ممّيتو عندها امتحان

ماما السنة ان شاء الله بتصير 60 سنة , العمر كله يا رب , و الها فترة حابة تتعلم تشتغل عالكمبيوتر, وخصوصا عالنت, مع انو خواني الهم سنين متغربين, لكن مع الاحفاد الموضوع صار جدا طارئ, بدها ايميل علشان اول ما يوصلو صور و فيديوهات الاحفاد تشوفهم وما تستناني لمّا ارجع من الشغل, و بدها بأي وقت تشبك على Skype علشان تحكي معهم و تشوفهم و برضه ما تعتمد على وجودي او وجود اخوي.

انا بيني و بين التدريس عداء كبير, جربت التدريس و لقيتو مش مجالي اطلاقا مطلقا, وماما والحمد لله عارفه هالشي عني, فجأة اجت تحكيلنا انها سجلت بدورة لتعليم مهارات الحاسوب, هي شبه ICDL للمبتدئين, و يا حرام هي بدت الدورة من هون و كل اجهزة البيت ضربت, الاوفس على جهازها هي وبابا اللي بلعبو عليه freecell ضرب , و الشاشة بالجهاز التاني ضرب, و اللاب توب كان فيه مشكله, وحتى بعد ما تصلح, بما انه مش زي الكمبيوتر اللي بتتدرب عليه بالدورة فمش مقتنعه تتدرب عليه.

امبارح سمعت ماما بتحكي لاخوي عندي واجب ولازم احلّه وبدي تساعدني, وفعلا قعد اخوي و بدا يدرسها, وانا كان عندي مشوار, رحت عالمشوار رجعت لقيت ماما بتشتغل عالكمبيوتر, لابسة النظارات و مدققه و بتتطلع عالكتاب و عالشاشة و معجوئه عالاخر, واخوي نايم عتختي جنبها, سألتها "شو خلصتي دراسة " وانا محششه ضحك, لانه هاد كان سؤالها كل ما شافت حد فينا طالع من الغرفة بالامتحانات, بتحكيلي لأ و ما حليت الواجب , ما قدرت اقاوم عبطتها و بستها و قعدت جنبها, درّستها و حلينا الواجب مع بعض.

الفاظ جديده بسمعها من ماما "يييي علينا ما ظللتها" "مش فاهمه" " وين اروح" او كلمة" نسيت" مع ضحكه خجل لمّا اسألها عن شي تعلمناه قبل دقيقتين, الله يخليلي اياه يا رب وما يحرمني منها ولا يحرم حد من امه وابوه, صحي اخوي بسأله شو صار بحكيلي , انا مش اني ما بحب التدريس , بس طلعت من اللي بصيبهم حالات اغماء بس يدرسو العالم :) بحكيلي حسيت انا اللي بدرس و نزل علي النعس العجيب و سطلت و نمت.

اليوم اتصلت في مميتو وانا بالشغل علشان اشوف شو عملت بالواجب, حبيبتي مبسوطه و بتحكيلي اللي بتدربنا سألتني سؤال وفورا عرفت الجواب و حكتلي " والله انك عسل يا خالتو", وسألتها في حد درسك حكتلها اه بنتي, حكتلها سلام خاص لبنتك

و انا بكتب هالبوست ماما قاعده بتعمل Presentation عال PowerPoint و طبعا مليان صور لاحلى الاحفاد :)

الله يخليلنا اياهم فوق روسنا يا رب

تحديثات

البوست هاد مجهزته من الخميس بس ما صار مجال انشره..

صورة النرجس لاني كتييير بحب النرجس و ريحته ولان ماما بتحبة و انا بحبه لانه بزكرني بماما, وهالحكي من قبل ما احضر ساندي بل عفكرة :)

كل عام وانتم الى الله اقرب بمناسبة يوم المولد النبوي

الدنيا برّه شتا و رعد و برق ...الحمد لله عالمطر

اليوم كتب كتاب وحده بحبها كتير كتير و هالمدونة هي اللي عرفتني عليها....الف مبروك يا قمر و عقبال الفرحة الكبيرة :)