الاعراس هالايام صايره زي الحروب تماما, وخصوصا بالقاعات الصغيره, بتكون كل الطاولات جنب بعض و الدنيا شوب و الكل بحكي مع بعضه, شوي وبكون بدي انفجر,بصراحه ما بحب احضر متل هيك اعراس, بس الواحد مضطر علشان صله الرحم, واجتماعيات الحياه.
اول شي اهل العروس بقعدو بجهه واهل العريس بقعدو بجهه, اعداء الله وكيلكم هدول ببحلقو بهدول و هدول بجحرو بهدول
فتره انتظار العرسان بالقاعه لحتى يخلّصو تصوير بتكون فتره الهدوء قبل العاصفه, اولاد صغار ماخدين مجدهم وهييييييييييه وهاد بلحق هاد, وهاد بقعد عاللوج, و كل العالم مش فاضيه غير توشوش بعضها و تأشر بطرف راسها , وتلوي ببوزها شمال ويمين علبسه فلانه, وعتسريحه فلانه.
شوي بدهم يدخلو العرسان, وهات لم هالصغار و بتبدا تعلى الاصوات, ولك يا فلااان والله لاقصف عمرك, ولك يا فلانه والله لاترفش ببطنك بالبيت, ماشي لمو الصغار و دخلو العرسان اللي مساكين ما بكونو عارفين شو يعملو وبس بيتطلعو على مسؤوله القاعه اللي بتعطي اشاراتها بكل حركه من ورا المصوره, والمساكين بكونو مش فاهمين اشي, يعني لو تحضرو اول دخله العرسان بالفيديو بتفهمو عن شو بحكي.
ببدا توزيع العصير, اللي بشتغلو بالصاله بيجيبولك العصير وهمه مش طايقينك بشلن, بتحط العصير قدامك و كأنها نفسها تلطشه بنص وجهك ويااااا ويلك ازا بتطلبي نوع عصير غير اللي حطتلك اياه, بتاخد كاستك و بتمشي وبتروح عليكي, علشان هيك ارضى بنصيبك و اسكتي, كاسات العصير ما بدي اجيب سيرتها, 10 الاف ايد ماسكينها قبل ما توصلك و بالنظر بتقدر تحلل البصمات و مرات بالمنخار لانه الريحه بتكون مميزه.
ببدو العرسان يرقصو و اول ما تخلص الاغنيه بهجمو اهل العريس, وبتبطلي تشوفي البيست لنص ساعه زمن, وبتبدا الروائح تطلع مع الانفعال و الذمه والضمير بالرقص, واهل العروس قاعدين بجحرو ولا وحده منهم بتزقف, و ازا كنتي قاعده جنب الطرف الاخر من الاهل وبتزقفي بتكون اللي جنبك بتطلع عليكي نظره " وك استحي على دمك هاد عرس و نازله تزقفي و تتبسمي" شوي شوي بتضطري تنزلي ايديكي و تزقفي عالجهه التانيه حتى ما تشوفك.
بيطلع العريس وهاد اعلان رسمي لاهل العروس يتفضلو عالبيست, كل اهل العريس بنسحبو انسحاب رجل واحد, و بتنعكس الايه, اهل العروس برقصو واهل العريس بجحرو وياويل وحده من الطرف الخصم تحب تشارك عالبيست, بضلهم يدزو فيها يدزو فيها ليطلعوها من حلبه السباق...قصدي حلبه الرقص :)
هلأ وقت الكيك شو على راي الدي جي اللي بعلن الحدث العظيم - عفكره كتييييييييير بكره كلمه الكيك شووو ما بعرف ليش - كل اطفال القرايب و اطفال قرايب القرايب و اطفال جيران قرايب القراب بجتمعو حول العرسان, و بعدين علشان اسمه شو لازم يكون في حركه, بشعلو اشي مش عارفه شو اسمه زي الفتّاش و بطلعو دخنه بيقعدو كل اللي بالقاعه نص ساعه مخنوقين و مش عارفين يتنفسو من ثاني اوكسيد المنغنيز اللي طلع من هالشو.
وهيك لاخر العرس, بس بزيد عليهم ان قريب اخر العرس بتحسي بتصفير غريب بدانك, طبله دانك بتحكيلك من شان الله ارحميني و اطلعي, وطول الطريق و انتي مروحه و انتي بتحكي بصوت عالي مع اهلك لحتى توصلي البيت ببدا معك وجع الراس.
هلأ الموضوع مش مقارنه اعراس قاعه ويلا فندق, الله يعين العالم وكل واحد حسب امكانياته بعيش, يعني تقريبا نفس العداوه بتكون بالفنادق كمان, بس بتكون المقارنات على مستوى اعلى.
وكل عرس وانتو بخير وعقبال العايزين :)
