Things I Like To Whisper About

Would You Hear Me Whispering

وانت مالك؟!؟!؟!؟!؟!؟



مع اني مقرره ما اكتب اشياء شخصيه هالايام بس مش قادره اسكت بصراحه
ومع اني قررت ابطل اكتب عن الامور الشخصيه بالمدونه و لكن برضه بدي افش قلبي ومش قادره اسكت

اليوم قررت اصحى بكير شوي علشان اقعد مع بابا وماما لانهم متسهلين بكره على الامارات, من كتر ما حكيتلهم عن الصغار بطلو قادرين يقاومو و فورا حجزو :) المهم اليوم الصبح يا دوب صحيت سمعت صوت حد غريب بحكي, تزكرت ان بابا حكا ان والد جارنا المسافر بدو يجي الصبح يجيب مش عارفه شو لبابا حكيت خلص اجت منه و حطيت المنبه لبعد نص ساعه و رجعت علشان انام, صوت العمو شويتين عالي, بحكي و فجأه وبدون مقدمات من ضمن الحكي بسأل بابا " هي البنت اللي عندك بعدها ما تزوجت؟؟؟؟"
البنت لانه عيب يحكي اسمي طبعا, بابا حكاله لأ , قام رد "لا حول ولا قوه الا بالله, عاد احنا سمعنا انها راحت عابوظبي و تزوجت يلااا بسيطه" بابا غيّر الموضوع وصار يحكي عن شي تاني


مبدئيا مش فاهمه ليش كل مرّه كل مرّه بروح عالامارات اشاعه مغرضه بخصوص الزواج تنتشر, بالشغل كانو يحكو اني رايحه اشوف عريس....رايحه اشوف عريس!!! خير ان شاء الله , بدي اسافر من بلد لبلد لاشوف عريس!!! و هي العمو اللي حاملني عكتافه و حملي تقل عليه بنسم بدنه...وانت مااااااااااااااالك؟؟؟؟ مين انت اساسا لتتدخل؟؟؟ ومين انت لتحكي بموضوع زواجي من عدمه؟؟؟ ميييييييييييييييييين انت؟؟؟ و بعدين "البنت" !!! ما بعرف ليش حسيته بحكي عن الشغاله :$ -مع احترامي الشديد للشغالات - هيك بنحكي عن الشغاله بس نجيب سيرتها...البنت اللي عندكم مغلبيتكم شي .

الموضوع مزعج مش لانه بخص الزواج,موضوع انه يتدخل بالموضوع بشل مش بس بقهر ولكن بنعديها عاساس انه بدافع الحرص زي تبرير مميتي للموضوع مع انها مش قادره تمسك حالها عن الضحك وقتها وانه حاسسني زي بنته ومن هالحكي, بس موضوع "سمعنا انها تزوجت" هاد اللي بجلط...مين انتو وشو سمعتو؟؟؟
كان نفسي افتح الباب واحكي للعمو....وانتو مال اهلكم؟؟؟؟ اذا انا ما عندي مشكله و اهلي ما عندهم مشكله , مرحبا يا ابو جارنا يحمل همي و يتنهد و ينسم بدنه

آل سمعنا آل :(

خلص ارتحت :)

46 التعليقات :

هو إحنا هيك سمعنا برضه بس ما حبينا نحكي شي
و وكلنا العمو يسأل و هيك


المهم تأكدنا من الأخبار
و كل واحد يرجع للتدخل بشؤون الغير، يلا ... انصراف


!!!

ويسبر: خلي أم عمر تطخه... بس برجله!

 

sa7ee7 o ho malo?!!
el3alam 3'arebeen ya a5i..
b3den 3'areeb enno r7ti 3l emirates la tetzawaji? men emta el benet bte3mal hejra 3axeyeh 3shan tetzawaj?!
ana b3raf el shabab bejo 3l jordan 3shan yetzawajo!!! 3'areeb tefkeer el 3alam... ba3dn katraneen elle besma3o hal ayam.. sm3na,, o katraneen elle be2olo kaman
elmohem ennek rta7ti dear,,, wala yhemmek .. tanshehom ..;P
o Estamerri:P

 

أنا جيت امبارح أكتب عن هالموضوع ووقفت ، لأنو نظرة البنت لهالشغلة أحسن من نظرتي ، اللي كان بدو يخليني أكتب عليه انو أمي متضايقة بنات العالم عالسريع بتزوجو ووحدة من قرايبي لسة ما تزوجت مع انو البنت لسة صغيرة، هلا اللي بدو اعرفو انا وين المشكلة اذا شخص تزوج ولا ما تزوج ، حينقص منو شي؟ لأ، حتطلع روحو عالسريع؟ أكيد لأ، في خمسين ألف قضية أهم من فلان وفلانة تزوجو ودخلو القفص الاسود ولا لأ

 

هههههه
على هيك كم مره صرتي متجوزه وفاسخه؟
شي 10 مرات مثلا؟

:))))
لا تشكيلي ببكيلك، بلاش احكي عن مذابحي يا "بنت"
:)

 

كل الناس هيك تسمح لنفسها أن تدخل أماكن خاصة ....
أهم شي إنك ارتحت بالكتابة

 

ولا يهمك يا قمر هى كدة الناس مش وراهم غير التدخل فيما لا يعنيهم بس الواجب كان والدك يقولة كلامتين علشان يبطل تدخلات تانى
وحلو انك تحكى عن حالك وتفضفضى ويارب دايما نسمع عنك سمع خير وربنا يجنبك الحشريين
تحياتى لك

 

الله يسامحك يا ويسبر
هو احنا بنعرف نقعد والا يهدالنا بال بدون ما نحشر حالنا بكل اشي؟؟

عنجد شو دخله , لأ وقال
"
يالله بسيطة
"

هيك خيبتي امله , تسك تسك تسك
عاد لو عرفتيلنا من وين هو سمع , خلينا نشوف من الاساس
:/

بعين الله عمّي

 

ma3lesh ... howwe fi nas men keter ma heyyeh balha merta7 bteblash bi 2esas o hmoom el nas el tanyeh men bab el hewayeh :) ay na3am bdhom dareb bs lel asaf betwajado bi kol makan wel wa7ad beddo ytawwel balo o yetjannabhom

masaki 3asal sa7ee7 :)

 

هههههههههههههههههههههههههههه

و كمان

هههههههههههههههههههههه
اكيد ضغطك صار 180/200

هيك البلد شو بتسوي زيها زي امتحانات التوجيهي و الشغل و دراسة الجامعة و تغير التخصص و تزوجت و لا لسه وهو الناس ليش بتحب هيك السؤال مع انه مش فارقيييييين معهم بالمرة

 

ههههههههههههه
كل الاردن و ماحولها كانت مهتمة بموضوع العريس اللي في ابوظبي كنت بشوف أخبار مصر و بعدين بفكر بعريس البنت!!!
ههههههههههههه

يلا أكيد صحصحت منيح


بس جد لا تزعلي

 

معلش ويسبر...طولي بالك
هو صحيح طريقته مش حلوه وسؤاله ما لووووش داعي

بس هما هيك العموااات...
مش كلهم اكيد...معظمهم:)


ان شاء الله الاهل يروحوا ويرجعوا بالسلامه

 

بييييييييييييييه البياخة.. متى العالم راح تتعلم تهتم بحالها وتترك الناس بحالها..
بعرف شو شعورك مزبوط!! إشي مستفز بصراحة!!
الله يعينك..

 

لا تهتمي ولا ع بالك الناس لما تكون فاضيه بتصير الناس شغلتها خذيها بروح رياضيه يا ويسبر :)
هيك المجتمع عنا بيفكر انه البنت اللي مش متزوجه ضحيه على الرغم انه ممكن يكون عدم زواجها افضل من ظل يبهدلها لكن من وين بدهم يفكروا بهيك
عيشي حياتك ولا تسألي ورب العالمين ما بينسى عباده اللي بيصبروا على اذى الآخرين
الله يصبرك هلى هيك تعليقات ما الها معنى

 

:S :S :S
وأنت قلتيها يأم الويسبر كنت بدي أكتبها بس انتي قلتيها
" وأنتو مال أهلكم" ؟؟
العمى ع هيك عالم
بيحشروا مناخيرهم باللي مابيخصهم
يأخي انا مش قاعدة ع نافوخ أهلك
ومش عم تصرف عليي من جيبتك
ومش مضايقة الكرة الأرضية يعني لتجي تحكي
ومش معطلة الدورة الدموية ببدن حضرتك
ولا حركة الكواكب اتغيرت
فا شو خصهم ؟؟؟شو خصهم؟؟!!!
ويعني الوحده بتسافر لتشوف عرسان مثلاً ؟؟ أما تفكير غجر بصحيح
لو أنا من أبوك ,كان قمت وصفقت وجهو باللي قدامي!!!
ياعمّي لو عظام الناس اللي ماتوا بالقرون الوسطى قُدر لهم ورجعوا عاشوا راح يكونوا أعقل وأفهم من هول
::
أعذريني.. بس انحرق دمي , لأنو بشوف وبسمع عن ناس هيك كتيررر
::
وأنتي ولايهمك , أذن من طين وأذن من عجين, هو صحيح مال أهلهم أففففف
::
دمتِ بخيــــــــر
<3 <3 <3

 

اول شي المهم انك فضفضتي و ارتحتي

و ثانيا ، شو سبب قرار عدم الكتابة
بالامور الشخصية؟

و بعدين عن جد شو هالقصة الطالعة؟ كل من راح على الامارات رايح يتجوز!

 

اهلا
التدخل بشؤون الغير معضلة الشعوب العربية كلها
لايكتفون بمشاكلهم رغم كثرتها بل يقحمون انفسهم في مشاكل الغير دون نفع يرجى منهم
تحياتي

 

فكرك لمى أروح " أنا" ع الإمارات شو رح بتكون الإشاعه؟؟

لوووووووووووووووووووووووووول

 

له له! عاد الإشاعه عنا هون إنك روحتي ع خورفكان، طلعتي رايحة ع أبو ظبي!
الله يسامحك يمكن لو روحتي ع إم القيوين كان الوضع اختلف.

عن جد: باشعر فيه ناس شغلتهم فلان راح و فلان رجع و فلان اتجوز و فلان طلق و فلان مش عارف شو ماله... (فلان هون لفظة عامة تحتمل التذكير و التأنيث).

و على رأيك "وإنت مآآآآآآآالك؟!"،
حل عن الناس و خليهم بحالهم

 

Sheeshany

هو انا اساسا بتوقع وراء كل كلمة "سمعنا" في اسم "هيثم الشيشاني " وراها و شكرا لتأكيد هالمعلومه

حاليا مشغوليين في شؤون اللي بدهم يجو من الخليج اللي معبيين فلوس والهدايا اللي بدها تيجي و العزايم

"سمعنا" ان في هدايا و عزايم و حاله...هينا بنستنى الاسبوع القادم :)

ام عمر!!! ام عمر ما في زيها اصلاطن....انا اللي بعرفها لام عمر...وخده بالك حضرتك :)

Ahmad Merie

Sa7!!!!!!!!! :$
fe3lan fe 3alam 3'arebeh kteeeeeeeeer ...t5ayyal, w men kul 3a2elhom be7ko w kont 2arga3 3al sho3'ol ykoon 2esas w 7akayah ma3moleh w kullo t2leef bt2leef :$ 2al 2eash 2asafer 3alashan 2ashooof 3areeeeeeeeeeees !!!! O_o

LOOOL sa7 kteeeer katraneen w nefse 2a3raf men hommeh 2elly besam3o hal3alam, yes 2erta7et b3ed ma katabet :)
lol 7aaaaaaaaaaader

 

Ahmad Hamdan

في شباب كمان بعانو من "سمعنا" هاي بس البنات اكتر
خالتو قلقانه عالبينت لانه هيك الامهات بالعاده بقلقو على كل شي و كل الناس, بس انها تحكي هالكلام بوجه البنت او اهلها هاي بتكون تدخل مباشر

الاهل بحسو ان مهمتهم خلصت بس هالبنات و الشباب يتزوجو و بنسو رأي البنت او الشب و بنسو موضوع النصيب و بنسو كل شي وكل الظروف , يعني لو متزوجه و دايقه الامرين مش مشكله المهم متزوجه :$

شكلها خالتو بتلمحلك عالبنت هههههه وانت ولا الك دخل :)
او بتلمحلك على موضوع الزواج بس الحكي الك واسمعي يا جاره

مياسي

عشر مرات بالزبط :)
من ال 2002 وانا بسافر
رحت 10 مرات اشوف عرسان...صحيح اني غريبه الله اكبر ولا مرّه زبطت معي!!!!

هههههههههههههههه....بعرف هاي مشاكل مشتركه :)

 

Alirbidi

الحمد لله ...انا عملت هالمدونه اساسا لهيك مواقف لاني بجد برتاح بس اكتب
الناس غريبه فعلا

هبه

مهو بابا حاسسني مبالغه بردة فعلي و حاسس ان العمو كلامه من نابع محبه وانو معتبرني زي بنته مش اكتر :)
كتير بحكي عن حالي هون :$ يلا استحملوني
تسلميلي يا قمر...الله يسمعنا الاخبار الطيبه عن الجميع يا رب
اهلا وسهلا فيكي دائما منوريتني

 

LUNAR.

ههههه هيك فكرك؟؟؟...خلص اذا هلأ بحكي مع العمو و خليه ياخد راحته علاخر و يسأل عن كل اللي سمعه :)

مش بس" يالله بسيطه"
حكاها بكل تأثر و مع تنهيده :(
شوووو بدك!!!!!
يعني الله يستر عالجميع ولاده وبنته متزوجين كلهم خلص ارتاح يا اخي

ربنا بعين

Hb

Ho fe3lan lazem ykon baloh merta7 y3ne halmawdoo3 men zamaaaaaaan 5eles menno ...kul wlado mashallah metzawjeen w m5alfeen lesh beddo y7mel ham el3alam mesh fahmeh ana....bentawel balna shoo warana lanshoof sho 2a5er halkalam 2elly besma3oh :$

Masake 2esh6a ya 7elweh....Miss u here ya amar

 

لا ولا الي دخل، القاعدة عندي لا للزواج قبل ال ٢٨ ولا لزواج الاقارب

 

Khaber

اضحكي...اضحكي :) هلأ صار الموضوع شوي بضحك بصراحه :)
هو بس ضغطي....السكر و القلب و النوم كلّه طار بالعلالي
معك حق...هي وصله ما بتخلص ما بتعرفي ايمتا بتبدا ومن وين...توجيهي ,جامعه, شغل, زواج, بيبي,بيبي تاني, اخ للبنت, اخت للولد وهالحكي ليدخلو المدرسة وبتبدا من جديد

Anonymous

حاسه انه تعليق من "خبر"
برضه اضحكي زي ما بدك :))))

لااااااا اهم شي التدخل بامور العالم بعدين بنصير نحكي بامور السياسه, لانّ الكل مبدع بكل المجالات ما شاء الله

صحصحت وطارت النومه....بطلت زعلانه :)

 

Naysan

طولنا يا نيسانه...طولناه و عرضناه كمان :)
مش الكل اكيد...لكن بعض العموات و الخالتوات و الصديقات....لااااااازم ولا بد يتدخلو من فتره لفتره
سوسه كأنه

الله يسلم عمرك...اليوم تسهلو :(
اشتقت لماماااااااااااااااااااااااااا وبابا اكيد :$

Rain

LOL no fe qanooon raqabeh lazem nemshy 3aleh :D

 

كيكي

ههههههههههههههههههه....بالزبط هاد الشعور اللي صابني :)
كتير مستفز وخصوصا بس ينحكى عنك هيك بنص الكلام و مع تنهيده :$
الله يعينا كلنا على هالعالم

Sozan

الله يسامحهم, فاضيين يسمو بدني انا على هالصبح :(
يعني ما حكا عن الشغل, ليش ما حكا عن اني لقيت شغل او لأ, بس موضوع الشغل هاد اشي ثانوي بحياة البنت اهم شي الزواج طبعا حسب وجهة نظرهم

مش مهم شو بصير فيها ولو كان مش مراعي ربنا في معاملتها...المهم مضبوبه في بيت

للاسف شكلي ضيعت اي اجر بالبوست هاد :( الحمد لله رب العالمين

ربنا يصبرنا

 

Bullet

شفتي بالله عليكي ....
كأني مسؤوله منه و حامل همي العمو....ليش؟؟؟
ههههههههههههههه...هدّي اعصابك يا قمر, شكله الحال من بعضه, بس فشيتي قلبي بزياده :)

الله يعينا شو بدنا نعمل
موضوع تسافر لتشوف عرسان بفقع بيني وبينك وكيف فاهمينها مش عارفه وكيف زبطت معهم برضه مش عارفه :$
بابا حاسه مش غلطان و بالعكس انه طيب كتير لانه مفكر فيي :$
بابا حبيبي حاسسني مزودتها لاني متدايقه

خدي راحتك يا قمر, بالعكس فشيتي قلبي بس انتي ما تدايقي المهم

بوجودكم دائما انا بالف خير والحمد لله
:)

W7l

الحمد لله ...ارتحت :)
لانه اجاني تعليقات كتير بتنتقد اني بكتب عن حياتي بهالوضوح و اشي انه يفضل اني اكتب عن امور بتهم القارئ و امور عامه , غير ان البعض صار يحكم علي و يحدد شخصيتي بكتاباتي فقررت اوقف :)

لاااااااااازم العالم تتدخل...ما بترتاح اذا ما تدخلت, وبشو بدهم يتسلو يعني!!!!

بابا وماما هلأ بالامارات :$ ابصر شو الخبر اللي حينحكى هلأ :)

 

شهر زاد

نيالي بصراحه اني احوز على تعليقين من شهرزاد المدونات :)
هي منتشره بين كل الناس ....بدل ما يحلو مشاكلهم بفكرو بمشاكل الناس, ممكن هالشي بحسسهم انهم افضل حال من غيرهم...مش عارفه بالزبط

اهلا وسهلا فيك دائما

UmMOmar

ممكن يحكو رايحه تجيبي كعك من هناك مثلا :)
او رايحه تخطبي لبيسان
هههههههههه

 

Saleh

انا اساسا رحت عدبي و العين :)
و ابو ظبي رحت مره لاعمل مقابله, هي هالمقابله اللي طلعت هالاشاعات شكله

كانت الخظه نروح على عجمان :$ منيح ما رحت كان ابصر شو حكو

اه الكل بعاني شباب وبنات و هالناس هدول منتشرين و بتدخلو بكل تفاصيل الحياه و كأنه حق الهم يعرفو و يدققو ويتحرّو
ما بصير يحلّو ...ويلا عن شو بدهم يحكو ويتسلو؟؟؟

Ahmad Hamdan

انا معك بالقرارين...و خصوصا الثاني

احنا شعارنا لا بناخذ ولا بنعطي للعيله...اريح للراس

 

3ady ktir.. Ppl hv nothing but spreading rumours.. Not only girls face this, we also do
In summer I went with my mother to visit our relatives in Cyprus, when we came our neighbour asked my mother did u go to find a bride for him!!

 

Tareq

So we both (men and women) are facing such drama in our lives,even about travelling to find our soulmates WOW :D
I liked "for him" .... actually I didn't like that :$

Allah be3een what to do

 

bs ana sabbait fi 3a2ly w 5allaset and it felt good :)

 

LOOL
Good for u ya amar...elmohem tfeshy 2albek bsara7a :D

 

ههههههههههه
هدول الجماعة ما وراهم شي و الله غير مين تجوز و مين خلف و مين جاب بنت و مين جاب ولد .. عنجد اشي بيضحك ..
تخيلي من الشائعات اللي طلعت علي أنا اني خاطبة و مو راضية احكي لقرايبي خوفا من الحسد و دليلهم صورة لابسة فيها خاتم و مع الضو بين فيها متل الدبلة :) :)

يروحوا و يرجعوا يالسلامة ماما و بابا و يكونوا اتفقوا مع اللي شفتيه و عجبك ههههههههه

بمزح بمزح :D

 

I like ur fadfoodah, 3njad elnas bteda5al belly elha o eli mo elha sho eli 7shrhom mosh fahmeh ana!!

 

هديل

اهم شي اهم شي مين تزوج :)
ههههههه اه طبعا وجودك بعيده من غير شر بعطيهم مجالات واسعه للاشاعات, وكمان في دليل !!!! لا لا لا تحاولي تنكري همه بعينهم شافوكي :$

بعرفهم هدول الناس

الله يسلم قلبك يا قمر....ههههههه المشكله لو في ماشي ما بزعل, لكن مفيش منو هالحكي :)

Sheeshany

"سمعت"....برضه بتحكيلي سمعت!!!!
:(

 

Gemini Girl

LOOL Thanks ya amar...I felt much better bsara7a after I wrote it :D

W betda5alo belly mo 2elha 2aktar....2akthar mot3ah belnesbeh 2elhom :$

 

يا شين الناس اذا تكلمت عن شي مايخصها يعني ماسلمنا منهم يتكلمون على هواهم
وكأننا آكلين شي من حلالهم يطلعوا علينا كلام ؟؟

ماعليك منهم وطنشي , واذا عرفتي مين اللي حكى هالكلام واجهيه ليه قال هذا الحكي ؟ ومليون في المية بيقول لك مو انا ومن هذا الكلام >_<"

 

العمو هذا في كل مكان .. وفي زيه كثير بيتدخلوا في حياة الواحد منا وكأنه شايل هموم الكل فوق رأسه ، مابعرف من باب الفضول ولا من باب المسؤولية !! المشكلة عاد في الاحراج ..بدي اروح ارد ع التلفون .. سلام بنكمل بعدين ..

 

White Freedom

للاسف كتار الناس اللي حوالينا واللي بحبو يتدخلو بشؤون غيرهم و بمواضيع ما بتخصهم

ما في حد حاكي ...هي كلمة "سمعنا" بتنحكى حتى تضيع المسؤوليه بالحكي

الله يعينا شو بدنا نعمل

وجع البنفسج

ههههههههه....في كل مكان و حوالينا كلنا

حتى لو من نابع مسؤوليه طريقه الحكي و الموقف مش مناسبين بالمره كانو

سلميلنا على اللي بتصل فيكي :)
الله معك يا قمر

 

حلو والله!!
بحب الناس اللي شايفين وقاحتهم اشي عادي..وحق من حقوقهم على الآخرين..ثقتهم عالية بحالهم.
يعني معلش..بس انت اللي غلطانة..انت مش فاهميتهم صح :)

بحس هاي النوعية من الاشاعات بتطلع بقعدة وحدة خلال 5 دقايق..يعني العيلة بتكون سهرانة وبجيبوا سيرة حدا وبصير كل واحد يعطي تحليل للموضوع والثاني بزيد عليه والاولاد الصغار كمان مسموحلهم يتفلسفوا..وبطلعوا بالآخر بالنتيجة العبقرية زي اللي سمعتيها

 

نورت ...نورت :)
اهلا وسهلا يا قمر

عادي جدا و من حقهم كمان و الغلط اني اتدايق كمان :$

هههههههههه زكرتيني بقعدة بعض الشباب و الصبايا عنا بالشغل, هيك بكونو خلال وقت شرب القهوه 4000 اشاعه و قصه و حياة خاصة للناس بتنجاب و بتتألف

و بالاخر بتطلع....سمعنا :)

 

نحن ابناء أمة العرب حلينا كل مشاكلنا وما تبقى إلا فلان ليه ما تزوج وفلانه ليه ما تزوجت !!!! لنا الله

 

Ahmad_k

العجز عن حل المشاكل الشخصيه بتدفع هالعالم ليشغلو حالهم بحل -ما بمنطقهم و من وجهة نظرهم - مشاكل غيرهم