شو بتعملي؟؟؟

اذا صدفت انكم كنتو بشارع مكه اليوم عالساعه 2 و شفتو سياره واقفه بنص الشارع قريب من جريده الغد فاااااااااااااا هاي سيارتي :)

كان عندي شغل برّه خلصتو وهربت عالبيت :), عادي ماشيه لا الي ولا علي, فجأه كل ما اضغط بريك و بعدين اضغط بنزين تصير السياره ترجرج. حكيت شكله السياره بارده و استبعدت انو يكون جاي عليها مي من تحت لاني ما مريت ولا على بركه, عاساس ان في شارع واحد بالاردن ما فيه برك مي :$

حكيت لحالي بوقف على جنب و بضغط بنزين بركي سخنت السياره وراح اي تأثير مي او برد, لكن الرجرجه صارت تزيد, انا اساسا كنت قريبه عالبيت, توكلت على الله ومشيت وما وصلت الشارع الرئيسي الا الاخت رج رج رج وطفت, يهديكي يرضيكي ابدا, ولا رضيت تشتغل, شغلت الفلشر وحاولت اشغلها ابدا, وطبعا على حظي المنيح الشارع قلب اتوستراد الزرقا وسيارات من كل مكان تنبع وهات يا تزمير, في سيارات يلزقو بسيارتي وهمه شايفينها واقفه والفلشر شغّال ويصيرو يزمرو , طيب وين اروح؟؟ ال يأشرولي امشي لقدام شوي, طيب يختي لو بتمشي لقدام ليش واقفه انا؟؟ ويلا هيك حبيت اجرب اوقف فجأه

احلى شي في شب بسياره مشيت من جنبي بصرخ وبحكيلي شو بتعملي!!

بالله عليك؟؟؟ شو بعمل فكرك...عاساس اني انا هيك فجأه خطرلي اوقف اتشمس بنص الشارع, او اتشتتى بما انها كانت تشتي..

شو اللي شو بتعملي...مفكرني الاخ زي الاخت اللي بالصوره فايقه و رايقه

اي انا اكلت برد ليوم البرد :( خليني ساكته

المهم قررت اني ادحّل السياره - حلو ادحّل صح, حسيت حالي شوفيره :) - حطيت نيوترال و دحلتها لقدرت اصف عاليمين بصعوبه بالغه طبعا لان في دخله شارع فرعي برضه كل الاردن فجأه صارت تمر منها ,و اتصلت في بابا المسكين اللي اجا و بعرفش شو عمللي فيها اشتغلت و بكره بدو يوديها اخوي عند الميكانيكي.

فاااااااااااا الحمد لله على سلامتي :)

شكرا خالد على الاغنيه :)