Things I Like To Whisper About

Would You Hear Me Whispering

مدونه صيف 2009




احمد المحروق زميل جديد النا بالتدوين اقترح فكره عمل مدونه صيف 2009

الفكره باختصار ان كل واحد يرشح مدونته او مدونه بتعجبه لتكون
هي مدونه صيف 2009 وراح يستمر الترشيح لمده اسبوعين ابتدءا من 1-7-2009 و لغايه 15-7-2009 الترشيح بتم اما بانكم تكتبو بالتعليق مين بترشحو, او اذا بتفضلو تبعتولنا ايميل بالمدونه اللي بدكم ترشحوها على ايميلاتنا انا واحمد

whisper - My_loud_whispers@yahoo.com
Ahmad - aalmahrouq@gmail.com


بعد الترشيح بدنا نعمل جروب عالفيس بوك باسم مدونه صيف 2009 و نحط اسماء المدونات اللي تم ترشيحها من قبلكم.

و التصويت حيستمر لاسبوعين ابتدءا من 16-7-2009 ولغايه 31-7-2009
وراح نعلن الفائز واللي عنده اكبر عدد اصوات من تصويتكم باول شهر 8 ان شاء الله


انا الفكره عجبتني كتير ويا ريت تدعمونا بمشاركاتكم و بتصويتكم وتصير هاي الفكره تطبق كل صيف ان شاء الله
وبشرفنا نعرف رأيكم واذا في اي اقتراح عندكم لتحسين او نشر الفكره اكتر :)

اذا حابين تضيفو البانر لمدوناتكم بتقدرو تاخدو الكود من هون


Create your own banner at mybannermaker.com!
Copy this code to your website to display this banner!




تعديل

في كان استفسارات عن كيفيه التصويت ومين ممكن يصوت و كم مره بحق للشخص يصوت

الاقتراح الحالي انه
التصويت عن طريق جروب ع الفيس بوك ... مننزل لينكات للمدونات المرشحة , و الناس اللي بشتركوا بالجروب بضغطوا
على " لايك " للمدونات اللي بصوتولها ... يعني الواحد بصوت لآكتر من مدونة ... بس ما بقدر يصوت اكتر من مرة لمدونة وحدة

وكل فتره بصير تشييك على النتائج و بنزلها انا واحمد في مدوناتنا كل فتره.

الجائزه للي بفوز
اول شيء لقب مدونه صيف 2009 و بنعمل بانر انا و احمد و الفائز بنزلها بمدونته و اللي بحب يضيفها بنعطيه اللينك.

شو رأيكم
انا حاليا بستنا اقتراحات وان شاء الله بس توصلني بنزلها عالمدونه :)
واللي عنده اي اقتراح يحكيلنا :)

انا بحب 100 ولد


صاحبتي متفقه هي وبنتها اللي عمرها 7 سنوات انها تحكيلها عن كل شي بصير معها
و حكتلها اذا حكيتيلي اللي صار بدون ما تكزبي او تخبي علي اشي ما راح اعاقبك

امبارح البنت اجت لامها بتحكيلها
ندى : ماما امبارح بنت عمتي حكتلي اشي و حكتلي انه سر وما بصير احكي لحد, بس انا مش حاسسته سر - بنت عمتها بالصف الثالث الابتدائي.
الام : ايش حبيبتي ..ايش هو السر؟
ندى : بنت عمتي حكتلي انها بتحب ولد, و كاتبه عالدفتر قلب حب و حاطه حرف اسمها و حرف اسم الولد اللي بتحبه
الام : بتحب مين يعني؟؟
ندى : بتحب احمد ابن عمتي, بس انا حكيتلها انه عادي, حتى انا بحب 100 ولد.
الام : بتحبي 100 ولد ؟؟؟؟
ندى: اه بحب اخوي محمد و اخوي عبد الرحمن و بحب بابا و بحب عمو و بحب خالو وبحب....وبحب...

الجيل الجديد بحسّه اوعى منا بكتير, وكتير قليل اللي بعيشو طفولتهم متل ما عشناها واللي ندوووش منهم , يعني بتزكر انا بالصف الثالث كان اكبر حوار يصير بيني وبين اللي بعمري, ان الباربي تبعتي احلى من الباربي تبعتك, وفستانها احلى.

او اني اتسلق عالباب زي اللي بالصوره فوق و احس حالي عامله انجاز وكل ما يجي حد من ولاد العيله اتشطر قدامه, واعطيه الوصفه, ما بصير تكون لابس جرابات و بلل رجليك علشان يلزقو منيح :)


اني احكي عن مشوار الملاهي اللي حسيته زي الاحلام, او انّا نضل نضحك بدون سبب خصوصي بس اجتمع مع بنات خالتي و نكون قاعدين بجمعه والكل ساكت , وماما وخالتو يجحرو فينا واحنا هات يا ضحك, على شو ما في سبب :) .

جيل اليوم مش ناضج وفي منهم ما بنضجو بالمره, بس معلوماتهم اللي ما الها لزوم ومش مفيده بحياتهم بوقتها ما شاء الله بتألف مجلدات منها!!!

اكتشفت اني بحب 100 ولد وانا مش عارفه...اخرهم عبود ابن اخوي :)
شكرا ندوووووش

Ice Cream




امبارح عملت ايس كريم و اليوم اجو عنا ناس و اكلناها و الحمد لله كتير كتير زاكيه
اللي عجبني بالوصفه انه ما فيها كريمه و السكر بتقدري تخففيه زي ما بدك, يعني مش خفيفه 100% بس اهون شوي

المقادير

1 كاسه حليب ناشف
1 كاسه سكر ناعم
2 كاسه ماء
1 ملعقه صغيره ممسوحه سحلب :)

اذا النكهه شوكولاته نضيف 3 ملاعق كبيره كاكاو
اذا النكهه عربيه نضيف رشه فانيلا و فستق حلبي و شويه مستكه :)
اذا النكهه فراوله - زي اللي عملتها بالصوره اللي فوق - بنضيف كيس شراب على النكهه اللي بدنا اياها و بنقلل السكر الى 1\3 كاسه سكر او اقل, و قطع فراوله

كل المقادير بنخلطهم بالخلاط ما عدا السحلب , بعد ما ينخلطو المقادير منيح, بنضيف السحلب ونخلطه لفتين و بس و بنفرغ الخليط بتبروير و بنحطه بالفريزر و صحتين وعافيه :)


انا حاطه على وجه الايس كريم لوز مبشور و بسكوت محشي فراوله
*

مش هيك الهبل


اليوم زرت بنت خالتي راجعه من اجازه بتركيا
وجايبه معها هاللعبه
جد هبوله و تحشيش شكلها
بتضغط عالايد و بتصير ترقص
بس بعتذر التصوير بالعرض و حاولت كل البرامج اعمله
Rotate
ومش زابط :(



Indian Starbucks :D



حسب ما سمعت انه تاني احسن فرع لستار بكس على مستوى العالم
صحتييييييييييييييييييييييييين




رحلتنا :)




يوم الجمعه الماضيه رحنا انا وصاحباتي بالشغل رحله على جرش وعجلون
الصيف الماضي رحنا على الاثار بجرش وعجلون هالصيف قررنا نروح على الخضار اللي بجرش وعجلون

الحمد لله الرحله كانت بتجنن وكتير انبسطنا

بدينا يومنا بالقهوه الساده اللي جايبتها وحده من البنات و عالطريق اشترينا كعك وحمص وفلافل و شويه خضره و توجهنا لدبين, هناك عملتلنا وحده من البنات اللي مسكينه دايما بتعمللنا الساندويشات بالرحلات, انا ساعدتها باني فتحت الكعكات و هي كملت الشغل :)

افطرنا و صلينا الظهر جماعه و قعدنا نتحدث, وكل ما نجيب سيره الشغل نذكر بعض انا متفقين ما نجيب سيره الشغل واحنا طالعين لننساه.


بعديها انتقلنا لارض لاهل صاحبه النا بعنجره , قعدنا هناك شوي و طلنا الشيبس والمكسرات وهالاشياءات الزاكيه و ضلينا ناكل ونتحدث لصار موعد الغدا, الغدا المفروض يكون بموقع تخييم شبابي بعجلون , المخيم كتير كتير حلو, فيه شاليهات , ومرافق صحيه نظيفه - هاد اهم اشي - و خيم وبرك سباحه و ملعب كره سله , وفي مكان مخصص للاكل تغدينا فيه وجيبات موصيه عليهم صاحبتي من قبل بيوم من المطعم اللي جنب المخيم, واحنا بالطريق اتصلت فيهم بعد نص ساعه من وصولنا اجا الاكل, و الحمد لله الاكل كان بشهي :)

اكلنا و تمشينا و لعبنا و اكتشفنا الموقع و رحنا عالشاليه غسلنا واتوضينا و صلينا العصر وبعديها اتفقنا نرّوح و احنا بالطريق نقعدلنا بمكان ساعتين زمن , وبعدين نكمل لعمان

اللي صار انه واحنا بالطريق مرينا من جنب واحد ببيع بطيخ, قامت وحده من البنات حكت انها بدها تعزمنا على بطيخ....طيب كيف بدنا ناكل واحنا استخدمنا الشوك والمعالق بالمخيم؟؟؟
حكو بلا اتيكيت بلا هم....هو في ازكى من اكل البطيخ من القشره مباشره!!!

وفعلا هاد اللي صار....وقفنا عند البسطه و طلع الزلمه ببيع اراجيل , اعطانا طاوله وكراسي و وصوه اللي بأرجلو على اراجيل - بدينار الارجيله و حسب ما حكو انها كتير مزبّطه - المهم نزلنا و جابو البطيخه غسلوها و تبرعت وحده من الصبايا تقطع البطيخه و وزعت علينا البطيخ بصحون - الحمد لله انا ما كبيناهم بالمخيم - و اكلنا و شروطنا - يعني بس تصير وجوهنا مليانه بطيخ واحيانا مناخيرنا تصير مليانه بطيخ والارض وكلها بطيخ - قمنا غسلنا و مسحنا بالويت وايبس , وفجأه وحده من البنات جاي و معها ضمه حامله خضرا, و بدو ياكلو البنات, انا ما اكلت لاني ما بحبها هيك , بحبها مشويه, وضلينا قاعدين لقربت تغرب الشمس و رجعنا للزلمه الكراسي والطاوله واللي ما رضي ياخد فلوس عليهم, وحاسبوه عالاراجيل و روحنا عالبيت على صوت عبد الحليم باغنيه "زي الهوى" :)

كتير طلعنا رحلات من قبل انا وصاحباتي, بس هاي كانت من احلى الرحلات :) الحمد لله

اتركم مع الصور






















استطلاع الرأي




دائما بنقرأ بالصحف او بنسمع بالتلفزيون ان الجهه الفلانيه قامت بدراسه, او بعمل استطلاع لاراء الشارع, و طلع 90 % من العالم بأيدو المشروع الفلاني, او 54% من العالم ما بحبو البطيخ, او 45.0006% من العالم ما بسمعو لفريد الاطرش... وغيرها كتير من الاستطلاعات و اراء العالم المهمه.

انا شخصيا عمري ما حد اخد رأيي او استطلع عن رأيي بشي, وكل مره بقرأ هيك خبر بسأل قرايبي و صاحباتي بالشغل و بسألهم يا جماعه في حد منكم او من قرايبكم انسأل عن هالموضوع, الكل بجاوبني انه لأ

طيب من وين جابو هالارقام؟؟؟ و دراسات مهمه زي هاي معقول يسألو مجموعه و يقدرو الباقي تقدير؟؟ يعني مدام بصير يقدرو , ليه بحكو استطلاع واراء الشارع؟؟؟ يمكن في الها عمليه حسابيه معينه وانا ما بعرفها!!


حتى الاستطلاعات اللي بتكون محطوطه على المواقع الاخباريه عالنت, مع ان ما اعتقد ان نسبه كبيره من الشعب الاردني بشبك عالنت و ببدي رأيه بهالاستفتاءات, ويلا بحسبوهم عاساس عدد اللي زارو الموقع وصوتو!!! اذا هيك ... ليش بحكور أي الشارع او المواطنين وما بحددو انهم زوار الموقع لحالهم!!!

فيا جماعه اذا حد منكم قبل هالمره شارك باستطلاع يحكيلي...بركي بس انا واللي حوالي همه المستثنيين و المقدره ارائهم !!!
او اذا بعرف كيف بعملو هالدراسات وبطلعو هالارقام بدون ما يسألو العالم برضه يحكيلي


اختلاف معايير

اليوم كنت بحوار عن موضوع مقارنه تصرفات الشب مع تصرفات البنت
يعني القصه اللي انطرحت ان في شب جايب بنت تتعرف على امه لانه بحبها وبده يخطبها
اهل الشب شايفين ان الموضوع عادي وبما ان الشب جايبها ازا فعلا قصده اشي منيح

انا من وجهه نظري ما بدي اخالف او اعارض بس لو ان اخت الشب راحت مع واحد بده يخطبها على بيت اهله شو بكون موقفه ساعتها؟؟؟


قصه تانيه صارت مع اخوي, وهو بدور على عروس راح شاف بنت و خلال نفس الجلسه اعطو لبعض ارقام موبايلاتهم, والبنت صارت تبعتله مسجات ان انت الشب اللي طول عمري بحلم فيه , وكل شوي مسج, وانا اسعد بنت بالدنيها وهالقصص, اهلي شافو هالشي نوع من تمسك البنت باخوي, وصارو يقنعوه بالبنت, انا سألتهم لو انا اجا واحد عالمكتب عريس المفروض و اخدت رقمه و صرت ابعتله مسجات شو بكون رأيكم, ماما حكتلي لا انت ما بتعمليها , انت تربايتي!!!

طيب هل هاد بعني ان تصرف البنت صح ويلا غلط؟؟

القصد ان دايما بمجتمعنا راح نضل نشوف تصرفات الشب و اي شي بخصه الها تبرير برئ جدا
اما تصرفات البنت اللي بتخصهم لازم تكون مدروسه و اي تصرف بدها تتحاسب على ادق ادق تفاصيله



دامت "الافراح "حليفه دياركم



كلنا بنعرف ان هالوقت من السنه بتكتر فيه الاعراس, الله يفرح الجميع يا رب


انا قبل هالمره حكيت عن العداوه بين اهل العروس واهل العريس "في بوست عقبال العايزين", الاشي اللي جديد انتبهتله ان اهل العيله نفسها برضه ما بكونو طايقين بعض.

وانا بعرس قبل كم من يوم سمعت هالحوار بين بنتين من عيلتنا و بحكو عن بنات تانيين من نفس العيله, الحوار استمر من اول العرس لاخره بفترات متقطعه.

شفتي فلانه...... ما راح اسلم عليها, مش مجبوره انا اروح, متيجي هي, شو مفكره حالها.
شفتي فلانه ..... شو هاللبسه الله يقرفها, والله لو يعطوني اياه ببلاش ما باخده.
شفتي فلانه....اجت عيني بعينها 3 مرات و لا سلمت علي صحيح انها ما بتستحي.
شفتي فلانه..... يا الله شو نصحانه وبشعانه ,صح؟؟؟
شفتي فلانه.... ....
شوي مرت فلانه من جنبهم , و اجت تسلم عليهم,التنتين قامو وهجمو عليها, والله ما شفناكي وين كنتي قاعده, شو هالحلاوه اه يا عمي التفصيل غير عن الجاهز والغالي سعره فيه, وهو بالاخر القالب غالب بضل هههههههههههه
انا صرت اقنع حالي ما تدخلي يا بنت, يسطفلو , وشو بدك تحكي للبنت؟؟ كانو يحكو عنك بشعه ولبستك بتخزي وصايره بقره!!! وهيك بطلع انا المنيحه؟؟؟ شو بدك...لا تتدخلي.

اشي تاني بدي احكي عنه اول ما شفت هاد الفيديو تزكرته
بس تصير ام او اخت العريس\ العروس يقومو الصبايا علشان يرقصو, في بكل عرس بنت ما بترضى ترقص و بتضل تحكي لأ و ما بعرف و الكل بصير يترجاها, وهي مستحيه و بتضحك وبتخبي وجهها, قمه البراءه و الخجل.

وبعد نص ساعه اقناع, بتوصل للبيست و هي مستحيه و وجها احمر, وبس تحط رجلها عالبسيست هات يا رقص , وبتصير ترقص بذمه وضمير وهات مين يعقعدها
هالبنوته اللي بالفيديو عملت نفس الشي , ضلهم يتحركشو فيها و هي يا دوبها عارفه تزقف و بس قررت تبدا انسجمت عالاخر

اتركم مع الفيديو :)







:)

احلام وافلام..وقصص طرمه :$


اليوم روحت من الشغل كتير تعبانه ففضلت انام على اني اكل او اعمل اي شي, وفعلا هاد اللي صار.

غفيت فورا و بلشت الاحلام اللي ما الها دخل, قصص طرمه عن جد...عميله سريه و بالمطار كنت, وانا هاربه منهم فجأه بالشارع ماشي ابو صياح و بتحكي معه جينفر لوبز, ايون جنفر لوبز و كيت هدسن, وعلشان يزبط مع وضع الاكشن اللي انا فيه كانو بالابيض و الاسود وبحكو عربي, ما تسألوني كيف هيك الحلم كان.....بحكيلكم قصص طرمه من الاخر :$

مش هاد موضعنا, وانا لسا بدي احكي مع وحده منهم ,صحيت على رنه موبايلي السايلنت - ما بعرف ايمتا بدي ابطل هالعاده و ابطل اصحى من اقل ضو - المهم انا بما اني لسا عايشه ضمن عالم الاحلام فكرت الدنيا صارت الصبح و اني نايمه بالليل مش العصر, بنص فانيه - اقل من الثانيه هاي - كنت ملزقه بالساعه المعلقه على الحيط, شايفتها 5:30 بس مش مقتنعه , صاحبتي بتحكيلي "الو" بحكيلها "كم الساعه كم الساعه" بتحكيلي " نعم, كيف يعني؟؟؟" وقلبي صار يدق كل دقه ما الها دخل باللي قبلها وبسرعه " تك دف دوف تااك تيك داف" هو كمان يا حرام مش فاهم شو صار.

فتحت باب الغرفه و صرت الف على ساعات البيت وافكر " طيب ليش ماما ما صحتني على صلاه الفجر " و صاحبتي بتحكي معي وانا ولا انا هون, فجأه سمعتها بتحكيلي " يا علي ان شاء الله, شكلك كنتي نايمه" هون بدت الذاكره ترجعلي شوي شوي و تزكرت اني نايمه العصر, ونزل علي الضحك و بطلت قادره اتنفس و لا قادره اسمع شو بتحكي صاحبتي, حكتلي انها بترجع تحكي معي كمان شوي,سكرت الخط رجعت عالتخت علشان اخلي قلبي يهدى شوي , و هات اني اعرف اوقف ضحك, صار هالموقف معي اكتر من مره بس مش مع حلم ابيض واسود زي هالمره, و اجت ماما على صوتي وانا بضحك " اسم الله عليكي, ابوكي بحكيلي شكله البنت صحيت, بقولو لأ لسا يا دوبها نامت " واجت مميتو تمددت جنبي و حكيتلها المغامرات و انا بضحك ويا دوب قادره احكي :)


Same Whispers In New Look

واخيرا غيرت شكل المدونه...دورت كتير و ما لقيت اشي يعجبني اكتر من الشكل القديم
بس كتير ناس حكولي ان في مشكله بمدونتي القديمه, حاولت اني الغي الاضافات بس شكلي ضايفه اشي داخل الكود ومش عارفه ولا متذكره شو هو

ان شاء الله يكون الشكل الجديد عجبكم
رأيكم اكيد بهمني......

انا مرات بحسّه حلو ومرات بحسّو معجوء .... مش عارفه

هلأ ضايل اضيف كم من شغله واهمها اسماء المدونات اللي بحب اقرأها :)

الدنيا صغيره





اليوم كنت معزومه على جمعه صبايا عند وحده من صاحباتي تعرفت عليها جديد و حبت انها تجمع كل الصبايا عندها,
صاحبتي عازمه اكتر من ناس , بنات بعرفهم و بنات ما بعرفهم.

من ضمن اللي اجو صاحبه الي من الجامعه من سنه التخرج ما شفتها, يا الله اول ما شفتها احساس غريب صابني , وذكريات كتيره دارت فبالي, زي كيف عرض الافلام زكرياتي رجعت لورا بسرعه بعدين بسنوات الجامعه صارت تمشي شوي شوي, وخصوصا لما كل وحده صارت تحكي للتانيه عن اخبار العالم اللي لسا على اتصال فيهم, اخدنا ايميلات بعض و تلفونات بعض و رتبنا لقاء السبت الجاي ان شاء الله اذا كانت ظروفنا مناسبه.


طبعا كل ما اجا ناس جداد تعرفنا صاحبتي عليهم , وبتعرفو الحكي شو اسمك وشو بتقربلك فلانه و وين دارسه و ين ساكنه و وين بتشتغلي, انا اول ما حكيت مكان شغلي نطت صاحبتي بتحكيلي اول مره بعرف, بتعرفي مين زوج خالتي - اللي كانت قاعده معنا - بحكيلها مين؟؟؟ بتقلي فلان الفلاني.... ومين يطلع فلان الفلاني.......أن أن أأأأأأأأأأأأن "مديري" :(

انا طبعا ابتسمت ابتسامه صفرا, زوجك يا خالتو انسان وقح وقليل الادب وما بحترم حاله ولا بحترم عمره, زوجك قارفنا حياتنا بالشغل, زوجك بس تتصلي فيه واحنا عنده بالمكتب بس يسكر الخط بقعد يحكي عليكي بطريقه مش منيحه و مش محترمه, زوجك شخصيته عدم وما بفهم بشغله, زوجك انسان حرامي و اكتشفنا هالشي و هو عرف يضبضب الموضوع, زوجك ما حد بكل الشغل بحبه و بالعكس ظلم عده موظفين وطلعهم من الشغل ظلما و بهتانا , وبدعو عليه.


كل هالحكي اختصرته بكلمه وحده " اهلا وسهلا...فرصه سعيده" فكركم فهمت :$

Little Becky's call

I wish they can do that to my work place
in a working day
and only me and my dearest friends to take that day off :D
listen to little Becky's call and you will understand




by Little_Becky
Fandalism Free MP3 Hosting

خلدون

كتير منا باي موقف بواجهه بالحياه او اي مصيبه بتعرض الها بوقف عندها و بتمر سنين وهو واقف مكانه بندب حظه, و يبكي عالماضي.
في ناس بصيبهم يأس , وناس لأبسط مشكله بتواجههم ممكن يفكرو ان اسهل طريقه ليخلصو منها هي انهم يخلصو من حياتهم نفسها.

وفي ناس مهما صار معهم بضلو متفائلين و ايمانهم بربنا بقويهم و بقوى داخلهم مثل خلدون.

خلدون شاب سوري تعرض لحادث وهو بعمر ال 18 سنه , قفز في بركه توقع انها عميقه فضرب راسه بالارض و اصابه شلل كامل.
لكن برغم كل شيء خلدون ما يأس وضل متفائل و مصمم انه يعمل شي
اتركم مع القصه كامله




الله يشفيه ويعافيه و يزرع صبره وصبر اهله بقلوبنا

يا محلى طفولتنا



كل شي من زمان كان احلى واله جوه اكتر من هالايام

ومش لانا كبرنا بنحس هيك....لان حتى الصغار بطلو يعيشو بهجه وحلاوه المناسبات
رمضان, عيد, عرس, جمعات عائليه, رحلات, مشاوير......
كل هالامور كانت من زمان احلى, كنا ننبسط بكل تفاصيل المناسبه و اهلنا كمان , الايام هاي كلها واجبات اجتماعيه للصغير و الكبير.

بتزكر برمضان كنا انا و اخواني نطلع على السطوح قبل المغرب بنص ساعه احنا و ولاد عمي, نلعب طمايه (غمايه) مع ان السطوح كان مكشوف وما فيه غير تنكين مي, وما في مجال غير نتخبى وراهم, لكن المهم السرعه باللي بضرب محل ما كان اللي عليه الدور طامم راسه و يحكي كمستير :) - من وين بالزبط هالكلمه و شو معناها ما بعرف بس هيك كنا نحكي , وجلول و مسدسات و السبع حجار - اه كنت العبهم كلهم بحكم اني البنت الوحيده بين شباب كنت حرّيفه جلول :) بس ماما انتبهتلي بعمر 6 سنين ورجعت العب بالباربي و هالقصص البناتيه - المهم انا كنا نقضي احلى الاوقات.

و العيد ....يا الله ما احلى العيد كنا ما انام الا واحنا معلقين الاواعي الجديده عباب الخزانه و حاطين الجربات جوا الكندره الجديده و اخر اشي نشوفه همه الاواعي و اول اشي نشوفه اول ما نفتح عيونا الاواعي, وتلقائي نصير نضحك.

كنا نروح على دوار فراس ايام ما كان دوار, وكان في بالوسط 3 اسطوانات اسمنتيه , كان بابا ياخدنا ناكل فلافل من عند جواد, او شاورما من عند عاليه و ناكل ونلعب و نروح مبسوطين.

الجمعات العائليه والاعراس, يا الله ما احلاها من ايام وما احلاها من زكريات, خصوصا بالصيف يكون زي حاله طوارئ, الكل جاي من السفر و استقبالات و جمعات و رحلات و سهرات, ماما كانت تحكي عن اشهر الصيف اشهر الزوبعه, لانه بعد ما يخلصو ويتسهلو المغتربين, فجأه بهدى كل اشي.


هلأ بطل في بهجه لاشي, وحتى الصغار ما بشوفهم مبسوطين زينا, يعني الطفل هلأ عنده انه يضل يلعب بلاي ستايشن 5 ساعات وما يتحرك من مكانه ولا يشوف شمس ولا هوا كتير احلاله من الطلعه.
صارو الصغار يتشرطو, اذا المكان الفلاني ما بدي اروح, اذا عند الناس العلانيين خلوني بالبيت, عنده صحابه بسوو العيله الكريمه من كبيرها لصغيرها.

حتى افلام الكرتون كانت احلى على زمنا :)
عدنان ولينا, ليدي اوسكار, توم سوير , هايدي , ريمي, قصص عالميه, جودي ابوت ........
همه كله ابطال خياليين, ديجيتال و بوكيمون ( مع احترامي الشديد للبوكيمون بلاش حد يزعل مني :$ ) و اشياء غريبه

يا الله ما احلاها من ايام....



سلسله عرسان - الحلقه التاسعه




القصه اليوم مش عني...القصه سمعتها من صاحبتها اللي طلبت مني اكتبها هون

البنت من عيله عندها شرط اساسي ان البنات يتزوجو بالترتيب حسب العمر, وبرفضو البنت الصغيره تتزوج قبل الكبيره, العيله كان فيها 6 بنات , صاحبه القصه رقم 4 بالبنات , البنات الكبار ال 3 تزوجو و هلأ صار دورها.

العيله من اللي بزوجو بناتهم بعمر صغير يعني بتخلص البنت توجيهي و بتزوج فورا و الاخت اللي ترتيبها 2 بالبنات بعتبروها تزوجت كبيره لانها تزوجت بعمر ال 20 يعني قعدت سنتين بالبيت ...

عمر البنات ال3 الصغار متقارب جدا, و كان يجي عرسان ممتازين للبنتين الصغار و ما يجيها عرسان زي العالم, وطبعا الاهل يرفضو العرسان لان الكبيره لسا ما تزوجت, مع انها كانت تحكي لاهلها انها ما عندها اي مشكله لو اخت من او التنتين تزوجو قبلها, بس الاهل كانو رافضين الموضوع تماما.

وهي بعمر ال 21 تقدملها عريس وكانت مواصفاته ممتازه بالنسبه لعيلتها , صاحب مصلحه و من بلد معينه - لانهم برفضو عرسان من مدن معينه و من عائلات معينه - المهم الشب مواصفاته كانت مناسبه , والموافقه كانت من الطرفين, واتفقو على كل التفاصيل والمقدم و المؤخر و هالامور, اتفقو المقدم 3 الاف و المؤخر 5 الاف, و بعد عده زيارات المفروض انهم اتفقو على كل اشي, اجو اهل العريس و حكو ان الشب مشغول كتير بشغله و انهم مضطرين يأجلو الخطبه لفتره لحتى يخلص شغله, اهل البنت ما مانعو بس اكدولهم اهل العريس ان الفتره ما راح تزيد عن شهر, وبعدها غاب العريس و اهله وما بينو بالمره, و ابوها حكالها انه لو اجا عرسان بدك تشوفيهم وتنسي الشب وهاد اللي صار, و بهالوقت كان يجي عرسان للبنات الصغار و برضه الاهل يرفضو الموضوع لتتزوج اختهم الكبيره.

مرت سنه عالموضوع وبيوم من الايام اتصلت ام العريس و احنا اسفين والله انشغلنا و توفى مش عارفه مين و الدنيا اخدتنا و احنا حابين نيجي نزوركم و احنا حبيناكم و حبينا البنت ومن هالحكي. المهم اجا العريس و اهله و المفروض انه خلص بدهم يحددو موعد حفله الخطبه, ابو البنت حكا بنضلنا على اتفاقنا الاولاني, 3 الاف متقدم و 5 متأخر, رد ابو العريس لا يا ابو فلان لا تنسى ان البنت الها سنه قاعده, الفين مقدم بكفو......

سكت ابو البنت, وقام فتح باب البيت و حكالهم الله معكم ما عنا بنات للزواج, صار الاب يعتذر ومش القصد و بالعكس البنت بتتقل بالذهب, الاب رجع حكالهم نفس الجمله " الله معكم وما عنا بنات للزواج"

البنت هلأ متزوجه وعندها 3 ولاد , زوجها شخص رائع و بستاهلها و بقدرها و بحبها كتير, و خواتها متزوجين من العرسان اللي كانو يتقدمولهم قبل , كل وحده كان في عريس يضل كل فتره يجي يخطبها و الحمد لله ربنا يسرلهم احسن الازواج, يعني اللي كاتبه ربنا هو اللي شافوه وبوقته .

غريبين بعض الناس كيف بعتبرو البنت زي غرض معروض بمحل و السنه التانيه بدو يصير عليها تنزيلات لانه صار في موديلات جديده بالاسواق و لازم يخلصو من القديم..... و غريبين الاهل اللي لسا متمسكين بان البنت الكبيره هي اللي لازم تتزوج....الحمد لله ما عندي خوات كان اكلو هوا وهمه بستنو فيي :)




ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقات السابقه

Evening Smile :D


زفر


زبعه


دزعه


غمزه


غمزة


زتة


دزعة


زفر


زبعة


زبعة
.
.
.
.
.





سوداني بينقل صاحبه رقم موبايله.





عجبتني النكته وحبيت اشاركم فيها D:

"مع احترامي الشديد لجميع اخواني واخواتي من السودان :) "

حمله تغيير المبادىء



اكتشفت خير اللهم اجعله خير ان بس يكون الموظف - بغض النظر عن موقعه و وظيفته - لما يكون صاحب مبدأ ,و ارضاء العملاء او المراجعين او المواطنين, هو اهم انجاز بالنسبه اله, وبشتغل شغله على اكمل وجهه , و ما بستغل منصبه باي طريقه, وبرفض اشي اسمه واسطه, هاد الانسان بكون ملطشه العالم, و جميع حقوقه مهضومه و محروم من الحوافز والمكافأت, ولا يمكن حد يفكر يحط اسمه باي لائحه تميز مهما كان مستوى هالتميز.

اما الانسان اللي بلف وبدور وما بلتزم بدوام رسمي او غير رسمي, وبستغل منصبه لتوظيف اقاربه وابناء عموميته, و بستغل منصبه بالعطوات والجاهات و اكل حقوق الناس, و الواسطه بكون اسمه التاني قد ما هو مرتبط فيه, واللي المواطنين مش راضيين عن ادائهم
هدول بكون كل العز الهم, سيارات بدون جمارك, حج ببلاش , رواتب من 3 خانات, و اخيرا تدريس مجانا لاي 10 طلاب من اختيارك .....طبعا احنا متأكدين ان لا ابن اخو ولا ابن اخت راح يكون من ضمن هالاسماء
واكيد راح يصير دراسات اجتماعيه لكل المتقدمين عن المناطق و اختيار الاسماء يتبع لأسس ومقاييس حسب درجه القرابه واسم العائله والنسب....عفوا قصدي حسب نتائج الطالب ونسبه ذكائه.


يا سلااااااااااااااام
شو بنفهم من هيك؟؟؟
ان اللي ما عندهم اخلاص بالشغل............و اللي ما عندهم أي انتماء لاي اشي بالحياه غير لنفسهم .......واللي بنادو بأسوأ القيم همه اللي بعيشو وين ما كان موقعهم بهالحياه

فشو رأيكم يا جماعه؟؟؟
نصير من اصحاب الذمم الواسعه و اصحاب اللا قيم واللا انتماء ونعيش بعزّ ؟
ويلا نضل اصحاب قيم ومبادىء وماكلين....... هوا؟؟؟

سبب الاكتشاف

صباح ومسا

صباح الخير......ومسا الخير.....وتصبحو على خير :)












الكذب ملح الرجال





انا بعرف ان الرجل كلمه , بس ما كنت اعرف انه هالكلمه مشكوك فيها اذا كانت صادقه او كاذبه
معقول هلأ الكذب يكون اشي منيح ؟؟؟؟ اساسا بضل الرجل رجل اذا كذب؟؟؟
هل بتقدر تحترم رجل بكذب؟؟ او اي انسان رجل او ست بكذبو ..بتقدر تحترمهم؟؟؟

انا بكره الكذب و بعرف ان معظمنا اذا مش كلنا بكرهو الكذب, بس في اشي بقسمنا مجموعتين.

اللي بكرهو الكذب زي عيونهم و بكذبو....بتعرفو كذبه بيضه على رأيهم
معقول ما بحسو بالتناقض بداخلهم؟؟؟
ايش ما كانت مكانته بالحياه, اب او اخ او مدير او زوج كيف بتوقع ان اللي بالمقابل يحترمه او يعتبره قدوته او يرفع راسه فيه اذا ما كانت اقواله وبالتالي افعاله كاذبه؟؟؟

واللي بكرهو الكذب وما بكذبو
انا بشوف الكذب كله اسود وما بشوف اله الوان ..لا ابيض و لا اخضر ولا بنفسجي
كله كذب, ابسط اشي بالحياه و ابسط موقف لا يمكن اكذب فيه, و مع المجتمع اللي انا عايشه فيه بالشغل الوضع كتير صعب
بكره الكذب عموما و بكرهو بزياده من شخص بيتخبى وراء الدين ليكتسب مصداقيه لكلامه.
يعني بكون شخص بصلي وبصوم ما بقطع فرض ما شاء الله عليه بس بكذب وبلف وبدور, وبدور على مصلحته اولا وثانيا ..ومليونا
انا عن نفسي بحكم انه هالشخص بمثّل نفسه وحاش لله انه يمثل الملتزمين او المتدينين او الدين نفسه. كل شخص تصرفاته بتمثل نفسه بشخصيته و بطريقه تفكيره, ببيئته و بامراضه النفسيه.
بس في ناس ضعاف ايمان او ناس اعداء للايمان بنتهزوها فرصه يعممو على الجميع.

من هاد كله انا بقترح انا نغير هالمثل لاشي تاني " الكذب سخام الرجال".... " الكذب مسح الرجال"....

* كان نفسي احط صوره مديري بس منعا للمسائله القانونيه حطيت هاي الصوره :)






حشرااااات



امبارح بالليل في حد ضلو يحكيلي عن الصراصير مع اني معلنيتها اني بكره الحشرات عموما, بس الصراصير بالذات بتعملي حاله هستيريه, جد بتقزز , ما بعرف شو اللي حكيته ونرفزهم لهالعام - او بعرف بس بدي اطول بالي و اعمل حالي مش عارفه - وبعد كل هاد الكلام عن الصراصير, طبعا صابتني حاله تخيلات طول السهره, كل شوي كأني بلمح اشي بمشي, واذاني تحكني, و طبيعي اني بس نمت حلمت بالصراصير :"(



النا اسبوع بنعاني من النمل على البرنده, مش عارفين من وين بالزبط بيجي, حاولنا انتابع اكتر من نمله انا نشوفها بتدخل بحفره او بمكان مش عارفين, فجأه اختفو والحمد لله بس تاني يوم رجعو .
مسكت وحده من النملات و ضليت اسألها " ولك وين خواتك احكيلي" وهي ولا هي هون و ما اعترفت باشي ...-.ماما بتحكيلي وك من وين جايبه خفه هالدم :) بحكيلها انا جديد اكتشفتها :$ -المهم سكرنا باب البرنده امبارح و رشت ماما مبيد و اليوم نظفناها والحمد لله لهلأ ما بين اشي, شكلنا قضينا عليهم.


القارص....يعني انا مع القارصه, بدك تقرصي ماشي حقك ما اختلفنا بدك تعيشي, بس انك تقرصيني باماكن حقيره ما بعرف احكها كتيير, يعني على عقده الاصبع, على قاع الرجل, على عيني و افيق الصبح بمنظر واروح عالشغل بهالمنظر !!! عيب يعني
بعدين نفسي اعرف شو شعورها للقارصه لو مسكتها من جناحينها و حددت موقع دانها بالزبط و ضليت طول الليل احكيلها " زززززززززززززززززززززززززززز" بدانها شو بدها تعمل؟؟؟ يعني جد لازم نعملها فيها لتعرف انه هالحركه كتير عاطله منها, يا اختي اقرصيني انا موافقه بس تضلك تزني بداني هاي ما عجبتني منك.



انا وانت احلى تلاته...

قبل اسبوعين لا كنت اعرف لا عزيز مرقه ولا يزن الروسان
و اول مره سمعت اغانيهم صرت اضحك انه شو بالنسبه للطرب وشو بالنسبه للصوت وشو بالنسبه للكلمات
ايش هاد مش حلو بالمره.....
بس هلأ بحب احكيلكم اني الي اسبوع ما بسمع غير اغانيهم
و تعلقت في اصواتهم
كيف ما كنت احبهم بالبدايه؟؟؟ وكيف ما كنت اعرفهم؟؟؟

اتركم مع اغنيه كتيييير حبيتها ليزن الروسان
"كنباي
"




اول مره...واخر مره

كنت وانا مروحه من الجامعه امر على مجمع الزرقا القديم ومنه الى مجمع الزرقا الجديد مسافه 5 دقايق بالباص ب قرشين ونص - ايام ما كان لسا في استخدام للمبالغ الاقل من نصف دينار - المجمع القديم كله محلات اشرطه و كل واحد اله ذوقه الخاص بالاغاني فكل ما تمر من قدام محل بتسمع نوع اغاني شكل, محل محمد عبده, ومحل عبد الكريم عبد القادر - اللي ما كنت اعرفه قبل ما امر بمجمعات الزرقا - ومحل عراقي دبكات, ومحل عراقي حزايني, وبنصهم محل اشرطه اسلاميه و محاضرات.... و من بعيد بتسمع اصوات مختلطه ما بتعرف منها اشي بس متأكد 100% انها راح تسببلك خرق للطبله.



المجمع الجديد برضه كله محلات اشرطه بس ارقى شوي بتكون برضه لخبطه الاذواق بس كلها اغاني جديده, في محل كنت امر عنده كل شهر تقريبا اجمع عنده اغاني, و كنت عامله زي اشتراك كل اربع اشرطه بطلعلي شريط مجانا.
المحل فيه شب كتير محترم عمره ما تمادى او حاول يعلق او يرمي حكي, وخلص مع مرور الاشهر حفظني و حفظ اوقات مروري عليه.

عاده بجهز 12 اغنيه لان مدتهم بتتناسب مع مده الكاسيت, مره كنت مجهزه بس 11 اغنيه وما في شي ببالي فكررت اغنيه بحبها ولهلأ متزكريتها, كانت اغنيه ما بعرف لمين ولهلأ ما بعرف لمين اسمها " انا الغلطان ماش انت" لمطرب من المغرب العربي, المهم تاني يوم بس مريت اخد الشريط حكالي الشب انه ما كررلي الاغنيه وانه حطلي اغنيه على ذوقه و هو صار عارف ذوقي, انا ما حسيتها مشكله وحتى لما عرفت انها اغنيه على مملكتي السعيده لوائل كفوري برضه ما حسيت اشي غلط بالعكس انبسطت لاني حبيت الغنيه كتير, واستمريت اجمع اشرطه عند نفس الشب.

انا عاده بعطي الشب ورقه بخط ايدي عليها اسماء الاغاني و هو بس يعطيني الشريط بتكون الورقه موجوده مع الشريط و باخدهم , وكل مره على هالحال الا اخر مره عملت شريط عند الشب, روحت عالبيت و كان عنا دار خالتي , ودخلت بنت خالتي اللي اكبر مني ب 5 سنوات معي على غرفتي , وبفرجيها الشريط و مسكت الورقه افرجيها الاغاني اللي جمعتهم, واذ بالشب كاتبلي شعر حب وما حب وانتي و عيناكي ومن هالحكي, و حاططلي اوراق ورد بالورقه, انا زي اللي حد كب علي مي بارده و صرت ارج و قلبي يدق بسرعه, حسيت حالي زي اللي عامله اشي غلط, احساس بالذنب فضيع مش عارفه من وين اجا, بنت خالتي صارت تضحك وبتحكيلي شكله اول مره بصير معك هيك, سألتها ليش يعني عادي يصير هالشي؟؟ ما عرفت شو اعمل ناديت ماما و فرجيتها الورقه, ماما انصدمت لاني بحكيلها دايما عن الشب و انه ما عمره تمادى ولا حكالي كلمه زياده عن الحوار الطبيعي مع اي بائع, المهم هاي كانت اخر مره بجمع شريط عنده او عند اي واحد تاني, كنت اشوفه وانا ماره بين المجمعات بس عمره ما حكا معي ولا دايقني وانا كنت احاول ما تيجي عيني بعينه.





كيف يعني؟؟

اذا بكره اشي بالدنيا - بالاضافه لل 100اشي اللي صرت ذاكرتهم قبل - بكره اللي بحاول يتلاعب بالكلام عاساس انه فيلسوف عصره و انه معبر من الدرجه الاولى.

الخبر بجريده الغد عن 3 اطفال انفقدو و اهلهم خافو عليهم ,مع انه تفاصيل الخبر بتدل على ان اهلهم مش سائلين عنهم اساسا...
خافو الاهل تتكرر مأساه ورد بس الحمد لله - الذي لا يحمد على مكروه سواه - لقو الاولاد واحد نايم على سطوح بيتهم, و واحد ماسكينه مكافحه التسول و الثالث نايم مع صحابه بعد ما شمو غرا ويلا بنزين.

الموضوع مأساوي باختفائهم و باسباب اختفائهم
وين المشكله؟؟
المشكله بعنوان الخبر
" 3 اطفال يختفون ليوم واحد يثيرون كوميديا الذعر"

بدي حد لو سمحتو يفهمني شو يعني كوميديا الذعر؟؟؟ ومن ايمتا الذعر و اختفاء الاطفال صار كوميديا؟؟؟

يعني عالم فقدو اولادهم - بغض النظر عن موقفنا من الاهل بهالقصه - وين الكوميديا؟؟؟
بس تذكر قصه ورد و تذكر قصه او اشاعه على رأي الكاتب عن انتشار العصابات اللي بتاجر بالاعضاء البشريه , وين التشبيه الكوميدي بالموضوع؟؟؟

يا ريت بلاش نتلاعب بالكلمات و نحاول نتفزلك, ويا ريت نركز على حيثيات الخبر نفسه.

الخبر في جريده الغد


*اخبارطازه بتجنن O_o

- نسبه ارتفاع اسعار المحروقات 20%

- مقاله مثيره للفتنه و النعرات للكاتب المبدع بهذا المجال ناهض حتر في موقع عمون
و اعجبني التعليق التالي على المقاله


مواطن اردني فلسطيني فلسطيني اردني

"اخي حتر
كثير حكي ابتكتبه ما بفهم منه اشي
يمكن لاني بسيط كثير
يمكن انتوا الكتاب مختصين ودارسيت وبتقروا جرايد وكتب كثير
ويمك في اشياء ابتعملوها وبتفصدوها احنا مش فدها
او ما ابنفهم فيها
بس بقدر احكيلك اشي واحد
حطه حلقة في ذانك
( انا اصلي فلسطيني لانه ابوي ولد في فلسطين اما انا ولدت في الزرقا .. اتجوزت اردنية من اربد .. اولادي جدهم اردني وجدهم التاني فلسطيني .. عمهم اللي بلعبهم وبموت فيهم وفي محبتهم اردني بحب فلسطين وخالهم فلسطيني بحب الاردن .. انا واولادي وجدهم الاردني وجدهم الفلسطيني وعمهم وخالهم بنحب فلسطين وبنعشق الاردن وملك الاردن .. ,,وبنكون في الصف الاول دفاعا عن الاردن وفلسطين )
حبيت احكيلك هالشي لانه هالشي هوه اللي بفهم فيه انا واولادي وما يفهم في حكي التنظير اللي التحكوا فيه"

ايام الامتحانات



بتذكر ايام امتحانات اخر السنه وانا بالمدرسه كنت احب ادرس عند باب الترس, كنا بالبيت القديم وكان في ترس كبيير و الدنيا عاده زي هالايام شوب و الواحد مش طايق حاله.

بتذكر اني كنت ادرس نص ساعه بالكتير و بعدين ابدا اصفن بالسما -اللي بغير ايام الامتحانات ما كنت اتطلع عليها - و اتفرج عاسراب الحمام وهمه طايرين, و اصفن ساعه ساعتين بايش و بمين مش عارفه, وبصير اسأل حالي انا ليش ما بتطلع عالسما و بسرح فيها بالايام العاديه؟؟؟ خلص اول ما اخلص الامتحانات بدي اقعد نفس القعده و اضل اتطلع عالسما والحمام و الطيارات الورقيه اللي بطيروها اولاد الجيران من اساطيح البيوت, وطبعا ما برجع لهلموقع الا بعد سنه بامتحانات نهايه السنه للصف الللي وراه.

ليش بايام الامتحانات كل شي بصير حلو؟؟؟ بتصير قرأه الجريده اللي عمرنا ما عملناها اشي ممتع عنا, وحتى برنامج افاق علميه اللي بنطنشه و بنوطي الصوت لحتى نشوف بس تبدا افلام الكرتون بعده طول ايام السنه, بنصير بدنا نحضره والثقافه بتصير مقطعه بعضها.

ليش اول ما امسك الكتاب ولو كنت هلأ فايقه من النوم بصير مش قادره افتح عيوني؟؟؟

ايام الجامعه بس يكون عندي امتحان تاني يوم, بصير اتفرج عالعالم بالباصات و المجمعات و بصير احسد كل واحد على انه بكره ما عنده امتحانات, حتى صديقنا كنترول الباص كنت احسده هو والشوفير , ما في وراهم اشي, ولا دراسه ولا هم ولا دكاتره مقرفين, وبس اخلص فتره الامتحانات ارجع لعقلي و احس بالندم, واتهم حالي اني انانيه و العالم اللي فيها مكفيها ....

هالايام خلصنا والحمد لله الدراسه, بعرف ان في نوعيه من الناس اللي بتضل تحب تتعلم لاخر لحظه, مثل اخوي الله يسهل عليه , متعته يقرأ كتاب عن التيارات الكهربائيه المش عارفه شو وتأثيرها بالضغط العالي المتكهرب, شو بدك يا اخي, ما بنكر ان الواحد لازم يضل مواكب التطور بس انا مش من اللي بواكبو التطور بالكتب, انا بحب الفيديوهات و البرامج العلميه التي لا تتعدى الساعه, بعديها بقلب ما بقدر استوعب بعد هالساعه, مع اني بحب القرأه كتير بس مش هالنوعيه من الكتب, ولا نوعيه كتب بابا , فلسفه وعلم اجتماع وعلم نفس, ما بحب الرمزيه انا , حطلي الموضوع قدامي كامل علشان انبسط وانا بفهم.

اللي زكرني بهالحكي ان اليوم مريت على بيت خالتي لقيت بنت خالتي الصغيره بتدرس و خواتها اللي بعمري وبشتغلو مدرّسات يا بكتبو اسأله امتحانات او بصلحو ورق, روحت عالبيت و رحت عالبرنده و نمت عالكنبايه و ضليت ساعتين بس اتطلع عالسما , جد شعور جميل :)



ضرب الحبيب متل اكل الزبيب ...


كلنا بنعرف ان كل جامعه لا تخلو من طوشه طوشتين كبار بالسنه
وبكون السبب الرئيسي بكل مشكله هو....البنات :)

في يوم من الايام كنا بمحاضره ال 8 وما في حد غيرنا بالطابق و فجأه طلع صوت بنات بصرخو, كلنا بنصف ثانيه و الدكتور معنا صرنا بره

المشهد يا اخوات و يا اخوان كان صدمه للجميع
بنتين ماسكين شعور بعض , والارض كلها كتب, وبصرخو وبسبو على بعض, وعلى طرف الدرج شب واقف مكتف ايديه وبتفرج

اللي فهمناه من بين المسبات والحكي , ان الشب كان صاحب وحده فيهم, وبعدين التانيه اعجبت فيه فصارت بدها اياه يكون صاحبها, والتنتين عم بيتقاتلو عالشب وهو واقف بدو يشوف مين اللي بدها تنتصر علشان يروح معها.

انصدمت انا, وما قدرت استوعب كيف ممكن بنت تهين حالها علشان مين ما كان يكون.... بالاخر صرخ فيهم الدكتتور ان احنا عنا محاضره وروحو تقاتلو بمكان تاني.

طوشه تانيه صارت واحنا بننزل من الباص الصبح نزل الكنترول و الطلاب بنزلو من الباص واحد واحد و وحده وحده, واحنا بننزل سمعنا صوت حد ضرب حد كف وصوت بنت صرخت, واذ بالسيد الكنترول ضارب بنت كف!!!!
طبعا الشباب حسو حالهم مسؤولين عن البنت و ولك يا كلب كيف تمد ايدك عليها ومن هالحكي وبدهم يهجمو عليه
الكنترول بكل هدوء حكالهم " ما حد يتدخل بيني وبينها" والبنت واقفه مكانها و لسا ايدها محطوطه على خدها...انا فكرت المسكينه موجوعه و مصدومه.
الشباب هجمو عالكنترول وبدهم يترفشوه واذ بالبنت بتحكي " ضرب الحبيب زي اكل الزبيب"
سادت لحظه صمت الكل فتح عيونه على مصارعها...و بدو الشباب بالمسبات عالبنت ابسط اشي كان " اتفووووووه عليكي و عليه وعاللي بده يدافع عنك يااا....بييب بيييب" انا طبعا من الناس اللي اختفو من ساحه الباصات بلمح البصر.


لهلأ مش مستوعبه شو ممكن تكون بنت جامعيه تستفيد من علاقه هبله مع كنترول باص؟؟؟
الله يعين بعض البنات على عقلهم....بدو يجيب اخرتهم لانه

يا بيرقنا العالي

بتزكر يوم ما اجا الملك حسين الله يرحمه من السفر و نزلنا كلنا عالشوارع نستقبله
كانت اول مره بشوف فيها الملك شخصيا...حسيت كأنه في نور حوالين الملك
و كتير انبسطت بالثواني اللي شفته فيها بعد وقفه ساعات وما حست انها ضاعت عالفاضي

تاني مره شفت الملك حسين الله يرحمه شخصيا يوم ما اجا افتتح الجامعه الهاشميه
كنت انا وصاحباتي قاعدين بالسكوير المربع و لما اجا الملك سكرو كل الابواب
ومر الملك و صار يأشرلنا من ورا الباب الزجاجي و احنا مش مصدقين حالنا و نأشرله
الله يرحمه و يسكنه فسيح جنانه
ويخليلنا خير خلف لخير سلف
.
.
.
.
بحب هاي الاغنيه كتير...بتزكرني بايام حلوه وذكريات احلى

بتمنى تعجبكم


حوار تفيهي



قبل فتره كنت بالنادي بغرفه الخزاين, عاده بتكون مليانه الغرفه و الكل بحكي مع الكل ,ومن ضمن اللي بحكو بنتين كل وحده فيهم بطرف من الغرفه وبتحدثومع بعض .

من ضمن الحوار ان وحده منهم بتحكي للتانيه عن عريس اجا يخطبها من طرف ابن عمتها, البنت بتضحك وبتحكي لصاحبتها انه الشب مش ستايلها , وانه طول ما هو قاعد وهي كل شوي تتصل ببنت عمتها و تتخوت عالشب, وشو هاد اللي باعتيلي اياه, و شو هالاشكال, وضحك ومسخره..

بتسألها صاحبتها ايش ماله يعني؟؟ بتحكيلها البنت "كتير مؤدب", انا استغربت شو يعني كتير مؤدب, بتحكيلها مش ملحلح ولا حرك يعني انا متأكده اني اذا تزوجته من تاني شهر بخونه.....انا انصدمت من هالتعبير اللي استخدمته و معظم اللي بالغرفه لف وجهه يتطلع عليها.

هي كملت ضحك و بتحكي لصاحبتها, بحكيلك بضحك الشب كتير, بتسألها صاحبتها يعني مش منيح الشب؟؟؟ جاوبت البنت انه محامي ومن عيله معروفه و وضعه المادي فوق الريح, و عنده بلاوي فلوس , بس كتير مؤدب شو بدي اعمل فيه هاد.

وطلعو التنتين وهمه مش قادرين يوقفو ضحك, انا لا اخفيكم كرهتها للبنت, شو هالمسخره هاي وشو هالتعبير اللي استخدمته , وشو رفضت الشب لانه مؤدب, حسيتها سخيفه بصراحه, بعدين فكرت تزكرت السلسله اللي بكتبها عن العرسان, معقول ان في ناس بحسوها سخافه برضه؟؟؟ معقول في ناس بحسو انه مش اشي تكتبيه وتنشريه للعالم :(

فانا حابه اعرف رأيكم ....اللي بكتبه منيح و مقبول وبتحسوه تجربه مفيده انها تنتشر ....ويلا بكفي كتابه عن الموضوع؟؟؟
فااااا اذا حاسين الموضوع زاد عن الحد فيا ريت تحكولي :$



* تفيهي يعني تصغير التافه..هاي الكلمه بنستخدمها بالبيت بس الموضوع يتعدى مرحله التفاهه باميال

المفروض مقابله عمل


اليوم كان عندي مقابله عمل...وهاي مش اول مره بعمل فيها مقابله, خصوصا هاي الفتره لاني بفكر جديا اغير شغلي الحالي.

المقابله كانت مع مدير ال IT في مستشفى من المستشفيات الخاصه اللي عنا بالاردن, طالبين مبرمج اوراكل وبعتت ال CV و اتصلو فيي و حددنا موعد مقابله اللي كان اليوم.

الاسئله كانت طبيعيه, يعني ضمن تخصصي و كلها عن الاوراكل وال DBA اللي انا ماخده فيها دورات مع اني للاسف ما طبقتها ومع الوقت نسيت معظمها, انا الي فتره بحاول اراجع باساسيات ال DBA و الاوراكل علشان الاسئله الشفهيه اللي ممكن انسألها و الحمد لله جاوبت على معظم الاسئله بطريقه صحيحه - هيك انا حسيت - مع ان بعض الاجابات مش كامله 100% بس حسيت المدير راضي عن الوضع .

المقابله استمرت ساعنين كاملين باللغه الانجليزيه و كلها شفهي مع اني توقعت ان في امتحان كتابي بس ما حصل هالشي.

بعد ما خلصنا الاسئله بالشغل حكالي المدير انه في اسأله على الصعيد الشخصي المفروض اسألك عنها, حكيتله تفضل, سألني عن رأيي بالاختلاط بالمكتب واذا في عندي مانع, حكيتله احنا جايين نشتغل مش نعمل علاقات ونتعرف, فبما انه جو شغل فعادي الموضوع و خصوصا انا قاعدين بمنطقه مفتوحه, بحكيلي كيف مفتوحه يعني في باب وممكن يتسكر, حكيتله لازم يتسكر؟؟؟ بحكيلي لأ بس في ناس بحبو يسكرو الباب و انا ما عندي مشكله هاد برجع الهم, حكيتله اذا انا من الناس اللي بحبو الابواب المغلقه و الوضع زي ما حكيت راح يكون جو شغل مش اكتر.

سؤال تاني... بحكيلي انت خجوله؟؟؟ سألته كيف يعني , في اكتر من معنى للخجل بس بالتعامل مع الناس انا مش خجوله بالمره, بحكيلي , انت شايفه ان احنا بنشتغل بمستشفى يعني ممكن يطلب مساعدتك حد بالعيادات فوق و ممكن يكون عنده مريض و بحكم انه الدكتور بفحصه , ممكن يكون مش محتشم, انصدمت طبعا و حكيتله ليش هالشي كم مره صار معكم, بحكيلي ولا مره بس ممكن تصير, حكيتله انا اللي بعرفه اني مبرمجه, يعني اكيد في ناس مسؤولين عن صيانه الاجهزه و البرامج, واذا حصل و طلب الدكتور اي شي عالجهاز بنقدر نروح بوقت ما يكون عنده مرضى وخصوصا انك بتحكي ان هالشي ما صار من قبل.


بعديها بحكيلي المدير, ان احنا عنا سياسه معينه بنحب نمشي عليها و قوانين ما بنحب نخافها.. يعني ممكن ان نتعرض لواقف المفروض ما نتصرف فيها الا ضمن القوانين, حكيتله ممتاز انا بحب التعامل مع القوانين وبحترمها كتير وبالعكس هيك بضمن اني ما اتعرض لاي موقف مش لطيف, بحكيلي اعطيكي مثال.....مثلا لو اتعرضتي لتحرش معين من اي حد بالشغل المفروض ما تحكي معه ولا تغلطي فيه, المفروض تيجي عندي وتحكيلي وانا بتصرف معه, حكيتله "تحرش؟؟؟" كيف يعني ما فهمت, ال ممكن مثلا في حد معجب فيكي و عبر عن اعجابه بطريقه غلط مش مناسبه, المفروض انت تضلي طبيعيه و بتيجي بتحكيلي وانا بتعامل معه و ازا انت غلطتي عليه اوكبّرتي الموضوع بروح حقك وممكن تسألي عن الموضوع, حكيتله اعطيني مثل حي لو سمحت عن اللي بتحكي عنه, و احكيلي كم مره بتكرر هالشي عندكم بالشغل؟؟؟

حكالي هي ما حصلت من قبل, يعني هي مش اكتر من سوء تفاهم و مشي الموضوع بس توضحت وجهات النظر, انا طبعا من السؤال اللي قبله كان عندي شبه عدم موافقه عالشغل و بعد هالشي تأكدت تماما انه الشغل مع هالعالم كتييير مريب.

ومن ضمن الحكي انه هو ما شاء الله بكافيء الموظفين اللي عنده يعني لو انا عملت اشي مميز راح يمسكني من ايدي و يوقفني قدام الموظفين و يطبطب على ظهري و يحكيلهم اني تميزت بالشغل - كلمه يمسكني من ايدي ويطبطب على ظهري تكررت بالمقابله اكتر من 4 مرات بداعي و بدون داعي - لما اجينا لموضوع الراتب انا شطحت كتير بصراحه و بديت اتشرط, يعني ما راح اوافق وما راح اوافق مش ضروري اضل مؤدبه لاخر لحظه.

اه صحيح و بحكيلي انت كيفك والعصبيين, حكيتله كيف يعني؟؟ بحكيلي انا عصبي جدا و بدي اللي يتعامل معي يستحمل هالشي, حكيتله يعني اذا صار تقصير بالشغل؟؟؟ بحكيلي اه طبعا يعني لو انت قاعده مع البوي فرند تاعك ما عندي مشكله ازا ما بأثر عالشغل!!!!!!
حكيتله اولا انا ما بأمن بمثل هالعلاقات وثانيا هاد موقع شغل,و انت قبل شوي بتحكي ان في انظمه و قوانين و بتمشي عليها فأذا انا لاسمح الله قصرت بشغلي بتلجأ لهالانظمه بالتعامل معي, بحكيلي بس انا مرات ما بقدر اسيطر على نفسي و اذا شفت اشي غلط فورا بعلق, ما بغلط عالموظف بس بعصب, حكيتله بصراحه انا مش متعوده اتعامل مع عصبيين و اللي بعرفه في كتب رسميه بنتعامل معها في حاله تقصير الموظف وهاد من حق المدير.

و انتهت المقابله بانه سعيد جدا بمعرفتي و اعطاني كرته ......

شو رأيكم بهالمقابله؟؟؟؟

بالع راديو




هلأ فهمت شو قصدهم بس يحكو عن حد انه بالع راديو :)


سلسله عرسان - الحلقه الثامنه

العريس هاد اجا من طرف موظف عنا بالشغل, انا الموظف ما بستلطفه نهائيا فكونت فكره عن الشب من قبل ما يجي, وهاد طبعا غلط.

الشب كان دمه خفيف جدا و شخصيته رائعه, ضلو يسألني اسأله و كل شوي يسكت يفكر و يحكي....يا ترى شو كمان ممكن تسألني امي ...يا ترى شو كمان ممكن تسألني امي... و من كلامه فهمت انه عايش لحاله بعمان و واهله عايشين بمدينه تانيه, وبروح يقضي عندهم اخر كل اسبوع.

الشب بصراحه كان اكتر من رائع, كانت من المرات القليله جدا اللي بكون على راحتي تماما و انا قاعده مع عريس
حكينا بكل اشي, وحكينا باشياء كأنا بنعرف بعض من قبل, وجهه مبتسم على طول.

حكالي انه ناوي يسكن بعمان و وهو ناوي يشتري بيت بمدينه اهله نقضي فيه الاجازات - برضه كالعاده بصير العريس يحكي كأنا خلص صرنا مع بعض بس هالمره ما ازعجني الموضوع - و بدنا و بدنا....

انا وصاحبتي صرنا نفكر باسأله ممكن والدته تسأله عنها, لانه بحكي لو سألتني امي سؤال وحكيتلها ما بعرف راح تقتلني - طبعا بتخوت الشب -وكانت الجلسه كتير لطيفه, معظمها خفه دم واضحه من جميع الاطراف.

انا قبلها باسبوع كان جاي العريس اللي حكيتلكم عنه قبل - بالحلقه الرابعه - اللي كان عاجبني, وكان الهم اسبوع مش حاكيين فقررت انسى موضوعه, يوم ما اجا الشب هاد روحت عالبيت لقيت والده الشب هداك حاكيه مع ماما انهم بدهم يجو....طبعا كتير عيب انا نستقبل عريسين بنفس الوقت, هيك اهلي وهيك انا مقتنعه انه ما بيصر تتفق مع شخصين بنفس الوقت, مع ان كتير اهل عرسان بمرو على عروستين او 3 بنفس اليوم مرات بس هالشي مرفوض عنا, فماما حكتلي بدك تختاري شب منهم تكملي معه الموضوع لنشوف شو ربنا بيسر, انا اخترت الشب الاولاني بعد ما استخرت.

تاني يوم سألتني موظفه باعتها الموظف اللي عنا تسألني عن رأي وتاخد رقم تلفون البيت علشان والدته تحكي مع ماما, حكيتلها للاسف ما في نصيب.


وطبعا تبين انه ربنا مش كاتبلي نصيب ولا مع واحد من الشبين مع ان التنين كانو عاجبيني و ما في بشخصياتهم ولا عيب - طبعا الشب الاولاني حكيتلكم مشكلته اللي بينت بالحلقه الرابعه قبل- هيك ربنا كاتب, والحمد لله ان هالمواضيع بايد ربنا لان الواحد ما بعرف شو ممكن كان يصير واذا لا سمح الله في اشياء مش منيحه وما بينت هلأ وكان ممكن تبين بعديها.

يعني اللي بدي احكيه ان مرات الفليح بكون فالح بس ربنا ما بيسر الموضوع :)


ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقات السابقه

صباح الخميس ....صباح الورد




صباح الورد والفل عالجميع
لسا ما شربت قهوتي فشوي لسا مسطله



اليوم الخميس ...يعني نهايه الاسبوع...يعني بكره عطله....و بالنسبه الي عطله للثلاثاء :)

فاستمتعوووووو باليوم وما تخلو اشي ولا حدا ينكد عليكم

قرار نهائي

بدي افش قلبي
حاسه حالي بدي انخنق
بدي اصرخ
بدي ابكي
مش طايقه الشغل خلص
مش طايقه المدير وسلبيته
مش طايقه الموظفين
دايما مغمومه و دايما في مشاكل
و بدا الشغل يأثر على حياتي
بدي اترك الشغل خلص
بدي استقيل




اه صحيح.....عبير ماتت!!

اشي غريب قديش الموت صار اشي سهل عند الناس
يعني الموت المفروض يكون في اله رهبه و كانت سيره الموت تستوقفك للحظات بسود الصمت فيها و بتصير تفكر بهاللحظات بنفسك واعمالك و بالشخص المتوفي و اهله و كيف الدنيا ما الها معنى و بلحظه ممكن تنتهي.


في خبر في جريده الغد بحكي " الأردن يتعامل سنويا مع 250 حالة قتل و70 حالة انتحار"

ومن ضمن الخبر ان هناك 20 خطأ طبي سنويا و 700 حاله وفاه من جراء حوادث السير
يعني تخيلو هالعدد و الحوار كان ببين ان نسبه الوفيات زادت بشكل كبير خلال هالسنوات بدون التطرق للاسباب الحقيقيه وراء هالشي , وتمحور الحوار حول كفأه المركز الوطني للطب الشرعي و نشأته ...
كيف صار الموت عباره عن احصائيات و ارقام؟؟ وكيف نسينا انها نفوس و بشر و عائلات تدمرت؟؟ ابناء صارو ايتام و زوجات صارو ارامل!!!


هالخبر زكرني بموقف صار معي بالشغل, بس رجعت من اجازتي بدبي بحكولي صاحباتي عن اهم الاحداث اللي صارت, مواقف و احداث ممكن ما الها معنى بس بتعنينا انا وصاحباتي و خلصنا حكي و انتهت الجلسه.
بعد كم يوم بحكو البنات انهم بدهم يلمو فلوس لزميله النا سكنت بيت جديد, وكنا بنتناقش عن كيف في ناس ما بحبو يشاركو ومن ضمن الحكي بحكو متزكرين " عبير" بس توفت ما حد رضي يدفع, بحكيلهم مين عبير؟؟؟ بحكولي احنا ما حكينالك؟؟ هاي الموظفه اللي كانت تشتغل بالطباعه ماتت !!- البنت كان عمرها لا يتجاز ال 36 سنه, علاقتي معها سطحيه جدا بحكم ان تعاملنا مش كتير غير بس اشوفها عالباب واحنا داخلين الشغل او مروحين, وللاسف ما كنت استلطفها - كانو يحكو وكأنهم ما بحكو عن بني ادم, انا انصدمت بحكيلهم عبير الموظفه اللي عنا ماتت؟؟؟ بحكولي اه كانت مريضه كلى وبتغسل و توفت, ووحده من البنات غيرت الموضوع فورا لحلقه امبارح من المسلسل الفلاني, انا بصراحه لفت فيي الدنيا, صابني شعور غريب, بين الشعور بالذنب اني ما كنت استلطف البنت وممكن اكون حكيت هالشي لصاحبتي, وبين الصدمه ان البنت اختفت عن وجه الارض, يعني خلص راحت طيب شو شعور اهلها؟؟؟ كيف والدتها استحملت الصدمه؟؟ انخنقت و حسيت حالي راح انفجر بالبكا,كل هاد وصاحباتي بضحكو و بتحدثو ومش حاسين بان الموضوع كبير.

وانا طالعه من المكتب بتحكيلي صاحبتي حسيتك كتير اتأثرتي بعبير, بحكيلها البنت ماتت بتعرفي يعني ايش ماتت, مش اشي عادي ويلا حدث عابر, ماتت!!
و لليوم بس امر من قدام مكتبها اللي فورا غيرو ديكوره و اجت موظفه جديده قعدت فيه, بتذكرها و بنصدم...عبير ماتت؟؟؟