احب قبلات الشمس

في اشياء كتير بسيطه بحياتنا , لكن بتعنيلنا شخصيا اشي كتير حلو او اشي كتير سيء


انا مثلا بحب صوت المطبات اللي بتكون موجوده على الجسر بس تمشي عليه بالسياره, بكونو حاطين زي فواصل علشان ما يسرع السائق, كتير بحب صوتها بس امشي عليها, اخوي بكرههم وبحكيلي هاي تخريب للسياره


بحب بس اسوق بطريق يكون في عمارات و الشمس تضل تختفي و تظهر من وراهم زي حد بشغل الضو وبطفيه, بحس كأن الشمس بتطبع قبلاتها على وجهي و بتودعني قبل ما تختفي ويجي الليل


بحب تكون الدنيا براد و افتح الشباك و الف حالي بحرام و يصير الهوا البارد يجّي علي و انا دفيانه


كتير بنبسط بس افكر بفيلم او باغنيه معينه و بنفس اليوم اسمع الاغنيه بالصدفه او اعرف ان في قناه بدها تعرض الفيلم


كتير بنبسط بس ربنا يسّرلي انسان اساعده. خصوصا الكبار بالعمر, جد بحسها نوع من انواع الرضا من رب العالمين, و بحب بس يحكيلي بابا او ماما ان اليوم في واحد الله يرضى عليه ساعدهم و هوّن موضوع عليهم


بحب البحر بشكل جنوني وممكن اضل قاعده قدامه يوم كامل احكي معه و يحكي معي, بشكيله و بحكيله كل اسراري و بخفف علي و بضحك معي, كتير غريب ان البحر بتحول لشخص معين بعنيلك و بتحس معه بمشاعر غريبه, البحر اله ذكريات جميله معي, البحر كان صديقينا في فتره من الفترات