اللي بدها تتستر... تتستر

الصيف هاد مناسباته قليله نوعا ما, و الي فترة حابه احضر حفله مع اني بالعاده بندم لكن اشتقت للحفلات, و صدفت الخميس يكون عندي 3 حفلات 2 خطبه و زواج - عقبال عند العايزين - رحت عالخطبتين و للاسف ما قدرت اروح عحفلة الزواج لانه الخطبه للقرايب و الزواج لاخت صاحبتي, مع اني كنت كتير حابه اروح :(

هلأ احنا باعراس خواني اجو ناس قرايب - سكان عمان - ونامو عنّا بالبيت, و للحق كنّا فرحانين بوجودهم, يعني عجئه البيت ما بتتأثر بوجود ناس اضافيين, و بما انه بابا - مع انو مش اكبر واحد بخوانه - من اول ما تزوج حكا لمميتي انه العيلة بعتبروه كبير القوم " وكبير القوم خادمهم" فالكل بالعاده بيجي و بنام وبلجأ لبابا وخصوصا ان تيتا - الله يرحمها- كانت ساكنه عنّا, المهم هلأ خطبة بنت عمي, وبرضو الناس اختارت تيجي تنام عنا :) حجتين كبار بالعمر, بس حكياتهم وقصصهم بتجنن فماشي الحال


الخطبه الاولى لوحده من قرايب مميتي و الخطبة التانيه لبنت عمي, فبابا طبعا صرعنا رسمي, هلأ هو ما بدو يتأخر على خطبة بنت عمي واللي بتبدا بعد الخطبة الاولى بساعه, فخلانا نطلع عالخطبة الاولى بكير و كنّا اول الواصلين :$ بس الحمد لله بنت خالي اجت بكير و قعدنا ندردش و حكيتلها عن موضوع شاغلني حاليا واعطتني نصيحه كتير فادتني الحمد لله, كأنه مقدّر اروح بكير و الاقيها :) المهم الخطبة الاولى مشيت وكلو تمام و بابا اتصل بالوقت المناسب اللي كنّت بديت املّ من الحفله.


روّحنا عالبيت و غيرنا و طلعنا عخطبة بنت عمي, كل شي تمام و عيلة العريس الكل تقريبا لابس عبايات, و قاعدين وماشاء الله عليهم, وبس بدت الموسيقى قبل ما يدخلو العرسان و نزلو قرايب العريس عالبيست, تقريبا 90% منهم لابسين لبس اقل ما يمكن اني احكي عنه انه "بخزي" يعني في خط بين اللبس الحلو اللي بتفشي قلبك فيه اسمه الحفله مش مختلطه وبين اللبس اللي بتشوفيه و بتحكي مين اللي بترضى عحالها تلبس هيك لبس, اشي مقزز بصراحه, مرة اخوي بتحكيلي " بدي اسألك...هدول قرايبكم؟؟؟" حكيتلها " اطلعي على وجوه قرايبنا اللي سلمتي عليهم بتعرفي :) " الكل منصدم, حتى فروحة حبيبتي منصدمه, هلأ بتحكيلي حرية شخصيه, بحكيلك ماشي بس ما تتعدى على حريتي انا, وحتى دينيا في حد للبس بين البنات و الاخوات متجاوزين الحد بنص متر :$ اشياء غريبة عجيبه, احلى شي بس وقفت الموسيقى كلهم قعدو على طرف البيست, يعني مش هيك عرض العرايس بصراحه, مرة اخوي بتحكي " ايتها الام..انتبهي شقفه على الجدار " :)

هلأ كل هاد بنحاول نبلعه مع انو ما بنبلع, اجو العرسان والبنات لبسو وقعدو , المؤسف انه بس رجع العريس للمرة التانيه للحفلة, المسؤول عن ال DJ اعلن ان العريس بدو يدخل الصاله و حكا " الستات اللي بدها تتصتر تتصتر" تتصتر= تتستر , ضحكنا عالكلمة وعلى انو كيف يعني اللي بدها, وطلع معو حق لانه في بنات ما بدها, لبسو البنات العبايات وماشاء الله عليهم , لكن مجموعه منهم بس لبست العبايه بدون ما تسكرها , و رمت الحجاب على شعرها و صارت ترقص حول العرسان, وكل شي بالشارع و العريس المسكين يغض بصر و يلف وجهه, والحجاب يسحول وترجع ترفعه ونص شعرها مبين, جد اشي مقزز


ما بعرف هالامهات اولا و هالبنات كيف بفكرو , وكيف بعتبرو حفلات الاعراس فرصه لعرض هالبنات بهالطريقة المبتذله, يعني ماشي اعرضي حالك بس بالعقل, ترتبي و بيني حالك انك نغشة و اطرشي وجهك لتبيني بيضا وشقري الشعرات و البسي عدسات, ماشي بغصب حالي و ببلعها..... بس هيك...جد كتير

ملاحظه عالهامش..... ما بعرف ايمتا عماتي بدهم يبطلو يسمو بدني بطريقة تعبيرهم عن محبتهم الي بانهم يصيرو يدعولي بابن الحلال و شوي وبدهم يبكو علي اني مش متزوجه وبناتهم و بنات عمي الاصغر مني بتزوجو :( جد بحسهم بشحدو علي... صحيح ببتسم و بشكرهم عاهتمامهم ومرات بحكيلهم انه نصيب واذا في نصيب حيجي بوقت ما ربنا كاتب ,بس جد بسمو بدني , ومهما ماما حاولت تقنعني انه هيك طريقتهم بالتعبير عن محبتهم ما بهون الموضوع, وما بصدقو اني بكون فرحانه من كل قلبي بحفلاتهم و اني بس اشاركهم فرحتهم ابدا ابدا ما بتكون مجامله... بنظرهم المفروض اقعد عجنب و احط ايدي عخدي و اندب حظي :)