Things I Like To Whisper About

Would You Hear Me Whispering

وثقة من نفسيها :)


مسائكم فل و ياسمين

ندخل بالموضوع على طول ....هاد يا جماعه الخير اختكم ويسبر قررت تشارك في مسابقه المئة تدوينه من فلسطين ,وبما انه مسموح النا احنا اللي عايشين خارج فلسطين الحبيبه المشاركه فحبيت اشارك :)

هالتدوينه علشان اعرّفكم عالمسابقه اذا حابين تشاركو لان الفكره كتير اعجبتني, هيك مسابقات بتعرّفنا على مدونات جديده رائعه و بتستحق المتابعه و على ناس جداد بشرفنا يكونو اصدقائنا الجداد بهالعالم الافتراضي, بالاضافه الى طلب زغنون, و هون بتيجي مرحله "وثقه من نفسيها" يا ريت تساعدوني باختيار التدوينه اللي اشارك فيها -عأساس الابداع لا متناهي ومش عارفه الملمه -بدي انتو تختارو شي جد عجبكم و يكون مناسب للمشاركه بهيك مسابقه


هلأ انا بعرف ان المدونات المشاركه و اسلوب الكتابه و المواضيع راح تكون بمستوى عالي لا يقارن مع "الاشي" المتواضع اللي بكتبه بمدونتي, ولكن فكرة المشاركه عجبتني فمن
باب شرف المشاركه حبيت اشارك.


عفكره انا ما راح انشر التعليقات ....لحتى كل شخص يختار براحته ويعلّق براحته عالفكره...و تاني شي و اهم شي علشان احفظ ماء وجهي في حال ما حد علّق او رشّح تدوينه :)

ايون حفظ خط الرجعه....نراكم


تحديث

* التدوينه المرشحه ممكن تكون عن اي موضوع و باي لغه عاميه او عربية فصحى

* انا حابه اشي بتختاروه من ضمن شخابيطي الوسبريه :)


الوان الرياح



لا ما راح احكي عن الرياح المغبرّه اللي مرضتنا قبل فتره و حنقتنا...ولا راح احكي عن الرياح الضبابيه اللي مشبّعه بالرطوبه اللي برضه خنقتنا و عم تخنقنا هالايام.

بدي احكي عن الرياح اللي بتهب على كل واحد فينا من فتره لفتره, حسب الوضع النفسي و الاحداث اللي بنواجهها و بنعيشها, واحنا بس اللي بنشوفها وبالوان مميزه خاصه فينا

عن الرياح الخضرا....زي النبته اللي بتنمو و بنرعاها و بندير بالنا عليها, لا يمكن تذبل ولا يمكن تصفّر لانها مزروعه بقلوبنا وجواتنا مخبينها وما حد بقدر يلمسها ولا يغير فيها ...رياح الشوق للوطن

الرياح السودا...اللي بتغطي على كل شي, مثل الغمامه بس تغطي على عيونا و عقولنا و بنبطل نستقبل و بنرسل اشارات غلط لان عقولنا سكرت... اسودت ....و غطت على كل شي تاني...رياح الغضب

رياح بيضا .....صاااااااااااااااافيه حليب وما في شي ممكن يعكرها....بيضا زي قلوبهم و زي محبتهم النا اللي ما في شي ممكن يغيرها و مثل حنيتهم ...رياح الشوق للاهل

رياح بنفسجي..... مثل اللافيندر ريحته بتعبي الدنيا و بتخلي كل شي فيه لمسه حلوه...بس نشم ريحته تلقائي بنصير نبتسم ...رياح الحب ( اه بنفسجي مش احمر )

رياح بني.... بريحه الخشب اللي بتحسسك بالدفىء ....بتحسسك بالألفه و الحميميه, بالراحه وكأنك رميت احمال كبيره عن اكتافك فجأه....رياح الحنين للبيت

رياح زرقا... لوني المفضل...البحر...السما...الهدوء و الروقان...الابتسامه بدون سبب...الصفنان و التأمل....الانتعاش و النفس العميق...رياح الشوق للنفس

قفزات تفكيريه



افكار مش مترابطه بدي اكتبها قبل ما تطير

اول فكرة

هلأ بس يبدا شي فاسد مش اكيد جدا انه يخرب و يعفن و تطلع ريحته؟؟؟

اللي ببدا خطواته بفساد طبيعي ينتهي بريحه عاطله
واللي ببدا خطواته برشاوي و مناسف و عزايم و مجاملات و خمسين دينار لكل صوت...طبيعي جدا يكون هالشي اول الغيث و تشتي الدنيا فساد وطمع و جشع ....واللي بشتري العالم طبيعي جدا يكون اله سعر كمان لينشرى.... ويلا انتو شو رأيكم

ويلا احكيلكم...ما بدنا نغتال شخصيه حد عاخر هالمسا الله يسعدكم



القفزه قصدي .....الفكرة الثانيه

مقولة انك تندم على شي عملته افضل من انك تندم على شي ما عملته صح ويلا لأ؟؟
وهالشي ممكن نعممه على كل شي بحياتنا ويلا في مجالات بتنعكس فيها الايه؟؟؟

لهلأ ندمانه الف مره و لسا بندم على اشياء عملتها...غيرتني و غيرت طريقه تفكيري...غيرت نظرتي و شككتني بتمسكي بمبادئي....والندم مرات بربطني و بربط لساني و بشككني بحكمتي و قراراتي
هل ممكن يكون الشعور بعدم خوضي بهيك مواقف و تجارب اقوى من شعوري الحالي؟؟؟
مش عارفه



هب نقفز لاخر مرّه

كتير مقهورة من حالي....المفروض ان قلبي طيب و بسامح و بنسى و مرات شوي...هااا شوي بعطي عهبل بارادتي و غصب عني مرات ...و بسامح من كل قلبي
بس في كم شخص مرو بحياتي مش مسامحتهم, مش عارفه يمكن الزمن يشفي... و ممكن لأ
اللي قاهرني ان في شخص من هالاشخاص توفى ...و مش طالعه من قلبي ولا من لساني كلمة الله يسامحه :(
ما كنت اتوقع يكون قلبي بهالقسوه و كتير مقهورة من حالي, بعرف الاجر اللي حنوله اذا سامحت - ان شاء الله - و نفسي فيه و بعرف الراحه اللي حتصيبني لو سامحت...بس مش قادره
الاذى كان كبير و جرحه ما طاب ولا حيطيب ..... مش قادره غير اني اقول " اللهم ارنى فيهم ثأرى وأقر بذلك عينى"
نفسي اوصل للمقدرة على اني اسامح هالشخص بالذات و كل شخص اذاني :(

من هنا و هناك...دبي 2



مع اني ما حاولت استخدمها ولا مره خوف من انها تكون على ريحة ياسمين
لاني بعشق ريحة الورد و لكن بس تصير على عطر ممكن يغمى علي منها
بس الفكره لطيفه بشكل عام





تفاجأت فيها من كم يوم و جديد عرفت انها موجوده بمولات العين
و احتمال كبير تكون بمولات دبي بس عمري ما انتبهت
للاسف هالشي ملغي التفكير فيه بمولات الاردن
و كلّه كوم و مطار الاردن اللي ما فيه هالغرفه كوم




هاي الصورة من داخل دورة المياه -اجلّكم الله- يعني عالباب من جوّه
مااااا تحاولو تفكرو و ماااا تحاولو تحكو ما شفنا
موقف البلد من التدخين كتير بعجبني
مولاتنا بالاردن فكرو يطبقوها
ولكن مش عارفه على مين بضحكو بس يحطو كوفي شوب مفتوح بنص المول
و بعدين بحكولك اذا قاعد بالكوفي شوب مسموح تدخن اذا برّه لأ
و فعليا بفصلك خط مرسوم عن الجوّه و البرّه و الدخان معبي الطابق


اخر اخباري 6


اول شي و زي ما بقززكم كل سنه و زي ما الفيس بوك بعلن عن الحدث الكبير....اختفلنا نحن ويسبر الاولى بعيد ميلادنا الكريم - العمر كلّه يا رب - ال 35, و مع اني شوي هااا شوي مش مستوعبه الرقم المهول بس بدي اكتبه علشان من هلأ احكيلكم ان السنه الجاي النيّه الاحتفال بعيد ميلادي ال 34 , اه بدي ابدا ارجع حرّه انا ...حد اله عندي :)


اخدت اجازه و بالصدفه اخواني مقررين يجتمعو و كان يوم جميل جدا, بدا بمسجات من احلى الناس و بعدين غدوه برّه و بعدين بكيكتين بشهّو, الاولى ضلت شبه سليمه من اصابع الغزاه الاربعه بالعيله,اما الثانيه فانقضى على شبابها زي ما انتو شايفين تحت, مش قادرين يقاومو ,و ما وقفّت عملية الهجوم الا بس حطينا الشمعه و ما صدقو انفخ ليبدا مسلسل دوري و دوري و هلأ انا و هلأ انا و بعد نص ساعه طفي شمع اكلناهم :) و انتهى اليوم بلعبه طفوله لعبناها انا و اخواني و استمرت لنص الليل





بالنسبه للشغل فالحمد لله التأقلم مستمر و الصداقات توطدت و ساعة البريك اللي كنت اقضيها لحالي صارت تطير بسرعه من كتر الحكي و الانسجام, في موظفه تونيسيه عسل انتقلت جديد للشفت و صرنا ما انفارق بعض بالمره

طول عمري نفسي اشتغل بمكان يكون في ناتج و تقييم للاجتهاد بما اني من الناس اللي ما بقدرة غير يقدمو اكتر ما عندهم, مش لشي بس لارضاء رب العالمين وليحلل الواحد راتبه حتى لو فلان ما اشتغل و فلان تكاسل, والحمد لله الشركه اللي بشتغل فيها عاملين حساب هيك ,اشياء و بغض النظر عن القيمه الماديه او العينيه اللي بقدموها القيمه المعنويه اهم و بتصير بالسما



وجود السياره غير الحياه 365 درجه و مع الوقت صرت احفظ مواقع جديده, بس طبعا الله لا يحرمنا من الاخت جي بي اس اللي و بالرغم من مخانقاتنا بسبب سكوتها في مخارج رئيسيه و مصيريه بس متفقين بشكل عام, كترت الروحات و و الجيات, وخصوصي مع اللي كتييييييير بحبهم.

و اخرهم طلعتنا انا و حبيبتي ليو القمر, اللي بس نجتمع بنضلنا نضحك من اول الطلعه لاخرها - اه ام عمر و بنفس يوم خيانتك انت و نوريه - طلعنا تغدينا و تسوقنا و اشترينا قمصان زي بعض :) و حضرنا فيلم...بس شوووووو دمااااااااااااااار طلع :) و فهمناه و حبيناه و عشنا كل لحظه و ما ملينا و لا اتاوبنا 100 مرّه ابدا ابدا

هاي اخر اخباري اللي تزكرتها حاليا, لسا فتره التقشف و شد الحزام الافكاري شغّال عندي مع شويه عدم فضاوه مع شويتين ملل و كسل عام

اشتقتلكم كتير و اشتقت لحالي كتير.... بس اكيده اني حرجع بيوم