Things I Like To Whisper About

Would You Hear Me Whispering

هلأ بدا الربيع عندي




السنة ما تحسست باول الربيع مثل السنه الماضيه, و انبسطت كتير حكيت شكلي اخيرا طبت والحمد لله, الي اسبوع التحسس معوض الفترة الماضيه كلها, وشكله قلب رشح و انفلونزا قويه كتير, و اليوم صوتي خلص راح عالاخر, و حلقي مجرّح و وضعي صعب, وكله كوم و الحرارة كوم, بس يبدا المسا بتبدا الحرارة....شكله والله اعلم مش تحسس
و دوا التحسس مش انو بنعّس لأ....ببطل اركز بالمره بالمره
الاشي المنيح اللي بستفيدو اني رجعت انام منيح :) بنام العصر و بنام بالليل و بصحى كأني مش نايمه...بعرف النوم بجر نوم بس شو بدنا نعمل احسن من السهر والتفكير اللي بس بوجع القلب والعقل وما بنستفيد منه اشي :(

اليوم اكتشفت اشي جديد للتحسس, انا بوصل اخوي عشغلة القريب من البيت كتير كتير ما شاء الله اللهم لا حسد :$ المهم اخوي من وقت ما يركب السيارة لعند ما ينزل وهو برشرش عطر, فانتبهت اني اول ما ينزل من السيارة فورا دموعي بتبدا تنزل و ببدا التعطيس اللي بستمر معي ل 20 او 30 عطسه, وانا بسوق وحالتي حاله, حكيتله و وقفالمسكين شوي, بس حزنت عليه, بدوش يرش قدام الشغل و بدو يرش قبل ما ينزل بالزبط بدو اول ما يدخل الشغل العطر يكون "عفق" على رأيه :)

اليوم حكيتله لا تنسى العطر, انبسط و بدا يرش بحكيلي والله يا ام السوس انت لو في منك 10 كان الدنيا صارت غير, بحكيلو حتى 2 ما في مني, تخيل لو 2 كان برضه دمار, بحكيلي اي احنا بوحده و يا دوب ماشيين,لا يختي خليكي وحده بدنا نعيش :)
مش عارفه مدح ويلا ذم قصده
بس عالقليله الي تأثير :)

فاااا لكل المرضى و المتحسسين بحكيلهم سلامتكم وفترة و بتعدي ان شاء الله
و لميوش وميرا بحكيلهم الحمد لله على سلامتكم يا رب , امبارح رجعو عند بابا قويدر :)

اليوم الخميس والمعظم بعرف اني بحب الخميس
فاااا هاف أ نايس وييك اند يا جماعه



مشاهدات من يومي



المشهد الاول

اليوم وانا بستنى السائق على باب الشغل في عمو كبير واضح ان عمره في بداية الخمسين, صف سيارته الفخمه قدام باب الكراج و نزل من السيارة وبحكي لموظف الامن ثواني وبرجع, حكاله لا والله ما بنفع هي البنت بتستنا بالسائق يطلّع السيارة من الكراج , بحكيله العمو بنبره فيها حدّه " وطي صوتك وانت بتحكي معي وتأدب" حكاله موظف الامن " انا ما غلطت فيك ولا معك انا بحكيلك السيارة هلأ بدها تطلع من الكراج فلو سمحت حرك السيارة" رد عليه العمو " بحكيلك احكي معي شوي شوي احسنلك, ويلا شو رأيك اجبلك المسدس اللي معي تطخني فيه" احنا كلنا تطلعنا عالعمو, بنظره انو بالله عليك, طب احترم شيبتك, بحكيلو موظف الامن " شو يعني بدك تفهمني انه معك مسدس, شو يعني هيك بتخوفني" جد حسيت العمو قدامي زي النمله, اسفه عالتعبير بس جد انه شخصيه بائسه, وصار يصرخ" وينه مديرك انت اه وينه؟؟" حكاله روح قيم السياره و بتيجي بحكيلك وين مديري :) من خبرتي البسيطه بالحياه تعلمت ان كل ما الواحد صرخ ورفع صوته, كل ما كان ما اله حق باللي بطلبه, وممكن يكون بدو يورطك باشي مش قانوني بس بحاول يخوفك, على طريقه "خدوهم بالصوت "

المشهد التاني

قبل هالمره حكيتلكم اني بشغلي بروح عمواقع تانيه بشكل شبه يومي خارج الشغل, اشي شغل برضه
وانا مروحه ,بمشي من تحت مظله عاملينها للمراجعين وتحتها كراسي للأنتظار,اول ما طلعت شفت بنتين قاعدين لابسين من غير هدوم,البلوزه مع شبه البنطلون ما بيجو 75 سم ,حجابي اطول منهم :)
بصراحه اول مره بشوف من هالنوعيات في هالمكان

قاعدات وملطوشات ميك اب ليوم الميك اب وبعلكو بطريقه مقززه وحده منهم بتتاوب وفاتحه تمها على عرض المنكبين,و لاحظت ان اكتر من نص الرجال اللي بشتغلو هناك مجتمعين وكلهم نظرهم على هالبنات,وحده منهم بتحكي لواحد من اللي واقفين ,لو سمحت هو ايش هاد?? شو في هون? بتأشر عالباب الرئيسي للمبنى
بحكيلها الك نص ساعه قاعده وما بتعرفي ايش هاد,هو انتي ليش جاي هون??
حكتله'احنا كنا نمشي بره وقررنا نيجي نرتاح هون'
انا كملت بطريقي مع ان الفضول قتلني اني اكمل باقي الحوار واعرف شو قصتهم وشو بدهم بالزبط واتعرف اكتر عالصبايا... :)

المشهد الثالث

اليوم وانا مروحه مريت بطريق الرابيه, وين شركه الاتصالات, بتعرفو كم مطب بمطب هناك, ايوه هداك الشارع... :) سيارة بكب عاديه معبيه من ورا خضره للطرف و في على طرف الطرف ولد صغير عمرة يمكن 7-8 سنوات قاعد وماسك طراف البيكب و يا دوبو عارف يتمسك و يا حرام كل مطب يطج طجه اقوى من اللي قبلها, وشكله مرعوب و ميت خوف, واللي بسوق ولا هو هون, كنت بدي اصورة بس خفت اعلق مع العالم و الواحد مش ناقصه بصراحه بس جد منظر الولد اللي بطير من مكانه على كل مطب بقطع القلب كان :(

القلب و العقل



اشي كتير جميل سمعته قبل كم يوم من الدكتور احمد راتب النابلسي

الدكتور كان يحكي عن تجدد الخلايا في جسم الانسان وان اقل مده بتتجدد فيها الخلايا هي خلايا بالمعده بتتجدد كل 48 ساعه
وحكا عن ان جسم الانسان بكل ما فيه بتجدد كاملا كل 5 سنوات الا خلايا الدماغ و خلايا القلب لا تجدد بالمره

خلايا الدماغ حتى تضل عندك الذاكره و يضل العلم وتتذكر الناس والاشياء وتتذكر معلوماتك, ممكن تموت هالخلايا او تبطل تشتغل مع العمر و ممكن تفقد جزء او كل الذاكره ولكنها لاتتجدد,لانه في حال تجددت راح تفقد معلومات و تصير مكانها فراغ بدك تعبيه من جديد
وضرب مثل على مثلا دكتور درس 5 سنوات وبعدين تجددت خلايا الدماغ يسألوه شو درست يحكيلهم, كنت دكتور بس هلأ ما بعرف ايش انا :)

و القلب ...سبحان الله بحكي انه بيت الميول والمشاعر والعاطفه, اللي برضه لايتجدد ولا يتبدل, وحكا قصص رواها الناس عن الاشخاص اللي تم زراعه قلب جديد الهم, ان ميولهم بالحياه اختلف تماما, من نوع الموسيقى اللي بسمعوها, لانواع الاكل, لانواع الاشخاص, لدرجه ان في واحد تمت عمليه زراعة قلب اله و صار يردد كلمه ما بعرف شو معناها, بس يضل يرددها, اتصل بزوجة الرجل اللي اخدو القلب منه ليزرعوله اياه و سألها عن الكلمة, حكتله هاي الكلمة كانت كلمة سر بيني وبين زوجي علشان نخبر بعض ان كل شي تمام...
جد سبحان الله كل يوم بنكتشف اعجاز جديد بتكوين الانسان غير عن المعجزات الظاهره للعيان وللاسف في ناس بنكرو ان في الله الخالق ورا وجودها

نفسي اعمل زي دراسه او بحث او اشي لزيادة معلوماتي الشخصيه عن التغيير اللي بصيب الناس بعد عمليه زراعه القلب و اعرف القصص و اتأكد من اصحابها :)

كابوووووس



انا من محبي نومه العصر كتير كتير, بحس براحه لاخر اليوم و اذا ما نمتها و كنت كتير نعسانه بضلي لاخر السهرة وانا كسوله وما الي نفس اعمل شي

اليوم نمت متأخرة و اجت ماما صحتني و حكتلي انها بدها تركب القهوه عالنار, حكيتلها اوك وانا بلقمها, رجعت غمضت عيوني و طبعا رجعت غفيت, صحيت على صوت ماما بتحكيلي "اسم الله عليكي" و حسيت بالحرام بتحرك انها بتغطيني, فتحت عيوني ما شفت ماما و حاولت اتحرك ما تحركت, ما قدرت احرك اشي, غمضت عيوني بسرعه, و صرت اسمي "بسم الله بسم الله.." رجعت فتحت عيوني برضه ما شفت ماما مع اني لسا سامعه صوتها, ومع اني حاسه الحرام بتحرك, شفت الغرفه بس ما شفت ماما و ما قدرت احرك ايدي من مكانها ولا قدرت احكي كلمه, رجعت سكرت عيوني و صرت اقرأ المعوذات :( فتحت قدرت اتحرك بصعوبه وماما ما كانت موجوده بالغرفه اساسا :((( وحسيت ان في شي من جواتي بنسحب

كتيييييييييييييييييير خفت, هالشي صار معي قبل 100 سنه وانا بالتوجيهي يوم امتحان العربي, اول امتحان, كنت افكر كتير ومش عارفه انام, هالمره نفس الشي كنت افكر كتير ومش عارفه انام, في موضوع كتييييير قالقني

اللي خطرلي بصراحه هو اني سمعت ان الميت بس يدفنوه بعد ما يروحو اهله بصحى و بحاول يقوم ما بقدر وما بقدر يحكي مع انه بكون شايفهم وهمه مروحين و بعدين بتحرك بضرب راسه باللبنه اللي فوق راسه, ما بعرف هي حقيقه ويلا مقولات الناس بتناقلوها,ويلا خزعبلات مش عارفه بس جد خفت و صرت ابكي زي الصغار :( و ما هديت لاجت ماما وصارت تقرأ قرآن فوق راسي


ادعولي ان ربنا يكتبلي الخير.....جد خايفه وحامله هم و مش عارفه افكر منيح :(



تحديث...

شكرا لزميلنا المدون "Jaraad"
اللي اعطاني اللينك للتفسير العلمي للي صار و اللي هو اشي اسمه " شلل النوم" "Sleep paralysis"

هي اللينك

و قرأت الاسباب المحتمله لحدوثه و كلهم كلهم كانو متوفرين عندي :)

  • النوم و الوجه لاعلى - وانا اساسا ما بنام هيك.
  • مواعيد النوم غير النظامية ؛ القيلولة و الحرمان من النوم
  • زيادة التوتر
  • تغيير نمط الحياة المفاجأه.
  • ان يسبقه مباشره حلم واضح .



سلسلة عرسان - الحلقه 13


سافر اخوي هو وعيلته الله يسهل عليهم , والبيت رجع فاضي وهادي ومرتب مره تانيه :( بس اللي مهونها علينا ان اخوي التاني باول 6 جاي ان شاء الله, يعني فروووحه باول 6 بتكون عنا :)

اخدت مغادره علشان اضل معهم اطول وقت ممكن, المنطق بحكي اخد اجازه لكن بما اني خلصت كل اجازاتي بسفره دبي وما ضل غير كم يوم امشي حالي فيهم لاخر السنه فاضطريت اخد مغادره, رحنا عالمطار و استنيناهم لبينو عالدرج و حكينالهم باي و روّحنا, انا رجعت عشغلي وبابا وماما تسهلو عالبيت, اول ما وصل الشغل اتصلت فيي صاحبتي بتحكيلي ان والدها صابتو غيبوبه و ان امها اجت عندي عالشغل بدها مني اساعدها بشي وما لقتني, حكيتلها هيني عباب الشغل واذا بتقدر ترجع خليها ترجع, دخلت المبنى وانا بحكي تلفون وكعادتي مع ان مكتبي بالطابق الثالث, طلعت عالدرج لاني بكره استخدم المصعد, وانا ماشيه في مراجع طالع من مكتب وشوي وكان حيضرب فيي, انا بعدت بدون ما اتطلع عليه و كملت بطريقي, شوي بسمع صوت بناديني" لو سمحتي" اتطلعت عليه الا بالشب واقف و بسألني "انتي مرتبطه"ما عرفت اجاوب,مش مستوعبه لسا, شوي لهو كر معلوماته كلها , انا فلان الفلاني -وانا فعليا ما سمعت اسمه بصراحه- وانا كنت عايش بامريما وبدور على عروس و انتي شكلك "SO LOVELY" انا حواجبي ضربو بالسقف, انو بتمزح انت ويلا بتتخوت, حكيتله عفوا؟؟ايش مالك انت؟؟؟ و ضلو الشب يعيد ويزيد و انو بدو رقم التلفون علشان اخته تحكي مع ماما,وانا اجاني تلفونين وانا عالدرج و الموظفين رايحين جايين حوالينا, حكيتله عفكره انا بشتغل هون, تفاجأ حكيتله شو رأيك نروح عالمكتب نحكي احسن من وقفة الدرج...

اول ما دخلت المكتب حسيت البنات اللي معي بعرفوه, كلهم تغير لونهم و طلعو من المكتب, انا بصراحه مش فايقه ولا رايقه كنت, اول شي مودعين اخوي وعبووود :( و بعدين الصبح سمعت خبريه سمت بدني, وصاحبتي اللي حكتلي عن والدها, مش شايفه قدامي كنت, قعد الشب وبلش حكي, اسمه وعمره وشو دارس و وين بشتغل وخوانه وخواته و عمامه واخواله, وانا بتطلع عليه, خلص حكي بحكيلي دورك, حكيتله كيف يعني دوري, بحكيلي احكيلي عن حالك, حكيتله مش بالتفاصيل لاني من وقتها حسيت انه مش الشخص المناسب ولكن اندفاعه الغريب خلاني استحي ارد عليه فورا, خصوصا بعد ما حكالي انه الموافقه المبدأيه صارت عنده و بسألني اذا كان عندي موافقه مبدأيه, حكيتلو طبعا لأ لسا ما بعرف عنك اشي انا, الشب اصر انه ياخد رقم موبايلي علشان يحكي معي مرتين تلاته نتعرف على بعض اكتر و بعديها نشوف شو بصير, انا حكيتله ان لا انا ولا اهلي بنحب هالطريقه, و مع اصراره ومع سمة بدني من الصبح ومع ان كل الموظفين اجو عالمكتب و مع اني بدي اخليه بس يطلع اعطيته الرقم :$ وحكيتله انا حاخد رأي اهلي بالموضوع و اذا ما وافقو نحكي ما حنحكي لاني ما بحب اعمل اشي بدون موافقه اهلي, وانا كنت معتمده على انهم مش حيوافقو

روحت عالبيت حكيت لماما و ماما حكت لبابا وبابا زعل مني كتير :( , المهم صار بس بدي ان الشب يحكي لاخلص من الموضوع, وما اتصل الاخ , تاني يوم اول ما دخلت المكتب لقيت كل صاحباتي قاعدين بمكتبي, بحكيلهم خير شكله في اشي, سألتني وحده منهم عن شو صار بموضوع الشب, حكيتلهم كيف بابا زعل واني بدي اياه يتصل لانهي الموضوع, حكولي بصراحه في شي كنا مترددين نحكيلك اياه بس هلأ صار لازم نحكيه, طلع الاخ جاي عالشغل ومعطي المراسله 10 دنانير وحاكيلها دليني على البنات " الخرج جيزه" هيك حكتلهم و هي ما كذبت خبر واعطته معلومات كم بنت و طلع الاخ قاعد مع الكل, حتى مع صاحبتي اللي قبلي بمكتب, وهو فعلا فكرني مراجعه و طلع انا الوحيده اللي طالب منها التلفون, عاساس انو انا اللي وقع الاختيار عليها :$

انا انقهرت كتير بصراحه, مش طريقه بالمره, المهم اول ما وصلت البيت اتصل, و بحكي كأنه احنا صحاب خلص, كيفك وكيف الشغل, حكيتله انا حكيتلك اني حسأل اهلي, واهلي كتير زعلو مني بصراحه لاني اعطيتك الرقم, صار يحكيلي اللي طلبتو لا عيب ولا حرام, انا غرضي شريف وحابب اتعرف عليكي اكتر, حكيتله وانا اساسا فكرت بالموضوع ولقيت انا مش مناسبين لبعض, صار يحكيلي كيف يعني, حكيتله ظروفك ما بتتناسب مع ظروفي, طبعا ما عجبه وصار يشرحلي النقاط المتشابهه بينا, انا ضليت ساكته, سكت وحكالي عكلن الزواج قسمه ونصيب وان شاء الله ربنا ببعتلك واحد احسن مني, حكيتله وان شاء الله ربنا ببعتلك وحده بتستاهلك.

الشب عفكرة مسكين كتير, لما راح عند صاحبتي سألته انت حد دلك علي ويلا هيك فجأه اجيت, بحكيلها كنت مارق من قدام الشغل وانا بدور على عروس و خواتي مش راضيين يشوفولي عروس, وبحكولي روح اختارها انت, حكيت بركي لقيت وحده هون, انا اول مره بحس ان بس حد يحكي عن واحد كبير بالعمر ولسا مش متزوج - مع اني ضد ان اي حد يتدخل بالموضوع - بحكو الحق على امه وخواته, فعلا الشب هاد الحق على امه وخواته, جد مسكين و بحزن مع ان طريقته جدا غلط


ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع




وحشتونا :)



صباح ومسا الفل
كيفكم :)
الي فترة ما عم بعرف اشبك عالنت ولا اقرأ المدونات
لوجود عبووووود اولا و اخوي ومرته ثانيا :)
و ثالثا لان الجهاز خربان فاخوي مستلم اللاب توب اللي خربت مروحته :(
و اذا صحللي نتوفة فراغ اشوف اشي عالنت اخوي بكون محتلّه

قبل كم يوم كتبت البوست الماضي و مشيت عالمدونات اللي بحب اقرأهم
مش كلهم للاسف اللي قدرت اقراءه وعلقت تعليق سريع
فسامحوني اذا قصرت بزيارتكم
المهم اني بدي اياكم تعرفو انكم كلكم ببالي
واني اشتقت لقراءه كل مدوناتكم
عندي مواضيع كتيره اكتب عنها
ان شاء الله ما انساها :$


سامحونا :)
ونراكم قريبا ان شاء الله
_________________

سلام خاص لاحلى مدونه قديمه جديده
Rand


انطلاقة مدون "قديم" جديد...3



اليوم بدي احكيلكم عن مدونه جديده قديمه


مدونه انا شخصيا بحب اتابع كل شي بنكتب فيها مع ان صاحب هالمدونه ببخل علينا كتير بكتاباته
مدونه "شارع الذكريات" لصاحبها المدون "سراج الماضي"
انا الاسم كتير عجبني اسم المدونه و لقب المدون, في دفئ و رائحه عبق جميله بحس فيها بس اقرأ الاسم و المحتوى

صديقنا سراج الماضي مدون اردني بعيش حاليا في استراليا, بشتغل في مجال التدجريس الاكاديمي, كتبلنا بوست كبدايه سلسله لخبراته و قصصه بالتدريس و ما زلنا بنستنى باقي الحلقات :)


كتير بكتب عن الحنين الى الوطن, باسلوب كتير مؤثر

ان شاء الله كل المغتربين يرجعو لوطنهم ولاهلهم سالمين غانمين

مدونة شارع الذكريات.....بنصحكم انكم تقراءوها :)

فشّة قلب :)


انا شبه يومي في الي مشوار خارج مكان شغلي لشغل برضه, وكنت بالعاده يا اروح بسيارتي يا بسيارة الشغل , ما كانت تفرق عندي كتير مع ان الموقع بعيد نسبيا عن مكان شغلي,لكن بعد ما مرة مديري القديم سمعني حكي وكأني بهرب من الشغل, قررت ما اطلع بالمره ولعلّمت باقي الموظفات شو بنعمل هناك بالزبط, وطبعا خربو الدنيا, مش لانهم ما بفهمو, لا لانهم ما بدهم يشتغلو و مرات بس يخرب معهم اشي بتعقدو وببطلو يشتغلو, فاضطر مديري يترجاني اروح و بسيارة الشغل طبعا :)

حاليا انا وكمان بنت بنشتغل هالشغل وبما ان زوجها بيجي على الشغل لياخدها ما بتحب تروح كتير, المهم موضوعي عن السيد الشوفير, في عنّا اكتر من شوفير كلهم محترمين الا واحد, بكره اروح معه لكن مرات لان ما في غيرو بضطر اسكت, اجمالا ما باخد و بعطي مع حد منهم لكن هاد بالذات ابدا ابدا .

ال مره ركبت معه كان خاطب جديد , و ما حيليلو يحكي مع خطيبته الا باللحظه اللي انا فيها بالسيارة, و صباح الخير حبيبتي, وكيفك يا روحي, وزناخه دم , الحمد لله خلصت المكالمه شغل المسجل على اغنيه عراقيه عبارة عن ردح علني و علّى الصوت, ولا كأنها سيارة شغل, حكيتلو لو سمحت يا بتطفيه يا بتوطي الصوت, و ال ايش هو شغل عالاغاني علشاني, لان البنات بحبو الاغاني, حكيتله انا ما بحب الاغاني, و هاد الحوار بدون مبالغه كل مره بركب معو بنعيده.

المهم تزوج الشب و مرة طلعت معه, بحكي مع مرته, حبيبتي و افتحيلو الباب, معلش سامحيها...مش فاهمه شو القصه بس اللي قهرني, انه بس سكر الخط صار يسبسب عليها," انقلعي الله اللي يقلعك".." يغص بالك انتي واياها" و من هالحكي, كرهتو اضعاف الكره اللي قبل, ولك يا بلاش الواحد يحكي ما بتعرف ان هاد قلّه احترام الك قبل ما يكون الها, من يومها وانا مقهوره منه لكن ما الي دخل فيه اني احكي اي شي.

و امبارح اجت الفرصه :)
امبارح طلبت سيارة, و اتفقنا انه يكون جاهز الشوفير على موعد معين, قبل ما انزل اجا مراجعين مشيت معاملاتهم و كان لازم انا امشيلهم المعامله لاني بدي اخد معلوماتهم معي للمكان اللي انا رايحه عليه, يا دوب ركبت السيارة بلش الشب يردح و ليش بتنزلونا بكير, و بحكي بنبرة صوت عاليه, المسكين ما بعرف مع مين ورط, حكيتله اول شي وانت بتحكي معي بتوطي صوتك لان هاي النبرة انا ما بسمح لاي كائن كان يحكي معي فيها, صار يحكي بطريقه انه لانه شوفير انا بحكي معه هيك, حكيتله انت الك وظيفه بتقوم فيها و انا عندي وظيفه اقوم فيها وظيفتك توصلني و تجيبني محل ما بدي وانت ساكت, وانا وظيفتي بقوم فيها و ما حد بدخل فيها, فاخر مرة بتسمح لنفسك تحكي معي اي كلمه, ساق زي الشاطرين ولا نفس, مع شويه تعصيب بالسواقه ضليت ساكته حكيت لحالي بكفي اللي حكيته, وصلت مكان ما بدي و ضلو يستناني كالعاده و اول ما ركبت بحكيلي اخت ..... -طبعا كلمه اخت هاي نوع من انواع الاحراج علشان اسكت- انا اسف ما بعرف كيف حكيت معك هيك, وحقك علي ومن هالحكي, حكيتله بسيطه بس يا ريت ما ينعاد الموضوع و انّا لازم نلاقي طريقه لنتواصل فيها علشان ننزل بنس الوقت عالسيارة.

بصراحه انا استغليت الفرصه و فشيت قلبي و زدتها عليه شوي, وبصراحه مش ندمانه بالمرررررررررررررررررة :")
بكرة اللي بهزيء مرته انا ان كان بينه و بينها و اكتر بكرهو بس يكون قدام الناس
هاي مش رجوله
هاي قلّة احترام الك اول شي

موقع منحة


صديقنا المهندس جعفر من فلسطين, بشرفني دائما بزياراته لمدونتي و بسعدني بتعليقاته, جديد عرفت انه شارك في تصميم موقع رائع وجدا مفيد اسمه "منحة "


و زي ما انكتب عن الموقع بموقع زاد الاردن

فان الموقع بيوفر اخبار المنح الدراسية في جميع الدرجات العلمية؛ البكالوريوس، والماجستير، والدكتوراه، في كافة الدول الأوروبية وأمريكا واستراليا.

الموقع كتير مفيد لان ومثل ما المهندس جعفر حاكي, كتير شباب الحاله الماديه بتمنعهم متابعة دراستهم مع انهم ممكن يبدعو لو صحتلهم الفرصه.
الموقع مصمم باللغه العربية والانجليزيه


و في اله صفحه عالفيس بوك بنزل فيها كل المنح الجديده اول باول و بشجعكم انكم تشاركو هالصفحه وانكم تزورو الموقع لانه اكيد راح يفيدكم

الله يعطيهم العافيه المهندس جعفر و المهندس ابراهيم على هالموقع الرائع
و شكرا الهم لمشاركتنا فيه :)

We have been there :D

اليوم الصبح واحنا قاعدين بنفطر مرة اخوي بتحكيلة شو رايك نشرب القهوة بالبحر الميت - طبعا بالانجليزي لان مرة اخوي ما بتعرف تحكي عربي :) - بحكيلها اه و بالمرة بشوف الرالي حابب اشوفه, فكرتهم بتخوتو كالعادة, شوي بحكيلي اخوي جهزي حالك علشان نطلع, لبست عادي انو رايحين على كوفي شوب, شوي بحكي اخوي التاني اللي كان رايح يرخصلي السيارة:) الله يرضى عليه والله انهلك اليوم, و انا جيبتي اكلت هوا :( وطلعو مغليين الترخيص, شو بدنا نحكي الحمد لله.

المهم سمعت ماما بتحكيلو هيهم رايحين عالبحر الميت :) انصدمت و قمت غيرت بسرعة و رحنا
اشي بجنن :) مع انّا ما كملناه للاخر لان عبود نام و اضطرينا نرجع عالسيارة انا ومرة اخوي , لكن ما رجعنا عالسيارة الا و 4 طيارات استعراضية بدت تحلق و تلف, اشي بجنن ما شاء الله و بخوف الله يحماهم و كتير شطورين, اخدت صور و فيديوهات, لكن طلعو سما زرقا و نقط بتتحرك :) فما راح احطهم

بعديها رحنا عالفنادق بدنا نشربنا قهوة, طلع اقل فندق 20 دينار عالشخص, حكيناله ما بدنا غرف ولا سباحه ولا اشي بس نشرب قهوه, ما رضيو وبحكيلنا الشب انهم بالعطل باخدو 50 بالعاده :$ ما رضينا اخوي يدفع و رحنا عمنتجع البحر الميت الطبي و شربنا عصير هناك, ويعدها رحنا عالبحر و ضلينا نرمي حجار لنشوف مين اكتر واحد بخلي الحجر بنط اكتر على الوجه, اخوي طبعا اللي فاز ومرة اخوي بعده, انا اكتر من مرتين ما زبط, اخوي 5 مرات و مرة اخوي 4 مرات :)

اتركم مع الصور :)















الدنيا ربيع...والجو بديع

الحمد لله كان الاسبوع الماضي حافل بالطلعات و الرحلات :)
الجمعه و السبت الماضي كان برد ومطر , و الحمد لله باقي الاسبوع كان الجو كتير حلو, رحنا على حدائق الحسين اللي جد كتير بحبها, بحسها مشروع ناجح 100% و ما شاء الله كبيرة و منظمه وفيها شجر ومكان للقعده ومكان للمشي و للعب, لكن كالعاده احنا ما بلبقلنا اشي, العالم قالبينها مزبله مع انه بين كل سلة زباله والتانيه يا دوب 10 متر, و بتلاقي العالم راميين زباله جنب السله بشوي, انو جد عوج

مرتين رحنا عالحدائق, اول مرة كان في رحلات مدرسية للبنات,اول ما شفتهم رجعلي شعور جميل و ذكريات اجمل مع رحلات المدارس, وانا بالمدرسة كان نفسي تخلص سنوات الدراسة بسرعه و انتقل للجامعه, و اهم شي اني اخلص من المريول, خصوصا الازرق. كنت طويلة و احس حالي شكلي غلط فالحمد لله اني كنت بالكشافة, كل يوم البس مريول الكشافة :) ,وكنت احكي بعمري ما راح اتذكر هالايام, قبل فترة انسألت عن احلى مرحلة بحياتي, اجابتي كانت " ايام المدرسة :) " بكل برائتها وطفولتها, بكل احساس الحرية اللي كنت احسه, بكل قلّة همومها وقلّة تفكيرها, كان نفسي اروح احكي للبنات ان هالايام راح تكون من احلى ايام حياتكم فاستمتعو فيها لاخر لحظه, بس حكيت بلاش اكئبهم هلأ :)
اللي قهرني ان البنات كانو صغار بالعمر و معظمهم بمراييل زرقا يعني ابتدائي وكانو يلعبو ومبسوطين, تمشينا انا ومرة اخوي و مرينا قريب منهم, شفنا زلمه او مش زلمه شخص مريض نفسيا عمرة تقريبا بال 60 قاعد مكان بعيد و بتطلع عليهم, و شعرنا بان الموقف مش عادي لانه اول ما شافنا قام ومشي, و فجأة لقيناه ورانا و ال بضحكلنا :$ اشي مقزز بصراحة

تاني مرة كانت رحلات مدارس الاولاد, اللي قعدو قريب علينا, طلاب لا يتجاوز عمر الواحد فيهم 13 سنه, بدون مبالغه الكل بدخن :$, والاستاذ قاعد جنبهم زي البلاش الواحد يحكي و هوالتاني بدخن وما حكى كلمه لطالب, و بولعو لبعض من نفس السيجارة, حريفين ما شاء الله

اليوم رحنا عطريق السلط - ياما ماشينا :) - وما شاء الله الجو شو منعش, هوا نقي و خضار اشي بجنن, هش و نش و اكل اشي من الاخر كان واحلى شي ان خواني وبابا عملو كل شي, كانت رحلة مريحه و منعشه
بس للاسف وقع عبوود و انطبش اول طبشة بحياته :( بس الحمد لله كانت سليمه