وانت مالك؟!؟!؟!؟!؟!؟

مع اني مقرره ما اكتب اشياء شخصيه هالايام بس مش قادره اسكت بصراحه

ومع اني قررت ابطل اكتب عن الامور الشخصيه بالمدونه و لكن برضه بدي افش قلبي ومش قادره اسكت

اليوم قررت اصحى بكير شوي علشان اقعد مع بابا وماما لانهم متسهلين بكره على الامارات, من كتر ما حكيتلهم عن الصغار بطلو قادرين يقاومو و فورا حجزو :) المهم اليوم الصبح يا دوب صحيت سمعت صوت حد غريب بحكي, تزكرت ان بابا حكا ان والد جارنا المسافر بدو يجي الصبح يجيب مش عارفه شو لبابا حكيت خلص اجت منه و حطيت المنبه لبعد نص ساعه و رجعت علشان انام, صوت العمو شويتين عالي, بحكي و فجأه وبدون مقدمات من ضمن الحكي بسأل بابا " هي البنت اللي عندك بعدها ما تزوجت؟؟؟؟"

البنت لانه عيب يحكي اسمي طبعا, بابا حكاله لأ , قام رد "لا حول ولا قوه الا بالله, عاد احنا سمعنا انها راحت عابوظبي و تزوجت يلااا بسيطه" بابا غيّر الموضوع وصار يحكي عن شي تاني

مبدئيا مش فاهمه ليش كل مرّه كل مرّه بروح عالامارات اشاعه مغرضه بخصوص الزواج تنتشر, بالشغل كانو يحكو اني رايحه اشوف عريس....رايحه اشوف عريس!!! خير ان شاء الله , بدي اسافر من بلد لبلد لاشوف عريس!!! و هي العمو اللي حاملني عكتافه و حملي تقل عليه بنسم بدنه...وانت مااااااااااااااالك؟؟؟؟ مين انت اساسا لتتدخل؟؟؟ ومين انت لتحكي بموضوع زواجي من عدمه؟؟؟ ميييييييييييييييييين انت؟؟؟ و بعدين "البنت" !!! ما بعرف ليش حسيته بحكي عن الشغاله :$ -مع احترامي الشديد للشغالات - هيك بنحكي عن الشغاله بس نجيب سيرتها...البنت اللي عندكم مغلبيتكم شي .

الموضوع مزعج مش لانه بخص الزواج,موضوع انه يتدخل بالموضوع بشل مش بس بقهر ولكن بنعديها عاساس انه بدافع الحرص زي تبرير مميتي للموضوع مع انها مش قادره تمسك حالها عن الضحك وقتها وانه حاسسني زي بنته ومن هالحكي, بس موضوع "سمعنا انها تزوجت" هاد اللي بجلط...مين انتو وشو سمعتو؟؟؟

كان نفسي افتح الباب واحكي للعمو....وانتو مال اهلكم؟؟؟؟ اذا انا ما عندي مشكله و اهلي ما عندهم مشكله , مرحبا يا ابو جارنا يحمل همي و يتنهد و ينسم بدنه

آل سمعنا آل :(

خلص ارتحت :)

ثارات الزهور

قطفوا الزهرة ..

قالت:

من ورائي برعم سوف يثور ..

قطعوا البرعم ..

قالت:

غيره ينبض في رحم الجذور ..

قلعوا الجذر من التربة ..

قالت:

إنني من أجل هذا اليوم خبأت البذور ..

كامن ثأري بأعماق الثرى ..

وغداً سوف يرى كل الورى ..

كيف تأتي صرخة الميلاد ..

من صمت القبور ..

تبرد الشمس ..

ولا تبرد ثارات الزهور!

أحمد مطر

ديمقراطيه من نوع اخر

حقوق

ارادة الشعب

حرّيه

ثورة

كلمات كانت في قواميس عقولنا في الجزء المخفي منه, حيث تتفلتر الكلمات تلقائيا في ادمغتنا بسبب قلة الاستخدام, لم يستوعب عقلنا زخم الكلمات المتجدده التي تدلف عليه وبخلال فتره قصيره من اعمارنا, طويله على من عاشوها.

ليست عقولنا نحن - عامة الشعب - فقط من تفاجأ بتلك الكلمات, ولكنني متأكده من اختلاف وقعها عليهم,فما افرحنا احزنهكم وما قوّانا اضعفهم وما عزز ثقتنا بانفسنا اخافهم وها هي الثورات تبدأ على كل حاكم جائر لم يراعي حق الله في شعبه.

كنّا ننظر و نحمد الله تعالى على نعمتي الامن والامان التي ننعم بها في وطننا الحبيب الاردن,لا ننكر وجود الفساد و الفاسدين و لكننا على ادراك تام بما نريده, نريد اصحاب قرار و اناس بمكان مسؤوليه يقومون بواجبهم ليس الا, حكومه بما فيها من وزراء و نواب, رجال اعمال, مدراء وهكذا وصولا الى اصغر موظف في اصغر دائره خدميه, ان يقوم الجميع بواجباتهم و باعطاء الناس حقوقهم, احسسنا بالامان خصوصا بعدما رأينا كم "الديمقراطيه" الذي حظي به من حالفهم الحظ بتنسيق و حضور المظاهرات التي تحتج على الغلاء وارتفاع الاسعار و ترفض الفاسدين و الفساد وتطالب بتطهير الوطن منهم, تطالب بمن وعد بتلبية الوعود, ومع ان احدى الردود كانت "ربطة" خبز تلقى في وجه طالب لقمة العيش الكريمه, فاستمرت المظاهرات تحمل راية ولاءها الى قائد الوطن و مليكها جلالة الملك عبد الله, و بعد ان رأينا الامن وهو يوزع العصير و الماء على المتظاهرين دعما لمظاهرتهم و اعلانا على وحدة الصف بين الامن و الشعب, حمدنا الله على توحيد الصفوف و على اختفاء الفتنه فلا اصول ولا منابت ولا ديانات قد منعت باقي الشعوب من الاتحاد وهذا ما وصلنا من مظاهرات الاردنيون جمعة تلو الاخرى.

حتى جاء اليوم و الذي نفذّت فيه ديمقراطيه من نوع اخر, كان اطرافها "البلطجيه" و رجال الامن الذين تركوهم يمارسون ديمقراطيتهم بان ينقضون على المتظاهرين بالهراوي و العصي, من هو هذا البلطجي الذي يسمح لنفسه بالمزاوده على وطنيه المتظاهرين و ولائهم لوطنهم و لمليكهم؟؟؟ من هم هؤلاء الذين بعدما انسحب المتظاهرون حقنا لدمائهم و دماء اشقائهم "البلطجيه" يهتفون " يا ابو حسين لا تهتم...احنا رجالك نشرب دم" دم من ستشربون؟؟؟ وبما تهتفون؟؟؟وهل تعتقدون بان مليكنا الغالي قد يرضى بذلك؟؟؟ من كذب عليكم و اقنعكم بانكم تحاربون اعدائكم و اعداء الوطن لتقتلو و تضربو دون اي رحمه او احساس؟؟؟كيف خيل لكم بان اخاكم هذا الذي تكسرون له الايدي و الارجل لا يحب وطنه و من اجل حبه هو هنا؟؟؟من اجل حبه لوطنه نزل الى الشارع ليهتف بسقوط من تسوّل له نفسه بتشويه الوطن و بتجويع اخوانه و اخواته,من اجل حبه لوطنه يريد القضاء على من يروجون للفتنه التي اصابت ادمغتكم, من اجل حب الوطن يريد ان يحيا بسعاده ليعمل و يبدع في وطنه.

للاسف كلمه جديده دخلت الى قاموسنا ايضا...."بلطجيه"....واتمنى ان لا اراها في بلدي مره اخرى واتمنى ان يحاسب كل من يجب ان يحاسب ,ومرة اخرى لا تزاودو على وطنيه اي انسان, فالوطنيه ليست بالاقوال الوطنيه بالافعال ومن واجب كل مواطن يحب وطنه ان يطالب بالتخلص من الفاسدين و الفساد ليحيا الجميع.

طلع مفيش :(

متزكرين لما حكيت نفسي اطير و اجرب اذا في الي جناحات؟؟؟

جرّبت...او تعرضت لموقف اني اجرب - حرفيا -وطلع مفيش جناحين :(

اختكم من اللي بكرهو يأجلو شي و بحبو يعملو كل شي فورا وبايدهم طالعه لمميتي بهالشي :)

برداية غرفة بابا و ماما فالت طرفها و الي كم يوم بشوفها وبحكي بدي اعملها و ماما تحكيلي لا تعمليها اخوكي بعملها او عالقليله خليني اكون معك بس تعمليها, اليوم كنت انا و ماما لحالنا بالبيت و ماما بتتحمم قررت اعملها :)

جبت السلم الكبير لقيته بعيد لان في كوميدينو - الاش اللي زي طاوله و الها دروج جنب التخت بتنحط للي ما بعرفها - و الكوميديو كتير كبيره وما بقدر ازيحها فجبت السلم الصغير درجتين و حطيته فوق الكوميدينو و طلعت لحتى وصل راسي السقف لاشتغل براحتي :)

عملتها وكل شي تماما انتبهت في قريب نص البردايه اشي بدو يفلت ويا دوبك...يااااااااااااا دوبك بميل لازبطها هب...طب....طرت :) و للاسف ولا جناح رضي يرفرف نزلت طب على كعبي و بعديها كلّي لزّق بالارض :(

سيناريو طويل حصل بعدها ما بين ماما تنادي ..... انا ادوخ ..... بابا يجي....ضحك.... تلج.......و وجع .... يا على امك.... و معاتبات كيف اطلع ..... ضحك مره خامسه.....وجع رهيب.....انا ادوخ.....طوارئ.....صور اشعه.....ضحك مرّه تانيه و الدكتور بفحص لاني بس ضغط على الكعب حكيت "أخخخخ" وتزكرت فروحه اللي شبهي قلبا وقالبا و بتحكي كلمات اكتشفنا اني بستخدمها و بتحكي "أخخخخ" وما كنّا عارفين من وين جابتها :) الدكتور بحكيلي اول مره بشوف حد بضحك بس يتوجع :) المهم تبين انها بسيطه وما في كسر ولا شعر و الحمد لله , اعطوني مسكنات و دهون وطول اليوم وانا رافعتها وبعرج لاني مش قادره امشي عليها :)

فاااااااااااااااا الخلاصه......طلع مفيش جناحات :(

مفيش طيران.......

مفيش تحليق......

كيف احتفلنا بمصر :)

مبرووووووووووووووووووووووووووك لمصر

اخيرا فهم :)

تخيّل

علّي الصوت عالاخر

حط السماعات

شغل

و غمض عيونك

و تخيل انك معاهم هناك

في حكي كتير عن اليومين الجايين

ربنا يحماهم و ينصرهم

الله الله يا مصر

مصطلحات قدييييمه

امبارح و انا بجهّز لاغراض المقابله - لسا في سلسلة مقابلات و الشغل بالامارات طلع :( الله يجيب اللي فيه الخير - من ضمن الاشياء اللي طلبوها بالاضافه للشهادات و صور جواز السفر والصور الشخصيه طلبو نجيب قلم حبر و قلم رصاص

كله تمام لعند قلم الرصاص....طبعا و كالعاده عندي اقلام رصاص و برايات و محايات لاني كل سنه بشتري :) عندي هوس بهالاشياء و بشتري وما بستخدمهم بس لازم اشتري

امبارح "بريت" قلم رصاص لاول مرّه من 1500 سنه :)

جد شعور غريب و الريحه و الصوت اشي زماااااااااااااان, و بعدين اجا اخوي بكتب فيه قام "فطعه" و بعدين هو التاني اللي موديل اواخر ال 80 - مع احترامي الشديد طبعا بس انو امبارح خلّص مدرسه - ال احساس غريب صابه بس برا القلم, و بحكيلي برّايتك "فطّيعيه" و مش "بوّيزيّه" و حكالي اخدتي معك "محايه" " نظيّفيه" ويلا لأ

جد كلمات الي زمااااااااااااااااان ما سمعتها و زكرتني بالمدرسه و ريحه الشنطه والكتب ...زكرتني بصاحباتي و ايام حلوه...احلى الايام

تزكرت كيف كنا اول ايام المدرسه محايات ريحتها بتجنن والوان و اشكال و برايه على شكل بيت او سياره ...ما في شهر زمان بتكون البرايه لحالها بدون الاشي اللي عليها و المحايه زي كل محايه قبلها, ما بعرف ليش لازم اخزقها بالقلم ....كل محايه اجتني بتصير فيها دائرة بالوسط و طبعا محيتين تلاته بتنكسر و بتصير قطع صغيره مخربش عليها :)

يمكن لانها كانت ايام بسيطه و كنّا بسيطين واهم شي بحياتنا هو ريحه المحايه و شكل البرايه لهيك كانت احلى الايام!!!

اللهم امين

احنا معاكم...

احساس العجز بالاكتفاء بالمشاهده من خلف التلفزيون بيقتلني و متأكده انه بقتلكم

اكيد في النا دور ممكن نعمله

فكرة وصلتني من صديقتنا المدونه سوزان

ان اكيد في اشي بنقدر نساعد فيه...الانترنت عنّا شغال و في تويتر و فيس بوك و في مدونات .... عنّا اشياء بنقدر نساعد ولو بشي بسيط, بالتعبير عن رأينا ...بنقل الاخبار اللي بتصير ....بالتأكيد على مؤازرتنا للشعب المصري بهالايام بثورتهم اللي متأكده ان باذن الله انتصارهم قريب و حريتهم قريبه

الفكره انّا نستغل امتلاكنا لهالاشياء لتوصيل اصواتنا.... لافكارنا و لكلماتنا و لكلماتهم اذا بنقدر نوصللهم

فكرت باني اتصل برقم عشوائي و اسأله اذا بقدر اعمل شي اساعدهم

علقت على مدونات مصريه انّا كمدونين اردنيين جاهزين لاي مساعده ممكن يطلبوها و انّا اذا بمقدورنا انّا نلبي طلباتهم ما راح نتأخر

نعمل اي شي لحتى نحس انّا فعلا بنستحق انّا نفتخر بانفسنا و انّ كان النا دور و لو جدا بسيط في هذه الثوره اللي بتحصل

ما عندي افكار كتيره غير انّا نكتب تحت مسميات

Jan25

Egypt

و هي المسميات اللي تستخدم في التويتر حاليا بس نحكي عن الثوره

و اللي عندو اي فكره يا ريت يشاركنا فيها

خلي يكون النا دور بدعم الرجال المصريين في هذه الايام

نفسي....ونفسي...ونفسي

نفسي اكون معاهم....نفسي اوقف معاهم في ميدان التحرير و اصرخ و اهتف لحتى يروح صوتي زيهم

نفسي احط ايدي بايد اللي جنبي و نمشي بالشوارع و اصرخ وانادي باعلى صوتي برفض الظلم

نفسي اوزع المي و الاكل.....نفسي افرش الارض و انصب الخيمه

نفسي اقعد بوسط عيله و اضم الصغير بحضني و اسمع شكوى اهله

نفسي اعرف كل واحد وكل وحده فيهم

نفسي امسك الشرطي واصحيله دماغه اللي انغسل و اقتنع بان اخوه اللي قدامه عدو للوطن

اخوه اللي بطخه...واللي بدعسه...واللي برشه بالمي و بالقنابل

اخوه...وقريبه...وجاره...و صديقه

نفسي ارفع على كتافي نعش الشهداء و اكبّر مع اهله و اصحابه

نفسي اصرخ باعلى صوتي

الشعب

يريد

اسقاط الرئيس

ارحل ارحل يا مبارك

ومن هناك

و بعد ما يسقط الرئيس باذن الله و يرحل

اقطع المعبر السحري و اروح هناك

لمكان ما شفته لكنه مزروع بقلبي

احط ايدي بايد اللي جنبي

و يعطيني الحجر و ارميه

و بصدري اصد الطلقات

و يحملوني على كتافهم و يزرعوني هناك

و نضل سوى

هو بقلبي

وانا بقلبه

نفسي....ونفسي...ونفسي