Things I Like To Whisper About

Would You Hear Me Whispering

دامت "الافراح "حليفه دياركم



كلنا بنعرف ان هالوقت من السنه بتكتر فيه الاعراس, الله يفرح الجميع يا رب


انا قبل هالمره حكيت عن العداوه بين اهل العروس واهل العريس "في بوست عقبال العايزين", الاشي اللي جديد انتبهتله ان اهل العيله نفسها برضه ما بكونو طايقين بعض.

وانا بعرس قبل كم من يوم سمعت هالحوار بين بنتين من عيلتنا و بحكو عن بنات تانيين من نفس العيله, الحوار استمر من اول العرس لاخره بفترات متقطعه.

شفتي فلانه...... ما راح اسلم عليها, مش مجبوره انا اروح, متيجي هي, شو مفكره حالها.
شفتي فلانه ..... شو هاللبسه الله يقرفها, والله لو يعطوني اياه ببلاش ما باخده.
شفتي فلانه....اجت عيني بعينها 3 مرات و لا سلمت علي صحيح انها ما بتستحي.
شفتي فلانه..... يا الله شو نصحانه وبشعانه ,صح؟؟؟
شفتي فلانه.... ....
شوي مرت فلانه من جنبهم , و اجت تسلم عليهم,التنتين قامو وهجمو عليها, والله ما شفناكي وين كنتي قاعده, شو هالحلاوه اه يا عمي التفصيل غير عن الجاهز والغالي سعره فيه, وهو بالاخر القالب غالب بضل هههههههههههه
انا صرت اقنع حالي ما تدخلي يا بنت, يسطفلو , وشو بدك تحكي للبنت؟؟ كانو يحكو عنك بشعه ولبستك بتخزي وصايره بقره!!! وهيك بطلع انا المنيحه؟؟؟ شو بدك...لا تتدخلي.

اشي تاني بدي احكي عنه اول ما شفت هاد الفيديو تزكرته
بس تصير ام او اخت العريس\ العروس يقومو الصبايا علشان يرقصو, في بكل عرس بنت ما بترضى ترقص و بتضل تحكي لأ و ما بعرف و الكل بصير يترجاها, وهي مستحيه و بتضحك وبتخبي وجهها, قمه البراءه و الخجل.

وبعد نص ساعه اقناع, بتوصل للبيست و هي مستحيه و وجها احمر, وبس تحط رجلها عالبسيست هات يا رقص , وبتصير ترقص بذمه وضمير وهات مين يعقعدها
هالبنوته اللي بالفيديو عملت نفس الشي , ضلهم يتحركشو فيها و هي يا دوبها عارفه تزقف و بس قررت تبدا انسجمت عالاخر

اتركم مع الفيديو :)




video


:)

15 التعليقات :

لك شو هل حلو يا حلووو... يبعتلك يبعتلك يبعتلك على هل زووء،، بجنين هل لون و كل شي... فكرترك خطبتي أو شي.. وكمان عم تحكي عن الأفراح قلت خلصصص عملتها بنت الإيييه،،، هيهيهيهي.. هاد فال حلوو ؛) يالله انشالله.

ههههه هل كتبتيه يا وااايلي مت من الضحك هههه عنجد انك شي مو معقول.. ولا هل فيديو يا لطيييف شو هل بنوت.. :) :)

على فكرة أنا هيك كمان.. صعب اني ارقص بأماكن عامه أو شي بستحي إزا ما كانت حفلة حد قريب كتير مني ما بعمل شي،، بس يلي بصير إني متل هل بنوت بس ابدا ما بوقف.. .... خدلك هزز :) :)

هيهيهيهي
قلبي راح يوقف من الضحك على هل بنوت ما عدش فيني

 

إن لكيدهن عظيم

 

هاهاهاه ... تحشيش البنت .. هاهاها ..
نهفة ..
و بالأعراس صار هادا الشي أكتر من طبيعي

 

Jumana

انت طلعتي منهم....اصلا احسن ناس هالناس :)
بتجنن البنوته وهي بترقص صح :)

Maf3oos
لااا هاد اسمه ذكاء اجتماعي :)

رزان

المشكله انها بتصير مخلصه كتير و بتعطي كل دقه حقها :)

 

loooooooooool
wala eshi el benet :-D
o t3leeqan 3ala kalamek 3n el banat el "besta7u yer2usu" shufi had el clip la wonho chung (bt3rafeeh?? el koori el 2ommo vitnameyyeh p 3ayesh bel 2ordon lol)
http://www.youtube.com/watch?v=bwToqG-wKg0&feature=related

 

Naryat

hahahah he is funny
ana b3raf elshab bs 2awal marra bashoof el video LOOOL
this is exactly what I'm talking about :D

 

if there is a reason I hate summer, is because of the wedding things...

but during the wedding, 3adi.. AFTER the wedding is the issue..

"il2akel ma kan zaki", "il DJ hamel"
"il 3aroos shayfe oo mish msadd2a"
"wallah ma b3raf keef akhdato, bi6l3ilha a7san" (and vice versa)

Thats why, my wedding is going to be a reception... kaset 3aseer, oo kul wa7ad 3a daro...yalla!!

 

LOOOOL you say it all Ala'

Always they will find some thing to talk about :S
fal2a7san u to be happy and let them talk lalsobo7 :D

 

أول شي تصميم الصفحة صار بجننننننننن ... و هاي عنج من قلبي مو زي هدول النسوان هاهاهاهاها :)
تاني شي يا ماما هاد الحكي نفسه بصير بكل عرس سواء كان هاي كلاس أو حتى بلدي علاخر .. كأنة نفس السيناريو بينعاد !!
بس انا كتير بحب اروح علحفلات عنجد بتسلى :) بس ما في مجال للأسف لازم الواحد ياخد سيئات !!!

 

متل ما حكى mab3oos والله صحيح
اذكى و ادهى رجل في العالم ما بطلع راس براس مع مرة و الله الله يعين هالكرة الارضية
انا قليل ما احضر اعراس، يعني بكل عمري حاضرلي شي 8 اعراس بس، لانو كلو كذب و نفاق و مجاملات بلا طعمة، والسؤال انو يا عمي مضطرين تجاملوا؟ بقولوا لأ طيب ليش بتجاملو؟؟؟؟؟؟؟؟؟؟؟
للمعلومة على سيرة شفتي فلانة، النسوان بحبو الرغي و الحكي كتير :P
ويسلمو كتير عالفيديو

 

Marooo

شكرا يا قمر...افهم من هيك انك من زمان مش زايرتيني :(

انا بكره كلمه نسوان...بس متل هالاشكال بلبقلهم الاسم :)

هلأ حتى المش مختلط بناخد سيئات O_o


Mohammad Badi

هالفئه موجوده بكل مكان بالحياه مش بس بالاعراس, لكن بالعراس بتاخد مجدها اكتر لانه الصوت مش مسموع بكون :)

عنا بالشغل الشباب برغو اكتر من الستات :(
الله يسلمك واهلا وسهلا فيك دائما :)

 

عشان هيك طول عمري نفسي اعمل عرس كتير مضبضب يعني الناس المقربين جددددداااا اللي همهم بس يرقصوا ويهيصوا معي ومش جايين للحكي والتخبيص


:)

 

هو احسن شي الواحد ما يعمل عرس
لشو وجع هالراس
بس البنت في الفيديو بتعقد
عن جد لذيذة
بس الحكي اللي بالعرس بصير اهون من اللي بصير بعد العرس
و الا لما يشوفوا شريط الفيديو و التعليقات تبلش
هاي لحالها فلم تاني

 

التصميم حلو كتير انا بحب الزهر كثير
اما اللي حكيتي عنه هاد كيد وبلى ويا الله ما اشطر البنات في كيدهم وبلاهم

 

SimSim
انا بحكي ان العالم هيك هيك ما راح تكون راضيه
فليش ما تعمليه زي ما بدك انت
اهم اشي العروس والعريس بالعرس :)

Jafra

اااااه لسا هاي قصه تانيه والمقارنات اللي بتصير برضه بالاعراس اللي بعدها, عرس فلان كان الورد احلى, عرس فلانه كان الاكل ازكى
ومن هالحكي

شو ما يعمل عرس!!! لا يعمله بس على مزاجه هو :)

Sozan

الله يحلي ايامك يا قمر....انا كمان بحبه :)
جد بتحسي البنات بالعاده بكرهو بعض وبغارو من بعض...مش فاهمه ليش!!!