ان الله يهدي من يشاء

بعد ما تخرجت من الجامعه قعدت سنه كامله بالبيت بدور على شغل و من غير ترتيب اجا الشغل, كنت رايحه زياره لبيت عمي و اجا ابن عمي اخر الزياره اول ما شافني بحكيلي " كيف رحتي من بالي!!" طلعو بدهم بالكليه اللي بدرّس فيها محاضر حاسوب و اتفقنا تاني يوم اروح عالكليه و اقابل مساعدة الرئيس وفعلا و بعدها قابلت الرئيس و وقعت عقد و بديت تدريس تاني يوم فورا :).

مرحله التدريس كانت لسنه اولى و سنه تانيه و كانت كتيييييييييير حلوه وفيها مواقف كتيره خصوصي اني كنت بال23 فكنت تقريبا بعمر الطلاب و احيانا اصغر منهم, وكانت كتيييييييييييييييييييييييييييير متعبه و سبحان الله عأخر الفصل طلعلي بالحكومه و طبعا على رأي المثل .....مش متزكره منه الا الميري واتمرمغ فيه :$ المهم خلصت الفصل وطلبو مني اراقب شامل و فعلا كان لسا في وقت لبداية الدوام بالحكومه.

خلال مراقبتي للشامل تعرفت على مدرسات من كليات تانيه, وحده منهم اول ما شافتني انصدمت وانا قلبي من جوا فرح - ببقى احكيلكم قصتها بعدين - المهم وحده من المدرسات كبيرة بالعمر و كان الكل بباركلها عالحجاب و هي صارت تبكي , حكتلنا قصة حجابها

تزوجت مباشرة بعد التخرج , زوجها كان متخرج من روسيا تخصصه بشي بخص الديانات مش متزكره شو بالزبط و معه دكتوراه و كان شيوعي و معلنه هالشي, و اهلها بوقتها ما عارضو وما كان عندهم مشكله و اول ما اجا عالاردن اشتغل بجامعه من الجامعات الاردنيه و افضل ماده قريبه من تخصصه كانت الثقافة الاسلاميه :$ كان يدرس الطلاب الماده و يحكيلهم انه مش مقتنع باللي بدرسه و يحاول يدخل افكار شيوعيه من خلال المحاضره, طبعا ما كان معترف باي ركن مطلوب لا صلاة ولا صوم ولا اشي, وهي كانت ملتزمه بالصلاه و كانت توصل فيه انه وهي بتصلي يحط ابنها على ظهرها لحتى يدايقها, كانت تحكيله عن رغبتها بلبس الحجاب و كان ردّه " يوم ما بدك تحطي هالشريطه على راسك فورا بتروحي عبيت اهلك" و كلنا بنعرف ان ايام زمان كانو الناس مش كلهم ملتزمين بالدين, كان العادات و التقاليد و ثقافة "العيب" هي اللي بتحكم مش "الحرام", و طبعا فكرة الطلاق مرفوضة تماما بوقتها و لهلأ, فأستمرت بحياتها زي ما بده, كانت تصلي لانه ما بقدر يمنعها من الصلاه بس دايما يحاول يعيق هالموضوع.

بيوم كانو طالعين يسهرو كعادتهم براس السنه الميلاديه, كانو ساكنين فوق بيت والدته, و لازم قبل ما يطلعو يمرو عوالدته يسلم عليها و يحكي معها و يطلع, وبالفعل نزلو وحكو و ضحكو و ودّعوها و طلعو, بوقتها ما في موبايلات كان روحو لقو عجئه و ناس, اكشفو ان والدته توفت بعد ما ودعوها بفتره قصيره, و كانت هاي اول صدمه اله, تاني يوم وقت الدفن وبما انه لازم المحارم اللي يحطو المرحومه بالقبر نزل هو عالقبر, ومن وقت ما حط والدته بالقبر لرجعو عالبيت و هو منهار و ببكي, عرفت زوجته و راحت لتهديه و تواسيه , بعد ما هدي حكا لزوجته انه حس بشي جوا القبر بسحبه و كأنه مش قادر يتحرك و حس قديش الدنيا ما بتسوى شي و كيف اخرنا كلنا للقبر, وفورا حكالها بتمنى انك لسا بدك تتحجبي و فعلا من يومها تحجبت و هو التزم بالصلاه بالمسجد و كل سنه بروحو عمره و ربنا رزقهم بالحج

ما حد بعرف شو نهايته و شو نهايه غيره, كتير منا بطلقو احكام على غيرهم وممكن توصل انهم يلعنو و يسبو على ممثل او ممثله و احنا ما بنعرف شو مقدار الدين اللي بقلبهم, تذكرت القصه هاي لموقفين مرو بهالفتره, اول شي جديد حضرت فيديو لحلقه اللقاء مع حلا شيحه و زوجها على قناة الناس عاليوتيوب و جد هزني كلامهم و طريقة هدايتها و اشي تاني تعليق ما نشرته بناء على طلب صاحبه وصلني على بوست بكفي تقييم للعالم و حبيت احكي هالقصه لعل و عسى هالقصه تريّح البال

اللهم احسن خاتمتنا

الى متى!!

كان يحب السير كثيرا, يجد فيه الفرصه الوحيده لممارسه حريته, بحيث يكون لوحده, لوحده تماما وخصوصا مع سماعات الاذن التي تفصله تماما عن العالم الخارجي, يختار القناة المفضله فلا احد يزعجه ولا احد يعترض, ولا يسمع اي صوت غير صوت افكاره تقاطع ما يسمعه بين الحين والاخر, ولكن حديثا اصبح هنالك ما يقاطعه و يفصله عن هذا الجو الروحاني و الطقس الجميل الذي تعوّد عليه, مجموعه من الحجاره او سياره قد تركت الشارع بما رحب لتصطف على الرصيف الضيق بالمكان الوحيد الذي تركته "اشجار الزينه" كما يسمونها بالرغم من انها بنظره قد افسدت المنظر و شوهته و افسدت عليه حريته.

اليوم المشؤوم بالنسبه له هو يوم التقاءه صدفه باصدقائه وهو يمارس هذا الطقس الجميل, لقائه باصدقائة يعني التوقف و نزع السماعات وبذلك يكون انتزع تماما من عالمه و رجع الى ارض الواقع, حديث ليس له معنى قد يستمر اقله الى نصف ساعه و قد يتخلله بعض المكالمات الهاتفيه و جلب سيرة فلان و علّان و قد يتخلله ايضا زجاجه من العصير او احدى المشروبات الغازيه, و بذلك يرحع الى عالم تلبية رغبات الافراد و البعد عن "عالمي" كما يحب ان يطلق عليه وهو ما يتخلل الفتره التي يقضيه فيه اقلها ساعتين خلال سيره.

ولكن اليوم حدث ما لم يكن بالحسبان, اليوم سحب احد اصدقائة السماعات بشده كنوع من المزاح و انسحبت السماعات ليظهر الصوت عاليا مجلجلا في اذان كل من حولهم, و بدأت التعليقات من حوله " ما هذا!!"..." والله ما عرفتك"..." زي اللي عنجد"... و بدأت الضحكات تتعالى حوله, شعر بخجل كبير و لم يدري ماذا يقول وبماذا يبرر الذي حصل, " ياليتني اغلقته قبل ان اقف معهم" و فجأه احس بان العالم كله توقف من حوله و اختفى الاصدقاء و اختفى الشارع و احس نفسه في منطقه سوداء لا يظهر منها الا بقعه ضوء وحيده يقف تحتها, " ولم و من ماذا تخجل!!" سأله صوت من داخل عقله, " وما العيب او الخطأ بالذي تسمعه!!! ءانت الذي يجب ان تشعر بالخجل ام هم!! " و بلحظه رجع ضجيج الشارع و قهقهات الاصدقاء و حرارة نظراتهم المستهزءه .....نظر اليهم وقال " نعم وما العيب في ذلك؟؟؟ ما العيب في ان استمع الى ما احب ؟؟ " ثم سأل نفسه " و لماذا اخبئ ما اسمع؟؟؟ لعلّ العلّه موجوده في نفسي انا و ليس بمن حولي!! " ..."لماذا افكر في رأي الناس عندما اكون مقتنع تماما بما افعله!! لماذا دائما نسعى لارضاء الناس مع ان ارضائهم ان لم يكن مستحيل فهو يعني في كثير من الاحيان عمل مالا نحب و اجبار انفسنا على ممارسات لا نطيقها"

ابتسم....اشار لهم بيده مودعا....وضع السماعات جانبا, رفع الصوت و مضى

أخو امك يبقى....عمك !!!

لأ ما تتفاجئو ....بتصير صدقوني :)

هلأ بالعاده او الطبيعي ان اخو امك يبقى خالك, بس بابا اخو امه بكون عمّه....كيف؟؟؟ انا بحكيلكم

هلأ خلينا نعطي اسماء لنفهم الموضوع, انا شخصيا بابا رسمها رسم لافهمها :)

في اخين "علي" و "ابراهيم" ....علي متزوج من سميره و ابراهيم متزوج من هدى..

علي و سميره جابو ولد سموه "محمد"

ابراهيم و هدى جابو بنت سموها "عايشة"

سميره توفت....وبعدها بفتره ابراهيم توفى

فأصرّت العائله ان "علي" يتزوج "هدى" خصوصي ان هدى من مصر وكل اهلها موجودين هناك, صارو اهلها بدهم اياها ترجع عندهم وصار مشاكل على موضوع تاخد البنت معها او لا و طبعا اهل الزوج المتوفي بدهم بنتهم تتربى عندهم و حرام البنت تتربى بعيد عن امها - احداث حقيقيه .... ايون تيتت بابا من مصر .... علشان هيك خفة الدم طلعت زياده , خليط من خفّات الدم :)

المهم علي و هدى تزوجو و جابو ولاد و بنات... " ابراهيم" و "فاطمه" و "مريم" و "صالح" و هدول الاولاد و البنات صارو اخوان ل "محمد" واخوان و خوات ل "عايشة" ..... وسبحان الله بس كبرو "محمد" و "عايشة" تزوجو :)

"محمد" و "عايشة" همه تيتا و سيدو :) و بهيك صار اخو ام بابا بكون ....عمّه :)

خالاته همه نفسهم عماته ...وخواله همه نفسهم عمامه :$

مش عارفه حلو ويلا مش حلو, سألت بابا بحكيلي "عادي" ...

و توتا توتا ...خلصت الحدوته :)

يلا فرفشو سنانكم و اطفو الضو و نامو....تصبحو على خير :)

تحت خصلات شعرها....

"فتاة في قمّه الاخلاق لا تحاول معها, حالة ميؤوس منها" , هذا اول ما يقال عند وصفها بين زملاءها بالجامعه عندما يلتفت احد الشبّان الى جمالها الخارق, حاول الجميع ان يتعرف عليها و لكنها صدتهم جميعا و بكل هدوء.

لملمت كتبها و همّت بالخروج من قاعه الصف, احسّت بنظراته و بخطواته السريعه نحوها, خرجت مسرعه بين زحام الطلاب و الطالبات و تاهت بينهم.

ترى ما الذي يريده مني ذلك الشاب؟؟ عادة ما يكتفي الشاب بأهمالي له و لمحاولاته من ثالث يوم" تسائلت بينها وبين نفسها وهي تجلس مع صديقاتها في مقعدهم المقدّس, هكذا يطلقون على ذلك المقعد المتكسر الاطراف, والذي تظهر مساميره وكأنها ابت ان تستلم له و تغوص في داخله, ها قد مر سنتان منذ اجتمعو اول مرّه عليه, كان ملقى هناك لا احد يجلس عليه, وكان باقي الطلاب يفضلون الجلوس على الارض بدلا من الجلوس عليه, "ها هو هناك...اتراه يبحث عني؟؟" حاولت ان تحني راسها للامام و تغطي وجهها بخصلات شعرها لعلّه لا يراها, و هذا ما حصل وهذا ما كان يحصل على مدى الشهر الماضي.

بنفس الشغف ظل يراقبها و بنفس الفضول بقيت تختبئ خلف خصلات شعرها و زميلاتها, و في يوم من الايام اختفى, و بقي على هذا الحال اسبوع, لم يظهر و لم يحضر اي محاضره, لم تلمحه بين اصحابه و لا بأي مكان كان يتواجد به, فتشت عنه عيونها من تحت خصلات شعرها.

و فجأه ظهر, انتظرت ان يبحث عنها, ان يحاول ان يتعقبها بنظراته, لكن دون جدوى, يا الهي اتراني اصبحت خفيّة وراء خصلات شعري تلك, تبا لك من خصلات, رفعت رأسها بعنف و هزته لرفع الخصلات التي على وجهها علّه يراها....لكن دون جدوى

انهت يومها و عادت الى المنزل و في رأسها الاف الاسئله و الاجابات, ما الذي حصل؟؟؟ هل معقول انه نسيني في اسبوع, ام هل معقول انه تعب من جفائها فذهب الى غيرها, لا ...لا غدا ستحاول مرّة اخرى ان تنظر اليه و تظهر امامه دون خصلات شعرها تلك, اه كم اكرهك يا شعري

و فعلا في اليوم التالي و لحظه دخولها البوابة الرئيسية للجامعه بحثت عنه حيث اعتاد ان يقف مع زملائه, "ها هو" تلاقت عيناهما لثواني و اكمل حديثه مع صديقه وكأنه لم يراها, بدأت بالسير بأتجاههم و مرّت امامه مباشره, لم يحصل شيء, انزعجت و بدأ الم غريب في داخلها لم تشعر به من قبل " ما هذا!!!...لماذا اشعر بالانزعاج!! سوف انسى الموضوع وكأنه لم يحصل" و دخلت الى القاعه و جاء المحاضر و بدأ بشرح الماده, ما هي الا لحظات واذ بصديقتها تهز لها كتفها تخبرها بأنتهاء المحاضره.."يا الهي..ايعقل ان مرّت الساعه بهذه السرعه, حتى انني لم اكتب كلمه, حتى انني لم اسمع شيء لاكتبه"

سيطر التفكير بذلك الشاب على جميع افكارها " سأحاول لاخر مرّه" هذه المرّه تعمدت ان تتحدث بصوت مسموع مع صديقاتها لعلّه ينتبه, لم يلتفت,و تكررت المحاولات اخذت تضحك و تتكلم بصوت عالي , و استمرت بذلك لعلّه ينظر, ولكن لا حياة لمن تنادي, وفي يوم قررت ان تبدأ هي بالحديث معه , ذهبت اليه و بحجّة أنها تريد ان تستعير منه الملحق الذي وزّعه المحاضر في محاضرة اليوم لتصويره, تصرف بلا مبالاه تامه و اعتذر بأنه اعاره الى زميل له و ودعّها و مشا بعيدا

اشتعلت النار داخلها, "اتراه يظنني قبيحه؟؟ لا وكيف ذلك وهو الذي استمر بملاحقتي لاسابيع!!!" و ظلت تفكر و تفكر حتى توصلت الى نتيجه وهي ان تذهب و تصارحه و تسأله عن سبب تغيّره, ذهبت اليه وهو يقف بين زملائه وطلبت ان تتكلم معه منفردا, نظر نظرة الى اصدقائه و حاول ان يخفي ابتسامه لم تفهم معناها الّا لاحقا

سألته عن سبب ملاحقته لها , انكر , فحاولت ان تذكره بسرد المواقف التي حصلت, وهو يقف امامها و رويدا رويدا تظهر ابتسامه على وجهه ثم التفت الى اصدقائه و رفع اليهم بأبهامه وصرخ " قلت لكم لا يوجد في قاموسي كلمة "يأس"" و اخذ زملائه يضحكون بأعلى اصواتهم و يطلقون القاب " أسد"..."زلمة"...."استاذ"..."كينج"...

الان فقط فهمت ما الذي يحصل, دارت بها الدنيا لم تعد ترى امامها, حاولت ان تتماسك حتى تصل الى دورة المياه الخاصه بالطالبات, فتحت اول باب و دخلت, انهارت ...بكت...احسّت بأنها تختنق...مضى على وجودها بالداخل ساعتان و هي تحاول ان تلملم ما بقي لديها من قوّة لتبلغ بها البيت, نظرت الى نفسها بالمرآة, غسلت وجهها,محاولة اخفاء اثار الجروح بداخلها... ارخت خصلات شعرها.... و خرجت....

قصة راس الخروف

الموضوع اللي كتبه نادر في اسبوعياته لهاد الاسبوع في الاسبوع الثالث والعشرون, والموضوع اللي كتب عنه Harege زكروني بهالقصه اللي حكتلي اياها ماما

ما بعرف شو خطر عبال بابا واجا بنفسه ياكل راس خروف, سأل ماما لو جبتلك بتعرفي ويلا احكي لامي -تيتا الله يرحمها كانت ساكنه معنا بالبيت - حكتله لأ جيبه وبجرب وشو وراي, انا وقتها كان عمري اشهر, وبابا ما كزب خبر وجاب لماما راس, بتحكي ماما انها عملت زي ما كانت تشوف تيتا والدتها الله يرحمه بتعمل, وبتحكي كنت اشوفهم بفتحو تم الخروف مش عارفه ليش, مسكت ماما فكين الخروف وشد يللي بتشد وطبعا ما صار اشي غير ان سن الخروف غز باصبع ماما :( و اجت تيتا عليها وهي بهالمرحله, وحكتلها اساعدك طبعا ماما وافقت وطلعو بشقو الاطراف قبل ما يفتحو التم, وتيتا ما شاء الله خبره , بحركه وحده زبطت كل شي, وعالاكل بتحكي ماما شغل نهار كامل, يا دوب اكلنا كم لقمه وانصدمنا من الاكل لانها تقيله الاكله, اكلو الفته و تركو الراس زي ما هو.

بالليل محل ما غز السن طلع زي حبه غريبه, راحت ماما عالدكتور تاني يوم و حكالها هاي بدها تنشال بالليزر وكل شي بكون تمام, و عمللها اياها وروحت عالبيت, بالليل طلعو يسهرو عالسطوح - يا الله شو بحب سهرات السطوح, الله يسهل على هديك الايام - المهم بتحكي ماما انو بدو ايديها يحكوها كتير, وهي بالعتمه تحك و تفكر ان في قارص بالجو, نزلت عالبيت و انصدمت من شكل ايديها, كلهم حب زي جدري المي, كان يوم جمعه و الدنيا ليل, بابا اخدها عالمستشفى, الدكتور -مش متزكره اسمه مع ان ماما حكتلي اياه - اول ما شافها بحكيلها هاد من سن خروف صح؟؟؟ حكتله اه, جاب كتب و قعد يقرأ نص ساعه وبعدين لم دكاترة المستشفى وفرجاهم ايدين ماما وسألهم عن التشخيص, اشي يحكي جدري مي, اشي يحكي حصبه, حكالهم هاي جرثومه من سن الخروف , كل مليون خروف في واحد بحمل هالجرثومه, شوفو سبحان الله هالواحد جبناه عنا عالبيت :$

المهم اعطا ماما 14 علبه دهون و مضاد حيوي و حكالها هالشي بروح بعد 4 اسابيع بالزبط و ضلك ادهني من هالدهون وما توقفي ليخلصو ال 14 يوم, وما تحكي ايديكي بالمره لانه لو وحده من هالحب انقشر راح يعدي كل جسمك :$ ,بتحكيلنا ماما ان اول 3 ايام كانو اصعب شي, بالنهار ماشي بس بالليل المشكله, يدهنلها بابا ايديها بالدهون و يلفهم بقماشه, نص ساعه يروح تأثير الدهون وتبدا ماما تحك وهي نايمه, بس تتحرك يصحى بابا عليها, يصحيها و يفك القماش ويدهنهم كمان مره و يلفهم وهيك طول الليل, حبيبي بابا الله يسعده يا رب, و اجت عمتي نامت عنا علشان البيبي اللي هو انا :)

و بعد 4 اسابيع اختفى كل شي الحمد لله, ومن يومها ما دخلو هالاشياءات على بيتنا الا واخوي الصغير بصف تاني طلب الاخ رجلين خاروف, و بابا ما صدق جابهم و طبختهم ماما, يا باااااااااااااايه عمري ما بنسى الريحه :( المهم ما في غير بابا واخوي اللي بدهم ياكلو, اخوي بس شافهم صفن صفن و بعدين بسأل ماما " ماما هدول الاجرين من ورا ويلا من قدام؟؟" حكتله ماما ليش بتسأل, " اذا من قدام بكونو نظاف بس اذا من ورا بكونو اللي بيجي عليهم الاوساخ" ضحكنا و حكتله ماما لا هدول كلهم الرجلين من قدام هيك بابا جابهم, صفن صفن و بعدين حكالها " طيب خبيلي اياهم بعدين باكلهم" و اتوزعو تاني يوم على اصحاب النصيب :)

وتوتا توتا خلصت الحدوته :)

آدم و حواء

الجمعه الماضيه الخطبه كانت عن قصه خلق سيدنا ادم و سيدتنا حواء, لكن بطريقه جديده اول مره اسمعها

قال لنا الشيخ انه عندما خلقت حواء استيقظ سيدنا ادم و ووجد حواء نائمه بجانبه - لان انخلقت من ضلع سيدنا ادم وهو نائم وهو لحكمه كبيره هي ان الرجل بطبيعته لا يتحمل الالم مثل المرأه ولو كان مستيقظ لكرهها من شدّه الالم - عندما استيقظ سيدنا ادم جاءت الملائكه تسأله, لم احفظ الاسئله حرفيا ولكنها كانت بهذا المعنى


ما هذه ؟؟...قال هذه امرأة

وما اسمها؟؟...قال اسمها حواء

ولم هي امرأة؟؟... لانها خلقت من امريءٍ

ولم اسمها حواء؟؟... لانها خلقت من حي

اتحبها يا ادم؟؟...نعم احبها

اتحبينه يا حواء؟؟... قالت لا و هي بقلبها اضعاف حبه له

جميع المصليات ضحكن و اكدن على ذلك بامائه بالرأس :)

و اكمل الشيخ كلامه عن اعوجاج حواء وهو شي يرفع مكانتها ولا يقللها ولا يستدعي الاستهزاء بذلك من بعض الرجال
قال الاعوجاج جاء من تحكيمها لقلبها قبل عقلها, اعوجاجها لتحمي زوجها و واولادها و لولا اعوجاجها لكن هناك رجلان بالبيت

و ضرب امثله في تربيه الاولاد من العنايه بالرضيع و الاهتمام به و بنظافته ومن تغيير الحفاض ومن السهر بجانبه بكل الحب وهو مريض, كل تلك الامور لا يوجد رجل على وجه الارض يستطيع عملها و تكرارها لنفس الطفل او لاكثر من طفل على مر السنين.

الهدف من الخطبه كان ان خلق الرجل بتكوين وصفات معينه لذلك اعطي زمام الامور في امور حياتيه مثل الطلاق وغيرها, وخلقت المرأه بتكوين وصفات معينه فعاملها بناءا على تلك الصفات ولا تحاول ان تغيرها او تغير بها شي ولا تصنع منها رجل...

البيوت مغلّقه... والهموم مفرّقه

اليوم بدي احكيلكم عن 3 بنات تشابهت قصصهم لحد كبير مع اختلاف الاحداث, ال3 بنات خطبو و تزوجو بنفس الوقت تقريبا قبل سنتين

اول بنت تزوجت من شخص على مستوى كبير من الثقافه والعلم و كان وضعه المادي فوق المتوسط, كانت فتره الخطوبه سريعه جدا وضاعت كلها بتجهيزات العرس و البيت, و تزوجو و بعد شهرين رجعت البنت لبيت والدها لانهم اكتشفو وبعد اجراء الفحوصات اللازمه ان الزوج لا يصلح للزواج , وما حصل الطلاق فورا لان قانوننا الجميل بفرض على البنت انها تضل مقيمه مع زوجها لفتره 6 شهور و اذا بقيت العلّه موجوده بعدها ببدو باجراءات الطلاق, وبما ان الزوج طلع لا يطاق على جميع الاصعده فالبنت و اهلها فضّلو انهم يدفعو للعريس كل اللي صرفه حتى يتم الطلاق لانهم ما بدهم اي حلول تانيه تطول فتره ارتباط بنتهم في هذا الشخص, ورؤجعت البنت لبيت اهلها زي ما طلعت منه قبل شهرين.

البنت التانيه نصرانيه, وافقت تتزوج العريس اللي تقدملها لانها كانت على علاقه حب و خطوبه مع واحد من عيلتها وصار مشاكل بينه وبين والدها على تحديد موعد العرس , لان العريس مقيم بالخارج و لمّا رتب اموره مع شغله على موعد معين ابو العروس و بس علشان يفرض رأيه ما وافق عالموعد و احتدت النقاشات ووصلو اخر شي الى ان ابو البنت حكا للشب ما عنّا بنات للزواج سافر الشب و خطب وتزوج من بنت عربيه مقيمه بنفس البلد اللي بشتغل فيها, فالبنت وافقت على اول عريس تقدملها, بتفكر انها هيك بتنتقم منه وما كانت تعرف انها بتنتقم من حالها.

مشيت الخطبه على خير و وقت العرس حكالهم الشب ان امكانياته ما بتسمحله يعمل حفله ريسبشن - الحفله بعد ما يخلصو اجراءات الزواج بالكنيسه - فالاب حكا انه هاي الحفله عحسابه وانها راح تكون هديته للعرسان, تزوجو و سافرو عتركيا شهر العسل رجعو وتاني يوم من رجعتهم الشب حكا للبنت انه في رجال من عيلته زعلانين من والد العروس لانه بدرت منه كم من كلمه على جاهه الرجال اللي اجو ياخدو البنات, انه استقّل عددهم وعلق بما معناه انه وين الرجال هو ما في رجال بعيلتكم....

وفعلا راحت البنت لبيت اهلها زياره عاديه المفروض توصّل وجهه نظر زوجها و يجي بالليل ياخدها, ومن يومها -قبل سنتين - لهلأ والبنت عند اهلها و العريس و ابو العروس معندين من فيهم اللي غلط, وبما انهم نصرانيين فالطلاق عندهم بده موافقه كنائسيه و ما بتحصل الا في حالات نادره لاتنطبق عليهم.

البنت الثالثه, خطبت و تزوجت بفتره قصيره, الزوج بشتغل بالخليج و مش موافقين يعطوه اجازه طويله من الشغل و اذا اخد اجازه هلأ ما في اجازه تانيه الا السنه اللي بعدها, فتم الموضوع تقريبا بشهر, تزوجت البنت وسافرت و بعد سنه اجت زياره لاهلها لانها حامل و تعبانه وبحاجه لامها, كان الزوج مثال للزوج المثالي , البنت كتير مبسوطه و بتشكر فيه, سافرت البنت لعند زوجها عالخليج وراحت امها عندها وقت الولاده و كان حاطط البنت وامها على راسه حسب ما ذكرتلنا الام بس رجعت, قبل 3 شهور البنت اجت تحضر عرس اخوها, واضح ان البنت متغيره لكن المسؤوليات الجديده , البيت و البيبي الاّ ما يغيرو فيها اشياء كتيره.

بيوم من الايام وهي بتحكي عالتلفون مع زوجها اللي بالخليج وهي قاعده بين اهلها, فتحت السبيكر فجأه, طلع صوت الزوج وهو بصرخ و بسب وبلعن بابذء المسبات , انصدم الاب ومسك التلفون و حاول انه يفهم من الزوج ولمّا ما لقى ان في فايده سكر الخط, ولمّا سألو البنت, طلعت البنت من بعد ما سافرت امها بفتره قصيره مكتشفه ان زوجها بخونها, بحكي مع بنات عالنت و عالموبايل و بتواعد معهم و بتلاقى معهم برّه, وانه كان يغيب يومين وتلاته عن البيت عاساس انه عنده شغل بمدينه تانيه و تكتشف انه يكون مع وحده من هالبنات اللي متعرف عليهم, ولمّا واجهته قلب 180 درجه وصار يضربها, وحبسها لمده اسبوع بغرفه النوم و كسر موبايلها و بعد ما قدرت تضحك عليه و تعمل حالها انها بدها تتفاهم معه واعتذرت عن تدخلها بشؤون حياته, وصار يحكي مع البنات ويتواعد معهم قدامها, قدرت تقنعه انها تنزل عالاردن تحضر عرس اخوها, ولمّا وصلت ما حبت تحكي لاهلها لحتى يخلص العرس علشان ما تخرب عليهم فرحتهم, والبنت حاليا رافعه قضيه طلاق بالمحكمه

هدول 3 قصص لناس حقيقيين عايشين معنا وحوالينا, كلنا بنعرف ان البيوت اسرار و ان كل انسان عنده الهموم اللي تكفيه واللي على قدّه, ممكن هم انسان يكون سخيف بنظرنا بالنسبه للي بنعانيه احنا, وبرضه ممكن همنا يكون سخيف عند ناس تانيين, الحمد لله على كل حال.

السؤال اللي بدي اسأله, كيف ممكن ترتبو هالقصص التلاته من الاكثر صعوبه للاقل صعوبه, مع مراعاه البيئه اللي بنعيش فيها و الافكار الاجتماعيه اللي عند اللي حوالينا, من قصتها اصعب من التانيين؟؟؟

انا برأيي ان البنت التانيه هي اصعب شي لانه تقريبا و لهلأ ما في انفكاك .

احترت باللقصه الاولى واللي برجح انها تكون ابسط و بين القصه الاخيره

هلأ انها ترجع لبيت اهلها بدون اولاد عند ناس كتيره افضل من انها ترجع باولاد, لكن بنفس الوقت انها تكون طلعت من هالتجربه الفاشله بولد يكون هدفها واساس حياتها برضه اشي ايجابي...

انتو شو رأيكم؟؟؟

انا ابيع صاحبي علشان بنت .....كلاكيت تاني مرّه

طبعا هاي الكلمه دايما بنسمعها من الشباب و دايما الحكي انو البنت بتبيع ابوها علشان شب مش بس صاحبتها
وللاسف انا بالجامعه حضرت مشكلتين بين بنات وشد شعر على شب و الشب بكون واقف على جنب بستنى ان يروح مع المنتصره
وبنفس الوقت اكتر من مشكله بين الشباب و بتطلع بالاخر علشان بنت
فالمفروض ما يكون في تعميم ..في هيك وفي هيك

بدي احكيلكم قصه حصلت مع اخوي...اخوي سنه رابعه جامعه و احنا والحمد لله كتير قراب من بعض يمكن بحكم ان ما ضل غيرنا بالبيت والباقي تزوج وطلع,المهم...بحكيلي انه تلاقى هو وصاحبه و صاحب صاحبه خلينا نسميه فلان

فلان بحب بنت بتدرس بجامعه تانيه و متعلق فيها كتير...وطلب من اخوي طلب غبي ان يعطيه رقم تلفون البنت اللي هو بحبها على اساس انو بدو يختبرها... وللاسف كتير شباب بعملو هالشي...المهم اخوي ما كزب خبر بحكيلي اخدت الرقم ورنيت عالبنت ...خلصو كل الرنات وما جاوبت
طبعا نفش ريشه فلان وصار يحكي شايف يا زلمه ما احسنها...حتى عالارقام الغريبه ما بتجاوب..انا حاسسها هالبنت غير ...شايف الادب...شايف الاخلاق...شايف...قطع كلامه صوت رنه موبايل اخوي...بتطلع عالرقم ويلا مين يا معلم...رقم البنت :)

رد اخوي عالتلفون...بحكيلي سحبت عليها فيلم على اساس انو هي صاحبتي وانا بستناها بالكوفي شوب وهي تأخر
وبدا اخوي...انا كم مره حكيتلك ما بحب تتاخري علي واضل استنى...وبعدين مع هالعاده اللي فيكي..بحكيلي البنت بلّمت و بعد فتره بتحكيلو عفوا مين معي
بحكيلها انت مش فلانه..حكتله لأ انا لقيت مسد كول على موبايلي من رقمك وكنت بعيده عن التفلون..حكالها اهااا انا اسف كتير عالازعاج
..هي بدت تساله...انت بتدرس ويلا بتشتغل..حكالها بدرس وبحكيلي صارت البنت تتناغش وشو بتدرس و اي سنه وكم طولك وتمد المكالمه نص ساعه ...بحكيلي اخوي انا انسيت فلان اللي قاعد وفاتح تمه وخانس المسكين...بحكيلي انهيت المكالمه وحكيتلها يلا انا مضطر اروح
طبعا فلان اصفّر و كش...بحكيلي اخوي ما عرفت شو احكيله...

المشكله ان البنت بعد ساعتين ردت حكت...بحكيلي اخوي ان البنت من الاخر حسب الوصف وانا حكيت خلص مدامها طلعت هيك شو بده فيها فلان...فبحكيلي هلأ انا بكون رخيص ازا كملت مع البنت؟؟؟؟

طبعا حاليا اخوي والبنت على اتصال...وفلان طلع من الموضوع وبدوش يتعرف على اخوي ولا صاحبه ....وصاحب اخوي ندم انه مش هو اللي حكى :)
وبرجع بحكي....ان الشباب لا يمكن يبيعو صحابهم علشان بنت!!!!
اه ماااااااااشييييييييي صدقتك


** البوست هاد قديم من 17-9-2008 ,اخوي اليوم حكالي قصه مشابهه لهالموقف فحبيت ارجع اشاركم فيه لانه اعتقد ان معظمكم ما قرأه من قبل ....لاني كتبته في الفتره اللي كنت مبتدأه لسا وما حد بعرفني
عاساس انا هلأ صرت من المشاهير :")

اهلك ادرى بمصلحتك....

كتير اهالي بياخدو قرارات رئيسيه بحياه اولادهم, من منطلق انهم ادرى بالحياه وانهم بقدرو يحكمو عالاشخاص و عالمستقبل اكتر من ولادهم, وللاسف مرات كتير بعاني الولد او البنت طول عمرهم من هيك قرارات.

بتختلف القرارات وتأثيرها عالحياه, بتبدا يمكن من يوم ما اختارو اسم المولود, و بتمر بالعلمي و الادبي بالتوجيهي , بنسو ميول الطالب نفسه وبركزو على مصالح وافكار اجتماعيه بحته , ابن فلان علمي وابني ادبي لا والله, بدك تطلع دكتور و بدك ترفعنا من هالحياه اللي زي الزفت, بدك تدرس مهندس و تتعين عنا بالشركه...الخ من هالمعتقدات والفرضيات وكلها بتروح في خانه, ابوك اعرف منك بمصلحتك , لاتعانده واكسب رضاه.

اليوم بدي احكي عن قصه صاحبه الي, وكيف تدخل اهلها بحياتها خرب حياتها و حياه اولادها بعدها

صاحبتي جابت معدل عالي بالتوجيهي, وانقبلت بجامعه مؤته الفرع المدني , و لانها من عائله محافظه و ببتكون من 4 بنات والاب بشتغل بره البلد, ففضل الاب انه يحاول ينقلها على جامعه بعمان, وبحكم انه بره البلد استنو لاجا وبس قدمو طلع فتره التسجيل خالصه بالجامعه, واعتبرو البنت مستنكفه و راح مقعدها.

البنت ما يأست وقعدت سنه بالبيت وتعلمت تجميل و صارت تشتغل بصالون ليجي موعد التقديم للجامعات السنه اللي وراها, وللاسف بوقت التقديم للجامعات كان الاب عنده مشاكل بشغله , و وضعه المالي بالمره وما بقدر يدّرس حد جامعه, البنت قدمت على كليه و درست وقدمت دبلوم و اشتغلت, وهي بالشغل جسرّت جامعه - يعني بعادلولها ساعات الكليه والدبلوم و بحسبو كم ضايل ساعات لازم تدرسهم بالجامعه ليعادلولها شهاده الكليه بشهاده بكالوريوس - اشتغلت و صرفت على دراستها وكتير عانت خلال هالمده و الحمد لله خلصت و جابت معدل جيد جدا.

وهي بتدرس تقدملها شب من العيله, هي ما بتحبه ولا بتحب اسلوب حياته, الشب اتكالي على اهله بكل شي, وغير ملتزم لا دينيا ولا اجتماعيا, و رفضته بالرغم من معارضه امها بالزات , هو الشب من قرايب الام و بدها تطمن على بنتها على رايها.

قبل التخرج بكم يوم, اكتشفو ان والدتها عندها سرطان, تكركبت العيله و اتدمرو نفسيا وتعبت الام كتير و بدت المطاردات و جرعات الكيماوي - الله يعينهم ولا يبلينا ولا يبلي حد- تخرجت البنت و قدمت لوظائف بشهادتها البكالوريوس وانقبلت براتب ضعف الراتب اللي بتاخده و تركت الشغل وانتقلت للشغل هناك, بس هي كانت تحكيلنا انها نفسها تطلع تشتغل بره الاردن بس اللي صار لوالدتها هو اللي راح يخليها بالبلد.

وبهالفتره رجع تقدم نفس الشب للبنت, الام لانها مريضه عملت مشكله كبيره مع البنت انها لازم تتزوجه, والبنت رفضت مره تانيه, بس هالمره الام تعبت و بطلت بدها تشوف بنتها و لا بدها اياها تاخدها عالدكتور, البنت تحت تأثير الام رضيت تقعد مع الشب مره تانيه, و بتحكيلنا حكيتله انا ما بدي اياك و انا ما بدي اتزوج هلأ, و والدتي هي اللي بتضغط علي, الشب بكل برود بحكيلها بكره بتتعودي علي, انا بدي اياكي, حكتله انت بتحبني يعني؟؟؟ حكالها لأ مش حب بس انا حسيتك مناسبه الي!!!

استمر الموضوع اشهر والبنت تحاول تتخلص من الشب وبالاخر الام حكتلها بموت وانا غضبانه عليكي, وتحت كل تأثيرات العيله اللي حست البنت مجرمه بحق امها ومش مراعيه ظروفها و مش مقتنعه ان الام بدها مصلحتها, وافقت و انخطبت وتزوجت.

بعد ما تزوجت بفتره صار عندها مشاكل بين تعارض اجازتها اللي ماخدتها من عنا و انها اشتغلت بالبلد, فتركت الشغل الجديد ورجعت عنا.

صاحبتي الها سنتين متزوجه عندها ولد و حامل بالشهر الثامن,سنتين من الجحيم و المشاكل, سنتين من الكره , سنتين مش طايقته ولا هو طايقها, بس المهم قدام العالم متزوج و عنده بيت و ولاد, سنتين وهو اله علاقات مع بنات, في عنده خط موبايل ممنوع حد يمسكه وطول نهاره واقف عالبرنده بحكي فيه تلفونات, حاولت انها ما تحمل عالقليله بالتاني, بس هو اصر عالموضوع وحكالها, ولدين صعب تتركيهم , يعني بعرف انها ما بدها اياه وممكن تتركه باي لحظه و موافق يعيش معها بالغصب.

سنتين لا فيهم كلمه حلوه ولا حركه حلوه ولا حاول انه يقرب منها خطوه وحده, احنا كنا وما زلنا بنحكيلها انها هاي صارت حياتها وانها تحاول تقرب منه و تحاول تستوعبه وتتعود عليه تحاول تكسبه, مع انا كلنا مش مقتنعين باستمرا هيك حياه لا الها ولا للاولاد.

هي بتحكي اذا صار اشي لا سمح الله لامي , اول شي بعمله بتركه واذا اصر ياخد الاولاد بتركه هو و اولاده , بنحكيلها حرام عليكي الاولاد شو ذنبهم, وما راح تقدري تبعدي عن اولادك.

امها هلأ كتير مبسوطه, وهو صار عندو مشاكل بالشغل اله 5 شهور قاعد بالبيت وهي واهلها بصرفو عالبيت, و بدفعو لاهله مبلغ شهري مع ان ابنهم قاعد بالبيت بس لازم يدفعو لاهله, بتحكيلنا ازا هلأ واول سنوات زواجنا هيك عشناهم, شو بدو يصير بعد خمس سنين.

ما بعرف شو ممكن احكي, انا من جوا مقتنعه انها مش مجبوره تتحمل هيك عيشه, بس هلأ صار في ولاد, ولاد هو اصر يجيو بسرعه علشان ماتتركه, الشب ما بعمل حركه وحده تبين انه منيح وشاري البنت, طيب ليش تزوجها, ليش ما شاف وحده تانيه ترضى بهالحياه, لا عندها طموح ولا عندها اشي مهم غير انها تتزوج, انا بضل احكيلها لأ بدك تتعودي و بدك تيجي على حالك علشان الاولاد, بس مرات بحط حالي مكانها, ما بقدر استحمل ولا بقدر اكمل, شو ممكن تعمل؟؟؟ تعيش هي و اولادها ولا كأنه موجود بالحياه؟؟؟ تتأقلم على حياه بدت غلط اساسا؟؟؟
مش عارفه.....الله يعينها ويسامح امها ....

يا سلااااااام عالاخوّه

اخوي بحكيلنا قصه صارت عندو بالشغل بالامارات

بحكي ان الهندي اللي بشتغل عندهم واللي اله 3 سنين مش مسافر عالهند عند مرته و اهله
اجا من الصبح ببوزع عليهم حلوان, خير يا" كومار" - طبعا اسمه مش كومار بس نسيت شو اسمه وهاد اللي خطر في بالي فمشولي اياها - حكالهم : مرتي جابتلي ولد جديد, طبعا بحكيلي اخوي كلنا انصدمنا, ايش اللي مرتك جابت ولد جديد؟؟؟؟ المهم تشجعو الشباب و راح واحد منهم يسأله, و يفهمه غلطه :)


راح الشب بحكيله هلأ مرتك وين؟؟ حكاله بالهند.
طيب من ايمتا انت مش رايح عالهند؟؟ حكاله من 3 سنين
طيب يا كومار يا حبيبي كيف مرتك اجاها ولد جديد؟؟؟!!!!؟؟؟؟!!!!

حكاله احنا عنا عاده بالهند بس يغيب الزوج الاخ بحل مكان الزوج بكل اشي , سألوه يعني هلأ الولد بتسجل باسمك ولا اسم اخوك
حكالهم لأ طبعا باسمي, مهي مرتي!!!!

كيف بفكرو هالعالم نفسي افهم؟؟؟
يعني انسو الامور الدينيه و اختلاط الانساب , كل هالقصص انسوها
بس منطقيا يا كومار....كيف بتستوعب هيك اشي؟؟؟

تحذيييييييييييييييييييييييير

في خبر قرأته في موقع زاد الاردن, بحكي عن شخص اله 15 سنه بعمل عمليات نصب عالبنات و بوهمهم انه شخص مهم و بوعدهم بالزواج, واله اسبقيات و بنحبس كم شهر و بطلع من السجن و برجع لنفس الطرق بالنصب, باول لقاء بكون لابس احسن لبس, وبحكي عن حاله بشتغل طيار او مهندس وان وضعه المادي فوق الريح, و بحكيلها انه بمر بازمه حاليا و بحاجه لفلوس و بتقوم البنت بتعطيه فلوس و بتعطيه دهبها, و كاتبين قصه وحده من البنات عمرها 20 سنه و مقدمه فيه بلاغ للشرطه بانه ماخد منها فلوس ومصاغ بقيمه 14 الف دينار.

اللي بقرأ الموضوع بحس انه فيه نوع من المبالغه, يعني شو 20 سنه و معها 14 الف, كبيره بصراحه.

بس اللي بدي احكيه ان قصه هاد المحتال حقيقيه.....اه حقيقيه....كيف عرفت؟؟؟ لاني انا شخصيا كنت ممكن اكون وحده من هدول البنات :)

وانا بالشغل اجا تلفون عالمكتب, رديت اللي بحكي رجال و طلب يحكي معي بالاسم, حكيتله تفضل مين معي, مش متزكره الاسم الاول بس متزكره العيله " الناصر" حكيتله تفضل بحكيلي اليوم في واحد صاحبنا اجا عندكم عالشغل و شافك وبعرف اني بدور لابني على عروس و بصراحه انت كتير عجبتيه و هو اتصل فيي و اعطاني اسمك, انا ابني بشتغل طيار و دارس بالمانيا, و انا عمو حابب اخد رقم تلفونك علشان اتصل و اتفق مع والدك علشان حابين نزوركم.

انا لاني ما شاء الله كتير شاطره - طبعا قصدي العكس- اعطيته رقم تلفوني الخلوي :) بعرف ..بعرف مبدعه "كانت اول مره و اخر مره بعطي رقمي الخلوي لحد.
المهم روحت عالبيت حكيت لاهلي عن الموضوع المغرب رن تلفوني, مرحبا عمو انا فلان الناصر بقدر احكي مع بابا, احنا طبعا قدّرنا هالحركه, انه طلب يحكي مع بابا فورا, حكينا واضح ان الجماعه بفهمو و بعرفو بالزووء و الاصول.

المهم حدد بابا معاه موعد يجو عنا اخر الاسبوع.تاني يوم كنت انا وماما بره, رن التلفون نفس رقم الجماعه, الو مرحبا كيفك عمو, عمو ام فلان حابه تحكي معك و تسلم عليكي -اللي هي ام فليح يعني- كيفك خالتو وشو اخبارك و انا كتير مبسوطه لانا النا فتره بندور على عروس و اخيرا لقيناكي ومن هالحكي اللي بكبر الراس, انا بصراحه كنت مبسوطه عالحكي , وبعدين بتحكيلي حبيبتي فليح حابب يقعد معك في اشياء بده يحكيلك اياها قبل ما يجي عندكم عالبيت, حكيتلها ان شاء الله بس تيجو عنا عالبيت بحكي اللي بده اياه, حكتلي لأ هو حابب يحكيلك اياها بينك و بينه في تفاصيل حابب يتفق معك عليها و تكونو مرتاحين وانتو بتحكو لو تروحو على كوفي شوب احسنلكم, حكيتلها خالتو عنا بالبيت اريح اشي بالنسبه الي, فجأه صار العمو يحكي عالتلفون, ال يا عمو انت بنت واعيه و جامعيه المفروض انك تكوني متفتحه اكتر من هيك, حكيتله عمو انتو جايين اخر الاسبوع بنحكي باللي بده اياه عنا بالبيت, انتو جايين زياره عاديه و بنتعرف على بعض, بحكيلي خلص خلص بحكيلك راح نيجي بس انت اقعدي معه تفاهمو على هالكم شي, حكيتله لأه انا اسفه عمو, وازا عندكم مشكله احنا تشرفنا بمعرفتكم وبصراحه عمو انا بره البيت و لازم انهي المكالمه, سكرت الخط و انهيت المكالمه.

المهم روحت عالبيت شوي الاب بحكي مره تانيه, نفس الحكي و نفس الاقناع, حكيتله تفضل هاي بابا معك احكيله اللي بدك اياه, يا دوب اعطيت بابا التلفون الزلمه سكر الخط, استغربنا و حللّنا و حاولنا نوصل لشي يشرح اللي صار ما قدرنا.

انا نسيت الموضوع تماما, بعد بسنه تقريبا ما بعرف شو بحكي انا و جارتنا, بتحكيلي قصه صارت مع اختها, نفس اللي صار معي ونفس اسم الشخص, بس اختها وافقت تروح معه عكوفي شوب و اللي صاير انه حكالها اشياء تافهه ما الها معنى, وانه خجول وحابب يتعرف عليها ومن هالحكي وبالاخر بحكيلها انا مش حابب اجي ايدي فاضيه بدي اشتريلك هديه, اعطيني الخاتم و الاسواره اللي لابستيهم علشان اجيب نفس القياس و برجعلك اياهم بس نيجي عندكم, و الاخت الشاطره معطيته اياهم, و طبعا ما شافت وجهه بعدها,
ولما راحت بلغت الشرطه حكولها انت خامس حاله تبلغ عن نفس الشخص خلال هالشهر.

يعني يا جماعه الموضوع حقيقي و خطير, فديرو بالكم

براءه

امبارح كنا طالعين على سيتي مول , وكان معنا 3 بنات , بنت اخوي "فرح" عمرها 4 شهور و بنات خالتها وحده 4 سنوات " جود" و وحده سنه ونص "جنا".

المهم لفلفنا بالمحلات و من الاشياء اللي شتريناها باللون و لعبه لجود , اتفقت امها انهم الها ولاختها الصغيره, وبعد اللفلفه و كالعاده بس نروح على أي مول بتواجد فيه سينابون لازم نقعد وناكل :$

واحنا قاعدين " ام جود" اعطت "جنا" البللون علشان تلتهي فيه لحتى ناكل, طبعا وكعاده الاطفال "جود" واللي بتلعب باللعبه انجنت " هاد الي انا, ما بدي اياها تلعب فيه" مع بدايه تنكد, ابوها حكالها اوك اذا هاتي اللعبه تلعب فيها مش احنا اتفقنا انها بالنص الك ولاختك, سكتت شوي وبعدين حكت لا لا خليها تلعب بالبللون.

بعد شوي "ام جود" قامت شوي شوي و حملت بنت اخوي "فرح" و راحت بعيد علشان "جنا" ما تشوفها لان من يوم ما اجت فرح و هي مش طايقتها .

بتسألنا جود" ليش ماما هيك عملت, حكتلها مره اخوي علشان "جنا" ما تغار....سألتنا شو يعني تغار؟؟؟

طبعا هاي المره المليون اللي بتسأل هالسؤال قدامي, حكيتلها انا بحكيلك.

انا: هلأ معقول ماما تحب حد اكتر منك؟

جود : لأ طبعا.

انا: بالزبط, ماما لا يمكن تحب حد اكتر منك, بس انت كبيره و بتفهمي هالحكي, بس جنا لساتها زغنونه و يادوبها بتمشي و يا دوب بتحكي بابا, ما بتفهم هالشي, تخيلي انها بتفكر ماما بتحب فرح اكتر منها لانها بتلعبها.

سكتت شوي انها بتستوعب بعدين حكتلي: اااااه يعني زي لما انا زعلت لما اعطو البلون لجنا و كانو بدهم يعطوها لعبتي, انا غرت وقتها!! :)

حكالها ابوها بالزبط...مثال واضح و صريح ومباااااااااااششششششششششششرررر, وال ايش مش فاهمه شو يعني تغار.

ههههههههه الله يعينهم الصغار على هالمشاعر اللي بتصير عندهم بس يجي أي بيبي جديد عالعيله, بس لازم الاهل يستوعبو هالشي وما يتجاهلوه دايما يراعو مشاعر البيبي اللي بكون صغير اساسا بس لما يجي بيبي جديد بفكروه صار سنه تانيه جامعه عاقل وبفهم و واعي وكبير.

Nice Stories

I know that some of you don't like to read a copy paste things ,but believe me this is some thing nice to share.
I liked most the second story.....enjoy :)

a little confusion

Caller: Hello, can I speak to Annie Wan?
Operator: Yes, you can speak to me.
Caller: No, I want to speak to Annie Wan!
Operator: Yes I understand you want to speak to anyone. You can speak to me. Who is this? Caller: I'm Sam Wan. And I need to talk to Annie Wan! It's urgent.
Operator: I know you are someone and you want to talk to anyone! But what's this urgent matter about?
Caller: Well... just tell my sister Annie Wan that our brother Noe Wan was involved in an accident. Noe Wan got injured and now Noe Wan is being sent to the hospital. Right now, Avery Wan is on his way to the hospital.
Operator: Look, if no one was injured and no one was sent to the hospital, then the accident isn't an urgent matter! You may find this hilarious but I don't have time for this!
Caller: You are so rude! Who are you?
Operator: I'm Saw Ree.
Caller: Yes! You should be sorry. Now give me your name!!
Operator: That's what I said. I'm Saw Ree

The bad salesman

John was a clerk in a small drugstore but he was not much of a salesman. He could never find the item the customer wanted.

Bob, the owner, had about enough and warned John that the next sale he missed would be his last.

Just then a man came in coughing and he ask John for their best cough syrup. Try as he might John could not find the cough syrup. Remembering Bob's warning he sold the man a box of Ex-Lax and told him to take it all at once.

The customer did as John said and then walked outside and leaned against a lamp post.

Bob had seen the whole thing and came over to ask John what had transpired.

"He wanted something for his cough but I couldn't find the cough syrup. I substituted Ex-Lax and told him to take it all at once" John explained.

"Ex-Lax won't cure a cough!" Bob shouted angrily.

"Sure it will" John said, pointing at the man leaning on the lamp post."Just look at him. He's afraid to cough!"

The Mechanic and the Doctor

A mechanic was removing the cylinder heads from the motor of a car when he spotted the famous heart surgeon in his shop, who was standing off to the side, waiting for the service manager to come to take a look at his car.
The mechanic shouted across the garage,"Hello Doctor!! Please come over here for a minute."
The famous surgeon, a bit surprised, walked over to the mechanic.
The mechanic straightened up, wiped his hands on a rag and asked argumentatively, "So doctor, look at this. I also open hearts, take valves out, grind 'em, put in new parts, and when I finish this will work as a new one. So how come you get the big money, when you and me is doing basically the same work? "
The doctor leaned over and whispered to the mechanic.... .
He said: "Try to do it when the engine is running".