Things I Like To Whisper About

Would You Hear Me Whispering

المفروض مقابله عمل


اليوم كان عندي مقابله عمل...وهاي مش اول مره بعمل فيها مقابله, خصوصا هاي الفتره لاني بفكر جديا اغير شغلي الحالي.

المقابله كانت مع مدير ال IT في مستشفى من المستشفيات الخاصه اللي عنا بالاردن, طالبين مبرمج اوراكل وبعتت ال CV و اتصلو فيي و حددنا موعد مقابله اللي كان اليوم.

الاسئله كانت طبيعيه, يعني ضمن تخصصي و كلها عن الاوراكل وال DBA اللي انا ماخده فيها دورات مع اني للاسف ما طبقتها ومع الوقت نسيت معظمها, انا الي فتره بحاول اراجع باساسيات ال DBA و الاوراكل علشان الاسئله الشفهيه اللي ممكن انسألها و الحمد لله جاوبت على معظم الاسئله بطريقه صحيحه - هيك انا حسيت - مع ان بعض الاجابات مش كامله 100% بس حسيت المدير راضي عن الوضع .

المقابله استمرت ساعنين كاملين باللغه الانجليزيه و كلها شفهي مع اني توقعت ان في امتحان كتابي بس ما حصل هالشي.

بعد ما خلصنا الاسئله بالشغل حكالي المدير انه في اسأله على الصعيد الشخصي المفروض اسألك عنها, حكيتله تفضل, سألني عن رأيي بالاختلاط بالمكتب واذا في عندي مانع, حكيتله احنا جايين نشتغل مش نعمل علاقات ونتعرف, فبما انه جو شغل فعادي الموضوع و خصوصا انا قاعدين بمنطقه مفتوحه, بحكيلي كيف مفتوحه يعني في باب وممكن يتسكر, حكيتله لازم يتسكر؟؟؟ بحكيلي لأ بس في ناس بحبو يسكرو الباب و انا ما عندي مشكله هاد برجع الهم, حكيتله اذا انا من الناس اللي بحبو الابواب المغلقه و الوضع زي ما حكيت راح يكون جو شغل مش اكتر.

سؤال تاني... بحكيلي انت خجوله؟؟؟ سألته كيف يعني , في اكتر من معنى للخجل بس بالتعامل مع الناس انا مش خجوله بالمره, بحكيلي , انت شايفه ان احنا بنشتغل بمستشفى يعني ممكن يطلب مساعدتك حد بالعيادات فوق و ممكن يكون عنده مريض و بحكم انه الدكتور بفحصه , ممكن يكون مش محتشم, انصدمت طبعا و حكيتله ليش هالشي كم مره صار معكم, بحكيلي ولا مره بس ممكن تصير, حكيتله انا اللي بعرفه اني مبرمجه, يعني اكيد في ناس مسؤولين عن صيانه الاجهزه و البرامج, واذا حصل و طلب الدكتور اي شي عالجهاز بنقدر نروح بوقت ما يكون عنده مرضى وخصوصا انك بتحكي ان هالشي ما صار من قبل.


بعديها بحكيلي المدير, ان احنا عنا سياسه معينه بنحب نمشي عليها و قوانين ما بنحب نخافها.. يعني ممكن ان نتعرض لواقف المفروض ما نتصرف فيها الا ضمن القوانين, حكيتله ممتاز انا بحب التعامل مع القوانين وبحترمها كتير وبالعكس هيك بضمن اني ما اتعرض لاي موقف مش لطيف, بحكيلي اعطيكي مثال.....مثلا لو اتعرضتي لتحرش معين من اي حد بالشغل المفروض ما تحكي معه ولا تغلطي فيه, المفروض تيجي عندي وتحكيلي وانا بتصرف معه, حكيتله "تحرش؟؟؟" كيف يعني ما فهمت, ال ممكن مثلا في حد معجب فيكي و عبر عن اعجابه بطريقه غلط مش مناسبه, المفروض انت تضلي طبيعيه و بتيجي بتحكيلي وانا بتعامل معه و ازا انت غلطتي عليه اوكبّرتي الموضوع بروح حقك وممكن تسألي عن الموضوع, حكيتله اعطيني مثل حي لو سمحت عن اللي بتحكي عنه, و احكيلي كم مره بتكرر هالشي عندكم بالشغل؟؟؟

حكالي هي ما حصلت من قبل, يعني هي مش اكتر من سوء تفاهم و مشي الموضوع بس توضحت وجهات النظر, انا طبعا من السؤال اللي قبله كان عندي شبه عدم موافقه عالشغل و بعد هالشي تأكدت تماما انه الشغل مع هالعالم كتييير مريب.

ومن ضمن الحكي انه هو ما شاء الله بكافيء الموظفين اللي عنده يعني لو انا عملت اشي مميز راح يمسكني من ايدي و يوقفني قدام الموظفين و يطبطب على ظهري و يحكيلهم اني تميزت بالشغل - كلمه يمسكني من ايدي ويطبطب على ظهري تكررت بالمقابله اكتر من 4 مرات بداعي و بدون داعي - لما اجينا لموضوع الراتب انا شطحت كتير بصراحه و بديت اتشرط, يعني ما راح اوافق وما راح اوافق مش ضروري اضل مؤدبه لاخر لحظه.

اه صحيح و بحكيلي انت كيفك والعصبيين, حكيتله كيف يعني؟؟ بحكيلي انا عصبي جدا و بدي اللي يتعامل معي يستحمل هالشي, حكيتله يعني اذا صار تقصير بالشغل؟؟؟ بحكيلي اه طبعا يعني لو انت قاعده مع البوي فرند تاعك ما عندي مشكله ازا ما بأثر عالشغل!!!!!!
حكيتله اولا انا ما بأمن بمثل هالعلاقات وثانيا هاد موقع شغل,و انت قبل شوي بتحكي ان في انظمه و قوانين و بتمشي عليها فأذا انا لاسمح الله قصرت بشغلي بتلجأ لهالانظمه بالتعامل معي, بحكيلي بس انا مرات ما بقدر اسيطر على نفسي و اذا شفت اشي غلط فورا بعلق, ما بغلط عالموظف بس بعصب, حكيتله بصراحه انا مش متعوده اتعامل مع عصبيين و اللي بعرفه في كتب رسميه بنتعامل معها في حاله تقصير الموظف وهاد من حق المدير.

و انتهت المقابله بانه سعيد جدا بمعرفتي و اعطاني كرته ......

شو رأيكم بهالمقابله؟؟؟؟

18 التعليقات :

هاهاهاا ,,, مش طبيعي ... جد ... إيش هاي المقابلة .. يعني أنا إنصدمت ..شو الأسئلة و كيف إستحملتي .؟
هوة إنت بدك تشتغلي و لا تترقبي حصول مواقف ...
هاهاها ... الله يعينك ... بجد ..
يعني بهنيكِ على صبرك :)

 

رزان
شفتي يختي على هالمقابله :(

يعني الاسئله بالبدايه حسستني اني مبرمجه, الاسئله التانيه اللي المفروض شخصيه حسيت حالي بدي اشتغل ب
nightclub :D

 

night club ,, hahahhaa,,,,
ba3deeen entii programmer mush maintenance w ma elek 3alaqa eza 5ereb jehaz el doc !! w da5lek keef beddu y5rab !!! el printer !!! lol.. hehehe
mush heeeek ,, mush heeek ,, la hoon weslat el afkaaar !!!
w kolo koom w el ta7arosh koom tany !!! ya salam !!!!!! ween nna b '3abeh ,,, el mafrood mustashfa mo7taram !!!!!!!!
el donia a5er zaman ..

 

Exactly and I told him that, but he said you have to be ready just in case ....ready la 2eash yaba O_o

Ana el kelmeh bsara7a nakrazatnee kteer w soret beddy te5las el moqabaleh b2ay 6are2a :"(

 

يعني بصراحة مقابلة و لا اغرب هيك انتي تفوقت علي.....
بس كيف تحملتي اسالتوا لهالدرجة و الله بالك طويل كتير

 

هههههههههه, يعني صراحة تواقح هو في المقابلة و شو يعني انو بعصب وين قاعد اخونا بمحل خضرة , همسة حاولي اتدوري عشغل بشركات برمجة احسنلك هناك الجو اهون من المستشفيات ولا قطاع حكومي

 

بتعرفي من خلال بعض المقابلات بحسها فرد عضلات و انه فهمان و طلع من بطن الماما و ماسك بايده شهادة الدكتوراه مو لهايه من ضمن المقابلات قابل في بنك ع كريدت اناليست و قابلت مقابلتين بينهم اسبوع من مدير للاعلى منه و المفروض انه بس همه يقابلوني و اذا برجع بتصل البنك فكرت انه تعى وقع الاوفر بس استغرب بحكولي ذ هيد اوف كريدت بده يقابلك بعد يومين الساعة عشرة استغربت الهيد يعنى شي كبير طبعا ما بدي ادخل بتفاصيل المقابله مع انه المدراء اللى قابلوني حكولي انه اوك و راح انكلمك ع الاوفر و يا ويلي طبعا شوي و راح اضضربه ع اسئلته البايخة و اسئله في اقسام اخرة و جاوبت عليها مع بعض التعقيدات فعرفت انه ما بده يوضفني بس شو السبب ففشيت خلقي بالاخر و حكيتلو كنت اسمع انه ذ هيد لاي دبارتمنت بكونو بفهمو بس نضرتي اتغيرت بعد هالمقابله بس طلع مش بالضرورة يكون بيفهم و طلعت من غير ما يحكيلي شي اكتشف بنفس اليوم بعد جدال مع ابن عمي انه كان موضف عند ابن عمي في يوم من الايام و صار تتش بينهم و الاخ مو ناسي و انا بحكى في الك اقارب هون و شوف بعملو طلع بده ينتقم بالله مهو مريض نفسي - الله لا يحط حد بهيك محل

 

بصراحة من تجربتي المتواضعة بالحياة
اشتغلي مع مدير حمار بفهمش شي و لا تشتغلي مع مدير حقير و ما عنده دين و اخلاق و بعاني من اشي اسمه فراغ عاطفي لانه مهما طنشتيه عل الفاضي بضل حقير و ما بتوب من وقف او تنين اوكي؟

 

my advice:
don't work in a place that has an IT department, work in a IT company where you will feel that you are in the right place.

good luck

 

بتمزحيييييييييي !!
يرحم حالو عنجد هاد الزلمة جدا مريب وما حبيتة بالمرة !!
و شو بالنسبة لطبطبة و مسكت الايد ؟؟ يالله ما انتي بتصيري من المحارم ازا اشتغلتي بهالمستشفى الفظيع !!!
قولة بابا : الله الغني الرزاق و ما بدك هيك أشكال !! هو احنا ماشيين جنب الحيط و مش سالمين كيف لو نزلنا عن الرصيف ؟؟؟!!!

 

Jafra

اهلا اهلا...دائما بتسعدني زيارتك :)
الصدمه اللي كانت مخليتني مش عارفه اتحرك, بصراحه فاجأني بأسألته :(

احمد

والله ما انا عارفه كيف بفكر!!!
هو شكله هيك احسن اشي كلنا مبرمجين ببعض وفاهمين بعض...

(---)

كتير بتصير انهم حاطين ببالهم مين بدهم يوظفو و بعملو مقابلات بس علشان ما ينحكى معهم؟, لكن موضوع العداوات هاد جديد, يعني جد مريض نفسيا
امين يا رب الله لا يحط حد بهيك موقف

 

غير معرف

معك حق يعني هداك بتعرف تتصرف معه اما اللي بلا دين شو بدو الواحد يعمل معه؟؟؟
هو هبل على امراض نفسيه و فعلا ما راح يتغير

Allouh

I'm with you and Ahman in that, I should work in IT's or programming companies

Maroo

شايفه القصص الطرمه اللي بتصير معي :"(
الحمد لله :$
مش فاهمه شو الاخوه اللي عايشين فيها و انا شفت الموظفين شباب و بنات يعني ما شاء الله عيله عايشين مع بعض :)
معه حق عمو الله الغني الرزاق و ما بدنا هالاشكال
لااا خلينا عالرصيف احسن :)

 

مرحبا
انا بعرف انه بالمقابلات الشخص بنحط بظروف مختلفه مشان يشوفوا كيف ردة فعله و كيف تصرفه .. و مش شرط هاي المواقف تكون حقيقية و بتصير ... و بعتقد انه المدير كان بحاول يستفزك بكل الطرق .. و ال
ليل انه حكالك عن شغلة البوي فريند هيك بكل وقاحة.. أو انه بده يطفشك من الشغل كله و تحت ايده حدا ثاني موصى عليه

 

اهلا امجد

انا معك انه بالمقابلات بحبو يمرقو كم كلمه حتى يشوفو رده فعل المتقدم للشغل

بس في شغله عند كل انسان زي سنسور معين بتحس اللي قدامك وقح ويلا بس بحكي الكلام حكي....بس نظرات الزلمه و طريقه كلامه وااااضح انها وقاحه مش اكتر

وفي شغله مهمه انا ما كنت حابه احكيها, ان المدير عرفني من موقع شغلي القديم اني زميله زوجته, زوجته بتشتغل معي بشغلي الحالي, اتصل فيي و عمل موعد يقابلني شخصيا, ومع هيك هاد ما منعه انه يتواقح اذا في اشي غلط

 

والله يا حياتي وبلا مؤاخذه واضح انو بدو "رقاصه" مش مبرمجه (ممكن تشبطي التعليق اذا بدك ترى)

بس عادي انا مش مستغربه بالمره؛ وهاي مش أسئلة طبيعيه وشغل اختبارات ومش عارفه شو!!

الله يسهل عليه دكتورنا زمان؛ حكالنا مره اذا رحتو على مقابله -خصوصا البنات- وحسيتو اللي قبالكم قل ادبو لا تقصرو

كان هاد جواب على سؤال لو انطلب من محجبه تترك حجابها

على فكره انا مرت علي مقابلات طرمه؛ بس مش بهالوقاحه بصراحه وجوز زميلتك هاد اسمحي لي: وقح والله يعينها

 

لا مياسي معك حق لاني زي ما حكيت لرزان اني بهالاسئله حسيت حالي بدي اشتغل ب
nightclub
لاا خدي راحتك عالاخر كمان...يعني كل هالتصرفات وعارف ان مرته معي بالشغل...تخيلي لو اني ما بعرف مرته شو ممكن يحكي يعني؟؟؟...جد قهرني :(

 

الحقيقة انا مصدوم ... المفروض انو المستشفى مكان محترم ومصان ... و هو مكان للنبل والامان والقيم العالية ... و و و ... بس هالحكي كتير ازعجني

 

Ahmad
هو بصراحه اشي بصدم

اليوم حكو معي ال بكره في عندك امتحان علشان الوظيفه ومخقابله تانيه

اه ماشي شكرا كتير الكم ....طبعا مش رايحه بس ما حكيتلهم خليهم يستنو :)