Things I Like To Whisper About

Would You Hear Me Whispering

ام كامل الكرد




امبارح بعد ما روحت من الشغل واول ما وصلت البيت اتصلت فيي بنت خالي بتحكيلي ان في اليوم درس بدها تعطيه وحده جاي من القدس ببيت المحاضره اللي باخد عندها دروس فقه كل يوم اثنين, انا بصراحه كنت تعبانه بس حكيت يلاا بنام وبروح لاني بحب اسمع اخبار اهلنا بفلسطين واكيد بتكون غير بس تنحكى من الناس العايشين هناك.

رحت والحمد لله اني رحت, اللي جاي اسمها ام كامل, انا ما عرفتها بالبدايه و بالصدفه اجت قعدتي جنبها, حكت معي وتعرفت علي و سألتني من وين و شو دراسه وشو بشتغل, عاده ما بحب اللي بسالني هالاسئله من اول جلسه بس ما بعرف ارتحتلها وكنت اجاوب وانا كتير مبسوطه.

بدا الدرس, طلع الموضوع مش درس, طلعت ام كامل جاي تحكيلنا عن وضعها و وضع كتير ناس زيها بالقدس, بدت القصه من 1999 , وصارت تحكيلنا عن معاناتها هي و زوجها و اولادها, القصه طويله مختصرها ان بيت ام كامل من اقرب البيوت للمسجد الاقصى, واليهود بدهم اياها تطلع من البيت باي طريقه, وفعلا اخدو جزء من البيت و سكنوه مستوطنين يهود, اللي حاربوها واذوها هي وعيلتها نفسيا و جسديا, وكان دايما ايمانها بالله هو اللي مقويها و مخليها تصبر.

وبعد عده محاولات ما قدرو يطردوها من البيت ,عرضو عليها فلوس علشان تترك البيت وما رضيت, بيوم من الايام هجمو عليها اليهود بنص الليل,كانت هي وزوجها المقعد لحالهم بالبيت لانهم طلعّو قرار بتغريمها اذا حد من ولادها ضلو عندها بالليل, ربطوها ورموها بره البيت, و ضلت من الساعه 12 بالليل للساعه 10 الصبح وهي مربطه و الجنود حواليها لحتى فضو البيت من كل اشي فيه , و سكرو الابواب وهي مش عارفه شو عملو مع زوجها, بعد ما فكوها لقت زوجها عند الجيران رموه اليهود قدام الباب لانه ما بقدر يمشي, وبتحكي وحده من الجارات انها سمعت زي صوت شخير, طلعت ولقته واقع و نادت جاره تانيه و حملوه لبيتها و بعتت تجيب دكتور بعد ما حاولت تتصل بالمستشفى و حكولها ان الجنود مانعين سياره الاسعاف تدخل المنطقه, وطلع زوجها انصاب بجلطه.

ام كامل اخدت زوجها عالمسشتفى وبعد فتره انصاب بجلطه تانيه, وبعد فتره انصاب بجلطه ثالثه واللي اتوفى على اثرها, قررت ام كامل تعمل اشي, راحت قدام بيتها و نصبت خيمه وقعدت فيها , هالحكي في بدايه 2009 و لليوم هي مقيمه بهالخيمه رغم ان الجنود هدوها 5 مرات.

و هي بتحكيلنا القصه اتصل فيها راديو البلد و عمل معها مقابله عالتلفون,اول ما وصلت البيت عملت بحث على النت عن ام كامل, طلع في مقالات كتيره عنها وعن تكريمها من عده مواقع وجمعيات, وبالصور مليان صور الها بخيمتها, كتير انقهرت اني ما بعرف عنها....مع اني متابعه للصحف بس لقيت اكتر من مقال عنها عمري ما قرأتهم, واكتر من شخص شفته من امبارح لليوم اسأله عن ام كامل برضه ما يكون سامع عنها, مع انها حكتلنا ان كتير ناس كانو يجو عندها عالخيمه, اجانب وعرب وناس من حقوق الانسان , وحكتلنا ان في ايام يجتمعو عندها بالخيمه مسلمين ومسيحيين ويهود, وانهم كلهم ايد وحده ضد الظلم, عجبتني جمله حكتها ام كامل, بما معناه ان انا ما بهمني شو ديانتك ولا بكرهك لديانتك, لان ديني بحكيلي اني لازم اؤمن بكل الديانات وكل الانبياء, وان لا اكراه بالدين, اللي بكرهو هو اللي بأذيني وباخد حقي ايش ما تكون ديانته.

هي القصه كامله لام كامل لقيتها منشوره بجريده الدستور

واللي بدو يعرف تفاصيل اكتر هي هون مجموعه مقالات واخبار























7 التعليقات :

انا بعرفهـا بس ما كنت اعرف اسمها
وقصتها قديمه

نيالك اللي شفتيهـا والله يقويها
ويرجعلها حقها

والجملة تاعت كل الديانات كتير عجبتني

فعلا الظلم عالمي وماله دين

 

فعلا وانا اول مرة بسمع فيها وبقصتها مع انو وحدة متلها بتسوى بلد

"انا ما بهمني شو ديانتك ولا بكرهك لديانتك, لان ديني بحكيلي اني لازم اؤمن بكل الديانات وكل الانبياء, وان لا اكراه بالدين, اللي بكرهو هو اللي بأذيني وباخد حقي ايش ما تكون ديانته"

يااا هي الجملة ما اروعها و كتير بتبين شو داخل هالانسانة في ادراك و وعي مش موجود عند كتير ناس

الله يقويها يا رب وطول ما في ناس متلها ما بضيق حق

 

بيعلمونا الكفاح من اجل مبدأ فقدنا صورته في هالايام شي حلو انه امتلكت هالفرصه نيالك والله ينولهارجعتها ع البيت
قصتها قصص الكثار من اهل القدس الله يعينهم

 

I wish god to help them,, o enshallah el7a2 ma bedee3. jd shy berfa3 el ras.

 
بكتريا وطننية

امراءة قوية وتستاهل الاحترام والتقدير ... ونحنا نايمين
والصاحين خونة ... مع كل الاحترام والتقدير وان شاء الله بنشوفها وبنشوف الشيخ رائد صلاح والاب عطالله حنا .... لانهم اشخاص يستحقو التقدير والاحترام عن جدارة
الله يكثر منهم ويهد الخونه

 

Mohammad B Irshid

Ameen ya rab....and the way she is talking makes u very shy of the way u live ur life

allah yonsorhom w inshallah benkon m3hom

بكتريا وطنيه

الله بعين
وان شاء الله يصحى الكل صحوه حقيقيه وما يكون التأثير لحظي زي دايما :$

اميييييييييين يا رب

 

والله يا ويسبر في كثير نسوان مثل ام كامل
بس للأسف بعاد عن بلادهم و مع هيك دايماً لما بيحكوا بتحسي الوطن ساكن جوا قلوبهم