الله يخليلنا حبايبنا

اليوم طلعت بكير عالشغل, كان عندي مقابله لشغل و بدّي اخلص كم من شغله طلبها المدير مني قبل ما اخد مغادره , امبارح بالليل حكيت لاخوي اللي بوصله كل يوم عشغله لانه بطريق شغلي انّا بدنا نطلع بكير, و وصيته انه ما يرجع السياره بنزينها فاضي زي كل مرّه لاني مستعجله وما بقدر اعبي الصبح ولا قبل ما اروح عالمقابله.

الصبح صحيت بدري وصحي اخوي بدري على غير عاده, بحكيلي صباخ الخير بس سوري حبيبتي نسيت اعبي بنزين, حكيتله يعني فاضيه فاضيه؟؟ بحكيلي لأ فيها بس ما عبيت, طبعا كانت فاضيه و كل محطات البنزين كانت مليانه سيارات بطريقه مش طبيعيه, هيك بصير كل ما جابو سيره انه في ارتفاع بدو يصير , كلهم بروحو بفللو السيارات :(

المهم اخر محطه وقفت عندها وهي رقم 3 بطريقي صار اخوي يصرّخ ويحكيلي والله فيها, بتدويكي عالزرقا وبترجعك, رديت عليه بصوت كتير هادي, اانك بتتوقع بس تصرخ ويعلى صوتك اقتنع انا او ابطل شايفتها فاضيه, لفيت وجهي و سقت لمكان ما بدي انزله, بحكيلي بدك تعبي, حكيتله اه بس بدي اياك تنزل من السياره, عصّب الاخ و ضرب الباب ضربه اكتشفت بس وصلت للشغل انه خرّب بهالضربه الشباك, عالكهربا الشباك, ما رضي يتزحزح , نزلت و زي شيخ الشباب ضليت احاول ارفع فيه بايدي لحتى سكر و لاني كل ما اتركه يرد يفتح تنيت ورقه عروض كانت محطوطه بالسياره و حشيتها بطرف الشباك, طبعا تأخرت عالشغل و كنت على نقره بدي اقعد بنص الارض زي الصغار و ابكي :( جد منظر السياره بحزّن صار, اي نعم هي على قدّي بس بحبها و اخوي دمّرها من يوم ما اخد الرخصه.

هلأ مش هون موضوعنا, الموضوع ان بس اخوي اجا عالبيت سمعت صوت كياس و دخل على غرفتي, انا طنشتّه و ضليت بالمطبخ احضر غدا مع ممّيتي, اجا عالمطبخ و سلّم علينا واتطمن عالاكل, تغدينا و خلصنا, اجا بحكيلي بدك السياره اليوم لاني محتاجها بمشوار, شكله بصراحه حزني و ما حبيت اكسفه في نظره احساس بالذنب موجوده, حكيتله لأ ما بدي اياها, بحكيلي طيب تعالي شوي بدي احكيلك اشي, دخل على غرفتي ودخلت وراه بسألني "زعلانه مني؟؟" حكيتله اه و كتير بصراحه وحكيتله عن الشباك, بحكيلي والله حسيت حالي غريب اليوم ما بعرف كيف صرخت وكيف ضربت الباب, و ضمني وحكالي خلص لاتزعلي مني الله يخليكي, ضحكت وحكيتله خلص بس بلالك عاده الصراخ, بتطلّع عالتخت لقيت كيس, بحكيلو شو هاد, طلع جايبلي اشياء زاكيه من اللي بحبها :)

ما كنت اعرف حالي اني ممكن يتعدّل مزاجي 180 درجه من اشي زاكي :)

وكتير انبسطت لانه عارف شو اللي بحبه بالزبط :)

الله يسعدهم و يخلليلي اياهم يا رب و يخليلكم اخوانكم وخواتكم وكل اللي بتحبوهم

وحكالي انه عبّالي السياره فلّ بنزين

:)))))

صحيح بالنسبه للمقابله طلع امتحان و كنّا تقريبا 20 واحد و وحده و الحمد لله كتير منيح قدّمت وان شاء الله خير, واللي اله رزقه بمكان راح ياخدها :)