Things I Like To Whisper About

Would You Hear Me Whispering

Happy Birthday To My Blog


نعمُ نعم....اليوم صار عمر مدونتي 4 سنوات :)


اي نعم الي 100 سنه بعيده و مش عم بكتب زي قبل بس والله فرحانه بعيد ميلاد مدونتي الرابع ...عقبال ال 100 ازهقكم فيها و اهريكم تدوينات بداعي و بدون داعي

اخبار كتيره عندي و الحمد لله المعظم حلو بس للاسف ويسبر حرّيفه التدوين شكلها انقرضت و ما بقيلكم غيري ويسبر اللي ما بتعرف تعبّر و لا بيجيلها نفس تكتب شي :$

هلأ ليش هيك...خلينا بالمهم

شكرا لكل واحد فيكم اللي ضليتو صامدين برغم كل اللي كتبته فوق ....شكرا لتواجدكم معي دائما حتى ولو ما علقتو و حتى ولو ما زرتوني بس معرفتكم لحالها كانت وحتبقى شرف و سبب سعاده كبير الي


لمدونتي بحكيلها....سامحيني و اصبري شوي ....مصيري ارجع وين بدي اروح يعني؟؟؟؟

4 سنوات ....طفوله ...مع اني حاسستك عجّزتي بسرعه وانت بعز طفولتك بسببي بس مصيري ارجعلك الطفوله المسلوبه :)

و كل عام وانت بالف خير و ان شاء الله السنه الجاي بس ادور على هاي التدوينه لاقرأها امشيلي 5 او 6 صفحات بالهيستوري مش زي هلأ ....بصفحتين وصلت لتدوينه السنه الماضيه :$

كل عام وانتو دائما معي و بقلبي كلكم....كل عام و انتو زي ما انتو....من اغلى و اعز الناس عندي


ملاحيظ ع الهامش

* التدوينه حتكون مجدوله اليوم 24 الشهر و الساعه هلأ 11 بالليل لاني حكون بالشغل ب 26 الشهر وما في مجال للكتابه

** شكر و اعتذرا...بشكر ريمايندر موبايلي اللي ذكرني بعيد ميلاد مدونتي واللي كنت ناسيته تماما...اعتذار للمدونه... انا افف اني كنت ناسيتك :$




لمّا تعيش لحالك






بس تعيش لحالك كتير اشياء بتتغير بشخصيتك و بطريقة تفكيرك, بعيدا عن قوة الشخصيه و الاعتماد على الذات و هالقصص, في اشياء بسيطه بتتغير وانت مش حاسس فيها.

مثلا انك بتصير تحكي مع حالك و بصوت عالي و بكل اريحيه.... بتتقاتل مع حالك و بتبهدل و بتنكّت و بتحشش و بتلوم , كله مش ضميريا...لأ صوت و صوره :)


اشي تاني بتغير, ردود افعالك على الاشياء بتقل مع الوقت, قبل كنت احمل هم الشي بس يصير و اقعد افكر و ينسم بدني , هلأ الامور - بعض الامور علشان الحلال و الحرام لاني لسا بسم بدن حالي على اشياء تافهه - صارت تمشي اسهل

مثلا.... قبل كم يوم وصلت عالبيت من الشغل متأخره و يا دوب 5 دقايق و حيأذن المغرب, الاكل كان جاهز بس بدو تسخين, اكتشفت ان ما عندي غير عودين كبريت, حكيت عادي بشعل واحد و بحاول احافظ عالتاني قد ما بقدر ليطلع النهار و بجيب تاني يوم, ولّعت عين الغاز و كلّه تمام و اشتغلت العين, طفيت عود الكبريت هوب طفى الغاز :$ طلعت الاخت الحريصه حضرتنا مسكرّه الجره كعادتها بعد كل استخدام, عادي في عود تاني, سخنت الشوربه و سخنت الاكل و كلّه تمام, ولمّا رفعت الطنجره عن النار قررت اني ما اطفي الغاز استحياطا بركي في شي هيك او هيك, ياااااااااااااااا دوب ها يا دووووووووووووب ببعد الطنجره عن الغاز لاحطها عالمجلى حتى اسكب الاكل هب طب فلتت ايد الطنجره وكل اللي فيها بشكل انسطاحي انبساطي انفراشي على السجاده تحت المجلى و الارض :(

اول شي لفيت وجهي لاتأكد ان الغاز لسا مشعول, مشعول ولله الحمد, تاني شي حكيت لحالي - اه بصوت كمان - يلا الك كم يوم جاي ابالك سمبوسك و شيش طاووق, طلّعت الاخوان من الفريزر , مسكت السجاده كتيت اللي عليها و فورا عالغساله, نظفت الارض, قليت الاخوان و هم نم ولاااااااا كأنه صار شي :)


لو انا زمان...ياااااا لعوووويييييي...كان انئمصت و حردت و برطمت و انسدت نفسي عن الاكل...بس على مين!!! ويسبر تتحدى الملل :) لا مش ملطوشه من حد هاي ما تحاولو :)

في اشياء كتير بتتغير ....هاد اللي متزكرته, يا ريت تشاركوني باللي تغيّر فيكم و انا بس اتزكر شي جديد بخبركم :)


* ملاحظه ع الهامش.... اللي فوق كتبته من شي 10 ايام بس ما بعرف ليش ما نشرته
تقبل الله طاعاتكم و عيدكم مبارك ان شاء الله
بتمنى تكونو ما نسيتوني بالدعاء بالشهر الفضيل اللي مر طيران.....اللهم بلغنا رمضان