سلسله عرسان - الحلقه السادسه

فليحنا لليوم اجا عالشغل, عن طريق موظفه عنا صاحب زوجها بشتغل باداره حساسه بالاردن, بديش اجيب سيره حد انام ببيت خالتي, مش علشان جبن او اشي زي هيك لا سمح الله, بس انا متعوده انام بتختي :$

المهم اجت الموظفه واجا فليح معها, انا كان عمري وقتها 27 و هو عمره 39 و غير انه كبير شكله عمو و اقصر مني , يعني انا من الاشياء اللي ممكن ارفض الفليح علشانها غير الطول هو بس يكون عمو, بشكله و بطريقه لبسه و بطريقه تمشيطته, يعني حسيته زوج خالتي جاي يزورني :(

المهم انا بس شفته حكيت انسي يا بنت, خلص الموضوع منتهي, طبعا قعدنا و صاحبتي المسكينه اللي دايما بغلبها بقصصي هاي بتصير تعمل قهوه و تلطف الجو, بتعرفني دفشه بهيك مواقف.
بس لاني كنت مرتاحه انه لأ تصرفت بطبيعتي عالاخر, وما كنت مهتمه او متوتره او حامله هم بالمره.

اللي لفت نظرنا انا وصاحبتي ان عيله الفليح نفس عيله بنت عنا, فسألناه من باب فتح مواضيع جديده بدل ما نضل صافنين و تسود فتره الهدوء الممله بهيك مواقف, حكا انه ما بعرفها وممكن تشابه اسماء مش اكتر, حكينا, وسألني و سألته, طلع عنده بيت و ساكن فيه لحاله والبيت فوق بيت اهله, انا حكيت ممكن بحكم العمر بده استقلاليته ,وخلّصنا و تسهّل فليح.

طبعا وكالعاده اجت الموظفه, خير شو صار , شو رأيك, شو حكيتو, وهالقصص,حكيتلها بصراحه هو شب - لازم احكي شب شو اعمل - هو ما شاء الله عنه شكله محترم و مؤدب و...و... بس بصراحه تفكيري ما اجا عتفكيره - هاي كلمتي الدائمه اذا ما عجبني فليح منعا للاحراج- و بصراحه شكله ما في نصيب.

تاني يوم بتناديني البنت اللي عيلتها نفس عيلته, بتحكيلي انا بصراحه مش عارفه شو احكي, بس اخوي امبارح اجا شافك.....حكيتلها لحظه لحظه...اخوكي!!!! بتحكيلي اه بس هو انحرج يحكيلك انو اخوي, بحكيلها كيف انحرج ومن ايش ينحرج وبعدين انا سألته سؤال صريح و واضح انه شو بتقربيله حكالي ما بعرفها , هون انا انقهرت و صار الرفض عندي مضاعف, يعني من هلأ بلشنا بالكزب واللف والدوران , بتحكيلي البنت ما تاخدي الموضوع بحساسيه, يعني مش محرز الموضوع توقفي عنده , حكيتلها انا بصراحه بالنسبه الي كل شي ما بنحكى فيه الصح محرز وكتير كمان.

حكيتلها انه ما في نصيب, وصارت تترجاني, طيب بس اسبوع فكري, والله اخوي اكل راسي كل شوي بيتصل حكيتي معها...حكيتي معها, حكيتلها ليش اسبوع والجواب موجود, يعني هالمواضيع مش حلو المطمطه فيها, ما اقتنعت والله يخليكي اخوي صعب و بنق كتير, انا بعقلي صرت احمد ربي انها بتحكي صفات تانيه بالفليح ما حد بستحمل يتعايش معها, اذا اخته واللي متزوجه وعايشه بعيد عنه اكل راسها, انا بكره شو بده يعمل فيي؟؟ حكيتلها الله يخليكي خلص انت بدكيش تجاوبيه حره, بس جوابي عندك وعند الموظفه اللي دلته علي.


بعد كم يوم بنادوني موظفين بالمكتب اللي جنب مكتبي ان في تلفون الي عندهم, الو مين معي, طلع فليح :( بحكيلي اه شو قررتي؟ حكيتله انا جاوبت اختك, وانّي مش بمكتبي و ما بقدر احكي, وانا اسفه كتير ومضطره اني انهي المكالمه.
بعد ساعه تلفون مكتبي برن, الو مين فليح :"( بحكيلي بس حابب اعرف سبب الرفض, حكيتله الله خلقنا انفس و قلوب وافكار منها من أتلف ومنها من اختلف, واحنا للاسف مش جاي افكارنا على بعض, بحكيلي لا انا بحكيلك ليش!!! لانك حسيتيني كبير!!!
حكيتله ما بنكر هالشي بصراحه, يعني فرق العمر مش قليل, بحكيلي وانتي مفكره حالك صغيره, انا صرت اضحك ما بعرف ليش, حكيتله طيب شو بدك هلأ؟؟؟
بحكيلي ولا اشي بس بدي نضل اصدقاء, حكيتله طيب اهلا وسهلا فيك وفرصه سعيده, بحكيلي لأ بدي تاخدي تلفوني بركي احتجتي اشي مستقبلا - هون هو بده يزكرني بشغله الحساس- حكيتله طيب هات الرقم, نقلني اياه وانا طبعا ما كتبته, قام حكالي عيديلي اياه, سكتت انا, بحكيلي بدي انقلك اياه وهالمره اكتبيه, وباخر المكالمه بحكيلي يعني ما بتعرفي بركي احتجتيني بيوم بضلي متل اخوكي الصغير , ما صدقت اسكر الخط و حششت :)

انا مش من طبيعتي طوله البال بصراحه, وبكبس الواحد بسرعه على رأي اخوي, بس هاد بدي اخلص منه, لانه شكله ما بده يحل الابس يخلص كل اللي بده يحكيه, فانا اعطيته الفرصه و خلصت منه.

اشي اخير.... هلأ المعظم بس يقرأ سلسله العرسان بفكر ان ما بيجيني او بيجي للي كتبو عن الموضوع غير فليحين البلد بس , لا مش كلهم بكونو عاهات ومعقدين ومتخلفين, في هيك وفي هيك, وفي ناس فعلا ارواحنا ما بتنطبق على بعض مع انه بكون ممتاز بكل اشي, ان كان من ناحيتي او من ناحيته هو, يعني اكتر من شخص يجو اكتر من زياره ويكون الموضوع خلص راح يتم وباخر لحظه ربنا بكشف اشي , وهاد كله بالنسبه الي تقادير ربنا واستجابته لاستخارتي, و الموضوع اولا واخرا ان تم او لم يتم او تم وفشل باي مرحله كله تقادير رب العالمين.



ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقات السابقه