Things I Like To Whisper About

Would You Hear Me Whispering

الى متى هذه الظواهر !!!!



ما بعرف اذا في بنات تانيين بعانو من هالموضوع ويلا بس انا والبنات اللي بعرفهم

بتكوني ماشيه بالمول او بالسوق , ما شاء الله عليكي لبسك محتشم وكامل ,فجأه بتلاقي ست ماشيه هي و زوجها و زوجها من اللي عينهم زايغه وبتطلع عالبنات اللي رايحين وجايين, بتقوم مرته بتصير تجحر بالبنات كأنه زنبهم انهم طلعو من بيوتهم وعاشو حياتهم عادي, مش المشكله بزوجها, و كأنه لازم ازا الاخت طلعت مع زوجها باقي البنات يضلو مضبوبين بيوتهم لحتى تخلص مشوارها هي و المحروس, مش انه هو اللي مش معبي عينه حد ولا حتى مخترم هالست اللي متزوجها


اشي تاني برضه بتكوني ماشيه بمول او طالعتلك طلعه وماشيه بادبك واحترامك و ما شاء الله عليكي, بيجي اخ مع مرته المنقبه او اللي لابسه خمار, و برضه بصير يتطلع عليك, انه الاخ عامل اللي عليه ومراعي حرمته و مخبيها وساتر عليها اما انت بما انك بس لابسه حجاب -طبعا هاد من وجهه نظره - فانت مش مراعيه حرمه نفسك وهاد بيعطيه الحق انه يصير يتطلع عليكي ويلحقك بنظراته وين ما رحتي, وبنسى تماما ان في اشي بالدين اسمه غض البصر!!!!

هاد كله غير موضه الجحر اللي ماشيه عنا, بتكوني ماشيه وعين الله عليكي فجأه بتيجي قدامك وحده بتطلع عليكي من فوق لتحت و بترفعلك حاجب كأنه بدها تطاوشك و بتلفي وجهك انه خلي العقل مني, بترجعي تطلعي بتلاقيها بنفس البوز و نفس الوقفه ونفس الجحره, بتطلعي عليها انها تفهم انك شايفتيها وانها تكسر عينها لكن ابدا, كل العالم ماشيه وطالعه بس علشان تبحلق وتجحر بالعالم, انا طالعه انبسط اغير جو, الكل بس براقب تصرفات الناس , بتلاقيهم قاعدين على طاوله ياكلو , ولا كلمه بحكو مع بعض و بس بتصفنو بوجه العالم

كأس العالم و موسم الحج!!!



النا فتره بنسمع عن موضوع انفلونزا الخنازير وموضوع الحج, وكيف ان معظم الدول بتفكر انها تحدد اعمار و اعداد اللي بدهم يروحو و بدهم ينمنعو انهم يروحو عالحج السنه بسبب انفلونزا الخنازير , اللي ما بعرف لهلأ شو موضوعه بالزبط هو مرض حقيقي وخطير ويلا لأ؟؟؟ وهو مرض مميت ويلا اشاعه علشان يروجو العلاج؟؟؟ وهل هو اخطر من الانفلونزا العاديه ؟؟؟ و بالنسبه للعلاج هل صحيح انه بسبب السرطان؟؟ وهل صحيح انه عباره عن فيروس انفلونزا الطيور حي ؟؟ كتير ايميلات و كتير تحليلات بمواقع رسميه و غير رسميه و وهميه احيانا , قرأنا و سمعنا تحليلات و تفسيرات و انا من اللي تاهو بصراحه...

الموضوع اللي فكرت فيه اليوم هو كأس العالم, كلنا بنعرف ان كأس العالم قرب و انه كتير ناس بستنوه و بخططو يروحو على جنوب افريقيا علشان يحضرو المباريات , غير عن البعثات اللي راح تنبعث من كل دول العالم

هلأ يا جماعه حد يشرحلي اياها.....ليش ما حد جاب سيره كأس العالم وتأجيل كأس العالم او منع بعض الناس انهم يروحو على كأس العالم؟؟؟

هلأ مثلا الفيروس مقرر انه ينتشر بالحج و ما راح ينتشر بكأس العالم؟؟؟
ويلا من هون ليبدا كأس العالم سبحان الله راح يكون مقضي على كل الفيروس و منتهي امره؟؟

ليش العالم كلها بتحكي عن خطوره موسم الحج و ما حد جاب سيره خطوره كأس العالم؟؟

بس حابه حد يشرحلي اياها....

احلى عيد بحياتي :)

من اول العيد وانا مبسوطه ومش عارفه ليش, من زمان فقدت المعنى الحقيقي للعيد وصار العيد بالنسبه الي واجبات وزيارات و تضييف و التزام و مجاملات...

العيد هاد غير, انا عزيت الموضوع للطقس, الطقس بنقدر نحكي ربيعي اكتر منه خريفي, يعني الشمس طالعه و الدنيا بترشرش و نسمه هوا عليله معبيه الدنيا :)

لكن ولله الحمد في احداث كتيره صارت هالعيد خلته من احلى الاعياد اللي مرت علي من فتره, ومع ان مزاجي ما كان مزبوط عالاخر اله فتره, لكن اليوم كتير انعدل و لله الحمد :)

بتعرفو بخطبه صلاه العيد دائما وابدا بحكو عن صله الرحم و عن زياره الناس لبعضها وعن عقوبه قاطع الارحام .
خالي وخالتي الهم مقاطعين بعض 17 سنه!!! وطبعا على اشي مش محرز لدرجه ان ما حد متزكر شو السبب الاساسي لهالمقاطعه, خالي حج يمكن 5 مرات و رجل ملتزم دينيا و اجتماعيا وبكل شي , حتى انه هو اللي بصحي امام المسجد على بعض الصلوات لانه من اللي بروحو عالمسجد قبل النداء, وخالتي برضه حجه كبيره و ملتزمه , التنين من المثقفين والمتعلمين بالرغم من كبر عمرهم, المختصر انهم مش جاهلين و بعرفو معنى مقاطعتهم لبعض منيح و بعرفو عواقبها وخصوصا الدينيه.

كل اللي بالعيله حاول يصلح ولكن للاسف بدون فائده, و اكتر من مره توصل انه بدها تصير مقاطعات تانيه بالعيله من موضوع الاصلاح, و قبل 10 سنين تقريبا اقتنعت خالتي و راحت تصالح خالي و مع المعاتبات و تدخل شخص معين باضافه كم من كلمه خربت الموضوع وزادت الطين بله - الله يسامحه بس لو انه ما اتدخل - المهم امبارح كنا قاعدين بالبيت فجأه رن التلفون, انا رديت طلع ابن خالي ,حكى مع ماما و حكالها ان في ضيف عزيز جاي يزورنا و بابا بدو كل خواته يجتمعو عنده, كلنا بنفس الوقت حكينا اسم خالتي اللي مقاطعها, بحكيلنا اه هيها عنا و بابا بدو الكل يجتمع عنا, خالي ساكن قريب علينا و كانت عنا بنت خالتي وزوجها جايين يعيدو علينا فورا قمنا و بخمس دقايق كنا هناك, ياااااااااااااااااااااااااا الله شو انبسطت :)
والله في اشي بوجه خالي متغير, كأنه منور , ضحكه على وجهه اول مره بشوفها , الحمد لله يا رب والله كنت خايفه يصير لحد منهم اشي لا سمح الله وهمه مش متصالحين, الموضوع باختصار ان ابن خالي الله يجزيه كل الخير - اللي للاسف قبل بيوم كنا نحكي عليه وعلى تصرفاته اللي مش راكزه , يا رب سامحنا :$ - ابن خالي اله من اول رمضان شغال زن ونق على الطرفين و بقرب وجهات النظر ومش حاكي لحد بالعيله وهاد الصح , هو اللي جمعهم :)

يا رب اي تنين اخوان , خوات, صحاب اي تنين بالدنيا في بينهم مقاطعه او مشكله الله يصلح الامور بينهم و يهدي بالهم يا رب.

الاشي التاني اللي خلى العيد احلى , ان بالجمعه الكبيره واحنا عند خالي اجت وحده من بنات خالتي متحجبه :) يا الله شو انبسطت انصدمت لاني ما كنت احس ان الحجاب ببالها و فرحت من قلبي والله, وما شاء الله بجنن عليها الحجاب, وبسألها ان شو رأي زوجها بتحكيلي انه هو اللي شجعها, استغربت بصراحه لان زوجها ما بحسه ملتزم دينيا و خصوصا انه ما بصلي, وانا كتير كتير كتير بنقهر بس اشوف شب او بنت وخصوصا اللي اخلاقهم عاليه و بتحسهم نظاف من جوا وما يكونو ملتزمين بالصلاه, انا ما بحكم على حد بس بفكر وبحكي ان امر الصلاه واضح تماما بالقرأن فليش ما بلتزمو , وبعرف انه مش نوع من الكفر لانهم بكونو بعرفو ان الصلاه واجبه بس نوع من الكسل, المهم الخبر الثالث اللي خلاني ما امسك حالي و ابكي من الفرحه ان زوجها من اول رمضان وهو ملتزم بالصلاه :)

الله يتقبل منا جميعا و يهدينا جميعا لكل خير ربنا بحب انا نمشي فيه واليه, و يبعدنا عن اي شي بكرهنا نعمله او بكره يلاقينا فيه :)

عادات قديمه جديده




انا اسفه و بعتذر من البدايه لان الموضوع اللي راح احكي فيه مقرف شوي او يمكن شويتين بصراحه

بدي احكي عن عاده يمكن معظمكم انتبهلها قديش صارت منتشره و خصوصا وانت واقف عالاشاره الا ما تشوف واحد او تنين بعملوها

بدي احكي عن عاده التف و عاده نكوشه المناخير :(

جد جد يا جماعه ايش في؟؟؟؟
يعني ما بوقف على اشاره او حتى لو شويه ازمه الا ما تلاقي واحد فتح هالباب و "خخخخخخخخخخخخخختفوووووووووووه" و سكره و لا كأنه عمل اشي ....

يعني ول يا زلمه ازا انت قرفان تبلع ريقك و زلمه أريييف لازم تقزز حياتنا احنا :$ هالعاده زادت كتير برمضان , طيب ليش ؟؟؟ يعني قرفان و قرفان امسكلك محرمه و تفتف فيها من هون للصبح ما حد ماسكك, مش ضروري تقلب منافسنا على هالصبح و تقرف عيشتنا


نيجي على نكوشه المناخير...يعني بتشوف ولد صغير بعملها بتقرف و بتنخزي منه و بتغسله ايديه و بتعتذر للعالم عن هالمنظر, هلأ رجال و بشنبات - وممكن في ستات ما بعرف انا ما شفت :$ - بكون حاطط عقله‏"‏ بهالبربور‏"‏ و يا انا يا انت بدك تطلع بدك تطلع وهات يا نكوشه, حفريات الله وكيلكم و بتيجي عيني بعينه و عادي يا بضل يتطلع عليكي يا بلف وجهه ببطئ شديد مع استمرار النكوشه, ما شاء الله مخلص الاخ بحب انجاز العمل اللي بدا فيه.

ما بعرف شكله قبل ما نبدا نوعي العالم سياسيا و اقتصاديا و اخلاقيا بدنا نوجهه منطقيا و نحكيله شو اللي بصير و شو اللي ما بصير

انا بقترح نعمل دعايات بالتلفزيون و اعلانات بالجرايد عن محاربه هالعادات السيئه, وبدنا مخالفات لكل واحد بعملها

مثلا...

لما توقف عالاشاره........او تكون بازمه بالسياره....بدل ما تنكوش بالحفاره......او اتفتف بالحاره.... اقعد والبد بلا حقاره :)

غيوووووم :)

معلش يا جفرا بدك تسامحيني بس لازم اكتب عن الجو اللي بجنن اللي كان امبارح و اليوم
احلى اشي اليوم و طول ما انا بالسياره و احنا بنلفلف على بيوت العمات و العمام وانا بتطلع عالسما
الغيوم اليوم سبحان الله اشكالها بتجنن, كأنها قطع قطن او جبال بيضا
جد المنظر كان ساحر, حاولت اخد كم من صوره لكن للاسف مش 100% نقل لجمال المنظر

يلاا محاولات مبتدئين , واحلى شي ان الشباك اللي جنبي ماتوره خربان وما رضي يفتح
يعني من ورا الشباك كمان :$

اتركم مع الصور


























ايلول ذو الذنب المبلول ......كل عام وانتو بخير :)



اولا اسفه كتير على غيابي هالفتره الماضيه, بتعرفو العشره الاواخر و ما بده الواحد يضيعهم علينا والله اعلم نعيش لرمضان الجاي ويلا لأ - اللهم يبلغنا رمضان - كتيييييييير اشياء و بوستات راحت علي و ما قرأتها ...لكن ملحقوه الايام الجاي بمر عليها كلها :)



ان شاء الله يكون ربنا تقبل صيامنا و صلاتنا و قيامنا وطاعاتنا يا رب , تخيلو انه خلص رمضان :( عن نفسي حسيته مشي بسررررررررررعه كتير و الحمد لله كان خفيف مع انا كنا خايفين من الشوب والعطش لكن ربنا رحمنا


كل عام وانتو بالف خير علشان العيد والله يعيده عليكم وعلى كل اللي بتحبوهم بالخير

بدي اسبق التلفزيون الاردني باعلان العيد حتى لو كان يوم الاثنين و بدي اسرق اغنيه الاعلان الرسمي للعيد على التلفزيون الاردني










وكل عام وانتو بالف خير علشان شكله يا جماعه اللي حكا ايلول دنبه مبلول ما كزب
اليوم و فجأه الدنيا بلشت تشتي و كبست اشي بجنن...الحمد لله على كل النعم
ما بتعرفو بركي هاي كانت بركه دعاء حد بليله القدر اللي الله اعلم ايمتا كانت بالعشره الايام الماضيه :)

صورت فيديو مش واضح لاني بصراحه انتقلت من شباك لشباك علشان اصور لاني كل ما اروح على واحد يجي حد من العيله حابب يعبر و يحكي عن فرحته بالشتا و اهرب للغرفه التانيه يجي حد تاني :$
بحاول ازبطه و بحطه ان شاء الله

وانت مش حتنتشرو؟؟؟





من الصفات المشرقه اللي بتشرح القلب لمديري انه نقّاق, يا ويلي اا بدو اشي مستعجل

يا كل 5 دقايق بحكي تلفون من المكتب اللي جنبي, اللي صوتو بسمعه من الكوريدور مش من سماعه التلفون, يا بوقف فوق راسي , ومش مبالغه بكون واقف جنبي ورا المكتب وبتطلع على الشاشه عاساس انه فاهم كل اشي بعمله, مش لو اني فاتحه المسنجر ما بفهم شو بعمل :$

و الاخ بضل كل دقيقه يعيد شو اللي طلبه منه المدير العام وشو بدو الشاشه تعمل بالزبط, وانا شغلي برمجه يعني بدو روقان و هداوه وتركيز, وما بقتنع ان بس يرن التلفون كل خمس دقايق او بس يضل واقفلي ما راح اركز ولا راح اعرف شو اللي بعمله, وكل ما اكون بنص الشغل ومركزه على كل حركه وشو بتعمل بيحكي و ادبا لازم اتنور واتطلع بطلته البهيه و ليخلص بنسى وين كنت وشو كنت بعمل :(



اليوم كان نفسي احكيلي.... وانت مش حتنتشرو؟؟؟؟؟؟

Sweet........Sweet



كيفكم و شو اخباركم
ان شاء الله تكونو بالف خير
برمضان الوقت بمشي و الواحد مش حاسس فيه
مع ان النهار طويل لكن الواحد ما بلحق عمل فيه شي

ما في جديد, يا معزومين يا عازمين يا بناكل لحالنا, احنا من غير شر بس 4 بالبيت خواني التنين و زوجاتهم و اولادهم - اللي هاد اول رمضان الهم - بالامارات فلما اخوي يكون معزوم بره بكون الوضع غريب و البيت فاضي و هادي

اليوم بدي اعطيكم وصفه لحلو , ما بعرف شو اسمه, هو شبيه كتير بالشيز كيك ..

-----------------------

طبقه البسكوت

1 ونصف بسكوت دايجيستيف
1 باكيت زبده 100 غم


مقادير الحشوه

2 لبن زبادي بالقشطه - ببيعوها بالمحلات انا جبتها من السيفواي
9 ملعقه كبيره سكر
12 ملعقه كبيره حليب بودره

مقادير التزيين على الوجه

1 باكيت كريم كراميل
1 ملعقه كاكاو
1 ملعقه نسكافيه
1 كاس ماء




بالخلاط نضع البسكوت و الزبده و بعد ان يختلطو تماما نضعهم في قعر الصينيه - انا بالبايركس بعملهم - يجب ان يرص جيدا البسكوت في قعر الصينيه

الحشوه
نخفق المقادير بالخلاط و نفرده فوق البسكوت ثم يخبز في الفرن لمده 10 دقائق ثم يوضع بالثلاجه

التزيين
نخلط جميع المقادير ونغليهم على النار و من ثم نفرده فوق الحشوه بالملعقه, لا نصبه حتى لا يحفر بالحشوه ولكن نضعه بسرعه لانه يجمد بسرعه من بروده الحشوه

يوضع في الثلاجه لحين التقديم
وصحتين وعافيه

ان شاء الله تكون واضحه....و اللي بدو يحكي كالوريز ما كاوريز - يا نوسه :) - يا بتنسي يا بتنسي :)

شوربه العدس :)



بعرف ان هالرمضان صديقنا مفعوص- او جرفان في مقوله اخرى- اخد على عاتقه يمدنا بالطبخات الرمضانيه
لكن بما انه مشغول بالنقل فانا راح استغل الفرصه و امرق كم من طبخه او حلو - وهو اللي انا شاطره فيه اكتر - بعرفهم لحتى يفضالنا

شوربه العدس بصراحه انا ما كنت اعرف طريقه عملها لاني مش كتير صحبه معها :$
لكن بعد الرجوع لماما اعطتني طريقه عملها وان شاء الله اللي بحبوها تطلع زاكيه معهم

المقادير

كاسه عدس
حبه بطاطا مقطع
حبه جزر مقطع - اول مره بعرف ان في بطاطا و جزر فيها :)
حبه بصل مفروم
3 كاسات ماء
ملعقتين زيت
رشه ملح
ملعقه صغيره كمون
قليل من الفلفل الاسود


الطريقه زي ما استوعبتها :$

نقلي البصل في الزيت حتى يصفّر و نضيف اليه البطاطا و الجزر والعدس ونتركهم ينقلو لمده 5 دقائق

نضع الخليط في الماء على النار حتى يسلق و يغطى حتى ينضج تماما و يحتاج من 30 الى 45 دقيقه

بعدما يبرد الخليط يوضع في الخلاط و ويخلط حتى يصبح ناعم

نرجعه على الطنجره و نضيف البهارات و الملح ونتركه يغلي لمده 5 دقائق

عند السكب يمكن عصر ليمون و وضع رشه بقدونس حسب الرغبه

يمكن اضافه الليمون عند اضافه البهارات اذا كان الجميع يحبونه مع ليمون :)
و شكرا لمحمد اللي زكرني بالخبز المحمص او المقلي اللي ممكن تضيفوه مع الشوربه :)
و صحتين وعافيه

اللي بجربها يا ريت يحكيلي عن النتيجه :)

شعب بحب المبالغه



جد انّا شعب بنحب نبالغ بكل شي
بكون الواحد بتحدث معك بحكيلك, فجأه لقيت عشرين الف واحد جاي علي...و بالاخر بطلعو 5 او6 اللي زايرينو...

بوقف السير ثواني بصيرو يحكو ساعتين واحنا واقفين...

بتتأخر على موعد خمس دقايق بحكيلك وينك من الصبح وان بستناك..

حتى بالدعايات

اكثر لمعانا
اكثر اتقانا
اكثر بياضا
طيب اكثر من مين!!!
يعني هلأ من 20 سنه واحنا بنشوف دعايه مسحوق غسيل وكل مره بحكيلك اكثر بياضا... اذا هالمره اكثر بياضا اذا المره الماضيه كنتو كذابين؟؟؟؟ :)
و بعدين شو البياض اللي بدكم توصلوله فوق من الاكثر بياضا

اللي خلى هالامور كلها تيجي في بالي خبر بحكيلك توقيف 3 اطباء يعملون بالبشير اكتشفو ان شهاداتهم مزوره....و تاني يوم بطلع خبر بحكيلك لأ حرام عليكم ليش بتبالغو هو طبيب واحد بس اللي شاكين بشهادته وما زال على رأس عمله ...الله يسامحهم شو ببالغو هالعالم

يعني كتييييييييير بختلف الوضع بين طبيب و بين 3 اطباء!!!!

معهم حق بصراحه اللي راح يكون في اخطاء بتشخيصهم, واللي راح ينصرفلهم دوا مش بحاجه اله, واللي ممكن لا سمح الله تتطور الامور والامراض معه لاشي تاني, اكيد راح يكونو اقل بحاله الطبيب الواحد.....

فعلا انّا شعب بنحب المبالغه....

جد عالم ما بتستحي....

قبل شهر تقريبا انعزمت على عرس اخت صاحبتي, العرس كان كتير حلو و كل شي مرتب, العرس كعاده اكتر الاعراس هالايام مش مختلط, انا بالعاده ما بشيل الحجاب ولا بتحرك من مكاني طول ما في تصوير, حتى لو اكدولي ان اهل العريس و اهل العروس متدينين ولا يمكن حد من الشباب من العيلتين ممكن يشوفو الشريط, خلص قناعه وماشيه عليها, اكتر شي ممكن اعمله اني اقوم ازقف و ادور مع الصبايا حول العروس.

العروس ما قدرت تشوف شريط العرس لحتى وصلت البحرين, وهي البلد اللي راح تستقر فيها هي و زوجها, قعدت هي والعريس حطو ال دي في دي لقوه فاضي وما عليه شي, حطو الشريط اشتغل وكل شي تمام, وبس خلصت الزفه و بدى التصوير بالقاعه, بدى عرس ناس تانيين, عروس و عريس و صبايا كلهم من عيله غريبه, انصدمو المساكين ولاخر الشريط كمل عرس الناس التانيين, البنت اتصلت باهلها تبكي مصدومه و بتحكيلهم اذا اكيد هلأ شريط عرسي عند ناس تانيين, البنت ملتزمه بالحجاب هي و خواتها و خوات العريس, و اللي كاي خوات عروس وعريس كانو لابسين و متجهزين للعرس عاساس ما في حد غريب ممكن يشوف الشريط.

المشكله ان صاحبتي حكت مع الستديو التابع للصاله اللي عملو فيها العرس, الموظفه ولا على بالها وكأنه اشي عادي وبصير معهم كل يوم, وبالعكس بتبرر و بتعطي اجوبه زي عمايلهم ...زفت, و بتجاوب بكل برود ان ما ضل عنا نسخ من العرس, بتحكيلها صاحبتي يعني شريط عرسنا صار عند ناس تانيين, بتحكيلها الموظفه مش بس اختك المسكينه, ما العروس التانيه ضاع شريط عرسها كمان, انا كان نفسي امد ايدي واطولها من التلفون, ولك يا بطيخه افهمي, الموضوع ان انتو وديتو شريط عرس لناس مش صحابه واحنا اصلا اجينا عندكم لان البنت محجبه وطلبنا ان يكون التصوير و التحميض عند بنات لان بنات العيليتين محجبين, بتقومو انتو بتودو شريط العرس لناس تانيين هيك....

المهم اخر اشي قررو خوان العروس يروحو عندهم و بدهم ي %$$#$%#$ عيلتهم لهالستوديو, نفسي اعرف شو صار, للاحد لاعرف اخر الاخبار, ان شاء الله ما يكونو مشو الموضوع بدون عقاب ...

هلأ انا صرت اشك بكل ستوديو, بركي حكولنا ان بنات اللي بشتغلو وبعدين ما يفرق عندهم ويخلو شباب يحمضو الصور و الافلام؟؟؟؟

بحكي لبنات خالتي القصه, بتحكيلي بنت خالتي انه صايره مع صاحبتها قصه مشابهه, كيف بس كنا نجيب افلام فيديو و نقدم الشريط باخر الفيلم نلاقي نهايه فيلم مسجل قبل على الشريط, هيك صاير معها خلص شريط عرسها و بدا اخر غرس تاني مسجل عالشريط....

يعني لا امانه ولا اخلاق ولا اشي, هدول المفروض يحلفوهم يمين لما يبدو يمارسو هالمهنه لانه فيها كشف للبيوت و للعالم و اشي مش سهل بصراحه

حسبي الله ونعم الوكيل بكل مين ما بكون امين بمهنته....

الخميس و اكله الخميس :)

اول شي شكرا لكل الي اطمن علي, و بحب احكيلكم اني اليوم و الحمد لله كتييييييييييييييييييييييييير احسن, الحراره راحت وهاد اهم شي و ضل سعله خفيفه ان شاء الله يوم و بتروح

بنت خالي اعطتني وصفه ليمون دافي محلى بعسل... جد الله يرضى عليها عمل مفعول كتير منيح معي و خفف كتير

اليوم الخميس ...انا بعز الخميس كتير, حتى مع اني كنت ماخده الاربعا و الخميس اجازه مرضيه, لكن بما اني اليوم لصحيت منيح عالدنيا فبرضه اله فرحته الخميس :)

بدت المدارس دوامها و الله يعين الاهل معجوئين اكتر من الاولاد, والله يعين المدرسين و المدرسات على مناوبات الشوب و الصوت المبحوح و الحكي طول اليوم , معى الصيام, يعني نشفان ريق فوق نشفان الريق الطبيعي...يلااا كله اجر وعافيه... جددو النيه و خليها تكون لله علشان تاخدو الاجر كله ان شاء الله

انا بالعاده بروح وبشتري اقلام ومحايات و اشياء المدارس هاي اللي بحب اجمعها لكن للاسف هالمره ما رحت, لكن مش مشكله بتتعوض قريب.

كتير كترانه البيوت اللي مزينه برمضان السنه, شفت عند بيت من بيوت الجران هلال وقمر بس يضووهم بكون لونهم ابيض وما في فراغ بالنص ,جد كتيييييييير حلوين, وفي منظر مسجد من ضواو معمول نفسي اعرف وين ببيعوهم, لفيت على اكتر من محل ما في اشي غريب عندهم وانا حابه احط اشي غريب, حاطين الهلا والنجمه التقليديين و مجموعه الاهلّه والنجوم اللي بيضوو و بيطفو , لكن حابه احط اشي غريب, اذا حد بعرف من وين بقدر اشتري يحكيلي :)


اليوم بدي اكتبلكم طريقه عمل الباستا,الباستا اكله كتييير سهله التحضير و كتييييييير زاكيه

المكونات الرئيسيه

ا باكيت معكرونه
1 علبه مشروم -فطر
1 علبه باستا
3 حبات فليفله حجم وسط مفروم
1 بصله حجم وسط
1 باكيت نقانق - ويمكن استخدام قطع دجاج بدلا من النقانق
رشه ملح
رشه زعتر اخضر
جبنه موزاريلا

سلق المعكرونه
للي ما بعرفو سلق المعكرونه نضع ماء في طنجره حجم وسط مضاف له ملعقه زيت و ملعقه ملح وعندما تغلي الماء بنضيف المعكرونه و نخفف النار تحت الطنجره حتى تصبح المعكرونه طريه, نصفيها بمصفاه ونغسلها قليلا بالماء حتى لا تلتصق ببعضها.

الصلصه

نقلي البصل المفروم بقليل من الزيت حتى يحمّر, و في اثناء ذلك نقلي النقانق المفروم الى اقمار صغيره بقليل من الزيت.

نضيف المشروم المفروم و النقانق و الفليفله الى البصل, و نقلبهم لمده خمس دقائق ثم نضيف صلصه الباستا و نضيف رشه ملح و رشه زعتر, ونتركهم حتى يغلي الخليط.

في البايركس نضع المعكرونه و الصلصه و نخلطهم مع كميه من جبنه الموزاريلا, و من ثم نضع على وجه الخليط كميه مناسبه من جبنه الموزاريلا و نضعها بالفرن على حراره 180 درجه لمده نصف ساعه او ممكن مراقبتها حتى تغلي و تسيح الجبنه
وصحتين وعافيه
:)

اترككم مع الصور للمكونات وصوره للباستا قبل الشوي بالفرن...بعتذر عن الصوره بعد الشوي لانّا شويناها بالزبط على وقت المغرب و فورا هجوم كان و ما تزكرت اصور و لا تزكرت اشي, عند الاذان بروح التفكير باي شي غير الاكل :)








سطلااااااان

احداث كتير صارت خلال الفتره الماضيه لكن للاسف ما في وقت اكتب عنها

**حكو ان انفلونزه الصيف متل حد السيف, لكن ما حكو اشي عن انفلونزه صيف رمضان, لانه ما الها وصف :"(

عادي حاسه حالي بدنيا غير الدنيا, طول الوقت نايمه و اصحى اصلي وانام, و طبعا ما بدي افطر و ماما وبابا و الدكتور بتفرجو علي نظره معانيها مش حلوه بالمره (عناد على غباء على تناحه مخ) وانا ابدا ما بدي افطر
و رجعنا للكمادات عالراس لمّا يروح مفعول الدوا من السحور تصبيره للفطور, بشرب الشوربه وباخد الدوا وبرجع انام :$

الحمد لله هيها مشيت يومين راحو, واعتقد انهم الاسوء لاني هلأ حاسه حالي كتييير احسن, مع اني لسا بس اوقف بدوخ لكن راح الاشي الضاغط على راسي و دني و مناخيري :)

**انا صاحبتي بالشغل اللي زي اختي و اعز عبّاديه سلطيه, كتير متفقين والحمد لله وفاهمين على بعض من النظره, قبل كم يوم اتناقشت مع مديري - بني حسن - انه مش غلط بس يكون في شغل بالمحافظات يبعتنا, بسألني يعني بتنامي بالعقبه لو النا شغل هناك. حكيتله اه خصوصا ان اخوي طبيعه شغله بروح كل اسبوع عالعقبه , وحكيتله ان اخوي بروح معي, طبعا ما اقتنع مش من باب المحافظه علينا احنا البنات, من باب العنصريه للذكوريه, الاخ ما [آمن ان بنت ممكن تعمل اشي, ومن باب ان الشبل يستفيد من هالطلعه وياخدلو قرشين, مع ان الشبل اللي بروح بنقضيها عالتلفون ادله شو يعمل....

اكتر من مره يحكيلنا انتو البنات المفروض تقعدو بالبيت وتخلو هالشباب يشتغلو خليهم يعرفو يفتحو بيوت, حكتله صاحبتي بهالزمن ازا مش الزلمه ومرته بشتغلو ما بقدرو يعيشو عيشه محترمه وهو ابدا مش راضي يفهم, راحتلو صاحبتي بتحكيله عن طلعه المحافظات, بصراحه غير الخبره و شمه الهوا والتعرف على ناس جداد فيها منفعه ماديه, كل يوم ب 50 دينار و المشكله ان احنا اللي بنشتغل كل شي و بنبعته للي بروح لانه مش عارف يدبر راسه هناك,الاقتراح انها تصير بالدزر كل مره حد يروح وانا والبنت نروح مع بعض برضه ما رضي.

المهم مديري الفاضل شو برد على صاحبتي
بحكيلها ولك انت اردنيه فاهمه شو يعني اردنيه وبنت عربان و بدك تروحي , انت وراكي اهل كيف بدك تروحي, ,هي بدها تروح تروح -اللي هو انا -انو انا الفلسطينيه بنت شوارع و لا عندي شرف ولا عندي حيا و لا عندي اهل يضبوني, بالله ما هو انسان مخزي, صاحبتي اجت حكتلي انا خلص بدي اضربه, لولا صاحبتي اقنعتني انه بلاش يعرف انا بنحكي لبعض و انها بتطلع فساده.

كيف بدي احترم هيك شخصيه اه؟؟؟؟ حد يحكيلي
....