سلسله عرسان - الحلقه التاسعه

القصه اليوم مش عني...القصه سمعتها من صاحبتها اللي طلبت مني اكتبها هون

البنت من عيله عندها شرط اساسي ان البنات يتزوجو بالترتيب حسب العمر, وبرفضو البنت الصغيره تتزوج قبل الكبيره, العيله كان فيها 6 بنات , صاحبه القصه رقم 4 بالبنات , البنات الكبار ال 3 تزوجو و هلأ صار دورها.

العيله من اللي بزوجو بناتهم بعمر صغير يعني بتخلص البنت توجيهي و بتزوج فورا و الاخت اللي ترتيبها 2 بالبنات بعتبروها تزوجت كبيره لانها تزوجت بعمر ال 20 يعني قعدت سنتين بالبيت ...

عمر البنات ال3 الصغار متقارب جدا, و كان يجي عرسان ممتازين للبنتين الصغار و ما يجيها عرسان زي العالم, وطبعا الاهل يرفضو العرسان لان الكبيره لسا ما تزوجت, مع انها كانت تحكي لاهلها انها ما عندها اي مشكله لو اخت من او التنتين تزوجو قبلها, بس الاهل كانو رافضين الموضوع تماما.

وهي بعمر ال 21 تقدملها عريس وكانت مواصفاته ممتازه بالنسبه لعيلتها , صاحب مصلحه و من بلد معينه - لانهم برفضو عرسان من مدن معينه و من عائلات معينه - المهم الشب مواصفاته كانت مناسبه , والموافقه كانت من الطرفين, واتفقو على كل التفاصيل والمقدم و المؤخر و هالامور, اتفقو المقدم 3 الاف و المؤخر 5 الاف, و بعد عده زيارات المفروض انهم اتفقو على كل اشي, اجو اهل العريس و حكو ان الشب مشغول كتير بشغله و انهم مضطرين يأجلو الخطبه لفتره لحتى يخلص شغله, اهل البنت ما مانعو بس اكدولهم اهل العريس ان الفتره ما راح تزيد عن شهر, وبعدها غاب العريس و اهله وما بينو بالمره, و ابوها حكالها انه لو اجا عرسان بدك تشوفيهم وتنسي الشب وهاد اللي صار, و بهالوقت كان يجي عرسان للبنات الصغار و برضه الاهل يرفضو الموضوع لتتزوج اختهم الكبيره.

مرت سنه عالموضوع وبيوم من الايام اتصلت ام العريس و احنا اسفين والله انشغلنا و توفى مش عارفه مين و الدنيا اخدتنا و احنا حابين نيجي نزوركم و احنا حبيناكم و حبينا البنت ومن هالحكي. المهم اجا العريس و اهله و المفروض انه خلص بدهم يحددو موعد حفله الخطبه, ابو البنت حكا بنضلنا على اتفاقنا الاولاني, 3 الاف متقدم و 5 متأخر, رد ابو العريس لا يا ابو فلان لا تنسى ان البنت الها سنه قاعده, الفين مقدم بكفو......

سكت ابو البنت, وقام فتح باب البيت و حكالهم الله معكم ما عنا بنات للزواج, صار الاب يعتذر ومش القصد و بالعكس البنت بتتقل بالذهب, الاب رجع حكالهم نفس الجمله " الله معكم وما عنا بنات للزواج"

البنت هلأ متزوجه وعندها 3 ولاد , زوجها شخص رائع و بستاهلها و بقدرها و بحبها كتير, و خواتها متزوجين من العرسان اللي كانو يتقدمولهم قبل , كل وحده كان في عريس يضل كل فتره يجي يخطبها و الحمد لله ربنا يسرلهم احسن الازواج, يعني اللي كاتبه ربنا هو اللي شافوه وبوقته .

غريبين بعض الناس كيف بعتبرو البنت زي غرض معروض بمحل و السنه التانيه بدو يصير عليها تنزيلات لانه صار في موديلات جديده بالاسواق و لازم يخلصو من القديم..... و غريبين الاهل اللي لسا متمسكين بان البنت الكبيره هي اللي لازم تتزوج....الحمد لله ما عندي خوات كان اكلو هوا وهمه بستنو فيي :)




ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقات السابقه