ايام الامتحانات

بتذكر ايام امتحانات اخر السنه وانا بالمدرسه كنت احب ادرس عند باب الترس, كنا بالبيت القديم وكان في ترس كبيير و الدنيا عاده زي هالايام شوب و الواحد مش طايق حاله.

بتذكر اني كنت ادرس نص ساعه بالكتير و بعدين ابدا اصفن بالسما -اللي بغير ايام الامتحانات ما كنت اتطلع عليها - و اتفرج عاسراب الحمام وهمه طايرين, و اصفن ساعه ساعتين بايش و بمين مش عارفه, وبصير اسأل حالي انا ليش ما بتطلع عالسما و بسرح فيها بالايام العاديه؟؟؟ خلص اول ما اخلص الامتحانات بدي اقعد نفس القعده و اضل اتطلع عالسما والحمام و الطيارات الورقيه اللي بطيروها اولاد الجيران من اساطيح البيوت, وطبعا ما برجع لهلموقع الا بعد سنه بامتحانات نهايه السنه للصف الللي وراه.

ليش بايام الامتحانات كل شي بصير حلو؟؟؟ بتصير قرأه الجريده اللي عمرنا ما عملناها اشي ممتع عنا, وحتى برنامج افاق علميه اللي بنطنشه و بنوطي الصوت لحتى نشوف بس تبدا افلام الكرتون بعده طول ايام السنه, بنصير بدنا نحضره والثقافه بتصير مقطعه بعضها.

ليش اول ما امسك الكتاب ولو كنت هلأ فايقه من النوم بصير مش قادره افتح عيوني؟؟؟

ايام الجامعه بس يكون عندي امتحان تاني يوم, بصير اتفرج عالعالم بالباصات و المجمعات و بصير احسد كل واحد على انه بكره ما عنده امتحانات, حتى صديقنا كنترول الباص كنت احسده هو والشوفير , ما في وراهم اشي, ولا دراسه ولا هم ولا دكاتره مقرفين, وبس اخلص فتره الامتحانات ارجع لعقلي و احس بالندم, واتهم حالي اني انانيه و العالم اللي فيها مكفيها ....

هالايام خلصنا والحمد لله الدراسه, بعرف ان في نوعيه من الناس اللي بتضل تحب تتعلم لاخر لحظه, مثل اخوي الله يسهل عليه , متعته يقرأ كتاب عن التيارات الكهربائيه المش عارفه شو وتأثيرها بالضغط العالي المتكهرب, شو بدك يا اخي, ما بنكر ان الواحد لازم يضل مواكب التطور بس انا مش من اللي بواكبو التطور بالكتب, انا بحب الفيديوهات و البرامج العلميه التي لا تتعدى الساعه, بعديها بقلب ما بقدر استوعب بعد هالساعه, مع اني بحب القرأه كتير بس مش هالنوعيه من الكتب, ولا نوعيه كتب بابا , فلسفه وعلم اجتماع وعلم نفس, ما بحب الرمزيه انا , حطلي الموضوع قدامي كامل علشان انبسط وانا بفهم.

اللي زكرني بهالحكي ان اليوم مريت على بيت خالتي لقيت بنت خالتي الصغيره بتدرس و خواتها اللي بعمري وبشتغلو مدرّسات يا بكتبو اسأله امتحانات او بصلحو ورق, روحت عالبيت و رحت عالبرنده و نمت عالكنبايه و ضليت ساعتين بس اتطلع عالسما , جد شعور جميل :)