المطار....يعني و بعدين!!!

كان المفروض اسافر ب 7\1 برحله المسا قبل باسبوعين وصلتني مسج من شركه الطيران بانه التغت رحله المسا وصار موعد سفري ب 8 الشهر و بعد بساعه اتصلت فيي موظفه من عندهم لتتأكد ان الموعد الجديد بناسبني, و حكيتلها اوك حكتلي يا ريت تشرفينا لتاخدي التذكره بالموعد الجديد.

قبل السفر ب 3 ايام وصلتني مسج ان في ضريبه نزادت على التذكره و راح تتاخذ في المطار, و هالمسج زكرتني اني ما غيرت التذكره, رحت لمكتب شركه الطيران علشان اسأل عن الضريبه الجديده و اغير التذكره, طلعت الضريبه مفروضه على كل شركات الطيران من الحكومه و الشب اللي بشتغل هناك فرجاني الكتاب الرسمي من الجريده الرسميه التابعه لرئاسة الوزراء, طلعت الضريبه الجديده 4:30 مكتوبه هيك.

حكيت للشب فيها اشي لو دفعتها هلأ بدل ما اتأخر بالمطار, بنعرف كلنا عجئه المطار, حكالي اه و بالمطار بس بتبيني الوصل و بتمشي, غاب رجع بحكيلي لأ خلص الافضل بالمطار, حكيتله راح يكون ازمه و عالم كتير, بحكيلي لأ انا اللي راح اكون هناك و بسرعه بتمشي الامور, رحت عالمطار صف طويل مش مبين اوله و موظف واحد, هو نفسه اللي كان بالمكتب بتأكد من التذكره, بقطع و صل بتدفعله بعطيك الوصل و بكتب على تذركرتك علامه, ساعه كامله لوصلت للشب اللي كان نفسي امسح بكرامته الارض , ماشي دفعت و وزنت الشنطه و خلصت الاجراءات كلها و ركبنا الطياره.

في بالطياره ست مع اولادها ال 3 و الشغاله, كل شوي ينادو عالست و يشوفو البوردنج اللي معها, طلعو الاخوان اللي عالباب قطعو التذكره و ما شيكو على الاسم عالكمبيوتر فبفكروها مش راكبه او في اشي غلط بالتذكره و نص ساعه على هالحال , رايحين جايين و مين فلانه, وهاتي التذكره, وانت مريتي عالبنت اللي بره, بالله عليكم؟؟؟ يعني كيف ركبت الطياره هي والعائله الكريمه؟؟؟ لابسين طاقيه الاخفا مثلا ...

هلأ نيجي للامارات, وصلت المطار و مشينا للمكان الفيز, طول عمري بلاحظ بالمطارات اللي بكونو حاملين اسم و بستنو شخص, وبكون نفسي اعرف مين هالشخص هاد اللي بستنوه وعاده بكون واحد اجنبي, و بأهلو فيه و باخدو الشنط, و احترامات وحاله, وعاده بحب اقرأ الاسماء المكتوبه, وانا ماشيه بقرأ بالاسماء و اذ بشخص حامل اسمي :))))))

لاااااااا معقول, بحكيله يس, هندي طبعا الشب, بحكيلي اسمي بحروف مكسره مع انو ما في حرف غريب, حكيتلو اه, مشيت معه قعدني بغرفه فيها كنبايات و غاب شوي, اتصل اخوي بحكيلي شو يا VIP كيف الاوضاع :), طلع اخوي دافع لشركه بالمطار 50 درهم مش اشي كتير, وهدول بمشوك و بجيبولك التذكره وبوصلوك لمنطقه الشنط, و كل شي مشي تمام, مع ان اختكم بالله بطلت تعرف تفتح بدون ما ترمش كل ثانيتين علشان بصمه العين, وعيوني دمعو و فضيحه, الشب عالبصمه حشش ,انو مالك يا اختي :") بس الحمد لله بعد المحاوله الخامسه مشيت, وطلعت عالشنط وبكل بساطه وصلت للشنط, خصوصا بالشبره النيليه اللي رابطتها ماما عالشنطه علشان اميزها :") زكرتني بمدونه لناصر عن مغامراته عالجسر

رجعنا عالاردن , صف طويل عريض على منطقه جوازات الاردنيين و 3 صفوف فاضيين ما فيهم موظفين, اجا موظف قسمونا و طبعا بكل فوضويه الدنيا رجعنا عملنا صف وسبحان الله وقفت بالصف الجديد باخره مع انهم لمّا قسمونا كان بس 3 قدامي, مش راح اطاحش بالعالم, راجعه ونفسيتي حلوه و مسالمه, كملنا الاجراءات نزلنا للشنط, دور فتش على عربايه للشنط, مافي و كل اللي معي بدورو, رحت لهندي واقف - في شب بس شافه بحكيلو الله اكبر انتو ورانا ورانا..حلو عنااا ياااا - المهم رحتله و عملت حالي شاطره حكيتله جبلي عربايه والك الحلاوه, بكل برود الدنيا رد علي و هو متركي نفس التركايه عالحيط هلأ بجيبوهم, لفلفت مره تانيه ادور و انا واقفه استنى الشنط بديش تمر و انا مش شايفه واستناها لتلف عالقشاط, رجعتلو للهندي لاني مش شايفه حد غيره, انو يا مان روووح و ما راح تكون غير راضي, رد علي بنفس الطريقه و هو ما زال على تركايته, وظيفته عمود الشب و انا مش عارفه, شوي سمعتهم بحكو هي اجت العربايات , صاروخ كنت واقفه جنبهم , الاخوان جايبين 5 عربايات كل اللي بالطياره يتقاتلو عليهم, لفيت وجهي وحكيت امشي بكرامتي, وحده بنت حلال بتحكيلي طلعو معي عربايتين بدك وحده, لولا العيب والحيا بدي انط عليها ابوسها بين عيونها, بس هديت اعصابي, وقفت عالقشاط بعد ما قرأت عالمونيتور انه القشاط لشنط رحلتنا, ووقفت بين كل اللي كانو معي بالطياره, نص ساعه القشاط بلف وبدور بشنطتين يتيمتين و مش لحد منا.

واحد من الواقفين بسأل واحد من السيكيورتي عن الشنط و بحكيلو انه النا نص ساعه, مسك الورقه المكتوب عليها المعلومات و تفرج عالمونيتور, وبحكيله مكانك صح بش شنطتك مش موجوده شكله, بحكيلو مش بس شنطتي, شنط كل العالم هاي, غاب الموظف و رجع بحكيلنا شنطكم عالقشاط التاني مش هاد, كلنا زي التتار لفينا عالقشاط اللي حكالنا عليه,بعد ربع ساعه واحد من الموظفين الواقفين بحكيلنا, انت جايين من الامارات حكيناله اه, بحكيلنا شنطكم عالقشاط التالت, برضه بروح معنويه عاليه ما حكينا ولا كلمه و رحنا عالقشاط التالت, طلعو الاخوان حاطين كل شنط الطيارات اللي اجت على هالقشاط, والموظفين بنزلو الشنط و بكوموهم فوق بعض عالارض, يعني مسكين اللي شنطته انحطت تحت بدو يستنى لبكره.

عاده بس يجي حد من السفر, خواني يعني ماما بتحب تشوفهم من عند الصراف, في زجاج بفرجيك اللي واقفين عند الشنط, وانا ماشيه بتطلع لقيت ماما , بطلت مركزه باي وقبلات طائره كأني غايبه الي 5 سنين مش 3 اسابيع, بأشرلها انو لحظه بس بدي اجيب الشنطه ومع تأشيره الشنطه اطلعت عالقشاط ويلا هي الشبره النيليه بتلولح قدامي, هلأ تخيلو الموقف بالعرض البطيء,ما في مجال تمررها بين جحافل المسافرين, ولتمررها بتكون الشنطه صارت بين اكوام الشنط, بدون تفكير تركت العربايه اللي ماصدقت الاقيها وعليها شنطة الايد و اللاب توب :$ و دفعت كل مين اجا بوجهي , وهجمت عالقشاط و سحبت الشنطه متل شيخ الشباب و عيني رايحه جاي عالعربايه و عالشنطه وعاللاب توب , اخدت شنطي و اخيرا طلعت من المطار.

هلأ ما في عنّا غير هالمطار الرسمي لكل الاردن, على اعتبار ان مطار ماركا الحركه عليه كتييييير خفيفه و معظمها طيران داخلي, الموضوع ما اله دخل بتزبيطات المطار اللي مش راضيه تخلص و لا بالشارع و المطبات, الموضوع عباره عن تنسيق و ترتيب و شغل صح وهو ابسط اشي ممكن يتواجد بمؤسسه خدميه للشعب و للزوار في المطار, وهاد كله مش موجود بمطارنا...وبعدين يعني؟؟؟؟

عفكره سمعت اللي بكوّم الشنط فوق بعض بحكي, يالله عملو نفس امبارح و حطو الشنط كلها على نفس القشاط, و المشكله انه اصغر قشاط....يعني الموضوع مش اول مره و واضح انه مش اخر مره راح يصير....