عتمة القلوب

لما تتفرج على الضو و تلف وجهك, وانت مفتح و انت مغمض الضو بضل  معك و موجود قدام عيونك بس مع الوقت بخف الضو وليكون معك مره تانيه بتحتاج ترد تركز على نفس الضو ليرجع لنفس الاثر , مرات بعد ما تتفرج عالضو بيلفت نظرك ضو تاني وبس تطلع عليه بصير اثر التنين معك و لكن الاولاني بخف وجوده اسرع من التاني و بيختفي و التاني لسا موجود و حسب مين لفت نظرك اكتر بتقرر على مين ترد تتطلع, بس في ناس طماعين بكونو بدهم يتفرجو على كل الاضوية مع بعض, وهدول الناس بنعمي ضوهم حرفيا, وهمه مفتحين وهمه مغمضين النور اللي جاي من اكثر من بقعه بخليهم تايهين و بتحول لبقع سوده وعتمه وهمه مفتحين و همه مغمضين.

نفس الشي البشر, بحياتنا بنقابل كتير ناس و كتير شخصيات, منها اللي بيترك اثر بحياتنا و منهم اللي بمرو بدون ما يتركو اي شي بنفسنا, اللي بيتركو اثر مرات بكون اثر ايجابي  مرات سلبي, مرات بستمر معنا و بعطينا طاقة , سلبيه او ايجابيه ومرات مع الوقت بخف الاثر,بس في ناس معينين بكون اثرهم قوي لحد الابهار, اشخاص بكون الهم مكانه معينه بحياتنا و بقلبنا, تلقائي بنرجع نتفرج عليهم و نراقبهم, اشخاص معينين ببهروك بكل ما فيهم وما بتقدر تلف وجهك عنهم, هدول اللي بتحس بوجودهم معك وانت معهم و انت بعيد, بتفكر فيهم اكتر من مره باليوم و مع كل موقف الك ذكرى معينه معهم, و لما تطمع انك تجمع اكتر من شخصيه من هالنوع بحياتك طبيعي جدا ان كل شي فيك يتلخبط, مشاعرك و عواطفك, احساس الذنب و احساس السعاده بتداخلو, و بالاخر برضة  بنعمى ضوك وبتصير تتصرف من دون تفكير و بالاخر بتضل انت و السواد لحالكم.

ربنا خلقلنا عيون تنتين لنتفرج و ندقق و نتأكد و نتنقل بين الناس و نختار ونحكم, و خلقلنا قلب واحد ليكون لساكن واحد بس, و اول ما نحاول نجيب ساكن جديد ليستقر مع الموجود القلب بطرد التنين وبسكر, و بصير معتم و ما فيه حياه لانه فاضي, للاسف معظم البشر ما بتلحق حالها قبل ما يعتم قلبها, بتكون فخورة بالاضوية اللي بتجمعها.

هالايام كتير ناس حوالي طفو قلبهم وخلوه يسكر, مش لان ما في ناس مبهره حولهم, لا لانهم طمعو فخسرو كل شي وضلو لحالهم عايشين بالسواد اللي معبي عيونهم و قلوبهم.

دعاياتنا

كتير في افلام اجنبيه عن مصممين الدعايات, كيف بفكرو بكل جمله وكل كلمة وكيف التصميم ومين بدو يمثل و شو اللبس و الوضعيه, اساس حياتهم هو الفكرة الاساسية, وشركات بتربح وشركات بتخسر, موظفين بترقو و موظفين بخسرو وظائفهم بسبب هالكم دقيقة ومرات هالكم ثانية للاعلان, وما بننكر تأثير الاعلانات و كم الفلوس من وراها, مصاريف و مردود هائل, على شركة الاعلان وعلى اصحاب لمنتج.

بنيجي نطبق الموضوع على دعايات تلفزيوناتنا -وما راح احدد قناة معينه الكل فاهم عن مين بحكي - بتحس ان اللي فكر بالدعاية...لأ بتحس انه ما حد فكر اساسا, حرام ينحكى عن اللي بنشوفة فكرة اساسا, لا كلام زي العالم ولا صوت ولا وجه اعلاني, صراخ ورقص و صف كلام و طوش و بالاخر بتكتشف انها دعاية, بس لشو اكيد ما بتعرف لانك مصدوم بالمناظر, حتى بالدعايات بتطاوشو!!!

اذا اسمه زعل فطبيعي يتطاوشو o.O

لهيك الهدف الرئيسي من الدعايات  مش موجود عنّا,تعودنا على انها فقرة غير مرغوب فيها احيانا و فقرة اجت بوقتها احيانا اخرى, بالعاده  يا بنوطي التلفزيون يا بنعتبر فقرة الدعايات هي فرصه تتحرك من القعده, فرصة الزوج يتطلع بوجه زوجته, فرصة الام تحكي مع ابنها, فرصة تفك زنقة للي مزنوقين, فرصه تحكي تلفون او تشيك الفيسبوك - للي مش 24 ساعه شابكين - فرصة تلم كاسات الشاي او فناجين القهوه و تجليهم, فرصة  تصلي 4 ركعات العصر قبل ما يرجع المسلسل :$

سرقات

بالفترة الاخيرة كتر الكلام عن موضوع السرقات اللي بتصير ان كان بيوت او سيارات  او شنط, خالتي اللي عمرها بالثمانين بتحكيلنا انها بتعلق مفتاح البيت برقبتها لانه 2 من الجارات اللي بنفس العمر تقريبا و بياخدو معها درس الدين كل اسبوع  تعرضو لسرقة شنطهم و انسحبو عالارض و انضربو, فخوفا من انه يصير معها نفس الشي بتحكي عالقلقله اعرف ارجع عبيتي.

انا كنت احب المشي كتير وخصوصا ان مكان سكنّا مناسب للمشي نسبيا, ولكني فعلا صرت اخاف, كتير ناس بتهموني بالمبالغه و انه الدنيا امان, بس القصص اللي بنسمعها كتير بتخوف ومش مستعده اعرض نفسي لاي موقف لا سمح الله, ربنا يحمي الجميع وبعرف اللي ربنا كاتبله شي حيشوفو بس انا ماشيه على مبدأ اعقل وتوكل

من بين القصص الكثيره بخصوص السرقات اللي سمعتها في قصّه صدمتني كتير,حكاها موظف بشتغل مع قريبه الي عن اخته, مستأجره عند جماعه كويسين و علاقتها معهم ممتازة وبعتبروها زي بنتهم, اتصلت فيها الست صاحبة البيت بيوم و طلبت منها تنزل عندهم لتسشور شعر بنتهم الصغيره لانه عندها حفله , وفعلا نزلت و حطت مفتاح البيت على التسريحه قدامها وبدت تسشور شعر البنت, فجأه فقدت المفتاح ما لقته, دورت عليه بالغرفه ما اله اثر, قورا طلعت وراحت على شقتها و لقت الباب مفتوح و الصدمه الكبرى انها لقت الست صاحبة البيت حامله بايدها اشياء وطالعه من غرفة النوم, انصدمت المسكينه و صارت الست تترجاها ما تحكي لحد وخصوصا لزوها صاحب البيت, وصارت تحكيلها انه بخيل وما بصرف عليهم -عاساس حجه مقنعه للسرقه - و وعدتها انها راح ترجع الاشياء و راح تدفعلها حق اشياء سارقتها من قبل!!!  اخت الموظف كانت تفقد اشياء بس ما تفهم وين ممكن تروح وما حد بيدخل بيتها و غرفتها.

ما عرفت شو صار بعدها وشو قررت الست تعمل, بستنى اشوف قريبتي لاعرف منها :$

لو انا مكان هالست شو ممكن اتصرف, بسكت ويلا ببلغ عنها , ما قدر احدد بصراحه ....ربنا لا يبلينا بهيك قصص 

الخالتو المصدومة !!!

بعد محاولات اقناع لا تتجاوز المرّه الواحده وافقت امبارح اروح على عرس بنت صاحبة ماما, ماما عندها طريقة بالاقناع بسيطه جدا...هي بس تأمر وانا بوافق على طول :)
حكيتلها ما بدي اروح , اذا بدك بوصلك و برجع باخدك, حكتلي بس انا بكون مبسوطه اكتر و مرتاحه لو اجيتي معي فااااااااااا وافقت اروح شو اعمل ما قدرت اقاوم :)

هلأ بدي احكي عن موضوعين, اولا و بما اني ما كنت حابة و لاخر لحظه اني اروح عالعرس هاد لا يعني ابدا اطلاقا مطلقا اني ما اكون لابسة اللي عالحبل و اكون ماشية لفتين تلاته بعلبة الميك اب, يعني رايحه و رايحه اروح و نفسويتي مش بالعلالي؟؟؟ بعد ما سمعنا بابا بنتناقش بموضوع الروحه و شافني و انا طالعه نظرة الدهشة على وجهو كانت رهيبه, بحكيلي هيك حابة الروحه و مجهزه حالك...اروح بالجينز يعني ياحج؟؟ انت بترضاها؟؟  :)

الموضوع التاني و هو عرض العرايس اللي كان بالعرس, لا لااااا مش هيك, يعني عرض عيني عينك, ستات بلفلفو عالطاولات و بعرفو بناتهم عالعالم, و بنات ماسكين موبايلات و ناسيين يلبسو نص اواعيهم بتمشو بالقاعه و رايحين و جايين بس هيك بتحسوه عرض ازياء, كرهت حالي كل ما اجا حد وسلم على ماما و سألها عني :(, متزوجه حلوه بنتك وين كاينه مخبيتيها, هاتي بوسة يا "خالتو" او يا "آنتي"  مع بعض التحسيس و معاينة البضاعه من بعض الخالتوهات, وماما محششة ضحك ولا على بالها

كل الخالتوهات كوم و الخالتو اللي طلعت من طرف العريس وكاينه دارسة مع ماما بالمدرسة كوم لحالها, لقاء لطيف كان بصراحه و الست كتير كتير طيوبه, قمت و سلمت عليها بمحبه قد ما شفت مميتي فرحانه بشوفتها, و بدت كم ولد عندك و كم بنت و شو مجوزه و كم حفيد و وصلولي , الخالتو تفرجت علي و رفعت حاجب و ابتسمت ابتسامه و حكت لماما " بنتك عريسها عندي"  حاولت ان حواجبي ما يرتفعو و اني اضل محافظه على ابتسامة المحبه استأذنت بكل ذوق و رجعت قعدت على كرسيي و فجأه سمعت الخالتو بتحكي بصوت عالي "هاااي؟؟؟" "هاي 36؟؟؟"  ضحكت , ليش ما انبسط ان ربنا الحمد لله منعم علي بشكل ما ببين عمري!!! و لكن الابتسامه بدت تخف بعد تكرار السؤال "هاي 36!!!" للمره الخامسه, و بعد تكراره للمرة السابعه بصراحه ولا اخفي عليكم بديت اتوه مش عارفة انبسط ويلا ازعل :$  بدى الاحراج يسيطر علي, خلص يا خالتو ابوس ايدك, خلص خلص 28 , 30 ابوووس ايدك ما كانت مزحه مزحناها معها, و فجأه الست انعجئت و ودعت ماما على عجل و راحت و انا و ماما مش قادرين نمسك حالنا عن الضحك, حششنا بكل ما تحمله الكلمه من معنى, بتحكيلي ماما " يا علي انصدمت كتير كأنها" صارت ماما حاسة بالذنب  هههههههههههههههههههههه.

انسان بلا قلب

كل انسان خلق وله قلب, قلب فارغ يملئه بما يريد, يبدأ بخفقات تجاه تكل الرائحه العبقة التي تعوّد عليها, لصاحبة ذلك الصوت الذي تأقلم عليه و على دقات قلبه تسعة اشهر كامله, دقات الفها و عشقها و ستبقى تلك الدقات في القلب و لكن قد تصغر المساحة التي يحتلها ذلك الحب مع الزمن واحيانا قد تغلق.

كلما مرت السنين من العمر تزداد انقسامات ذلك القلب, يدخل الاب و الاشقاء و الشقيقات, وجميع الوجوه الباسمة المستبشرة بقدوم هذا الانسان, يكبر اكثر تدخل اصناف المأكولات ما لذ منها وطاب, تزداد انقسامات القلب الصغير ولكن يبقى هناك جزء خاص يحتفظ به الانسان فارغ يعيش به ايامه تساعده على امتصاص مرارة الايام ابتداء من ذهاب الام لوحدها الى السوق وتركه بالبيت مرورا بحبة الايس كريم التي وقعت على الارض الى كسر الفازه المفضلة عند السيد الوالد و حرمانه من المصروف والتلفاز بسببها.

يكبر ليصل الى عمر اعادة ترتيب التوزيعات المناسب لعمره, يخرج اناس و تخرج اشياء و تضاف اشياء جديده, يخرج بعض الاقارب الغير محببين, و تخرج العاب الطفولة و مغامراتها ليضاف مغامرات جديده و العاب جديده, قد يدخل معلم او معلمه, يدخل اصدقاء قد يحتلون اماكنهم الى الابد و بعضهم يكونون من السكّان الطيارين, لا يقيمون لاكثر من اشهر و احيانا ايام.

وهكذا تمر السنون و يزيد العمر و يعاد الترتيب, قد يخرج احدى الوالدين او كلاهما معا في فترة وقد لا يعودا ابدا, وقد يعودا بمساحات اقل من التي كانو يسكناها مسبقا, وتبدأ وجوه واسماء تدخل و تخرج من ذلك القلب, منها من يعيث الالم و المرارة فتبقى مساحته متضررة لفتره قد يأتي من يداويها و يرمها و قد تبقى فاسدة للابد, ومنهم من يبقى او يبقى عطره في تلك المساحات, ويبقى ذلك المكان السري الذي يرقّص فراشات الجسد كلما استنشقنا رائحة عطره في قلوبنا.

ومن الناس من يعتبر نفسة فهلوي و "حرّيف" تقسيم, فيقسّم قلبه الى قطع صغير و يستغل كل الزوايا و الثنايا, كل الحجرات و البطينات, ويقوم بتوزيعها ما بين ذلك و تلك وما بين هذا و ذاك, ويقفز بفرح ما بين تلك الاجزاء, ويرمي كلاما معسولا على ساكني تلك القطعه و يعاتب اصحاب تلك القطعه و دون ان ينتبه انه لم يترك قطعه صغيره له, تلك المساحه المخصصه لمحبتك لنفسك, لتقيس بها افعالك, لتميز بين الصحيح و الخطأ لتعاتب نفسك و تمدحها, تلك المساحه الاهم التي تبقيك على تواصل مع المسار الصحيح الذي يجب ان تسير عليه, تلك المساحه التي تقوم بمكان الضوء الخافت الذي ينير لك الدرب.
و لكثرة ساكني ذلك القلب و لصغر قطعه لا يكون هناك مجال لاعادة الترتيب والتوزيع و تبقى القطع تذوب و تذوى حتى ينسى او يتناسى تلك الدقات, و بذلك يتحول القلب الى عضو اخر في ذلك الجسد يضخ الدم ليبقى ذلك الانسان على قيد الحياه ولكن....بلا قلب.

ملاحظه ع الهامش
بعتذر عن التطبيش الفظيع للغة اللي ورد فوق بس هيك طلع معي و اذا راجعت و عدّلت راح اشطب كل الادراج فاااا تركته....سامحونا :)

ايام البلاد

شاطئ بحر يافا

كتير بسمع الكبار بالعيلة بحكو عن البلاد وايام البلاد, البلاد اللي صارت زي عالم خيالي ممنوعين عنه بنراقبه من بعيد و من ورا الشاشات وما في بايدنا نعمل شي  نغير من هالواقع المرير

البلاد اللي بريحة ياسمين نابلس و ريحة شط يافا, البلاد اللي بريحة بيارات البرتقال, اللي فيها خيالات اجدادي بتمشي بشوارعها و اللي فيها طفولة اباءنا بتلعب و بتركض باحيائها

البلاد اللي من قصص اباءانا و اجدادنا تخيلنا اطفالها كبار و كبارها اساطير, البلاد اللي  كانت امان لدرجة ان سيدي يبعت ماما اللي عمرها 4 سنوات مع شوفير الباص من نابلس لطولكرم لتقضي نهاية الاسبوع مع خالتها, البلاد اللي كانت ماما كل اخر اسبوع ترجع من المدرسة و تروح عالسينما وتلاقي تذكرها اللي قطعتلها اياها اختها الكبيرة عالباب مع الحارس, البلاد اللي الكل فيها بحب الكل, اللي الكل بحسن الظن بالكل و اللي الكل ما بتدخل باي حد.

البلاد اللي اكبر مغامره بحكيلنا اياها بابا و بنسأله كم كان عمرك يحكيلنا ست سنوات و على وجهه ابتسامه ما بترتسم الا بعد هالقصص و عيونه بكونو معلقين بالسقف و كانه شايف الصورة بتنعاد قدامه بكل نتفاصيلها وعيونو بتلمع.
البلاد اللي الاطفال انجبرو يدخلو بصفوف الكبار , البلاد اللي الكل حمل روحه على كفة ومشي , البلاد اللي قررو كبارها يتركوها مجبرين خايفين, واللي بلومو صغارها كبارها على هالقرار, البلاد اللي اصغر طفل بلعب بشوارعها بكون عند الجد اكبر سياسي ومحلل و متحدث.


الباد اللي بتتوجع و بتتقطع من سنين , البلاد اللي فيها اطهر شي و اخبث شي, اللي داستها اطهر الاقدام واللي بدوسها اقبحها هلأ, ان شاء الله يجي اليوم اللي ما تضل فيه هالبلاد زي اسطورة بنسمع فيها و بنراقب فيها عن بعد, ان شاء الله بيجي هاليوم اللي نعيش الايام الحلوه اللي عاشوها.

ملاحظه ع الهامش
لكل اللي بزاودو على موضوع الوطنيه, واللي بعتبرو فلسطين خاص بناس معينيين وما بتعنيهم وما الهم فيها,واللي بفكرو ان مجموعه وحده راح تحاسب بكرا عاللي بصير بالمسجد الاقصى,  واللي بعتبرو حب فلسطين يعني كره البلدان التانيه, تذكرو انّا كلنا كنا تونسيين بوقت ثورة تونس, وكلنا كنا مع المصريين وما زلنا في ثورتهم وكلنا مع اهلنا و اخوانا بسوريا و بنزعل على زعلهم و بنبكي على وجعهم كلهم, فياااا ريت بس تفكرو شوي قبل الحكي اللي بدون معنى.

عيد العمال

المشكله الاساسية في مؤسساتنا الحكوميه هي انهم ما بقدرو ولا بحاسبو الموظف على شغله وعلى انجازه, لأ اهم شي اي ساعه اجا واي ساعه روّح, اذا تأخر 10 دقايق يكتب مغادرة و يتحمل عشرطعشر جميله و انه يضل قاعد بمكتبه طول فترة الدوام بغض النظر شو بعمل, نت و فيسبوك, شات العاب مش مهم المهم يكون قاعد بمكتبه.

اليوم المدير مصبح مستنفر, من الصبح واقف مكشر جنب ساعه الدوام ولا صباح الخير ولا برد السلام, و كلّف مدير مديرية موظف اله 100 سنه بشتغل بالوزارة بانه يلف عالمكاتب و يكتب اسماء اللي قاعدين بمكاتبهم و اللي مش قاعدين, ولما سأل عن وحده من الموظفات اللي بالمكتب اللي جنبي و حكوله انها بالتواليت, علّق واسفه عاللفظ لانه لازم انقله حرفي " ول عليكو كل الموظفين  انسهلو اليوم كلهن بالحمام" , انا كنت بشتغل و مجدّه من الصبح والله العظيم انه احبطني و لما رئيسة القسم للموظفه اللي مش بمكتبها وقفت قدام التواليت و نادت على اسمها انصدمت و حكيتيلها "من كل عقلك بتستني تحكيلك نعم من جوا الله اكبر حتى على التواليت لاحقين الموظفين"  استحو و مشيو

هلأ ما بنكر ان في نسبة كبيره من الموظفين ساعه على بعضها ما بشتغلو , وبنسو الضمير و الحلال والحرام, و خصوصا اللي في الهم تعامل مباشر مع المراجعين واحنا مؤسسة خدميه بتخدم ناس مساكين ومحتاجين, طريقة التعامل على النفتره على الذل و الانتظار على الخمسين الف مشوار ليجيبو اوراق لاستكمال المعاملات و اللي بعطوهم اياها بالقطارة و روح وتعال,لانهم عارفين انهم ما بتحاسبو على كل هاد ولكن بتحاسب الموظف اذا ما كان قاعد على مكتبه او اذا روّح قبل بدقيقتين من نهاية الدوام.

غير عن التقدير السنوي و اللي برضه "بعض" المدرء بكون تقديرهم ابعد ما يكون عن انجاز الموظف, صاحبتي المحاسبة اللي ما بعطوها اجازه الا بميت الف واسطه لانها ماشاء الله مخ نظيف و انجاز و دقة و حل لكل المشاكل تقديرها طلع جيد بس, ولما راحت تراجع مديريها بحكيلها " انا باجي عندكم عالمكتب ما بتوقفيلي بس ادخل, وبعمرك ما عزمتيني على قهوه ولا شاي, بعمرك ما جاملتيني بكلمه بصباح"

ردت عليه بانها لما قرأت قانون الخدمة المدنيه وفيما يخص التقديرات السنوية ما قرأت باب المجاملات و العلاقات الاجتماعيه فيه و طبعا ما عملت شي لانه اذا اعترضت بتيجي لجنه من الوزارة تحقق و طبعا طبعا راح تطلع محقوقه غير عن موضوع المحسوبيات و العائلات و العشائر و الوساطات, مستحيل يطلع موظف صح ومدير غلط.

المهم يا جماعه انه خميس جمعه سبت عطله و ان شااااااااااااااااء الله انّا نكيف :)

كل عام و كل يوم و كل دقيقه و الجميع بالف خير دائما :)

ظاهرة ملفتة

ظاهرة غريبة منتشره هالفتره بالشغل, ظاهره سمعت عنها من صاحباتي وانا بدبي بس الشوف مش زي السمع بالمررره, الظاهره هي العلاقات الغراميه بين الموظفين و الموظفات , كتبت قبل عن الموضوع تحت عنوان اهواك بلا امل  من قبل , الموضوع مش حاله فرديه و في حالات موظفتين متزوجتين على علاقه بنفس الموظف  المتزوج و وحده منهم بتبكي و بتحكيله "بدك تتركها" O.o, كبار و صغار و في بنات انصدمت بانهم قبلو على حالهم هيك موقف و انسو الشباب اللي صارو يفكرو حالهم اشي ما حصل, بحكو معنا كأنهم دنجوانات زمانهم و ياااااا نيالنا بوجودهم معنا و هو مع احترامي الشديد لو يقعد 100 سنه بوجهنا ما بنفكر نصبح عليه, مش تقليل من قيمتهم او تكبير بنفسنا لا سمح الله بس جد شوووو بالنسبة !!!!
مرّه كنت بدي اعلق على موظفه بوجهها صارو صاحباتي يسكتوني .... و بس ....والله يخليكي ما بدنا نورط... انصدمت منهم حكيتلهم  الدنيا صارت بالعكس, اللي بعملو المصيبه بعملوها علنا و اللي بدو ينكر المنكر بتسكّت , طلعو محاولين ينصحو وحده قامت ردحتلهم رسمي و صارت تصرخ و تقاتل

هلأ في ظاهره تانية لفتت نظري و خلتني افكر اكتر بالموضوع, كل مره بروح عالمول او بسمع صاحباتي بحكو عن ازواجهم و عن حياتهم بلاحظ البعد و الجفاء الغير طبيعي بين الازواج, جفاء يبعث على الاكتئاب :$
اللي بالمول بكونو كل واحد صافن بجهه لو لحالهم او معهم اولاد, لو صغار او كبار كلهم مكشرين وماشيين وحتى لو باكلو كل واحد مكشر و بياكل وما حد بحكي مع حد ولا حد بضحك مع حد, لدرجة اني مره كنت انا و بنت خالتي بالمول واحد و مرته ماشيين وشكلهم يوحي بانهم متزوجين جديد التنين امامير و صغار شفناهم بضحكو و بحكو و كأنهم بدورو على محل و همه ماشيين البنت مسكت ايد الشب قام سحب ايده من ايدها بطريقة خلتني انا اللي ما الي دخل انكسف , انا شهقت بنت خالتي بتحكيلي شفتي ؟؟؟ البنت المسكينه احمر وجهها و اختفت ضحكتها اشي بصدم

الموضوعين كتير خطيرين لو فصلناهم عن بعض, الفتور المبكر و الملل و الزهق اللي بصيب الزوجين مشكله كبيره, و العلاقات الخارجيه حرااااااام و خيانه و قرف و قزز,  هلأ اللي فكرت فيه انه هل هالموضوعين الهم علاقة ببعض؟؟؟ معقول واحد منهم مسبب للتاني؟؟ و اذا اه مين فيهم سبب للتاني؟؟ يعني هل العلاقات خارج اطار الزواج هي السبب بالفتور و الاكتئاب اللي صايب المتزوجين؟؟ ويلا العكس ...الفتور مسبب ان التنين يدورو على ناس تانيين يملو الفراغ ؟؟؟ 

Standards

اول ما سكنا بيتنا بال 99 كان لازم نركب مطبخ جديد, و للاسف بابا و كالعاده قرر يستعين بخبرات عائليه,  قريب النا بشتغل بالموضوع و وكله فيه.

ماما في بيتنا القديم وبما انها قصيره مقارنة بطول عائلتنا كانت تعاني من ارتفاع المطبخ بالبيت القديم و اللي سببلها ديسك و وجع ايدين و كتاف دائم, فبما انه لما تزوجت كان المطبخ القديم راكب ما في مجال للاعتراض فبالبيت الجديد حبت تختار الارتفاع المناسب الها بما انها بتقضي وزي كل الامهات بالمطبخ 99.9999% من يومها.

مناقشات و محاورات بينها وبين قريبنا على الارتفاع و بالاخر عمله زي ما هو بده لانه وبناء على كلامه و تكراره للكلمه "هاد الارتفاع الستاندردز بين المطابخ"

بما انه "قريبنا" ومن ناحية بابا, فاااا بابا كان معه و تم عمل المطبخ بارتفاع مناسب للستاندردز العالميه بالارتفاع, ومن ال 99 وماما بتعاني من هالمشكله و كل مرّه ماما بصير يوجعها ظهرها كلنا نشاركها بالدعاء و تحميل المسؤوليات, وبابا بعد بفتره حس بالذنب ولكن خلص "اللي صار صار وشو بدنا نعمل" هيك برد

اللي ذكرني بالقصه خبر قرأته في جريدة الغد اليوم

الخطيب: الانتخابات النيابية الأخيرة تقترب كثيرا من المعايير الدولية

قديش بتقترب؟؟؟ كيلو مثلا؟؟
و هالمعايير من وجهة نظر مين صحيحه و صحيّه؟؟ و من وجهة نظر مين مناسبه؟؟ ومين اللي قرر انها تطبقت ويلا لأ؟؟
والسؤال القوي..............مين اللي راح ياكل هوا من وراها؟؟؟

ودمتم

what to say ya mama

في يوم و اخوي هون استغلينا الجو الحلو و رحنا على حدائق الحسين لحتى نتشمس و نلّعب الصغار شوي، رحنا عالالعاب و بدو يتمرجحو و يتسحسلو في ما تبقى من الالعاب المتدمره ،، الله يسامحهم الناس مخربين كل شي مع انه واضح انه متعوب عليها و مجهزه لتكون مناسبه و مريحه، وما بدي احكي عن علب البيبسي وكاسات القهوه اللي مرميه هون و هون و عمال الوطن شغالين ينظفو من ورا هالعالم اللي بترمي كل شي ولا سائله.

اللي بدي احكيه عن الفوضى و الازعاج اللي كان مرافق الطلعه و اللعب،، المطعم اللي جنب الالعاب كان حاطط اغاني و على اعلى صوت و ياااا دوب كنا نسمع بعض لما نحكي, ازعاج ما بعده ازعاج و للاسف ما وقف بالمره طول ما احنا هناك, غير ان الصوت مش واضح و السماعات خربانين يعني وجع راس من الاخر.

الاغاني كانت بالبدايه اغاني دمار عاطفي لمطرب مش عارفه مين هو و من اللي نكد بنكد و بعدين الاخوان حبو يحسنو الجو حطو شريط لسميره توفيق من سنة 1900, بدت اغنيه "يا ابو قضاضة بيضا" - انا كنت مفكريتها قضابة و شكرا لجوجل اللي زبطلي اياها و عرفني على معناها :)

المهم مرة اخوي اجنبيه و منزعجه من الصوت وكل شوي تسألني يعني الاغاني حلوين؟؟؟ بحكيلها لأ :$
بس بدت هالاغنيه سبحان الله طلبت نترجملها الكلام :$ سألت اخوي شو يعني قضابه بحكيلي شو بعرفني انا و بعدين اكتشفت اني مش فاهمه ولا كلمه من الاغنيه شكلي حافظه الموسيقى بس...شووووو بدي اترجملها هلأ :$

المهم اجت فقره "وان ردتني لاريدك..وان ما ردت عمرينك ويش اقول يا يما"
وهاد الاشي الوحيد اللي فهمته فاااااااااااااااا ترجمته بعد محاورات بيني وبين اخوي على ترجمه "عمرينك" و قررنا انها تكون I don't care

What to say ya mama....what to say ya mama :)

قوس قزح...البلوج اشتاق لاهله

،

حمله قوس قزح اللي بدأها صديقنا يوسف حمله نداء لاصدقائنا اللي اشتقنالهم كتير كتير و ﺍﺷﺘﻘﻨﺎ لكلامهم و لوجودهم معنا بهالعالم الجميل وﻟﺘﻮﺍﺟﺪﻫﻢ بين عائلتنا اللي بنيناها بانفسنا ،، اخترنا اللي عقولنا ترتبت مع عقولهم و جذبنا صفاء قلوبهم.

للاسف كتير من هالاصدقاء اختفو تماما من عالمنا و مكانهم فاضي ما حد بقدر او بسترجي يعبيه من بعدهم.
من اول ما بدت الفكره و في صديق اسمه ضرب في بالي وكنت ناوية اخصص هالتدوينه اله، و سبحان الله صديقنا يوسف اقترح علي نفس الشخص و بالرغم من الصفه الطفوليه النكده اللي فيي و اللي هي اني ابطل اعمل الشي اللي مقررته اذا حد حكالي اعمله ولكن صديقي يوسف مش اي حد و صديقي صاﻟﺢ باشا بستاهل اتنازل عن هالصفه ولو لمره واحده :)

صديقي صالح...دكانتك بحاجه لاعاده ترتيب و تفقيد لتواريخ الانتهاء، و بما اني كنت مزود دائم بالبضاعه هناك محاولة مني اني ما اخليلك حجه لتسكر هالدكانه و تتركنا عطشانين لكل ما هو جديد منك فانني من موقعي هذا و بهذه الساعه التاريخيه - ليله سبت و بكره دوام - فاااااا انني اطالب باعاده فتح الدكان و تخصيص ولو ساعه وحده تطمنا عليك و تزودنا بكل ما هو مفيد كعادتك صديقي وما راح احدد ساعه يومي او يوم ورا يوم على ان لا تزيد المده عن اسبوع يلاا علشان تعرف قديش احنا كريمين :)
صديقي السباق بالخير...كل عام وانت بالف خير و خلي هالسنه الجديده تبدا بفرحتنا بالرجوع
بانتظارك قريبا جدا جدا جدا صالح باشا :)

،

اشي بجلط

اول ما رجعت من دبي سمعت من اهلي عن بنت قريب النا الها فتره زعلانه ببيت اهلها, و ا ن هاي مش اول مره بيصير انها بتزعل, اتدايقت كتير عليها خصوصا ان اللي كان ظاهر انها كتير متفقه مع زوجها, تمنيت انها تكون زعله وتمشي خصوصا ان في عندها بنت و ولد بالمدرسه وفترة امتحانات و دعيت ربنا يصلح الحال.

شاءت الاقدار ان اهل البنت يجو عنا زياره ويفتحو الموضوع, الموضوع انفتح لان اهل البنت قراب كتير منا و حسب كلام الاب هو ما حكا اشي لحد و حابب يشكي لبابا, بشكي من اهله  كيف بتدخلو بالاصلاح و انهم مستهجنين ان البنت طولت ببيت والدها و طبعا المصيبه الكبرى كانت لما لمح الاب – الغير مقتنع بتلميحه – بموضوع الانفصال.

طلعت البنت من اول سنوات الزواج يعني قبل 10 سنين وهي تهان عند زوجها, اهانه بالضرب و بالكلام و اهانه بالتعامل واهانات معنويه, وكل مره البنت تروح عند اهلها ابوها يرجعها عاساس ان البنت ما الها غير زوجها, والزوج يفهم  الموضوع ضعف من اهل البنت و يزيد بالاهانه.

فالاب الذكي قرر يعاقب الزوج باخر زعله, فقرر ياخد البنت و يخليها تترك ولادها( ولد 8 سنوات وبنت  5 سنوات )لابوهم, البنت تدمرت نفسيا ببعدها عن الاولاد و الاب مش مقدّر هالشي, و بعد ما شاف البنت بتدوب قدامه راح جاب الاولاد, شرحتلي ام البنت الاهانات اللي بتتعرضلها البنت, المسبات و التهزيء بوجود ناس او بدون وجود ناس, الضرب  اه الضرب اللي صدمني ان في اب ممكن يرجع بنته بعد ما تضرب و يسكت عن حقه و حق بنته و يجبرها ترجع لهيك بني ادم, الضرب لدرجه ان البنت الها شهر عن اهلها و لسا امها كل ليله بتحطلها مراهم على اماكن ضربها بالحزام من زوجها, لدرجه ان البنت الها شهر ما طلعت من البيت ولا شافت حد لان الزراق و الانتفاخ اللي بوجهها لسا ما اختفى.

من ضمن الكلام انجاب سيره الطلاق و اكد الاب انه مستحيييييييييييييييييييييييييييييييييل تطلق, شو بدهم يحكو العيله و شو بده يحكي المجتمع و بلوم المجتمع اللي عايشين بينه وما بلوم حاله, انا ما قدرت اسكت حكيتله بدي احكيلك شغله اولا العالم لو بنتك مبسوطه ما حترضيها العالم اذا بدك تعيش بناء على رايهم تموت احسنلك ويا دوب تسلم, و هيني من هلا بحكيلك اذا بنتك رجعت و صارلها شي ماتت او انتحرت فانا بحكيلكم انتو التنين اني بحملكم مسؤوليتها, طبعا بابا وماما ما عجبهم تدخلو بس الله هداهم و اكتفو بالتشبير انه اسكتي.

بتحكيلي الام هو بصراحه البنت تعبت نفسيا و اخدتها على دكتور نفسي من شي سنتين و الدكتور حكالها انها مصابه بانهيار عصبي حاد و ان البنت عرضه لانها تعمل بحالها اي شي و ممكن تأذي حالها, والها سنتين عالادويه

كيف بهونلك تعمل هبك في بنتك, بديش احكي عن شبه الرجال اللي بضربها و اللي فاهم الرجوله بطريقه متخلفه, بدي اضل بالاهل, لما تجبر بنتك على هيك عيشه و لما بس بدك تساعدها تقرر تحرمها من اولادها اللي الشرع و الدين بعطيها هالحق , للاسف كتير اهل بحكو لبناتهم اللي ماكلين هوا بحياتهم تعالي انت و ارميله اولاده, عاساس انهم ولاد الجيران مش ولادها, بدك تكسر قلبها فوق الكسره اللي هي فيها, هاد طبعا في حال الاهل رضيو بموضوع الطلاق, كتير اهل الطلاق هاد غير وارد و الحل هو انك تموتي او هو يموت بس رجعه عندي ما في, كتير بنات ما بعرفو حقهم برفض هالواقع اللي بلزموهم فيه ازواجهم و اهاليهم.

اتقو الله يا جماعه في بناتكم, اتقو الله يا رجال في زوجاتكم

ملاحظه ع الهامش

اصدقائي و صديقاتي....في مشروع بشتغلو عليه زميلات مدونات النا و انا حابه اشاركهم فيه, هالمشروع بحكي عن حقوق المرأه و تعريفها بهالحقوق, حقها بالحياه, حقها بانها تحكي لأ و ما تسكت عن الظلم, اول خطوه في هالمشروع هي تجميع قصص عن العنف ضد المرأه و ياخدو رأي قانوني بالموضوع لتعرف الستات اللي ساكتين عن هالعنف شو العقوبه القانونيه للي بتعرضوله و انه الهم حق يرفعو صوتهم و يحكو لأ , بدي منكم اصدقائي تبعتولي اي قصه بتعرفوها عن الموضوع و تبعتولي اياها على ايميلي باسمكم او باسم مجهول واذا بتحبو بالتعليقات, يا ريت تشاركونا بكل القصص اللي بتعرفوها علشان اللي بتعرضو لهيك مواقف و بفكرو انو عادي الزلمه يضربها و عادي يهينها تعرف انه مش عادي بالمره و ان القانون برفض هالشي, كتير ستات عايشين بينا بفكرو ان جزء من واجباتها تجاه زوجها انها  تاكل القتله و هي ساكته و لااا كمان  تستسمحه و تطلب الغفران على شي ما عملته, بتمنى منكم تساعدونا.

مصدوووومه O.O

قبل كم يوم بتحكيلي صاحبتي قصه صارت معها جد صدمتني

احكيلكم عن صاحبتي قبل لتكون الصوره  واضحه عندكم

  صاحبتي كبيره بالعمر و حتتقاعد بشهر 2 ان شاء الله، عاديه جدا شكلا و طريقه لبس، محجبه و قويه و قد حالها ، بالشغل النص بحبها و النص التاني بخاف منها ما بتسكت عالغلط و اخت رجال بالمواقف اللي بتطلب منها اي شي صعب او سهل

  بتحكيلي قبل كم يوم كانت مروحه بتكسي من الشغل، فجأه سائق التكسي لف وجهه عليها و اعطاها ورقه، بتتطلع شو هاللي اعطاها اياه طلع معطيها  خمسين دينار...بتحكيلي ما فهمت بتطلع عليه بحكيله شو هاد اتطلع عليها من المرايه اللي موجهها على وجهها بدل الزجاج الخلفي - زي تلات ارباع سواقين التكاسي عنا - بنظره مقززه و بحكيلها " ها شو رأيك بمشي الحال " مع غمزه   صاحبتي بتحكيلي قلبي كان بدو يوقف و صرخت فيه وقف و بديت اسبسب و رميت الفلوس بوجهه و نزلت من هون طار من هون  

ﺑﺴﺎﻟﻬﺎ طب ما شفتي اسمه ما شفتي رقم التكسي ، بتحكيلي صرت ارج و متت خوف و اساسا بطلت شايفه...الدنيا فجأه صارت عتمه سوده قدامي

بس ترجع امي ﻋﺮﻭﺱ

القصه حكتلنا اياها خالتي صارت معها
كانت واقفه عالاشاره اجا شب ببيع فراوله، فتحت خالتي الشباك و سألته بكم السحاره حكالها باربع دنانير، خالتي ما عجبها حكتله شكرا و سكرت الشباك
صار الشب يأشرلها من ورا الشباك انه بس بواحد، حكت والله اذا بدينار باخدها، فتحت الشباك قام الشب حكالها " بس ترجع امي عروس بعطيكي اياها بدينار "
خالتي بتحكي بعد الصدمه و كتمه الضحك بالغصب حكتله " مش عيب تبهدل والدتك و هي قاعده ببيتها يا خالتو !!"  وسكرت الشباك
بتحكيلنا يا دوب فتحت الاشاره و مشيت وكل اللي بالسياره فقعو ضحك
كلنا ضحكنا عالقصه الا بابا :$ انقهر و انسم بدنه ، بحكيلنا ان بزمنه ستات العيله، الام و الاخت كانو اشي مقدس ما يدخلو لا بموضوع مزح ولا بموضوع جد، هالايام صارو علكه بتم اولادهم، صار الاخ يسب على اخوه بشرفه وبامه و باخته
طبعا اختفت الضحكه و التفكير بالموقف صار اعمق واله ابعاد تانيه ...

Published with Blogger-droid v2.0.9

الف سلامه يا رب

متأكده انكم كلكم مستفقيدينلها بعالمنا الافتراضي, عالبلوج و الفيسبوك و التويتر, بطلتو تلاقو متعه بسبب غيابها يا ترى عن مين بحكي؟؟؟

عن اللي بتحفزنا نكتب و نعلق, عاللي بتحفزنا نتطاوش عالفيسبوك, عاللي بتعمللنا تاج على صور غريبه عجيبه....بحكي عن ام عمر

متأكده ان الكل فاقدها الو فتره , اليوم حكيت معها و اذذذذذ :( حبيبتي ام عمر هابب فيها الغاز و ايدها محروقه حروق من الدرجه الثانيه و الثالثه :(
اجر وعافيه يا رب و الله يقومك بالسلامه عن قريييييييييييييييييب يا قمر.


الحرق ما بدو حد يشرح عن المه و اللي بستمر بكل مرحله, اجر وعافيه يا قمر و الله لا يحرمنا من ضحكاتك يا رب

اسأل الله العظيم رب العرش العظيم ان يشفيك

وبحكولك ليش الدكاتره بنضربو

ماما من قبل العيد وهي بتشكي من ركبتها و مع عجئه العيد و طلوع درج و نزول درج زاد الوضع, راحت عالدكتور و اعطاها مسكنات و حولها للمستشفى علشان التصوير, اخدنالها موعد يوم الثلاثاء الجاي عند دكتور العظام في المستشفى ليصوروها و يعملو اللازم, طبعا 100 ترجاي انها تقعد و ترتاح و لكن بدون فائده, الها كم يوم بتسحب رجلها سحب و ما بتقدر ترفعها و اليوم و هي بتمشي من عند الباب ما قدرت ترفع رجلها و ضربت بالعتبه, حبيبتي داخت من كتر الوجع و الحمد لله كنت جنبها, طبعا نشف دمي و صرت انادي على اخوي زي المجانين :( الحمد لله صحصحت و مشي الحال.

حكينا ما بدها هلأ بدنا نروح طوارئ عالمستشفى, دور و عجئه طبيعي و ساعه الا شوي لدخلنا على غرفة طوارئ العظام , مع ان الناس بتتجاوز الدور وما حد حاكي معها شي ضلينا قاعدين لان اللي عالاستقبال حكالنا ارتاحو و انا بنادي عليكم بالخمس مرات اللي رحت اساله فيها ايمتا دورنا.

اجا الدور و لله الحمد و قبل ما حد يفحص قررو نصور الركبه, اخدنا ماما عالتصوير و صورناها, كنت انا و اخوي مع ماما و طلبنا من بابا يروّح لانه اساسا ظهره و ركبه بوجعوه وما بقدر يمشي ولا يضل واقف بالمستشفى, برضه دور عالتصوير و لكن اكثر تنظيما, خلصنا و رجعنا لغرفة الطوارئ  اعطيناهم الصور و الممرض علقها عالجهاز الخاص بصور الاشعه و خصصولنا سرير لماما, ماما فضّلت تضلها عالكرسي المتحرك لانها مش قادره تحرك رجلها, بعد بنص ساعه و احنا بنستنى حد يجي اجا الدكتور المقيم بسالنا عن الحاله, شرحناله و فحص رجل ماما و استأذن علشان يروح  يشوف التصوير و يرجعلنا , و قبل ما يطلع بحكيلنا لسا هلأ كان دكتور العظام واقف و راح و الله اعلم ايمتا يرجع, اخوي وصفله شخص كان واقف جنب الممرض اتطلع على الصور و اتطلع على ماما و طلع من الغرفه, طلع الاخ هو الدكتور بس فضل انه يطلع من الغرفه قبل ما يفحص ماما, الدكتور المقيم حكالنا هلا بنتصل فيه و بيرجع, رجع بعد نص ساعه تانيه رجع الدكتور المقيم يحكيلنا عن الصوره و عن العلاج المتوقع لرجل ماما و لكنه مش دكتور عظام و بترك القرار للدكتور اللي حكو معه وحكالهم انه  هيو جاي, واقترح يعطي لماما ابره مسكنه لحتى يخف الوجع.


اجت الممرضه بعد نص ساعه  و اعطت ماما الابره مفيش ربع ساعه  ماما صار وجها اصفر و صارت تحكيلنا انها دايخه و حاسه حالها بدها تستفرغ, ركضت عالممرضه الاخت و بكل برود بتحكيلي اه هاي الابره بتعمل كل الاعراض دوخه و لعيان و هبوط عادي عادي, رجعت عالغرفه ماما غمضت عيونها و بطلت قادره تتحرك ولا تحكي, حملناها انا و اخوي و نيمناها عالتخت و رجعت للممرضه وين الدكتور , ال حكو معو 3 مرات و حكالهم هيو جاي , ساعتين ونص و احنا بنستنى الدكتور اللي لا ذمه ولا ضمير لانه حسب ما فهمنا ما اله شغل تاني بالمستشفى غير طوارئ العظام يعني الغرفه اللي احنا قاعدين فيها , حكيتلها عن وضع ماما للممرضه وانا نشفان دمي بتحكيلي " الحجه شكلها بتبالغ" اخوي هون اعصابه اللي ضلينا انا وماما نهدي فيها طول الساعتين فلتت منه, صار يصرخ و يبهدل قام الممرض حكاله انا ما الي دخل بس يجي الدكتور صرخ عليه بدخلت الاخ الدكتور, اخوي بلش يحكيله " كيف انت دكتور و بتتطلع على صور مريضه بالطوارئ و بتتركها و بتطلع؟" 
الدكتور و بكل وقاحه  الدنيا و بنبره مستفزه جدا  " عندك مشكله ما تحكي معي و روح اشتكي" 
اخوي بلش يصرخ ويبهدل و حكاله "اه بدي اشتكي عليك" , حكاله الدكتور " اطلع بره اشتكي و بديش حكي كتير"  
اخوي " انت واحد مش محترم و لو انك محترم كان حسيت انك بتتعامل مع بشر و مرضى وانا راح اشتكي عليك و هلأ" و كان اخوي ماشي باتجاه الدكتور خلص ضاربه لولا تدخل الممرضين و باقي الدكاتره, اجا دكتور عظام تاني اخد اخوي يهديه و بعدين اجا شاف ماما و تبين انه ردّه فعل الابره غلط و هاي اول مره بصير بمرسض هيك و طلعت رجل ماما بدها جبص :(

الدكتور نفسه اخد ماما و حطلها الجبص وبدقائق كانت الوصفه مكتوبه و المواعيد محدده و الدكتور التاني اعتذر لاخوي و حكاله اذا بدك تشتكي هاد حقك بس انا عملت كل اللي بقدر عليه للوالده , اخوي حكاله انا مش جاي اقاتل انا  معي مريضه بدي اعالجها و اروح, و احنا مروحين اجا الدكتور المقيم بحكي لاخوي معك حق باللي عملته و انا لو مكانك بعمل نفس الشي, شو مريض طوارئ يستنى دكتور ساعتين و نص, و احنا دائما هالدكتور بسببلنا مشاكل مع المرضى و اهاليهم.

من ال 8 المسا لل 1 بالليل و احنا بالطوارئ....طب بالله عليكم هيك دكتور بدوش قتله تصحيله ضميره اللي مات و تذكره باليمين اللي حلفه؟؟؟

تعيش الحكومة

تعيش الحكومه...يعيش احمد عرابي... من سنييييييييين و احنا بنعيد هالمقطع من مسرحيه شاهد مشفش حاجه و بنحشش من الضحك عليه, من جديد بطلت اضحك على هالمصطلح, بطل اي شي وحتى لو نكته تقصد بها التسحيج للحكومه يبعث روح الفكاهه من اعماقي.

ما بين الغاء قرار تغيير التوقيت - و اللي انبسطت عليه لاني بكره التوقيت الشتوي - و بين تغيير اوقات الدوام و بين موضوع السيارات الزوجي و الفردي  و الله اعلم شو اللي جاي استوعبت الموضوع و فهمته اكتر, و كتبت هالشي تعليق على الفيسبوك, اللي فهمته ان الموضوع كله حب من الحكومه النا.... اه الحكومه لانها بتحبنا و تعتبرنا طفلها الصغير المدلل فكرت فكرت فكرت و طلعت بهالافكار الرائعه - اه رائعه علشان ما نغتال شخصيه حد - فقررو يطلعو بامور يخلونا "نتسلى" فيها بتعرفو بما انّا شعب فاضي وما في وراه ولا ديون ولا فساد ولا انتخابات ولا خاوات ولا واسطات و لا.... فاااا حبّو انهم يعطونا لعبه زغنونه نلتهي فيها لحتى امور الدنيا اللي ممكن تزعجنا  - اه تزعجنا احنا  مش احنا اللي نزعجهم - تمشي من تحت رجلينا, قصدي تمشي على عيونا, هو هوووو قصدي اممم مش مهم شو قصدي المهم انها تمشي بهدوء و سلاسه 

و زي ما لاحظتو ان حكومتنا الرشيده فاهمتنا كتير منيح و حافظتنا و حافظه ردود افعالنا, و فعلا حصل, مناقشات و حوارات و توهان و تفكير بين ايمتا بدي اوصل ولادي عالمدرسه و ايمتا بدي اروح عالشغل و ايمتا بدي اجيبهم و هالقصص, بين سياراتنا زوجي ويلا فردي و شو بدنا نجيب سيارات و شو بدنا نغير لوحات السيارات - عفكره سألت شخص عن سعر تغيير لوحه السياره طلع بكلف فوق ال 100 دينار للعلم فقط -  و التهينا و نسينا الدنيا, الدنيا مش بره الاردن لان للاسف في كتير ناس مش سائلين اساسا بس الدنيا اللي جوا البلد.

فاااا بهالمناسبه بحب احكي ....تعيش الحكومه....يعيش احمد عرابي...و محمد الكحلاويييييي...وتحيا الامه العربيه...تحيا الامه العربيه.

عن الزواج و تكاليفه

الزواج و تكاليف الزواج, التقدم لخطبة بنت و انت مش جاهز ماديا, فكره الزواج تكون مطروحه و انت مش جاهز ماديا, موضوع اله فتره محيرني و بفكر فيه, بدا بحوار مع صديق و انتقل الى موضوع جدّي بالنسبة الي لانه بخص حد بعرفه منيح.


انا من زمان, ايام الشباب يعني :) , كنت مع ان اي شب ما يفكر بموضوع الزواج طوا ما هو غير جاهز ماديا, و ليش تجيب بنت العالم تمرمرها معك اذا انت حياتك مره, و لكن بعد ما كبرت - شوي -  و خبرتي بالحياه زادت نقطتين و نص - علشان الدقه النص - تغيرت وجهة نظري.

هلأ التغير ما بعني اقمه زغيوره تكفينا  و عش العصفور يقضينا, لأ فكرتي ان الحياه صعبه صارت و ضروريات الحياه صارت تفرض ان التنين يتعاونو و يشتغلو و يصرفو عالبيت, فكره الصرف عالبيت هاي من زمان وارده من منطلق ان انت سلمتي نفسك لانسان, فاكيد انت واثقه تماما منه و اذا خايفه على الفلوس الاولى انك كنتي تخافي على حالك, الفلوس ارخض شي بتقدميه بعد ما تختاري تدخلي الشخص على حياتك.

نرجع لموضوعنا, هلأ فكره ان انت ماديا مش جاهز للزواج حاليا, شو اللي بضمن انك تكون جاهز بعد سنه او حتى سنتين؟؟؟ و بس تشوف كل اللي حواليك متزوجين و مستقرين, موظفين الحكومه اللي بياخدو ملاليييييم - اه صرت منهم هلأ - ويلا الموظفين الكبار كله فاتح بيوت, بتشد عليهم بيوم و بتفرج بيوم, فاااا انا برأيي اذا معك الحد الادنى من مستلزمات الزواج فمش غلط تطرح الموضوع و تبدأ بتنفيذه مع وضع العروس و عائلتها بالصوره ليكون الموضوع واضح من اولها, في عائلات ما بترضى اكيد و هاي حريه شخصيه و وجهة نظر حقهم يتمسكو فيها و في ناس ما عندها مشكله.

يا ريت تفيوني بوجهات نظركم عن الموضوع لاني مش عارفه شو انصح هالشخص اللي كتييييييييير بهمني , اذا ما كنتو حابين تعلقو باسمائكم بتقدرو تعلقو كمجهولين, واللي لاول مره بيجي على مدونتي و بالصدفه قرأ هالموضوع يا ريت تفيدنا و تشاركنا بوجهه نظرك

و دمتم :)

اهواك بلا امل

لاا ما بدي احكي عن اغنيه ام كلثوم, بدي احكي عن اسم من الاسماء المستعاره المنتشره على النت, لصمتي حكمه, توتو تتكلم والعالم تتألم - جربوها موجوده عالفيس بوك :$, صمتي شموخي, فوفو الوحيد O_o 

اللي بدي احكي عنها اليوم اهواك بلا امل, قبل فتره اجاني طلب اضافه من شخص بشتغل معي بشغلي القديم, انا بصراحه مش ضايفه عالاكاونت الا شخص واحد من الشغل و اللي متأكده منه و من طريقه تفكيره, شخص طبيعي مش مثل الامراض النفسيه اللي عنّا بالشغل , المهم فتح الاكاونت تبعه لقيت كم من صاحبه الي برضه ضايفينه و بيّن كم بوست عنده, الشب متزوج و عنده ماشاء الله 4 اولاد, كتاباته عشق وغرام , عادي حر الشب يكتب اللي بدو اياه و يحط  اللي بدو اياه عالاكاونت, في وحده باسم اهواك بلا امل معلقه على كل بوست حب و غرم بطريقه بتحسس الواحد ان الكلام الها, و بس فتحت الاكاونت شفت ان في بينا صديقات مشتركين, بيني وبينكم فضولي اللطيف بدا يتحرك شمال ويمين بس انا هدّئت من روعه و سكتّه على مضض

من ضمن الليموجود بصفحته فيديو لاغنيه اجنبيه, صاحبتي معلقه انها كتييييير بتحب هالاغنيه و شكرته انه حاططها,وباقي التعليقات لشباب برضه بشكروه عالاغنيه مع تلميحات غريبه,  انا بيني و بينكم ثقافتي بالاغاني الاجنبي  محدوده جدا كم اغنيه قديمه من اخواني الكبار و كم من اغنيه جديده من اخوي الصغير وكم اغنيه من الافلام اللي حضرتها, شغلت الفيديو لاشوف شو ذوق صاحبتي طلعت الاغنيه محطوطه على صور اشي بخزي, اتصلت بصاحبتي فورا بدي احكيلها تشيل تعليقها لاني بعرفها مش من الاوبن مايندد اشي شبهي تقريبا, انصدمت و بتحكيلي انها ما حضرت الفيديو بس بتعرف الاغنيه و بتحبها, ومن هون و من هون وصلنا الى ...."اهواك بلا امل" :)

بتحكيلي عن اخر الاخبار بالشغل و القصص و اذذذذذذذذذ الاخت اهواك بلا امل موظفه عنا بالشغل, متزوجه و عندها 3 بنات, بحكي لصاحبتي  يعني ليش الهبل و هالشبهه اللي حطت حالها فيها, بتقلي اي شبهه, التنين بحبو بعض :$ نعم يا ماماااااا حبو برص منه الها, طلعت هاي اخر موضه حاليا بالشغل ,3 من الموظفات و الموظفين المتزوجين عايشين حالات حب و هيام, بقضو الدوام مع بعض و بالبيت مسجات و مكالمات و قصص طرمه من لاخر.

يمكن انا بحكي عن الموضوع بنوع من التندر و المسخره و لكن الموضوع بهز البدن, الموضوع غير انه مقزز ومقرف و بصدم الموضوع حراااااااااااااااااااااام, خيانه فظيعه , ومش للهبله البنت لا للتنين الشب و البنت, تخيل زوجها بكون رايح يشتري كم غرض من الدكانه ويلا بشتغل بالشغل التاني اللي بعد الظهر ليجيب لقمه العيش و هي بتحكي مع "حبيبها" و تخيل الزوجه بتغدي الاولاد و بتدرسهم و بتحممهم و بتنظف و بتجلي و الاخ بحكي مع "حبيبته" و الامر و الادهى ان هالعلاقات مش بالخفى لااااا كل الموظفين بعرفو و عادي ما في خوف ما في خجل ما في حيا ما في دين!!!!!

 كيف بتوصل اخلاقنا لهالمستوى من الانحدار!!!  كيف بهون عليك دينك!!! كيف بهون عليكي زوجك و اوادك و اهلك !!! كيف بتهون عليك زوجتك و اولادك و اهلك!! كيف بتهون عليكم نفسكم!!! ما تحكولي هاد اخر الاختلاط بالشغل وهاد اخر شغل الست, الموضوع ما اله دخل, مهينا بنشتغل و اكيد في كتير من بنات العيله بشتغلو اذا مش زوجتك او والدتك او اختك, بتتوقع هالشي بطلع من وحده فيهم, الموضوع مش شغل البنت الموضوع انحدار الاخلاق , الموضوع الفراغ النفسي اللي بخلي امثال هالعالم  يعبوه بالهبل, الموضوع قلّه وعي ديني و اخلاقي.


ملاحظه ع الهامش

بعرف ان الاغنيه لفيروز بس حبيت احرئصكم من اول البوست لاخره وانتو نفسكم تعلقو لتحكولي انها لفيروز  :)

مجرد سؤال!!

كيف بقدر الانسان يكون اناني بدون ما يحس؟؟ كيف بقدر يفكر بس بنفسه و ينسى مشاعر و حياه الناس التانيين؟؟؟ مرات بفكر و بتختلط الامور عندي....معقول همه الصح وانا الغلط؟؟؟ معقول ان اللي بعاني منه حساسيه زايده؟؟؟ معقول لازم اتعامل مع الناس من منظوري الشخصي للعلاقه بغض النظر كيف همه بفكرو؟؟؟ معقول العلاقات لا تبنى الا على المصالح الشخصيه؟؟؟ معقول العلاقات و المشاعر المصاحبه للعلاقه تتغير بتغير الزمان والمكان؟؟؟ تتغير بتغير الفائده من هالعلاقه؟؟؟
معقول مشاعر البشر عباره عن ازرار وريموت تحكم, الغي هالانسان ضيف هالانسان, كأنا قنوات بنحضر منا فيلم و بعدين بننسى هالقناه لحتى يجي يوم وما نلاقي شي تاني عاجبنا فبنرجع نفتح عليها, بنحدد علاقتنا ومتى يمكن نتواصل مع الشخص حسب المزاج, جاي ابالي اضحك يلا بحكي مع فلان, جاي ابالي احكي و اتفلسف يلا بتواصل مع فلان؟؟ بغض النظر شو مشاعر فلان بهاللحظه, هالعالم بفكرو  باقي البشر بس بستنو اشاراتهم وحياتهم واقفه.

لهدرجه صرنا انانيين حتى باغلى و ارخص شيء بنملكه.....بمشاعرنا؟؟؟