المفروض مقابله عمل

اليوم كان عندي مقابله عمل...وهاي مش اول مره بعمل فيها مقابله, خصوصا هاي الفتره لاني بفكر جديا اغير شغلي الحالي.

المقابله كانت مع مدير ال IT في مستشفى من المستشفيات الخاصه اللي عنا بالاردن, طالبين مبرمج اوراكل وبعتت ال CV و اتصلو فيي و حددنا موعد مقابله اللي كان اليوم.

الاسئله كانت طبيعيه, يعني ضمن تخصصي و كلها عن الاوراكل وال DBA اللي انا ماخده فيها دورات مع اني للاسف ما طبقتها ومع الوقت نسيت معظمها, انا الي فتره بحاول اراجع باساسيات ال DBA و الاوراكل علشان الاسئله الشفهيه اللي ممكن انسألها و الحمد لله جاوبت على معظم الاسئله بطريقه صحيحه - هيك انا حسيت - مع ان بعض الاجابات مش كامله 100% بس حسيت المدير راضي عن الوضع .

المقابله استمرت ساعنين كاملين باللغه الانجليزيه و كلها شفهي مع اني توقعت ان في امتحان كتابي بس ما حصل هالشي.

بعد ما خلصنا الاسئله بالشغل حكالي المدير انه في اسأله على الصعيد الشخصي المفروض اسألك عنها, حكيتله تفضل, سألني عن رأيي بالاختلاط بالمكتب واذا في عندي مانع, حكيتله احنا جايين نشتغل مش نعمل علاقات ونتعرف, فبما انه جو شغل فعادي الموضوع و خصوصا انا قاعدين بمنطقه مفتوحه, بحكيلي كيف مفتوحه يعني في باب وممكن يتسكر, حكيتله لازم يتسكر؟؟؟ بحكيلي لأ بس في ناس بحبو يسكرو الباب و انا ما عندي مشكله هاد برجع الهم, حكيتله اذا انا من الناس اللي بحبو الابواب المغلقه و الوضع زي ما حكيت راح يكون جو شغل مش اكتر.

سؤال تاني... بحكيلي انت خجوله؟؟؟ سألته كيف يعني , في اكتر من معنى للخجل بس بالتعامل مع الناس انا مش خجوله بالمره, بحكيلي , انت شايفه ان احنا بنشتغل بمستشفى يعني ممكن يطلب مساعدتك حد بالعيادات فوق و ممكن يكون عنده مريض و بحكم انه الدكتور بفحصه , ممكن يكون مش محتشم, انصدمت طبعا و حكيتله ليش هالشي كم مره صار معكم, بحكيلي ولا مره بس ممكن تصير, حكيتله انا اللي بعرفه اني مبرمجه, يعني اكيد في ناس مسؤولين عن صيانه الاجهزه و البرامج, واذا حصل و طلب الدكتور اي شي عالجهاز بنقدر نروح بوقت ما يكون عنده مرضى وخصوصا انك بتحكي ان هالشي ما صار من قبل.


بعديها بحكيلي المدير, ان احنا عنا سياسه معينه بنحب نمشي عليها و قوانين ما بنحب نخافها.. يعني ممكن ان نتعرض لواقف المفروض ما نتصرف فيها الا ضمن القوانين, حكيتله ممتاز انا بحب التعامل مع القوانين وبحترمها كتير وبالعكس هيك بضمن اني ما اتعرض لاي موقف مش لطيف, بحكيلي اعطيكي مثال.....مثلا لو اتعرضتي لتحرش معين من اي حد بالشغل المفروض ما تحكي معه ولا تغلطي فيه, المفروض تيجي عندي وتحكيلي وانا بتصرف معه, حكيتله "تحرش؟؟؟" كيف يعني ما فهمت, ال ممكن مثلا في حد معجب فيكي و عبر عن اعجابه بطريقه غلط مش مناسبه, المفروض انت تضلي طبيعيه و بتيجي بتحكيلي وانا بتعامل معه و ازا انت غلطتي عليه اوكبّرتي الموضوع بروح حقك وممكن تسألي عن الموضوع, حكيتله اعطيني مثل حي لو سمحت عن اللي بتحكي عنه, و احكيلي كم مره بتكرر هالشي عندكم بالشغل؟؟؟

حكالي هي ما حصلت من قبل, يعني هي مش اكتر من سوء تفاهم و مشي الموضوع بس توضحت وجهات النظر, انا طبعا من السؤال اللي قبله كان عندي شبه عدم موافقه عالشغل و بعد هالشي تأكدت تماما انه الشغل مع هالعالم كتييير مريب.

ومن ضمن الحكي انه هو ما شاء الله بكافيء الموظفين اللي عنده يعني لو انا عملت اشي مميز راح يمسكني من ايدي و يوقفني قدام الموظفين و يطبطب على ظهري و يحكيلهم اني تميزت بالشغل - كلمه يمسكني من ايدي ويطبطب على ظهري تكررت بالمقابله اكتر من 4 مرات بداعي و بدون داعي - لما اجينا لموضوع الراتب انا شطحت كتير بصراحه و بديت اتشرط, يعني ما راح اوافق وما راح اوافق مش ضروري اضل مؤدبه لاخر لحظه.

اه صحيح و بحكيلي انت كيفك والعصبيين, حكيتله كيف يعني؟؟ بحكيلي انا عصبي جدا و بدي اللي يتعامل معي يستحمل هالشي, حكيتله يعني اذا صار تقصير بالشغل؟؟؟ بحكيلي اه طبعا يعني لو انت قاعده مع البوي فرند تاعك ما عندي مشكله ازا ما بأثر عالشغل!!!!!!
حكيتله اولا انا ما بأمن بمثل هالعلاقات وثانيا هاد موقع شغل,و انت قبل شوي بتحكي ان في انظمه و قوانين و بتمشي عليها فأذا انا لاسمح الله قصرت بشغلي بتلجأ لهالانظمه بالتعامل معي, بحكيلي بس انا مرات ما بقدر اسيطر على نفسي و اذا شفت اشي غلط فورا بعلق, ما بغلط عالموظف بس بعصب, حكيتله بصراحه انا مش متعوده اتعامل مع عصبيين و اللي بعرفه في كتب رسميه بنتعامل معها في حاله تقصير الموظف وهاد من حق المدير.

و انتهت المقابله بانه سعيد جدا بمعرفتي و اعطاني كرته ......

شو رأيكم بهالمقابله؟؟؟؟