وقف يا زمان

نفسي يكون عندي القدره اني اوقف الزمن لحظه, متزكرين كان يجي مسلسل على عمان التانيه, ايام العز ما قبل الساتيلايت و الخزعبلات الجديده, والله كانت ايام بتجنن عالقليله تحط عالقناه وتسهر عالفيلم مش زي هلأ بتضلك تقلب من ساعتين ونص ل 3 ساعات- نفس مدّه الفيلم- وبالاخر ما بتحضر اشي, شو كنت بحكي انا؟؟؟ اه اه مسلسل البنت اللي ابوها عباره عن منشور بلاستيكي جنب التخت بضوي و بصير يحكي معها, كانت بس تحط اصابعها على بعض توقف الزمن.

بدي تكون عندي هاي القوه الخارقه و خصوصا بس يكون في عنا اجتماع مع المدير, يعني بنص الحكي و هو بتلفلسف و بكزب اوقف الزمن امسك ورقه قد راسه الزقها بنص صباحه مكتوب عليها انا كزااااااااااااااااب.
او و هو بمدح بحاله اوقف الزمن الخمه 10 كفوف على خد واحد و ارجع اقعد مكاني و اطرقع باصابعي -هيك كانت ترجّع الزمن البنت- و اشوف رده فعلّه.

او لما يمشي تكسي من جنبي و يضل ماشي على نفس مستواي علشان ما يخليني اخد المسرب, بس لاني بنت -بتعرفو لساتها البنت صفه ناقصه مرفوعه بالسكون عند بعض جماعه- اوقف الزمن و فجأه يلاقيني قدّامه و على وجهه ابتسامه بنفكحيه دليل على الانتصار :)

او لما اكون بمكه مول و يجي شب قدامي من المسحولين اللي شعرهم منكوش, اوقف الزمن اكب عراسه سطل مي و افرقله شعره على جنب او من النص و الزق شعره تلزيق براسه , زي ولاد الابتدائي المرتبين ,و ارفعله بنطلونه واشد الحزام على اخر منطقه فيه.

بس اكون بموقف محرج و نفسي الارض تنشق وتبلعني, اوقف الزمن و اختفي من الجلسه نهائيا.

بديش احكي لما يصير في خطر على الارض اوقف الزمن واهزم العدو و انقذ الارض بتقلب قصه فيلم امريكي , عيب يعني الموضوع جدّي وما بدنا نقلبه تخويت :$

شكرا لمحمد اللي حكالي اسم المسلسل
Out Of This World