Things I Like To Whisper About

Would You Hear Me Whispering

انت ما احترمتيني



قبل كم يوم طلعنا انا و بنات خالتي عالمول نتغدا و نتسوق، و احنا بالمحل وعند الكاش وكاي عائله اردنيه وقفت كل وحده منا على كاش لحتى اللي بيجي دورها اول نلتم عندها و ندفع سوا.


وحده منهم صار قدامها بس ﺯﺑﻮﻧﻪ ﻓﻜﻠﻨﺎ وقفنا جنبها، وحده من بنات خالتي حكت للشب اللي واقف وراها " معلش بس احنا مع بعض" حكالها " لا مش معلش وانا شفتكم كنتو واقفين بالدور هناك،بدكم توقفو وقفو بس انا مش مسامحكم" بنات خالتي ما فرقت معهم و لكن انا ضميري انبني و حسيت كلمه مش مسامحكم كبيره.


خلصت الزبونه اللي قدامنا فانا طلبت من بنات خالتي انه نخلي الشب يحاسب قبلنا خصوصي انه ما حد وراه, لفيت وجهي و حكيتله اتفضل ، بحكيلي و بنفتره و عصبيه " لا شكرا ما بدي" بكل ادب واخلاق حكيتله لا خلص تفضل انت حاسب واحنا بنحاسب وراك, رد بنفس العصبيه " ما بدي خلص انتو ما احترمتوني واللي صار صار"


تلقائي حواجبي ضربو بالسقف وحكيتله " انت حر انا ضميري هلا مرتاح و هلا الموضوع صار مشكلتك انت مع نفسك و انا مسااااامحه نفسي" و لميت اغراضنا كلها و حطيتها قدام الكاشير 


انا مش حاسه حالي غلطت بالمره لا انا ولا بنات خالتي لانها حركه كل العالم بتعملها، خصوصي انهم فتحو كاش جديد و اللي ورانا راحو عليه وحاسبو واحنا واقفين و هو اجا بعدنا اساسا ، كلمه مش مسامحكم خلتني افكر الشب بفهم و معه حق  ولكن ردة فعله و طريقه كلامه بعدها حسستني انه " الله يعييييين مرته عليه :$ " اذا انا ولا بعرفني صار بده يعطيني محاضره و بتحترميني وما بتحترميني قدام الكاش فكيف المسكينه :$




Standards




اول ما سكنا بيتنا بال 99 كان لازم نركب مطبخ جديد, و للاسف بابا و كالعاده قرر يستعين بخبرات عائليه,  قريب النا بشتغل بالموضوع و وكله فيه.

ماما في بيتنا القديم وبما انها قصيره مقارنة بطول عائلتنا كانت تعاني من ارتفاع المطبخ بالبيت القديم و اللي سببلها ديسك و وجع ايدين و كتاف دائم, فبما انه لما تزوجت كان المطبخ القديم راكب ما في مجال للاعتراض فبالبيت الجديد حبت تختار الارتفاع المناسب الها بما انها بتقضي وزي كل الامهات بالمطبخ 99.9999% من يومها.

مناقشات و محاورات بينها وبين قريبنا على الارتفاع و بالاخر عمله زي ما هو بده لانه وبناء على كلامه و تكراره للكلمه "هاد الارتفاع الستاندردز بين المطابخ"

بما انه "قريبنا" ومن ناحية بابا, فاااا بابا كان معه و تم عمل المطبخ بارتفاع مناسب للستاندردز العالميه بالارتفاع, ومن ال 99 وماما بتعاني من هالمشكله و كل مرّه ماما بصير يوجعها ظهرها كلنا نشاركها بالدعاء و تحميل المسؤوليات, وبابا بعد بفتره حس بالذنب ولكن خلص "اللي صار صار وشو بدنا نعمل" هيك برد

اللي ذكرني بالقصه خبر قرأته في جريدة الغد اليوم

الخطيب: الانتخابات النيابية الأخيرة تقترب كثيرا من المعايير الدولية

قديش بتقترب؟؟؟ كيلو مثلا؟؟
و هالمعايير من وجهة نظر مين صحيحه و صحيّه؟؟ و من وجهة نظر مين مناسبه؟؟ ومين اللي قرر انها تطبقت ويلا لأ؟؟
والسؤال القوي..............مين اللي راح ياكل هوا من وراها؟؟؟

ودمتم

مين انا؟؟




بما ان الحمد لله الحمد لله مشاكلنا و همومنا وقضايانا محلوله تماما وما في ورانا ولا قدامنا اي موضوع نكتب عنه فاااااا قررت اغير المزاج الكتابي :)

احزرو ميييين المدون بكل فقره؟؟
ما حنشر التعليقات الا بعد يومين لاشوف قديش بنعرف بعض هون :)




1
اللي لوشفت بوست او اكتشفت مدونه اول مره بتسمع عنها بحياتك  و عليها تعليق واحد بتكون متاكد 1000% انه هو كاتب/معلق/ضايف التعليق....... و هيك

2

سنحك
بووووووووومه،،، مين سمير؟؟؟

3
سمايلي ابو قنوه
:sofera:

4
الله يرضى عليكم ويسعدكم

5
المدونين باشا و المدونات خانم

6
ملاااااك يمشي على الارض

7
ميتاليكا و اشباه اغانيهم..وشوية طلبات "حد يفهمني" من فتره للثانيه

8
مغامرات  ومشاهدات على الطريق وفي الحافلات...عالواقف نص الطريق و جلوسا في النصف الاخر

9
مقلوبه بنكهه ربيعيه

10
المرأه عنواني و حكاياتي...المرأه ماضي وحاضري و جميع ايامي

11 
صغيرتنا  التي سكنت قلوبنا...رائحة كتاباتها من رائحة الوطن...ابنة احدنا و شقيقة الاخر و صديقة للجميع

12
رائحة جبل النار في كتاباته...قلبه معلق بالاقصى و ابوابه وساحاته

13
انا بعمل اشياءات زاكيه و طبخات على قدي و وزني عم ينقص ....ارتحتي يمّاااا؟؟؟

14
بالاضافة للصور و المقارنات بين البلدان دائما بزيد مصطلحات جديده للقائمه عندي و اخرها كان segregation

15
بتتحفنا بسلسله قصصيه و بعدين بتختفي
شمّلت و النيّة ... ;)

16
اللي بكبس ممل عندي على كل بوست :(


جنسية امي حقي




مشاركتي اليوم حتكون على شكل قصه حصلت مع وحده من قريباتي 

قريبتي انولدت وعاشت و تزوجت وهي بالكويت،هي و زوجها اصولهم فلسطينيه و بحملو الجنسية الاردنية,بعد الزواج بسنه تقريبا وهي حامل بطفلها الاول صار مشاكل بينها وبين زوجها وقصص كتير رافقت هالخلافات وهالقصه الها بوست تاني ان شاء الله , المهم هالخلافات انتهت بان زوجها يطلقها و يتزوج زميله اله بالشغل و يكتب تنازل عن الطفل اللي لسا ما انولد للام و يتخلى عن كافه حقوقه و واجباته تجاه هالطفل .

قريبتي ولدت و صارت حرب الخليج و الاب رجع على فلسطين و بعد فتره انسحبت منه الجنسية الاردنيه من ضمن اللي انسحبو منهم الجنسية, قريبتي وابنها ضلو عايشين بالكويت، كل سنه كانو يجو زياره عالاردن لتزور اهلها اللي رجعو عالاردن بعد الحرب و كبر ابنها و عمل دفتر خدمة علم وكان يجدده كل ما احتاج لتجديد.

والد الابن توفى في فلسطين و هو عمره ما شاف ولا تواصل مع ابنه اللي بالكويت, و الولد عمره ما نزل على فلسطين او كان اله اي علاقة بوالده و سمعو بخبر وفاته زيو زي باقي الناس.

بزيارة من الزيارات وهو جاي عالاردن الشب - صار عمره 23 بوقتها - بالمطار وقفوهم و اخروهم فتره و بعدين خبروهم انه بما ان الاب انسحبت منه الجنسيه فالمفروض ان الولد تنسحب منه الجنسيه, و سحبو جواز السفر , حاولت امه تشرح لكل الاطراف المعنيه بالمطار و بوزارة الداخليه و السفاره بالكويت ان الشب ما اله علاقة ابدا بوالده و انهم منفصلين ومتنازل عنه للام من قبل ما ينولد و ابدا.

ضلو بالمحاولات لمده سنتين و ضل الشب و امه بالكويت ما بقدرو يسافرو لانه غير معترف فيه من الجهتين, الجنسية الاردنيه انسحبت و الجنسية الفلسطينيه بما ان ابوه متنازل عنه و هوما اله علاقه فيه ولا عمره راح على فلسطين فهو مش معترف فيه كفلسطيني,  و بعد سنتين من تسكير الابواب بوجههم عملو جواز سفر فلسطيني مؤقت, وحكو انه الموضوع عامل مشاكل للشب بدراسته و بالشغل بالكويت ولكن ما عرفت شو التأثير بالزبط اللي صار.

الشب اجا زيارة وحده عالاردن لحتى يتمم اجراءات تصويب وضعه بعد ما حكولو انه لازم يسلم اوراق شخصيه اله بالاردن و تغلب بالمطار هون و بالكويت و بس وصل حكوله ان الاوراق مش مهمه و انه مغلب حاله عالفاضي مع انهم وقعوه على تعهد بالجوازات على تسليم هالاوراق.

حاليا العيله ماشية باجراءات هجره لكندا لحتى يصير عندهم جنسية كنديه تفتح كل الابواب المغلقه, للاسف هاد حقيقي و واقعي بعالمنا العربي, مع انه كان بمنتهى البساطه ممكن ياخد جنسية والدته, في منكم راح يحكيلي بالعكس الجنسية الكنديه افضله, لكن بس انت تنتمي لبلد بتحبه و بتعرف عن نفسك انك منه بتحب يكون انتمائك اله مثبت حتى ولو على الورق بس, بتحب ما تكون غريب عن باقي عيلتك و لا ان اولادك يكونو منتمين لجنسيات غربيه وما الهم اعتراف رسمي ببلدهم.


عوالم و شخوص حولنا




قاعده في تختي تحت العشر حرامات لحتى اتدفى شوي من البرد اللي زايد بالاردن هالايام او اللي بطلت متعوده عليه بعد سنه و نص بالامارات, اجا اخوي بحكيلي "انا طالع على عبدون ادرس ب Second Cup تيجي معي؟؟" طبعا حكيتله : انا اللي باجي :)"

المحل بحبه من ايام الامارات واله ذكريات حلوه, طلبنا هوت شوكلت و قعدنا كل واحد راسة بلاب توبّه, انا بكتب تدوينه  "حقك اولويه" و هو بدرس, بدت الناس تكثر و للاسف الدخان يكثر و اصوات الناس تتداخل و تعلى مع العجئه.

سبحان الله كيف كل شخص اله عالمه و مشاكله و حياته الخاصه, اول طاوله عليها شبين من حديثهم عرفنا...اه لان الكل كان سامع الكل - عرفنا انهم اطباء ومعهم كتب شكلهم بدرسو ليتخصصو, واحد منهم بحكي قصته وعن زوجته اللي كانت حامل بطفلتهم التانيه و اللي تأخر لاخد زوجته على المستشفى و اهلها و اهله و زوجته حملوه مسؤوليه اللي صار للبيبي بعدها, الدكاتره بالمستشفى اضطرو يعملو عمليه قيصريه و البيبي انولدت بمشاكل صحيه , الاطباء بلغوهم ان الطفله ما الها امل بالحياه, قعد يوصف كيف حمل بنته للمره الاولى و كيف اهله و اهل زوجته ببكو و كيف اعطى البنت لامها وحكالها هاي بنتك استقبليها و ودعيها و اقرأي قرأن عليها لانها راح تفارقنا, و فعلا البيبي توفت :(

طاولة تانيه عليها صبيه و شب, شكلهم بحبو بعض و ناويين يخطبو, بس وضع الشب مش مناسب مقارنه مع البنت و هاد واضح من كلامها انها بتطلب منه يساعدها بانها تقنع اهلها و هو ما في بايده شي, و اهل البنت رافضين الشب بسبب الوضع المادي, الشب مش كتير متأثر او هاد اللي كان مبينه بس البنت بتطلع بعينيه بطريقه غريبه حزنتني عليها مع انها ختمت كلامها بانها ما بتقدر تعيش بمستواه لانها متعوده على طبيعه حياه غير عن حياته, اللي خلّى اخوي يترك دراسته و يحكي معي انه نفسه يقوم يلخمها كف انه شوووووووووووووووووو بدك منه يعمل يعني؟؟؟ يختلس؟؟؟

طاولة ثالثه عليها طلاب بحضرو لامتحانات جامعات بامريكا, ما بعرف ليش بين هدول بالذات حسيت حالي بين عالم غريبه علي كثير, حكي نصه عربي ونصه انجليزي , العربي انه كووول " خف عgلي و اولتيلها come on what's the hell"
و البنت بتحكي للشب انها مريضه وبدت بتفاصيل غريبه مرافقه للمرض اول مره بسمع فيها بحياتي و تحتوي على كلمات لا تناسب الاطفال تحت سن 35 سنه :$ و بتحكي عن والدها و والدتها  بتفاصيل برضك غريبه اخوي رفع راسه اعطاني نظره الحاجب المرفوع و رجع للاب توب :)


بالاضافه لطاولة الشباب اللي بس نازلين رمي كلام مشفر لبعض نص اللي بالكوفي شوب فاهمينه و بحششو ضحك بدون سبب و بشكل مبالغ, هدول عذرتهم....شبااااااب و عايش و هاد فعلا وقت الضحك ملحقين على النكد :)

حقك اولوية



حملة بدأت بمناقشات وافكار و امال وانتقلت الى حيز التنفيذ بعد فتره طويلة من التجهيزات, بدأت بين صديقتين و كبرت و ان شاء الله تكبر اكتر و اكتر و تحقق الاهداف الاساسيه الي انبنت لاجلها.

ما بخفيكم اني ما كنت متحمسه للفكره باعتقادي بانها من الحملات التي بتنادي بحقوق المساواة بين الرجل و المرأه و انا هالموضوع لا استسيغه بدون الدخول بتفاصيله, ولكن بعد ما سألت و استفسرت تبين انها ما الها دخل بالموضوع نهائيا.

"حقك اولوية" همسة موجهه الى كل افراد المجتمع نساء و رجال, لفته لتحفيز المرأه على عدم التفريط في حقوقها و عدم التردد بطلبها لانها المفروض تكون موجوده بدون ما تطلبها, حقك بالحياه بامان, حقك برفض العنف من اي شخص في المجتمع, حقوقك السياسيه, حقوقك الاجتماعيه, حقوقك المدنيه, كل الحقوق اللي الشرع و القانون فرضلك اياها ولكن بعض النفوس المريضه حولك سلبوكي اياها.

هالتعاريف كلها ممكن نستشفها من الهدف الاساسي لهالحملة الوارد الموقع الرسمي   و موقع الحمله على الفيس بوك هو "خلق وعي قانوني لدى المرأة والمجتمع الأردنيين من خلال تناول قضايا متنوعة ونقاشها من الناحية القانونية والانسانية والاجتماعية"


وكعادتي بهيك مواقف لازم اطلب منكم طلب....لكن هالمره طلبات مش طلب :)

الحمله بحاجه لدعمكم في عده امور و اهمها مشاركتكم بالقصص اللي بتعرفوها و بالمناقشات و بارائكم في المواضيع المطروحه بالموقع.

بمشاركه و نشر الموقع مع كل اللي بتعرفوهم لحتى تنتشر الفكره و يتحقق الهدف و التوعيه توصل لاكبر عدد من النساء حوالينا, ولحتى اللي ساكته تتشجع تحكي قصتها او عالقليله تعرف الرأي القانوني للحاله اللي بتتعرض الها و انها الها حقوق و اللي بتتعرضله من ظلم بعض النظر عن نوعه هو مرفوض.

هلا في فكره حابين اصحاب الحمله تطبيقها و هي اشي شبيه باللي كنا نعمله هون تحت مسمى "لنكتب عن في شهر..."
كل شهر يحدد موضوع بخص الحمله ليتم الكتابه عنه في اول اسبوع من كل شهر,التدوينه تحتوي على الهاشتاغ #حقك_اولوية و هاشتاغ بخص الموضوع #جنسية_امي_حقي مثلا و يتم وضعها على صفحه الحمله بالفيسبوك او عتويتر

كل شهر يتم اختيار افضل تدوينه عن الموضوع و يتم نشرها في الموقع الالكتروني للحمله,و نقاش الموضوع بتم على الموقع في ركن النقاش.


الشهر هاد مشي اوله فاستثناءا راح نكتب ابتداء من بداية الاسبوع الجاي و يتم مناقشة الموضوع لاخر الشهر, الموضوع عن حق منح جنسية الام الاردنيه الى ابناءها و خصوصا انكم اكيد قرأتو و سمعتو عن "الام" اللي كانت تهدد بالانتحار بسبب حرمان اولادها المقيمين في سوريا من جنسية والدتهم وبالتالي حرمانهم من دخول الاردن.

شاركونا و زورونا تجدون ما يسركم :)