماشية باتجاه الشغل و قلبي طافح عالحج وانا متردده احكيله ويلا ما احكيله هب لقيت حالي طاله راسي من جنب شباك الحجه :) " السلام عليكم صباح الخير عمو" 
"يا عمو الله يسامحك يعني لو رجعت لورا شوي ما انا أشرتلك , هيني صفيت السيارة اخر الدنيا, عكلن  اليوم  اذا كانت عال 3 وقت ترويحتنا بتشتي فاعرف اني راح امشي للسيارة وانا بكل خطوة بحكي  الله يسامحك يا عمو!!!!"
الحج انعجق و صار يحكيلي "ما انا أشرتلك و رجعت و هيني قدمت جيبي جيبي سيارتك يا عمي" 
شكرته و حكيتله مخلص تأخرت على دوامي و مشيت :)

شو العبرة من القصه؟؟؟
اني بعد ما وصلت مكتبي و قعدت و فكرت تأكدت من شي مهم..... انا كبرت يا جماعه :"(
هلأ انا و بشخصيتي  الطبيعيه  من عاشر المستحيلات اروح احكي مع الحج, وانا وبشخصيتي الطبيعية مستحيل ادخل بحوار و احمّل الناس ذنب بس شكله الكبر عبر و الشخصية تتحول ....ابااااااااااااااااااااااااااااه  :"(


ظاهرة ملفتة




ظاهرة غريبة منتشره هالفتره بالشغل, ظاهره سمعت عنها من صاحباتي وانا بدبي بس الشوف مش زي السمع بالمررره, الظاهره هي العلاقات الغراميه بين الموظفين و الموظفات , كتبت قبل عن الموضوع تحت عنوان اهواك بلا امل  من قبل , الموضوع مش حاله فرديه و في حالات موظفتين متزوجتين على علاقه بنفس الموظف  المتزوج و وحده منهم بتبكي و بتحكيله "بدك تتركها" O.o, كبار و صغار و في بنات انصدمت بانهم قبلو على حالهم هيك موقف و انسو الشباب اللي صارو يفكرو حالهم اشي ما حصل, بحكو معنا كأنهم دنجوانات زمانهم و ياااااا نيالنا بوجودهم معنا و هو مع احترامي الشديد لو يقعد 100 سنه بوجهنا ما بنفكر نصبح عليه, مش تقليل من قيمتهم او تكبير بنفسنا لا سمح الله بس جد شوووو بالنسبة !!!!
مرّه كنت بدي اعلق على موظفه بوجهها صارو صاحباتي يسكتوني .... و بس ....والله يخليكي ما بدنا نورط... انصدمت منهم حكيتلهم  الدنيا صارت بالعكس, اللي بعملو المصيبه بعملوها علنا و اللي بدو ينكر المنكر بتسكّت , طلعو محاولين ينصحو وحده قامت ردحتلهم رسمي و صارت تصرخ و تقاتل

هلأ في ظاهره تانية لفتت نظري و خلتني افكر اكتر بالموضوع, كل مره بروح عالمول او بسمع صاحباتي بحكو عن ازواجهم و عن حياتهم بلاحظ البعد و الجفاء الغير طبيعي بين الازواج, جفاء يبعث على الاكتئاب :$
اللي بالمول بكونو كل واحد صافن بجهه لو لحالهم او معهم اولاد, لو صغار او كبار كلهم مكشرين وماشيين وحتى لو باكلو كل واحد مكشر و بياكل وما حد بحكي مع حد ولا حد بضحك مع حد, لدرجة اني مره كنت انا و بنت خالتي بالمول واحد و مرته ماشيين وشكلهم يوحي بانهم متزوجين جديد التنين امامير و صغار شفناهم بضحكو و بحكو و كأنهم بدورو على محل و همه ماشيين البنت مسكت ايد الشب قام سحب ايده من ايدها بطريقة خلتني انا اللي ما الي دخل انكسف , انا شهقت بنت خالتي بتحكيلي شفتي ؟؟؟ البنت المسكينه احمر وجهها و اختفت ضحكتها اشي بصدم

الموضوعين كتير خطيرين لو فصلناهم عن بعض, الفتور المبكر و الملل و الزهق اللي بصيب الزوجين مشكله كبيره, و العلاقات الخارجيه حرااااااام و خيانه و قرف و قزز,  هلأ اللي فكرت فيه انه هل هالموضوعين الهم علاقة ببعض؟؟؟ معقول واحد منهم مسبب للتاني؟؟ و اذا اه مين فيهم سبب للتاني؟؟ يعني هل العلاقات خارج اطار الزواج هي السبب بالفتور و الاكتئاب اللي صايب المتزوجين؟؟ ويلا العكس ...الفتور مسبب ان التنين يدورو على ناس تانيين يملو الفراغ ؟؟؟ 


سأنتظر الشمس




وقفت على نافذتي اطالع الوجوه علّي ارى وجها ألفته.... 
اتدري ماذا!!!
 لقد اكتشفت اليوم اني ألفت جميع الوجوه كلها متشابهه في عبوسها الذي تخفيه تحت ابتسامتها المتصنعه
كلها تتشابه في الافكار المخفيه تحت كلمات التفاؤل المزيفه
لقد اصبحنا في زمن تشابهت فيه الوجوه لاتفاق القلوب 
لاول مره تتفق القلوب.. مضحكه مبكية هذه الحقيقه
اتفقت على الالم و والاسى...القلوب اخيرا تساوت..تساوت في القسوة

لعلّي كنت ابحث عن وجه محبب


وجه يدخل النور الي قلبي... وجه يشعل النيران بداخلي ...وجه يدفئني في هذا اليوم البارد


لا...لا... لن انتظر

ساعود الى المدفئه والى ملابسي التي تضمني ولا تتركني فلقد اخذت القرار

سأنتظر الشمس

سأنتظرها فهي الوحيده التي تعود...وهي الوحيده التي تظهر ما في قلبها بدون اي تجميل...هي الوحيده التي تظهر ما تخفيه


الا ليت قلوبنا كما الشمس...مهما غابت ومهما غلت وفارت ومارت تعود الينا بدفئها المحبب



سأنتظر الشمس اذا...

Happy 22nd Birthday To Ali :)




مهما بعدنا بنضلنا نرجع لهالعالم
بنفكره اسؤ من الواقع ولكن فيه ناس بتثبتلنا انه افضل من الواقع بكتير
و صديقنا علي و والده يوسف من هالناس الكتار
اللي ربنا وفقني بالتعرف عليهم هون

اليوم عيد ميلاد صديقنا علي 
بإسمي و بإسمكم وزي كل سنه بحكيله
كل عام وانت بالف الف خير
عقبال ال 100 سنة اللي تقضيهم بسعاده و فرح
سنوات و عمر مديد من المحبه و السعاده اللي بتدخلها على قلوبنا
وعلى قلوب والدك  والدتك و اخوانك يا رب

انت ما احترمتيني



قبل كم يوم طلعنا انا و بنات خالتي عالمول نتغدا و نتسوق، و احنا بالمحل وعند الكاش وكاي عائله اردنيه وقفت كل وحده منا على كاش لحتى اللي بيجي دورها اول نلتم عندها و ندفع سوا.


وحده منهم صار قدامها بس ﺯﺑﻮﻧﻪ ﻓﻜﻠﻨﺎ وقفنا جنبها، وحده من بنات خالتي حكت للشب اللي واقف وراها " معلش بس احنا مع بعض" حكالها " لا مش معلش وانا شفتكم كنتو واقفين بالدور هناك،بدكم توقفو وقفو بس انا مش مسامحكم" بنات خالتي ما فرقت معهم و لكن انا ضميري انبني و حسيت كلمه مش مسامحكم كبيره.


خلصت الزبونه اللي قدامنا فانا طلبت من بنات خالتي انه نخلي الشب يحاسب قبلنا خصوصي انه ما حد وراه, لفيت وجهي و حكيتله اتفضل ، بحكيلي و بنفتره و عصبيه " لا شكرا ما بدي" بكل ادب واخلاق حكيتله لا خلص تفضل انت حاسب واحنا بنحاسب وراك, رد بنفس العصبيه " ما بدي خلص انتو ما احترمتوني واللي صار صار"


تلقائي حواجبي ضربو بالسقف وحكيتله " انت حر انا ضميري هلا مرتاح و هلا الموضوع صار مشكلتك انت مع نفسك و انا مسااااامحه نفسي" و لميت اغراضنا كلها و حطيتها قدام الكاشير 


انا مش حاسه حالي غلطت بالمره لا انا ولا بنات خالتي لانها حركه كل العالم بتعملها، خصوصي انهم فتحو كاش جديد و اللي ورانا راحو عليه وحاسبو واحنا واقفين و هو اجا بعدنا اساسا ، كلمه مش مسامحكم خلتني افكر الشب بفهم و معه حق  ولكن ردة فعله و طريقه كلامه بعدها حسستني انه " الله يعييييين مرته عليه :$ " اذا انا ولا بعرفني صار بده يعطيني محاضره و بتحترميني وما بتحترميني قدام الكاش فكيف المسكينه :$