سلسله عرسان - الحلقه 11

قبل شهر تقريبا اتصلت فيي صاحبتي بتحكيلي ان في جيران الهم كانو سكّان الكويت و وقت الحرب اتفرقو وانهم جديد تلاقو معهم و عندهم شب بدور على عروس, الشب مقيم في كندا و لسّا ما اخد الجنسيه و عمره مناسب وضعه المادي ممتاز و حاليا بدو يسجل بالجامعه يكمل دراسته, و بشتغل بكازيه للعيله هناك.

المعلومات مبدئيا ما فيها اي مشكله, المشكله بدت بس حكتلي ان الشب اصله من غزّه وسافرو من الكويت للعراق و بعديها لكندا , وان الشب ما بقدر يدخل الاردن حاليا الا بس يحصل على الجنسيه الكنديه, واله كم سنه ولهلأ ما حصل عليها, و المشكله الاكبر اني المفروض اتعرف عليه عن طريق النت, صوت وصوره عالنت, وحسب ما قررو الجماعه انه اذا صار موافقه, انه يبعت وكاله لاخوه اللي تزوج وحده معها جنسيه كنديه و اعطته اياها و اخوه يكون وكيله.

ما بعرف اذا في حد ممكن يوافق على هيك شي, بس انا اكيييييييييييد مستحيل اوافق, يعني اذا بكون العريس رايح جاي عبيت اهل العروس و بتقعد معه اكتر من 10 مرات , ومع هيك مرات بتكتشف البنت انها ما بتعرف اشي عن الشب و ياما سمعنا قصص و عشنا قصص زي هيك.

حكيت للبنت عن رأيي وحكيتلها برضه لازم اخد رأي اهلي بركي عندهم وجهه نظر غير, المهم حكيت لماما و كان عندها نفس وجهه نظري و فورا اتصلت بصاحبتي ونهيت الموضوع.

امبارح صاحبتي اتصلت فيي, بتحكيلي ان اهل العريس حابين يزورونا بالبيت, و اول مره بنبسط ان اهلي مسافرين - من غير شر عنهم :( - المهم حكيتلها ان اهلي مسافرين وما في مجال يجو, وسألتها اذا وصلتلهم جوابي بالمره الاولى, حكتلي اه و الجماعه مصرين يشوفوكي قد ما حكيتلهم عنك, شكرتها و حكيتلها طول ما هو ظروف الشب ما تغيرت بصراحه ما في نصيب.

قامت عرضت علي عرضهم التاني, وهو انهم يجو على الشغل ...

سألتها..يجو!!! من اللي يجو؟؟ بتحكيلي ام العريس و اخو العريس :)

حكيتلها ليش يعني؟؟؟ بدهم يعاينو البضاعه؟؟ يعني بدها تيجي الام و تشوف اذا بعجبها الشكل ويلا لأ و يجي الاخ على اساس رأي شب ياخدو بالمره؟؟؟ بصراحه انقهرت و عصبت على صاحبتي و حكيتلها انا بالعاده اذا العريس ما اجا و قعدت معه اشوف كيف بفكر و كيف بحكي ما برضى اشوف حد فكيف كمان انه يجي اخوه و يقعد ينقد الاخ فيي؟؟

حكيتلها احكيلهم ما في نصيب, واذا النا نصيب ربنا بيسر امور الشب وبقدر يجي عالاردن و ساعتها ممكن اقعد معه علشان اتعرف عليه و اقدر احكم اذا كنا مناسبين لبعض او لأ.

اليوم اجت صاحبتي تعتذرلي و تحكيلي مش عارفه كيف كنت افكر لمّا عرضت عليكي لموضوع, وبصراحه الشب كتير منيح وانا واهلي بنعرفه وبنعرف اهله من زمان وحسيت انه مناسب الك, بس فعلا ظروفه مش مناسبه بالمره, و بس :)

ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع

الحلقات السابقة